Table of Contents:
1. Isulung Yu - Jose Roman Laquian
2. Qng Sugal Ning Pusu - RBA
3. Atin E Tune Cacaluguran - RBA
4. Lwid Ka Mar - RDM
5. Bandi Raca Keng Kakung Paninap - Renato B. Alzadon
6. Rimang "li" at "id" - RBA & RDM
7. Maquina Anti Ya - Willie Dizon
8. Tanam Tamu - RBA
9. Kasangguni (lus & lang) - RBA & RDM
10.Uling Mipalsinta Cata - Mar Franco
11.Paquibat Qng Mangapit - Mar Franco
12.Laut Ning Pluto King Yatu - Jason Paul Laxamana
13.Alang Mibait A Timawa - Jason Paul Laxamana
14.Poesia Para Cang Edna - Art Tolentino
15.E Mu Cu Lalon Macanian - RBA
16.Alilan Cu Na Ing Laru - Jose Roman R. Laquian
17.Dakal Mawawala - RDM
18.Pamagbule-bule Queng Pamamulut Pale - Jose Roman R. Laquian
19.Nung Keni Ka Keng Siping Ku -
Isulung yu, capatad cu, reng masanting yung poesia
ban dacal la reng migising, queng bague ini, lunto biasa!
Dening quecong pamoesiang mitmu cule't cabaldugan
cayabe lang babie tatag quing Culturang Capampangan!
- Jose Roman Laquian
Qng Sugal Ning Pusu
rba--2007
Sintang cayanacan , sugal ne ning pusu
bayu ca sa talbug, magsadya ca, Bungsu
cailangan atin cang matatag a salu
macasadyang tanggap qng calmang mebigu.
Nung misan, nung ninu ing buri mung buri
ya na pin mang queca ali maqui-buri,
aguiang nanan mu man, ali me asuri
nung nanu tang sangcan a maquipasari.
E mu ne paintunan sangcan na nung nanu
at e na ca buri nitang aburi mu;
alayu qng lub ning quecang pangatau ---
atyu qng panlasang e parapareju.
Mecad apansin mu, nung ninu na pin man
itang e mu buri, buri na naca man;
ica man siguru e mu aintindian-- -
ing maburi queca, e me pibuburian.
Nung atin mangutang qng maguing sangcan na
o'bat e me buri ing maburi queca;
Nanung asabi mu...? E casalanan na
e ne mu cayagpang ning quecang panlasa.
Nung panamdaman mung anti cang mesawi
uling ing buri mu e na ca aburi;
lumawe na caman quetang bandang caili
ing maburi queca, sawi de ding sawi.
E ca mamirapal, potang quelambatan
itang aburi mu buri na ca naman;
oyan ing tagumpe e mu na calinguan
qng sugal ning pusu---sintang cayanacan.
Atin e tune cacaluguran
rba-2007-09
Caring caluguran, mamili ca, Bungsu
cawani mo detang tutu qng e tutu;
tutung caluguran mengari lang guintu
ding e tutu naman mengari lang tangsu.
E na basta taung queca maquibasa
tungguen mu neng tune cacaluguran na;
ing ngeni genacang queca papaquit na
magcang tauling aldo bayaran mung dusa.
Nung misan atin cang acacaluguran
ing anggang lijim mu caya sabian mu ngan
potang cagulut mu lunto cang picailian
caretang aliwa paniabyan na naman.
Atin cang aburi, pasaup ca sana
quening caluguran ban lunto mayap ca
neng e mu acaquit pamarocan naca
ing cayang sarili ya pang sisingit na.
Inia queting yatu e mu no abilang
malagung pamiutus, mesira, mesintang
ing maquipasari, nung pitutuliran
ing pamanyira na ning cacaluguran.
Ninu tang sinira qng pamaquiutus da
qng Ibpang miglalang di Adan at Eva,
nune ing parating abe da qng mula
sutil a Ubingan a caluguran da?
Sundalong linusub qng ba're pin dacpan
ing meyaus Jesus Maestrong Uliran;
nanung pepatune qng yang pagdulapan
nung e ing uma na ning cacaluguran.
Inia o' Bungsu co, e cacalinguan mu
dacal la ding sutil queti babo yatu;
inia mimingat ca, e sa paililu
carening e tune cacaluguran mu.
Luid Ka Mar
RDM
Ing parangal a tinggap mu bunga ne ning kaganapan
karing bining kekang silbag king amanu tamung sisuan
karampatan lang mukadkad ding sampagang miambunan
ketang ardin king parnaso mekad e mu tegimpanan.. !
King tapang at tetagan mu ing galal keka mitulid
keng leon man o keng tigre dugarug lang mangulabid
kabud asuglapan daka payatras lang mamulandit
misusumagid la taram ding amanung kekang bitbit..!
Luid ka king kekang parasan paninapang kekang dasan
kambe ning pangasalba ning amanu tamung sisuan
nung iti man mipase ya, king imbut tamu't tetagan
mibangun yang pasibayu ing salitang Kapampangan. .!
Bandi Ra Ka King Kakung Paninap
Neng Renato B. Alzadon
Malambat na murin e mikakit kata
Mimiguit na mekad aduang pulung banua;
Kabud miglakbe kung menaliwang bansa
Ala nakung dimdam makatungkul keka;
Nung balikdan ku man makule napun ta
E'ku man asabing meguing bandi ra ka;
Dapot, makanian man, bakit kaya, Rosa,
O' bat angga ngeni, paninapan da ka?
Misan a kabengian king niaman ku tudtud
Detang anino ta linto nala kabud;
Karing kekaldan mo ikatang mibukud
Mipalsintang tapat, wagas mikalugud;
Arapan ning altar kata siniklaud
Sinumpang matalik king lagyu ning lugud;
Bagting na ning sintang kekata mibuklud,
Kamatayan ya man, ali ne apatlud.
King misan a bengi kakung teguimpanan
Ing ati kata mo busal ding tanaman;
At lalam nang sinag ning Sultanang Bulan
Sinumpa ka kaku, sinumpa ku naman.
Maglua tang pengakung nung dunutan da man
Ding mal tang pengari butul ta at laman;
Dapot itang sintang karelang titulan
E malyaring mate king kapilan paman.
Misan peninap kung king Eden a mula
Aku mo ing Adan, ika mo ing Eva;
Magmain kata mo karetang lilung da
Ding m'yaliwang dutung, berdi, at mabunga;
Ayup lang daralit babo ra ding sanga
magcanta lang batis siping ding sampaga;
Panyatang ning silim ing Guinu tipa ya
Sasalubung katang pupuring sasamba.
Rosa, kasampat na! Agyang paninap mu
Mika atin katang pisugue pangaku;
Pablasang kanitang e'ku pa dinayu
Pagnasan kung ikang kakung akasuyu;
At paniwalan mung ika at ikamu
Ing apalsintan ning mabilug kung pusu;
Dapot numan anti lugud kung milalu
Keni ya mikabat, king kilub ning salu.
Kanita maselan, sutil ing panaun
Kapitna ning bie ku ati ne king aun;
King balang penandit e ku mipaindatun
Tatamban ku wari king lablab ning pugun;
At ing kasakitan ning bie susun-susun
Anti kung mamusan dusa at pagmalun;
Inia arapan mu mepilit kung memun
King ba'cung maglayag manaliwang gabun.
At kabang mamun ku tikis keng kinimkim
King kakdug kung salu pamagnasang sakim;
Pamikawani ta kanian ke asimsim
Agta nang mapait ning malsintang lijim.
Kabang lalon ke yang banuang mali-malim,
Peka-pangaku kung wagas at taimtim
Ing lugud ku keka eya mangulimlim
Angga king ing bie ku takpan ning sisilim.
Ngening ing aldo ku malale neng lalbug
At malimadmad na sinag nang tatabug;
Dapat sa king diwa mimin nong melabug
Pingalip nang simpan nining salung kakdug.
Dapot angga ngeni makinang yang bubug
Ing panaguimpan kung ikang maguing irug;
Ing amlat nang paldas ning bigung panirug
King marimlang aun kagum keng mabaldug
Nung pagumasdan me yang e mipaindatun
King pader a batu mamaltuk a alun;
Makanian ing sintang bigu ning panaun
Maibug neng gabakan yang salung mamalun;
Kalupa ning bining mikutkut, metambun.
Maspak yang manasit lunto babo gabun.
Makanian ing sintang mipase king napun
King paninap mu man pilit nang magbangun.
Karing paninap ku metupad, meganap,
Ing ibat king napun lijim kung pigagap.
Aklis ning kaladua dinininan mung lingap,
Kau ning panamdam inaplak mung ganap;
Ing kekatang banua milako ya ulap;
Samyu ding sampaga kekatang asangap;
Mikalugud katang wagas at masapsap---
Meguing bandi ra ka king kakung paninap.
Capampanan, Mipacde Ca
Capampangan, mipacde ca, dinatang ne ing saguli
ban ing quecang amanung mal, minono ne pangabili,
inia sa't magcusa naca, e na casa maquijili
ibie mu ing caguiwan mu, sumaup cang mamiragli;
sumaup ca sang manintun nung nu la man macabili
ding guinintuan tang catayang malambat nang macacubli;
nung e ta tucnang magdulap bandang wanan, bandang caili
ing aldo na ning Amanu sunlag yang atmu capali---RBA
Deng amanung mengabungkal e tana makapa-ali
sumulat tang kawatasan, malwatan man o piragli
ding kasangguni ring watas manenaya la ban ibili
pamirima ding amanu anting maglalang sawali..!
deng belangkas salukuyan bukas na ing maging sukli
nung alang mitanam ngeni ela mupul nung sakali
ding kayanakan lalu na, kampian de pa'ng katunggali
king e ra malit-malitan lilisya no panugali..! RDM
Marangal a ArtDax pugue mu rin queca
quening sipagan mung susulat poesia;
English o Tagalog maquicaguiwan ca
dapot qng amanung sisuan susuyu ca;
ing amanung sisuan tutung mapalad ya
caring anti quecang magmasabal queya. RBA
Capampangan cung palsintan, damdam ca sa at mulingid
qng acling na ning macudtang qng camalan mu tutulid;
mananu sang saglit mu man aganaca mung maliquid
qng calma ning amanu mung medacurac na matulid;
daralung cung alang patna qng matatas mung paningid
paquisaupan ca sana qng parasan na ning Bidbid
uling qng pamitambayan carin ta ya aquit maglwid
ing babangun tang amanung malambat nang macapaid....
RBA
Kataya ding rimang "id"
Mekasilip tang' tagumpe king kekatang pangatayid
king ligligan poesia penimunan da at migluid
kayabe tang mangasipag, e re paburen mipayid
ing ugnayan tang ANASI, atin na rin mangumasid
o reni na naman de ning rimang dakal, kakid-akid
manenayang ibalangkas, tawling linya tulid-tulid
king kekatang pamagsane ing amanung mipapayid
sisikan yang tatalakad, akakit taya pang mag-luid..!
RDM
Maquina Antiya
Neng Willie Dizon
Abac maranun a maulap aldo macasalicut sisilipsilip
Dening matang macapucat ume nalang mibuclat
Sicanan ning catuan anting maquinang minandar
Patingapun gogosang minimawas manintun auling cabiayan
Alang patnang mamandar anggang mipatudtud maniaman.
Tanam Tamu
rba--2007
Tanam catang dutung, coya,
coya, tanam catang dutung;
tanam catang dutung, coya,
caretang malapad bulung;
tanam catang dutung, coya,
caretang mamungang dutung
ban ing mula tamu, coya,
mabunga ya at malilung.
Tanam catang pale tatang,
tatang, tanam catang pale;
tanam catang pale ,tatang,
qng malualas a marangle;
nung dacal ta pupul, tatang,
dacal ta abias qng bale
nung dacal ta abias, tatang,
dacal ta nasing isangle.
Tanam catang atbu atsi,
atse, tanam catang atbu;
tanam catang atbu, atsi,
carin qng saculan tamu;
nung dacal ta atbu, atsi,
dacal ta lunto mayumu
pamisali tamu, atsi,
manaquitan tamung libu.
Tanam catang gule, ima,
ima, tanam catang gule;
tanam catang gule,ima,
quening bacud to ilele;
nung dacal ta gule, ima,
camatis, apalya, bule,
apandinan tala, ima,,
ding quecatang siping bale.
****
Kasangguni (lus)
Kakalugurang poeta, kekata na pung taglus
isundu ing pamaniulat karing lapis tang' matilus
ilage ing balu tamu kekata na ngang ibulus
ding amanung pakakaban, saka na ing pamangalus
lalu ngening babayube, ing amanu maluluslus
miyabeyabe tang sagip king masikap tang pangilus
luid ya ing amanung sisuan, oyan kekatamung talus...!
RDM
Kasangguni - (lang)
Oreni na naman, mikarakal bilang
de ni nang amanu king tawli la ngan "lang"
gawa tang poesia, miuman kalang-alang
keng salita tamung bisna nong magkulang
diritak sasabi, bukas pota galang
mawala nia kabud, mawala no galang
king amanung sisuan, akwa nang mibulang
e ta papaliaryan. .! Ta' na pung maglalang... ! RDM
ULING MIPALSINTA CATA
Linicas ning Biseru (Ibat qng oreinal nang cawatasan G. J.R. Laquian - BECAUSE WE ARE IN LOVE at lepatan nang sucad G. Art Tolentino)
E ta pagmulalan qng banua nung baquit
ding tala maslag la neng benging tajimic
e ta na cucutang nung baquit ing munag
ya ing sasagana qng abac a saslag
Ing angin ati yu qng gabun maplus ya
ing dayatmalat at banua micaul la
ban midamping uma qng abac a singlad
quetang matajimic at masolung labuad
Metung yang panaun, ing lugal at oras
a menibatan qng Dios qng banuang matas
ing pamicatagun pigcalub quecata
uling ica’t acu mipalsinta ca ta!
RBAPaquibat qng Mangapit
Ning Biceru
Ania miparacal ing cacung apulut
Qng pamanuqui cu qng banda mung gulut
Ing e ra mu balu saria mung e diclut
Lalam ing belita ban cacung apulut
Cabang mamulut cu ing cacung isipan
Obat caya ica seria mung lalacwan
Ing dacal a sagua qng quecang quepitan
Cacu ‘tin ca cayang lijim capalsintan?
Pati na ring tugac a quecang aracap
Lalam ding belita carin mo acapcap
Caibat mong pinile cacu mo pasicap
Qng cacung langgotsi a gewa cung salap
Pilan na ring banua ing pamamulut cu
Calupa ning sadia e na abilang cu
Guintung tinulage lalacuan canacu
Neng pamulutan cu titimanan mu cu
Magcasia na ca mu qng lawe paduclap
Eca macalawe neng cacu macarap
Capilan ca caya canacu magtapat
Ing pilubluban mu capilan me buclat?
LAUT NING PLUTO KING YATU
neng Jason Paul Laxamana
Nung luban me ing kayang silid keta karela
Ring medalya na, anti lang CDng pinirata
A sasampukaki ketang dalan ning Miranda
Mal la laman oneng asali mu la mung mura
At ali ka pa pilmi nung tutu lang gumana
Karing anggang ának a apulu pa mung banua
Ing laut na ning Pluto king Yatu, ay, balu na!
Nung subukan mu ya mang ikutang ngeni kaya
Ing maliksi nang ipakibat, akakit ku na
"Ahem, the distance in light years is bla-bla-bla- bla-blah"
`Niang pebalung king Porac ya mete ing indu na
`Abe ing ibpa nang maibug nang maging kaladua
Gagaga't aspak siuala, kaku pinulayi ya
Melunus ku oneng mipatiman king kutang na
"Bapa, bapa, makananu ing mumunta keta?
"ALANG MIBABAIT A TIMAUA
[No One is Born Free]
neng Jason Paul Laxamana
E me pinili ing kebaitan mu
Bayu ka pa mipusit king yatu
Ila, pánisip da na kang lagyu
King relihiyun da, ika ipalub
E ra ka man kitngan nung bisa kang
Mibait panaun `salukuyan
`Ta nung e me buri ing kabilian
Ning yatung kekang akabaitan
`Ta nung e me buri ing lagyu mu
Inta nung bisa ka king Budismu
Nanu rugu ing akarapat mu
Ipilit mo reni, ating presyu
O panayan mu pa mung tumua ka
Pota nang mánintun na kang pera
Bayu ka maging tutung timaua
Karing kebit da `niang malati ka
Ala kang karapatang mamili
Karing bagebageng kekang buri
Nung tutu pin ing "numerology"
Pati kalma mu e mu pengadi
Kapilan la mo kaya mikabus
Deni pung ának king pangaipus
`Tang ának la pa, ala nang gastus
Pilinan ing sariling sapatus
Caluguran cung babasa, oreni pu ding rimang (las)
yabut cu la qng gamat yu macatunging anting perlas
qng malugud yung tangquilic carin cu la pu panilas
ban queta ding bayung suli aquit dala at amalas;
at nung qng parang ning rima lunto lang atmu catalas
at ing beluan qng amanu mawalac at maliwalas;
canita na mipasulit ining pawas cung menalas
quening salu ning maluca, tulang alang catumbalas.rba
A POEM FOR EDNA
Edna likes the things I like
and Edna is for real
and Edna thinks the way I think
and knows the way I feel
Edna makes my two hands shake
When I look at her face
Edna makes my heart beat faster
When we kiss and embrace
Edna seems to have the power
For making time flash by
Edna brightens the darkest night
and keeps my passion high
I have rearranged my whole life
for things that we would do
but how was I to know, that
she is just passing through
POESYA PARA CANG EDNA
Ing buri cu buri nang Edna
y Edna malagu yang tutu
Ing isipan cu isipan na
Ing panamdam na panamdam cu
Pareu caming gagalgal gamat
Neng misasalubong que mata
Mebiyag ing lugud cung tapat
Qng caul, uma at lambis na
Angel yang liningap canacu
Sepu naku at kinandungan
cayabe que pamu o't saquidlap mu
meco ne pala e cu apansin man
Y Edna, qng bie metung yang misteriu
O't dintang ya pa nung maco neman
E Mu Cu Lalon Macanian
rba-2007-9
E mu cu lalon macanian, Babaye, ica, balu mu
neng lalon mu cung macanian malilipang cu animu,
ining matbud cung calamnan panamdaman cung balamu
maguguna yang lalapit qng sabic a candungan mu.
Linawe mu cung maratna, maratnang atmu caratna
cabang maratna cung lalon yang leguan mung macaguna;
at ding malagu mung mata dimdam culang migsalita
daraing lang manigapung e cu agad ayalata.
At ngara ding quecang mata: "Matbud cu naman calamnan
acu man maguguna cu qng lawe mung pangayamnan;
dapot...., milulupa catang e na malaya cabilian....
Lalaque, paquisabi cu: Emu cu lalon macanian.... !"
Ing Kasangguni "las"
Ay salamat king ganaka ning kekatamung kapilas
ing poetang matenakan misalbag yang anting balas
king dagat ning kawatasan at kekatamu panilas
deting katayang rimang "las" anting punyal a matalas
tataram ya ining diwa kening bili apiyalas
maliswas yang maligaga ining lapis magpumiglas
mangatakid neng babaslen king panyulat abulalas
panamdam ning Kapampangan ing ligaya e mabaklas..!
RDM
ALILAN CU NE ING LARU ( Suglung Poesia ning Mekanicung Kotsi )
neng Jose Roman R. Laquian
Sadia-sadia, capatad cu,
qng oras mung magmaneju
cacarug ca rugu salu
queng kotsi mung luma laru.
Sadia-sadia bubusuc ya,
magcasaquit mangisnaua
uling luma ne ing laru na
capapatdan yang maquina.
Memanaung milayi yang
pupugac qng pangisnaua
memitamit casing-ap na
tiniric ya dalan matua.
Ing kotsi mu sadia-sadia
magcasaquit yang milarga;
ngening mibayu ing laru na
mulayi yang macayama.
Ining kotsi, capatad cu,
istoria ne ning Amanu
a cailangang sesen tamu
ban mulayi yang mapinu.
Balang metung quecatamu
meyaus mag-mecanicu,
micana tang bayung laru
queng Amanung maniyad suyu.
Larung pamagmalasaquit
ampo lingap a mabinit
qng lugud tamu ipaquit
queng Amanung sucdul-riquit.
Ngeni na pin ing panaun
bayung larung maca-sulung
ibie tamu queng Amanung
cailangan ning bayung siglu.
Capampangan tang Amanung
maniyad-sagip, capatad cu,
e taya paburen rugung
mamitamit mag-jingalu.
Ing Amanu tamung Sisuan:
ing Amanung Capampangan
saup-saup tayang dinan
bayung larung masicanan.
Larung mitmu capalsintan
at daquilang capagnasan
iyang lunas at pag-asa
qng pupugac nang inaua.
Larung pamagmalasaquit
ampo lingap a mabinit
qng lugud tamu ipaquit
queng Amanung sucdul-riquit.
Dinan tayang bayung larung
pacasican ing Amanu;
caring sal'ta niting yatu
iyang lunto peca-puru.
Dinan tayang larung bayu
ing Capampangang Amanu;
queng pamaglicap tamung ustu
mamayagpag ya qng yatu !
Dakal Mawawala
RDM
Nung mewala ya man ing matas a tori
king New York kanita dalan niamu iti
pamuklat ning gera't pamika-intindi
ding bisang maniakup ding matas a uri.
King diaryu meyakit ngening salukuyan
mikarakal na la dakal balitanan
mangawalang taung e malit-malitan
metung ne I Burgos nanung maging sangkan..?
Metung pang masala e dapat mawala
ing amanu tamung kekatang amana
uling yang pagasa dala ning kultura
tune Kapampangan mangga man king angga..!
Pamagbule-bule Queng Pamamulut Pale
neng Jose Roman R. Laquian 2007-09-14
Queng pamamulut cu apagbule-bule
ing niaman na niting pamamulut pale;
aguiang mapali ing aldo ning marangle,
tune macauili ing mamulut pale.
Inia macauili ining pamamulut
ing sinta cung lugud atyu quening gulut,
cayabeng mamulut caniting palibut,
careng gintung pale abe queng dadaclut.
Queng pamamulut cu apagbule-bule
qng lualas na niting mapaling marangle,
dacal cung apupul caring tenam pale,
a gauan cung abias caiuli qng bale.
Maniamang mamulut careng gintung pale
aguiang mapali ing aldo ning marangle,
paleng meguing abias caiuli qng bale
maniaman yang canan a nasing misangle !
Nung Keni Ka Keng Siping Ku
Madalumdum ya ing bengi, kabilugan ya ing bulan
Alang batwin banua babo, ating anging manyaman
Tatando ku kening awang, bubulung ke ing lagyu mu
Kanyaman na sana ne? Nung keni kang siping ku
Pagmasdan daka mata, kaulan dakang matalik
Iparamdam ke ing tibuk ning pusu kung binang sabik
Idampi ko ding labi ku kareng labi mung mayumu
Kanyaman na sana ne? Nung keni kang siping ku
Dapot yaku mung dili cu, ngening benging madalumdum
Inyang meko na ka ena man meko ing dulum
Dapot pilit kung isipan agyampang likuan mu na cu
Kanyaman na sana ning bie, nung keni ka keng siping cu |