Contents:
1. Ing Amanung Kapampangan - Renato B. Alzadon
2. Kasanguni - RBA / RDM
3. Ing Mayap a Capampangan - RBA
4. Bini - RBA
5. Pinggan - Jose Roman R. Laquian
6. Atin Tune Cacaluguran - RBA
7. Anthea - RBA
8. Boot Camp Caya Ine - Udis Manalansan-Lord
9. Ing Indu - anonymous (contributed by Amor de Jesus)
10.Mitanam Cang Mayap - Jose Roman R. Laquian
11.Guinu Co Acalinguan Yu Na Co? Udis Sanchez Manalansan-Lord, Ph.D.
ING AMANUNG KAPAMPANGAN
Neng Renato B. Alzadon
Ing amanung kapampangan, nanuya?ta ?
Diwa yang menibat king Matas a Diwa;
Inyang mabugtu ya king labing makudta
Mika-lindayug ya't mapinung tumaila;
Sakdal ya karilag! Guintu yang salita!
Kawili-wili yang bibigkas ning dila!
Ban gamitan tayang makipag-salita
King Ari ding Ari, king Malam a Ibpa.
Gagamitan tayang taimtim mangadi
Arapan ning Ibpa tapat sasangguni;
Ah! Nung marapat yang ibigkas ning labi
Neng kasabi taya ing Ari ding Ari,
Karapat-dapat yang yagape't ilimpi
Kenu man salita ning nanu mang laji;
Inia yapse tayang alang pamangimi
Ing amanung sisuan a guintu king uri.
Guintu ya king uri, 'nia naman ding watas
Papalkas de ningning bayang e mapintas;
Ala lang patugut maniabing matatas
King poesia't prosa, at karing kalatas;
Yang panaguimpan da ing akit deng mitas
At mitaluktuk ya king siduan nang matas;
Ban ding kapampangan lubus dang abatas
King ing amanu da, amanu yang pantas.
Nuan tamu kabalen! Ding labi ta mismu
Ila ding migmana king guintung amanu;
Inia king kekatang pamipagmananu
Gamitan tala ding salitang maguinu
Ban manatili yang maslag at mapinu
Ibie ta ing lingap a e mamagkanu
E ta ya pabustan siran da terminu
Ding alang masabal a magninu-ninu!
Ing amanu tang mal, lon yu, makapakiak!
Mika panagkas yang terminung masalpak!
Dening pesi-uling miglayas a anak
Apulut do ketang delanan dang pitak!
At pablasa kaseng kuto la pamalak
Pikatang-katang de ing dinat king labak;
Bala ra dangalan king kanuan mitumpak
Maniabing magaspang at masalampitak!
King pamitipun dang miminum, magsaya
Pakiramdaman yong maglabit, mangaya;
E re balung yapse ing laman dang diwa
Nung ala yang samut terminung masagwa.
Ding terminung detang makasulak daya
E la kapampangan ibat king samula!
Ing amanung sisuan eya salaula
E ibat king pitak, ibat ya king ibpa!
Ding terminung masias mengari lang dikut
King palayan tamu kabud nala linsut;
Nung mipabustan lang dagul mangulaput
Ing palayan tamu masira, mapuput;
Inia dapat tamung lague at mamagut
Atsitan tamu ing malalam dang yamut;
Ban paniatang na ning aldo pamamalut
Ing gapasan tamu, pale alang samut.
Kekatang manasik, tutu tang e buri
Ing mamalut tamung pale sari-sari;
Inia manibat king pamanialbag bini
Ding bububud tamu binutil lang pili;
Makanian mu naman karing mal tang sapni
Ding pupunla tamu amanung lang budni
Uling nung nanu ing sisuan da king labi
Ya ing idalit da king pamag-bantiti.
King ban lunto tamung masipag manasik
Ding amanung budni palto tala litik;
Ipalkas tala ding terminung malantik
Antimong sampagang king kanbas linalik;
kapamilatan ning wagas tang tangkilik
Ing seda nang sutla milako ya baltik
Makanian yang lunto leguan at salpitik
Ing mal tang amanung king pusu darantik;
Ing amanu tamu king bayang maniulul
Makisugu tamu, ibie ta ing tungkul
Dening lumang pluma gawan talang sarul
Batang pamaligtad ing gabun nang uliul;
A sumaup tamung manese , mangambul
Bayang maniampagang malagung pamiukul
Layun magparayo king banua nang asul
Ing amanu tamung dapat pagmaragul.
Pagmasabal taya pablasang yang ubud
Batang misampulung king lagyu ning lugud;
King pamiaduangan yang magsilbing birtud
Batamung maniabing malagu't makatud;
Potang apansin da ding kangatbang bakud
Ing amanu tamu malambing ya agud
E la mikakunung mabe't makibuklud
Lalam nang salilung ning pamikalugud.
Luid ya ing amanung inirug tang mutya
Mamutyawi ne ing aldo nang sasala;
At malaguintu na ing tenam tang punla
Magpatawe butil king tanke maramla;
Nung atin man mansa king seda nang sutla
Pamaglambing nemu king sepu ning dila.
At kening binie nang malagung salita,
Pasalamat tamu, king Dios a Bathala.
Kasanguni- le
Makalunus-lunus, makajale-ale
nung ing Kapampangan lubus neng milele
susulat poesia, gagaleng malale
ing karelang yaus mitnung tagulele
kailangan ing tugtug, gambul e miwale
ban ing kapagnasan 'tang malabung a kule
ing amanung sisuan e ya pu mibule
masias yang talakad king maslag nang adle...RDM
Ustan me, capatad, ing canacung basle
lon mu nung marapat ing qng pamibule
nanan que yang banua nung ala yang cule
nung ala yang batuin qng benging matamle;
nanan queng ingatan baug a marangle
nung e cu manaquit a tutubung pale;
inia yang salita quen que paquiarle
nan' que yang amanu nung ala yang gale. rba
Ing Mayap A Capampangan
rba-2007
Ing Mayap a Capampangan, Ninu ya ta?
Ya itang malugud qng Indung Salita...!
Nuya man misanglad babo ning masala
Capampangan ya ing qng punta nang dila...!
Qng mayap a tau, ya nang piaquitan
ing pamicamal na qng pamanang quimtan;
pamana rang Sabi ding matuang ibatan
ya ing caba ning bie e na paingulu
Balang Capampangan dapat ipaquit na
pamipacundangan qng Amanung Mana;
ing e magmasabal bucbucan yang sanga
a pagbitinan ding e mayap a bunga.
Pangacapampangan ning Mayap a Tau
mamale qng pusu, diwa't pangatau;
e na picarine masqui na caninu
ing Capampangan ya ing queyang amanu.
Ding taung macanian marangal la uri
e la balatcayu at mapagcunwari;
itang panamdam da panamdam yang budni
uling ing pusu ra pusu yang bayani.
Ya ing matibe rang catatalacaran
ing ipaglualu ya ing amanung sisuan;
nanu man ing miras qng mabang lacaran,
ali la painggulut, ali la pailacuan.
Nuan ya ing amanung sisican,cacayap
caibat na ning dusang queya linaganap;
iti, pauli ning mayap dang pigagap
ding tapat nang suling maqui pusung mayap.
Inia, marapat mung magbiba tamu ngan
ing mal tang amanu ali ne milangan;
at asabi tamung alang pacundangan
ating pusung mayap caring Capampangan.
Maging mayap ku sa anting pakikwanan
miyabe kareting tune Kapampangan
uling nung miugse yamu at kalingwan
ing salitang mana a amanung sisuan
anti kung bilasang mabangnas a 'yasan
aliwang amanu nung 'paglibe ke man
at gintu ya waring tangsung milibayan
mengari kung liling dikut king kakewan..! RDM
Bini
rba-2007-09
Nung miras ing aldo bisa cang mamili
maguing acabangal pusu nung sacali,
palague cu, Bungsu, e ca magcamali
nung dinan meng pansin yang mayap a puli.
Den namung manasic bina lang pijican
nung nanung sucat dang tanam qng asican;
uling ing bini rang salbag qng pamunlan
ya mu ring tumubung pale rang pupulan.
Yan namung damulag quenu re pabuctut
quen waring calembut a maina at gutut?
ali, pabulug de queng mabilis quimut
masanting a bicas at masican gulyut.
Nung magpalaji cang manuc a panlaban
e me buring tatyo yang lajing talunan;
mecad ing buri mung maglaji na pin man
caretang ganarul, subuc qng tepangan.
Careng magpabini, quen na mung apalya,
insanu tang bunga ing dinan dang tanda...?
Ya nang pilinan da ing pecamacaba,
ing pecamasanting, ing pecamataba.
Pacatandanan me ing queca cu payul
nung nanu ing bini yang quecang apupul
nung bini yang mangga ing quitcut mung butul
mamunga yang mangga, e mamungang santul.
P I N G G A N
Jose Roman R. Laquian 2007-10-03
Itang atchi ampong wali malumeme lang mamangan
malumeme lang mamangan misusulu quetang pinggan
latang pinggan ating ditac lamang nasi ampong asan
asan tuyung cacapurit miabe dang pisusuluan.
Careng japis dang itsura pati yayat dang catawan,
butul-balat lang larawan ning matinding casaquitan,
quetang apag misusulu, malumeme lang mamangan
nanamnaman deng cacanan itang nasi ampong asan.
Sumangid ning casaquitang bunga niting cacaluluan,
ngening bengi misusulu detang adua queng pamangan;
abac ampo gatpan-apun danup pilit dang tidturan
ban a-labas de ing caplas ampo calam na ning atyan.
Ngening bengi maca-timan lang misusulu queng pamangan,
ngening bengi milamnan la reng atyan dang alang laman;
itang carelang asimpang ditac a nasi at asan
majulagang pamangan yang cacanan da't nanamnaman.
Ing inda da tajimic yang itang malan pipipian na
queng luwal na nitang cubu, matiyaga yang magobra;
matiyaga yang mamipi lalam aslag na ning bulan,
cailangan nang mangabyayan ning masaquit nang catawan.
Ining mebalung mamipi, quening yayat nang catawan,
bengi't aldo quetang pipian mat'yaga yang mangabyayan
ban queng panaquitang ditac macasali lang pamangan
itang ditac a pamangang miabe dang pisuluan.
Ining inda ampong anac: ing mapait a larawan
dareng anac mung misaldac, misubsub qng cacaluluan;
Masdan mu la, Indung Tibuan, O Balen cung Capampangan,
Masdan mu lang mamalipit, mitmung dusa't casaquitan.
Anggang cap'lan la mibabatang libung danup at quealan?
anggang cap'lan de lacaran ing dalan ning calungcutan?
deng anac mung e megaral, memulat qng camangmangan
pauli ning cacaluluan: e abilang, Indung Tibuan.
Deng anac mung mepalungi, memisali caring laman,
deng anac mung memaglaco, memanintun pangabyayan,
mig-sacrificiung merayu qng familiang pacamalan
pauli ning cacaluluan: e abilang, Indung Tibuan.
Anggang cap'lan mu pagu-masdan ing masaclap a larawan
dareng anac mung daranas libung dusa't casaquitan?
anggang cap'lan ya sumaclub itang ulap ning quealan,
libung gaga at jinagpis ala natang capupusan?
Cabang queng pusu mag-jari ing imbut at casaquiman,
cabang guinu de ing cualta deng matacong manungculan,
cabang e ca tatalacad wacasan me ing carocan,
Indung Tibuan, manatili ing masaclap a larawan...
Panaun na, panaun na, O Balen cung Capampangan !
Dinatang ne, dinatang ne: Oras Mung Manalacaran !
Mibangun Ca't Durugan Me Ing Baluarti Ning Carocan,
Deng Anac Mu, Iligtas Mo Queng Pinggan Ning Cacaluluan !
Atin Tune Cacaluguran
rba-2007-10/05
Caring caluguran, atin namang tune
ila ding laus lub a quecang carame;
nanu man ing miras, tula man o lumbe
e ra ca gulutan, tapat lang cayabe.
Tune caluguran ila pin ding subuc
a cayantabe mu qng pamaquipamuc;
nung nanu man itang datang a pagsubuc
e na ca pabustan qng dusa milugmuc.
Nung tune cayabe ing panintunan mu
e na ca darayu atiu qng siping mu,
ali me acaquit uling ding mata mu
yang panintunan da ing aliwang tau.
Qng wari mu, Bungsu, yang cacaluguran
aliwa yang taung e mu nanu balang;
ding quecang cadaya o abe tucnangan
itang balamu mo e la macabilang.
E ra ca asisian, acu man canita
aliwa lang tau ding cacung barcada;
dapot e que iquit metung man careta
ing buri cung tune caluguran sana.
Iniang ati na cu quetang ustung edad
canita cu pamu lubus atimalad
tune caluguran capamangan palad
ila pala mismu ding cacung capatad.
Ing pamangailangan iniang miras cacu,
ninung caluguran a sinaup cacu...?
Ninu pa nung e ding capatad cu mismu
a e cu tutungguen cacaluguran cu.
Inia sa O' Bungsu, payul cu damdam ca
e ca darayu lub qng malapit queca;
tune caluguran ala nang muna pa
qng quecang casiguing cadangatan mata.
O' icamo Ibpa, mecad acutang mu
ninu ta ing tune cacaluguran mu;
panualan mu, Bungsu, subali quecayu,
ala nang aliwa nune ing Indu mu.
Anthea
neng Robet Herrick
Linicas neng rba qng amanu ning romansa
Aduan mu cacu, Anthea, mica atin cu sanang bie
aquit mu qng mica bie cu ban pagsilbian dacang tune;
o caya aduan me cacu ing pamalsintang dalise
ining pusu cung malsinta matula queng queca ibie.
Pusu yang quipnuan qng lambis, pusu yang quipnuan alala,
pusu yang mapaparayo qng calayan at ligaya;
pusu yang qng yatung iti ali mu na atagpuan pa
at ing pusung yan yang ngeni matula cung babie queca.
Aduan mung e sa darayu qng siping mu ing pusung yan
aquit mu qng e dumayu, ing nasa mu mipamintuan;
dapot aduan mung maco yang mapda qng quecang arapan
dumayu yang alang jimic qng banacang panusigan.
Aduan mu qng manangis cu, atangalan mu cung quiquiac
at caring matang malino manibat ing luang mipatac;
ngeni nung ding cacung mata bulag na la at mepisac
damdam capa mu ring tangis, ing pusu cu ya nang cumiac.
Aduan mu qng magdusa cu at aquit mu cung magdusa
aquit mu cung sacdal lungcut quetang pun na ning Jiguera;
aduan mu cacung mate cu at yanang maliari ita
maniaman cacu ing mate nung mate cu para queca.
Ica ya ing cacung sinta, cacung pusu, at cacung bie
ica mu rin ing aslag na ning canacung panlalawe
queca cu maquipanusig qng macananu mang adle
nung inia sa't qng ulimu bisa cung mie at paimate.
Boot Camp Caya Ine?
by Udis Sanchez Manalansan-Lord, Ph.D.
10/13/07
Masqui nanu ing talnan cu
Mangabalbal queng gamat cu,
Manalamsic ing malutung daya
Careng taliri cu.
Sinucub que'ing lupa cu queng tabla ning cocina cu,
Mapali itang luang minagus que lupa cu.
Nucarin ca Dios obat dugu licuan mucu?
Inang, Tatang at icong anggang cacung Nunu,
Cayabe nanaco ning Dios ausan ye para cacu!
Acuayng anac nang mengawang maracal a cayapan,
Menyaup cung maracal careng anac nang calulu!
Obat ngeni bigla biglang
Medalumdum ing yatu cu?
Dios co! Dios co! Nanung sala ing agawa cu?
Bang antining caparusan ing tacman cu quening bie cu?
Ngening biglang bigla atandanan ing bie cu
Quetang anac cu San Pablo
Casaquitan a delanan iyang minie tatag cacu.
Canita tinggap que ing paquibat na ning Guinu
Dadalas nacu namang casaquitan uling patatagan nacu
Tinggap que ing pequibat na nabengi apaninap cu,
Melili cu queng madalalum a caquewan at talagang tatacut cu
Ecu balu nung sumulung ecu balu ning magbwerta.
Aba , cabirabira macasaque cu quing coche
Maracal a taung memaliguid queng siping cu.
Itang magmanehu anac a lalaquing diez y seiz anos
Megulat cu uling ecu apanwalan
ining magmanehu babalicdan nacu,
Lalon nacu, at babanten bang milaco ing tacut cu.
Jesucristu caya itang magmanehung sinaup caco?
Dimput nacu queng caquewan uling balung tatacut co?
Pabalu na caya cacu dacal dumame que siping co?
Pabalu na caya ning Dios a e ginulut canaco?
Siguru padaralan nanacu namang casaquitan
Antimo quetang anac cu pa
uling patatagan nacu ning Dios
Queng mission a buring ipagawa.
Bang agampan que itang mission cailangan danasan cu
Casaquitan, capaitan, mangabalbal lang pinggan cu,
Mangaraya lang gamat cu, magus ing anggang lua cu.
Uling oining “boot camp†a mibie tetagan cacu.
ING INDU
by anonymous
(sent in by Amor de Jesus)
"NANU YA ING INDU? METUNG YANG SAMPAGA
A PINTI NA NING DYOS KING HARDI'NING GLORIA
KING DALISE LUGUD AT TAPAT A SINTA
YA ING GINTUNG KALIS A PILULANA'NA;
BINYE NE KING YATU BAN MAGING ANGHEL YA
KING SIPING DANG DUYAN DING MUTYA NANG BUNGA
BEIT NE I'ELIAS MIGLIGTAS BALIA'NA
AT Y DR. RIZAL INAUS NENG SISA."
"DING KEWALAN INDU KALULU NA LANG DA,
ING ALDO KARELA MEPITNA NE SALA,
ING LUGUD NANG BILDUG KARELANG BATHALA
MENGARI KING TALANG MIPAMPAN KING BIGA;
ATIN MAN SANG BALEN A KEKA MEMINGWA,
ALANG MAKAWANGIS KING APIS NA'T UMA,
KAUL NA'.T PASUNUD NING METUNG A INDA."
"ING METUNG A INDU KASAKIT NANG LUBUS,
KILUB SYAM A BULAN DALA NA KANG KRUS;
NUNG PILAN LA BILANG DING SUPLING NANG IRUG
DING KEANG KALBARYO MAKANYAN LA KABUD!...
NANAN ME ING TIBWAN, NANAN ME I'BENUS.
NUNG MAGKALUNGAN KANG KING LAMPIN BINALUT?
NUNG NGAMU TAWLI YA, SAWPA'NA KA NING DYOS!'
"NUNG ALANG PENGARING MIYUYU KING DUYAN
E MU MAN ABALUNG ATIN KANG BALAYAN;
MALYARING MISAKWIL ING LUGUD KING TIBWAN
DAPOT ING KANG INDU ALI KAPILAN MAN.
ING LUGUD A KERAGUL KING MAL NANG KANDUNGAN
LUGUD KING SARILI ULING ING INDUNG NUAN
LAMA'NA KA'T DAYA NING DAYA NA'T LAMAN."
Mitanam cang mayap
Jose Roman R. Laquian 2007-10-14
Mitanam cang mayap :
Ing guintung pangarap
Queng Balen mung lingap
Matupad yang ganap !
Mitanam cang mayap : nung nanu ing tenam
yamu ring pupulan ; tanam cang malalam,
malalam cang tanam mitmu qng cayapan,
datang ing panaun iya mung pupulan.
Deng quegana-ganang gawa niting laman
ilang iwasan mu't emu pigagawan:
ing pamangalunya ampo cajalayan,
pamanaco't lugud qng cualtang diosdiosan,
Pati pamaglasing, capanagjilian,
pamipate-pateng alang catuturan,
layo ning catawan ampo obrang culam,
pamicampi-campi at muang mitatanam...
Dening macajayag a obra ning laman,
dening 'bat queng diablu niting sanlibutan,
deni't aliwa pang tanda ning carocan
ilang iwasan mu't emu pigagawan.
Ing guintung pangarap queng Indu mung Tibuan :
manawang cabyayan careng Cabalenan
maguing catutuan ya nung quecang ganapan
obrang maqui-lugud qng capilubluban.
Tandanan mu sana : dalan-sanlibutan
a quecang delanan, emu na dalanan
inia mitanam cang bini ning cayapan,
enaca mibalic qng delanang dalan.
Ing guintung pangarap lunto yang catutuan
queng balang tenam mung bining maqui-laman :
laman na ning lugud, tula't capayapan,
caba ning pasencia't tune catapatan,
Pati pamipigil ampo caamuan,
jinaun at baba ning capilubluban,
pamagmalasaquit queng Indung Ibatan,
queng guintung pangarap, mamie-catuparan !
Queng Balen mung lingap, mica-capayapan,
mica-cababan lub at cajinajunan,
mica-pamanyagip caretang quealan
pauli ning tanam mung bining cayapan.
Milaco ing anggang capanagjilian,
ing capalaluan ampo cayanginan,
ing obrang balacyut ampo cabuctutan
milaco causbung ning bining cayapan.
Balu mung nanu mang apundar mung yaman
caras ning panaun, ila mu ring lacuan :
lubas cang mibait quening sanlibutan,
lubas cang mibalic qng quecang pibatan.
Ing Balen mung Tibuan, aquit meng aslagan
ning aldong magdalang bayung cabucasan;
milaco ing lungcut, mitmung casaganan
ing bunga ning tenam mung bining cayapan.
Matupad yang ganap ing quecang asajan
a numawa ya ining Indu mung Ibatan,
mica-pamaniaup at malasaquitan
pauli ning tenam mung bining cayapan.
Tanam na cang tanam queng Indung Ibatan,
tanam ca mung bining mayap ya ing laman,
datang ing panaung ing quecang pupulan
tula at dalanang mitmung casaganan.
Aquit mu, Capatad, queng pamananaman
mung bining cayapan, ing quecang pupulan
pamiabe-abe at malasaquitan,
milaco queng pusu : imbut,casaquiman...
Milaco lang ganap: lungcut,cacaluluan,
datang ing panaung mitmung casaganan
uli ning mitanam a bining cayapan
queng quecang bacuran, Balen Capampangan !
Ing guintung pangarap
Matupad yang ganap
Queng Balen mung lingap
Qng tenam mung mayap !...
Panintunan Daca
Udis Sanchez Manalansan-Lord, Ph.D.
10/25/07
Panintunan daca babo bulan,
Panintunan daca lalam na ning yatu,
Pero eraca aquit masque
Nang gawan cu!
Nucarin ca? Nanu cang panintunan cu?
Nanu ing lagiu mu? Balu mu cu lagio?
Paintunan daca pero eraca man balu,
Dapot ing balu cu
Guinu Co Acalinguan Yu Na Co?
© Udis Sanchez Manalansan-Lord, Ph.D.
10/26/2007
Guinu Co Acalinguan Yu Na Co?
Madalumdum, caquewan melili cu.
Ecu balu
Nung murung o sumulung,
Ataquiran mataram a batu.
Dubul dubul
Daya ning canuan cu
Minagus careng
malutung mata cu.
Babagyu, marimla
Paid paid cu
Mangalawat caring sucsuc
Mangalgal quelamnan cu
Managulele, mepayo
Maclac yatu!!!
Guinu co!
Obat quelinguan Yu cu?
Udes, lawen mu cu.
Macabitin!
Bitis, gamat
macapacu
Tagyang sicsacan
Pete racu
Mabayat curus pisanan cu
Caibat banua silapo cu.
Eca tatacut.
Lugud cu
Cambilan naca.
Taimic ca.
Acu ing Guinung mangacu
Caibat na ning bagyu
Masalang aldo, maputing ulap
Angin matimyas
curonaan pagtumayla raca.
E ware Acu
Ing sinaguip queca
Quetang caburacan na ning
Marangle San Pablo
Bang adala raca
Queni America ?
Udes, eraca quelinguan.
Pagapangan daca
Palacasan cong camau
Ampong intud mu.
Patacman daca queng
Yumu ning lugud deng taung
Sumaup mamusan
Curus mu.
For the next page, go to
http://maxpages.com/poecia/poecia66
For the very first page, go to:
http://maxpages.com/poecia |