 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY, page 60 |
 |
| compiled by Ernie C. Turla, pres., ANASI |
| ||||||
| Table of Contents: 1. Sagip Tang Malulumud - Ray R. Tanjoco 2. RAY TANJOCO - Paing 3. Caulan Daca, Uman Daca, Samban Daca - ArtDax 4. Gumamela - Renato B. Alzadon 5. Ing Anak A Tagak - Jason Paul Laxamana 6. Manuklwan - Jason Paul Laxamana 7. Poesia, Nanan Me? - Renato B. Alzadon 8. Bini - Paing 9. Malituang A Pamisip - Rafael D. Maniago 10.No title - Ariel Malig 11.Subucan Ta Pu - RDM 12.Walu-walu - RDM 13.Pang Anam-anam a "Ac" - RDM 14. Amung Ed - RDM 15. Bibinca Nang Ana - Ariel Malig 16. Ispongang Penisis Kalan - Jason Paul Laxamana to be continued SAGIP TANG MALULUMUD Neng: Ray R. Tanjoco Eme daramdaman itang gugulisac? Ibat ya qng matas karin de tinulac. Payus ne boses buri nang ipasuala Malambat neng babad suba ne inaua. Macalibis ya babo nitang talangpas Quetang cabilian na e mignasang culdas Lislus de qng ilug, agpang qng talastas Ninu qng Gobiernu ing ausan tang Judas? Mabilis a agus dela ne mauli. Qng Manila de Bay carin ne tutuqui. Milunsad cang bangca lagua teng tagalan, Bayu ya lumaut...o qng aun tane dasan. Ining malulumud dapat yang sagipan, Pirapal miligtas munang paquicuanan. Eyu ne sana malambat pang liliban Mas importante ing agad yang saupan. Manintun ca aguiang metung yang calait Itang menabu oita pang mangulauit Lunto lumbog ya lumpaui ne sicanan Malapit neng miras quetang casesepuan. Tucnang na ca sanang magmaclac-maclacan E ustu mu rin ing magbulag-bulagan Pate-pate, malumeme, tiayaman-tiayaman Ing tala-talilis quecang patugutan. Itang manyaguip lundag ta qng danuman E tana pagnasan maglaco imalan Bawat segundong lilipas at dadalan Miparayu ya, e mune abatiauan. Ing dusang tinggap na, cayang pagdalitan Obat macanian ing queya miriquilan? Pigturaidulan de ena man pagnasan Ing Amanung Sisuan `la yang capayapan. Gawa ta nang accion, atin tang upaya Sicnangan ing lub, at sibugan ing puersa E maco pagasa, dapot mamaligua! Lalu na nung lusuc ing quecatang tangca Potang miras tamu agad ta yang gulyutan Yabut me quecang gamat baneng atalan Isaca te at palangian ing mal tang Sisuan Eta ne paburen banten ya't lingapan! " RAY TANJOCO " neng Paing R...ay keng galing mung sumulat king amanung Kapampangan ika pala ing poetang malwat mi nang panenayan mekaramdam king kalbit mu karing kwerdas ning panamdam magduyan ke ketang biga karing kekang kawatasan. A...lang nanumang sumbagal sige keka lang ibalabag poesia mung managinis karing alang magmasabal ing amanung malulumud ipakit me at iladlad karing magmamatudtudran king balang suluk ning labuad. Y...amang a-umpisan mu ne ing amun mung managalan ing amanung singap-singap ibugnus me king kealan patukyanan meng daya ninuman ing keang dagpan ing balas ning kekang pana pasimbalang alang turan. T...abakit ninu mo retang manaliping manyalambo ding kasi-kasiping balen, miyayaliwang amano buri deng saluputan, panyipitan deng masaklo amanung kekatang beitan kapilan man yang itikdo. A...nggang atin pang panaun ding bersu mung mangulisak mangising la at mangalbit karing malakak matulsak sige buren mong milablab king pali ning kekang akdak nung ninu mang mangalingwan paganaka kekang tasak. N...eng datang na ing panaun ding silbag mung bining aren ding bersu mung peka-punla dilig kami ampong banten gambul kami ketang gabun inasik mung kekang bislen asajan mung atiu kami pangakung e mipaburen. J...udas ya man ing salake at dakurak king amanu amanung kekatang beitan king pusu mikakaluku masilab yang mangaduluk magdusa ya king impierno Ing tagumpe yang sumiklab king ardin na ning paraiso O...ba't pitakutan tamu keng pilan no reng gugusal lungad-lungad malulumud ing amanung kekatang mal e mo wari alang tuknang ing kekatang pakipagkal ing labanan salakuyan ala yang lugal ing pagal. C...abang ating mamoesia, mamulosa't mamikudta ene mate ing amanung Kapampangan a salita samantalanan ta ngeni king mamialungan tang diwa king miyayaliwang porma kapilan man ene matda. O...ren na reng kekang anak lalawigang Kapampangan luid la king kekang parasan a metung mung paninapan ing amanu manatili angga man king katatawlian ing lugud tang alang kabas lugud king amanung sisuan. CAULAN DACA, UMAN DACA, SAMBAN DACA Neng ArtDax 07/12/07 Quening libutad ning mamaping cabengyan Migpaldas ne'ng aldo ibat na'ng mengabyayan Queng masayang bague quecatang gagawan Mipanpanan na la deng pigaganacan Limbug ne ing aldo milaco ne sala Magumpisa ta nang magquera qng biga Deng angeles ta mag daque lang musica CAULAN DACA, UMAN DACA, SAMBAN DACA Quening lalam ning maragul a tanaman Bildug que'ng buntuk cu qng quecang candungan E agus ning ilug quec'tang daramdaman Nun e agus ning daya ning capalsintan Quening Octubring benging ala nang sala Alducan cu ing nectar qng quecang copa Paslan daca gamat mipaglalawe cata CAULAN DACA, UMAN DACA, SAMBAN DACA Cabang deng batwin qng babo alben tala Sinup que qng memoria ing quecang canta Canta yang bucu ning dalise pagsinta Palsintang ala nang dungis alang mancha dudurut ya man ing yatu quelingwan ta na Ing eganang sabla nun e ing gagawan ta Ing queng pusu cu paintungul ngan queca CAULAN DACA, UMAN DACA, SAMBAN DACA GUMAMELA Neng Renato B. Alzadon 2007 Baltimore I. Malare nang punlas----- malare antimo yang pisngi ning banua neng ta'ne magpaitas yang aldo sisiro dane ning Alaya----- qng tagle nang timias pelalung ding batis apapagcantan na cagum da ding coplas ding maniale ayup babo ra ding sanga; ding paga-pagaspas mariposang sugui magnasa lang dumpa ban sangap qng licas a saguiwang samyu------samyu ning sampaga; qng tagle nang bicas macanian lang anting susucu.----- sasamba ding lira ding watas a magpa-alipan qng tagle leguan na....! II. Menuling nang punlas.... wari sa queng danum, danum neng melabug pablasang tinacas ing cabayangnan nang gaglas qng panirug; ding paga-pagaspas budning mariposa, cabud na la limbug, pati na tecladas ding magcantang batis mipda na lindayug; ding maniale denas tajimic no ngeni----- calupa ding bantug a macudtang watas, qng parang ning rima, e na bisang talbug----- uling itang timias na ning Gumamela quinupas.... ..tinabug calupa ning cupas a sinag ning aldo malapit nang lumbug...... .! ING ANAK A TAGAK by Jason Paul Laxamana Ating anak a tagak, maputi ya pu bulbul Matunud ya't mapamintu karing pengari na Ibpa at indu na makanita mu rin kulul Anti lang burarul potang susulagpo banua Uling kádimla king Tsina, mine la Candaba Agum ding aliuang ayup a danupan mu rin Disnan de ing marangle't inatu ring damulag At agad lang mengan simbilis nang Kuran Kurin* Uling kanita ya pa minunang mekatuklu King asikan ning Candaba ing anak a tagak Yang dili sinulagpo, nu ya pu memanyulud King tula na king lugal, gagatal yang ságakgak Mine ya ing tagak banda ketang ilug kaibat At disnan no ring tuyu, bangus, ampo pang itu Akaistorya no ring asan, oras a maluat At bayu ya meko, sebianan de pung malugud "O anak a tagak, ali ka sana mángari Karing mame keti, `neng mababating keluatan Iti ing sangkan ba't pikasnukan ing kanduli Mangan mu keti at muli karayatmalatan" Bekalan ning tagak itang sinabi ring asan At semalan muli bayu sumuklub ing bengi Kabalik na karing pengari, agad nong kitnan "Ibpa at indu, angga tamu kapilan keti?" "O anak ming tagak pale, pakakabsi mu na Ipainaua ring pakpak, tipunan ing sikanan E marakal ing kakanan keti angga-angga Dálipat tamu pang pulu pota nang kauran" Ngana pung mekibat nitang tagak a malati "Ali kayu pa pu sasauang palikas-likas? Nung nu karin ing biye masaplala ya't masanting Karin ta papakuyud; ba't ali ta malasbas**?" "Magdatun ta na keti, sesen te ing marangle Kingsa king mányayang ta'ng oras king alapaap Kekatang pagaralan ing pamangauang bale Malagu at matibe, e patuag king abagat Sesen ta ya ining labuad, pati na ring dutung Misuklian ta pung lugud, kekayu sang abalu Kaibat na ka ta'ng pekanan ning mapamiyeng gabun Batingan ta ne mu uari? Ablas, atin tamu" Uling anak ya pang tagak, ali de pensinan Dening makatuang ayup a manikab king kabsi "Ay, pabustean yu ne, ali na pa ayintindian Anak ya pang tagak, magagtu*** pa pamiyisip" Ala yang akarapat ing tagak a malati `Nia selikut na na mu kilub ing kayang diua Ding kayabe nang ayup, kaugaling kanduli E la mákiramdam king paralan a aliua Ating anak a tagak, maputi ya pu bulbul Matunud ya't mapamintu karing pengari na Ibpa at indu na makanita mu rin kulul Anti lang burarul potang susulagpo banua *KURAN KURIN - Kapampangan mythical character; fastest runner **MALASBAS - rootword BALASBAS; to take another path ***MAGAGTU - adj. half-cooked, half-baked MÁNUKLUAN neng JASON PAUL LAXAMANA Oyta i Ginang Nacionalista Ngana king ulaga ning salita "Ang `di ma-al ang sariling wika Masa-ol pa sa malansang isda" Ita kanu'ng amanu nang Pepe Inia mag-Filipinu king bale Sibuknan, oneng dipan-ning-alti! E pa rin asalikut ing gege Misan a aldo merakap kami Rugu ning kasiping kung kaklasi Kákanta keng `Atin Ku Pung Singsing' `Nia balugbug mi tinakam pitik Di Bokbok at Ketuy naman gulut Pepamayaran dong limang pesus `Tse e la kanu mig-Filipinu Ing magdusa ing karelang gradu "Painuman na," ngaku king kakasi "Mauo ku't dila ku asne langi" Kabirabira itang mestra mi Ing patilya ku kayang penabit Uling pane kung mángapampangan "Sa labas ka ng silid-aralan! " Ala ku kanung lugal king "bayan" Metung ku mu yatang mánukluan Kapilan na ku kaya paluban? Poesia, Nanan me...? Neng Renato B. Alzadon Poesia, nanan me...? King labuad ning inge, masdan mo ding taung misalasalibe. Eno mipaglawe king bilis dang mame king paki-aryan dang matimbang a bague--- ala lang panaun ban makiramdam pa king pagale-gale. ..! Poesia, na'n me yan...? Ngening kapanaunan "text" ing makausu, "cell phone" ing kailangan. Karas keng sulatan, mipag-E-mail naman. Ing sabla balamu makisaglulu ngan--- inya king poesia, a parima-rima, ninung bisa kanyan...? Dapot..., kapamu na. Wapin. Wapin pala...! Kasumangid na ning panyulung ding bansa atin pang magdusa kikiak lang kaladua sikwil ning lipunan king kakaluluan da--- maplas dang saingsing ninung mangidalit nung alang poesia...? King balen ta mismu laganap ing gulu mipapatayan la ding kapatad tamu. Ing pamanabusu tinuki king usu at mitabili la ding aral ning Guinu--- nung alang poesia ninung mamikudtang yan e maka ustu. Ing sumpa ning lugud sinulad n'yang matbud a king dit a bague agad mapapatlud. Inya kabud-abud namu mapupupud ing pami-usig ding sadyang mikalugud--- nung alang poesia nukarin misulat king yan e makatud...! Inya sa, mekeni O' Makudtang Sugui mamikudta katang poesiang matindi. Ding guintung lawiwi ilang panawili ding ulilang pusung tinkus ning palsimi--- Uling ing poesia, tutu yang kailangan king balen ta ngeni...! "BINI" neng Paing king rimang....ac Detang yata na ning aldo cabuklat ning mayling abac ilang bining memutawi para king bucung bulaclac macanian la ding katayang maningning ampong busilac malagu pangasalansan, pangatungi, panga-acbac ing pamaniulat poesia bucnul ya waring melubac at ing caisipan tamu e masyadung mipasabac mipasno tamu ngan damput caring amanung mesalac inia capmuan la ding salu qng tula at qng sagacgac Kasangguni ding Watas... king rimang "ac" "MALITUANG A PAMISIP" neng Paing Cabang queta susulapo la ring ayup maglipacpac tuqui cung maquiagum cambe cung papalacpac anti mu rin, itang agus caring batis mamusilac macanian cung mamayagpag, macasulat kung catambac..! At cacung samantalanan ing penandit a masaspac cabang ding amanung sisuan a cipmuan lang mamulaclac ding Casangguni ring Watas mibuclat la at misapwac qng panaun a cailangan ning balen tang misasaldac.. ! Quening diwang maung-mau malangi at mangabtac sagana cung maniad uran qng lulam ning banwang pilac ban ing cati kung catawan miuranan libung patac sariwa la deng amanu quening salu ku lagapac..! E cu man malit-malitan ing paniulat yang tutulac deting amanu ring watas mengapili, mengasanac pusu ya mang maqui sugat, micalamat at misaldac mayaplac yang anting aslag na ning aldo mamusilac..! O mika-racal lang bina deting rimang limpac-limpac e man wari maging sangcan agyang bucnul yang malubac nune lalu yang titigic mangatarantang e palac ing sumulat cawatasan ning diwang miralacdac.. ! Nanu man ing salibusab ning malintuang cung pamalac libutad na ning dalumdum qng quealan mica sindac metagquil cung mamayagpag, ding amanu gugulisac migising cu qng catutuan ing diwa cung macatunggac. .! Salamat ngening penandit a pisugu tang' lipacpac ding amanung ugne-ugne misanmetung lang misalpwac cataya ra balang sepu pangatungi ra qng acbac rima-rima lang milapat, tula, saya ing capislac..! RDM NO TITLE Ariel Malig Tiupan i ye pa , sige bayang milablab Ing panandam Capampangan bayang siclab Pepen yu neng pepen bayang micalabcab Ing api ning Amanu bayang sumlag Tiupan i ye pa , sige bayang mitau Ing pali ning Amanu Ba reng panandaman ding tau E ta ya paburen mamatda Ing inumpisan da reng aliwa Mugse na cong mugse tangab Poesia, istoria, ampong miyaliwa Ing giripu cu mayna poesiang lual bagya-bagya pota siguro pinutut de ing tubo ning giripu pig-tiupan de. "SUBUCAN TA' PU" RDM O't e ta subucan magrima tamung "ac" anam-anam bilang, salita manacbac agyang apat mu sa'ng linyang mengasalak ibat kareng linwal catayang catambac..! "WALU-WALU" RDM Atin naman walu-walu ing maging bilang na qng "ac" labi yang anam silaba ing balang linyang lipacpac anti tamu mung mamadwas, simut-simutan la ring tugac careting pitipun-tipun 'tang salitang mabusilak..! "PANG ANAM-ANAM A "AC" RDM Ing pang anam a "ac" mas mayan ya baksak "e masyadung ditac..?" poesya yang pandac..! Balamu bitin cu, keng anam a bagsac... isundu cu nia mu labing adwang tasak... ing rima na mismu king tawli nang saldak... yang maging mapinu king pangasalalac. .! RDM "AMUNG ED" RDM Ing pusu mung mala-guintu ing aslag na mamusilak manialicsic at miraras caring balang sising sisiac ding Capampangan ngeni masican dang gugulisac "I Amung Ed Luid ya Ngeni..!" ing agnan-agnan dang culiac..! Bibingca nang Ana by Ariel Malig Lawan lawan que lupa Malagu ya ampong maquinis ya cabang maglutu ya bibingca tatamban na sala ning candila na teterac queng lupa na lulto ya lagu anggiang bengi na Oyni pu nga na Mapali ya pa Canyaman na ning Bibingca nang Ana ISPONGANG PENISIS KALAN neng Jason Paul Laxamana Ay, papainuman na lang tabletas a mapait Deta kanu ring kayang iinuman a pilit ‘Nia ala nang ta’ram pa king kayang pamiisip Malagua mong asaul ding kutang a masa’kit Sukat lang memanilak ding kayang pepainuman Lalasa la kanung ispongang penisis kalan Detang tabletas nang pampasaplala kabaluan Suklati’t kendi na’ kanu ing karelang kanan Aruy, mi’kamas ya ing lakan ning pangabiasa At penaus no retang tau: diablus at puta Ya na mu pin kanu ing ma’mie saup karela Nung e ro buring inuman, mabating na ya Kabang lalakad, mitaluras ya king burak At menabu king kulkul; ali ya pu miukyat Bang ating saklolu pekasikan ing gulisak Salamat, ating linapit a maganakang siak Mamagdala yang lubid itang siak a dinatang Sapak yang suksuk; alang ninu mang makatalan Saingsing na ning menabu: “Aku, kekang saupan! Kumua ka sanang taling ali na ku sugatan†‘Kayi nganang mekibat nitang siak king saingsing “Makantini’ng geua mu karetang tau nandin Buri mong itas balu oneng kelinguan mu pin Ali me apakan ing laman babi king kambing†|
 Sign Guestbook |
 View Guestbook |
 ernieturla@yahoo.com |
|
. |
| Visitors: 00065 |