 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY page 70 |
 |
| Ernie C. Turla, curator |
| ||||||
| CONTENTS: 1. O Matas a Diwa - Renato B. Alzadon 2. Ala Tang Dapat Ganacan - Jose Roman R. Laquian 3. Nung Atin Lang Sibul Ding Pusu - Perry Am 4. Ing Saguipan Ku - Lilibeth Muller 5. Nu Ya Munta? - Perry Am 6. Ungul Cubiquela - Jose R. Roman Laquian 7. Ing Mutyang Capampangan - ArtDax 8. Malagung Capampangan - RDM 9. Diwa Ning Capascuan - Jose Roman R. Laquian 10.Nanu Yata Ing Amanung Kapampangan - Libutadcu 11.Nang Megawa - Lilibeth-Alemania O' Matas a Diwa Neng Renato B. Alzadon Poeta Laureado Guinu, pabustan mung gawa cung poesya caring inaslagan ning kecang ligaya; canita ninu mang macabasa sana tumula ya caring dalit cung Hosana; ing mipamatulan abatas na keta Ica ing Sibul na ning diwang Poeta. Nung atin cabyasnan ding sugui at Magcas a pagmumulalan a antimong lingcas, O' Dios cung sasamban, Pantas da ding Pantas, keca menibat ngan, Icang Diwang Matas a tune nang Sibul ning pamanalastas nung nula miminum ding sapni mung watas. Ding cawatasan na ning keca susuyu bistaman man lubas la qng macule anyu; casumangid nita yang mamalimbuyu casalpantayanan king banal mung lagyu; at ding balang sunis sacsi lang patutu O'Matas A Diwa, Poeta cang tutu. Ica ing Poetang minunang migale inya ing licupan mirinan yang adle; mica ating banwang minlungan king cule mica ating dagat, bunduc, at marangle; yan, king panakit na ning dimut cung male linto ngan ulina ning diwa mung tagle. Nuan ca, Diwang Matas, nuan da ding anggang nuan pugue alan'angga qng quecang caniwan; salamat qng diwang lebul mu qng canuan ning sasalpantayang malating larawan; at ining quimtan nang calam a caguiwan queca isuyu na , O' Sibul ning beluan. O' Matas a Diwang Ibpa ra ding Budni queca yang canuan na maluca mung sapni; bustan mung ing lub mu ya nang quen mag-ari isulat ning quecang plumang pinenari ban maguing aslag lang candilang mesindi ding ipaisip mung poesiang pangadi...! Ala Tang Dapat Ganacan ! ( Poecia ) Neng Jose Roman R. Laquian 11:30 am./2007-11- 29 Aguiang nanu pang maliari , Ala Tang Dapat Ganacan , Qng IBPA ta'ng atyu banua ing maliaring caburian ; saquit , bagyu , o ayun man , o nanu pang calamidad ing maliari , ding gamat Na magligtas lang macapalad ! Aguiang maralas ing gulu't cudeta da Pilipinas , Atyung Mailing Macalawe ing GUINUNG DIOS ta'ng Magligtas , balu Nang ding sablang gawang macasarili't carocan ala lang mayap carasnan , mapait la capupusan ! Aguiang miabe-abe la ding problema dareng tau , Maragul Yang palac ing DIOS a MIGLALANG quening yatu ; aguiang ding diablos at taung maroc gawa lang caguluan quening yatu , Obrang Mayap ning DIOS agad nong sambutan ! Purung Casalpantayanan babie Lugud qng MIGLALANG ala yu queng paquiramdam o maguing queng acaquit man ; Ing DIOS IBPA , YA ing ARI , banua't yatu YANG tatalan , queng maliliari qng yatu , Ala Tang Dapat Ganacan ! Nung Atin Lang Sibul Ding Pusu PerryAm Nung atin lang sibul ding bunduc At mamagus ing danum a titipa Alang mate cau caring ayup Alang mate cau caring sampaga. Nung atin lang sibul ding diwa At mamagus ing sampat ning alala Alang mate danup a paninap Alang mate danup a pag-asa Nung atin lang sibul ding pusu At mamagus ing pulut na ning sinta Alang mate cau caring calulu Alang mate danup caring ulila. NUNG SAGUIPAN KU Manapa ku oini yaku, makaduku sisiklaud ku, Bubusngi ku’y king pusu ku, ring gamat ku ding oras ku, Yng abe ku, ing anac ku, yatad daku ken lele mu, Nung wari mu: sabian cumu, ning mesinup na'king lub ku. Burian muku, palian muku, dapot yaku misugu ku, King dulang mu ning pusu ku, lugud mipnu nang quecayu, Yakung tantu, sarili ku, templu niya mu, ning caladua ku, Ditak yamu ing adwan, ku: ’ba’t kecayu’ng espiritu. Lukluk kupa lawen daka, mamun' kacu talnan daka, Milulupa 'ting balat ta, masaquit la’t makanyan la, Lawen kula yang palad da, obat rugu mekanyan la? Ing kule da malutu la, tindus dala mebusbus la. Menangis ku ing luwa ku, tutulu mu king lugud yu, Lelangan ku kayabe yu, mibubud mu king platitu, Mekalinguan ta’ng dapat mu, mibalatu carela mu, Pipitna rang pibandian mu, saguipan ku’t isubli ku. Gamat kacu bubuklat cu, ring bitis ku lalakad ku, Iyanung buntuk paganan ku, malumane gagalo ku, Basan muku akung libru, mekandadu ning pasbul mu Asbuc yamu iting bibu, dapot tune yang gawan mu, Masagu’tang sasalita, mamamatda la reng tala, Dadagundung la reng balun, dapot ika magmulala, Nakadwa pa migmalun ka, sinaupan ka tinikdo ka, Sasalangsang paniwala, alang kuwentang tanikala. Oh saguli mu! talakad ku, matna kupa nukarin la, Pamilya ku kayabe ku, manaya la lawen kula, Manabilin ikang sepu, keti labuad lakwang tula, Imalan yang miyayakma, merinat ya pip'yan kepa. Lilibeth/Alemania 30.Nov.07 Nuya Munta? PerryAm Nung king kampana ing inge Yana kabud ing kaladwa na, Potang tuknang na ing dupikal Ing inge yan nu'ya munta? Nung king sampaga ing banglu Ya na cabud ing kaladwa na, Potang ing sampaga mate ne Ing banglung yan nu'ya munta? Nung king katawan ing diwa Ya na kabud ing kaladwa na, Potang mate ne ing katawan Ing diwang yan nuya munta? UNGUL - CUBIQUELA ( Poesia ) Neng Jose Roman R. Laquian 12:30 pm./2007-11- 28 Ing caluguran cung mabeluang poeta minta ya que quilub nitang cubiquela , calucluc na quetang tronong ceramica , malalam nang ungul , " uuuhhh , aaahhh , uuuhhh , aaahhh , uuuhhh , aaahhh ! " Agad caramdam minta cu qng lugal na ban abalu cu nung mipacananu ya , at 'niang quitnan cu neng " mipacananu ca ? ", ala yang pequibat nune , " uuuhhh , aaahhh , uuuhhh , aaahhh ! " Caibat ning capitnang oras a linabas , linual yang mapawas at anyung maticas , at ing paquibat na queng cutang cu quea , " Maniaman lulucluc quilub cubiquela ! " Inia pala " uuuhhh , aaahhh , uuuhhh , aaahhh ! " ing ungul na , mipapanulac la , pamangan pengan na ; ing bayung pamangan queng lumang pamangan manulac yang palual , queang quilub atian ! ING MUTYANG CAPAMPANGAN ArtDax 12/ 05/07 Atin cung iquit mutya, ala yang casing lagu Capampangan ya casi, Ana Lagman ya lagyu Iquit que queng mata nang Ruston a baintau Ala namang sang mimua, nung maninap na cu mu Neng lalon que letratu, ing lulub qng isipan Ing angin queng aplaya, payapang calicasan Ing falls ning Multnomah, deng beaches qng Maryland Ing parque ning Dollywood, ing saya quing Disneyland Neng lalon que letratu, macaramdam cung bosis A balamu musicang, mag gayuma qng lambis Balamu canta nong Beyonce o Alicia Keyes O poesyang Alzadon ustu sucad ustu sunis Macanyan ya calagu ing mutyang Ana Lagman Masuert’ing baintaung a caya maca talan Bie ne sa ing pangacung cabang bie ne luguran Mabanglu yang sampaga ing mutyang Capampangan MALAGUNG CAPAMPANGAN RDM O lingkas no naman, deting Capampangan migpaynawang bagya, king lalam ning lulam manayang lang sumlag batwin king ketasan ban keta ing diwa mulang manyabitan.. . Ba! Bigla yang sinlag ing aldo masala inyang manakit lang makapagmulala sirena ya waring sinakang mamala malagung letratu nang Anne Lagman pala..! Nimpa yang tinipa ibat king batisan Venus yang liniluk, kikimut, titiman kinuldas ya wari king kwadru sinimpan anting Mona Lisa tane tatalangan.. . Mismung camera nang Ruston a bayntau e macapayali king nanumang pwestu king balang kimut nang Anne a malagu maligagang calbit king balang letratu..! Payarap, pagilid, o patalindiking nanu mang pusisyun, nu ya man magbaling ing legwan nang Anne, mayubu, majinjin Balen Capampangan, pagmaragul na pin..! Diwa Ning Capascuan ( Poecia ) Neng Jose Roman R.Laquian 12:12 am./2007-12- 09 1 Darampi ya ing marimlang angin ning bulan Diciembre , careng pisngi cu darampi ya ing angin malumeme , at ding batwin babo banua mamie aslag quening tete dadalanan , pati na ding parol careng siping bale . 2 Mangasigla lang quiquislap , ating mialiwang cule dening mangalagung parol careng misisiping bale , dening canta at tigtigang masayang miugne-ugne ilang tanda na ning Pascu balang bulan ning Diciembre . 3 Bayung imalan , pamangan at ding mialiwang bague panialiwan dareng tau caras ning bulan DIciembre : regalo careng pengari , cari cumpare't cumare , careng anac , coya't atsi , pati careng abe-bale . 4 Sisilim pa , ding campana magcainge lang cacalembang at ding tau masigla la ngang mumunta qng pisamban ; at cayari na ning misa , mumuli lang mamirapal , careng bale ing pamangan , suman latic a amusal . 5 Panga-bengi , dening anac careng bale la mag-"caroling", cacanta lang Cantang Pascung asmu saya't mangalambing ; Pascu , Pascu ing panaun careng mipamie-regalo , careng cantang mangasaya at pamangan todu-todo ! 6 Pascu dareng maqui bayung sapatos , imala't relo , deng dalaga't baintaung malsinta't mipapaglolo , Pascu dareng miqui pera't mitmu qng bague material a macapamieng regalong piling-pili' t asmu camal ! 7 Tune Diwa na ning Pascu atyu wari caring bague panregalo , bayung baru't parol a mialiwang cule ? o atyu ya careng lutung manganiaman a cacanan , careng putu at bibingca , tibuc-tibuc ampo suman ? 8 Careng bague macayama, masanting queng panimanman , careng lutung bale tamung asmu niaman a cacanan , o carening Cantang Pascung canta dareng cayanacan mayaquit ya wari Tune Diwa ining Capascuan ? 9 Majigit nang adua libung banua na ing mengalabas , 'niang y Cesar Augusto yang menutus at migtalastas a cailangan palista la ding balang metung a tau , ing mumunang listang-balen quilub ning queang emperiyu . 10 At miliari , memunta la ding tau para palista , balang metung minuli qng balen a penibatan da ; y Jose at y Maria , meco la qng Galilea , at minta la qng balen nang David , lugal ning Judea , 11 qng Bet-lehem a ausan da , cang David a cabalenan ( y David a pipumpunan nang Jose , at queang angcan ) , ban ila ning mabuctut nang cayabe't asawang Maria queng balen nang aring David , ilang adua palista la . 12 Lalam aslag na ning bulan , dinalan la qng caquewan , macasaque ya queng asno y Maria a cagampan at y Jose , yang lalacad , mamantabe queng dalanan a papunta qng Bet-lehem , cang David a cabalenan . 13 Queng macabang pamaglacbe , miabe dang pibabatan ing capali-paliang aldo qng malawac a caquewan , at ing dimla na ning benging manialicsic queng catawan , miabe dang aramdaman , miabe dang pibabatan . 14 At miliari , 'niang miras lang adua dacung cabalenan , meganap ing tacdang aldo , sinaquit yang queang atian , sasaingsing ya y Maria queng saquit nang daramdaman , at y Jose manintun yang maliari dang pagdatunan . 15 Dapot balang pintalan dang taberna para datunan , alang cuartong mitatagan a maliari dang tucnangan ; at miliari , capaintun da qng silungang macapampan , menganac ya y Maria qng lugal a lilibangan . 16 At penganac neng Maria ing panganeng pacamalan , ing pangane nang lalaquing maingat nang nilampinan , saca macacalale neng quinera queng lilibangan , uling ya mung lugal para carelang apagdatunan . 17 At ding pastul dareng tupa , qng taldawang calualasan a magpuyat bengi-bengi pamagbante caring cawan , metacut la 'niang ing angel na ning Guinu pepaquit ya at ing gloria na ning Guinu sinlag ya qng palibut da . 18 At sinabi na carela ning angel ," E cayu tatacut uling mayap a balitang ing Guinung Dios ing payabut ing masayang dadalan cu para careng sablang tau , careng taung liguran Na ning Dios Ibpa quening yatu . 19 Uling ngeni , queng balen nang aring David , mibait Ya ing Manatbus , Ya y Cristo ing Guinung menibat banua , at oini ya ing quecayung pecatandang atabnuan , aquit ye queng lilibangan ining anac a pasusuan ." 20 At biglang mequiabe la queng angel dening queraclan dareng hucbu na ning banua , a magpuri qng Miglalang , " Gloria queng Dios a Miglalang , Queang Cacatas-Catasan , at qng yatu capayapan careng tau Nang luluguran ." 21 At 'niang meco no ding angel at memagbalic qng banua , dening pastul mengamanu't misabi-sabi lang " Munta , munta tamu ngeni mu rin qng Bet-lehem , quetang lugal a pepasiag na quecatamu ning Guinung Dios a Banal ." 22 Agad lang dinatang at iquit da la ri Jose't Maria at pati na ing anac qng lilibangan a painawa ; at quening apanaquit da , mangasaya dang pepasiag ing balita queng Manatbus , ining anac a mejayag ! 23 At ding balang mecaramdam queng balita migtaca la caring bague-bagueng sinabi da reng pastul carela ; dapot dening mengapasiag , iningatan nang Maria , at pemibule-bule na qng quilub na ning pusu na . 24 At ding pastul minuli la , qng Guinung Dios memie gloria at papuri caring bagueng dimdam da ngan at iquit da , 'niang pepaquit la ding angel a magpuri babo banua qng Cacatas-Catasang Dios , qng Guinung Dios na ning Gloria ! 25 Careng maniamang pamangan , canta't parol quening yatu , careng bague panregalo't bayung imalan ala yu ing Tune Diwa ning Pascu , ing Mensaje nang dadalan , ing Daquilang Peca-Yampang Qng Dios Ibpa menibatan : 26 Ulina ning pamalsintang labis ning Dios quening yatu inia binie Ne ing Queang bucud a Anac careng tau ban ninuman salpantaya Quea ela mipahamac nune , mie lang alang anggan at ausan Nang Queang anac . 27 Ing anac Na ning Dios Ibpa , e Ne sinugu queng yatu ban atulan at parusan ding macasalanang tau nune ing yatu miligtas ya cang Cristong capamilatan , at tangapan dareng tau ing Lugud Nang Alang Anggan ! 28 Ngening Pascu , ing masampat at marapat tamung gawan , buclat tala ding pasbul dareng pusu tamu't capilubluban , dinan tayang pilugalan at tabernang pagdatunan Y Cristo tamung Menatbus , Yang Diwa Ning Capascuan ! " MASAYANG ALDO NING QUEBAITAN QUECAYU , GUINUNG JESU CRISTO ! " " Pascua Ning Dispu ! " ( " Merry Christmas ! " ) quecayu ngan pu , Capatad cu at Cabalen ! NANU YATA’ ING AMANUNG KAPAMPANGAN? by libutadcu KITNAN MUKUNG MASINSINAN, NUNG MAKANANU MENG PAKIBATAN, KUTANG DA RING ALA/ATING MASABAL, NANU YATA’ ING AMANUNG KAPAMPANGAN? UMPISAN TENG TUNGGAL TUNGGAL CARENI KING APTAS TA PAKIBALUAN ING PANAKIT, PAMI-ISIP, PANIMAMAN, PARALAN, METUNG MU ING PANAMDAM. CADUA CANITI, NUNG KING KUENTU, KING POESYA, LITERATURA, TEATRU, KING ARTING PAMAGLUTU, DEBUHU, USUNG PANUGALI, ATIN TANG KAPAREO? KATLU, KING MANGALATING PAMIPUGUE, MATICAS A LALAKE, ELEGANTING BABAE. KAMAG-ANAK, KALUGURAN MEYAKIT’T ATALUSE, KING PAMAKYABE, ASMU KING KATIBE. KANINI TA ATALMACAN AT ATALASTAS, ASIGURADUAN, ATUPAN, AT ATUYAG, ALANG CONTENTELYO, PANE AYAMPULA MAYAN IBUGNUS MATALUSTUS A DIWA. ITI NGAN MESIMBITLA’T MENGAYAPSE, CANACUNG PIG-LUNGABAN AT MIPAKDE, CACUNG CAPATAD, NGANANG MINYABE, BA’T ECA MAKITALAMITAN, ITI PAMAKIYABE? ING PEKIBAT CU CAYA, SISIGURADU CU, CARENG MYEMBRU DACAL A MAKIBALU, ECUMAN BUBULAD, KEKAYU YA ING PUSU, BYUNG NING HANGIN, LUGUD, BISTA MAN MARAYU. NUNG KEKATAYANG TUYAGAN ING PISASABYAN, DAGAT DAGATAN YA ING BALEN KAPAMPANGAN, AMANU, IYA ING BANGCA, ITAMU ING BABAGSE MABAGAL, ETANE DUDURUT, DIRETSU ING BAGSE KING PAMPANG. KABALEN A ERNING, GUINCAS NE ING SENTRU, MALINO YA PA KENG CRISTAL, EYA MIGSANU’T SANU, TINDUS NENG MATULID, TINAGLUS KING PUSU, “ALANG KAPAMPANGAN, NUNG METE YA ING AMANU.” NA’NG MEGAWA Nandin abac, katikdo ku, Sinulud na, kaisipan ku, Biruan daka, ban mung balu, Alben namu, na'ng gewa mu. Ing isip ku, abungkal yo, King tindahan munta ya’ko, Miras keta, mengutang mo, Dinan baguk ampong toyo. Dinwang kacu, metung kendi, Tumpak kepa ketang baldi, Lukluk kupa magkunwari, Kanan ke'ning kacung kendi. Din'tang bigla'y Apung Bari, Kayabe ne'y Darang Tali, Metuksu king kakung kendi, Mengutang 'lang tsokolati. Ta'ing dimdam ku, tutu ale, Ta’ing ikit mu,metung kapre Bustan' tamu, keta lele, Keta namu, e paybakle. Melambut ya, o’ wantutre, Mepaklud ya, ay’alambre, Misabit ya lalam tete, Linundag ya’ng migkamale. Ngeni ika, kutnan, daka, Mengabigla, mipnung bina, Sinabi da- “dimdam muna,” ”Mengaklak ka,” magluga ka. Muli naku, masumbung ka, Kang Indu ku, miyadya ka, Mabangle ka, mayalti ka, Kasebian ka, metukal ka. Lilibeth/Alemania 11.Dec.07 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00133 |