 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY PAGE 64 |
 |
| anthologized by ERNIE C. TURLA |
| ||||||
TABLE OF CONTENTS: Ing Amanu Ning Romansa 1. - Renato B. Alzadon 2. - Art Tolentino 3. - Rafael D. Maniago 4. - Jose Roman R. Laquian 5. - Mar Franco 6. - Ernie C. Turla 7. - Carolina Sicat Guanzon Ipiac Mo Deng Quecang Mata 1. - RBA 2. - Bicero 3. - Artdax 1. Ing Bagyung Jiganti - Carolina Sicat Guanzon 2. Alilan Cu Ne Ing Laru (complete version) - Jose Roman R. Laquian 3. Motorsiklo - Paing 4. P A C U - Jose Roman R. Laquian 5. Verses Between Precy and Rey 6. E Ranaca Paninintunan Man - Artdax ************************************************** ING AMANU NING ROMANSA Renato B. Alzadon 2007-09 Nung tutu man mong ing English yang lenguaji na ning ciensia at ya naman magagamit qng parang ning tecnologuia, dapot nung pangaras naman qng parang ning pamalsinta ing amanung capampangan yang lenguaji ning Romansa; pablasang ing amanung yan picabaluan yang talaga pecamaniaman yang diling gamitan queng pamandiga. Nanan cu ta nung tutumang ing salita ra ding Griego ya mo canu ing salitang gamit da ding Pilosopo; dapot nung pangaras naman qng parang ning pamaglolo ing amanung capampangan ya ing amanung macalto; pablasang ing capampangan patutuan ding carinioso yang amanung macabijag caring Diosa ning Olimpo. E na bala nung sabian dang ing Latin yang picabaluan a salitang linisu ra ding manaral queng pisamban; dapot, potang miras naman qng laguiu ning capalsintan ala nang maliaring miguit qng salitang capampangan; uling ing amanung iti yang salita ding majalan ding pantas a nung lugud la, angga man qng camatayan. ING AMANU NING ROMANSA Art Tolentino Atin pin canung amanung, malumeme qng balugbug a balamu musica yang gagamitan qng pagirug bala me mong daramdaman ing laguslus na ning ilug amanu yang sacdal yumu, e mitauli e ya labug potang mag tapat ne ing salu ning metung a cacarug Kapampangan ing gamitan, bitasang e ca mabaldug Nung ing mong sanang megamit, ing Amanu ning Romansa Quetang Romeo and Juliet, itang Shakespeare a nobela Mas mesala la sana deng batwin queng matas a banua Lacuas la sanang mebanglu deng sampaga quing Verona Linual sanang mas matinidi ing pait ampon ligaya Nyang memun ya y Julieta cang Romeong pecamal na Agyang dacal a sasabing, manyaman pakiramdaman Ing Italiano o Frances , queng pamandiga manyaman E ne man rugu mitauli ing canacung Kapampangan Irug pangacu co queca, deng batwin ampon ing bulan Ing guintu na ning pinanari, ing cabayung bagyusan pangacu que ing lugud cu, angga na queng alang anggan ING AMANU NING ROMANSA Rafael D. Maniago Ing malsintang Kapampangan nung ya sa'ng pakabitasan; mapili yang mangamanu, mapinu yang maniambitan. bakal ya man ing pusu na ning babaing keang suyuan, malaso yang anting sutla karing amanu nang sisuan ding makapadurut kea, a abut ning panimanman i aple no king arap na, pasiwalang kapalsintan. .! Kapampangan, Kapampangan, o ding kekang mangabiasa, mikarakal nong beyit mu king lagyu ning pamalsinta; mamuntukan keting bansa, ing inawa pakataya king marangle ning labanan, ning balen king pamagdusa karing katandanan tamu, mibalut na king kaladwa at e no kapilan pa man, makalingwan king istorya..! Ing sinta ta king amanu ing lugud tang e patawak a-babie tamung lubusan, silbaganan tang bulaklak; bustan tamu king bayat da karing tanke mangalapak, detang mau king amanu, itang tugtug at manaplak ban ding manayang sumalud king mikarakal a patak mag-luid ya ing kapalsintan, karing amanung mengasalak.. ! ING AMANU NING ROMANSA Jose Roman R. Laquian Ing canacung capagnasan : ing amanung quebaitan mibabo ya, mitampuc yang Salita ning Cabiasnan; ulina ning dening pantas, maqui balung asmu lalam, tune la ping Capampangan: pusu, isip at panamdam; Indung lugud de ing Baleng Pugad na ning Quebaluan, inia ela cagisangan mamoesiang capalsintan ! Quing madauag a gubatan o lauac ning caparangan, pagnasan cung aquit dacang mamayagpag, mamuntucan caring sablang magagamit salita ning sanlibutan uling icang peca-puru, Amanu ming Capampangan: mitmu catas a maniaman, macabijag panamdaman, a sasagad quing calamnan at pilatan ning butulan ! Ining yatu: e macule, eya ustu't magculangan, nung ala ya queng lugal na ining Baleng Capampangan; inia mu pin atin yang bie, tula, sigla at sicanan uli na pin magagamit ya ining Amanu tang Sisuan; Inia acung Capampangan, pagmaragul cu't patutuan: salita cung gagamitan ing Amanung Capampangan ! ING AMANU NING ROMANSA Mar M. Franco Ing amanung capampangan qng dila cu e ne mate Uling yang canacung sisuan bingut cu pang alang male Amanu yang sacdal lamyus, qng lub mamaplus malale Ding amanung ginamit qng escuelang cacu mipande Pangaras qng capalsintan deti cacu lang ilele Qng mal cung amanung sisuan carin cu bucud iyapse Nanan que mo ing Tagalug qng pamanapse panirug Nanan que mo sa ing Inglis qng digang maqui-abe carug Malino cung macapasiag ayapse cung alang cabug Ing capalsintan dalise a macasale quening lub Pablasang ing capampangan amanu yang mabilug Qng sablang bage qng yatu ating catayang macatud ING AMANU NING ROMANSA by Ernie C. Turla Ing pusu na ning princesang didigan na ning principi Mangalingapngap ya iti queng bagul ning mal a puri Miliari na naman iti queng pusu na nitang nimpa Ning Makiling iniang quetang gatdula na qng Laguna Pigloluan ne ning higanting Sinukuan na ning Alaya At icua neng agad-agad queng salitang ma-romansa E ing iti salita que sasabian cu mu ing tutu Peca-malambis yang dili at mayumu careng pusu Maliap ya man ing daracpan queng marangle na ning sinta Musig ya ring maquiramdam at layun 'bie ing gamat na Uling me-encantu ya 'iti gumato ya pasaldangan Pasari na ning lenguahing amanuan tang Capampangan Ania, ana gamitan ya, e taya paburen matda Bancanita ing romansa queting yatu e mawala Anti'ing singsing daring nunu dareng taung taga-pampang A casulucuyan ta rugung alang patugut paintunan Nung ayasual taya iti queng nung nu ya mitambunan Lacuas yang maging salita ning romansa'ing Capampangan! ING AMANU NING ROMANSA by Carolina Sicat Guanzon Ing amanung Capampangan malambing yang daramdaman Casing tarling ne ning Inglis, Ruso, Apon, o Aleman Dapot careng Capampangan malalam ya cabaldugan Macabusal qng amanu pusu, isip, panimanman. Qng parulang ning pamipalsintan at pamiatbanan Ing amanung Capampangan matalas ya’t matenacan. Dapot ing paniwala cu nung SINTA ing pisasabian Palague cu misterio ya, ing amanu e cailangan Lawen tala deng mebijag o mesilung pipi’t maclac Nanung lambis ayampang da, nanung canta, nanung poesia? Nung mesupil ya ing dila ing panamdam mebucnul ya Ing amanung Capampangan angin ya mu qng lupa ra. SINTA careng Capampangan, Capampangan ing gamitan, Careng Inglis o Aleman, Inglis o Aleman ing cailangan, Careng Ruso o deng Apon, Ruso’t Apon ing sicanan, Queng capalsintan amanung sisuan ing pecamaniaman. O reng pipi o reng maclac calulu la capalaran? Aaa..., macayaliwa ing amanung sisuang tutuntunan: Lawe marayuput, Sulyap a malagquit Timang malumeme Ailing sidsad tipid. Sinial ning catawan Matalic pagmasdan Quimut a magaspang Lasun pangilagan. Ipiac Mo Ding Quecang Mata rba-2007-09 Nung sacali pagnasan meng buring aquit ing napun ta paingulutan me saguli ining yatung e quecata; busal ning catajimican, ipiac mo ding quecang mata ati cu queni, irug cu, qng labuad ning malic-mata. Mequeni cacu, mequeni, mutyang canacung liguran tipa cang magpatagusgus caniang sinag na ning bulan puntan mu cu quening jardin nung nu ra ca panenayan ban queta magmain cata qng cajarian ning taguimpan... .. Ngeni acaquit danaca, O' calagu mo irug cu balangquinitan catawan---- edad pa mung labing walu; wa, macanian ca pin edad----macanian ya rin ing cacu--- iniang apalsintan dacang alang imbut pamaglilu. Calagu ning quecang lupa...! Ah, yang batal mung lelican--- qng panga-aptas ning buac mu--- mapinu yang pamilugan; at ding matatag mung salu alus maibug deng lasacan ing tela-sutla rang tabing a maimpis mung imalan. suglung ning Biseru: Ah, deng puad mung mangacaba tutu lang pangangayamnan qng ugis dang pamilugan macabacat qng imalan e co patdan paglalawe buri cong pacabitasan ing ligayang manenaya qng carelang cabubuslan Aniang migulut ca cacu, e abatang pagumasdan ing malale nang quembut ning mabilug mung papaluan maibug cung e apibata manigalgal cu catawan ing leguan qng arapan cu buri cu neng angcaminan Sinaquildap ding gamat cu ati na la awacan mu caring pingul mung balugbug bubulung la ring labi cu dapot “capamu ca” ngamo “saguli mu mandilu cu, ba na cang mipanusigan queang bague pagnasan mu” Imbut cu nang ining sinta mamiragli neng maglubas e na nacu man binigu qng banyu e ya miglambat malagua cu neng penuma itang catawan nang lubas anting ayup a danupan a e mengan qng cabucas Caibat ning sintang pisulung anting alang capupusan timan timan cung malati quening cacung panimanman ah,.. caniaman ning malsinta… neng siping me ing palsintan quetang napun a milabas… qng sibul ning cayanacan! Suglung nang ArtDax IPIAK MO DING QUECANG MATA Ah… anac ca at anac cu, quening jarding paraisu Casing sican lang duldul deng tibuk ding quecatang pusu Melabug ing panimanman queng palsinta tang macalyu Licuan te’ng casalucuyan ban maglakbe universu Mekeni na irug cung capilas ning cacung caladua A pipagbuklod ning Ginu anya pang mibait cata Dapot buri na ning dimonyong ipagkait quecata Itang ligaya na ning biye’ng peka dakilang palsinta ipiak mo reng mata mung calupa cu magpiak cu naman lacuan ta pa mu sauguli, ing bie at pigaganacan Irug, nung makaquera cang pilit mung pangulilian ing quecatang milabas a mapusok a cayanacan, gamitan mu ngan ing sabla, isip, gamat at taliri Isipan mung uman cu la deng maglagablab mung labi Ing pisngi mu at batal ing pangisnawa cung mapali ipalub que ing lugud cu qng quecang pusung mamapi Paingulutan me sauguli ing mal a casiping mu A anti murin mekaragdag banglu’t cule qng bie mu Acu macanyan mu naman, ipiak cu la reng mata cu Paingulutan que sauguli, ing reyna na ning bale cu Ica’ng mumuna cung sinta, ica pa murin ing tauli Panaguimpan cu ing bucas, dadalan cu mu qng ngeni Nung e man queti quing yatu, nung e man queng bie a ini Acayabe da ca murin, quetang bie a alang anti Ing Balita Nang Atching Liling: ING BAGYUNG JIGANTI by Carolina Sicat Guanzon Migising ca, Capampangan! Migising ca, Capampangan! Oyan na ing bagyo magdala yang duldul, quildap, uran. Imulat mo reng mata mu, iyatyat mo’ng tacde’t bitis, Gisingan me ing isip mu, “Ticdo!”, miblas cang mabilis. Ibalut me’ng Indung Sisuan, itapal me qng catawan, Indung Sisuang pacamalan, tune manang Capampangan. Lalagusgus na ing uran, manuldul na’t mangildap pa. “Lumacad ca! Mulai ca!”, pagnasan mung miligtas ca. Ining bagyung mamirapal, manaliswas, asna sican, Jiganti yang misnang danup, pangatau ing pamangan. Tatali no’t babarugan deng araracap nang asan, Lalabugan no isipan qng macawiling paralan. Urang macayatu, maglasac, macapagmulalang tutu, Quildap macasilo, macabulag, mitmung baung tansu, Duldul waring tambul, macalugcug, macabangal pusu, Jiganti yang magcuculam, anging mapagbalatcayu. Sasarulan no reng balen, caisipang pupud matbud, Mumugmugan reng malasing, biling biling at matudtud. Capiadian: Migising ca Capampangan, iligtas me’ng Indung Sisuan. E me rugu paimburisan Indung Tibuan capilan man. ALILAN CU NE ING LARU ( OIL CHANGE ) ( Ing Completung Poesia ning Mecanicung Cochi ) Jose Roman R. Laquian 2007-09-15 Alilan cu ne ing laru queng cochi mu, capatad cu; alilan cu ne ing laru, malagua mu, malagua mu. Tacap babo niting laru ning maquina ibuclat cu ban ing angin maquialu, 'subung patipan ne ing laru. Ing sinturun para tiempu, larung transmisyun at prenu queng cochi mung cule abu inspecsiunan cu lang ustu Pati na ing angin filtru abalu mu nung baiuan cu, ban salese at ma-pinu ing pulayi ning kotsi mu. Tacap datucanan laru lalam cochi, tanggalan cu; alilan cu ne ing laru, malagua mu, malagua mu. Tacap datucanan laru lalam tinggal cu ne rugu ban sagana yang tumulu qng panialuc ining laru. Lauen que numeru filtru ining laru ning saquen mu ban micabit, capatad cu, miyaliling ustung filtru. Tacap datucanan laru lalam quebit cu ne rugu pati ining ustung filtru miyalili queng cochi mu. Alilan cu ne ing laru queng cochi mu, capatad cu, ban caniting sasaquen mu ma-suelu cang magmaneju. Ustung angin icana cu careng gulung ning cochi mu ban salese, capatad cu, pulayi niting saquen mu. Alilan cu ne ing laru queng cochi mu, capatad cu, ban apasyal mong madayu deng familiang malugud mu. Ayalili cu ne laru ing cochi mung cule abu; familia mu macusuelu qng marayu apasyal mu. Sadia-sadia, capatad cu, qng oras mung magmaneju cacarug ca rugu salu queng cochi mung luma laru. Sadia-sadia bubusuc ya, magcasaquit mangisnaua uling luma ne ing laru na capapatdan yang maquina. Memanaung milayi yang pupugac qng pangisnaua memitamit casing-ap na tiniric ya dalan matua. Ing cochi mu sadia-sadia magcasaquit yang milarga; ngening mibayu ing laru na mulayi yang macayama. Ining cochi, capatad cu, patungcul ya qng Amanu a cailangang sesen tamu ban mulayi yang mapinu. Balang metung quecatamu meyaus mag-mecanicu, micana tang bayung laru queng Amanung maniyad suyu. Larung pamagmalasaquit ampo lingap a mabinit qng lugud tamu ipaquit queng Amanung sacdal-riquit. Ngeni na pin ing panaun bayung larung maca-sulung ibie tamu queng Amanung cailangan ning bayung siglu. Capampangan tang Amanung maniyad-sagip, capatad cu, e taya paburen rugung mamitamit mag-jingalu. Ing Amanu tamung Sisuan: ing Amanung Capampangan saup-saup tayang dinan bayung larung masicanan. Larung mitmu capalsintan at daquilang capagnasan iyang lunas at pag-asa qng pupugac nang inaua. Larung pamagmalasaquit ampo lingap a mabinit qng lugud tamu ipaquit queng Amanung sacdal-riquit. Dinan tayang bayung larung pacasican ing Amanu; caring sal'ta niting yatu iyang lunto peca-puru. Dinan tayang larung bayu ing Capampangang Amanu; queng pamaglingap tamung ustu mamayagpag ya qng yatu ! MORORSIKLO neng Paing Kailagan kung makisake king mesabing motorsiklo at nung ali malakwan ku ketang kabilis na sigpo lalu ngeni papali ya ing makina na at laru timpladu ing kalugkug na, king bilis na kasalusu ..! Ing matikdi tang maestru manibela yang tatalan Ing poeta Mang Renato, king prenu at kambiu naman I Art murin, Jose at Mar ilang spark-plag at dugang Mekad yaku ing tambutsu keta nakung kabulditan.. ! Ding torniliu ampo retang miyayaliwa pang piesa kabu-uang motorsiklo, lapitpit ing pulayi na aku wari detang miembru itamu ngan manigobra pamitatambayan tamu, kumulio ta king ligaya..! Ninu la mo reng salabat nung bisa lang malaparis sagkan deng kekatang saken, king bulusuk tamu't bilis balang mangapakli butul, at saka mangalapiris mamanatras manajimik, mulayi lang pupulandit. Ing puntu ning kakung tema, ding amanung mesaglawe ing ugnayan tang ANASI, motorsiklung keang aske inistart ne pung Mang Ernie, anti ku mung makisake nung bisa kong mangkas tangan, tara na pu at maglakbe..! P A C U ( Poesia ning PecaDaquilang Lugud ) Jose Roman R. Laquian 2007-09-18 Metusuc cu qng aspili asmu saquit ! aruy cu pu ! metusuc cu qng pardibli asmu saquit , oining tutu ! Queng carayum , metusuc cu pamanaji carsuncillu asmu saquit ! aruy Apu asmu saquit , e bibiru ! Pacung gaua qng aseru metusuc cung todu-todu casaquit na , o Ima cu ! quening saquit cu meliliu ! Dening bague mangalati macatusuc lang masidji ; ing tusuc da macarindi , maca-saquit lang matindi ! Dening pacung de numeru : uno , dos , tres ampo cuatru nung mitusuc lang matodu macalaco lang animu ! Ini pin pacung de cuatru pacung gaua qng aseru nung tagus ya queng gamat cu milaco cu male tau . Ining pacu a de cuatru pacung yari qng aseru nung tagus ya qng gamat cu aruy , sayucut cung todu ! Pacu , pacu a memacu careng gamat na ning Guinu pacung meguing instrumentung matubus : sala ning yatu. Pacung meguing cabaldugan ning dusa at casaquitan nang Cristu tang Caluguran ban mie tamung alang anggan. Pacung ginamit Mu Guinu queng Quecang pami-casundu caring mica-salang tau : pigcalub Me ing corderu. Pacung de cuatrung tinagus careng gamat mu , O Guinu , miyabe lang pamanubus careng sala na ning yatu. Pacung memie Quecang saquit , apdi't dayang memulandit queng mebugbug Mung catauang mitmu't sucdul- capalsintan . Queng lugud Mung abut-banua caring tau , mesugat ca at deng gamat mung mipacu migpatune quening tutu . Pacu , pacu , meguing dalan ban ing dayang men-agasan 'bat Queca , Jesus , miglarauan queng Lugud Mung Alang Anggan ! alzadon@verizon. net wrote: Capas , Tarlac Camp O'Donnell Dining Hall March 5, 1978 Dear Bro. Rey E nacu sa bisang dalit mamicudta caring letra uling ini nang dila cu umid ne caretang lira, dapot king uli mu, coya, bustan mung comustan daca canining amanung sisuan a quecatamung amana. Mecad mipamulala ca nung baquet quening sulat cu ing amanu tamung sisuan yang apiling agulis cu, uling iti nang amanu yana ing peca mayumu caring anggang salita nang magagamit queting yatu. Inya sana capatad cu e mu sana cacalinguan iting amanu tang sisuan a quecatang aguisingan, neng casabi mo deng kano caniang labuad na ning dolyar ganacan mung queti Capas 'ting amanung capampangan. Yanamu Precy April 20, 1978 8223 Greenhouse Lane Kingsville,Md 21080 U.S.A Precy Muna, ining panalala ya ing queca yayabut cu cambe na ning pasalamat quening sulat mu canacu, cabud iti abasa que, ing tula cu e mu nanu, abatas cu ing lugud mu qng sisuan tamung amanu. Caring dalaga ning ngeni malagad la't pambijira ding anti quecang malugud qng sisuan tamung salita; inia naman macanian cung panalangin cang Bathala bilang galal ning lugud mu minuan ca sa at mipala. Yang asajan mu, capatad, qng aguiang milaut cu man marayung acalinguan que ing salitang aguisingan; uling aguiang mibusal cu qng banyagang cacarinan capampanan la pa mu rin ding canacung cawatasan. Yanamu Bro.Rey Ali Danaca Paninintunan Man Neng ArtDax Edited by RBA Paninintunan que---- ing mapaling aldo cabuclat ning abac-- ing gulis a pilak qng bigang masaspak-- ing banglu at samyu ding maldang bulaklak-- Ing lua na ning banuang qng bubong papatak- Ica, ali danaca paninintunan man--- ----- Paninintunan que---- ing ambun qng dicut ning berding marangle-- ing agus ning danum quetang lalam tete-- ing magcule gintung manyampagang pale-- ing bunduk susucdul qng banuang makule-- Ica, ali danaca paninintunan man--- Paninintunan que---- ing gatpanapun a babie ligaya-- Ing masayang canta ding pipit at maya-- ing mapinung balas ning prescung aplaya-- ing manene pasyuk ning anging alaya- Ica, ali danaca paninintunan man--- E na cailangan pa--- ing ica ing cacung paninintunan- -- cabang atin banua qng calaganapan- -- cabang atin labuad qng cayactanganan- --, uling para cacu, ica, ica ngan yan--- ing sabla canacu, ica ngan, ica ngan--- ************ ***** Talabaldugan Panintunan-- -looking for; searching for Paninintunan- --missing you; longing to see you For the next page, go to" http://maxpages.com/poecia/poecia65 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00069 |