 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| KAPAMPANGAN LIBRARY OF POETRY PAGE 68 |
 |
| Ernie C. Turla, curator |
| ||||||
| CABIASNAN ( Poesia ) Neng Jose Roman Laquian 2007-11-22 1 Magdeclara ya ing banua queng gloria na ning Miglalang at ding sablang Queang guewa , papaquit ning calawacan ; ing aldoldo ya ing mamie pamaniabi qng cabiasnan at ing bengi-bengi naman papaquit yang matas beluan ; ing carelang matning suala , pamaniabi't lenguaji man , mengaramdam , linaganap qng masalang cabilugan , 2 ing carelang matning suala at amanung pengamanuan mengaparas angga wacas na ning yatu tang tucnangan ; ining aldo ampo bengi ilang Queang pilugalan qng tabernaculung diquil qng aldo ning caningningan ; ing pamilual na ning Guinu wacas banua manibatan at carin mu rin mibalic ing lualas Nang lilibutan . . . 3 Ing bale nang asmu tibe , telacad ne ning Cabiasnan at deng queang pitung asias metung-metung nong tebasan ; pete no deng animal na't guinawang alac mu naman , inayus ne at gueyacan ing queang macabang dulang , at saca ne tinalacad qng pecamatas a dalan , mamaus ya't gugulasio, managcat ya ing Cabiasnan . 4 Emu wari daramdaman mamaus ya ing Cabiasnan at pati na ing intindi lulual ya sualang masican careng matas a taluctuc at misasaganang dalan , careng lele pasbul-balen , papalub qng cabalenan , ing Cabiasnan tatalacad ya queng macalual a dalan , quetang lugal a tabnuan , mamaus yang asmu sican : 5 " Ninu man quecayung musmus diwa , lungub , lungub queni , para queang magculangan unawa't pamanintindi , munta ca queni't mangan ca queng tinape cung malaman , at minum ca quening alac a guewa cung asmu niaman , mipacde at cumabie ca , lacuan me ing camusmusan , magumpisa meng dalanan ing dalan ning cabiasnan ; 6 O quecayungang lalaqui , mamaus cu , managcat cu , at pasuala cung amanu para careng anac-tau , O icayung musmus diwa , intindian ye ing amanu at icayung mangmang pusu ing maquiramdam canacu , maquiramdam queng sabian cung bague purus mangarilag at deng labi cung mibuclat , bague matulid ing pasiag : 7 Deng amanu ning asbuc cu quen lang sablang catuliran , alang bague macalicu , macalili't suwail man , caring biasang manintindi , aquit dang malino la ngan at matulid lang macalto careng manaquit qng beluan ; ing bunga cu , mas ya pa quesa queng pilac ampo guintu inia cuanan me't tangapan ing canacung mal a turu ; 8 Acung Dalise Cabiasnan magdatun cu queng cayapan at canacung acaquit ding balang milabas at beluan , ing asbuc cung mangamanu maniabi yang catutuan , carumaldumal careng labi cu sambitla ing carocan , ing pangatacut queng Guinu ing impisa ning cabiasnan , ing pamiquilala queang Banal , ing impisa ning beluan ; 9 Ing pangatacut queng Guinu , ya ining pamicasaman careng sablang capalaluan , cayanginan at carocan , maroc a lacad at asbuc , ilang canacung casaman , bandi nacu ning Guinung Dios manibat qng alang anggan , matning payu canacu ya , pati mayap a beluan , canacu ya ing intindi , ing upaya at sicanan ; 10 quening capamilatan cu dening ari mag-ari la , at ding mepiling pamuntuc macapasiya lang husticia , quening capamilatan cu , deng pamuntuc mamunu la , at maguing ding mal a tau at matning hues cayabe da ; deng lulugud qng amanu cu ila ring caluguran dirinan cu't cacatmuan cayamanan at dangalan ; 11 Canacu la , wa , canacu , ding cayamana't dangalan , manatili lang canacung cayamana't catuliran ; ing bunga cu mas ya quesa pilac ampo purung guintu , ing paquinabang ning bie mu canacu ing mal a turu , dadalan cu queng dalanan ning catulira't catutuan , queng libutad dareng dalan ning husticia't caatulan . 12 Deng lulugud qng amanu cu ila ring caluguran canacung antabayanan qng panaung cabagabagan , deng lulugud qng amanu cu ila ring luluguran at dirinan cu carening pamana cu't pibandian qng beluan , catuliran at pati na carangalan , dirinan co't catmuan deng carelang ingatang-yaman . 13 Mangasaya la ding taung manaquit queng pangaral cu at ding taung macanicua qng beluan cung mapuru , uling tinda cu mas ya pa quesa pilac , rubi't guintu , quesa qng dalise guintu , tinda cu mal ya pin tutu ; queng canacung wanan gamat , caba dareng aldo atyu , ding yama't dangal atilu la qng cailing pangamat cu . 14 Bandi nacu ning Guinung Dios qng impisa ning lacad Na , bayu pa man mig-impisa deng obra Na qng minuna , iniang ala pang impisa , manibat qng alang anggan atyu na cu , at iquit que ining yatu a melalang ; milual cu iniang ala pang sibul qng calalaman , ing lalapo danum-sibul qng lalam nang tutucnangan , 15 bayu Ya mibiling bunduc ampo burul , milual cu , milual cu 'niang ala pang taldawa't gabun qng yatu ; iniang tetag Ne ing banua , atyu nacu queng siping Na , 'niang mibili Yang balantuc calalaman , lalam banua , iniang tetag Ne ing banuang mamie sala't piaslagan , iniang pasicanan Na la deng sibul ning calalaman ; 16 at ing dayat malat Queang dininan queang angganan ban ing danum queng utus Na eya cabud sasalangsang ; iniang deng pundacion yatu metung-metung Nong tilduanan , atyu nacu queng siping Na , cayabe na cung linalang ; queng aldoldo abe nacu't acu ing Queang ligaya at maralas babie tula queng pangayatyu't arap Na ! 17 Nung macananung milatag la ding pundacion ning yatu nung macananung sucad da , mibili lang macaustu , at ing batung paniuluc Na queng pundacion mibili Ya ing Miglalang , at deng batwin abe-abe lang migcanta , at ding sablang anac ning Dios gugulisac la queng saya , atyu nacu't queng aldoldo acu ing Queang ligaya ! 18 Iniang mengasara la reng pasbul na ning dayat malat , 'niang pipiglas yang antimong manibat queng bale anac , 'niang megawa la ding biga a magsilbing imalan na at ing capal ning dalumdum ing balut nang macasadia , atyu nacu , nang sabian Na queng dagat, " Quen ca magdatun , angga queni ca mu datang , e lalagpas quecang alun ! " 19 Maguing Queang pamanutus qng abac queng pamaglual at pati qng galing-aldo nung nucarin ya maglugal , ban deng wacas na ning yatu macacalale nong talnan libutad ning banua't dagat yang magsilbing mamilatan ; atyu nacu , milual nacu , bayu pa man mica-sibul calalaman na ning dagat a midinan queang pasbul ; 20 'niang mipasiag la deng pasbul na ning imbing camatayan , atyu nacu , at balu que ing yatu queng calualasan , nung nucarin ya ing dalan qng sala't queang tucnangan , nung nucarin ya milugal ing parting cadalumduman , atyu nacu , balu cu la ding mitabnu dang angganan , balu cu lang panaluquian dalanan da at tucnangan . 21 Linub nacu careng lacsang cayamanan dareng nieve , iquit cu la cayamanan deng granizong mangayugse , mireserba laban caring panaun cabagabagan , laban qng datang a aldo na ning guera at labanan ; atyu nacu at balu que ing sala at queang dalan babo-yatu linaganap queng angin na qng aslagan . 22 Iniang miparti-parti ya ing danum queng queang dalan , iniang ing quildap ning duldul menudyat yang mamie uran qng caquewan alang tau , deng mengasalbag a uran qng melangi't sirang gabun , migpatubu yang tanaman , atyu nacu , at balu que penibatan pati yelu at busilacang escarcha , ibat banua nung caninu . 23 Milual cu 'niang ala pang ordinancia caring banua , at ing suala na ning Guinu yang migbabo careng biga ; atyu nacu 'niang deng biga masalese Nong binilang at deng datucanan danum Queang tintua't pengamanuan ban queng mitacdang panaun , canita la mugse uran qng malangi't sirang gabun , magpatubu lang tanaman . 24 Lelangan Ne ning Guinung Dios ing yatu capamilatan cung Cabiasnan , at tetag Ne ing banua uli ning beluan ; qng Queang beluan , miparti-parti la ding calalaman at ding biga memagpatac la ngang ambun ampo uran ; deng dalan cu dalanan la qng ligaya at canawan at ding sablang lalabasan cu mitmu lang capayapan . 25 Ing bie anti yang tanaman queng taung ating cabiasnan , tanaman mamungang mayap lele ning dalan canawan ; nung macanian , lumacad cang lacad qng capanatagan at ding quecang bitis , e la , queng lacad mu , mitaquid man ; Anac co , maquiramdam ca careng canacung amanu , balugbug mu iquiling mo careng cabiasnang sabian cu : 26 Matudtud cang miamasamas queng oras ning pamagquera uling queca Yang maningat ing Guinu tang Mayupaya , Ya ing maguing compiansa mu , pamilacad mu queng yatu , ingatan No deng bitis mu qng carocang mapansilu ; lumacad ca qng cayapan , catuliran at catutuan , lumacad cang mababa lub qng banal Nang arapan . 27 Ing balang mayap a dapat , daptan mu queng mangailangan nung atyu ya qng upaya ning gamat mu para gawan , nung atin ca mu rin naman a-bie queng para mung tau emu sabian , Bucas namu , mibalic cang pasibayu ; e me panisipang maroc , cayabeng para mung tau , a balu mung mabibie yang mapanatag queng siping mu . 28 Eca sa maquipagcasu caninu man alang sancan , nung ala ya quecang guewang maragul a casalanan ; queng taung basaguleru , eca basta maririria at emu sa paquiapusan ing nanu mang queang gawa , uling ing suwail ya ing queng Guinu casuclamsuclam , dapot ing payu ning Guinu atyu queng macatuliran . 29 Ining taung mapanlibac , e me basta aawatan uling queng pamanawat mu , icang queang picasaman , uling ing licas a maroc , eya biasang tangap payu , eya biasang magbaba lub o tangap mayap a turu ; mayap pa nung ing pantas ing pangamanuan mu't awatan qng amanung cabiasnan , papurian naca't luguran . 30 Turuan me ining pantas at maguing mas ya pang pantas , turuan me ing matulid at qng beluan ya cumatas ; ing pantas ya ing magmana queng corona ning gloria , queng corona ning Cabiasnang babie ning Dios ibat banua ; nung magpacapantas ca , maguing pantas ca pin lunto at ing dalan mung dalanan , ing aslagan na ning aldo . 31 Atyu ya queng taung maroc ining sumpa na ning Guinu , dapot queng taung matulid babie Ne ing payu't turu ; ing mababa lub a tau , yang midinan cabiasnan , dapot ing sobrang palalu , yang mica-camarinayan ; ing maquiramdam queng payu , manatili yang panatag at qng balang pamiticdo , talacad yang asmu tatag . 32 Ing ustung pamanintindi at dalise cabiasnan cuanan me't e cacawanian , lingapa't e cacalinguan ; pecamaalagang bague ing cabiasnan , wa , cabiasnan , nung luguran me't e lacuan , icang lubus nang ingatan , bunyian me't pacacaulan , mamie ya quecang dangalan at corona na ning gloria queng buntuc mu queang dinan . 33 Queng pamilacad-lacad mu at qng balang quecang tacbang , maguing qng pamamulai , tutung eca mitaquid man ; talnan meng matiguit ining caturuan ning cabiasnan uling ya ing quecang bie't mayap a paintungulan , talnan me't e tatabiluan , ingatan me ing Cabiasnan , dalan nacang catuliran , capayapan at cayapan . 34 Ing dalanan dareng maroc , salincuan me't pangilagan at ing lacad dareng imbi , e me dapat lalacaran uling ela ngan matudtud , liban nung gawang carocan , at lalaco da ing tudtud ulina ning quenimalan , uling ining cacanan da , tinape ning carawacan at ing pane inuman da , ing alac ning cat'raidulan . 35 Anac co , maquiramdam ca careng canacung amanu , balugbug mu iquiling mo careng amanung sabian cu , careng mata mu emula wawale o lalacuan man , at qng capilubluban ning quecang pusu mo sinupan , uling bie la at cayapan qng mabilug mung catawan at ilang mie catatagan careng tacbang mu queng dalan . 36 Anac co , paquiramdaman mo deng aral ning Cabiasnan , deng balugbug mu iquiling mo queng intindi at beluan ban ca mong e bisu-bisu't macapaningat guelingan at ban deng labi mu ilang macapaningat dangalan ; Anac co , emo wawale careng mata't panimanman , ingatan mo deng magaling a cabiasnan at cayapan . 37 Mimingat ca , mimiwas ca quetang babaing patutut , deng labi nang mapanucsu , mamamanulu lang pulut at ing queang asbuc , yang mas mataluras pa queng laru , mimiwas ca't e lalapit queng macasadia nang silu , deng tacbang na lugal ning Sheol iyang carelang puntalan , deng bitis na titipa la pababa qng camatayan . 38 Idayu mo deng lacad mu queang mamisaling laman at eca sa lalapit qng pasbul ning queang tucnangan , mecad magcamali cang mie queng ingatan mung dangalan at ding banua na ning bie mu quea namung panacauan ; ing quecang pequi-apiran , guisangan neng quecang yaman at dalan na queng pugad na ding sabla mung pipagalan . . . 39 at ica pin manangis ca queng pait ning cawacasan ngening laman mu't catawan daranas yang casaquitan , at queng sarili mu sabian , ba't quesaman que ing caturuan ? ba't ecu la penaluquian deng aral da qng cayapan at deng balang pamagtulid qng pusu ecu pemintuan ? 40 Minum , minum ca mung danum queng sarili mung tapayan maqui-danum , queng sibul mung ating danum a dadalan . Maniabug la wari quecang sibul qng calualasan at lalapo la ring danum qng marinat a dalanan ? Nuan sibul queca lamu at emu la paqui-pisan . Magsaya ca queng asawa na ning quecang cayanacan . 41 Ining malsintang usa queng usang babaing palsintan , qng salu na miramdam yang libung tula at sicanan ; inia emu panusigan lugud aliwang candungan at ing sinapupunan ning e quilala , quecang caulan . Ining maroc a me-ulul at mitaling casalanan uling e tinangap turu , mapait ya camatayan . 42 Emo sana panusigan deng mata mu queng tudturan , careng talucab mata mu , e naca sa mimidlip man ; mulai cang anting usang mimiwas caring mangasu , at antimurin qng ayup caring gamit ding manyilu . Puntalan mo detang panas , lacuan me ing catamaran , ticdo't magpacapantas ca , baluan mu la lalacaran : 43 ilang alang mamantabe , manibala't mamuntucan qng panaun ning quealan , atin lang ustung pamangan , at panaun pamamupul , pamangan da , titipunan , ila , e da panusigan : sobrang tudtud , catamaran , uling quening sobrang tudtud 0 maguing pamiidlip man datang yang anting manaco ining imbing cacaluluan . " 44 Careng taung magculangan intindi at cabiasnan , maniawad la qng Guinung Dios , mamieng ating catapatan , maniawad la dening taung mitmung casalpantayanan , at laco ra queng isip da ing nanu mang capagdudan , ibie Ne ning Ibpang Dios ing aduan dang cabiasnan , ibie Ne ning Dios queang mitmung lugud at cayapan ! 45 Dapot e balang melalang , midinan lang cabiasnan , detang isipang mebulag , alang casalpantayanan , uling angga ngening aldo , ing cabiasnan at catutuan ede aquit , tatacpan ne ning talucbung a mamilatan , talucbung a miyalis mu cang Cristong sasalpantayan , Guinung Dios tamung babie-caligtasa' t catimawan . 46 Ninu la mo dening taung midinan purung cabiasnan ? Ninu lang macaintindi , macatalastas qng beluan ? Ninu la mo nune detang mitmu casalpantayanan , detang mapagpacumbaba at lalacad qng cayapan , calupa na ning propetang Daniel iniang milabasan a panaun migpuri ya qng Dios Ibpa tang Miglalang : 47 " Purian Ya ing Lagyu mu Dios , Guinung Dios capilan pa man , uling Icang panibatan ning Cabiasnan at sicanan , balang oras at panaun ila ding Quecang babayuan , lalaco Mo at bibili dening aring manungculan , bubulalag Mo ding bagueng secreto qng calalaman , talastas Mu't balu detang atyu qng cadalumduman . 48 Ibpang Dios ming pupuria't lubus ming pasalamatan , Guinung Dios ning quecaming menimunang pipumpunan , Icang Dios a magcalub qng beluan at guelingan , caring sablang caturuan at dalise cabiasnan , ing pamanintindi careng panaquit at paninapan at pabalu caring bagueng marapat ming talastasan ! " 49 Ing cabiasnan niting yatu , qng Guinung Dios , camangmangan , at daracpan No ding biasa qng carelang camulalan ; deng gawa Na't caisipan ning Guinung Dios tang Miglalang mas matas la careng gawa't isip ning taung lelangan , nung macananung mas matas ing banua qng yatu, macanian ya mas matas gawa't isip ing Miglalang queng lelangan . 50 Ninu man quecayung musmus diwa't culang qng cabiasnan munta cayung mababa lub , maqui-casalpantayan an , mamaus Ya at managcat, anang Guinu ning cabiasnan , " Munta't lumapit Canacu icayung cababayatnan , icayu ngang mangapagal , ban midinan capainawan , pasanan ye ing pamatuc , pamatuc Cung asmu cayan . 51 Pasanan ye ing pamatuc , ining pamatuc Cung mayan , at manigaral Canacung mamie tune capainawan , matunud Cu't maqui-pusung mitmung lugud at cababan , at aquit ye qng quecayung caladua ing capainawan ; Pasanan ye ing pamatuc , icayung cababayatnan , Pamatuc Cu , malambut ya't mayan yang Canacung pasan ." 52 Cuma , cuma cang cabiasnan , cuma ca't e cacalinguan , mas mal ya pa quesa guintu ampo sablang cayamanan , Wa , cuma cang pamanintindi quesa pilac a maquinang ; puru't dalise cabiasnan qng Guinung Dios manibatan , yang babie Na careng taung maqui-pusu qng cayapan , e guiguinu careng cualta't materyalismung diosdiosan . 53 Caninu ya manibatan puru't dalise cabiasnan ? Caninu pa nune qng Dios , qng Guinung Dios tang Miglalang , Ya ing babie careng taung maqui-pusu qng cayapan , antinamu cang Bezaleel at Aholiab a mabeluan , binili Na la ning Guinu qng pusu da ing cabiasnan , qng pusu dang e guiguinu qng material a diosdiosan . 54 Pusung ma-pamanintindi caring sablang catuliran , pusung biasang mangilala qng husticia at cayapan , pusung babie ustung atul qng mabilug cabalenan . . . Deng mata da reng pusu mi , O Guinung Dios ning Cabiasnan , Buclat Mu la , ban aquit mi ing Sala Mu't Caningningan , Ing Gloria Mu't Cabiasnan , Catulira't Cabanalan ! 55 Ing dalise cabiasnan , Queca Guinu , manibatan , babie Mo queng mababa lub , maqui-casalpantayan an ; ing quecaming panalangin : ding asbuc ming mangamanu maguing papuri la Queca , qng cayapan a mapuru , at qng pamibulebule ning diwa mi't panimanman , Queca , O Dios , manigaral : cababan lub at cabiasnan ! Cang Roman Cabalen, Cabyasnan mu keng poesia, macagulis cu mong bagya deng mangabyasang poeta, menibat ngan king Dios Ibpa pami-ugnayan ding tau, pamikasundu at camwa king amanu ya mayakit ing malabug o masala... Ing cabyasnan malawac ya at ala yang cayangganan anti yang sibul mamagus malaut ya kayactangan nung macasentru yang lugud nanu ya mang pisasabyan at ing tawling pamanusga nune king Dios a miglalang... Pasalamat ta king Guinu puryan ta ya't parangalan migale tang poesia lalu king amanung siswan capamilatan ning lugud king amanung Capampangan luid ya ing ANASI bilang anting kecatang ugnayan..! neng Paing For the next page, go to http://maxpages.com/poecia/poecia69 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00122 |