LIBRARY OF KAPAMPANGAN POETRY - PAGE 75 - Compiled by Ernie C. Turla, president, Academia ning Amanung Sisuan, Int'l. - Languages

Table of Contents:
1. Kakandut a Poesia - Paeng
2. Cacandut a Tuglung - RBA
3. Cacandut a Poesia - Jose Roman R. Laquian
4. Cacandut a Diwa - Carlos M. Castro
5. Kang Sally - Pidong Rivera
6. Acalinguan Daca Wari? - Jose Roman R. Laquian
7. E Raca Acalinguan - Paeng
8. Qng Baryu Cung Quebaitan -
9. Matwa - Paeng
10.Paing - Pidong
11.E Ku Akalinguan
12.Nung Atatandanan Mu - Paeng
13.Pangabait Ning Pungul Inosenti - Jason
14.Misan Bening Mabatwin - Jose Roman R. Laquian
15.Ing amanung Kapampangan - Carlos M. Castro
16.Nung Metuctuc Cang Ubingan - Renato B. Alzadon
17.Gisingan Mucung Abril - Renato B. Alzadon

Kakandut a Poesya
Paeng

Ay salamat Kakang Ernie, melino yang lalu kaku
ing buri yung sabyan keti, miyayaliwa ta balu
ining kekang lidlad ngeni, oyni mu ing adake ko
kakandut ya mung poesya, milabas neng kakung aldo..!

Bisa ku mang magkantang Rock, ining bosis ku kokorba
baka basibasan dakung boting plastik ampong tropa
lalu kyamung lalasakan iting salitang amana
ngana pin kakung waling Rey, "magdrowing na ka mu Koya"..!

Lalung ala kung ataya itang daycare a mesabi
uling e ku makababad, king balen ku, e masigi
at ing metung na pa nita, alang kwaltang pagmantini
makasulat poesiya, ing ditak kung balu oyni..!

Atin naman kekatamu, ing balitang kakalat da
ing pelalung mayap dili, ing kalamnan na ning biblya
amanu lang ating aral, poesya lang makarima
ing lalu pang makayama, Kapampangan ing diwa ra..!

E ku pu makipag-contest keng nanumang kagiwan ku
uling ala kung ilaban keng balu yu at talentu
nune ining panamdaman, libutad na ning pusu ku
antimong Kapampangan agyang nukarin ku dayu..!

Babye ke ngan karing aggang bisang tanggap a papuri
papanyawup da king balen, king sipag da at prusigi
king galing da at matapat, gugusal la't manatili
Luwid ya ing Kapampangan! Misanmetung king ANASI..!

************ ********* ********* ********* ********* *****
Cacandut a Tuglung
rba-=3-08

Ining pamisasanmetung a amanwan mu Cang Paing
para cacu, ya na pin yan ing bague peca masanting,
ini, caring lirang watas ya ing dapat lungcas tabling
ban ding batwin tang amanu maglambitin la king ningning.

Ilud tamung alang pucnat ing pamiagpangan tamu
ding bersu tang capampangan bustan talang maglipatu;
iting pamicacalugud yang daclat a tukyan tamu
macanyan la ding poeta.....ding poeta na ning Guinu.

Sumulat tamung papuri king Poeta ding Poeta
ipasyag tamu king yatung ing cabyasnan ibat caya;
at ing cabyasnan nang binye kipnwan lugud at ligaya
palcas tayang alang gulat caring dalit at poesya.

Yang ilud tamu, Poeta, ing malagung pamiyusig
king calam ning Mayupaya carin tamu sa manalig;
at nung ing Dios abe taya, nung atin mang manligalig,
e re malyaring atibag ing matibe tamung dalig.

Sulung pin, alang patanat mangisulat tamung lugud
matibe pamisanmetung a e malyaring mapatlud;
Nung manibat la king banwa inspirasyun a mibubud
ninu ta ing macasabing ing bague yan e macatud?

Cacandut a Cawatasan
Jose Roman 03-03-2008
Lunes / 10:00 pm.

Pangatluan cu, Cang Rene't Cang Paeng ding amanu yu,
amanung manibat pusu, careng Poeta Ning Guinu;
Ninu waring sumansala caring diwa dareng pusu
a lalapo mitmung lugud, at malambing lang susuyu ?

Deng amanu'ng pasiag tamu carening pamiagpangan
tanda la ning matibe ta'ng lugud at pamigalangan;
Balang metung quecatamu atin quea-queang beluan,
beluan at cabiasnan'g binie Na Ning DIOS tamung Miglalang.

PecaMatas A Papuri Qng DIOS IBPA yang iyampang
uling ding diwa'ng masampat tamu, Ya ing panibatan;
Ulina Ning Queang Lugud atin tamung cawatasan
babie sigla at tetagan queng Amanung Capampangan.

Mangari ta'ng anting panas, itamu ngan'g Capampangan,
maqui-lugud at masabal, tune'ng mipapagdamayan;
Alang mipapamarsala, manisi't misasancanan,
Deti ilang sisira queng daquila tamung parasan.

Bilang metung a pamilia queng ANASI ta'ng silungan,
Saup-saup, abe-abe, maqui-lugud ta'ng dadalan;
Mipagbuclud tamu diwa, pusu, isip at panandam,
Maguing Uliran queng yatu, Ing Lahi ta'ng Capampangan !

KAKANDUT A DIWA
Carlos Mañgalindan Castro
March 5, 2008

maragul ku pasalamat keng saup ding kayanakan
keng paniulung at tagumpe ning amanu tamung sisuan
masala kung tatangalan ing karelang kapagalan
dapot e ra sa kalingwan ing papakit dang kaguiwan
talentu ampon sikanan ibat ngan king Guinung nuan
iti karela na binie ba tamung maisaup-saupan
panuyatan palabungan ing amanung Kapampangan
ban king datang a panaun pagmaragul de't luguran
ding balang taung mibait king mabilug a ketawan.

makisabi ku karela e ra sana pu lalatian
ing saup da ring mangatua keng amanu tamung sisuan
uling nung ding talasulat at poetang matenakan
dramaturko at krisotan, nobelistang kabalitan
pepaburen de ing Amanu ni bakas ala lang likwan
nanu mo ing pagmaragul da ding mabunying kayanakan
karing aliwang memalen lalu't karing lalawigan
nung e mu ing samut-samut at balid a Kapampangan
antimo ing amanu ra ding modernung kayanakan.

ding talentong pigkalub na ning Dios a Mayupaya
pigkatiwala na la mu ban king mayap gamitan la
lalu na ding pamamanuesya, pamanerak, pamagkanta
pamaniulat keng zarsuela, nobela, at pamagpinta
ala tamung pipilinan, deti ngan kailangan tala
ban ing Amanu tamung sisuan magluid ya't makilala
karing balang sibabalen e mu keti king Pampanga
nune lipat dayatmalat anti mo king Amerika
nung nu di Ka Paeng, Ka Ernie, at Ka Rene atiu la
Ka JR at Atsing Helen, malugud king amanung sinta

luid ya ing Kapampangan, ding matua na't kayanakan
a miyabe magmasakit agpang king karelang kaguiwan
ing kekatamung kabiasnan misanmetung tang gamitan
e ta mipapagdibati, misusunggalit ditak man
ding kekata' manungkulan kekatamu lang galangan
ban ing Diyos a Miglalang mipuri ya king dangalan
a keyang ipagkalub karing sablang kayanakan
a alang sawang gugusad, magmasakit king aguman
king mitmung kapakumbaban, lugud ampon kagalangan.

Kang Sally

Buri ke y Sally e ku agrabiadu
Ustu ya ugali pati na king anyu
Milabas ing aldo nung ala ya kaku
Keng awang ku tando kakarug ku salu
E ku isipan bat lugud ku menabu
Talukab mibuklat yang meging kasuyu.

Ing sinta't pamisip linto antimanu
Bitasang mituklip alang anunsiyu
Lwa ning kabengian taul ning kuriru
Mitdas la't megisan kakung asigradu
Tapat a palsinta samyu ya king banglu
Cacung abitasa aklis kung meangu.

Makananu meng sukdan kapal ning curudu
Makananu meng surian palsintang e biru
Mie yat mie dalan tiktak da king batu
King landas ning bie sunlag ya ing sulu
Aslag yang mantabe anting alipatu
Tanda yat patune ning palsintang tutu.

Nung sakali miras... acu munang duku
King upayang matas lele ning Guinu
Yagpang kung matimyas kilub ning pusu ku
Lugud nang pemalas tune yang antigu
Igit pa ding perlas king Eden pabalu
Ing ala yang kupas lugud a mayumu.

Ngening balu nana ning benging kalmadu
Ing dalise sintang alang balatkayu
Panyad ning kaladua ing e pamagbayu
Bustan meng mampang king altar ning pangaku
Bustan meng idaun ing lugud at suyu
Antimong asahar king tula magyuyu.

by Pidong Rivera
1/25/08
San Diego CA

ACALINGUAN DACA WARI ? ( Poesia )
Neng Jose Roman R. laquian 8:30 am./ 2008-01-25

Acalinguan daca wari
nung ining angin darampi
careng mapali cung pisngi
mag-dalit ya't mag-cudyapi ?

Acalinguan daca wari
nung quening pusung sacbibi
niting diwa mung masubi

qng lugud ya manatili ?

Acalinguan daca wari
nung ing diwa niting lahing

atyu queca yang maniabing
tapat cacu aldo't bengi ?

Acalinguan daca wari
nung queng gabun balang bini
tutubu lang asmu yumi ,
manyampagang tuqui-tuqui ?. . .

Ali daca acalinguan
queng lualas ning capatagan ,
careng bunduc at caquewan ,
sapa , batis , cailugan ,

dayat malat a malalam ,
marimlang angin-albugan ,
banua't labuad cung quebaitan ,
mabie ca diwa't cabiasnan .

Qng banua ca menibatan ,
Qng Dios Ibpa cung Miglalang ,
binie Na cang Cayamanang
Pamana Ding Pipumpunan .

Ali daca acalinguan
queng pusu cu macatanam
ing diwa mung iingatan
ning bie cu't paintungulan .

Icang Cacung Pacamalan
Amanu Cung Capampangan ,
Icang Canacung Lingapan
Ngeni At Capilan Pa Man !

E Raca Acalingwan
neng Paeng

Keng santing ning poesia mu e ra ca pin acalingwan
ding amanu mesalac la king lagyu nang Jose Roman
pinili mong tunggal-tunggal inareglung masinsinan
mitugma-tugma la reti mirima la at miyagpang..!

O ninung e maligagang mamusising macabasa
caring tema at puntus da caring lulwal mung cataya
pacabawul a masicap bibilad mong mitimiwa
caring matang manigapung Capampangan babye diwa..!

Papasyag mu ing lugud mu king amanu tamung sisuan
misambulat micacalat panamdam mi miyabuban
cayabe caming cacawul kecatang pisanmetungan
ing tagimpan tang masugid lwid ya ing kecatang tibwan..!

Canyaman na't casampat na ning pawaga mung lugud
mipapalcas king ubud da ring uyat mung alang patlud
talasagip king amanung ditac-ditac malulumud
dapot ngeni mibangun yang mababalag keyang pawud.

" QNG BARYU CUNG QUEBAITAN "
Nang Jose Roman R. Laquian

Queng pusu cu't caisipan
ya ing tula't caganapan
at qng maluat a panaun
eque maliaring calinguan .

Aguiang nucu mangaparas
ing malagu nang larawan
qng canacung camalayan
miquintal yang casucdulan .

Mengari ya mong suclating
miqui-ubas a cacanan
at sorbetes a maniaman
lalam aldong capali-palian .

Queng aslag ning aring aldo
tune lang macapaniglo
ding itic a mipaglolo
caring batis nang malino .

Queng queang angin-amiam
mapepresco cu isipan
at qng canacung catawan
macaramdam cung sicanan .

Deng tanaman nang magbalse
cambe'ng angin macacate
anti la mo quea mamie
poesiang matning magpugue .

Qng marangle ming pitamnan ,
caibat nang sinarul Tatang ,
dalan mi la ding damulag
qng paranum para diluan .

Qng marangle ming pitamnan
dacal bungang licas-yaman :
milun , camatis at pacuan ,
manga , santul at dalandan .

Careng tanamang maglingap ,
detang ayup a mamag-siyap !
meg-sale lang macatanglad ,
pipanganan careng ulad .

Balang bengi , lalam aslag
na ning bulan cabilugan ,
icami ngan cayanacan
mamyalung queng salicutan .

Careng panaun cauran ,
mipanagal que queng dalan ;
careng patac na ning uran ,
didiluan inq camusmusan .

Simple ing bie't pangabyayan
dapot lalapo cayapan
ampo lugud a matimbang
qng baryu cung quebaitan !

Matwa
Paing

Ginuko, cacalingwan ku na sana
ba't pepaganaca mu pa
ing napun a milabas na
dimdam kung lalu cung metwa..!

Meputi ne ing bwac rugu
dacal ing, na? pakibat cu
deng bitis kung meging atlu
palacad na kung gugupu..!

Deng panulu cung inuman
casacmal no casalasan
pipamisan cong inuman
miyaliwa no puntalan.

Neng yacu na ing mamasa
tayid-tayid no reng letra
neng damdam na cung musica
caylangan ing matutuk pa..!

Linwal cung mapangalingwan
ining apung cacung awsan
atlu la pang lagyung sabyan
o ba't bayu ke pa turan..!

Dapot ing e cu kelingwan
ing amanu tamung siswan
kening pusu macasimpan
anting tune Capampangan. .!

PAING

Kinurap ku mata
Linto la ring nota
Ain ning poeta
Guintu lang diwata.

Ikit ku't abalu
Ing e eya magbayu
Lugud king amanu;
E ya makurilyu.

Saluduan ka Paing!
King lugud mu't galing
Sisuan tang kegising
Ubud ya king ningning.

/Pidong

E KU AKALINGWAN
(a sequel)

napun, pamilya arap altar
mangading tayimtim orasyun
ngeni, oyni ing bayung altar
yapin ing colored television!

napun, bulung samat, cortal
mipasno na ing panamdaman
ngeni, panulu nang mangamal
dipanen, alang kapaldanan!

napun, syoktong metung basu
mag-trip no ring isip at mata
ngeni, metung mung singut shabu
agad kang dudurut malata!

napun, nung eka bisang masaping
pakasal pamu bayu siping
ngeni, kandut-kandutan pamu
balak-kasal pane nang kapamu!

kanita, karing bayung-tau
usu diga-diga k'ring dalaga
ngeni, mikindatan la pamu
kaybat-agad dickdikan nala!

mas buri ku na ing napun
karin ku paynawa't mapun
ngeni purus nang taksyapo
kasipu meyango ne y Apo !

Nung Atatandanan Mu...

Matwa na ka wari,
o ba't mo ngeni pa
carin ca mitayid,
mebatubalani?

Ating anac matwa isip
ating matwa anac isip
buri cu ne ing mumuna
agyang anac, isip matwa.

Cunan tana keng poesya
calingwan tana ing matwa
ing ayisip cu talaga
I Pids yang talagang matwa.

O ba't abuclat ne pamu
iting temang macarayu
cabang dacal kecatamu
malapit nang gumupu.

Pecamasakit labanan
ing panyulung na ning ketwan
uling balang catacbangan
panawun ya ing daralan.

Anya king balang penandit
samantalanan ing saglit
iwasiwas ta neng aplit
ing panyulat isapilit.

Cang Tony eca manamdaman
a buri dacang calbitan
malwat da cang panenayan
keng kecatanmng ugnayan.

Paninintunan mi la mo
amanung mung macapasno
ike kening pacatando
king jardin na ning parnaso.

Ing amanung siswan ngeni
king ligligan makilimpi
anti yang batung brilyanti
ing brilyu na alang anti..!

Paeng

Cong Ernie At Atsing Helen ,

Balang amanung mesulat careni pung cawatasan
Midinan lang Bie at Diwa Pauli Na Ning Miglalang ;
Ing Guinu ta'ng JesuCristo Ya ing Amanung Larawan
Ning DIOS IBPA ta'ng Miglalang Qng Lugud Nang Alang Anggan !

Inia Matas a Papuri Ing Marapat Quea Babie ,
Qng IBPANG DIOS a Miglalang , penibatan ning cacung bie ,
at nune Qng Pauli Na , Alang Diwa't Cawatasang
yampang cu Qng Queang Binieng Amanu ta'ng Capampangan .

Pasalamat cu Qng DIOS at acayabe dacongan ,
Capatad cu at Cabaleng cayantabe't casuglungan
qng lalu nang pamaniulung ning Amanung Pacamalan ,
Ing Amanu tamung Sisuan , Amanu ta'ng Capampangan !

Pagdamutan ye pu ining panibayung cawatasang
mesulat a ating lugud qng Amanu ta'ng Pimanan ;
Ing Taimtim cung Dalangin Qng DIOS IBPA ta'ng Miglalang :
Queti yatu Mibabo Ya Ing Amanung Capampangan !

PANGABAIT NANG PUNGUL INOSENTI
neng Jason Paul Laxamana

Sumangid atin metung a yatu
Ding salita ra para king tau
Nung bilangan mu la atlu la mu

Kabait nang Pungul Inosenti
Abalu no ring amanung deti
Malutu, Dilo, ampong Maputi

Uli nita atlu ya' pigpilian
Nung sanu ing buring maging dalan
Dapot e buring pamaliguanan

Kayi sibukan meging Malutu
Wangis da ring mangatua king baryu
Oneng e pa rin kuntentu pusu

Kayi sibukan nang meging Dilo
Kalupa ring sasamba king aldo
Dapot biye e pa maging malino

Kayi sibukan meging Maputi
Anti retang aliwang kakasi
'Neng panamdaman pa rin ing lili

'Nya pisamut na no mu ring atlu
At ing linual aliwa yang anyu
Para keta ala pang amanu

Kemuanan de reng sablang Malutu
Inyang pekiabayan no rugu
Lawe da kaya ali ya tau

Parang kalma'ing disan karing Dilo
Linapit ya saka ya mebulyo
Inya i Pungul mengapalako

Karing Maputi e ne mebigla
"E ka tau," ngara anting sadya
At saka ya rugu mengapalua

Linapit ya'ing metung a kaladua
Saka ne kitnan o't gagaga ya
Sinabi nang Pungul ing istorya

"Ali ku pu balu nung nanu ku
Inya yausan da kung ali tau
Nanu'ng maging lugal ku king yatu"

Pakibat ning kaladuang kasabi
"E ka Malutu, Dilo, Maputi
Oy, metung kang Pungul Inosenti"

Misan a Benging Mabatwin
Neng Jose Roman Laquian

King misan a benging batwin matindag la,
lalam na ning dutung, carin, ikit daca;
king sawup ding sinag ding sulu ning banwa
ikit cung lungcut mu, maki lwa ca mata.

Calupa ning canta, ikit da ca, Irug
king penandit aytang kikyac ca lindayug;
nung wari keng bulung cule mu tinabug
at caybat king gabun carin ca mebaldug

King misan a benging batwin matindag la
lalam na ning dutung sinta mibayit ya,
tula nang pigcalub ning Guinu kecata
yang paninasan tang e ne mapupus pa.

Malambis lang uma minlungan king suyu
caring mipalsintang biclud ning pangacu:
"King capilan pa man, Irug, keca ya mu
ining pamalsintang dalise at tutu."

At misan a benging batwin matindag la
ing ambun balamu lwang ibat king banwa;
lalam na ning dutung ing penandit ayta
bina yang malungcut, cacu mamun na ca.

Carening tacde cu mayna meng catawan
sinupil ning sakit at mipmung bengisan,
nu anti cabayat pigunamgunaman
suyuwan tang tapat tane miyangganan.

Ngening paynawa ne ing pepatingapun
aldo lintang na ne dase nang milulun;
mabye ning kakewan tano memanapun
ban caring sale ra miglip nong maratun.

Ngening benging ini batwin matindag la
managlus king dulum sinag a tagle ra;
magdili-dili cu keni king aplaya
ing banwang mabatwin lalon keng misan pa.

(Kepampangan neng rba)

ING AMANUNG KAPAMPANGAN
Carlos M. Castro
February 3, 2008

Nukarin mo menibatan lugud king amanung sisuan?
Baket dapat yang luguran, sesen at dinan dangalan?
Nanu waring kapakayan ding kantata't kawatasan,
A susulat da't gagale ding poetang matenakan
Nung e mu ing magluid ya ing amanung kebaitan?

Ketang minunang panaun metung ya mu ing salita
King mabilug a ketawan ing amanu metung ya pa.
King karelang pamitipun, ding tau pikayari da
Mitalakad la ping siudad at toreng miraras banua
Ban king mabilug a yatu maging pikabaluan da la.

Uling metung la amanu misasanmetung lang agad,
Ing karelang kapagnasan, malagwa dang apatupad
Nung deti mipabustan la, siguradu't e maglambat
Gawan ing buri dang gawan ala na ping makasabat
Ania ing Dios gilu nala keya lang pisasambulat.

Gilu na ing amanu ra, e na la mikaintindi,
Misalbag lang anting bomba, ding tau mikakawani.
Detang mikakaintindi mitipun ampon mikampi
Mitalakad lang balayan, siudad at sariling lahi.
Oyan ing penuyatan na ning amanung samut-sari.

Ing amanung Kapampangan salita yang ibat king Dios.
Sari lagu at makule, mabunga ya at tibubos.
Sesen tayang mitmung lugud, ban e lunto makalunos
Turu taya karing anak ban kislap na e mapupos
Kanita tangalan taya karing batuin na ning Dios!..

Ing amanung Kapampangan dalan ne ning katuliran.
Dalan ning pamisanmetung a babie lubus sikanan.
Dalan ning pamikalugud at sibul ning kapayapan
Nung iti luguran taya at gamitan king kayapan
Magluid yang Kapampangan, sulapo ya king katasan!

Nung buri tayang matatag ing amanu tamung sisuan
Italakad taya iti king Amanu ning Miglalang.
Kekata yang ibalangkas babo Batu ning Katutuan
Dakal mang unos ing datang e matibag ditak mu man
Kanita ing Kapampangan, amanu yang pikabaluan!

Nung Metuctuc Cang Ubingan
Neng Renato B. Alzadon

Nung metuctuc cang ubingan, nanu ing gawan mu caya?
E me caya panagalan ing ubingan king kecang mwa?
Oyan, ing e mu gagawan, nung micasbu cang malagwa
ing camandag at me bilis cumalat king kecang daya;
inya sana O' Bungsu cu, ali ca dapat paybigla
nung anti ca mong metuctuc king masakit a salita.

Nung metuctuc cang ubingan, e ca caya mangilabut?
E mo caya salibusub king lub mu ing kecang tacut?
Oyan ing e mu gagawan, nung king tacut ca mibalut
ing tacut ya na pin mismung king inawa mu mamuput;
inya sana, O' Bungsu cu, king tacut e ca paysaput
agyang mataram la datang ding amanu rang mangutcut.

Nung metuctuc cang ubingan, nanu ing sucat daptan mu?
King abut ning kecang agyu sawpan me ing sarili mu,
e me sa papagbabawan ing mwa at tacut king lub mu
nune manalig ca king Dios a manakit king calma mu;
nung sacali atin datang ban manaplac king sugat mu
e mu cacalingwan, Bungsu, yan,tiburan ne ning Guinu.

Gisingan Mu Kung Abril
Neng Renato B. Alzadon

Matudtud kung maniaman, Indu
king pali ning kekang salu.
Gisingan mu kung Abril.....!
Pasibayu kung tumubu
maniampaga kung "Daffodil".

Matudtud kung maniaman, Ibpa
king pugad a kekang dampa.
Gisingan mu kung Abril....!
Akit mulang dalipakpak
dening kakung murang pakpak.

Matudtud kung maniaman, Guinu
king kalalaman ning yatu.
Gisingan mu kung Abril...!
Magbangun ku king Bethlehem
king Bayu mung Jerusalem.

************ ********* **
Winter 2005/Maryland

For page 76, go to:
http://groups.yahoo.com/group/K-poetry
It is showcased in Yahoo and has a different format.

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00090

Page Updated Sun Mar 16, 2008 1:42pm EST