 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY PAGE 69 |
 |
| Ernie C. Turla, curator |
| ||||||
| Contents: 1. Ing Amanung Kapampangan - Perico Amable 2. Kakung Katatalakaran - Jason Paul Laxamana 3. Kang Jason - RBA 4. To Mr. Takshapu - RBA 5. Lapugpugan - Paeng 6. Kalinguqan Na Ing Milabas - Paeng 7. Dalit Qng Asawa - MAR (Malambis at Romanticu) 8. Lungcut, Tula At Ligaya - Paeng 9. Dalit Qng Asawa - Artdax 10.Cuebang Madalumdum - Dr. Udis Manalansan-Lord 11.Quetang Sapa Lalam Cuayan - Dr. Udis Manalansan-Lord 12.Udis Lord (acrostic)- Paeng 13.Untitled - Lilibeth Muller 14.Amanung E Cu Quelinguan -Rolando de Jesus 15. Untitled - Jose Roman Laquian 16. Ing Memialungan Pau - RBA 17. Ing Paninap Ku - Lilibeth Muller 18.'Tin Kung Apu, 'Tin Kung Ingkung - Lilibeth Muller 19. Mangacuyad a Poesia - Paeng ING AMANUNG KAPAMPANGAN Perico Amable Danum a malino King sibul menibat Balsamu ya waring King Kau penaplak Uling ing nasa Ku¢t sariling pigagap Tuklu king bakas da ding banal a pantas. Kapampangan ya ing amanu kung siswan Ya ing pibandyan ku at mabye tanaman Inya nu man Karin e ku pitakutan Ing pakilimpi ya king puri at dangal. Nung atin man sanang Balagtas kanita King sabing Tagalog yang peka-ari ra King kapampangan man ¡tin linto kabas na Crisostomo Sotto a peka Ibpa Ra. Anting bayung supling bayung managimpan Bayung talagale daralit kundiman Udyuk na ning pusu akling ning panamdam Manese¢t gumambul sabing kapampangan. Uling ing amanu yang malino danum At ing kapampangan ya ing tune sibul King ubud ning pusu yang tenam kung dutung Sabing kapampangan bakeng pagmaragul. KAKUNG KATATALAKARAN neng Jason Paul Laxamana Nung ing poesya mu ala yang kalamanlaman At nanunanu ya mu pangamanuan Makananu meng asagip ing Kapampangan? Atin uaring bisang laklak mung balat suman? Tutung kailangan ning amanu, dakal a pamasan Oneng bakit basan de nung ala yang laman? Asagip me pin ing amanu, dapot kng mung sulat Ala ne man kng dila da ring tau, nung nu ya dapat Nung sumulat na kamu pin, samasnan mu na Ali ka gulis nang gulis, kasayangnan kng tinta Bala mu kanita sundalung magsasamatapang ka Susugud ating pusu, oneng alang kaladua Sumulat ka itang, kauna, basan ding taung dakal Kadua, itang burian da, ban lang magmasabal Katlu, itang burian dang ipasa karing kakuyug da Bang ali mapatad ing kekatang propaganda Uling ing kaladua, nung pitnan me, pusu ya't isip Deni ring kailangan tamu kng pamanyagip Ding biyasa kailangan da namang sumugud Ali la mu dapat mimisip at sasabi kabud Ding matapang naman, tutung pikatulan ing kaburian Dang asagip ing Amanu tamung Kapampangan Oneng kutnan ye pa ing sarili yu: Makananu? Nung nanu man ing pakibat, ing daptan, pakasalesen yu! Mibalik la mu ring kabalen king bunduk ning Alaya Nung talnan nong Suku ring kaladua ra Potang kayi, migising ing karelang pamagmasabal Ala lang buriang gauan nune sumaup dakal Oneng i Aring Sinukuan e ya kukuldas keti sulip Kng Ginu ing pamanantabe, ing tau yang manyagip Malyaring kamuanan mo ngan ding aliua a amanu Lauan ku mo nung atin kang parasan malaut Malyaring pakit mu karela ing santing ning kekatamu Paburen mung mitau ing lugud kng sarili dang salu Alang pilit, ilang dili magbalik la kng Indu ra Ali mu na kailangan sumulat poesya - ila na Nung ing lalaki, susugud yang e manakit tibag kng dalan E na ku bisa; ing butu ku, kekayu neng pututan Nanan ke ing butung asne kasyas talakad Oneng ding balak nang sagipan, e da ne man kapad Ing pekamaulaga, atin kang sangkan kng gagauan mu At ing sangkan a ita, siguraduan meng makatud Pota sasagipan me ing Amanu, e mu balu para nanu Pota galang ding kailangan sagipan ding mismung sundalo? Kang Jason Jason, saguli mu, Itung, atin cu mung sabian queca ibilang mung amanu ne ning macarayu mung Bapa, balu mo, ing piniabi mu quetang Paeng a Poeta mataram yang bagya, Itung, ngacu wari, maniugat ya. Caretang quecang piniabi dacal la ding maca-ustu oneng qng pangaapse ra maqui-quesiasan la tonu; aguiang maca-ustu ca man dapot qng pamaniabi mu bala ra deng tau, itung, tutu na cang alang modu. Maca-ustu na mo, Itung, ing anggang quecang selita dapot qng pamaniabi mu, me ala cang galang ata; qng quecang pamangamanu balamu matas cang bagya intasang balamu rugu sibianan me yang pelangga. Y Mang Paeng, queng balu cu, miguit neng anam a pulu ica, itung, palague cu, banda ca pang aduang pulu, qng datang ning salita mu bitasang e ca pepapu balamu mo icang matua at anac yang alang balu. Iniang iqueng maca-anac, magalang que caring matua lalu na't ing casabi mi gagalangan yang poeta, ot balamu ata, Itung, ing yatu mibaligtad ya nung ninu na pin mang anac yang linto magtata-tata. Iniang iqueng cayanacan anti ngeni yang edad mu queng bague macasalicut maingat queng mangamanu aguiang nuya anti casias a talacad yang sese mu e mu ne dapat paquiabe at paniabyan caring tau. E ca sa mimumua, Itung, nung asabi cu man ini ibilang mu ne mung lugud dening queca cu asabi at mananu na mu sanang ing amanu tang mal dili magluid ya ampon magamit qng mayubung pamaniabi. Ing Adua Cu Pung Cusing. Mr. Takshapumo, acakit ke keca ing atin caguiwan sumulat poesia, king ulina niti isundu mu sana dalit cang cundiman king amanung mana. Detang anti keca a atin caguiwan dapat lamung lunto kening piarapan; lalu't akakit cung tagle me mu naman ing mapaling lugud king amanung sisuan. Sulung pin, capatad, e ca micacunu detang anti keca cailangan lang tutu; palto mo ding rimang menibat king salu ban ing amanung mal, palcas ta ya lagu. RBA LAPUGPUGAN neng Paeng E pa pu meyari iting lapugpugan careti' nang tatyo parejung matapang palacpacan tala ala nang atrasan puru english naman karelang pisabyan..! Mecalingwan ne pu ing amanung sisuan..? sana balican da Capampangan naman king pamagmatulid pareju cabyasnan e ta no ayawat sundu yu na pin man...! Ikeng anggang mirun anting Capampangan manalbe nake mu kilub ning sabungan king barug balabat, sicad pasicnangan nung ninung masambut anggang catatawlyan. .! Kabangsang Kapampangan, Kalingwan na ing Milabas neng Paeng Caybat na ning lulam banwa manenaya ta pang bagya sumlag ne canyan ing aldo macasilo keyang sala antimurin ding amanung meyapse memaluca magbanayad no datang king poesia o picudta..! Agyang ing bulus ning uran neng sosobra maging albug agyang ing sala ning kildap neng masican maging duldul neng ing curug na ning ayun bigla mangaspac ing gabun anti murin ing amanu manyugat ya neng manamun..! Dapot neng mipayapayan ne ing amanung sisuan dale migit ya pa keng sampaga ing banglu na sasagese magduyan ka king parnaso ing ninuman a milele pagtumayla da ca wari ring poetang migagale..! Calingwa' na ing milabas ipatange ketang angin buren ta nang ing alisus isalbag nang anting puling e na lunto pasibayu king catandanan mipinpin anya ing amanung sisuan yang pisabyan tang tayimtim..! Dalit Qng Asawa Suglung nang MAR (Malambis At Romanticu) Buri cu qng abalu mu icang babie tula cacu Ania naman ing tula mu ya namang paninasan cu Pablasang neng acaquit cung matamle ing pangilus mu Tatamle yang anting dutung mabilug cung pangatau Nanupata cacung mutia neng aquit dacang masaya Ing pusu cu anti ya mong macasucul miden laya Caring timan mu at aili anti cu mong pagtumaila Ilang macalaco pagal quening catawan cung pata Alang dalan e cu luban ban dacang apamatulan Pablasang queca manibat ining sabla cung sicanan Nanan cu ngan ing pibandian, alang cuenta¢ing pipagalan Nung ala ca qng siping cu o mutia cung pacamalan! Caluguran mu cu, caluguran da ca Ing keca cacu ya, ing cacu keca ya Tumayid ca cacu, tumayid cu keca Y ca pin at acu, micalugud ca ta Laban cu laban mu, tula cu tula mu Saya^ cu saya^ mu, buryan cu buryan mu Ing casakitan cu, yang casakitan mu Miyabe cata king, lugud na ning Guinu. Lungcut...Tula at Ligaya neng Paeng Ba't caya neng malungcut ca, wari malungcut cu naman uling ing lungcut mung bina, pagcalungcutan cung myuman cabang ing pagcalungcut mu, pamaglungcut e mipanpan kening cacung calungcutan ing diwa ku manyambitan. .. Dapot neng matutula ca, ing tula cu alang cabas nanu man ing picatulan mu, picatulan tang matimyas king pusu ta ating tula, tula king lugud a matas ing piyabayan tang tula, ing tula ta e kumupas... Anya ngeni king ligaya, ligaya tang tatamasan mekeni na ing ligaya, ligaya teng piyatbanan pibutnulan a ligaya, e mapatlud capilan man ligaya mu, ligaya cu, ing ligayang alang anggan... ArtDax Dalit Qng Asawa Suglung Nang ArtDax Ligaya mu ligaya cu, panamdam mu panamdam cu acaquit da reng mata cu, in ngang sablang acaquit mu Deng mabanglu para queca, mabanglu la para cacu Ing bosis mu cagising mu, musica qng balugbug cu mangaligkig cu qng tula qng tagquil ning pagsuyu mu, uling balu ning pusu cung, mangaligkig ca qng tagquil cu Neng marok ca pakiramdam, sasakit ka sasakit cu Ing dusa ning catawan mu dusa ne ning caladua cu Ing quecang bie binie cacu, yapin ing bie na ning bie cu Adua catang meguing metung qng altar na ning pangaku tinali ne ning Dios Guinu ing pusu mu queng pusu cu Caladua me’ng caladua cu, acu ica , ica yacu Cuebang Madalumdum © Dr. Udis Sanchez Manalansan-Lord 11/21/2007 Quilub ning cuebang madalumdum, malalam, marimla, macapangilabut. Alang pasbul, alang awang, alang aldo. malalam ing danum. batung milumutan, matarulas, bitis tatalpacan. Quelacalale cu, Bacung e mabaldug malalam a danum. Gulapac lang dapu tutulu ya'ing wawa da, Curap curap, Tacam tacam la pa, At detang iqui da, Paspas paspas paspas. Balacusa rugu tutung mabaldug cu, Ecu icuang iquit ing pupuntalan cu. Mitarulas, melili, mebaldug, Ot cabira bira, dintang ya'itang matua, Lalaking matas, mayayat, Mabalbas, macaba, maputi ya buac. Ing gamat nang wanan tatalan candila, Ing gamat nang caili tuturu quing dalan. Quetang cayang pago pepasaquen nacu, Bang ayucyatan que ing asbuc ning cueba. Carin asilipan ing masalang aldo, Dimdam cuya'ing pasyuc dang mipalsintang pipit. Teterac lang adua babo camachilis. Quetang Sapa Lalam Kwayan © Dr. Udis Sanchez Manalansan-Lord 11/21/2007 Quetang sapa, lalam kwayan Memipi cu quing bantilan Palu-palu pamucpucan ing marinat a imalan. Ing atiyan cu mengalucguc Nasiâ't asin a quenan cu Mengulisac queng atiyan cu. Pilisan cu ing pawas cu, Mequiramdan cung culiglig. Damulag mandilu la Sirut sirut lang Arung da. Y Tibu ampo'y Tecla labing aduang anac da pa cacawe lang anting asu deng aliwa Manulud la quetang batu Gagasgas do reng gulut da. Quetang sapa mandilu la Casiping do reng damulag ampong asung mainge caul, menyacap lang dagis culcul a ningnang nang Apung Angkung. Quetang sapang Pipanasan Nang Bolang a Pedrung Bucul. Carin, mebiasa cung quinawe. Pangayari cung memipi Mendilu cu quetang sapa, Isip isip cu queng lub co Ining sapa lacuan cu ne Islang cacung pibaitan. Pinulis cu ing lua cu Gilutan que, Itang sapa lalam kwayan . Dili-dili miglacad cu, Itang Dimla memanyaguid Careng pantic a butul cu, Pero disnan que'y tang bansang Minie lagiu't dangal cacu. Aba ! Abe, macanian man, acaquit que itang sapa, Quetang lalam da reng cuayan. Daramdaman cong malacas Deng culiglig, Ausan depa'y lagiu cu. UDISLORD neng Paeng U...dis ing lagyu mu, e ne macalingwan caring talasulat king amanung siswan agyang milaut ca king balen tang tibwan ing dayang cucuri, uring Capampangan. .! D...agat mung lipatan, kecang ginuyapgap linabas ngan keca, bagyu ampong kildap e mu man picabyang, anti yang paninap tetagan ning bie mu, memunga ngan mayap..! I...ca ing agilang susulapo matas abitasa mu ngan, api, bagyu't balas alundagan mo pa, e ka man minatras uling ing tetagan kecang pepamalas..! S...ana ngening oras, king kecang arapat detang cayanacan acwa rang mimulat atin lang batayan nanu mang cabayat ing bie mung denasan magsilbi ngan ibwat..! L...alu king salita, ing amanung siswan king pusu midukit anting catandanan e re acawani keca capilang man ing amanung beytan anting Capampangan. .! O...ba't mo sa ngening menaliwang bansa atiyu pa keca itang bie keng sapa babalican mya rin napun nacadwa na abe cayanacan carin mandilu la..! R...etang cayabe mung mandilu, mamipi ketang lalam kwayan, masaya cong mayli bagkus gilutan mu anting pisawili oneng ali murin, king isip parati..! D...apot king lugud na ning lalaking matas at maputi na buac, macaba pa balbas ya na ing mantabe angga na king bucas munya dalan keca king sablang pangarap..! Mayap a aldo pu, magsilbi cupung makidalan? Atin cung paintunan malyari cung asaupan? Matiyaga cu oneng atin murin angganan Sicanan cung sasaguipan quecayu ya iampang. E ku man bubulad oneng nung maliari mu Aganaca ku, quecayu Cong Rey o't nucarin cayu? Saguli mu at paquiyabut munamu Careng caiantabe ning bie mu paquicomusta namu. Mapilan a beses quecayu meg email nacu Oba't alang mequibat acalinguan daco? Mumuli cayu, lalacuan yuco? Tuqui cung pasibayu queta quecatamu. Natural queni cu Europa icayu quen America Capirasong panaun miquilala tamu Dapot ica amung mangutang canaco Nung bisa cung maquiabe quing Amanu tamo. Wa acu queca mequibat cu ba't ali mo Ninu mo wari iacu, uli mong Aleman ya'ng asawa co? Nanupata mebiasa cu qng salita da ecu micacuno Capampangan ya pa murin ing Amanung Sisuan cu. Luid Ya Ing Amanung Sisuan! Luid Ya Ing Capampangan! y Lilibeth pu taga Alemanya Cacang Lilibeth Ca-Capampangan Mangalug ku pamu keng banggera tamu ba ku sang magpapak keng pamangamanu ing amanung siswan tutu cang larinu agyang Aleman la deng capadurut mu... Ikami man keni bansang America ing Kapampangan mi kening nyang pamilya panga lwal mi bale salita English na malaus ka rugu at misulu tana... Makayapag ne man king dulang a kwayan ing salita tamu ing amanung siswan libri na cang damput libri cang manakman anti yamong duman misna ya canyaman... Re: Re: [AmanungSisuan] Amanung E cu pa Quelinguan! Mekeni, Capatad, taga Alemanya king bale ANASI malawus ca sana; macabuclat ya ing pasbul para keca lalu't ketucan me king malagung rima. Mekeni, Capatad, mekeni, mekeni king kecang panyatang maligaya cami; detang anti kecang Capampangan sabi tutu lang caylangan king bale tang ini.rba Aptas kalibugtan, oini meyaus ku Ipasyag karela nung nanu'ng lugud ku Mas masanting yata at matimbang ya pa Nung ing ipasyag ku ing manibatan keka Ing lugud mu kaku anting aslag aldo Pipilit magpalsut kareng biga babo Anti ka mong danum, kawa makalako Nu ing bie neng kayi anti mong disyerto Ing lugud mu kaku kilub ning aldoaldo Pulut yang dalise labis king kayumo Anti ketang kaban laman mamaglapo E ya man maumid keng pamnggauk ko! - Rolando de Jesus Ing Cabiasnan tang tutunguen caras queng pamamoesia manibat ngan qng Dios Ibpang POETA da reng Poeta , Ya ing babie Diwang Matas , Lacsang Lugud at Ligaya careng taung magtiwala at sasalpantaya Quea ! Ing Cabiasnan ibat qng Dios malawac ya't alang anggan calupa na ning Lugud Nang ala mu ring capupusan ; ding sablang bague queng Lugud at Cabiasnan Na lelangan , inia marapat mung Ya ing Pasalamata't Papurian ! Ing sablang bague menibat qng Daquila Nang Caburian cayabe ya ing ANASI , Aguman tang pacamalan , ban deng binie Nang guelingang quecatamung tatayasan Magpatutung ating Dios a Tapat Mamieng Cabiasnan ! Jose Roman Laquian Ing Memyalung Pawu rba-2007-09 E cu pa kelingwan inyang anac cata lele na ning sapa cacu linapit ca; anti cang mipasdan inyang akit mu ya ing pakyalungan cu...., pawu ya pin pala! Ngamung mipayasyo: "Ay! Ibili me yan deng mamyalung pawu agad lang magulyan!" Saca ca mengagang e macanyan-canyan king tacut mung agad dacang acalingwan. Itang sabing matwang deng memyalung Pawu mapangalingwan la, e ya mipaltutu; uling banwa la mang meco masalusu angga ngeni, Rosa, awsan daca lagyu. ING PANINAP CU! by Lilibeth Muller (Lilibethcruzpamintuan-Müller ning Alemanya) Nabengi meninap cu kecayu istorya cu Capiyak da reng mata cu quing ulap linakad cu, Linukluk cu canu kandungan ning Ibpa cu, Bubulung na canacu inyang malati cu. Yng atatandanan cu pilan man ing idad cu, Y Indu cung malagu pipiblasan nacu, Y Apu cung pikun sasabianan nacu, Yng sabi na cacu mingat quing sarili cu. Iyang beluan acamulatan, pinaud yang bale, Pawas cang Ibpa cu miriquil ngan carin tune Sawali reng dingding tikluwanan mi lande, Lalam ding bubungan Capampangan masasangle. Linakad ing panaun reng letra ku sinibul la, Mekad minisip cu nung macyabe quing musica, Aliwa murin pala nota yang dapat amimorya Kayabe lapa pala: Literatura ampo na Kultura. Dikil ning isip cu 'ning Ibpa cu babasan na, Kabud na mesala ing Indu cu dinatang ya, Miduyan cung mipnu king tula ampo saya, Biklat ko reng mata ku, "Mayap a Abac" pala. Minarap ku king aslag, matingkad at masala, Pesalamatan ya'ing Guinu dininan nakung dila, Reni mung bagwis ku buri kulang iyatna, Cambe ning saup yu miligtas ya ing salita. Mupin balugbug yu isitsit ku't makisabi, Kening sulat ayni nung wari mu widu mu'y ni Nung amatyagan yumu susulat ku atin mali, Ikayu nang mangumpuni mabiyasa kupa keni. Ika kapatad ku, ika Kapampangan, Ika ing basi ku mimiral ku beluan, Dinan yakung sikanan, ikay'ng tune ilaban, Ikang paintungulan, ume naka Kapampangan. tin Kung Apu, Atin Kung Ingkung by Lilibeth Muller Misan memalis ku king jardin di Apu ku, Memaswit kaku'y Apu atin kakung tuturu, Linapit kung bibu balaku mo sana nanu, Tiru ne'y Ingkung ku manyulud yang karsisilyu. Meyli nakung meyli dimdam nakung Ingkung, Melikid ne kaku bubusuk ya o't mepikung, Mikasbu ya lalu inyang mangutang nakung- "Nanung linug linug, nang tatakpan mu Ingkung?" Minarap ya kanaku balamu'y Andres Bonifaciu, Makiyalam ku kanu ing palisan ku yang isundu ku, Yaku namang aktibu balaku bibiru yamu, Pilmi keng binistu king susulud nang karsisilyu. Penagal na naku king tukud na mitakid ku, Inaus ke'y Apu ku pepasaup guguliyak ku, Minentrang Apu ku lalaban kang Ingkung ku, Pegtanggul na naku migera la pauli ku. Menulauk lapu retang teksas nang Ingkong ku, Pinutak noman pu reng gaindu nang Apu ku, Linundag ya'ng pusa tegal ne ning asu, Pati kanan babi mitugtug pu mibulus pu. Magurung e meyari ing gera ding bayani Seksi nong babai menalbe na paligid mi, Nung alben yu kami makatula kami, Ing Ingkong kung lawi y Apu kung sawi. Sabyan ku pung tutu nung nanu ing ikit ku, Bitobitong mabilug selikut nong Ingkung ku, Uling-uling bitin-bitin, ali lapu o' misip kayu, Adwa lapung chicu ring selicut nang Ingkung ku. -Lilibeth/Alemanya Cacang Lilibeth, O Cacang Lilibeth, tune Capampangan, uling angga ngeni e me pa kelingwan; kecatang salita ing amanung siswan yang pecamasanting ing ugaling a yan..! Atandanan murin, keca lang apansin, sese nong Inkung mu, adwang macabitin; Pilatan ning pwad na, tsicu lang matuling bunga nong tanaman, pimamanan la pin. Paeng Maniago Ed, Cagaling mu namang suglungang poesya ustu la king bilang, ding bersu at rima agyang I Cang Rene e ya mipaynawa pisundu-sundu mu magcang malakwan ya... Ating pang manyaman talangcang majuli menasa mataba, la retang babayi ding caracap-dacap king buslu ibili ikulug lang asin, panulam lang nasi... Tutu ing sabi mu, tictac la canyaman agyang nanung lutu, liga o buru man caybat mong pemusit, tiltil la keng aslam cumusad naca mung, matras ketang dulang... Paeng Sarili tang mismu, icata nang tatsa ya nang pangamanwan kesa deng aliwa nung ila pa mecad ing kecata mimwa nung abugnus tane, masakit nang bina..! Ing balu ta naman, magsaya cata mu king amanung siswan, sulat-sulat rugu ba teng asasane ing pamangamanu mamasa, migale, ampong magbasultu.. ! Datang ing panaun deting tatanam ta amanung mapinu mupul catang bunga yuyumu la lalu, cabang lululut la ngeni manibalang, maki-caslam la pa..! Neng misan balu mo, oren deng pamitan deta nang cacagling wawa ra mangaslam malutung la kinis, tiltil dong begucan pakisimpara te king amanung siswan..! - Paeng |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00071 |