LIBRARY OF KAPAMPANGAN POETRY, page 9 - Ernie C. Turla, president of the Akademya ning Kapampangan USA, curator - Languages

Table of Contents:
1. Queng Ardin Ning Tigre
2. Queng Ardin Ding Tigre
3. Ing Pacung Malati
4. Cabait Ning Anac
5. Nung Metung Tana Salita
6. Queng Api Ning Pamisulu
7. Doble Cara
8. Ing Ustu Queng Oras
9. Nung Mapamintu Ca
10.Ing Capagpasencian
11. Ing E Mamayad Utang
12. Deng Bayaning Piloto
13. Ing Bengador
14 Pintatubo, Perwisyu Ca
15. Dalit Ning alang Panaquit
16. Ica

QUENG ARDIN NING TIGRE

In The Garden Of The Tiger can be taken either literally or
figuratively. For in any place where there is fear of danger
lurks a tiger. The poet used the tiger to represent danger,
and the garden, to represent any alluring paradise where
one should not dare tread. The two poems just tell the
same story, and the writer probably wrote them at different
times. BTW does anyone remember William Blake's Tiger,
Tiger burning bright, in the forest of the night....
- Lucy Galang

QUENG ARDIN NING TIGRI
by Ernie C. Turla

Queng ardin ning tigri / nung nu matanaman
Queng busal na nitang / maberding caquewan
Lislis mu ing bulung / malabung papampan
Macapangaligquig / quecang atingiran

Manaquit cang mabie / a gulis-gulisan
Tanda ning piligru / at ning camatayan
Asilip mu'ing buangis / a caya sisimpan
Careng mataram nang / cucu ampong ipan

Lacuas na pa potang / asque yang danupan
At maintun yang mabie / laman a laclacan
Macalunus-lunus / ya'ing cayang atiempuan
Pacabsian neng ustu / queng cayang catawan

Cabud mebalag ing / silim ning cabengian
Adua lang mata reng / queng dulum quiquinang
Apat la reng bitis / gugulung queng canan
Matilus lang patsit / deng sabic maniagpang

Ing ardin a berdi / maguing malutu ya
Queng daya ring mabie / ing tigri pete na
Ania e ca lulub / sayang ca rugu bie
Queng ardin ning tigri / mete ing tagumpe

QUENG ARDIN DING TIGRI
by Ernie C. Turla

Queng ardin ding tigri / e ca bisu-bisu
Ba cang queng piligru / ali mipasubu
Pangilagan mu lang / tigri acatabnu
Ania angang binit / lisia cang parayu

Misan linislis cu / ing bulung ding saguin
Asilipan cu la / reng carelang cuting
Sususu la quetang / inda rang matudtud
Migpaltitica cung / minatras na cabud

Buangis la ichura / sidsad la queng bangis
E mu la alelen / pilmi cang maquinis
Patsit dang matilus / patia sigpang daca
Nanu pang gawan mu / para mitacas ca?

'Nia nung e ca bisang / gawan dang abacan
Deng tigri lacuas na / tague lang danupan
Eca lapit-lapit / at e ca papaquit
Misan daca dacma / ditac mung penandit

Uling alang ligtas / calub mu teya me
Ing bie mung daralan / anti me mong pamie
Ania iwasan me / ing ardin ding tigri
E mu na pangangas / matapang cang dili.

ING PACUNG MALATI
by Ernie Turla

Atin ne ping armas para paquiguera
Iting cayarian a macualtang-macualta
Careng casalang nang bisang lusub caya
Ania queng lugal na magsadia-sadia ya

Cailangan ne-ing tau anti mong sundalu
Mangailangan namang metung a cabayu
A mangailangan mu namang patus pala
Oneng ing problema ing pacu yang ala

Atin na mong taung mecuang magsundalu
Macananu neman nung alang cabayu
Cailangan neng saquen potang queng labanan
Nung ali masambut ya careng casalang

Ngeni ing cabayu mangailangan ne man
Patus queng bitis na para mulai yan
Oneng naman pala obat alang pacu
Mecalinguan ya-iti neng malati ya mu

Queng uli na mu ning pacung queilanganan
Mesambut ya rugu iti queng labanan
Ing moral na niti macualta ca pa man
Dapot ing malati adian nacang sican

Maralas queng tau yang bague malati
E na papansinan panatag ya bili
Ing mung isipan na itang mangaragul
Anti mong lamesa o caya paradul

Ania e ta sana mangaring maquiapus
Quening cayarian a macalunus-lunus
Ot queng cacualta na papaisambut ya-iti
Qng uli ning pacu calulu nia ngeni.

CABAIT NING ANAC
by Ernie C. Turla

Deng ngang anac canu nga ning mababasa
Casapuac da pa mu queti qng masala
Macayungyung nala queng matsurang gawa
Tambing nong mamampit queng maroc bitasa

Ania pin ing anac cabud dinapat ya
Queng e ustung bague sucat amanuan ya
Malambut prumeru, masias potang cai
Queng sias na ning buntuc, iti magcompormi

Dapat yang ambernuan yusuc queng macatud
Yayus yang matulid queng landas ning birtud
E ya papaburen misacab mitaquid
Tairan yang maigpit ban e mipaidpid

Nung magculangan la talab ding amanu
At alang dionabis saslag a apectu
Tampan ya qng buldit ba yang mitacutan
E mu sana iti masiadung masican

At nung pulpiaru ya pipilit na-ing caya
(Ing anti caniti queraclan amana)
Canita ya pamu magamit ing lande
Pamarug, e mu sa miraras maglate

Uling ustu canung mengarapat na ngan
Ing sablang mialiwang sistemang paralan
Para salese ya ing anac a pilyu
Dapat yang pasacban at barugan ustu

Para atuntun ya ngara reng mangatua
Gamitan ya 'ing barug e na bali ing lua
Alang cusintirul quiquiac a pengari
Nung queng disiplina tutupad la reti

NUNG METUNG TANA SALITA
by Ernie C. Turla

Cabud mepanat la ngan deng / quecatamung mal a sabi
At metodas la ngang gulpi / anting digpa na ning alti
Cabud metahimic la ngang / limbug queng masala reti
Anting reina neng migwagui / metung nia mu ing lenguahi

Neng ing bansa metung ya mu / ing buri nang magtagumpe
Para queng pamisan-metung / bibitbitan neng masese
Queng gastus da ren ngang sabla / deti ilang miyuyugse
Ban magluid ya mu 'ing lenguahing / paglualu rang masalese

Ing estadu anti ya 'ini: / deng bitis ning Pilipino
Macatuclu la queng pago / ding Bisaya't Ilocano
Anti murin deng mang Bicol, Pampangueno, Pangasinan
E la macasampa reti / queng bacud ning caunlaran

Siempre e la maca-uquiat / macapatanan lang ustu
Careng bitis ning que babo / a magbiba't sasaludu
Metung ya mu'ing mitaluctuc / mitauli la ngan deng sabla
At layun lang suncad namung / mawala bie queng masala

At canita mibastag ya / caburian ing bansa tamu
Neng metung nia ing lenguahing / paliguan dang Pilipino
Ing paninap na metupad / dapot nanu naman caya
Ing coseciang paqui-arap / na queng yatu cabang-caba?

QUENG API NING PAMISULU
by Ernie C. Turla

Dagdagan yu ban lumambat / mitatau ing panangab
Queng api ning pamisulu / macacentru que libutad
E ta mu sa papaburen / maguing dapug namu iti
Uling capalipalian pa / ing macalud ngening bengi

E ta ya sa paningningan / panatilian ta'ing calabcab
Tabi tamu iting dimlang / sasalaque anting atab
Ban ing pali na ning diwa / magparayo queng caladua
At miguising caring malda / careng anac at mangatua

Discursu ta'ing calinangan / careng tipun tang poecia
Careng curirung abasa / o ayalben a cumidia
Careng sarsuela nang Soto / careng pulosa't basultu
Penimunan nang Manacmul / at sindu nang Totoy Batu

Mipaglibe tamung biru / e mu macapanandaman
Mipanula tamung bugtung / anti ustung bulaclacan
Samantala mimilup tang / tsuclating mapali-pali
A mebati queng batirul / at macaguiam anting dati

Deting ningnang a camuti / at mais a ating busal
Maniaman lang quiquinisan / ing pali ra babie sasal
Nung wari sa't matical ca / milaco ing quecang pagal
Pamisulung anti iti / guintu, pilac queng cacamal

Ing mag-camping macawili / at metung neng sancan ini
Campfire a paliguan da / reng boy scout ilig da'iti
Lumual maglibut marayu / nung nu ing angin a prescu
Asangap da at mipasno / la panamdam pihung-pihu

Pero ing pam'yabe-abe / lalto ngeni quecatamu
At ing tulang abibie na / misusulit anting premyu
Samantalan ya'ing penandit / magmasaya tamung bina
Ing lubus pamica'intindi / queng anti'iti ya macucua

Macaporma tang mabilug / circulo tang mayayaquit
Careng batwin a que babo / durungdung at magumasid
Pupugayan da ing lalto / pamisasanmetung tamu
Ing bulan man titiman yang / anting pulut queng cayumu

Potang matatda na'ing api / at bisa tanang painawa
Ticdo tang macapatulug / gamat tamu sable tala
Queng pago ring cayagape / taid-taid tang magcanta
Caibat layun tang pasilub / careng cubu tamung tolda

DOBLE CARA - a tongue twister
by Ernie C. Turla

Ating tapang pangilagan / neng lalacad ca queng dalan
Atin namang tapang asan / a yuyulam neng mamangan
Ating aping gagamitan / da queng samat a mamaman
At ating mu namang api / queng samientu sasamutan

Ating mitataung api / at ating maputing api
Ating sisi queng quilub mu / nung damul meng saria'ing sisi
Ating tula careng tau / ating birung babie tula
Atin tubu ing magtinda / careng tubung labatiba

Ating dalan careng saquen / at careng taung susuba
Ating namang queng bilangan / limang dalan alimbawa
Ating bulan a Enero / ating masala ya'ing bulan
Ating aldo saslag babo / ating aldo a mumuran

Ating masaquit a sugat / at taung alang masaquit
Ating pasienting masaquit, 'ting masaquit pagaralan
Ating susung pupulutan / ating susung babie gatas
Atin yang sicu ing gamat / ating sicu queng tanaman

Ating bancu careng pera / ating bancung luluclucan
Ating galun a panyucad / ating galun a pagrancu
Ating lasu para queng buac / ating lasu careng dila
Ating tau neng magpiesta / para canan da reng tau

Ating pila careng flashlight / queng gabun man ating pila
Ating apa queng quisquisan / queng sorbetes ating apa
Ating sasala queng clasi / ating aldo a sasala
Ating banuang milalabas / ating banua babo biga

Ating basan a panguscus / nung queng danum me'iti basan
Ating librung para basan / ating imalan a basan
Atin yang balag ing opu / Opu, balag que'ing bunga na
Ating utang a bayaran / at utang a sususuan da

Ating picu careng mangga / ating pangulcul a picu
Ating istambay queng cantu / deng sarsuela 'tin' lang cantu
Atin yang cucu'ing masaquit / pututan mong cayang cucu
Ating pacu careng pasu / at pupulpucan a pacu

Ating tabla mu queng sugal / gawa yang tabla ing bale
Atin yang lugud qng pusu / queng pusu na sepupu ne
Ating tarat careng pera / ampong tarat careng cuayan
Ating cubang macabucut / at cubang asung cacanan

Ating bau careng byulin / ating bau ing pamangan
Atin yang balas ing baril / ating balas ing samientu
Ating yang bacal a cualta / atin yang bacal a palang
Dacal la reng lupa-lupa / dapot e naman pareu.

ING USTU QUENG ORAS
by Ernie C. Turla

Ing canung manayang / alang panenayan
Daig ne pa'ing muting / queng cayang cabilian
Lupa ning manintun / alang panintunan
Queng yang libutad ning / cadalum-duluman

Ustung e siniput / ing quecang pagnasan
Queng picayari yung / oras a paniatang
Mababating mu at / mangapanialaula
Sayang a oras dang / aibie queng aliwa

Alimbawa na mu / queng lupung o "meeting"
Ing mayayatrasu / e binang masanting
Nung madisoras ca / agad mu sang sabian
Ban deng manenaya / balu ra cang tantian

Nung tau cang ating / responsibilidad
Queng quecang casabi / pa'intindi mung agad
E me bibili queng / medyu miquelangan
Ban ing panaun na / e muling masayang

Nung namang ica ing / taung mangumbira
At balang e tauli / reng quecang bisita
Quesa queng alas tres / alas dos meng cabit
Deng namang tutuntun / ilang mapirait

Tuclu ca queng oras / anti queng pisabi
Ing relo mung sulud / nanu nia mu iti
Ing "Filipino time" / matsura yang gawi
Queti America / dapat neng tabili

Ania nung talagang / e ca macaratang
Qng pauli na ning / biglang mica-sancan
Deng cataratus mu / agad mong tapatan
Queng talepanu mu / ausan mo't pabaluan

Ing oras ning tau / quintu queng cacuenta
E bague panugse / anti queng basura
Sucat nang gastan queng / bague maulaga
E no sasayangan / oras deng abe na

Ing ustu queng oras / yang sucat tang gaywan
Ban alang miquique / queng bitin ninu man
Ya ing panyucad queng / birtud na ning tau
Responsibilidad / ya ing cayang lagyu

NUNG MAPAMINTU CA
by Ernie C. Turla

Nung mapamintu ca / nga na ning casebian
Deng ngan canung pasbul / abuclat mu la ngan
Uling queng gamat mu / susi yang tatalnan
Ing birtud mung sinup / ya'ing cala-alangnan

Masilbi yang bague / careng maintun obra
Careng opicina / planta o pabrica
Ustung mag-apply ca / cabud abalu ra
Agad cang matangap / nung mapamintu ca

Uling nung balu rang / e ca mareclamu
At tutupad ca queng / angang reglamentu
Magcatiwala yang / quecang palsuneru
Casdan mu agad cang / micatas pa sueldu

ING CAPAGPASENCIAN
by Ernie C. Turla

Ing mapagpasencia / mamunga yang suerti
Queng ngang sablang bague / sanac tana iti
Ing capagpasencian / nga ra ping sasabe
Ya ing indu na ning / nanu mang tagumpe

Bastat sigui-sigui / miras ca rin carin
Maglislis cang tacde / labanan mu'ing angin
Masucsuc a dalan / a bicual-bicual pa
Ayalsutan mu'iti / ditac mung aguanta

Capibabatan ing / sucat mung tandanan
Banting upayang ing / quecang paquicuanan
Acua meng atupad / at layun meng dasan
Iti e bibiru / guintu yang casebian

ING E MAMAYAD UTANG
by Ernie C. Turla

Yang asung matudtud / e ya guiguisingan
Ba yang manatili / lubus cataimican
Marayu yang caung / manget o maniagpang
Iti picabaluan / guintu yang casebian

Mengari yang taung / agad pangilagan
A e ra man buring / asasalubungan
Deng pawa queng awad / at pamagdelencia
Ban macainum lang / alac o cerbesa

Neng magagawi la / reng taung e sadia
Queng doc da ugali / reng alang cocesia
Madadala la ngnang / paparam carela
Cualtang pegobra rang / e na misubli pa

Ot caya atin ping / quewalan marine
Gagawang garapal / at e sunis queng bie
Mamiasa, magtacsil / e mu apanualan
Pagcatiwala ing / bie mu at pibandian

Caluguran daca / ustung manandam la
Culang namu reti / e ra ca uman pa
Pero caibat na ning / aldo cabucasan
Managalan naca / 'la nacang asahan

Salicutan daca / e mu no aquit man
Camtan mu'ing perwisyu / 'ning macasalanan?
Neng pepabilug ca / buntuc careng pilyu
Linto cang picailian / mabilug a yatu!

Ing daptan mu namu / neng mepirait ca
Sias me ing pusu mu / lunus laco mu na
Maliban mu abe / nung macapihu cang
Ing paparaman mu / biasa yang manutang

Dinan da cang payo / queng mismung cutang cu:
"Nu mong gulpi na cung / silput arapan mu
Ibat queng marayu / para magnegosyu
Ot e na mu caya / queng mismung baryu cu?

DENG BAYANING PILOTO
by Ernie C. Turla

Bibyung la que babo / sisyuc queng cabilis
Cabud queng tetagan / ala lang caparis
Carelang piloto / daig de y Evel
Teya ra ing bie ra / tune lang "dare-devil"

Ara nang mig-circo / at mig-dive queng angin
Cambe ning lapitpit / rapidu ring machine
Deng contra que lalam / Hapon a calaban
Metodas lang ustu / ala nang mitagan

Cauli ra reti / seganan dong banda
Bilang bayani qng / bansang linigtas da
Inarap do reti / lalam ning bandera
At layun inonor / sebitan medalia

Maglaco tang cupia / at saluduan tala
E mistulang bague / itang depatan da
Lusuc queng ulaga / ing nobli rang guewa
Oren deng bayaning / cailangan ning bansa

ING BENGADOR
by Ernie C. Turla

Ing mua na cayarle / micalucung silab
Queng paling sisigpo / at micacalabcab
Danum ating yelu / ena agyung patdan
Neng pigtacsilan de / abe nang tulisan

Calual-alual napa / niti queng suculan
Nung nu ya meculung / labing-aduang bulan
Tintu na queng lub na / ing maghiganti ya
Babalan nong ustu / reng migtacsil caya

Cabud cabalic na / queng bar ya tinaglus
Ing cayang isip at / caladua'ing mumutus
Manyingil yang utang / careng barcada na
Detang cayang abe / migturaidul caya

Menamun yang duelo / queng arap-arapan
Baril na mayan ya / queng cayang caluban
Neng queng cabeluan / na pisasapacat de
E na agyung dalan / dusang caya mique

Ing pali na buntuc / magbabo queng sabla
E na apiguil ing / bucal ning cayang mua
Deng apat a matun / a cayang amunan
Pesitalacad la / anda queng barilan

Begut ne'ing baril na / e bisang mi-unan
Quildap ya queng bilis / queng cayang calbitan
Deng cayang calaban / mitamacnan la ngan
At layun mitomba / queng arap-arapan

PINATUBO, PERWISYU CA
by Ernie C. Turla

Lacsa-lacsa ing perwisyung / pesari nang Pinatubu
Vesuvius yang micapali / buangis lupa at micasbu
Penambunan na ing sabla / pisamban escuela't bale
Timbac na'ing burac queng dalan / at quinalat queng marangle

E re balung bulcan pala / pitung siglo yang matudtud
Busuc-busuc ya prumeru / memacbung nia cabud-abud
Quilualan yang lahar, balas / sinabug nang atmu catas
Quinarag yang meto yatu / metimpla ing cayang lacas

Queng capal ning alicabuc / capisacan ing miliari
Ing aldo limbug niang gulpi / queng dalumdum meguing bengi
Pesibacweit la reng sabla / meliswas la't metaranta
Bastat miligtas la mu sa / at micabus queng sacuna

Deng balugang taung bana / dalangin da paclud-paclud
Queng carelang pangabigla / at sinupil a quilabut
Ing dios ning carelang bunduc / a yapin yapung Maliari
Ing bagsic na bignus na ngan / nga ra reng taung sasabi

Iniang linino ne'ing lugal / macalunus ing iquit da
Deng carinan ding calulu / queng lahar mengatacpan la
Ing pisamban qng Baculud / mitambunan ya'ing lalam na
At ing balen ding macudta / rugo obat mebura ya?

Nung balu ra sa canita / ing perwisyu migmula pa
Uling banua-banuang cauran / ing lahar mamagus pala
Maluluslus matalustus / at queng agus mipupunta
Mitatambac careng ilug / a mebabo qng uli na.

Lalbug queng bulus malalam / deng marangle ampong dalan
Neng lalapo la reng ilug / aguiang baguia pa minuran
Ing danum a mititipun / alang sapang pidalanan
Para muntang lual queng dagat / iti minie casaquitan

Nung sang liplap da queng draga / antemanung indat atin
Me-agad sa, e na icuang / quinapal at mesias carin
Ngeni nanu'ing mararapat / neng deng ilug mibara la
Pane namu rugung lalbug / Pinatubu pasari na

Ania ngacung magsalita / Pinatubo, perwisyu ca
Ica'ing metung a sabagal / queng probincia panyulung na
Sisiran me paintungulan / ing balen ming pacamalan
E na caman wala parti / ot e ca marap albugan?

ING DALIT NING ALANG PANAQUIT
(based on Wm. Ernest Henley's "Invictus"
by Ernie C. Turla

Malalam bengi / ing tatacap cacu
Pisac ngan ing quening / macapatulug cu
Salamat na mu queng / ninu man ing guinu
Atin cung caladuang / e mapagreclamu

Queng tituc da cacu / ala cung suat queng bie
Alang paguinaquit / ni saingsing a babie
Ing calma tingap cu / at e cu susucu
Maplas man queng lub cu / e cu bisang ducu

Queng lalacaran cung / landas ning mua at lua
Cambe ning oras a / dasan da reng malda
Ing sisilim mecad / e cu na pansin man
Nung ania datang man / e cu pitacutan

Ania e na bali / potang queng tucuran
Lista queng parusa't / cacung casalanan
Acu ing magmandu / queng suerti ning bie cu
At anti murin sa quening caladua cu

ICA
by Ernie C. Turla

Icang balang misip, ica ing magplanu
Nung iti daptan mu o tuagan mu namu
Ica ing gagawa queng mismung isip mu
Nung bisa cang muna o tauli naca mu

Nung matas ca puluc at bisang minawa
O nung magbacutcut na ca cabang-caba
Tangapan, ali mu, payu caring sabla:
"Tyu queng caburian mu - ica casing bala

Nang paninapan mu? Maguing butangero?
O taung masipag anting ortelano
Tiwalag ding malda o picasaban da
Pulubi, tulisan, lipit o macualta ?

Curung o alistu, o mapagpabaya
O mapagprisigui, ica mu ing bala
Samantalanan mu icang magdecisyun
Nung magpate-pate ocaya sumulung

Alang mamatustus queca qng paitas ca
Alang pamulagat careng quecang mata
E ra ca pilitan sumulung o matras
O manatili nang pante angang bucas

Bali pialung ya'ing bie at ica'ing maquibat
Nung baritaclan ca o matinu dapat.
Ing suerti e pihu 'nia pamilmi mu na
Nung bie mu'ing agyu mu o magpaticut ca

Ania tandanan mu diquil queng ambisyun
Libri cang mamili, bandi mu 'ing panaun
Maganaca, maimut malpa o malacas
Tutuntun queng mayap, o lalabag batas

Salaula queng dangal, sisicap queng puri
Deni cutang la ngang paquibatan ngeni
Macayapag queca pipamilinan mu
Icang gagawa queng quecang pangatau

For more poems, go to the next page:
http://maxpages.com/poecia/poecia10

To go to the previous page, click:
http://maxpages.com/poecia/poecia8

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 01705

Page Updated Sun Dec 25, 2005 9:55pm EST