 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| Library of Kapampangan Poetry, page 59 |
 |
| by Ernie C. Turla, curator |
| ||||||
| TABLE OF CONTENTS: 1. Dacal A Salamat - Art Dax 2. Ing Amanung Sisuan - Renato B. Alzadon 3. Ligligan Pangadi - Jason Paul Laxamana 4. Bacasyun - Renato B. Alzadon 5. Ing Gising Pantalun - RBA 6. Baryo San Jose - Aleta Tolentino 7. Ninung Tumangis Para Cacu? - ArtDax 8. Sinalicut Cata - ArtDax 9. Ing Karatista - ArtDax 10.Ing Karatista II - Rafael Maniago 11.Para Keng Kalusugan at Pamikakatawan - Ariel Malig DACAL A SALAMAT Neng Art Dax Carangalan Cong Ernie ing aquilala da cayu Inabut que ing gamat cu gelamanuan mu cu E mu cu man caquilala binuklat me ing pasbul mu Bistat e mu balu nung mayap or marok cung tau Y Aching Angie e ya pepatugut miglutu Dacal cayu inanda longanisa at tocinu Bistec, danggit, sinigang at talangkang buru Qng anda yu balamu meg pamiesta San Fernandu Diyos co o’t pecaracal yu ing inandang canan Atin pang sabo at manyaman a paksing asan E pa yari, inyang gatpanapun mig buffet tanaman Aquit yo caring letratu mengaragul cami atyan Ing e mi na agisan pepabacal yung agad Nyapin pilang aldo e cami mecapag MacDonald Canyaman ing linutu yo e na man misadsad Adua mung aldo qng biyai mi megisan nang sagad Salamat a dacal quecayung aduang Atching Angie Sana maca dalo cayu queni quecami New Jersey Atutuglapan la neng misan qng agus ning bie Deng calupa yung Aching Angie a calugurang tune Ing Amanung Sisuan Neng Renato B. Alzadon Baltimore-2007 Ing amanung sisuan, ya itang tumaila ning metung a indu cabang pasusuan ne ing bungsu nang anac qng daya nang salu; ing tumailang ita a minlungan lambis, lugud , ampon camu yang antimong bining mipunla, meragul, qng saguiwang pusu; nuan la ding penganac a midalitanan dilang catutubu atin lang matibe sandigan qng bie ra, nu la man painturu. Ing amanung sisuan, ya itang aral na ning metung a ibpa cabang tatalnan ne qng metung nang gamat ing lande paluca; ing aral a ita, yang maguing tuntunan ning sapni nang mutya bayang mipanginlag qng cabiguan ning bie, at maroc a gawa; nuan la ding penganac a mituruanan qng sariling salita ila ding migmana qng lijim ning beluan, aral a daquila. Ing amanung sisuan, ya itang dalung na ning malsintang tapat cabang ing mutya na sangcan nang e pansin ing cayang pagtapat; ing dalung a ita, dalung yang manayun pamilapat-lapat, qng panga-apse na, mula anggang sepu, ganap ya at sapat; Nuan ca cayanacan, atin cang amanung agamit magtapat amanu yang sisuan a sacdal qng leguan , at sacdal qng sampat. Ing amanung sisuan, ya itang aru na ning casuyung irug cabang ing sinta na, maquilua ya mata, aplit nang tatabug; ing arung malambis, ya ing magpalino qng bague melabug qng bayang masaguip ing pamipalsintang mamit-amit lumbug; nuan ca Capampangan atin cang salitang maslag pa queng bubug a quecang agamit antimong birtud na ning quecang panirug. Ing amanung sisuan, ya itang poesiang gayuma qng lambis cabang gagale ne ning suguing macudtang pangawilian bosis; ing poesiang ita, yang wagang patutu qng e ya maumis ing sucad at rima, a pamanang adle na ning pamigulis; nuan ca Capampangan, atin cang poesiang meapsi qng wangis ning pulsu ning tau, a ustu qng sucad, at ustu qng sunis. Ing amanung sisuan, ya itang gulisac qng busal ning pisac cabang ing labanan mapaling mamapi at casindac-sindac; ing gulisac aita, masias yang terminung leucanan salpac mipariquil ya mu caring manalipan a dayung manyindac; nuan ca capampangan atin cang salitang mataram a acdac a quecang agamit caring mapanyupil a magnasang dalpac. Ing amanung sisuan, ya itang sambitan ning managulele cabang ketang aun ing matibe lubid yugus deng malale; ing sambitan aita, lugud yang dala ning caladuang miwale dane na pa carin nitang alan'anggan nung nu ya maglacbe; nuan ca Capampangan atin cang amanu qng saglit ning lumbe a quecang agamit ban ing quecang lugud miuman meng ayapse. Ing amanung sisuan, ya itang siwalang minunang dimdam na nitang bayung bait, a alus e paman mibuclat a mata; Ing amanuang sisuan ya ing capamunan ning ume magpiac na cabang sisitsit na ing banal nang lugud caretang lacuan na; nung pitutuliran, yang amanuang sisuan, ing cabaldugan na, qng bie na ning tau, mula ya at sepu---alpa ya't omega. LIGLIGAN PANGADI neng Jason Paul Laxamana Pangadi nang Darang Flor Linukluk ya bungad nang Birhen Maria Kandilang pudpud at dilo sinindi na King lual bale kildap kildap, malulam pa Metung sintunadung magkanta, muran na Mengurus ya't sinitsit, "Bapu Maria" Nasang e bubugnus uling kebaitan na Datang la pin ding anggang kaluguran na Sidya na na ing pititian at atsara Lintik dinugpa bubung kabirabira Inia sikmal neng lalu ing rosaryu na Sikan pang bagya pota ala nang munta Sayang ing litsun manuk at ligang baka Pangadi nang Kang Abram Kulait na, "Ibpa mi a atiu banua" Kabang lalablab ing api king bale na Pakasinup kilub ing anggang tipun na Ibat king pisasali nang kulubasa Galgal galgal ya katauan at kaladua Lulam king babo magkulangan pang dusa Para mulus danum king Meto Pampanga Inia digdagan siklod ing pangadi na Agum ning duldul ing lintik megumpisa Sikan pa sa bang misalba ing bale na Penaus no ring anggang santu at santa Ustung ala neng tuknangan kalulu ya Pangadi nang Kristin Biklat ne ing libru ibat king iskuela King katlung bulung ating pangadi keta Genakan ne ing pangaral ning Apu na "Potang ating panganib, nang, mangadi ka" Gagatong telabangka ring tsinelas na Ketang lual nung nu ing albug kakatas na Ali la pa mumuli ring pengari na Pota kabalik da dayat ne ing sala Pesibayuan ne rugu ing pangadi na At sinampa ya king babo ning lamesa Ustung uran binugnus malumud na la Ring tingkang kagamitan ning pengari na Pangadi ning manasik Kinaul neng matalik itang Biblia At pekisabian king diua ing Ginu na Balang duldul anting siuala ning banua Kalam ning Dios ding patak a titipa Iniang kaleldo melangi ing gabun na Mepanat ing pale't mekaina ing pera Ing Apung Ginu makiramdam ya sana Nung kauran na pin tutung tumula ya Mekainge ing pitik uran king bubung da Sebianan no ngan ding anggang anak na "Ume ko keni at mangadi tamu pa Dayuput sa ing melanging asikan ta" Bacasyun Neng Renato B. Alzadon Baltimore, Md USA-- Summer Time 2007 Summer Time na naman..... miras ing panaun na ning pamaglayag, at pamaglimayun; samantalanan ye ing pamicatagun. .... Mica atin co sang masayang bacasyun. Atmu na caniaman ing Bacasyunista mamasyal ca queni, mamasyal ca queta, e la sa sasawa ding quecayung mata qng leguan ning yatu...... aguiang nu co munta. Calagu ning yato...!Atmu ne calagu qng panimanman da ding magbacasyun mu, at pablasa caseng balu re ing tutu ing pamagbacasyun .....pansamantala mu. Ing bie queting yatu macanian ya uri mengari tamu mung magbacasyun wari; e tamu alisian..... datang ing saguli qng ibatan tamu carin ta ngan muli. Cabang queti tamu magbacasyun sana ing leguan na ning bie apagmasdan ta ya, uling ing mitacdang oras nung datang na casayangnan ning bie lubas qng ligaya. Ba't sayangan ta ya ing macuyad tang bie qng pamipagcamua ampon pamipate...? Ing pamangandiria sucat neng milele qng ban yang matangal mayubung pamiugne.... ! Cabang e mamaco ing pamangandiria e ya naman maco ing pamipagcamua; inia macanian yang anting masisira ing bacasyun tamu babo ning masala. Ya sanang magbabo caring pusu tamu ing lugud a tune qng caparang tau ban nung muli ta man .....ing asabi tamu atin tang masayang bacasyun qng yatu...! Ing Gising Pantalun Neng RBA Biclat cu ne naman itang lumang cajun nung nula metipun ding iyas ning napun.... qng pamanintun cu qng lumang sinturun.... . Oitang macalulun babo ning melaun.... calupa ning pusu.....ing gising pantalun. Itang maung aita.....qng uli ning saquit ning pangapirait a anting manatsit.... . qng pamagtacsil na ning mutyang pepaiguit... .. e cu na acumpit itang paguinaquit inia itang tud na lislas que qng lait...! Casumangid na ning dusang milalalu gamat yang menaru qng calmang mebigu cacaluguran yang malugud at mamu....... manajing malagu, queni qng marayu ali que quelinguan ing pusu mung guintu. Nura ca dulapan malagung manaji....? Ban ilang misulsi qng pusu cung gisi ding e calinguan cung sutla mung taliri... qng banang mapawi quirut nang matindi ning e na quinayap a pusu cung sawi.....? Balacu mo sana qng cacung pandayu malumpawing tutu dusang milalalu, Dapot ngeni cu pa lubusan atantu manajing malagu malugud at mamu icang macasulsi qng gisi cung pusu....! Baryo San Jose by Aleta Tolentino Carin qng Pampanga Malapit qng tete, Ating metung a baryo, baryo San Jose. Ylog yang malalam, Gulot da reng bale Carin po qng baryo me, baryo San Jose. Nung bisa cong munta, Saque cong calesa, Yng quecong bayaran, mayan mo qng bulsa. Reni po deng tao, Carin macapirme, Qng quecami pong baryo, baryo San Jose. Y Tang Nanaung pulis, Mabilis yang mulandit, Dapot metung mang manaco "la ya pang yquit. Ymang Isang naman, Yng cayang cayabe, Carin lapa maraton qng baryo San Jose. Yning Imang Isang, Antiya mong radyo, Nanumang sabyan yu brodcast na qng baryo. Caibat na ning pagtuan Ating quiquiriling, Balu mo canitang daratang ney Docling. Tinda nang sorbetes, Talagang manyaman, Mingat ca mo abe, adua ya sisingilan. Y Tembong mayabang, Penumboc neng coya, Anya acalinguan na pati yng lagyu na. Oyning Atsing Tess, Manang ne ning pisamban Obat 5-6 naman yng cayang panaquitan? Coya ney Tanding, A mayguit nang corenta, Pero lupang grade wan pa yng queyang asta. Araay! Quindut nacu, Ning canacung mestra, Mecaulata yang magdaydreaming cu pala. Patawaran yu cu po, Ecuna balu yng tune, Mecad guewa quiamu, yng baryo San Jose! NINUNG TUMANGIS PARA CACU Neng Art Dax Nung sang semasan que ing bie cu at e cu migpabaya Meguing doctor cu mo sana o artistang magpasaya Nung pegaralan cu ing leye abogadu cu sana Nung linub cu seminaryu migpari cu sana Roma E na mibalik ing abac gatpanapun na qng bie cu Sinulapo no qng pugad deng meragul a anak cu Malungcut man ala cung apamana agyang caninu Cayamanan mang maulaga pilak man o guintu Nung bucas tumangis cayu neng agaganaca yu cu Queng pamamanintun quetang pegsaluan tamung yumu Basan yo deng sulat cu alben yo deng cacung letratu Catibayan la ren qng ligayang pegcalub ning Guinu Basan yu la deng cacung poesya qng amanung indam A ngeni milicas na la ngan qng amanu cung sisuan Ila ren deng bacas a queti yatu cacung alacuan Mas maulaga la qng pilak, guintu o cayamanan Uling mapatlud man ing bie e mapatlud ing lugud cu Ing bie casi casing catbud ne ning balas a castilyu Ing lugud susukdul ya anggang mapupus ya ing yatu Anggang mi iquit tamu quetang ausan dang paraisu SINALICUT CATA Neng Art Dax – 07/07/07 Ining benging iti Ing mumuna mung bengi Ita ing sinabi mu canacu Alang bali ita Uling palsintan daca Ing leguan mu ing acaquit cu Nyang domingung milabas miyabe cata cabucas quetang cacung cottage New Englanding saquit a pibatan miyambulaang nyaman Ing lagu mu ing cacung pegumasdan Napun quing opisina Ala no deng magobra binie cu queca ing acaparan Nyang uman daca Kikislap ca mata Ginalgal ca't mengilabut laman Ngening aldo iti Inanyan dacang tuqui Quetang labuad e ta pa pintalan Telan que ing gamat mu tinuqui ca canacu Quetang ligayang ala nang anggan Dimdam me qng quilub mu Ing bie na ning bie cu Ini ing purmerung bengi queca Balacu mayari na Ing lugud ning palsinta Minie yang sican ban e cu muna Linawe daca irug Ing salu cu cacarug Quitang cu ing quecang panamdaman Inaplus mu cu buac Ing pawas cu papatac caluguran dacang caluguran E mu cu pecawalan Maigpit mu cung quewlan Lalagablab ing quecatang uma Queni e cu pa miras Paninap e abatas E na cu sana migigising pa Ngeni deng mata mu Pipiak lang lalon mu cu Pangatlung beses mu nang mipasnauan Bulung at gulisak salitang mangapalpak Qng amanung e cu aintindyan Mabanglu cang rosas panamdam cu meliswas Binulus que ing cacung animu Ing yatu melati ya Ing meragul icata Inapag que queca ing suyu cu Mitalanan catang gamat Ing lugud tang tapat Lugud yang dalise at wagas Sinalicut cata Ing aldo 'e queca ta Ining penaco saguli e ne sana mag wacas ING KARATISTA Neng Art Dax 7/18/2007 Nyang anak cu pa mung mapanalbe pelicula Detang Gonzalez brothers paburitu cu la Uling usung usu ing Karate canita Bisa cung maging matinik a karatista Y Shintaro Katsu, y Wang Yu inalben co ngan Y Bruce Lee, y Chuck Norris, ampo y Jackie Chan Y Wong Fei, y Bolo Yeung ampo y Sammo HungAlben co ngan ren, Kung Fu o espadaan man Atnacu catula neng lumual nacu qng cine Makyapus cung tutumbuk qng tumbuk nang Jet LiNyapin naman neng panga uli cu San JoseMangatumbuc la't manga sipa reng cacung wali Nyang minta cu Amerika tanggap nacung sueldu Mig enroll cu qng Karate a buring buri cu Ing Sensei carin Nakamura San ya lagyu Ing lagyu ning escuela Kyokushinkai ya canu Ing assistant nang pecapun ya y Sensei Kishi Qng pamag training na cacu mebiasa cung dili Sabi na pa ing cacu canung mawashi geri ya canung pecamasican at peca matindi Nung qng "kata" naman mapinu ing galo cu Balamu teterac ing indac ning catawan cu Casi makyapus cu caretang ayayalben cu Detang Shaolin monks macatucnang quetang templu Neng namang sparring saingsing cung ala Bruce LeeA balamu pusang lampung queng pamag "Ki Ai" mi Nyapin deng kalaban masisindak lang parati Yacung yacung mangimuna basta qng kumite Dintang ing metung a aldo a ating dinalo Quetang quecaming malating Kyokushinkai dojo grupu lang matuling ampon Puerto Riqueno masculadu la ngan at matindig la tikdo Kawangis neng Tyson ing timbal da canacu tiniman cung bagya uling white belter ya pamu Isipan cu nung nanung technique ing gamitan cu Crouching tiger, hidden dragon, iron fist o dragon claw Inarap queng alang tacut ing negrong calaban Matas yang masculadu maragul ya catawan Nyang mipaglalawe cami at mipag pustuan Isip cu yacu y Steven Segal o Van Damme Mabilis yang tinumbuk, dinurut pildak nacu Mituran cu atian at mengapangisngis cu Qng sican na paldak alus mitda cu animu e mu batwin nune aldo't bulan ing iquit cu O't caya mesambut cu white belter ya mu naman cabang maluat nang martial arts ing cacung caguiwan Nyang inalben que ing video ning quequeng laban Y Dolphy pala ing canacung pekyapusan ING KARATISTA II by Rafael Maniago Katula ku keng poesia mung ikang talagang bida labu-labu nang labanan manibat pa keng umpisa, miyayaliwang karakter mangalampag no't magalsa ding mangabilis dang gamat kambe bubiung ding bitis da. Deng ngang mesambitlang lagyu king larangan ning karate anti kuna mong akakit mibie keka't mengulabe; anya neng lumwal ka keng dalan manatras nong makipate e da man mo apangara ke leon la man o tigre..! Lalu meng dildakan ampong balak mung manampalasan magpairing manyalambo, ban ipalkas ing sikanan, minyundu ka America, king panyulung mung kabiasnan Nanu ya man sa degulan ing karap mu 'lang atrasan..! Makanyan keng akakit, wa ing amanung sisuan keka anti la mong kildap wari ding paldak mu ampong sipa manguliglig ku balugbug susyuk la kaku't mingatba ding amanung Kapampangan karing bersu mu at rima..! Anti ko mo sang medungus kening bayu mung poesia, singap-singap kung mamablas pota apuruan daka uling nung ing gamitan mu itang kang Dolping amana makanyan kung kukwang tiempu, ba..! simbut ke "Ing Karatista".. ! Para Keng Kalusugan at Pamikakatawan by Ariel Malig Maningat ta na ngan pu Pamangan mataba, miwas ta pu Asan danum ing panyamalan ta mu Ampong gule ing panacmulan ta mu Reng pusung titibuk, mimina Reng uyat daya, susunga Sisyas ta tud, alang patna Minum serbesa ba tang saya. Macanyan man, masaya cung manalbe Careng mangalagung babai que lele Anggiang pasyuc-pasyucan cu la mu Ayli ampong timan iyang buri cu. Pero, Abe co, cailangan masican tamu Daya, uyat, pusu ampong tud Uling macaba pa ing labanan Para queng Amanu tamu. To go to page 1, click: http://maxpages.com/poecia For the next page, click: http://maxpages.com/poecia/poecia60 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00168 |