 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY - PAGE 72 |
 |
| compiled by Ernie C. Turla, lexicographer, archivist |
| ||||||
| Contents: Bayung Paradiso - Tony Pena Mercado Atin Lang Panandam Deng Dutung - Perry Am Ing Dutung At Ing Watas - Jason Paul Laxamana Panandaman Cula - Paeng Atlu Nang Pulung Banwa - Lilibeth Atin Daiang Asu - Willlie Dizon Pamanungkulan King Balen - Carlos Mangalindan Castro Sumpa Ning Poeta - Renato B. Alzadon Ing Lupa Ning Kakalulwan - Carlos Mangalindan Castro Pakibat King Kakalulwan - Paing BAYUNG PARADISO (Neng Tony Mercado Peña) Busni me ing pasbul malugud a Pastul kening kaladwa kung sasyo't magbitawul manintun salilung at mapaling kalung bale a tuknangan kanakung payntunan. Dinan mukung katubale tanggap kaku masalese makabusni pusu k'ning karinan kalulu; malwalas pamisip alang sumbat-silip makabuklat gamat pati kule balat luguran ne salat. King bayung Paradiso ibulus muku na alang mansanas ampo nang ubingan hubad a marine e dapat tabingan ala nang tuksu, ala nang manuksu. King bayung Paradiso ala nang luwal prodigal king bakud ning kural makalarin ne'ing busbus makasalbag ne'ing basbas ning tukud ning Pastul ning Guino! ATING LANG PANANDAM DENG DUTUNG PerryAm Atin lang panamdam ding dutung Byasa la naman sagakgak. Potang makyalung la king angin Masaya lang terak-terak. Atin lang panamdam ding dutung byasa la mu naman kumyak. Potang masugat la katawan Maki lwa lang patak-patak. Atin lang panamdam ding dutung Byasa la naman masindak. Potang idagsa dala ding mangutud Gugulisak lang mibagsak. ING DUTUNG AT ING WATAS neng Jason Paul Laxamana Aro, ne, itang dutung king mula Dit na mu dasan ing pangalanta Kaya, maluat, alang menibala Ala rugung lagu uling mawa Sisilip king awang bitiawan ne Ning watas ibat kilub ning bale Ing dutung a migkulangan sese Ing dutung a mayayari na biye Ing lunus ing tambing memayani Pusu ning watas a mekasaksi Buri neng bayuan ing pobreng bili Dapot e bisang lumual king pali King banyu atin timba ning danum Oneng king pun matamad iraun Ikua nang linimpas ning panaun Asisilip ne pa mu rin ing pun Kinua na ne mu ing panyulat na At miglalang ne mung poesya Dikil king malukang pun king mula Kabang kilual awang lalawe ya Yari kilub ning walung minutu Ita na'ing saup na king kalulu At mipasno ya ing kayang pusu Ita mu ing mipasno, ita mu Penamdaman Cu La Paeng Penamdaman cu la sagacgac ding dutung neng yacung matula masican malutung..! Penamdaman cu la calupa da naman neng tutulu cu lwa ating panamdaman.. . Penamdaman cu la neng miraragsa la reng dutung king gabun malalasac la pun..! King cacung panamdam migising cu diwa ing amanung siswan yang kecatang tula... Paeng ATLU NANG PULUNG BANWA Atlu nang pulung banwa / ing milabas ba' kapilan pa! Makikelangan man kanita / matimbang ya inumpisa, Banwang tinipun na / ketang mayap mikana ya, Maulagang lagyu na / tutung tula manguinu ya. Kapanaunan ta’yta / nung atatandanan yu pa? Belangkasang letra / pugad ning pangarap ta, Matingkad at makule ya / king pluma memagumpisa, Penagimpan siwala ya / 'tang Ambisyun miglakbe ya. Inyang lalakad ku / king eskwela palub naku, Kabud aisip ku / nukarin ya’ing luklukan ku, Kanita’ng itsura ku / apigunam-gunaman ku, Misna’t melikid ku / letratu kang tengalan ku. Kilub naning kwartu / tatalnan ya kacung libru, Palaisipan reng maestra ku / tuturu ra, makananu? Alang pakundangan yaku / karelang mangutang ku, Pamagdudang lawe ku / itang pakibat, era balu. Itang Matematika / a malinong Politikang balu, Bilangan mo daliri ku / mimemorya ku ing idad ku, Kaluguran king Eskwela ku / maratna kang linawe ku, Bultu bultung kukutang mu / gradu nitang kabiasnan mu. Misan mikyabe ku / king gayumang biyasa kaku, Balamu wari yaku / dekorasyun mu king lele mu, Ketang suluk migtampu ku / melunus namu sarili ku, Ketang kimut Amanu mu / migsilbi yang Amun kacu. Kanita man e bubulad / mangasaya tamung paksa, Aganaka kunang bigla / bulbul-asu ampon pusa, Kapamu namo pala / o' paquiyabut mune sa, Sulat ya para keca / „loveletter“ ya Sinta. Atatandanan kupa / misan kakung sinitsit mo, Arimonyan mukung / iyatad kanu kaibat meugto, Cayarle detang grupu / 'tang gatpanapun mebantilo, Lawen dana ka man Jo' / samasnan me ing diga mo. O’ Anghel dela Guardia / pamu'eka paytaranta! Tau ke kanu’y’ta / ba’t ka-tsismis mo amu’ paya, Yang talakad maporma / mas buri da nanu’pata, Kaguwapu mu kanita / o'malagu naka man Kaka! Masaya mupin kanita / lakwas na nyang mas anak tapa, Mapamusit deng mapamusga / keca lalung-lalu naka, Misakab ka man kanita / inyang Indu ku ikit naka, Misabianan katang bigla / nya binasted danaka pa. Ing sekundu ning minutu / dudurut mu kening yatu, Sumangid ning oras mu / yang isip mu, kablas kacu, Kikildap ing susulud mu / dapot kaku simpli yamu, Dekada na'ng idad mu / pilan banwang tutuklip mu. Datang man ing aldo mu/ balikdan ka't batyawan ku, Parangalan yang titulu mu/ tataluntun 'ting yaus mu, Sasapnuan ning isip ku/ panimanman kang Indu ku, Batyon ngeni at pasibayu/ entabladung paparam mu. Mirayu ku't nu' mipakde / dayuan keni pelsintan ke, Kapampangan- Amanu ke / ken katamu bibigkas ke, Malumene isuglung ke / basan kune damdaman me, Maliwalas pusung sane /'ting mapayapang aldo tune! MASAYANG PASKU AT MASAPLALANG BAYUNG BANWA QUECONGAN PU! Lilibeth / Alemania Misulat, 20Dec07 ATIN DAIANG ASU, ALIMULA ASUBUCAN neng Willie Dizon Ding maqui dayang asu alimula asubucan Macatilad canuan ditac man alang capagsintian Talacad nanu yaman alidaca gulutan capilanman Iyang carelang iapag mitmung lugud't catapatan!. Ding maqui dayang asu alimula asubucan Aduang gamat tanggapan utus ning catasan Planu yang macacroquis carelang pamintuan't taluntunan Tune carelang iaduang alang casimparang tepangan!. Ding maqui dayang asu alimula asubucan Saingsing man alila queng pali ning labanan Quing isip macasinsil't macauquit tagumpeng sasanacan Miambula daiang asu ampo daiang Katipunan!. Ding maqui daiang asu alimula asubucan Ania acu queca abe ali mo dapat kuritan Aqua mung mipacarine carela alang atrasan. Atin daiang asung memalen, tune caiung Capampangan! Casangguni ring watas ding catayang tawling "ud" neng Paing Cabud-abud na lang lingcas ding amanung tawli lang "ud" at miyapag la king dulang ning pisulu tamung lugud lugud king amanng siswan ya ing sentrung macabucud ning kecatang piyagpangan talete yang alang patlud ning Indu tang Capampangan a kecatamu mitubud ban sagipan ya king lalam, ing amanung malulumud antimurin sesen taya't pasicnagan ya ring ilud ala nang atrasan abe, gisingan la ring matudtud..! PAMANUNGKULAN KING BALEN Carlos Mangalindan Castro December 18, 2007 Ing pamanungkulan e ya gawang biru, Iti pigkalub ne malugud a Guinu, Keka yang luguran sagradu yang tutu. E me dudungisan ban e ka manabu, Malalam a kulkul ning dine at gulu. Atin yang upaya ing pamanungkulan, Ban kekang atupad simpa mung parasan. Pigkalub de keka ban kekang gamitan King ikanono da maldang sasakupan E king pansarili't diring kapagnasan. Kapakibatan ya ing pamanungkulan, E man karing taung kekang sasakupan. Ing mayupayang Dios a keka linalang Yang milukluk keka ban kekang tuparan Pengaku mu't sumpa kanitang alalan. Talasuyu na ka ning Dios a miglalang, Ban ing kapayapan kekang yang imbutan. Pamisasanmetung iyang panikuanan Ing kapanakawan pilit yang pututan, Ban ing lugud ning Dios kamtan ning balayan. Makasalale ya ing kekang tagumpe King katapatan mu at malinis a bie Alang kapintasan karing sablang bague Maging uliran ka, ba mung asalese Nanu mang kaguluan keka da ilele. Ing kekang sikanan aduan mu king Guinu, Ding keang Amanu gawan mu lang sulu, Matulid a dalan ya ing lakaran mu Ban e ka malili't e ka miparayu Bukal ning paniulung a panikuanan mu. Sumpa Ning Poeta Neng Renato B. Alzadon Ing Poeta Pakdu makukulami ne Ining susulat na, ene asalese; Dakal no ding benging dili nang maglame Dapot ing diwa na e bisang mantabe! Bayang datang diwa, Ing Poeta Pakdu Ya ing aisip na ing munta king pulu, King Pulung-kulayu nasa neng ibubu Ing pang-laureadung "Poesiang Guintu". Oita pin, kabuklat ning mayap a abak Memun ne Y Pakdu king mutyang kabislak Penapik no pago ding lima nang anak Kaibat, tintunan ne gasgas a e gasak. King kayang panlako bukud darala na Mapilan a papil at ing paniulat na; Inyang dasnan na ne ing pulung sarya na Aldo kukuldas ne ketang tungatung na. Lalam nang lilung ning lubas king bungang Dwat Karin ya linukluk ining talasulat; Kanian ne ilague ing kayang paniulat Ing Obra-Maestra bananeng isulat. Sumulat ne sana ,dapot minambangan Ing danup at kau ning kayang katawan; Bisa ya mang minum ala yang inuman Bisa yang sumubu ala yang pamangan. King ulining puyat, pagal, danup, kau Bigla yang melata kabud nia malilyu; Kalulung Poeta mipda ya animu!!! Oita! Yang dili nang alang male tau!!! King panga-ungle na king tigang a sulip Pantas yang tinikdo ing kayang pamisip; King siwang ning tabing karin ne asilip Ing atmu katimbang a pamipatilip! King malating siwang ikit ne ing Matua Painuman deng daya panyuglung king bie na; Ketang peka-altar lalapit do kaya Ding anak ding Watas a susugatan da. Mipatingangas yang mengablad, mesindak! Ila ding ikit na detang kayang anak Magsakripisyu la--- daya da papatak King panat nang labi ning Matuang makapiak! At kayagnan na ning aklis da at daing Ding anak-poetang king danup gigiling! Linub ya Y Pakdu king siwang ning tabing At selubungan deng maplas a tampaling. Iniang lawan no ding menampaling kaya Ila ding atinan, pamuntuk, at biasa ; "Buri kulang akit ding anak ku", ngana Segakgakan de mung anting mamulang na. Pituya-tuya de at pitulak-tulak Kambe ning sunu ra at matning sagakgak "Oyan ing Poeta", ngara pang maglibak, "King kai-isip na, mesira ya utak." "King pangamulang nang susulat poesia Ilang magkasakit ding kayang pamilya; Kukunan no daya ding mismung anak na King baneng dinan bie ing amanung mana." "Bat e mipakanian? Lon ye pamanyaptan Kesa king sarul ya susulat ne naman; Inia ding anak na linto lang danupan Dungis-dungisan lang mete paintungulan." Ding amanung deta ilang mekapakde King bigung Poetang king gabun mirate; ken na apialas ing mapusio nang bie Magdilidili ya king benging malumbe. Mistula ya waring mamulang nang tutu Alang kasausig king dulum ning pulu; Ding kawatasan nang king kaniglan bibu Ala lang ulaga, sisibi da la mu! King katajimikan na ning benging ita Meramdam ya itang Sumpa Ning Poeta "Nung Payaso ku mu king balen kung sinta Bitasang e naku sumulat poesia." "Karing pamilya ku ibie ku ing tungkul Ilang maguing paksa ning kakung pamyukul Yang gawan kung papil ing gabun a ulyul Yang gawan kung pluma ing sudsud ning sarul!" Inyang pauli ne, 'guiang malaut ya pa Abatyawan na ne ning kayang asawa Agad selubung ne kinaul ya kaya At layun neng kitang itang susulat na. "Ayari me", ngana, "ing kekang susulat?" "Oh, wa, ayari ke", ngana ning pakibat; Saka ne inabut ing papil a pirat Nung nu ne binalut ing pakling panyulat! ING LUPA NING KAKALULUAN (King mata ning metung a anak) Sinulat Neng Carlos Mangalindan Castro Tau Sasmuan, Pampanga "Tatang, marine ku", ing siguk ning anak, Malan kung susulud atin ya pung gabak Ini pung salol ku busbus ya pu tumpiak At ding sapatus ku ala no pung suelas Masakit ku bitis, ala kung tsinelas. Ing gulgul kung buak pugad de ding liyas, Babau kung aldo, bangil ku mengasias Marusing kung lupa, batal kung memalyat Burakan kung bitis, kukung mipnung dinat Sipun kung tutulu, kapilan mabawas? Malangi kung balat king butul mipakat, Mipnu ku pung galis uli na ning dinat. Mangaslak kung mata, labi kung mengaspak Pandirian da ku pu kalupa kung anak Tampulan kung tuksu a makapangaklak. Eke man pu balung isulat lagiu ku, Pagsisti ra ku pu ding kaluguran ku. Gabun ning eskuela mituntung ali ku Talan man pung lapis eku man pu balu "Pedrong alang balo!" aus da kanaku. Neng makatando ku, malati tang awang. Pagumasdan ku la anak a daralan. Mangalinis la pu pamikakatawan Naku pung kariria, sabe managuimpan Ing masayang aldo, kapilan ya datang? Pota pung muli ku ala ku mang dasan Ing kanakung indu kanakung paintunan Buklat ke'ng kaldera ala ya mang laman Inda nukarin ka? Manintun kung kanan. Kaibat abalu ku atiu king sugalan.. Potang lapitan ke't ume keng kalbitan Ing maslam nang lupa kakung atangaran. Palmurang masakit kanakung damdaman Tatabi naku pu, pilit papalakuan Ena man pu kutang nung e ku pa mengan. Potang malasing ka, mangulu king dalan E ku na pu balu ing kanakung gawan. Bisa kung salikut at lumbug malalam, Bang e ku akakit ing kekang daraptan Uli ning dine ku, buri da kang lakuan. Pota pung lumbug ne ing aldo masala, Dalumdum ning bengi ume na pung dugpa. Mantun kung pagkeran ba nang painawa Dapot ela mipiak ding kanakung mata Uli ding matua ku mipangulisak la. Mengari kung sisi alang salilungan, Ing kanakung indu e na ku lukuban. Aplus ding palad na kakung panintunan, Pali na ning lugud e ku aranasan, Mayap ya pa `ing sisi atin yang kandungan. Misan kukutang ku ba't mibait ku pa Keti babo yatu a batbat king dusa Ba't e pa metakmus kanakung inawa Sana kabait ku batal ku sekal da Ban ena danasan dakal a palasa. Nukarin ing lugud ampon kapayapan? Nukarin ing saya ampo ning kanawan? Ba't e ku akakit, e ku aranasan, Ing mura kung isip pilit nang paintunan Nung nanu ang sangkan na ning KAKALULUAN. Tatang makibat ka kening kakung kutang Buri kung abalu ing sukat kung daptan Nanu ing paralan ba tang alampusan Ing sakit na ning bie at ing kakaluluan Tatang, MARINE KU, yan pu ing katutuan. Pakibat king Kakalulwan neng Paeng Agpang king kekang belangkas ing lupa ning kakalulwan milarawan ya ing dusing ning biktimang kayanakan e na buri ing meganap king bili nang makalantang pero kaylangan nang marap, buri na sang payngulutan. .! Biryanan da reng pengaring ing kabilyan dang kalulo ? o serya rang gewa iti para ing bie ra magupo ? o subung na ning kundisyun ning sosyudad a magulo ? kabud na la mipapate alang sangkan punu't dulo ? Ing kutang mu nung nukarin, lugud ampong kapayapan anti murin ing kanawan, saya keka alayu ngan pilit murin panintunan king bubut mung kayisipan nung nanu ing maging sangkan ing sakit ning kakalulwan.. ! Ating sangkan penibatan ba't dakal la ring kalulu agpang king abitasa ku mibalita kareng dyaryu kareng TV, kareng radyu, karing labi da reng tau yang isiwalat ku keka ring balitang atipun ku..! Ing mumunang maging sangkan ing pera da ring memalen a mitipun king gubyernu dakal la reng mipaburen mibulsa lang pansarili at e ta no dapat tunggen a mapilang manugkulan, mipapanuldu la pa ren..1 Pawuli na ning kurakut makalantad kareng dyaryu mipaburen e melingun pamangaylangan ding tau kabang inyang pabotu la, mitnung dakal a pangaku ing lugud da king memalen, mengakalinwan na rugu..1 Anya ngeni keng panawun detang e na makabata lulwal na lang gugulisak, magreklamu lalaban na e na kabud nanajimik, e na cabud mangadi la ipagmasyas ing matulid ampo ing katuliran da..! Nung atin kang abalitan mengawala, mengarakap nung atin kang amamasid, makilabang gugulisak oren deng kabalen tamung magkapilit alang sindak para mika-kapasnawan ing kabilyan tang melasak..! Maresolba ing kabyayan da reng dakal a kalulu nung miyabyeng kayadwanan a miragdag ing pa-sweldu at midake ing asikan para kareng ortelanu kanita na ing tagumpe ring kalulung Pilipinu..! |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00035 |