 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY - PAGE 73 |
 |
| compiled by Ernie Turla |
| ||||||
" PAMISALUNGATAN " ( " CONTRA - OPINION " : POESIA ) Neng Jose Roman R. Laquian 11: 00 pm. / 2008-01-08 1 Ining pamisalungatan ning ngening casulungsungan , dacal tamung edificiong mangacatas a cabilian , dapot nung nanung catas da , ding linto cabaligtaran yapin ding pali ta'ng buntuc at ditac capasensiahan . 2 Tune , ding sasaquen tamu mangalapad la dalanan , dapot ding " punto de bista " tamu linual caquitiran ; atin tamung mangaragul a bale a-tutucnangan dapot ditac ing panaun qng pamiliang pacamalan . 3 Masican ta qng gastusan , dapot ditac ta pibandian , maracal ta sasaliwan , dapot culang casayahan ; maracal ta conbinientes , dapot qng oras magculang , magdagdag tamu pibandian , dapot meditac cayapan . 4 Maracal ta pegaralan , dapot culang caisipan , maracal mu naman beluan , dapot dimut caatulan ; maracal la dening biasa , dapot mas la ding problema , linabis la ding masaquit , aguiang dacal medisina . 5 Sinobra tamung sisindi qng paqueteng cigarillo , pati pamaninum alac todo pasa't alang preno ; malugud ta queng sarili , gagastus ta'ng todo-todo , mabilis tamung mimimua , magmanehung cascasero ! 6 Madaldal tamung masiadu at qng lugud magculangan , matipid tamu qng tula at labis mami-casaman ; mamasa ta'ng asmu ditac , at maralas qng puyatan pamanalbe quening " TV ", queng pangadi mangalinguan ! 7 Mebiasa ta'ng mangabyayan , dapot ing bie mewala ya , midagdag ta'ng banua queng bie , ali ing bie careng banua ; Mengaparas ta qng bulan at pabalic queni yatu , dapot careng siping - bale , ni man-atu ali tamu ! 8 Miras tamu calawacan , ali qng capilubluban , maragul ta bague guewa , dapot dimut qng cayapan ; lininis taya ing angin , dapot diwa merinatan : pamanlait careng tau ing ugali ta'ng dadalan . 9 Susulat tamung maracal , dapot dimut tamu beluan , magplanu tamung maracal , dapot alang megawa man ; mebiasa ta'ng mamirapal at e macapanenaya , migculangan qng intindi't quegisangan qng pasensia . 10 Dening gamit de corienteng maglulan queng inpormacion guewa tala , dapot papa-ditac ing comunicacion ; guewa tala dening gamit ban mag-copia ta'ng maracal , dapot careng parang tau , milalaco ta masabal ... 11 Oreni na ding panaun dareng malaguang pamangan at ding balang sapac atian , banayad melaso pengan ; ating mitmu at magculang qng costumbre't piugalian , at matacong magpatubu't mabibie queng quenimalan ... 12 Oreni na deng aldo ding adua-adua panaquitan , dapot dacal a diborcio , sirang pamilia't tucnangan ; oreni na deng aldo ding mala-palaciong canlungan , dapot salbag a pamilia , quening lugud migculangan . 13 Oreni na deng aldo ding mangabilis a pasyalan , ding yuyugse moralidad , metung benging catacsilan ; deng memaglobong catawan , uli ning calimatacan , ding pildoras a mag-lingo at manyirang caisipan . 14 Ini na iting panaung maracal tamu acaquit qng salamin-calacalan , dacal bague maca-sabit , at qng lugal-pisinupan , ala ni metung a gamit ; deng macualtang mecalulu qng lugud at malasaquit . 15 Ini ing sadiang panaun : ing bayung tecnolojia dalan ne ing pamaniulat tapat mangamanu queca ; atyu queca nung tangapan ning pusu mu't caisipan , o timiran ining gamit de coriente , at tangalan ... 16 Tandanan mu , magsadia cang oras careng pacamalan , uling e cabang panaun atyu la queng panimanman ; mamie cang salitang mayap queng anac mung lilingapan uling caras ning ustu nang edad , icang queang lacuan . 17 Tandanan mu , ing anac mu queng lugud me pacacaulan uling ya ing guintung yaman , pamana mung quea lacuan ; sabiang " Caluguran Daca " queng asawang pacamalan , at careng bunga yu naman , patutuan me cabaldugan . 18 Ining uma ampo caul maguing panulu queng sugat a manibat quening quilub ning pusung malsintang tapat ; milaco balang hinampu't saquit ning capilubluban , ulina ning uma't caul qng pamiliang pacamalan . 19 Pacatalnan me ing gamat ning asawang luluguran , balang oras at minutu , ila ding quecang namnaman ; uling datang , misan aldo , ing asawang pacamalan , anting bula mawala ya , qng oras ning camatayan . 20 Inia queng bala mung oras ating lugud at amanu , sadiang oras para sabian ding amanu ning pusu mu : Ing Bie , E Ya Masusucad Careng Bilang Ning Inawa , Nune Careng Maulagang Oras Mibie Queng Pamilia ! Ing Cacaluwan at Ing Talapagobrang Aldawan Neng EDGARDO BONUS SALE E cu na agyung tarucan,/ e cu na agyung isipan Maybug neng misambulat pin / y ning ca cung cabuntucan Kening pacsang cacalulwan/ parati ta yang pisasabyan King keca tamung aptas/ at aliwa pang aguman. Y keng metungge calulu/ y keng dimut a pamangan Maralas macacalingwan/ at mipapaimburisan Sopan, sopan, yu cu rugu/ e yu cu dinan derang asan Dinan , dinan yu cung gamit/ Turwanan yu cung manasan. A cu pu metung cu naman/ talapagobrang aldawan Manintun capakibatan/ keni nang ca cung cabilyan Calupa da reng calulung/ pane mipapaimburisan Uling buluc a sistema/ ning gobyernung manungculan. Aldo't bengi bibie cu ngan/ ing ca cung sican at belwan Ba cu rugung e milaco/king pabricang pipagobran. Cayabe co deng calulu/ gugulisac kening dalan Sana deng keca ming daing/ y la na ring mararamdam. Deng mapilan politicung/ atyu na keng catungculan Bawasan yu na pu sana/ ing kecong cacuracutan Migising na co pu sana/ e co magmamatudturan. Arapan yu ing problema/ e yu pu sana lilisyan. Panalangin ming calulu, King Guinung catascatasan Salamat king binye grasya/ milamnam atyan danupan Kilub na ning patingapun/ milabas na ke pu naman Nanu ne kaya ing bucas / panenayan, paninapan. INUMA NA CU ArtDax 01/11/ 08 Sasabian da daratang Ne ticumcum cung manenaya Titibuk ya ing pusu cu, ing salu cu cacarug ya Macarungut cung deng gamat daun la babo lamesa E cu malemalayan man, a ngeni ing pagdatang Na Dintang Ne macaba Ya buac, atin Yang samyung mabanglu Paticcuad Ya keng gulut cung, inuma Ne ing pisngi cu Alang capante ligaya’ng menalukyat keng uyat cu Casampat na ning lugud Na keng migsalang calupa cu Nabengi apaninap cu inuma nacu ning Ginu Lucas-Paldas Renato B. Alzadon 01/08/08---Baltimore Bilang piyugalyan a kegisnan tana, mal tang meyangubye pagpaldasan tala; ing cule matuling yang pecatanda na nitang pamagmalun king lub ning pabanwa, at ya na mang anting simbul ning alala ketang degulan ning lugud ta carela. Pabanwa na pala mabilis miglacbe king pangawale na mal tang meyangubye; utus ning ugali dapat milucas ne ing sinulud tamung matuling a cule; wagang tinggap ta na king ya payapa ne siping ning Miglalang, ketang aliwang bye. Inyang lucas-paldas, dinatang ca canu, ali cu miratang, ipanupaya mu; uling ala cu pin yang pekisabi mu pakiyatad de sa ing kecang amanu ban keta miras ya king cangatbang yatu ing e na kinupas a lugud mu cacu. Miras ya canacu. Dacal a salamat kening pepabal mung amanung masampat; aganaca raca, bistaman e sucat! Patawad ibie mu, balwan cung e dapat.... Iti, udyuc ne mu ning macadalamat a e na mepawing pamalsintang tapat.....! At aganaca ke ing sulat mu cacu nung nu mu selita king guintung amanu, king ing penandit na ning pamanlaco cu pigpaldasan ne ning malsintang pusu mu cambe ning pangacu king e na magbayu king capilan pa man, ing lugud mu cacu. Aganaca ke ing pekibat cu keca: Mabanglung bulaclac ning cacung pag-asa, inyang king tangke mu meyagtal cang Rosa kena ra king gamat na ning apili ra....... King aldo mung casal, ing sinta mete ya...! Mimalan yang paldas ing cacung caladwa. Dacal no'ng bilungan king tangke melagas lalam nang bengisan ning aring Taglagas; king mabang panawun ali ya milucas baru nang matuling caladwang migpaldas; pintig na ning pusu nung atin lang cablas saldac lang inawa king sintang meyapas. Ing pusung mebingbing nung atin yang wangis ya ing meguing yelung tajimic a batis, tinucnang ing agus, mipda ing lawiswis ning sadyang cundiman a sari king lambis; mangalating butil banayad gugulis lwa la king pag-asang timbunan ning aclis. Keyalimbawa cu ayup a magsantung king sanga na nitang mibayube dutung; carin ke panayan lubusan magcanlung king gilid ning bunduc ing aldo dudulung; angga king ing silim a magdalang lilung culubutan na cu king cayang salilung. Nung abalitan mung ing ulilang denas menabu yang anting bulung a melagas; ing tacdang panawun icwa na ring miras baneng mipayndatun ing salu nang gaglas; at canita ya pa talagang milucas king patang caladwa ing baru nang paldas. Panabilin cu mu inirug cung mutya e me pagpaldasan caladwa cung mipda, nune yang adwan cu, king ilucas me sa imalan nang paldas pusu mung malyasa; king baneng mituclip matuling nang calma ning amlat ning sintang sicluban ning lugma! Nung Balu Cu Sang Datang Ya RBA-2008 Nung balu cu sang datang Ya mecapaglinis cung bale, mecapanisis cu sana at ing basura miyugse; miglarin cu sang bangguera at mecapanulip lande, ma-ayus ya sang disnan na ing cacung pibale-bale. Nung balu cu sang datang ya miglinis cu sang catawan mecapandilu cu sana at menaliling imalan, mecapanyucle cu sana at mecapanisis ipan calinis cu sang disnan na ala sang musing ditac man. Nung balu cu sang datang Ya mecapaglinis cung pusu, icwa cung asisyan sana ing anggang depat cung licu; mekipagbati cu sana caring e cu cacasundu, payapa cu sang disnan na..... alang dit'mang carug salu. GUINU, QUENG UMANG TINGAP CU ( Poesia ) Neng Jose Roman R. Laquian 7:00 pm. / 2008-01-11 Guinu , queng Umang tingap cu't queng Lugud Yung ibat babo , antinamong miras nacu Qng Gloria Yu't Paraiso ; Tune Ala Yang Capara Ing Dungut Qng Presencia Yu , at Ala Ya Ring Catumbas Ing Uma Yu queng pisngi cu ! Acung taung asmu rungis , mitmu dinat queng sala cu , E Yo linawe ding mali , belabal Ye Ing Lugud Yu ; Qng Quecayung Pamanyatang a e cu amalayan man , Pepaquit Yu't Peparamdam Ing Lugud Yung Alang Anggan ! Nung mebalu sanang agad ing Quecayung Pamanyatang , Meglinis cu sana , Guinu , queng mabilug cung catawan ; Dapot ngeni apitagni't pepaisip Yu , Guinu cu , aliwa ining panlual ing maulaga Quecayu ! Guinu , aliwa ing linis ning catawan at piblas cu ; Ing Masampat , abalu cu , Queng lawe't panimanman Yu Yapin Ing Pusung Lulugud , Sasalpantaya Quecayu , Maligayang Pasalamat Queng Uma Yu queng pisngi cu ! Nabengi apaninap cu inuma Yu cu , O Guinu , qng paninap peramdam Yu ing Lulugud Cayung Tutu ; nabengi mu rin qng Pamaniatang Yu apitagni cu : Maulagang Maquiramdam cami Careng Amanu Yu ! Ngening ala na Cu… Neng : Arnold D. Batul (January 11, 2008 - Hawaii) Ngening ala na Cu…. Papaganaca Cung pasibayu queca Uling ‘nyang ‘tiu Cu pa balugbug sera la Labing mitmung yumu calam alang sala O’t piticum mu la qng Amanung mala. Ngening ala na Cu…. Pepaingulut Cu man quen mung panimanman Licuananan da cang pusung manimbangan Nung luguran mu Cu O magtalipampan Magumpisa sepu anggang talampacan Ngening ala na Cu…. E Cu man belikdan dusa’t parusa mu Pematac latigu qng Crus pemacu mu Lagpas aduang libung dalan guisalan Cu Buclat pasibayu pusung alang tonu Ngening ala na Cu…. E Cu na panayan dalan mung lacaran Salasalapang yang maroc piuliyanan Ania tinubud Cung belasbas caguiwan Queng Amanung Mala queca maniambitlan Ngening ala na Cu…. Quen na mung paninap carin Cu bulalas Yng lugud matalas ban meng apiyalas Pusung magpumiglas queti yatu penilas Cacu ca mebiclas tuntun ca qng Cablas UMA neng Paeng Ing paspas ning angin king kanakung pisni ing aslag ning aldo king pisni midampi ing salpuk ning alun king pisning melangi ing agus ning sibul king pisni misigi ing sala ning bulan king pisni mipilmi ing patak ning uran king pisni king labi paganaka na ngan lelangan na keti oren deng UMA Na kaku manatili dimdam kung patawad ing sala mipawi ing lugud na ning Dios napun ampo ngeni iti e kumupas angga man king tawli... MALAYA Buren mo sang sulapo ku king malayang poesia ding bagyus cung metamimi king panawun na ning dimla. Mituclip la ketang suluc king dalumdum la meculub ngeni mumang mibastag la mamayagpag manyalupsup magparayo king calayan na ning diwang mangundiman! !! RDM CALULU Metung cung calulu aldodo magpamalimus Kening cabilyan cung tutung macalunus E cu pin balu nung capilan cu micabyus Uling pati caladua ku yata macagapus? Dangal nang panaun ing menga palabas Dangal la naman bulung a menga lagas Kening bye kung ala na yatang lunas Panamdam cu king sarili, purus maplas. Capilan cu rugu caya minawa? E na cu man tuctucnang manalangin king Ibpa. Maski ditac mu sana rugung upaya Deng ca cung pamilya mirinan lang saya. NU IBAT ING KAKALULUAN? Neng Carlos Mangalindan Castro Ning Balen Sasmuan King bulung ning Kasulatan, misan kaku yang abasa Ating metung a babai Guinung Jesus linapit ya Magdala yang alabastro mitmung mabanglong kanangga Bilus ne king Keang buntuk kabang iti manaral ya. Ing kananggang makalulan maulaga yang unguento Aniang ikit ding alagad king babai la mikasbu Nanu ing kapakayan na inugse na ing pabanglu Nung iti sa pisali na nabangnan da ring kalulu. Dapot i Jesus talastas na, ing isipan ding menakit Kaya lang peniabianan karing salitang masakit Eye sa lilingasngasan babaing kaku linapit Mayap ing keang depatan kaku ya migpakasakit. Eyu ku maluat kayabe e na lumuat mamun naku Dapot king balang penandit kayabe yo ding kalulu Nanupata pawaga na e la mako ding kalulu Kakaluluan e mabating kabang atiu ya ing yatu. Bayu naka pa lelangan ning Dios a mitmu king kalam, Gewa no king kaingatan ding sablang mung kailangan. Keang tenam ding tanaman, ding danuman kitmung asan Karing ayup a makule, kitmu ne ing kaparangan. Ding animal king marangle pati na king kagubatan Lelangan no ngan deti ban e ka milako kanan Penabilin na mu keka keka la sanang ingatan Ban king bie mu keti yatu kakaluluan e dalanan. King wangis na't kalarawan ning Dios kakatas-katasan Lelangan nong mitmung lugud di Eba ampon i Adan Dininan na lang upaya at Keya lang pepanuanan Sabla binie na karela ban karelang panibalan. Dapot nanu ing gewa ra? Selangsangan da'ing utus na Ing tanamang binawal na ya na pin ing pignasan da Uli niti mitabi la Paraisong tuknangan da Ing sumpa ning kakaluluan pepapusa' Na karela. Ngana ning Dios a mikasbu, kang Adan a mikasala Makasumpa ya ing gabun uli ning gewa mung sala King pawas na ning kanuan mu pamilya mu pakanan ya Angga na king mibalik ka gabun uling alabuk ka. Oyan ing meging uyat na kakaluluan da ring malda Ania nung e ka mag-obra dumanup ka ping bitasa Nung luguran mu ing tudtud ding gamat itamimi la Ing bayat ning kakaluluan pusanan mung alang sala. King panlalawe ning Guinu pante-pante la ring tau Ing lugud na `lang kapara, makualta man o kalulu Ala ya ping pipilinan buri na pin kamtan tamu Ing tula ampon kanuanan kabang atyu ta king yatu. E na ka tamu lelangan ban magkasakit ta king bie Keka tamung pangabait e ya kabud aksidente Atin yang planu ing Guinu, king balang metung a mabie Ing buri na kamtan tamu ing saya ampon tagumpe. Ninung dapat palsalanan kakalat a kakaluluan? Ding manungkulan king balen o ding taung mimusingan? Nung e me sana pisali ing botu mung miulingan Ala sanang mangurakut at alang kapanakawan. Dakal la ring kasangkanan ba't dakal la ring kalulu Dakal la ring mangatamad, magugumun la king bisyu. Detang e bisang magaral, pati obra e ra balu Buri da ing kamangmangan a babat da ring kalulu. Kasakiman ding mabandi sangkan yang e agulutan Lilipitan dong mag-obra sarili da ing pataban Deng mamalaguang mikualta king krimen la mangabiayan Angga potang mitakid la sakban da ing kakaluluan. Ing Banal a Kasulatan dakal ya naman sasabian Nung kekata lang tuparan bie kalulu e dalanan. Ing taung makiganaka mipala ya king kabiayan Lalu na nung ding kalulu kaya la pang sasaupan. Luid Ya ing ANASI at ding cuyug ning Anasi! KA CARLOS CASTRO LUID CA CANG RENE neng Paeng Cang Rene king panga-Capampangan mu Capampangan cang tune Icang manantabe nang asyas ning belangcas a matibe alang maka-abwal keca, alang makapag-bayube ing amanung Capampagan keca ya macasalale.. . Ding sinulat mung casulatan sibul la waring mamagus caring uyat ding pusu mi at king caladwa managlus ica namang talasagip king amanung angus-angus at e na macalingwan king istorya lubus-alus.. . E la adwa, e la atlu ring anti kecang matikdi metung ya mu't ica't ica, ing susulat a matindi alang cutang alang duda, alang ninumang milimpi keca king pamanyulat, pamanyagip, pamagsilbi.. . Nung ating mang lulto duda, o ating mang lulto cutang balu ta nang masayang mu nung keca lang palinawan mas ibye ta ing ulaga king masamyung casulatan a maka-ibye suglung king amanung malalacwan.. . Luid ya ing amanung sisuan luid ca Cang Rene Alzadon pasalamatan cung bina at kecaming pamaniglon uling ding kecang pamasan babanten mila't lalon ngeni ampo bucas at kareng daratang pang panawun... Luid co ngan Cabangsang Capampangan, Mang Ernie, Cang Robby, Cang Mike, Cacang Helen, e co ngan sambitlan pa reng lagyu da reng magmalasakit king amanung sisuan... LUID CO NGAN!!! Asyas na ko ngan ning belangkas a matibe ning ANASI mitagtag ya kambe ning dayang mamalebe ning panawun a mipalcas antimurin ning pagcabie luid ya keco ngan ing parasan tang dalise caring miyayaliwang belwan e la bating ding midake pawuli ning masugid yung pamanantabe tune co ngan Capampangan at masampat a cayabe!!! Paeng SALAMAT neng EBS Salamat isan RBA keng kecang pamanantabe Panayan cu pa mu rin, turu mu cung gumale Uling tutung malambat na cung miwale King amanung sisuan a maybug nang mate. Isundu cunang isundu pamanyulat cawatasan Ban cung misane ngamu pin keng kelambatan Ding amanung tagalug dapat cu lang iwasan Amanu Sisuan pa mu ing ca cung sagipan. Agcatan cu la ding ca cuyug king ANASI E yo pabustan ding poetang magdilidili Sumulat tamung prosa't peosia e co sumisi Canita ing Amanung Capampangan e ya malili. Tara Mamyalung Tamu neng EBS Tara, Meco keni ca cung Caluguran Lawan ye casala na aslag ning bulan Manyalung tamung picu at sabatan Sumawa tamung maki tagalan, pulayan. E na co pate pate meco keni Pandinan naca tamung Fredi Ca rening daralan nang kendi Ibat la pa canu king Cabiti. Tara, tara mamalagwa ta mu ngan Pota gisanan na la ngan Teban Ding kendi, pota e naca ta taganan Mabilis yang mulayi't matalic mangan. |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00127 |