 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY PAGE 67 |
 |
| Ernie C. Turla, curator |
| ||||||
| TABLE OF CONTENTS: 1. Tuqui Ca Baculud - Jose Gutierrez David 2. Paganaca Nang Atching Liling - Chasenavarre 3. Pulosa King Amanung Siswan - Renato B. Alzadon 4. Capampangan Ing Salita Cu - RDM 5. Disyertu - RBA 6. Ing Dalit Ning Dutung - Renato B. Alzadon 7. Ing Yatu Ning Anak - Artdax 8. Ing Yatu Ning Anak - Tony Pena 9. Ing Yatu Ning Anak - Willie Dizon 10.Ing Metwang Yatu Ning Anak - Artdax 11.Bulbulan Naka Butu, Itu - Jason Paul Laxamana 12.Ispongang Penisis Kalang - Jason Paul Laxamana 13.Maplas King Puki - Jason Paul Laxamana 14.Ing Pengari King Anak - Tony Mercado Pena 15.Panupayang Lubus - Paeng 16.Sulapawan Co Ngan - Dr. Udis Sanchez Manalansan-Lord 17. Pamanyara - RBA TUQUI CA BACULUD by Jose Gutierrez David contributed by Nestor Galura Queta qñg busal na niting Capampangan Carin ya mayaquit tibuan cung balayan A nung nu babagul ing marimlang amiam At nung nu masayang titiman ing bulan. Lauisuis ding cuayan matas magparayo Ing azul a banuang lililung qñg yatu Alun ding palayan ing sinag ning aldo Panagaula nala masayang balen cu. Carin e mapansing angin dayat-malat Dapot caring ilang misna qñg calapad Sañgapan mu naman ing tiup nang banayad Ning macayayamang angin qñg abagat. Malambis a basle carin mu dandaman Ing siuc da ring batis ing angin qñg parang Ing dalit ding ayup ing biung ding tanaman... Paua ñgan ping babie tula't capaldanan. At ita... balu mu? ausan dang Baculud. Qñg bale meyaring cuayan at pinaud A quecang acaquit qñg metung nang suluc Carin cu mibait, mebiasang linugud. Tana... tuquian mucu carin ca magsaya Queta qñg balen cu gauan da cang mutia; At carin, baluan mu alang lua't paliasa Bucud mung mimiral ing lugud at tula. Baculud, Capampangan circa 1908 Chasenavarre Paganaca nang Atching Liling: Ing Amanu Ing Amanu, anac, macabaldugan ya Anti ya mong banglu o panang besibas, Istung miapse ne ala nang salabat Atiu ne qng angin e ne magbalicuas. Ing Amanu, anac, salamin yang tapat Ing pangatau mo caya ya cacablas, Isipan meng mayap bayu me iagcas Bayu me ibulus queng labi mu, anac. Ing Amanu, anac, alale yang tune Qng erang ligaya o aping talete, Pacacalale meng palual qng caluban Bang e ca sumisi bucas capilan man. Pulosa King Amanung Siswan By Renato B. Azadon Inya mag-English cu ating casangcanan ding cacung casabi e la Capampangan, ing Capampangan cu, nung ya ing gamitan, ding Americano e re aintindyan Nung balu de sana ing Capampangan cu e cu man Mag-english careng carungut cu; ing cacung casabi, cabud abalu cu, king Capampangan ya, mangapampangan cu. Inya kening Buclud a pipagaralan, ing Academya na Ning Amanung Siswan, nung magsalita cu, e cu calaraman, e cu pu mag-english pane Capampangan. Ngacu mong mimisip, keni king ANASI Capampangan no man ding menasa keni, uling Capampangan ing carelang sabi, king salitang English ali cu manyabi. Nung capilan naman mangapampangan cu lacuas yang tatalas ini nang dila cu; detang Capampangan a acalingwan cu magbalic no ngene king caisipan cu. Tabalu, tabalu, caretang aliwa nung buri da English ila na pung bala, dapot acu naman, Capampangan na pa, ing panugalyan cung yapse na ning dila. Oyan ing pulosa king Amanung Siswan icayu nang bala nung buri yeng tucyan, lunto tang masaya nung saluran ye yan at mipasyag cayung catatalacaran. Capampangan Ing Sulat Ku RDM Ing Dios lelangan na ing egana-gana metung neng lelangan ing amanung mana atiyu canacu, atyu naman keca yang gamitan tamu nung malyari sana... Oba't mag-english cu, ali cu sa ali Capampangan myuman, misulat parati nung king lual cung bale, iti e magsilbi mipasnu ing lub ku, ken mu mang ANASI... Ba oyni na naman, mecabalangcas cu king amanung siswan, malagu, masamyu cabang babasan ye, dacal salamat pu misane na naman, king pamangamanu. .. Disyerto Neng RBA-11-2007 Ketang cabubuslan ning Disyertung labwad nung nu ya tinicdo ing mabanding syudad; carin la mitipun midawupan palad dening misampulung a micacapatad. Ken de apisabi ing mal dang amanu nung nu melangi yang antimong disyertu; manintun lang lunas a nung macananu ban keta akit deng ticdo pasibayu. Miglibut-libut la at memagumasid lawe keni't keta king macapaligid; magbacasaling king misan a saglit ing mayubung lunas cabud da nya akit. Apagumasdan de ing santing na ubug nitang anting alun a macalindayug; anti yang manaru king lirang tatabug ban keta misan pa tigtig yang panirug. Inyang maramdam ya musicang malambis ing danum tinerac mekyagum king sunis; mengari lang kimut ding myaliwang bitis king awus ning nota e byasang magmintis. Apagumasdan de Bulkan a migising cucurug yang mispac king benging matuling; ing daramdaman da king keyang saingsing ing pacapalyan ya lugud a mebingbing. Cawuli ra bale misabi-sabi la nung nanu'tang lunas ing apagmasdan da, at ing balang metung yang asasabi na pamicacalugud---pamibasa-basa. Nung atin mang lalto e pamicasundu mayacwa ya ngara king sabing malagu; Tanggapan ke ing "K" ing "C" keca ne mu alang lunto manong ampon pamibunu. E yata, ing linto king disyertung Labwad lunas yang malino king gulis ning palad; Ing amanu dang mal acwa nang talacad lalam nang bandila ning pamicapatad. ING DALIT NING DUTUNG Neng: Renato B. Alzadon Dinatang ing dimla. Aku itang dutung A pakakalale mamako salilung; Ining malimpuyut a angin a bibiung Paglaputan no ding maputla kung bulung; At ing kakung aldo lalon keng dudulung, Magpampan king bunduk nung nuya magkanlung; King panga-ungle ku dili kung bubulung: "Sasalpantaya ku king kaku Miniaklung." Limbug ne ing aldo. King keralumduman Ikit kong kinislap ding sulung paritan; King pangarate ku king kakung pagkeran Dutung kung mipase bigbugan ning uran; Babad ya king pawas ing kakung katawan Bistaman ing dimla mangutkut king laman; At daramdaman ko ding mibubulungan King pamanyabi ra king salitang dayuan. E na man melambat ing banyagang dila Tinabi ning kantang kipnuan king upaya; At itang magkantang malambing siwala Ya ing mal kung indung kaku magtumaila; At kaibat ning kanta itang mal kung ibpa Ya ing mengi-gale poesiang pikudta; Dios Ko, kasampat na, dala keng miragsa Ing pakamalan kung sisuan a salita. Biglang menajimik. Ing sabla migdatun; Tinuknang ing angin a mamius manugun; Ing uran, selisian ning payapang ambun; King dagat, maniaman a tudtud ing alun; Mipda no musika detang maglimayun, Mipda no plegarias ding pusung magmalun Dutung kung siniklod, minuma king gabun Nung nuku menibat, nung nu ku matambun. Ketang maninyud kung melipang a male Gagato antimo yang mepakling dangwe; Ing nandin dimdam kung siguk a manene Meguing sambitan ya't matning tagulele: "Oyan, balen Capas ing anak mung tune Ing pagmaragul mung Poeta, mete ne...! O, ninu pa ngening sumulat, migale Kapurian king Ibpa king grasya nang babie." "Nung abasa yula ding kasulatan na, King lagyu na ning Dios babie lang ligaya; Pablasang king balang grasyang tanggapan na Ing pasalamat na susukdul king banua; Dapot ing lalu pang makayama-yama Sinulat no deti king amanung mana; Ban nung atin iyas karing kalamnan na Ding kapatad, ilang manakit mumuna." Ding makapaligid, mangadi no kanian, Aku king bili ku mangadi ku naman, Aduan ku king ibpa dinan neng sikanan Ing matbud kung pusung biglang misalunan; "Dios ko at Guinu ko, o nanan meng kunan Salunan kung pusu, daya yamu't laman? Wari't paintulut mung mibawi ya't sikan Ing balang pintig na kasalpantayanan!" "King bale mu Guino, king matas a banua Aldo o bengi man mipaligayan ka; Ngening ati no ken ding Santo at Santa Nanan me pa Guinu ing kakung kaladua? Dapot keti sulip, ditak lang Poeta Ding king mal mung lagyu pupuri't sasamba; Inia paintulut mung sikan kupa sana King bara kang samban king kakung poesia." At kanita murin, dimdam kung melaput Ing aguing babagwang kaku mengulaput, At inyang milaya ku king pangasaput Dimdam keng minawa ing salung mepuput; Ining mainang daya, migising, kinimut Pitabi-tabi na ing sinagkang lumut; at antimong dutung, karing kakung yamut Minagus ing sibul a nandin migkaimut. Ding nandin mangadi anti lang migpampan, Ing banyagang dila dimdam kune naman; King panintindi ku karelang sasabian Menagumpe la king karelang depatan; Mapilan mung aldo ing kakung panayan, At nung ala murin lunto kasangkanan Lumual naku't muli king kakung tuknangan. Ban karin paimawi at magpakasikan. King kakung tuknangan dakal lang saguli Ding meko linabas bayu ku mibawi; Mapilan pang dangat 'nyang aldo mapali Ing gilas ning diwa dinatang, sinubli; Maintun lang paniulat ding kakung taliri Sabik lang migale ding kanakung labi; Ban king kawatasan idalit kung matni Malugud ya ing Dios karing kayang sapni. Ing diwang poeta a aldo migkanlung Mispak ya't minukiat king bayung tungatung; Ing dalit-pangadi ning pusung daralung Dela na ning angin karing balang bubung; Ing dalit a pagas ngeni e ne bulung Kasing katni ne ning kampanang mepaktung, King bayang maramdam ing Dalit Ning Dutung: "Sasalpantaya ku king kaku Miniaklung." ING YATU NING ANAK Kepampanganan neng ArtDax 11/07/07 Pagmulalan cu, anak cung pagmulalan Nung deng palung ding tatyo gawa lang pakwan Nung deng biga babo a banayad dadalan Bulac lang kending ma-ayus la salansan Pagmulalan cu nyang anak cung malati Uling ing isip cu isip yang inusenti Nung balat ning dapu casing capal ne'iti Ning magaspang a gomang dugang ning cotsi Pagmulalan cu o'bat ing berdeng gubat Neng dumayu ca maging azul ya caibat Nung ita cayang uran-yelung papatac yang migdala quetang sorbetes cung liclac Pagmulalan cu neng laguslus ing uran Neng ing uran didiluan nacu catawan Ila caya detang angjel a mamyalungan Quetang babo, ngeni mandilig na naman? Pagmulalan cu nung deng talang kikislap ila neng bengi, titipang alitaptap at itang kablas ning cacung gulisak bosis ne ning taung bisang makibacbac Pagmulalan cu, ating gera siguru Neng duduldul, kikidlat queng babo yatu Oita pin canita calati cu pa rugu Qng sablang bague ala cacung tinuru ING YATU NING ANAK (Linikas neng Tony Pena July 17, 2005) Pane kung pagmulalan kanitang malati ku palung da reng tatyo gawa lang pakwan malutu ampo reng biga banua susulapong maingat gawa lang kending bulak manyaman makakalat! Inyang malati ku ing kakung mulalang yatu lalu yang magmulala potang manakit kung dapu marapat kung isipan ing magaspang nang balat gawa yang gomang parulang makapal, makunyat! Pagmulalan ku nung bakit ing berdeng kakewan magkule yang azul king marayung kabundukan sorbetes makatulung wawa pagmulalan ke ibat ya king uran-yelo ning marimlang Disyembre? Potang ing uran basbasan naku kabilugan umpisang impun buwak angga king talampakan aliwa kaya ding angeles king babo banua palage ku bigla dakung imiyan alang patna? Mapalyaring detang dakal batwin kildap-kislap dinugpa keti sulip antimong alitaptap ampo ing boses kung ginulisak dinagundung kablas pakibat ning makipate taung metung? Atin waring kasalukuyang gyerang mibuklat anyang duldul kinalugkug, kinildap kinidlat? makanyan man uling anak ku pa mung malati e ke balu kabaldugan ing tutu keng mali! ING YATU NING ANAK Linikas neng Willie Dizon 11-12, 2007 Pane kung pagmulalan canitang cacung cainacan Palung dening tatio ibatqueng malare paquan Nung deng biga quing banua papato-pato la Anti lang quending bulac macailera't macaasad Bilang metung a cainacan mitmu cu't maiatu Minisip cung banaiad queng itsuraning dapu Melaus cung inisip ing balat nang alsadu Menibat queng dugang lupang matibe't manguinis! Pagmulalan cu obat cule yang berdi ing caquewan Cabud magcule yang asul ing mataluctuc cabunducan! Magtacacu nung minuran nang ielu ning Disyembring iladu Detang na ing sorbetes a mecasaya cancu! Potang ing uran adiluan nacu cabilugan Ituctuc ning buntuc angga sepu ning talampacan Palague cu ila ding angeles quing babo banua Mengaring mimila anti mo ing aldo manimu ya? Deta waring batuin a sisindi papatda Alitaptap tinipa quing dalumdum mamialungan cucuticutitap Ing siula cung guilisac linagapac at quinablas Siualang managcat maquipate mamatiauan?. Atin waring guiyera pataning casalucuyan maliliari Cabang daratang, duldul ampong quidlat macagalgal? Nanupata ecu pigagad uling anac cupu Kabaldugan nini canacu pepabalu ali daman! ING METWANG YATU NING ANAK (A sequel of "Ing Yatu Ning Anak") by Artdax Marakal ku pagmulalan, anggang metwa ne'ing yatu ku bakit ing palung ning tatyo malapakwan yang malutu bigla yang manimutla keng balabat ning matuwang gaindu! Makanyan mu naman ining isipan kung mabusisi bakit mo ing dapu babo sasagakgak ya keng kabsi dapot ing dapu lalam, gagalukguk ya ing buksi! Magumpisang malati ku, anggang ngeni kukutang da bakit ing malasing keng basu buyagyag sikretu na pero ing malasing keng poder indredus salikut na! Oyning masanting mulalan, pati baba makanganga obat kaybat ning marimlang patak-uran alang patna sunlag yang mapali ing pinanaring makatalanga! Masanting ping pagmulalan obat ing Ginu maladlad yang matalik kumaul king anak nang kapus-palad dapot maymut ya kandungan king taung kuyum-palad! Maski metwa ne'ing yatu ku, e parin paklud pusad ku aldoldo mangading tayimtim buntuk kung makaruku magbalik pasibayu king mapaling karinan ning Indu! BULBULAN NA KA BUTU, ITU! neng Jason Paul Laxamana Akasabi ke nandin ing pengari mu E mu mamarokan ing kayang amanu Uling bala mu kaya nang pilming balu Oy, baintau, bulbulan na ka butu Panaun na ping misip kang ikang dili Dati susumbung ka't kaya pupulayi Potang keka rugu ating mángayi Manong na yata ing makantita ngeni Nung danupan ka ika'ng mamupul pale Ika'ng maglarin nung kesiran kang bale Patua na ka, `tung, dapat na kang masane King e biru-birung kalakaran ning biye Lulug'ran na kang tutu ning pengari mu Inya ing buri na kumatni ka buntuk E ke balu ing lagyu ning kekang Indu Pero ing yaus da kaya Apung Ginu Tuneng anak na ka ning Dios a malugud Mesese ka't mebanteng alang patugut `Pot ngening bulbulan na kang baintau Karing obrang bale o't e ka sumaup ISPONGANG PENISIS KALANG by Jason Paul Laxamana Ay, papainuman na lang tabletas a mapait Deta kanu ring kayang iinuman a pilit `Nia ala nang ta'ram pa king kayang pamiisip Sakildapang asaul ding kutang a masa'kit Sukat lang memanilak ding kayang pepainuman Lalasa la kanung ispongang penisis kalang Detang tabletas nang pampasaplala kabaluan Suklati't kendi na' kanu ing karelang kanan Aruy, mi'kamas ya ing lakan ning pangabiasa At penaus no retang tau: diablus at puta Ya na mu pin kanu ing ma'mie saup karela Nung e ro buring inuman, mabating na ya Kabang lalakad, mitaluras ya king burak At menabu king kulkul; ali ya pu miukyat Bang ating saklolu pekasikan ing gulisak Salamat, ating linapit a maganakang siak* Mamagdala yang lubid itang siak a dinatang Sapak yang suksuk; alang ninu mang makatalan Saingsing na ning menabu: "Aku, kekang saupan! Kumua ka sanang taling ali na ku sugatan" `Kayi nganang mekibat nitang siak king saingsing "Makantini'ng geua mu karetang tau nandin Buri mong itas balu oneng kelinguan mu pin Ali me apakan ing laman babi king kambing" MAPLAS KING PUKI by Jason Paul Laxamana Perusan na ku rugu ning Apung Ginu Uling ing kabiasnan pekiabutan ku Nanu'ng klasing Dios ing mibait kanaku E ne buring kumatni buntuk ing tau Pelakuan na ku pamo king Paradisu Gewang alipan ning taung asawa ku Maplas na `tie maglual pungul king puki ku Bisa ku mung mabiasa, nanu'ng sala ku? Meyigut ku mu king tagyang ning asawa Minuna mo pang lelang ding leu't usa Sebianang e mamangan karetang bunga Abalu'ing marok at mayap `tie mengan ka Mibait ku mu bang i Adan sumigla Palagyuan ding bage, e ku agawa Penganak mung babai tutung mababa Inya kabiasnan na mu ing kakung nasa Ing Pengari King Anak (In praise to Kahlil Gibran) Itamung pengari sana pin tanggapan ing matning katutwan a makakalingwan na ring anak tamu ali tala anak nune anak nala ning Indung panaun kabaldugan ning bie pagnasang payntunan. Ding kekatang anak na kayabe bale e mangaintuliran tunggen talang bandi nune ibulus la king dayat na ning bie gulis ning palad da e tamu sakmalan anting kasangkapan pagkaymut masimpan. Itamung pengari ibye tamung lubus karing sapni tamu lugud a tibubus e tamu pamintu kekatang kaburyan o panusig kaya ing kapilubluban uling atin lang sariling kaisipan. Ding kekatang anak isalilung lubus lalam tamung bagyus marayu keng signus karelang ambisyun e tamu saklawan uling angga king pekamalyap paninap e tala atagkil karelang kaladwa. coda: Itamung pengari e ta magkamali kekatamung anak ali tala anak nune anak nala ning Indung panaun payntunan, pakrasnan kabaldugan ning bie! Panupayang Lubus Neng Paeng Sa pula sa puti..! Oyan ing labanan caring adwang tatyo, kilub ning sabungan ing anac a tecsas at matwang balulang milapugpugan la king amanung siswan..! Neng yakung balulang tatalyu cung bagya uling ing kalaban marakal ya taya e na panamdaman ing kakung paluka yacung mangasugat king ablas nang bigla..! Nanung ing gawan cu nune mamulayi lisya-lisya namu caring cayang tari balang balabat na king wanan at kayli mangabitawac kung daraya na wari...! Ing macatagan kung ditac pang inawa maglele na cu mu king suluc paynawa king tapang ning tecsas e na cu magcasya e ke man asugat king barug cu't tira..! Isundu ku na mu ing pamagtulauc king amanung siswan king salitang lusuc caring cataya cu nung ating mibulus a catatakiran, panupayang lubus...! Sulapawan Co Ngan Dr. Udis Sanchez Manalansan-Lord 11/18/2007 Dayat malat, Api't, bagyu paglundagan co ngan, Ausan Dacayu neng mitatacutan. Pequibat Yu cacu, Mas maracal la pa queng buac ning buntuc mu, Deng queganaganang pemaglundagan mu, Obat wari ngeni mitatacutan ca? Emu wari balu cayantabe mu Co? Enaca tatacut, Acu ing Ibpa mu, Balu raca lagiu! Anya balu cu Anti mong Agila, Sulapawan co ngan Api, bagyu, canyon, balas, Ampong palang. Ecu la mu lundagan Nung e sulapawan, Uling anti mo Y Inang cung Kapampangan, Agilang matatag a pakpak Sulapawan co ngan Masqui nanu pa man Pamanyara rba Oita pu, migsalita ne ining kecatamung Matwa tabalu nung apansin ye ing laman ning sinabi na, ipakisabi nang mayap nung maliari mu pin sana ing malagung capampangan sucat papanatilyan ya. Acu nayun cu canita, dapot e na buring sabyan king ing diwa na ning watas icucutun me calayan; pablasang ing diwang watas e me maliaring tabunan nung wari sana keng agus mamusbus yang maintun dalan. Yaring iting pisasabyan tungcul ya keng poesia matulid mu ing lisya cu king larangan na ning prosa; inya ipanupaya yu sinulat cung macarima ban ulitan ing aus cung dapat tana pung manyara. Ining canacung amanu e cu ne pu pacacaban at sampulungan cu ne pu ining cacung buring sabian; ining sinabi ning Matwa nung sacaling english ya man pagaralan ye pu sana nung nanu ya cabaldugan. For the next page: http://maxpages.com/poecia/poecia68 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00075 |