 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY - PAGE 74 |
 |
| compiled by ERNIE C. TURLA |
| ||||||
| Magmiryenda Ta Pa Paeng Magsaya tamu mu kambe ning salita king amanung siswan keti king masala kwanan ta suguru keng pamamatula neng sasapac tana calusan yang bagya. Detang king Pampanga mesabing sundalus mapagal no yata keng utus nang utus gagalucguc lapa re carelang dungus balamu ne kayi lipasan lang danup. Nung ating mitagan careng badjet ta ken gumastus na co man kesa mica-ulcer muna ye pang atiyan kesa keng project ken masakit na yata nung yang mipaburan. Magparimla ta pa mapali ing sabo kwnanan ke ing sanduk yacu pang migogo miparacal sangcap pota mabantilo laman a mibulug lunto gato-gato... Nung nanung melutu ya pang pagdamutan ya na pang gigutan saca paglangutan nung isubu tamu saca agnan-agnan pota e malaso king kecatang atyan.. Ing yatad ku ngeni ditac yang miryenda suman yang malagkit balut bulung sasa pangisnawang saldac at saca paynawa magpyac ta saguli diwa ning poesya. Ing kecatang pake king capupuntalan metung yamu punta ya ing Capampangan ating mangabiis pamanalumpacan ating diplomasyang pamanalacaran. Ating mangatapang ni e man milapit ing tigri o leon e la man migilid agyu nong abwangan ducduc at sapingil king takut dana mu maco lang mulandit. Ating e bubulad sangcan yang manasdap magugumasid king kecatang dapat potang sagad tana keng obrang mayatsat saka neman lunto maglinis mangulap. Atin naman mo ken palawe-lawe mu ala yang agawa obra e na agyu lalu nung malawut ya king peca-sentru nanung kakulangan yanamang mangatmu. Ing panamdam tamu king amanung sisuan ketang ing cagiwan yang kecatang gawan nung dagul ta tacbang a e ayactangan acwa tang misagad lalu tang mabalam. E cu pu manaral ala cung tuturu ala kung paturan ing canacu mu pu magsane sumulat kening cacung agyu ban e macalingwan ing ditac kung balu. SAINGSING DING MAKATUA Sinulat neng Carlos M. Castro Ning Balen Sasmuan Kabang mibule-bule ku, patuasan a luklukan ku, Meskup ya ing kakung salu, bigla namu akutang ku. Angga kaya kapilan pa manatili ining bie ku? Kapilan ing kapupusan ning krus a pupusanan ku? Guinu sabian mu kanaku, kapilan kamatayan ku? Uling tutu yang mabilis, mapupus bie na ning tau. Sana iti abalu ku, bang keta apagsadian ku. Uling bisa o ali ku, king gabun murin muli ku. Nung kanakung pibulayan ing bie kanakung delanan, Manintun kung kabaldugan, karing subuk kung denasan. Meging makasalanan ku, utus mu kakung selangsang, Meging makasarili ku, ala kung pakiramdaman. Guinu e mu ku kakamuan, at e mu sa paparusan, Karing kakung kasalanan a e ku na buring gawan. Uling ngeni ku pagdusan at kanakung pasayangan, Makabang bie a binie mu, ginamit ku king dewakan. Mamau la at nanaknak ding sugat kung e kakayap, Ding bitis sadyang masikan, e nala bisang lumakad. Ing gulut kung sasayukut, takde e na makapamuat, Ila ring sasaingsing ku, uling e ku no ayatyat. Balugbug ku mangaklak la, ding gamat ku gagalgal la. Ala nakung daramdaman nanumang pisasabian da. E ku makapagsalita agguiang bisa ya ing dila, Pati kanakung pamisip megulian na kung bitasa. Bengi-bengi tatangis ku, maniawad kung pakalulu, Sana Guinu ilako mu ing sablang kasakitan ku. Ding mata kung mabubulag, sala dinan mo sana pu, Ing pusu kung makitakut, tibuk ya sa king lugud mu. Misan kitnan daka Guinu, ba't pepakaban mu'ing bie ku? Nanu ing kapagnasan yu, nanu ing kapanayan ku? Ing sangkan pu e ku balu, ania pilit kukutang ku, Bang mitatagang aldo ku, maging tula la kekayu. Sabla alang kabaldugan! sabla alang kapupuntan! Nanu mo ing pakinabang ning mag-obrang alang tuknang? Potang mamun ne king yatu, ala ya metung mang dalan, Itang lakuan nang pibandian, pisamsaman ding malakuan. Sabla ating kayangganan! Sabla ating kapupusan! Ing bie da ring mayakayan, ing bie ating kayupayan. Iti atin ngang angganan, e magluat kapilanman. Pati ing bie na ning tau, anting angin mung dinalan. Potang kakung pibulayan, ing bie kanakung delanan. Alang tula kung akakakit nung e mu bie kayanakan. Munta ka nung nu mu buri, gawan ing buri mung gawan, Balamu ing bie ning tau, ala ne ping kapupusan. Ania ing turu ku keka, e me sana kakalinguan, Ing Diyos a keka miglalang, king aldo mung kayanakan. Ganakan me sa ing Guinu, bayu datang ing kauran, Bayu ya lumbug ing aldo, at dalumdum ya ing bulan. Kabang katawan masikan, kabang atin ka pang ipan, Kabang e ka pa mangaklak, at matuling ka pa buak Kabang makapulayi ka, maka-ukyat king ketasan, Kabang ding tud mu masias la, Guinu eme gugulutan. Ania sa pakisabi ku, ituru yo ding anak yu,. Ding Amanu na ning Guinu, itatak yo king pusu yu. Bang e nala miparayu at maliling pasibayu At era na danasan pa, kasakitang pisanan yu. Ngening ing bie pigkalub yu, ume neng mika angganan, Aduan ku sana pu Guinu ituru me sa ing Dalan. Ituru miya naman kaku nung nukarin ya'ing Katutuan Bang e ku tatakut mate't tanggapan ing Kaligtasan. ORTETLANU (mumuna ya ing tema) Caslag na ning aldo abac pang maranun ating neng sisilo lele ning minangun nitang ortelanu tatalas king tabun umang ning palucsu ya ngan ing lilingun. Deng akwa nang bulig dagul panyacalan yuli na nong agad saca no inangnang ilang almusal dang paniltilang aslam at siningle nasi yapag ketang dulang. Ketang simpli rang bie ding kayang pamilya dadagisut na la king dacal a banwa ing kayang paninap apayari nala Carin king coleyu ding anac nang lima. ORTELANU (macalibutad a tema) Cabud mayari la retang kayang anac metung muman sana antimong pamalac macapag-abroad ya king aliwang lugal bansang America malwat nang tagimpan. Oyan ing masipag king kayang asican ala yang picabyang king aldo't uranan iting ortelano, pamilyang liguran adinan nong bucas manawang cabyayan. Ala na sang muna king sipag at tiaga Caretang pengaring magsicap minawa at ba lang micabyus king sakit mistula ning bie salucuyan ning calulung bansa. ORTELANU (tawli ya ing tema) Tulawuc ning manuc mine neng manunyat detang kayang gamat mengaspac lang palad lipunga ring bitis king sapa mebabad mabilis neng ticdo king marangle musad. Cambe ning pamitic king cayang awacan puntalan neng sese damulag neng sacyan at saca ne dulung keta nang asican umpisa nong sarul ning kayang calacyan. Macanyan ing bie na nitang ortelanu masipag gugusal king gabun masolu ing pusu,t caladwa king pamilya mismu macabulus nangan king Dios macasentru. Paeng Pamigaganaca rba-2008-Enero Itang bosis nang mabilug, kecatang macapatulug, tatabling ya a cucurug.... Mangalambing ya lindayug caring dalit nang panirug. Alang patna nang sasabyan.... Sesen taya at gambulan ing amanu tamung siswan ampon detang caugalyan ding matwa tang penibatan. Ing matabling nang siwala cabud-abud ne mu mipda, cambe ding cayang tumayla mangalambing a picudta magparayo babye diwa. Nung ngara memayapa ne mine ketang aliwang bye, dapot king sulip licwan ne ing lugud nang madalise king amanu nang kesale. Ngening bulan ning Enero ganacan ya ing talindo ning marangal a maestro.... Ari ning Berding Parnaso Poeta Jose Gallardo. INDANG ELING - Metung a Pugue (written for Mrs. Eling Guinto in honor of her 90th birthday on January 19, 2007, by Tony M. Pena, at the request of Ernie C. Turla, and eloquently delivered by Rudy del Rosario before the celebrant's family and friends at the Tahayeri-Guinto manor in Sherwood, Oregon.) Nuan ka karing sablang Inda king yatu Tinayid, teguyud ikaming suli mu Sumangid kauran at kalaldo binye Makule’t maslag pinanari ning biye! Nanu la man lagyu ding bagyung dinalan Matagumpe kang tinikdo’t linaban Angelina kang selilung kami k’ring bagyus (or Angelina mukeng selilung k'ring bagyus) Bale mung mabule, metibe keng aplus! Makislap kang Guinto minaslag king dalan Binubud ing lugud ampo ing kabyasnan Ala nang melili milisya nake ngan King dayat dalumdum ning mangmang karinan! Anggang gatpanapun masalbag ka sala Kwintas Guinto kang susulud ming sabla Ing kislap mu’t kinang silbi yang uliran Talangan tangalan ning meto balayan! Matalik lang bante ding kekang amanu Pamaglakbe king biye ban e mitalabu Sandalan ning lugud masikap mung pusu Makamal kang Guintu lamak ka king Guinu! Note: Bayu ya megale ing poesia, mepaquilala ya pamu careng maquiramdam ing author as one of the Most Outstanding Kapampangan Awardee for 2007. BULAN, BULAN anonymous (contributed by RBA) Bulan, Bulan, balduganan mu cung palang. Nanan me ing palang? pangutud keng cwayan. Nanan me ing cwayan? Yang gawan cung bale. Nanan me ing bale? Lulanan keng pale. Pamigaganaca rba-2008-Enero Itang bosis nang mabilug, kecatang macapatulug, tatabling ya a cucurug.... Mangalambing ya lindayug caring dalit nang panirug. Alang patna nang sasabyan.... Sesen taya at gambulan ing amanu tamung siswan ampon detang caugalyan ding matwa tang penibatan. Ing matabling nang siwala cabud-abud ne mu mipda, cambe ding cayang tumayla mangalambing a picudta magparayo babye diwa. Nung ngara memayapa ne mine ketang aliwang bye, dapot king sulip licwan ne ing lugud nang madalise king amanu nang kesale. Ngening bulan ning Enero ganacan ya ing talindo ning marangal a maestro.... Ari ning Berding Parnaso Poeta Jose Gallardo. Tucsu Neng Renato B. Alzadon 2008-Baltimore 01-12 Ketang e ra ca pa cakilala, Tucsu balacu mo sana lupa cang Demonyu, pakiwangis da ca king macadibuju a macaba iking matilus a sagu; O caya caretang Aswang at Impactu at pamatacut dang maroc a malignu. Uling macanyan ya ing macalarawan a macatanam king cacung panimanman, ngacu mong mimisip, e cu paniglon man nung caba ning bye cu e cata mikit man pasalamat cu pa nung ing capalaran e na la picurus ding kecatang dalan. Dapot, inyang misan, ing calma, ticda na, king metung a ukyan mecapikit cata; kinarug cu salu cabud ikit da ca anti cung meguna at memalicmata; uling ining mutyang pepakilala da e mitawli legwan king Helen ning Troya. Tucso, calagu mo! Malagung malagu e cu inacalang macanyan ca anyu! Timan ding labi mung balamu manaru apatunud me ing pijican cung pusu, at uling e cata sadyang micabalu ditman e cu malit king Linda ca lagyu. Manibat canitang mecapikit cata king pangatawu na ning malagung Linda; ding balang penandit ning bye cung malsinta teterac lang sabic king lambis ning canta, uling balang Byernis indat mikit cata anti cung magduyan king biga ning banwa. Ketang Malating Bar a minlungan gayut carin cata mikit ketang pasalicut; itang casabican leco na ing tacut yang batubalaning matalic manigut; king pamagpatawe maybug cung mayuyut arapan ning legwan a mapanamuyut. Cabanglu mu Tucso! Mabanglung e palac king canangga na ning mabanglung bulaclac; yang macalasing mung tagle salimuyac miguit ya bengisan king mapaling alac; Oh, Tucso! Oh, Tucso, ditac na mung ditac adwa lang caladwa ding kecang alasac. Misan a cabengian, alalu ding batwin at itang patac na ning uran masinsin, keta king libis na ning bale salamin ing saken tang cotsi perada ke carin, agyang mamyus ya man sabewung ing angin caring mayling pusu ditman e ra pansin. Bitasang ala nang amanung mepunti king pangalapat da ding kecatang labi; at king calamnan ta malabab ing pali na ning pamagnasang mitatawung api; ing pasbul ning Eden ikit keng mibusni king anti canacung Adan a mitabi. Bayu ing pamisip inacmul ning pisac dimdam ke ing kecang banayad a tulac; at yang sinabi mu king pilatan ning kyac aganaca mo ding malati mung anac, at ing catapatan ning kecang cabislac a alang patugut king obra babatac. Inyang manic na ca ketang tucnangan mu ing cacu mu licwan isip yang magulu; luruc-lurucan ke licwan mung amanu casalanan cu ngan ing pangabijag mu, acung menaligwat king payapang bye mu uling acu palang larawan ning Tucsu. Tucso! Tucso! Tucso! O'bat macanyan ca mamijag cang pusu king kecang gayuma, caybat mu cung ticswan king legwan nang Linda ipatan mu cacu ing pamamarsala, icang menaligwat king cacung caladwa ngeni mo sabyan mung, acu mismu, ica. Tucso lacwan mu cu, ume cang marayu e na ca magbalic king matbud cung pusu; agyang misulud cang bayung balatcayu balu cu ne ngeni nung nanu ca anyu; panyabyan cu caring e pa makibalu datang ca king bye ra, at na ca calagu. Magaral Cu Queng Escuela ( Poesia Para Careng Chiquiting Gubat ) Neng Jose Roman R. Laquian 9:30am./ 2008-01-22 Magaral cu queng escuela dacal bague ban mabiasa , pati queng Amanung mana ating diwa't ating rima . Ining Amanu cung Sisuan , Amanu cung Capampangan , Pamana Ding Pipumpunan , Maniaman Yang Pangamanuan ! Magaral cu queng escuela , magaral cu ban mabiasa diquil queng cacung Culturang Capampangan a amana ! MACATUCSUNG CALBIT neng Paeng Metucsu nacung mengalbit kening cacung caluguran Yang carame kening lungcut saya ampong casakitan at caya cu rin bubulus ing canacung panamdaman nung ating cung buring sabyan, ampong buring pakirasan. Neng datang na ing sisilim at caybat cu ketang obra agad-agad keng calbitan nung cacu ne macasadya uling ing gawan cung calbit e ya caylangan magpalya ing canacung casabican aldo't bengi pagsadyan na. Keng milabas a Domingu kilbit keng mecatapilan uling keng pagal keng obra, e ke man ayatbatnan manaya yang dalusungan, e ke man ayugnayan ing casabican na cacu, ali ke man apagbigyan. Uling e na cu magwanta keng pamanaya na cacu pisundu-sundu kung calbit ing ligaya suguradu apasyag ke ing canacung casabicang macabuwu poesiyang Capampangan, kening compyuter cu rugu. TUCSU Suglung Nang ArtDax 01/23/08 Dapot tucso, tucso o’t Biernes na naman Balisa ne naman ing pamicatawan Cacarug cu salung dadalakit dalan Papunta ketang bar nung nu ke puntalan Y Lindang malagu a cacung licuan A ngeni ing tucsu ing paintungulan Atiu pin keng bar panenayan nacu Parminggu yang sabik keng uma’t caul cu O Linda o Linda, tuksu ca man lagyu Keka neng ilili ing ulilang pusu Keng silab impiernu, ‘gang bucas Sabadu Bang keng Domingo mangumpisal na cu mu Y IMA ( Poesia Para Careng Anac ) Neng Jose Roman R. Laquian 9:30pm./2008-01-22 Matudtud ya pa ing aldo macagising ne y Ima at pagsadia neng amusal ing ortelano ming ibpa ; caibat pag-bacalan ne pang nasi't asan maqui-gata , maniaman ya ing lutu na ning mapanese ming Ima . Quecaming micacapatad y Ima mi , ya ing mestra at ya mu rin maningat mi , labandera't cocinera , yang mamalenque't maglutu queng pamangan ming cacanan , queng bale mi , jalus cayang obrang-baleng gagampanan . Manatad ya't sasalusun quecami ngan queng escuela , masalese't macaayus balang bagueng gagawan na ; y Ima mi , masinup ya , mumuna ya queng sipagan ; Ing Malugud quecami ngan Ya ing Ima ming Uliran ! MACATUCSUNG CALBIT neng Paeng Metucsu nacung mengalbit kening cacung caluguran Yang carame kening lungcut saya ampong casakitan at caya cu rin bubulus ing canacung panamdaman nung ating cung buring sabyan, ampong buring pakirasan. Neng datang na ing sisilim at caybat cu ketang obra agad-agad keng calbitan nung cacu ne macasadya uling ing gawan cung calbit e ya caylangan magpalya ing canacung casabican aldo't bengi pagsadyan na. Keng milabas a Domingu kilbit keng mecatapilan uling keng pagal keng obra, e ke man ayatbatnan manaya yang dalusungan, e ke man ayugnayan ing casabican na cacu, ali ke man apagbigyan. Uling e na cu magwanta keng pamanaya na cacu pisundu-sundu kung calbit ing ligaya suguradu apasyag ke ing canacung casabicang macabuwu poesiyang Capampangan, kening compyuter cu rugu. Maniaman Papa-Pu ( Poesia Para Careng Anac ) Neng Jose Roman R. Laquian 6:30pm./ 2008-01-22 Maniaman papa-Pu Gagalang quecayu Tatang at Ima cu , Malugud cung Indu . Ing pamamie-galang quecayu, O Tatang at quecayu , Inang , mayap piyugalyan . Maniaman papa-Pu Opu , Salamat pu , Pugue cu quecayu Pacamalang Indu ! KETA PU KEKAMI Neng Carlos M. Castro Balen Sasmuan Keta pu kekami Kubu ming malati Di Ima ku't Tatang Parati lang maili. Manakit kung lugud Agguiang tutung dimut Ing kekeng pamangan Malan a susulud. Ding siping ming bale Agguiang makuwalta la Alus king aldo-aldo Mipangulisak la Ding karelang anak Parati kikiyak la Agguia mang mabsi la Keng lugud ala la. E la pu masaya Agguiang makuwalta la Uling maimut la Mapagmatas la pa. Turu nang Tatang ku Keng kuwalta ala yu Ala keng pibandian Saya't kapayapan. Keng pamikalugud Karin me akamptan Ing tula at saya Keti king sikluban. NANU ING LUGUD? Neng Carlos M. Castro Ning Balen Sasmuan Ing amanung mikalugud Madalas keng daramdaman Di Tatang ku at Ima ku Madalas deng pisasabian Madalas da kung tuturu Luguran ke i Koya ku Luguran ke I Atsi ku Luguran ke ing wali ku. Pero e ke pu aintindian Nanu ya ing kabaldugan Ning amanung kaluguran A dapat ku kanung gawan. Misan a aldo kitang ku Ing lulugud makananu? Pekibat na pung Ima ku Ing sabian ku tingiran mu. Ing anak a biasang lugud Maganaka, e maimut E palalu't mapanimbut Mapamie ya karing bingut. E tutula keng marawak Pagdulapan na ing mayap Mapibabata ya't ganap King lugud na king Dios Anak. Ing biasang lugud a anak E lalaban karing matua E mapangwa king e kaya. Magalang ya karing maestra. Ban ing lugud abalu mu Luguran mong pengari mu Ding anak a kalupa mu Panalangin mo king Guinu. Tapat a Cayabe Paeng Maski nucu munta tutuki ya cacu lalu na neng aldo keng pamagpasyal cu. Neng miras ing bengi ene bisang palto paynawa ne galang mepagal neng usto. Potang cagising cu lumacad keng dalan Tacbang cung mabilis tatacbang ya naman. Tanggapan cu ne mu king isip malino tapat yang cayabe ing cacung alino. Lugud a Lijim Paeng Maski nang gawan cu gagawan mu naman neng mayli cu keca mayli nacang agnan. O ba't macanyan ca ing kecang ugali ala na cang balu nune makituki. Potang lakwan daca maco king arap mu maco naca naman magdili-dili cu. Pero macanyan man ing lugud cung lijim makiyarap keca arap ning salamin. Ing Cacung Alino ( Poesiang Pang - Anac ) Neng Jose Roman R. Laquian 10:10 pm. / 2008-01-24 Ing cacung alino pane queng cayabe queng aslag ning aldo iyang cayantabe , Anti ya mong asu atyu queng gulut cu , lacad cu't pulayi e ya cacawani . Caya-cayabe que nu man mangaparas , wawangis ya cacu , anti ya mong bacas , Enacu lalacuan e na tatantanan cayang tatacbangan ding bala cung tacbang . O ba't mo macanian ding bala cung gawan queng lalam ning aldo queang paquiapusan ? Tutu ya pin cayang tapat a cayabe ing cacung alino'ng paquiapus a tune ? BAYU CU MUNTA QUENG ESCUELA . . . ( Poesiang Pang - Anac ) Neng Jose Roman R. Laquian 1: 00 pm./2008-01-24 Miamasamas mandilu cu at saca magsupillo cu careng ipan ban inawa cu macayama't mabanglu . Caibat , suclen masalese't dinan pitna ining buac cu , gupitan co dening cucu at manos careng gamat cu . Isulud que'ng imalan cung asmu linis at planchadu , caibat , bitis mediasan cu at magsapatos cung ustu At ining bag dadalan cu ating lapis , papil , libru at aliwang gamitan cu queng pamagaral cung ustu ! Dening bague ilang pihung gawan bayu magaral cu . |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00035 |