 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY PAGE 71 |
 |
| compiled by Ernie C. Turla, pres., Academia Ning Amanung Sisuan |
| ||||||
| Table of Contents: 1. Gulisac Ding Capampangan - Paing 2. Yampang - Jose Roman R. Laquian 3. Mampang - Paing 4. Don Pablo - Paing 5. Dalit Ning Maglacbe Neng Rizal - RBA 6. Carlos Castro - Paing 7. E Yu Palangian Ing Lua 8. Para Qng Parasan Ning Amanung Sisuan - J.R. Roman 9. Suporta - Paing 10.Migising Ka - Carlos Mangalindan Castro 11.Ing Pascu Ning Macawale - Renato B. Alzadon Gulisac ding Capampangan neng Paing Ba, managalug ta namu, ba tang micacayintindi? nung iti cutang ya abe ing pakibat cu caniti malwat ta nang managalug at maralas ya pa iti a pane yang magagamit, misusulat, masasabi..! Ding opisyalis ning balen, talaturu king iscwela caring dacal a pengari, magobra king upisina deng lilito careng syudad, detang taung mamagtinda Tagalog ing pisasabyan, antimo ring manistima..! Cacu ya pung apapansin, a bina yang malalacwan ing salita tang amana, ing amanu tamung sisuan. cacu salamin ne ning bye, king caladwa mibalutan; manibabo yang Tagalog, ya pung cacung gaganacan..! Palala ne panamdaman, nung wari sa keng masakit ing indu tang Capampangan, kecatamu, yang mibayit mangailangan yang lingun, pansin ampong malasakit nung macananu yang mayulu ing sicana' na magbalic..! Dapot ali, nune ngeni, pauna reng lilingunan ing Tagalog a salita king balen ta yang masican unggu re pa't pagtumayla, sisesen de ketang duyan cabang iting Capampangan, ing aldo na mabibilang.. ! King casakitan na bili ing Indu tang miwawale atyu keka ampo cacu, itamu ngang macalele dala taya king uspital ban malingun mawulu ne king iskwela ring tuturu ilang doctor a metungge..! Bayu ne pu ume carin kecata neng pamalita sesen tane at lingunan, pamasa ta caring sabla basan tamu karing labi ing amana tang' salita paburen tana waring mawala nyang anting bula..! " YAMPANG " ( Poecia Ning Sucdul-Banuang Lugud ) Neng Jose Roman R. Laquian 10:20pm./2007-12- 22 Mibait Ya ing metung a Anac para quecatamu , ing Lalaquing Anac mibie Yang Yampang para queng yatu , at qng pago Na mibili ing ustung pamangobiernu ban mipacde't misaplala ing bie dareng balang tau . At ing Queang Laguiu , mayaus Yang Macapagmulala , Tagapayo , Mayupayang DIOS at Alang Anggang IBPA , Principe ning Capayapan tune't alang capupusan , Ya ing Sucdul-Banuang Lugud , at Ya ing Daquilang Yampang ! Metung nuan bengi , mibait Ya at ding tune sancan : acu , cayu , at ing yatung miwale qng Queang arapan , miwale qng arapan ning DIOS a Cabanal-banalan ulina ning casalanang minana tamu cang Adan . . . Misan , metung nuan a aldo qng Golgotang maculimlim , ing Lalaqui , manangis Ya , quetang Curus macabitin , at ing bie Na , ing Yampang Nang panatbus qng casalanan tamu , ban ta'ng mipatawad at cumabieng alang anggan ! . . . Salamat pu , Guinung Jesus , qng metung a benging nuan , qng Bet-lehem nung nucarin ing pagasa menibatan , nung nucarin ya mipasiag ing Lugud Yung Alang Anggan , at quetang Curus qng Golgota , binie Ye ing Caligtasan ! MAMPANG Keng inampang mung poesia agpang ya king salucuyan mampang cu king pamitugma keng panawun Nang kebaytan ning Guinu tang Jesucristu a Minyaclung king ketawan ing capuryang alan angga ngeni at capilan pa man. Atin pa waring papaygit king marangle ring macudta nung ing bucud macasentru ing Miglalang a Dios Ibpa? ing bunga ring selasan tang mabulaclac a salita menibat ngan Kaya iti karing masaplalang diwa. Anya ing tiparan tamung macasulat king amanu panese yang pamanirug ketang paninapan tamu ing tiparan nang San Jose ala nang pamicacunu mepalyari at metupad ing ula ngan mipaltutu. Pasalamat taya't puryan ing Guinung Dios a Miglalang mantabe Ya kecatamu caring galo tamu't tacbang ing pusu tamu't pamisip ing kaladwa ta't catawan miyampang ngan king arap na diwang cabanal-banalan. Paing DON PABLO Paeng Careng mensayi yu keti, masaya ku pung mamasa keng galing yu at tepangan, aliwa co careng sabla panyabac co keng labanan nung wari sana keng gera ken yu cung cagulutan yu, manalbe mu at magsaya!!! O yan naman ing canaco, tsismis at pasulat-sulat pero keng amanung sisuan ya mung cacung acarapat detang bisang macabasa keng indredus alang dapat mecad amanu lang luma ampong bayung ditac-ditac! !! Isundu yu ing tepangan, sagap, tumbuc at tampaling careng beyit Capampangan, memagaral at magaling at saca la managalug, agnanan yo king sapingil at bala sanang mimasmas king catutwan ban migising!!! Yacu nung managalug cu, salicut cu at magpanpan Uling nung abante yu cu, masagap cu malingmingan masanting na ing mimingat uling ala cong parangsyan deng managalug Pampanga tutu yo pung acasaman!!! Magsane na cung susulat, migagale, sasalita king amanung sisuan keti uling masakit nang bina baca nung managalug cu king panawun mikit cata pota tanggap kung sapingil, paldac ampo pang palmura!!! Don Pablo ken lagyu yu, mayakit na ing tepangan anti la pin ding berdugung mamarusang mangasican icong anggang managalug king balen tang Capampangan lisya na ko king arap na cang Don Pablong tampalasan!! ! Dalit Ning Maglacbe neng Rizal kepampanganan neng RBA Calupa ning bulung melanta, melugus pisintac-sintac na ning angin a mamyus; calulung maglacbe 'lang mutyang cayutus layunan, caladwa't balyan nang ayawus. Panyaluputan ne ing calma nang malyap nanan ne man dacpan ali ne aracap; malagung talindo bistaman maulap e ya rin tinucnang ketang pamagdulap. Udyuc na ning diwa a babye sicanan susulapawan na ing mingatbang nangan, inirug na king bye ila ding taguimpan ampon ing aldo na ning capagpaynawan. King salu na nitang disyertong malumbe malyaring carin ya miyanganan a bye, calingwan ning yatu at balyan nang tune mipayapa nya sa calulung maglacbe. Dacal la pa detang caya mangandirya ayup yang maglacbe king bansang myaliwa; e ra case talus degulan ning lugma a liligalig king pusu na at diwa. Nung misan a aldo pagnasan nang muli ban ding mal king bye na yapa no saguli; ing carin akit na lasac lang gusali at pantyun ding cuyug payapa na bili. Calulung maglacbe! Nanung ulyan mu pa king sariling balen ala na cang sinta; ding carelang pusu bustan mong magcanta lumito na ca mu king myaliwang bansa. Calulung maglacbe! Nanung balican mu ing lwang patungcul da keca ala na yu; Calulung maglacbe! Dusa calingwan mu king lungcut ning tau, mayli ya ing yatu. CARLOS CASTRO neng Paing C...arlos malaus ca abe keng kecatamung ugnayan macabuclat ya ing pasbul caring sablang Capampangan agyang e ya Capampangan dapot ing amanung sisuan yang buri nang sasalita iti cayagum ya naman..! A...gpang caring manimunang mangasipag a cayabe sumulat ta nang sumulat ngara ba tamung misane king amanung Capampangan, pamanapse, pamanggale saca tano panuliran nung atin mang mipatawe..! R...etang bage mangalamlam, sibolicu't alimbawa rima-rimang pacabilang, pulosa man o picudta poesia ring Leoryado, talasulat o sapatsa keti ya ing academya, pamagaral, magpabyasa.. ! L...alu pang maca-engganyu keting kecatang aptas macabalu tang amanung e man sadyang mayayagcas dening abe tang poeta king galing da ampong gilas ila ring guyabnan tamu ketang balitang ding watas..! O...ba't mecad king sarili a acutang tamu ngeni ketang napun nacadwa na alang pasbul anti keti mibuclat ing diwa tamu miyabuban ta king pali iting malablab nang nasa ing aptas na ning ANASI..! S...ulu ya waring masala king kecatang kayisipan ing ugnayan tang iti nune bucud Capampangan ding tema king balen tamu, sentru na ning pisasabyan tatas taya king matilo ing amanu tamung sisuan..! C...abang lalacad ing oras king bulung na ning panawun eta mu man apapansin ding amanung mengalawun maging bayu la king mata king lawa ta mititipun macabubu tang poesia beyit ning pamicatagun. .! A...cung magsane mu naman pamanyulat Capampangan mitayid nacung matalic king aptas ning pibutnulan ining daya cung mamagus king uyat manalacaran papalcas kening diwa cu ing amanung cacung beytan..! S...ana mantabe ya ing Dios king kecatamung parasan caring kecatang amanu mapinu la pangayagpang uling ding egana-gana a kecatamu ngang bewlan dinake Na kecatamu gamitan tang malinisan..! T...utal miras na rin iti isundu tanang isundu pamagsane Capampangan king cagiwan tang asuyu metung bage macasican macasaup e mu nanu uling ing Tagalog rugu tatacpan ne ing amanu..! R...afael ing cacung lagyu ing bayu mung cakilala mibayit cu king Masamat baryu da ring maglalawta Baranggay ne ning Mexico, lalawigan ning Pampanga pagmaragul ke sang bina Capampangan cu salita..! O...yan abe ica na sang kumulang man o dumagdag dening piyug-ugne cung salita lang pemangalap Cang Mang Ernie at Cang Rene ampong cang Cang Tony ibat at aliwa pang poeta at king Dios cu pasalamat... ! E Yu Palangian Ing Lua Ning Biseru 12/17/07 Mapusyo ya ing kule na ning daratang bayung banwa Anti mong makisanmetung kareng lulam da ring lupa Uling karing balang balen pane ing sisikasuan da Detang mipuk king upaya ita mung para karela Mapilanpilan pang bulan kekatamu yang tengalan Ing masayang pangapuk na ning bayung pun lalawigan Bistaman king e ya sadya at metung ya pa mung baywan Ing marangle pulitika mitmung tapang neng telasan Ketang kayang pangalukluk king matas a katungkulan Ding memalen amatyag da…ing painturung kapasnawan Uling kaya mayayaquit ing laus lub a kasuywan Para king kasaplala na ning mabilug lalawigan Dapot nanu ing milyari obat kaya mipakanyan? Ding aliwa e da buri mayap a pamanungkulan Manimuna na la detang mengaturan a kabyayan Ania ngeni susulung da e mayap pamisagsagan Nanung ing akarapat na mayap ya man ing pamuntuk? Nung magdilidili ya mu ketang parasan na't imbut? Ding dapat nang kasanmetung pagnasan de pang milugmuk E na pa balang ing balen mirate ya at mikutkut! O balen ming pakamalan bakit kaya makanian la? Nukarin lang ring mangayap a mamuntukan mung sadya? Dening atyu king upaya megaring balas aplaya Magparagus la king alun nukarin ya man munta! Damdam kayu o manungkulan king gulisak ding memalen E yu na sana paburen keng balang suluk ning balen Detang mata rang matamle detang taung mipaburen Sumiklab lang anting api … ban panlualu ya ing balen! E yu sana panenayan ing mangalambing dang bosis Ding kekatang kayanakan mangalako la king sunis Pota mamaglual la karing silid dang pipagaralan At lumakad lang magtambul karing libutad ding dalan! Mulingid karing daraying kabubuslan kasakitan Pulisan yu itang lwa da ring memalen manyambitan E yu na paburen langi karing pisngi rang musingan Pota iti maging dayang… magus karing kabalenan! PARA QNG PARASAN NING AMANUNG SISUAN ( Poecia ) Neng Jose Roman R. Laquian 1:20pm./2007-12-24 Pagmaragul taya't Pane Pangamanuan , Yang itampuc quening Bacuran-Capampangan : careng bale , escuela , opicina't calacalan , Amanu ta'ng Sisuan ing Ipasquil at Babasan ! Tara , Capatad Cu , tayang Pisaup-saupan Ing Tanda Ning Quecata'ng Panga-Capampangan , Ing Panandam tamu qng Pusu at Diwa Emu queng Salita Nune Pati Gawa ! Tara Na , Capatad , Ala Nang Atrasan , Isulung taya ing Mayap a Parasan A Icacasaplala Ning Amanung Sisuan , Ing Pacamalan Ta'ng Amanung Capampangan ! Pagmaragul taya't Pane Pangamanuan , Aguiang nucarin tamu miras a cabalenan , Capampangan Amanung binie Ning DIOS IBPA : Amanung Dalise , Macatas , Ma-Diwa ! Pagmaragul taya't Pane Pangamanuan , Yamung Itas tamu qng Bacuran-Capampangan : careng bale , escuela , opicina't calacalan , Amanu ta'ng Sisuan ing Ipasquil at Babasan ! Luid ! Luid ! ya ing AMANUNG CAPAMPANGAN ! , Amanung Liguran Dareng Pipumpunan , Amanung Dalise , Mayumu't Maniaman AMANUNG DAQUILA , Ngeni't Capilan Pa Man ! SUPORTA Salamat karing suporta king amanu tamung siswan. Ninu pang magmalasakit nune mismung Capampangan; E ta neman apanalig keng Bulacan o Bataan, ing masakit pa careti, salita ra palagapan..! Panawun na ing kimut ta, ketang cagiwan ta't agyu. Balang casindagul tingting ketang asawup ta rugu; Metung neng bungkus paglinis neng miyabe-abe tamu, ing pwersa ning pamagalsa sisican yang e mu nanu..! Ating midinan regalu king belwan dang pamagcanta atin naman ing talentu pamagrima king poesya pamagmulat, pamanagcat, pamanyulat ortograpya ding casangguni ring watas ilang bibilug king obra..! Pasalamat lalung dacal, antabe ning Mayupaya ing babye Nang alang cupas tutugtug Na king masala king dalan tang tatalasan ing imbut tang mandatila manatiing Capampangan king labi ring magsalita. Paing MIGISING KA Carlos Mañgalindan Castro Sasmuan, Pampanga Angga pa kapilan ing kekang panutud? Agkatan da naka ding Kea tinubud, Buklat mong mata mu, eka pa matudtud, Yatyat mo ding gamat, pati kekang intud, Malan mung pag-obra, keka yang isulud. Tando ka king awang, lawen me'ng paligid. Pisak ning dalumdum ing keka akakit, Mata lang mebulag ding babie pasakit, Karing kabalen tang maluat nang alipit Ning kasakiman da retang taung ganid. Tara tipa kata king barung-barong mu. Lande mung pigkeran, bigsu mitalabu, Ing kekang bumbungan, king uran tutulu, Eran mung makuyad, bigsu ku menabu, Dinding mung penakap, kartun mung malutu. E tana mamangan, uling alang kanan. Itang kekang kalang, e ne milablab man. Siguk ding anak mu, e buring damdaman, Maniawad lang danum, ditak mu mang kanan, Ban kaplas ning atiyan era na damdaman. Ding karelang mata ta nala mengaslak Ing karelang balat king butul mipakat Uli na ning danup, ampon alang lingap Paintungulan da pati na paninap Tikpan na nang lubus matuling a ulap. Ketang bandang wanan, karin ka malikid. Nanung akakit mu, lawen mung matulid. Detang kayanakan magdalang pasakit King balen tang tibuan uling e matulid Karelang gagawan keng droga mibulid. Ketang bandang kaili, karin ka lumawe. Nanung akakit mu, lawen mung manene. Ing indung magdusa at managulele Maniawad pakamal, ditak mu mang lawe Ketang asawa nang mibulid king bote. Keka yang pagmasdan kekatang darasan Nanung akakit mu, lawen mu sa naman Pamilyang misalbag, anak a danupan Misisiping bale, ala lang gagawan Nung e mipapate, ing puri sisiran. Kekatang balikdan kekang kagulutan Nanung akakit mu, lawen mung miuman Miyaliwang bisyu, sugal at inuman Dakal lang lalaki ala lang gagawan Uling alang obra king balen tang tibuan. Nu ka man lumawe, nu ka man malikid Ing karalumduman yang kekang akakit Kapilan ya sumlag king kekang paligid Ing sala ning munag, at sulung marikit Ban balen tang tibuan e ne mayalipit? Nanung kailangan ba katang misalba Kaniang kasakitan alang pangisnawa? Tuki ka king gulut ban keta akit ta Itang kaligtasan a panintunan da Ding kabalen tamung maluat nang magdusa. Agkat dakang munta king Mayap a Pastul E ka sa gugulut at e ka tututul Keka yang subukan ban eka masaul Aligwat ning diyablo, ning laman mu't butul Ban milaya na ka king keka kakaul. Masayang balayan a misasanmetung Ding pakakalulu karin la magsantung Mengaring tanaman karin sasalilung Ding taung mapagal manintun magkanlung Lugud a paintunan karin la misumpung. E naka dumanup, takut milako na Payapang matudtud uling mabsi ka Ding anak mung kikiyak e no damdaman pa Bale mung busabus, maging tuknangan ya King kekang kabiyayan, maging masikan ka. Tuki ka king gulut ning Mayap a Pastul Nu naka man dala, e ka sa tututul. Ketang keang tukud karin ka kumaul Ban e ka mitakid at e ka misukdul Ketang KAKALULUAN a keka kakaul. > Ing Pascu Ning Macawale > Neng Renato B. Alzadon > Kingsville, Maryland--1978 > > > > King bili cung macarayu king sintang labwad cung tibwan > mangulila king casuyu, pengari, at cayabyayan; > e cu malyaring tumutul king awus ning cayisipan > a tandawan co king diwa casuglung ning bye melacwan; > lalu na ngening ing Pascu pilan ne mung catacbangan > datang neng magdalang saya king mabilug a ketawan; > kening panyatang nang iti lalu ke mung panamdaman > ing caplas ning macawale caring maldang pacamalan. > > > > Caluguran cung Poeta ibye mung pamanupaya > nung keca ipagtapat cung ing Pascu cu atin yang lwa, > yang bucud panaguimpan cu ing abe co't cayambula > detang licwan cung cacuyug kening aldo mipagpala; > at uling macarayu cu ing pusu cu e ya bisa > ban tanggapan neng manyaman ing aldo ning pamagsaya > nung atin mang sayang datang mamaco yang malalagwa > cabud ding canacung licwan miuman cu lang aganaca. > > > > Wa, agaganaca cu la, lalu na detang malati > a ala pang camalayan kening yatung mapanyawi, > ing pangisnawa rang bingut a masamyu at mapali > mal da ding anggang peca-mal a e miyablyan salapi; > cabang caring cacung tacde patudturan cong bantiti > ing paninap king bucas da macaslag yang pinenari; > o' ninu naman mo caya ing e mica lwa king pisni > ngening cacu lang gunaman ding mebating a saguli. > > > > Agaganaca kya naman ing malugud a indu cu > a e kinulang a suyu manibat king malati cu; > nung atin yang panaguimpan ya ing canwanan king bye cu > ban acabyusan ke sana ing calma na ning calulu; > ing keyang mayap a dapat tagle na ning pangatawu > e cu malyaring calingwan lingap nang e mamagcanu; > macanyan keng lewan-lewan ngening lalapit ing Pascu > ya ing cacung Mal a Virgen king pangalto cu king yatu. > > > > At agaganaca cu la ding maldang cayabe-abe > ding capatad at cacuyug a casuglung ning cacung bye > ding cayabe king aswayan neng maglinang keng marangle > ding casugu king acutan neng mamuntun kaming pale, > ding cacuyug king pastulan at caligligan king gale > ding cayabe mamulosa lalam nang lilung ning tangle, > ding maldang cacaluguran, capanalig, cayantabe > ngening daratang ing Pascu laman no ning pamibule. > > > > > Ing mutya ning caladwa cu agaganaca kya naman > sana atyu ya siping cu king Aldo na ning Capascwan; > canacu alang nang miguit pang regalung paninasan > king panirug ning diwatang sasamban cu cayupayan; > inya ngening malawut cu king malambis nang candungan > panamdaman cung balamu mitabi cu namang Adan > ban magdulap cung pagcabye king pawas ning cacung canwan > at acwa cu sang micabus king sumpa ning cacalulwan. > > > > Caluguran cung Poeta, pabustan mung tangisan cu > tangisan cung anggang binit ing calma na ning calulu; > pablasang ing cacalululwan ya ing mitulac canacu > ban cacu yang apilasa ing payit ning cacung Pascu; > at ing cacalulwan a yan ya ing ngeni panyumpa cu > panyumpa cu ing caplas nang anting barug ning laticu; > O' nung acarapat cu sa ing cacalulwan ding tawu > bagutan keng anting dicut kening babo na ning yatu. > > > > > Poeta ing cacalulwan culungan yang alang rejas > ding calulu cayarle da ding pacajawulang denas; > nanan cu mang pibalacan caylangan cung macatacas > nung bisa cung catimawan lacwan ke ing Pilipinas, > din'tang ing pamicatagun sinake cung mekiyangcas > king pacpac ning aring angin king aliwang pampang miras, > at king cacung pamangulcul king guintu ning cacung bucas > cuculculan ke ing awun ning lilibing cung milabas. > > > > > Poeta, panupaya mu, ining darala cung lungcut > nung atin yang dit a tula dacal ing alu nang tacut; > tatacut cung balican ke itang macapangilabut > a bye ning pacacalulu nung nu malwat cung milucut; > macanyan man tatacut cung isundu ing pamagimbut > at magsane cu king saya niting bansang manamuyut; > uling cabang lalapit cu king pagnasan cung ayabut > panamdaman cung balamu carela cu milalawut. > > > > > Poeta, king cacung aclis, ing mangatmu, ica na sa > uling cabalwan cu naman king panawun e ya acma, > e macayacma king Pascung panawun ning pamagsaya > uling iting cayaldawan, cayaldawan yang dakila; > inya bilang pamanyara manyad cung pamanupaya > pablasang ining panamdam bina yang macayaliwa, > panamdam ne ning miwale caring ligaya na/t tula--- > macanyan ya ing Pascu cu, Ing Pascu cu, atin yang lwa. |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00029 |