 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY, page 62 |
 |
| Ernie C. Turla, curator |
| ||||||
| 1. Kapampangan - Anonymous 2. Ing Poesia, Oyan - Renato B. Alzadon 3. Song pf the Migrant Workers - Blanca Datuin 4. Dalit ding Anak Pawas - Tony Mercado Pena 5. Poeta, Nanu Ya? - Renato B. Alzadon 6. Ing Pamamarsala - RBA 7. Bitsen La Ring amanu - RDM 8. Ing Quecang Tetagan - Renato B. Alzadon 9. Lalam Na ning Manga - RBA 10. Kapampangan, Mipakde Ka - RDM 11. Ding Miyaliwang Rima - all-star poets K A P A M P A N G A N author - unknown Kapampangan. ..! Yan ing Dai ding pantas at mangatapang; In Tribu ra ding Maginu... Ing Lahi ra ding Mahalan; Kapampangan. ..! Yan ing lagyung milalablab king dangalan; King bilunga'ning Istorya e na mapda kapilan man; Kapampangan. ..! Ing Amanung kasing-lambing ning kundiman Kasing timyas ning dalit da ding Angheles king Katasan. Nanung kayapa'ning tau ing liliwan mumo sana A emu malyaring akit karing mapuring anak na...? King talino at sipagan, king ganaka't pamakyaga, King hinhin at kabanalan, uliran la't manimuna; At lalu nong e mitawli nung king lagyung pamalsinta Pablasang ing Kapampangan nung lugud ya alanangga. King bye na ning Kapampangan ing "kredo"nang matas dili Ya ing mye, yang e manginu, e busabus o dwahagi; Buri na pa ing mate ya, e mu sana madakati Ing banal nang katuliran, katimawan ampon puri; Ing Istorya yang patutung kapilan man e matawli King panyanging Kalayan agyang king pisak ning bengi. Bakit kaya makanyan ya iting lahing Kapampangan Bakit kaya mataluktuk ing asal na at kaniwan? Bakit kaya parati uang manimuna at uliran? Iti... uling ing daya na dayang lusuk king kamalan Dayang tune Mahadlika... Dayang Datu...dayang Lakan. Ing Poesia, Oyan Neng Renato B. Alzadon Ing poesia, oyan, Ya ing alang patnang paniatang ning abac, Nung nu qng silangan, Yapsa ne ning dulum yang aldo masaspac; Ding batuin at bulan A sulu ning bengi, mapda la at magpiac, Layun deng panayan Ing pamagbalic na ning miwale pisac; Potang ing cabengian Datang ne na naman, ding yata rang pilac Ilang mipalcasan qng leguan at ningning qng banuang mawalac; ing poesiang yan, ala yang camalian, ganap ya at tamac, camamatutuanan, Obra Maestra ne ning Tanac ding Tanac. Ing Poesia, oyan, Ya ing alan’anggang sirculu na ning bie, Nung nu calacbangan Atin mibabait, atin mamamate; At balang cauran, Atin casalising caleldo macule; Gulut ning caqueuan, Ati ne man carin ing berding marangle; Yang bagyung masican, Catumbalas ne ‘niang angin a manene; Ing mamaping bulcan, A nandin minyintang, ngeni, payapa ne; Ing poesiang yan, Inia minlungan ya qng mialiwang adle, Uling yang caburian Na nitang linalang qng Banal a Gale. Ing poesia, oyan, Ya ing pamituglung a atmu canayun, Anti qng ngeninan Mitutuglungan la ding bucas at napun; Inia ding batisan Tipa lang maquiagum qng dagat a susun; Yang banuang catasan Caulan ne ing yatu qng tacde ning ambun; At yang aplaya man Yang catipanan na ning casuyung alun; Quilub ning pisamban Pusu lang bicluran ning banal a culdun; Ing poesiang yan A calilicuman ning mayap a layun Yang mabie larawan Ning Macudtang Watas qng anggang panaun. Ing poesia, oyan, Ya ing tugma-tugmang mapinung sonata Ning calaganapan A maquipamintu qng sucad at rima; E pagmumulalan Ing macasunis dang galo ding planeta At ing alan’anggan’ pamiatbanan na ning yatu at banua; Nung pitutuliran, Ing cabaldugan na ning naturalesa Ya ing cawatasan A ginale ning Dios iniang maglalang Ya; Yan ya ing caustan Ning Matas a Diwa, Ing Dios Poeta Ya; Ing meto-lelangan Poesia ne ning Dios, oyan ing poesia. SONG OF THE MIGRANT WORKERS by Blanca Datuin We are figures hunched from morn till sunset. Crowned with broad-brimmed hats and silhoutted against the blazing sun, we pick the prize of the earth that feeds humanity. The dawn breaks, we break the dawn, and we stay bent till the dark falls to shroud us. Never mind the pain on our back, fingers turned purple, creamed with soil and swelling with the richness of terra firma. Never mind the knees that tremble, summer sweat that drips aplenty to bathe the body ready to crawl to a bed cushioned with dreams of a rising bird; never mind winter that numbs ears, hands and fingers. We look only to the feel of green in our palm to send our folks back home; they who thirst for fathers and mothers gone to a strange land, to bring them back the fruits of a teeming graceland. To you whom the scourge and agony of labor are alien, please do not draw the curtains of darkness on us; our bodies though worn-out are still warm like yours; you feed on us as we feed on you. We're tied to one another. # DALIT DING ANAK PAWAS Wangis kuba kami gayak pun aspak abak anggang mapun aldo makakoronang kupyang mangalapad ampong antimong mengaduluk alino busal ning kapalyan aldo, ikami daramputan ing nabang ning gabun a papakan king meto yatu. Masaspak ing munag, aspakan miya ing munag, at manatili kaming bukut anggang manabu ing silim at kekami malabal. Paburen na ing saingsing ning galudgud, taliring menuling, makabalut burak at mengalbag king yaman ning gabun gimbulan. Paburen la ring intud a gagalgal, pawas ning kalaldo tutulung mamagus didilwan ing katawang gagagad magkera king dase mikutson paninap ning ayup a bisang sulagpo, paburen ing dimla ning kauran mapapata la ring balugbug, gamat, taliri. Manintunan kami kanita maka-aplus berde ding palad at ipadala karing likwan king balen tibwan; ila napin na mawu karing tata ampong inda na linuslus king marayung lugal, kanita ibye karela bungang pagal pawas ibat masaplalang bangsa. Ikayu na e dadanas sapinit at saingsing ding anak pawas maniklaud kami e yo sana laladlad ding tabing ning dalumdum; ding katawan mi maski hubad-babad nala keng pagal mapali la pa murin kalupa yu, babye yu ing kakanan mi, babye mi ing kakanan yu. Makagapus, mipanatbus tamu! Kepampanganan neng: Tony Mercado Peña Ma'am Blanca, Uli na ning kantang gewa mu: Dimdam ku ing pali na ning aldo keng katawan da Dimdam ku naman ing lua da reng mata ra Dimdam ku naman ing lungkot da ring puso ra Opu dimdam ku ing bie ra kabang makarayu la Dave de Jesus Poeta, nanu ya...? Renato B. Alzadon August 19,2007 Poeta, nanu ya....? Pinili ne ning Dios ibat qng samula ban mangamanu ya qng mangapalyari babo ning masala; mipagcalam caya itang cabiasnan a macapagmulala ban maguing sulu ya qng queralumduman ding manintun sala; at caring poesia ilang bibigcas ning guinintuan nang dila ding babie ligaya qng lagyu na nitang Banal a Siwala. Poeta, nanu ya...? ya ing mituburan a talapangabus ban mitimawa ya balen a magdusa qng pangabusabus, tacut, ala caya, picasaman de man detang alang tarus, aguiang mipacu ya bitis ampon gamat qng babo na ning cruz; o' e bala caya, nung ing cayang daya magisan ngan magus munie yang ligaya qng Banal nang Lagyu ning caya minutus. Poeta, nanu ya...? ya ing babie pugue qng yatang busilac ban miculayan ya qng timan ning aldo yang bucung bulaclac;, o' palsintan naya yang naturalesang mebinang mawalac malagu ngan caya ing ayactanganan ning cayang pamalac, uling para caya, ing naturalesa yang licuan nang tatac iniang maglalang ya ing Matas a Diwang Tanac da ding Tanac. Poeta, nanu ya...? o'bat nung lugud ya matas dili uri, ibat qng pamilia, angga qng sepu na ning tibuan nang laji? Inya lawan mu ya, ipagmasabal neng alang pamangimi amanung sisuan na at ing cultura ning quegisnan nang dai; inia macanan ya, ing cayang panamdam, panamdam yang budni uling ing pusu na pusu yang daquila, pusu yang bayani. Case, nung macanian ya ing bayani na ning naturalesa, ning cayang balayan, ning cayang amanu, ning cayang cultura; at aliwa mu yan siwala ne ning Dios..... ing Dios atyu caya----- at acaquit ta yan qng banal nang lugud qng cayang capara.....! Balen cung sasamban.... .. acu, e mu cu sa ausan Poeta....... .. qng cacung cababan, e cu macabague qng dangalan aita.....! Ing Pamamarsala rba-2007 Ing pamamarsala, malagua yang daptan quesa queng tatanggap qng maling depatan; macalabyus ca mu qng capaquibatan at mangituldu cang dapat parsalanan. Acaquit taya yan qng panaun ngeni: "casalanan nita, casalanan nini". Itang balamu mo nung 'tin lang asisi qng pamagculang da, tutu nong milibri. Calupa na nitang miliari canita qng Mula ning Eden, cang Adan at Eva; e na tinggap Adan ing pamagculang na cang Eva na quena ing anggang parsala. "Ini pung babaying binie yung abe cu binie ne ing bunga, inya pu mengan cu." quen mong pamalac na tane meabsueltu casalanan na ning babaying menucsu. Iniang ing babayi ya namang micutnan ing papamarsala, ginamit 'nia naman; "o' macananu po, ini nang ubingan a tucsu na cu pu, macanian cung mengan." Nanu tang miliari...? Iniang majatul la bate ya qng utus a e tiparan da; eata, ing tau qng pamagculang na ali ne asaguip ning pamamarsala Nanung mecasaguip qng dapat a licu? Ing capaglunusan ning Bining Pangacu; ing anggang parsala tinggap nang inacu babo na ning Sanga cambe nang mipacu. Caring taung wagas casalpantayanan ing pamamarsala e ra ne cailangan aquit mong ticdo qng panig ning catutuan a nung nu ya carin ing capaglunusan. Bitsen la ring Amanu RDM Inyang malati ku ketang, lalam na ning palbabewan tanud-tanud kung mag'masid bibewan da ring keraklan itang pale ketang asung, saup-saup dang titiran ing pawas da maralikat mayayakit ing sipagan..! Atin naman ketang lele karing asias pakakawat ala lang patugut liligis detang bitis manialikwat dadaran da itang pale pasaldak dang dadakurak itang tangke mangalagas gintu waring masasalak..! Kanita da na tipunan itang pale ibalusbus ban sapula' nitang angin itang apa mitagusgus akit mong misasaglulu manuktukan detang manuk sasamantalanan da na itang ilo dang atuktuk..! Itang pale a mirikil mebitse at melinis na salakan da nang tipunan, ding linggotsi manenaya kasapak dang kaban-kaban, timbangan da king baskula itambak da ketang bangan kabyayan dang pag-reserba. Anti murin keng panaun tamu ngeni misanmetung mi-ugnayan king salita, mikarakal tang' lilingun ating masipag bibitse, babalusbus maki-ayun ding amanung pagsadian ta karing tu'king jenerasyun.. ! RDM Ing Quecang Tetagan (Iron Will) neng Renato B. Alzadon Ing quecang tetagan ala yu qng quimut, ala yu qng anyu at ala yu naman qng timan ding labing mapagbalatcayu; atyu cabubuslan ning atmu catatag a matibe pusu a qng nanu paman sigwada na ning bie, e agad susucu; qng e mu cabalwan, acu ing pupugue, acu ing duducu, qng quecang sicanan a miguit qng leon ning metung a pulu. Ing quecang delanan a landas na ning bie, landas yang masucsuc landas yang minlungan bitag at pasulung camandagan tusuc; dapot macanian man ali mu picabiang ing maldang pagsubuc tinggap mung maniaman gagampan mung calma a queca mitutuc; guewa mung guyabnan pamanialpantayang dalise at lusuc ban acua meng dasnan ing carurucan na ning matas mung bunduc. Queca cu tengalan qng ing tetagan na ning tau qng bie na atiu maglayunan qng cabubuslan na ning cayang caladua; case, nung macanian, ing nanu mang datang a e inamin na ala yang carinan qng capanamdaman ban manaliguat ya; balang calungcutan balang casaquitan ning pusung lalasa atyu ya qng queinan ning salung tatanggap qng late ning dusa. Salamat capatad qng pamandalo mung matimbang, matimid cacu la miatad ding talimjaga na ning bie palpitaquid; iquit cong miladlad ing licum mung beluan a cacung amasid nung nu qng panlacad agamit dong sulu ding palpitalabid; O' taung mapalad sacdal ca catibe a ena mipaid qng cacung timalad gamat ne ning angjel ing queca tataid. Lalam na ning Mangga rba -2007 Matas ne ing aldo iniang aquit da ca paquisabian mula ding ayup qng sanga, at ing payatad mung amanu carela carin cata miquit lalam na ning mangga. Milingat cu quetang sigla rang daralit ding ayup qng sanga mamamangundalit; ing metung carela atmu ne caculit lalam mangga ngana carin cata miquit. Micatagun naman aldo ning Dominggu mitutundu cu pa qng pangapuyat cu; qng misan a quisap ica nang iquit cu lalam na ning mangga sasalubung cacu. ************ ********* ********* *** (Ipariquil que ing poesiang ini, qng cacaluguran a maquibat qng laguiung Willie Dizon ning Kapampangan Mipakde Ka RDM Sumulat tang' Kapampangan at saka ta magsalita king porma ning kawatasan mapalyaring king kumidia basultu o poesia man, drama kaya o sarsuela kultura ya manatili... o king sunis man ning kanta..! Ibugnus ta ketang angin, pabustan tang maniulapo detang balas tamung pana kareng taung lipo-lipo kalbitan la at gisingan mipakde la sanang tikdo ban miagnan-agnan tamu king salita magtampiso.. ! Kagising ta karing bersu, ing mipatudtud tamung diwa yelu ya man sa ing pusu, mikapali ya't sumala ing panamdam makabalen, pangisnawa miyayakma agnan-agnan tang sumulung, itamu ngan salimuwa..! Paburen ta neng milablab ing salita mikaluku nukarin man suluk niti ning ketawan maglipatu neng ing kakatang paniulat, miraras ya karing pusu da ring balang Kapampangan king kabilugan a yatu..! Luid ya ing ugnayan tamu king salita misanmetung king aplus da at leguan da ring bersu king pamaniaklung magpatinganiud tana mu king bilis na nitang alun masaplala yang tagumpe ing salita tang mibangun..! RDM Lon mu, O' Poeta, ding matas pamisip oren, quen la babo, isip na lang isip, ot balamu ata, buri deng masagip ing Capampangan dang mamuc mipa-iglip, nung macanian palang mayap la pingalip o'bat manalig la queng Pamipatilip; sabian mu carela, tipa la qng sulip talan lang sinabud, dulung lang manulip, uling nung angga la queng pasilip-silip ing amanu rang mal, cabud nia' mituclip.... ! RBA Bagya ku mu mipasandal, agad nakung mipa-iglip, ing mipatudtud kung diwa, tekasan na ning pamisip maliswas kung panintunan ing mitagan kung pingalip, maging poeta ku sana, metung karing makasagip king amanung malulumud, Kapampangan keti sulip, gisingan ke ing sarili, ban makiabe kung manulip uling nung manatili kung lipo-lipo na ing isip ing amanu tang' sisuan king paninap nia silip-silip. .! RDM. Luid ca, O' Poetang macudta pamisip cumaba pa sana bie mu queti sulip, matupad nia sana banal mung pingalip a ing amanung mal acua nang masagip. RBA Salitang "be" RDM Mekatipun kung mapilan karing makarima keng "be" masakit ing pamanipun king amanung miba-ube, pablasang e ku mituru, kanaku ban payantabe king amanu tamung sisuan, kakapkap kung mangulabe dapot matibe king lub ku king saup yu kekong kambe ikeng bisang mamikudta, dakal kaming mamalebe king dane ning kawatasan, a mi nang salasalibe makanyan tamung sasaya, king kekatang pamiyabe..! > Nung atin cung acalinguan caring macarima queng "be" > bilang yu nang cayapan lub, lague yu la at paquiabe, > nung misaup-saup tamu talacad yang atmu tibe > ining quecatang amanung malambat nang mibaube. RBA Dacal a salamat, Caca, quening tapat mung patnube ing tula cu e mu nanu qng tapat mung pamaquiabe, acaquit cu ing degulan na ning lugud mung matibe quening amanu tang sisuan a maluat nang mibaube, malugud ya sa ing Guinu, nung nu yang quecatang gabe pacaban na sa ing bie mu at mirayu ca qng lumbe uling quening sipagan mu at tune pamanantabe ing amanung mipaburen talacad yang misnang tibe. RBA King daratang a panaun ing kekatang panikwanan matipun lang maka-ayus ding amanung panagimpan ding tutuking Jenerasiun a karelang pagdulapan Kapampangan mibubu ya king masaplalang parasan... king kasalimuyut na pin, ing imbut tang pigagapan matibe ya sang talakad, ding talindo tang pagnasan alang sangkan e ta magluid karing pigagap ta'ng dasan magluid ya pin ing ANASI king kekatang pingalipan.. ! RDM Capanalig cung capatad, icana mo sa qng album at layun ingatan mo sa dening catayang melicum; uling ating aldo datang, talacad la at mia-agum ding bayung sibul a watas a managtas qng dalumdum; at dening pigsicapan yung catayang pilagum-lagum qng amanung malalawi agamit dong pamaranum; at lalam nang pacalulu ning pecamatas a Ucum ing amanung capampangan, misilad ya pangaticum.. ...RBA Ding mirima king "ik" RDM Metalsik ku at mepitik balugbug ku linagitik kareng bayung makasabik a amanung manalamsik bisa ku man sang mulandit ban ipilit mana-imik oneng eku pin milisya kailangan ta ing tangkilik..! Ba..! ing diwa kung magjimagsik kening butul manialiksik banten taya at lukuban, e tana patumpik-tumpik ing amanung matitiktik, parayan da ring limatik atiu king pago tamu ing tagumpe a matarik..! RDM Salamat Mang Ernie king kekayu pung tangkilik anya akakwa ming mamoesia balik-balik deting amanu yu, kekami pu manalamsik king kekong patnube buknul lalu yang titigik... Salamat kekayu, ikeng supling sasagikgik bunga na kami rin, ding kekayu pung palikpik ati ke gulut yu, masipit keng manialiksik mamintu kami mu, kumpas ning kekong pamitik..! RDM Karing Sampaga Na Ning Baltimore Sulung, dalan yu bulaklak uma nang banal at sabik at king indu nang malugud malale yu sang idantik; ding mayintang a tula na pagkanta yong makakilik karing bantiting metakmus kanyang alun a sasaltik, karing maldang kabalen na kakuyug a masalpitik, aduan nang lapitan yu la at ikaul yeng matalik; at pagdala yong pag-asa ding king dusa maka-andik sabian yung ya ing kaladuang king balyan na balik-balik. ....RBA Ing Bendeta Ning Poeta Inia mekeni , Poeta, ding dalit tang maki-bagsik Ila namang ilague ta balang maramdam laguitik; Ing Poeta tin yang bersung mataram at maki-lisik Anting kildap neng kaleldo, mitataung manalamsik; Karening Pusung Matuling matindi teng ipandikdik Ing Bendeta ning Poetang inamun dang pemalantik; Ngening ing kekatang lira yang papaten da salpitik Para king Naturalesa, dapat katang maghimagsik! .....RBA Kasangguni ding rimang "O" RDM Mekasilip naku naman, mikarakal a rimang "O" dakal a salamat keka o poeta Kang Renato masanting lang pamagsane kataya mu bito-bito, mamagtal naku mung kukwa at ena ku malilingo... Nanu pa mong lilewan ku kening kanakung ensayo, patiglap-tiglap naku mu, ena kupa lito-lito mamangulap, mamanintun, mikaraka' nong pakalto ding selasan a amanu, kening pusu makapasno..! RDM Ing balu cu sana, caring Ortelano aguiang mapagal lang qng gabun gagalo dapot ulina ning mipamuat lang pago micalu-calu la at miayo-ayo, ing capagalan da anting susulagpo uling ing carelang tula yang magbabo, cabang mamaswe la talu mipangantyo papulayi la pang maquiabe culyo itang sayang itang mengatmung tabulyo yang e ra calinguan qng datang pang aldo; macanian mu naman, ban iting talindo magluid ya at muquiat qng banuang matilo aguiang mapagal man ining pamanggalo qng amanu tang mal gagambul, gugoso, itang pamagsaya e taya lalaco at paralan taya qng paberso-berso quetang e ta malit cabud nia minono amanu tang sisuan maningning yang lunto....RBA Tumiman ca, indu cung mal, calinguan mu ing pagsalbat ing aldo mung panenayan, datang ne, e na maglambat, maus ca sa, ding anac mu, macasadya lang maquibat talasan dang cailugan, capatagan man at gubat, at quening pamagbaliuc mu qng trono, nung nuca ibat, yang matibe ming panata qng ala nang macasabat at bayu mipasibaywan ing qng gabun ca mibatbat manajimic ne qng aun ining quecang anac-gubat-- --RBA Sundu Tamu Sundu tamu alang tuknang at ala nang makasabat ing pami-ugnayan tamu telakaran e mibatbat tikdo tamung agad lisya neng ating makasalabat linisan ta ing kakewan nung iti man anting gubat king kapibabatan tamu, e ta maynip e na lumbat kabilya' na ning amanu king dase na ning pagsalbat kukusad ya ketang dalan anti yang magsalibatbat pusanan taya king pago ing tagumpe maka-abat isadsad ta ing panata, pusu tamu yang makibat...! RDM Ing ANASI anti ya mong saquen deng taung manabat Mapilan la mung pinili at mesalac caring lambat Metung lang cuyug gugusal calasan pangabatibat Deng pusu at pamiutac queng tagalog a mengabat Pamibiebie Capampangan pati panasbuc peniabat Magadia na ca tagalog uling e na pecalambat Ining culio nang Incung cu at ding anac pacababat Oras nang ticdo’t guyapgap Indu cu ya’yng mamalatbat! ADB (Arnold Batul) |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00161 |