Table of Contents:
1. Poesya, Kaylangan Daka - RDM
2. Bandi Raca Qng Cacung Paninap - RBA
3. Rimang "Al" - RDM
4. Ing Biniagan - Willie Dizon
5. Kulyat 1997 - Jason Paul Laxamana
6. Diosa - Artdax
7. Diosa, Part II - Artdax
8. Diosa, Part III - Artdax
9. Diosa, Part IV - Artdax
10.Art Tolen - RDM
11.Art Tolen (Acrostic) - RDM
''Poesia, Kailangan Ke''
neng Paing
Bilang Kapampangan
ating kung tungkulan,
gawang poesia king kakung kagiwan...
e naman kailangan
ding peka malalam
dapat kung isulat king amanung sisuan..!
Deta mung balu ku
ilang isulat ku
singka-sikan mung lub ing pagbasian ku...
makayambag dugu
king ditak kung balu
agyang ulit-ulit la mung salita ku..!
Poesia nanan ke..?
a wa... kailangan ke
at yang dalerayan landas ning kakung bie...
libutad ning lumbe
king saya magdase
ing poesia murin iti kailangan ke..!
Datang ing panaun
baka ku sumulung
pane kung magsikap, kakung ibalayun...
keng kakung durulung
sarili isubung
ban e ya mapatlud... kekatang pisuglung..!
RDM
Bandi Ra Ca Qng Cacung Paninap
Caba ning mamun cu, tiquis queng quinimquim
qng cacdug cung salu pamalsintang saquim
iniang cagulut carin que asimsim
ing lua nang mapait ning malsintang lijim----
sacsi que yang banuang cule malim-alim
qng cacung panatang wagas at taimtim,
ing lugud cu queca e ya mangulimlim
angga qng ing bie cu tacpan ning sisilim---RBA
King patingapun kung obra anti kung milako pagal
ngening abatyawan ku la ding katayang mikarakal
deng inampang nang RBA, bala' ku mo asno dakal
o ding kang Mang Ernie pala dinatang lang
bukal-bukal. .!
Ba lalung kakayan yata neng magrima tang' pirapal
Neng ating tang' durungdungan keng poesia manigaral
ding poetang matenakan a kekatamu pepabal
sana isadsad da katamu king sipag dang alang tikal..!
RDM
Queca, O' Poeta salamat a dacal
qng catapatan na ning lub mung gugusal,
quening acaquit cung imbut mung masasal
a saguipan taya ing amanu tang mal;
ing sicanan a lub magbabo, mimiral
sulung,sundu tamu, ing pamagmasabal. ...RBA
Tane kaluguran mine tana king lual
makyabe tana ngan kareting gugusal
king amanung sisuan salitang pekamal
ala nang atrasan ban e matigagal...
Lalu na pu ngeni mabilis yang tagal
ita nang Tagalog bina yang pirapal
makisaglulu yang magbabo mitangal
ban pandalpakan ne salita tang banal..!
RDM
Keng pami-ugnayan tamu dakal nala ring gugusal
e mu kabud king panyulat, lulto atin pang mimiral
deng basultung Kapampangan Totoy Batu yang popular
oh,,. ding Arti Sta Rita, itas tala king pedestal..!
Pamaglimbag karing komiks, banda at lalu pang dakal
a pagobran ning KAMARU, magprisiging alang pagal
ding susulat nang poesia, makasentru, makabusal
kareng kayanakan lalu keng iskwela, deng magaral..!
King metung pang porma naman, ating poesiang mimiral
romantiku ing datang da karing pusung mitatambal
mikakasbu la king lugud, pibutnulan dang pakamal
miyabuban ka king pali, pilasan meng
tunggal-tunggal. .!
Luid ya't itas ing ANASI..! Pugad ning kekatang dangal
misasalubung a watas ing diwa ra at masabal
masias ing tatalakaran, pamisulu da ring dakal
ing amanung Kapampangan, e ya matda e ya mibual..!
RDM
Ing Biniagan
Quing bisitas la miquit aldo Duminggung maculimlim
Binyagan dang belacan ding micalugurang micalijim
Aduang candila quing altar quilimquilim
Quiquilican nang sibung keang atitimtim
Mamindisyung Pari manganding mataimtim
Cayari ning binyagan tegauan munie paquinquim
Selebrasyung masaya menangga yang sisilim---Willie Dizon
KULIAT 1997
neng JASON PAUL LAXAMANA
I
E ku pa kelinguan iniang malati la
Lucky, Pakbit, Macmac, mikukuyugan la
Ilang atlu ‘tin lang pamimialiua
E dapat m’lupalupa ba’mung malagua
Pitung banua na ing milabas kaibat
Ning pangatabunan ning balen king balas
King abroad, dakal la ring minta ban bukas
Makasaka king biyeng ma’nakit nang uakas
Iniang me-lahar ya ing Indung Balayan
Mengasambaloku ya ing Kapampangan
Ding makatua kabiyayan na ing etupan
Balas ne mu pin ing meging kabaldugan
1997 ding ának Kuliat
‘Atin Ku Pung Singsing’ na mu ing balu ra
Pasinag ‘bat aliuang lugal na’ing alben da
Nu na mengaparas ing tibuang kultura
II.
Ibat king Menila, i Meynard, dintang ya
Megaral ne mu rin keta king ‘skuela ra
E baling king Kapampangan e ya biasa
Tagalug at Ingglis, balu ra Pampanga
Ding ának Angeles karas da king ‘skuela
Turuanan dong Ingglis, Tagalug, Bibliya
Pangaras da bale, mag-Kapampangan la
Kastila ne man panganta i Thalia
Manalbeng animé, pasinag ‘bat JapanNiponggu la kanta, e ra aintindian
Siualan dong Tagalug ding king Kamenilan
Panagkas nang Ima, oyta, Kapampangan
Nan’ mung magaral salitang Kapampangan
E me man agamit king lual ning balayan
Mayap pa’ing Tagalug, Ingglis, ‘tin kang dasan
Ustung mi’bagsak ka, ausan da kang bolang
III.
Atlung dinalan a banua king lalam da
Ring Kastila, ding keng pisamban migdala
King kekatamung labuad; dakal la sála
Inia agnan agnan, ay, pelakuan ta la
Meko la pin ding Kastila keti balen
Aliua pang minyupil, mengalabul oneng
Ing ‘ganaganang likuan keni, aalben
Ta lang alang patugut; bakit pepab’ren?
Kalunus ku rugu king Indung Balayan
Ing lagyu na tutung mengaramusakan
At mekutkut ya pa king ipsa ning bulkan
O nanu pang mi’tagan a Kapampangan?
IV.
Bakit pin ding Kanu potang tutuknang la
Keti itamu’ing makibage karela
Pipilitan ta’ng abalu’ing salita ra
Mamagkasakit tamu ‘stung e ta biasa
Deni namang tau ibat king Menila
Makanian la’ naman, bala ra ninu’la
Subukang manuknangan ketang balen da
Ing dapat magbayu, ninu pa, ‘di ika
Potang ‘paglaban me ing kekang Amanu
Tumas la mo kile, e kanu makatud
Dapat ing kaulan ta kanu Filipinu
Ban ta kanung mikapamisasanmetung
Ustung Tagalug ne, ing aus: National
Ustung ibat Cebu, Bikol, Pangasinan
Davao, Pampanga, Ilo-ilo, Palawan
At aliua pa, ing aus da: Regional
V.
E ku pa kelinguan’ tiru ring mestru ku
Nung makananu pin ing pamagrosaryu
Ding planeta tamu, siyam la mu kanu pu
Kayi bildug da ne mu kabud ing Plutu
Bakit lulub la ring tau king iskuela?
Nanu’ing kasangkanan, para mo mabiasa?
Ding aliua lulub la ban makapagobra
Uling keti yatu, kailangan: diploma
Potang mebiasa’t mekibat karing mestra
Nanu ing sabian da? Ingratu, ingrata!
Bala mu king ‘skuela, tutung turu da ka
Dapot e ra pab’reng mas bumiasa ka pa
Kumuang length-wise a papil, number one to ten
Ibiye rang panyubuk, identifica-shen
Ding pangutang da ‘tiu la lalam page seven
Dapat magaling ka king memoriza-shen
VI.
Nung alang pa’isaul alang mandamusak
Nung alang magobra, mangan tamung burak
Nung alang lumaban, kalaban bumatak
King pamanipus king kekatamung labuad
Ngada ring tau, “Nung king leun at tigri
E ke bitasang tatakut, mataloti
Ba’t tumakut kami? E ke mangamuti
Uling ati la’ gulut ding kabalen miâ€
Oneng ali mu king sikan ning kaladua
Pusu ampong isip, ay, mitataid la
Tandanan mu, alang damdaman a siuala
Nung ika mu kabud ing mamagsalita
Ing taung mayap isip e ya susugud
Nung ya’ng diling lalaban at alang kuyug
Malaguang manasik nung dakal ma’nyabud
Kuldas karing tau, e ka’ king bakulud
VII.
Ala kang aliuang tuldu nung e salamin
Ba’t e ka kikimut? Saken me ing angin!
Agnan-agnan agyung lukdangan ing bangin
Misasanmetung pu ban resulta, atin
O nung akung dili, agyu ku mu naman
Oneng bakit ali mu ku rugu saupan
Nung dakal tamu alang sákit bitasan
Kekatang ‘pakit, kabalua’t katibayan
Nung pa’ngayan da ka, tutung ‘tin lang sála
Dios ku, Dios ku, bakit e mo pemanyipa?
Nung ing asu manget ya at mangaung pa
Ganakan: daya mu, ngara, king asu ya
Ala kang aliuang tuldu nung e salamin
Ba’t e ka kikimut? Saken me ing angin!
Agnan-agnan agyung lukdangan ing bangin
Misasanmetung pu ban resulta, atin
YARI
DIOSA
PART I - Nang ArtDax
Misan queng bie queti sulip magregalu ya ing Guinu
A metung a mutyang birhen a tictacan na qng lagu
Nung iquit ye canita palsintan yeng calupa cu
Cawangis ne ning Barbie Doll Diosa ing cacung pelagyu
Mapundat la reng mata na, culut ya buac, ginintuan
Ing cutis na malagatas pang modelu ya catawan
Abac, mag yelu canita nyang muna qng asulyapan
Casaque que quetang subway, quetang linyang pa Manhattan
Sasaque cu quing Richmond Hill , sasaque neman Liberty
Uling muna cu estasyon, macalucluc cung parati
Agyang ing tren kinatmu yang dacal taung mamiragli
Misalubung cami mata, agad mipagtiman cami
Uling makatikdo nya mu, quen yang arap cu mipunta
Sinabit ya quetang “strap”, ban nung mag “break” steady ya
Buri que man sanang ibie, ing cacung luklukan queya
Cailyan da cu mu deng tau, uling e custumbri ita
Tatalnan que ing Daily News, sangcan sangcan cung mamasa
Queng melisangan ne ing tren, binuclat ne ing zipper na
Ning macapal nang leather coat, panglaban ya qng marimla
Dapot inapag ne cacu, ing mabanglung kelagwan na
Pinyak co reng cacung mata, ala no reng taung dacal
Silapo ne ing animu, migliyag ne at migpasyal
Quetang alang taung pulu, paraiso yang tropical
In mung tau carin acu, ampon ing cacung Barbie Doll
Ing ugung na niting subway, ya ing angin qng isip cu
Balang tucnangang estasyun, alun ya caretang batu
Acaquit queng maca quera, qng aplaya maca puestu
Macatas ya aduang gamat, pepepe ya ausan nacu
Pilan na muring dumingu macanyan ing mararapat
Sasarian cu ing titikdo ban mitagkilan que gamat
Ing quecaming pamaniman, miuli murin qng kindat
Deng galo ding catawan mi, qng lugud ilang migtapat
Macanyan qng mipaglolo, qng subway que memyalungan
Anti cami mong sundalus, sasalikut mitagalan
O pota abijag nacu, pota abijag cu ne man
Ninu man ing mangibabo, ing pagsuku yang manyaman
Queng malaguang pamaniyabi, pareu caming gagalgal
Mitataid qng linub qng pasbul ning hotel a e mal
Atin caming bitbit champagne, linub caming mamirapal
Bubukal ya ing cuartu mi, cabang mag snow naman qng lual
DIOSA
PART II-Neng ArtDax
07/31/07
Cacatmuan no deng basu mi qng alak a quequeng bitbit
Balamu metung cung tigreng pacacale linapit
Sikmal que ing awacan na qng caul a sukdul tigik
Ing gulut na qng arap cu mipacat yang asna talik
Bilabal que ing caili cu qng makitid nang awacan
Qng palad na ning caili cu inapis apis que atyan
Inaplus que ing batal na qng palad ning cacung wanan
Beliquid que ing pisngi na ban canita que a uman
Ing uma cu e man uma, mi dampian ya mu labi
Tegalan no reng labi cu, neng cayang labing mamapi
Mitangaban ing api cu, qng tuksu nang atna pali
Melalam ya pangisnawa qng pagnasang sukdul tindi
Mipalukluk cu qng supa mamirapal tikyan na cu
Balu na ing gagawan na makarungut ya canacu
Linislis que ing palda na ginapang la reng gamat cu
Inatna no deng cayang puad ing buri na saupan nacu
Asna man carimla queng lual ing cuartu mi bubukal ya
Sasalimuyak ya banglu limbug cu qng alindug na
Cayang pulut a mayumu ibat pisngi na ning banua
Macamulang a palsinta, macapatlud a inawa
Pipiakpyak la reng mata na, bibiling biling ya buntuc
Susunga ya’t gugulisak, maka nganga queyang asbuc
Melasing cu queng lagu na, sisingap cu at sisguk
Miminum cung alak ning Dios, cabang mumukyat cu bunduc
Mas mabilis cung macaukyat, papanaya ya canacu
Agyang mang mamirapal cu, icua cung tinucnang pa mu
Inapis queng atmung lambis, ba yang e ma agrabyadu
Mitatalanan que gamat angga quing babo ning yatu
Quetang taluktuk ning bunduk, agnan queng miras, melaus
Disnan mi ing caulian mi, ing ligaya mi minagus
Ing daya careng uyat mi cacalucu lalaguslus
Cayari na ning carasnan, agnan queng migpatagusgus
DIOSA
PART III-Neng Art Dax
Sasabunan que catawan quetang shower asna pali
Uling atne panga relax malagua yang mecasabi
Queng lagu na catawan modelu ya pin pala ini
Atlu yang bulan magsane quetang Ford Model Agency
Mag adua neng pulu’t adua, tau ya North Carolina
Migraduate ya quing UNC quetang milabas a banua
Nung ing pamag modelo yang talagang capalaran na
Maglakbe ya queng marayu, London , Paris , Zurich , Roma
Sinacab ya qng siping cu, catumung lugud ing lawe na
Uling ginintuan ya buac, e alata ing balbun ya
Queng mataram cung paglawe, deng brasu na ampon puad na
Tibuan lang bulbul pusang maka wili at makayama
Inapis apis que tundun queng canacung palad caili
Ginulisan que galudgud caring adua cung taliri
Pangaras cu bandang lalam mengilabut yapin ini
Decapan ne ing gamat cu minatna yang mamiragli
Telanan ne ing gamat cu inapis ne queng pisngi na
Pepyalung ne ing cayang batal ampon deng balugbug na
Balang metung cung taliri sinubu no queng asbuc na
Beba ne ing palad cu at linapat ne qng salu na
Tatalnan ne ing caili cu ning cayang caili mu naman
Cabang ing wanan nang gamat mamapis ya nucarin man
Beba ne pa ing gamat cu uling buri nacung turuan
Queng arti ning palsintang ligayang buri nang acamtan
Minaus caming room service uling meranup na cami
Pepasali que pang champagne, whipped cream ampon strawberry
Uling lupa yang munica, pangigilan que pin ini
Atme cayagang casabi, steak mu ing inorder mi
Tinas que ing cacung champagne, ing toast cu "here’s looking at you"
Ing ablas na naman, "here’s looking at you kid", ngana cacu
Mipakaili cami “ Casablanca ” ngaming mengamanu
Ya ing lumang peliculang, pareju ming paburitu
Istorya neng Rick at Ilsa, y Bogey ampon y Bergman
Mipaglolo la quing Paris , at miwale lang tuluyan
"Salamat Dios co cang Diosa, aisip mu cung regaluan
Patawad Dios co cang Diosa, ya ing cancacung sasamban"
Detang steaks a inorder mi malagua mi lang pengan
Queng kislap da reng mata na, migbalik ing pakiramdam
Tinikdo ya qng arap cu belag ne’ng robe a imalan
Inabit ne ing gamat cu, at ngana “play it again Sam”
DIOSA – PART IV FINAL CHAPTER
Neng ArtDax
08/13/07
Queng canacung candungan sinampa yang mamalagua
Tiniltil ne ing strawberry qng whipped cream a maka anda
Sinubu ne qng asbuc cu ing asbuc na linapit ya
Qng yumu da deng strawberry y Diosa mas mayumu ya
Pemanuma nacu pisngi, pemanuma nacu batal
Tuqui tuquing capasnawan qng catawan na mimiral
Ing pag suyu na canacu, mabilis man o mabagal
Qng lugud na qng pagnasa, balamu e mapapagal
Ngeni maniwala nacu qng abasa cu qng libru
Atin pin palang babaing e painawa qng pag suyu
Metung ya caren y Diosa, alang angga ing cusuelu
Tatanggap ya at bibie ya, alang patna e sumuku
Ngeni maniwala nacu, qng abasa cu mu naman
Atin mu namang babaing, mamagus qng capaldanan
Nung ninu mang macabasang balu ne’ng buri cung sabian
Bindisyunan na ca ning Dios qng balu mung cayamanan
.
Nyang minie yang lagu ing Dios queya minta ing queraclan
Nyang bildug na ing ligaya, ning mapaling pangatauan
Queya mibie ing regalung, capagnasang macalaman
Regalu mu naman cacu’ng, adiscubri que catawan
Ing capalaran pin naman alang taung maka piju
Peburen qng sinulapo atiu ne qng palad cu
Ing peca mapaling aldo, ning cacung bie queti yatu
Acayabe que y Diosa queng libutad ning Eneru
Mecad labing atlung oras, a marimla at mag yelu
Mupin labing atlung oras, macatatak na qng bie cu
Nyapin madalas neng benging, qng cama macaquera cu
Dacal mang pigaganacan, y Diosa ing queng isip cu
Ating benging deng mata cu, o’t balamu atin lang lua
Canita cu bisang tikdo ban cung tipang mamalagua
Ban lawen cu quetang baul, detang rosas a melanta
Sagisag la qng lugud cu, qng palsintang mesalanta
Pepadala no deng rosas, anyang memun yang dumayu
E no man metung a dusena nun e labi lang atlu
Sagisag la careng oras, piyabayan ming mabanglu
Atin yang cayabe sulat canacu ya maca lagyu
“Dear ArtieBear…” ngana cacu, “oren queca la reng rosas
Misanga la reng dalan ta qng mali pa namang oras
Belwan cung qng quecang lugud, migculang ing cacung ablas
Murin sumulung ing bie mu, magtagumpe ca ‘gang bucas
Artie Bear mamun nacu, e mu cu sana cacalinguan
Ing pepatacman mung ligaya cabang bie cung atandanan
Dapot calupa ning sineng pareu tang apalsintan
Nung carela ya ing Paris , we will always have Manhattan ”
END
ART TOLEN
by RDM
Ing pangaromanticu mu, mayayaquit, mamulaclac
caring amanu mung sisuan ing banglu ra salimuyac
alang diosa a pijican gumulut mo o maglibac
qng quecang arapan mismu sagana lang mangapalpac. .!
Ing asajan cu pa canian anting ayup maglipacpac
caring tutuqung ecsena dusa't lumbe macayaplac
caring adwang micalugud qng ligaya miralacdac
sarili da makababad qng aping micacalabcab. .! RDM
"ART TOLEN"
RDM
A....rt kuswelu kung mekabasa, istoria ning kekang
Diosa
kening isip mamialungan adwang pusung maligaya
magduyan la ketang biga anti la mong pagtumayla
makababad karing rosas ketang ardin na ning
tula...
R....etang adwang mikalugud king busal ning kapalsitan
ninung e magnasang ume maglakbe at salugsugan
king diwa ning poesia mu anti mu keng paramdaman
manenaya ke pang suglung karing kekang
kawatasan...
T....abakit ninung e sabit ding terminu mung ginamit
simpli lang aintindian ku king panamdam
manyaliksik
keta pamu king umpisa pagnasan ku neng aplit
pakirasan ing linamnam e ku pasayang penandit...
T....abalu yaku, eku biasang sumulat romantiku
anti ing karanasan mu, kang Diosang peka-malagu
angya' ping eka poeta, dramaturgu, tagakwentu
makasasulat na ka kabud, maging tutu ing
milagru..
O....kaya atyu pa murin king diwa mung lipo-lipo
itang bie mung milabasan ing ligaya yang maglapo
pauli na ning kwentu mu king poesia ne man linto
mibayit ya ing poetang Kapampangan magpatilo...
L....umipas man ing panaun king tangke ning balang
petsa
e ne makalingwan aske itang Diosa king legua' na
ninu man ing mekabasa king kalamna' ning poesia
manenaya la pang sunud keta namang kadwang
Diosa...
E....wari mo keng umpisa nanu ya man ing mibubu
masikap lang manenaya ding malda manigapu
karing tutuking poesia, maka-awig a senaryu
mangalambing a sonata karing magdeliriung
pusu...
N....anu makasadya ta nang makabante ketang awang..?
sumiro no retang bersung panigobra' nong Art
naman
e la makasawang basan detang kayang kawatasan
at lalu yang madidilig ing amanu tamung
sisuan..! RDM
On the upper left hand corner, you'll find links to more
Kapampangan poems. - Ernie C. Turla, president, Academia
ning Amanung Sisuan (ANASI)
|