LIBRARY OF KAPAMPANGAN POETRY - PAGE 58 - Anthologized by Ernie C. Turla, president, Academia ning Amanung Sisuan, Int'l. - Languages

1. Deng Dinalo Capampangan - Renato B. Alzadon
2. Kutang - Renato B. Alzadon
3. Ikit Ku Ne - Art Tolentino
4. King Kekang Panyambut - Tony M. Pena
5. Alamat Qng Dusa - RBA
6. Abou - RBA
7. Ing Paslu At Ing Canta - Renato B. Alzadon
8. Nung Keni Ka Keng Siping Ku - ArtDax
9. Gatpanapun Na! - Aleta Tolentino
10.Careng Dugong ahas - Helen Lagman
11.Balen Ya Pa Wari Nung Ala Neng Amanu - Art Tolentino
12.Queragul - Willie T. Dizon
13.Ortelano - Pedro Rivera Alzadon
14. Licuan Daca O Indung Tibuan - Ed Sale
15. Sigpo Ning Makasigpo - Tiakbong
16. Sumulat Tang Poesia - RDM
17. Lagusgus Ning Uran - Biseru
18. Tipanan - RBA
19. E Man Dapat Muran - ArtDax
20. Ing Sicanan Ning Tatang - Biseru
21. Lalangan Te Ing Milabas - RBA

Ding Dinalo Capampangan
Neng Renato B. Alzadon

Delawan da cu ding Maestrang Capampangan
quetang silid cung pipagaralan;
ticnangan que ing susulat cung cawatasan
a pequisabian cula qng amanung sisuan.

Binasa do ding sinulat cung poesia
at ngara cacu mangasanting la
ban canita canu manaquitan cung pera.
dapat canu ipalibru cu la

Nga na pa ning metung a sinabi canacu
dacal canung perang tanggapan cu
Nung English la ding poesiang gawan cu
mas misali la ding canacung libru.

Itang metung naman qng Pilipino ngana
carin cu sumulat poesia
ing salita na ning quecatamung bansa.
dapat canu unajan ya

Calaco ra ding mipaidalan a Capampangan
sindu que ing canacung gagawan
at e cu balung dacal lang oras ding miralan
bengi na palang capitangan.

Linub ya qng silid ing cacung asawa
at canacu qinaul at minuma ya
caluguran ne canu ing amanu cung mana
inia ding capampangan inimbita na la.

Ing pamagmalasaquit qng cacung amanu
Aduan na qng sana isundu cu
capampangan ya pa quesa caring ca-capampangan cu
at canian cu acalaru

Kutang
Neng Renato B. Alzadon
Poeta Princepe/Laureado

Ngening apibuklatan to ding ilug a lipatan ta
at ding gasgas tang biltangan inyang kababayangnan ta,
papasyag no ning lupa mu at sulyap ding kekang mata
detang kutang mung tatarul king sukdul ning pamalsinta.
("Nung ala na ing legwan kung pangangayamnan kanita,
yampang mo pa kaya kaku ding mapanirug mung kanta...?")

Balikdan mu la ding dutung king larawan dang kukupas
at lalon mung mananabu ing bulung dang malalagas,
paniniglon mo ding sibung na ning kaleldo milabas
a mikapakpak linipo migdulap king bayung bukas.
("Nung ding anak mako nala at magsarili nong landas
ati'ka kaya siping ku king panaun ning Taglagas...? )

Apansinan me ing aldo titipang pakakalale
ketang manenayang bunduk a makasalud a takde,
kaibat na ning mayaktangan at malakwe pamaglakbe
king takde ning kasing irug ating tulang mamagape.
("Nung ing katawan kung matbud ing sikanan tabugan ne
makapagsandal ku kaya kanyang salu mung matibe...?"

Dimdam ko ding kekang kutang agyang e ka migsalita
yang bague e mesaglawe yang malagwang ayalata;
telanan ko ding gamat mu, linawe dakang maratna
at ing pintig ning pusu ku yang minyabing alang patna.
("Ing legwan mu kumupas man karing mata ra ding malda
dapot karing kakung mata sampaga kang e lalanta.")

Akuman, apagmasdan ke ing tamle na ning panaun
ding dutung kule lang kupas king sinag ning gatpanapun,
paniniglon ku la naman detang ayup a mamapun
a ngeni memaglakbe nang king marayu na migdatun..
("Maski nanu man ing datang, babagyu man o mamayun
abe mu ku kening pugad a belangkas ta king napun.")

Apansinan ke mu naman ing aldo king panipa na
karing takde na ning bunduk a kasuyung manenaya,
aganaka ke mu naman ing aldo pamagpainawa
kaibat na ning patingapun a kapagalan king obra.
(" Nung datang man ing saguling ding takbang mu mabule la
talan ka karing takde ku, ing sikanan ku keka ya. ")

Ngening mipakibatan la ding kutang mung e mibigkas
at nung nanung manenaya karing aldo na ning bukas,
ilako mu sa king salu ing bague makalingasngas
uling ati ku siping mu angga man king tawling oras.
("Para king banwang daratang, king ngeni, at king milabas,
Masayang pamagmasusi king aldo tang pami-aptas."

IKIT KU NE
by Art Tolentino

Ibalita yu kareng kamaganak ing sinta ikit ku ne
Malambat ku mu ring maglalawe
Dapot e yu sasabian ing dinanas kung lumbe
Bayu ya dintang keng kakung bie

E yu babalitang keng bie cu ing suerte linampas na
A metua nacung e mebiasa
E yu babalitang ala nakung pagasang mikualta
Dapot sabian yu ikit ku ne.....ing kakung sinta

KING KEKANG PANYAMBUT
(Ampang kang Among Gobernador Ed Panlilio )
by Tony M. Pena

kumpul-kumpul pangadi meto balayan
butil balas lang mepuling ding punsalan
mitombang metambun mabilug katawan
dalusung ning agus bosis ning halalan!

king kekang panyambut mibuklat la mata
ding bulag mesilo king kislap ning kwalta
nanan deng simpanan ing kinabsing bulsa
nung danupan neman ing sasyo kaladwa!

ing kekang panyambut metung yang biyaya
king tigang nang gabun ning balen kung tibwan
uran yang saluran ning benging salunan
sunlag ne ing bukas katmu yang ligaya!

metung yang siwala ing kekang panyambut
lipat dayat malat meramdam minabut
tiwala ning tau keka yang penyambut
tukyan ing bakas mung alang imbut kaymut!

ing kekang panyambut metung yang himala
misalbag king sulip anting sinag-tala
e binang maglambat limbun yang makaba
atin nang makyapus bukas makadwana!

ing kekang panyambut mabye yang krusada
nuan ka maAmong Pastul ning Pampanga
sinumangid bakud linwal king Pisamban
ding meliling tupa keka lang tipunan!

alamat qng dusa
Neng RBA

Menabtac ya labi ing quinaung gabun
uling ticusan ne ning sagradung ambun;
nung atin mang tanda qng bacas ning napun
mistula lang late ning mipdang panaun...!

Ing payat a tupang manintun agigut
ala yang atagpuan a saguiwang dicut;
quilim-quilim lasa ing makapalibut
qng singo yapsa na ning gabun a tuyut.....!

lalam nang Desyertu ning mipdang Paraiso
ing dangwe metambun icua nang ginalo
linsut ya qng siwang...... at misan a aldo
memunga yang dutung babo ning Calbario ...!

Iniang tangalan de ding matang melula
ing malagung bunga ning mayap a calma;
migbabo qng lub da ing pamangandiria
buri deng sugatan, bayang mapinsala... !

Salamat qng diria, qng sunu, qng parius
qng barug, qng acdac, qng que-alan lunus;
ing agta na ning bie, tinulu, minagus..... ..
Salamat....! Salamat...! Qng Taram Ning Tandus....!

Abou
by RRA

(Meapsi qng poesiang Abou Ben Adhem
neng James Henry Leigh Hunt-RBA)

Qng misan a bengi, qng cacung pagqueran
acalingatan que qng sinag ning bulan
ing antimong liriong mibucadcad leguan,
Angjel yang susulat qng librung guinintuan.

Mipmung cagalangan ngacung mengamanu:
" Marangal a dalo, nanung susulat mu?"
Minatna ya canuan at ngana canacu:
"Ing laguiu ra detang malugud qng Guinu."

"Mangutang nacu mo", ngacung quincas queya,
"ing cayang laguiu cu , macacabilang ya?"
"Pagcalungcutan cu", agad pequibat na,
"ing laguiu mu Abou, e ya macalista."

"Ali na pu bala, waman, ing laguiu cu,
e mibilang caring malugud qng Guinu;
yabe yu ne mu pu, nung pamayapan yu,
caretang malugud capara nang tau."

Angjel sinulat ya, at meco ya iti,
dapot , mibalic ya qng tutuquing bengi,
guinintuan nang libru , iniang lon que iti,
ing laguiu cung Abou, mumuna yang dili.

Ing Paslu at Ing Canta
by Renato B. Alzadon

Metacmus qng poesiang
The Arrow and the Song neng
Henry Wadsworth Longfellow-RBA

Bignus que ing paslu qng calaganapan
ing inagpanan na, eque balung sabian,
quetang salusu nang mine qng catasan,
ding panimanman cu, ali re atuquian.

Banua lang linabas , qng biru ning tagcu,
miuman queng atagpuan ing bignus cung paslu
qng pun na ning dutung nung ya mitimu
e ya mepacli man o mibayu anyu.

Dinalit cung canta qng cayactanganan
nung nuya sinanlad, eque balung sabian
uling atin waring macapanimanman
qng lawiwi na ning metung a cundiman

At misan a aldo, alang pangabayu,
ya at ya pa mu rin, mula anggang sepu,
cacu yang atagpuan ing cantang delit cu
qng ubud nang pusu ning caluguran cu.

Nung Keni Ka Keng Siping Ku
- Poesya Neng ArtDax

Madalumdum ya ing bengi, mabilug ya ing bulan
Alang batwin king babo, ating anging amian
Tatando ku keng awang, bubulung ke ing lagyu mu
Kanyaman na sana nung keni kang siping ku

Pagmasdan daka mata, kaulan dakang matalik
Iparamdam ke ing tibuk ning pusu kung sabik
Idampi ko ding labi ku kareng labi mung mayumu
Kanyaman na sana nung keni kang siping ku

Dapot yaku mung dili ngening benging madalumdum
Inyang meko na ka ena man meko ing dulum
Dapot pilit kung isipan agyampang likuan mu na cu
Kanyaman na sana ning bie nung keng kang siping cu

Gatpanapun Na!
Neng Atty. Aleta Tolentino

Capilan pamu migising cu,
Biclat que ing awang cu,
Iquit que pang sisilip
Ing aldo a maynip.

Mabilis cung memiblas,
Ing obra cu pendalas,
Anya e cu amalayan,
Gatpanapun na naman!

Balamu nandin pamu,
Mamyalung tamung picu,
Queng biru sasagacgac,
Nanu mu papalacpac.

Oba't ngeni aliua na,
Ticdo mu masaquit na,
Mayli man malagad na,
Gatpanapun nang talaga!

Emo cayabe taya pang,
Mamasyal i Tatang,
O ngeni ala nayu,
Melacuan cayang amanu.

Ing buac tamu maputi na,
Ating pilegis queng lupa,
Cabilis ngan ing milyari,
Gatpanapun napin ngeni!

KABALEN, OYNI ING CUSING CO PARA CARING DAYANG UBINGAN (DUGONG AHAS): by Helen Lagman

SANGCAP TAMUNG "LECHE AMANUNG SISUAN",
IPANE TAMU ING PANAMPALING CARELA NGAN,
ANGGANG E YUMUMU ING DAYANG UBINGAN,
MAPANAS ING LAMAN, PATUGUT LANG GUMAPANG.

"DUGONG ASO" TAMU MAN,
ASU TAMAN QNG CATULIRAN,
ING ASU PAGUMASDAN YE QNG CATAPATAN,
SUBUC NE, TUNE LUGUD Y BALIC NA NGAN.... by libutadcu

Balen Ya Pa Wari Nung Ala Neng Amanu
by Art Tolentino

Milako man keng balen
Ing batute at camaru
Milako man ing cuchcinta
Kalame, putu secu
Milako man ing tidtad
Talangkang buru
E mu sana milako ing quecatamung amanu

Aguiang ala nang papakurus
O darame neng maleldo
Aguiang ala ne ing parada
Da reng parul neng magpasku
Agyang mawala no reng fiesta
O pursisyun deng manyulu
E mu sana mawala ing quecatamung amanu

Agyang mamun ne keng balen ing
San Miguel at Pasudeco
Agyang lacuan ne ning SM
Ing balen San Fernando
Agyang ing Capampangan
Mitmu neng caring calulu
Mayaman ya naman nung atin yang amanu

Dapot nanu ya ing balen
Nung catmu yang tau
A mipagsalita lang
E pare pareu
Ating mag Tagalog ampon
Mag Amerikanu
Luguran me ing balen o ing sisuang amanu?

Likuan da ca Kapampangan
Trese anos cu pa mu
Dapot e mu na cu likuan
Migdatun ca keng pusu ku
Ing lugud keng balen
E lugud para canacu
Nung e me luguran ing sisuang amanu

Queragul
Neng Willie T. Dizon

Caibat ning misa Dumingung gatpanapun
Pamilyang micacalugud quing bale matua mitipuntipun
Lugud at galang yang ugaling queragul
Ibie ya cari Inkung, Apu, Bapa ampong Dara.
Apu dang macatimpu sumangid ning dulang
Apung macapadurut manenaya la ngan
Asan a manyaman quing nasi macabusal
Mistula lang sibung manenayang subuanan
Cayari dang mengan manenaya no naman
Pepa-ambun atbung alunan iya namang angusan
Tune pagmayumu caibat mengan.

Ortelano (a special contributed poem)
Neng Pedro Rivera Alzadon

Tajimic na iting yatu, mituclip na ing labanan
mitucnang na ing paglunus istoria ra ding Bataan;
ding bayaning pepaimate qng parang ning lamutacan
detang e biasang susucu, tinanggap lang camatayan,
e bala nung mitimbuang la libutad ning caparangan
iti, qng uli ning balen, at qng labuad tamung tibuan.

Bayani lang menaluntun qng bacas nang Bonifacio
tinanggap lang camatayan antimo Y Jesu Cristo
ing licuan nang bilin Rizal macatiman deng pepalto
qng uli ning Pilipinas e bala nung mangalaso;
uling itang dayag linsut ya ing matning migpatilo
menalamsic meguing api, mecamate caring Judio.

Dapot ating macalijim a bayaning e ta balu
sasabian dang e linague qng parang ning labu-labu,
ninu caya iti balen? Anac ya't dayang calulu
tala ne ning liling landas sundalus ne niting yatu
timbulan ning malulumud guyabnan yang macanono
suli ne ning pamibata ing malucang ortelano.

Ortelano yang calasag ning mabilug a marangle
ing e biasang mitacutan, duldul, quildap,. e mangimi,
marurunut ya catawan, pagal, puyat, alan'anti
ing nectar ning casaquitan inucuc nang mawiwili
uling qng pawas nang canuan sinlag ya ing guintung tune
ing corona na ning balen, ligaya na ning tagumpe.

Alang martir at bayani...! Alang bansang mangatatag.. .!
Alang macualtang manipus queting mabilug a labuad...!
Magsalbat ing meto yatu, malaso yang madacurac
nung ala nang ortelanong magtampiso alang gulat,
inia O comanguing laji, daya na ning Pilipinas
ing tetagan at tagumpe, utang caring sawi palad.

Licuan Da Ca O' Indung Cung Tibuan
neng Edgardo Bonus Sale

Obat licuan da ca O'Indu cung Tibuan?
Qng aliwang bansa menintun cabyayan
Ala na ca waring aquit a capanintunan
Quening sarili mung Indung Belayan?

Lingunan co pa deng ca cung punla
Ing pamilia cung ala nang aliwa
Bayu cu gawan ing ganaganang sabla
Ban y ning cabilyan minawang bagya

Dacal ing mangapalyaring sacripisyu
Bista man malaut ca reng pamilia cu
Amyaman cung mapait queng sarili cu
Uling ini ata ing macatalaga cana cu?

Qng Saudi Arabia ca rin cu mi paras
Pali ning angin qng catawan cacablas
Amanung Sisuan ya pa mu rin ing agcas
Qng calupang Capampangan a ca rin miras.

Obat licuan da ca O'Indu cung Tibuan
Caybat cu Arabia, America menucnangan
Queni cu migdatun masanting ing cabyayan
Macatud ing sweldu, qng aldodo cacanan

Dening pamilia cu, abe cu la't matula
Anac at asawa mitmu caming saya
Dapot ing caladua, pusu cu at daya
Capampangan pa mu rin pati na salita.

Ing pamicawani ta metung yang misteryu
y ca ing isipan muran man at magyu.
Maldo man at bengi y cang tangalan cu
ing lugud cu queca e ne man migbayu.

Maracal nang banua ing menga palabas
Talwing pamikit ta e cu na abicas
Dapat mikit ta na, e cu na apalampas
Ing lugud cu queca e ne man quinupas.

SIGPO NING MAKASIGPO
Neng Tiakbong 06/15/07

Ume na cang mate, ninu'ng saguip queca?
Danup ya mu wari mamatad inawa?
'Wapin mesane ca, quening bie maluca
Paninap mebuguc, e pa man miyapsa.

Cabang mabie canu atin pang pagasa
Pasigpon na ka wari, bansang alangala?
Mepilit linaut, menaliwang bansa
Mieng marangal, mate e macanganga.

Bansang mengalinguan, o't ngeni pansin la?
Atagpuan da ne'ng bie pigcait carela.
Bayani'ng yaus mu, o insultuan mu la?
Sariling paralan mecacalabyus la.

Pansinan mo caya potang mibalic la?
Sagad dang catawan, muli painawa na.
Yadwan cu sa queca, caluguran bansa
Balicdan mo sana reng migluid queca.

"Sumulat tang Poesia"
neng RDM

Gawa kung poesia agyang nang' malyari.
Pilitan kung gawa agyang yakung dili;
Nukarin ku man sa, nu ku man melili,
Ing amanung sisuan tutung makawilli..!

Sumulat kung tema ketang makatagkil.. .
Nung nu ing panamdam karetang misakwil;
Aliwang amanu king labi rang sawil,
Ginulut king balen amanu mipilpil..!

Nu ku man mipalpal gawa kung poesia...
Kapitangang bengi libutad ning dimla;
King lalam ning aldo mapaling alaya,
Magduyan king biga king babo ning banwa..!

Gawa kung poesia nanu mang kabiguan.
Nanu man ing amun problemang daratang;
Dapot labanan ku at kakung arapan,
Nune isulat ku king amanung sisuan..!

Nung mitutundu ku, ding mata mipipiak.
Pilitan kung biling kening pangatulsak;
Neng aranan naku ning sintang mataktak,
Karing kapus palad mangailangang lingap..!

Luid ya ing ANASI ding mapiang susulat..!
Ipalkas ta eni amanung pangmulat..!
Karing Kapampangan king labuad mikalat,
Ing amanung sisuan kekata yang ladlad..!

Lagusgus Ning Uran
Ning Biseru, 22June 2007

Lagusgus ing uran, duldul cucurug pa
Dapot ing diwa cu e que ayaguanta
Ing yumu at pait ning pamipalsinta
Pilit yang babalic qng cacung alala

Balamu nandin pa aniang pisabi ta
Ing pengacung sinta queca at cacu ya
Nanu mang sumbagal ing marap quecata
E ya maguing sangcan ing gulutan da ca

Icang macasentru qng cacung paninap
Nasang maguing indu ring canacung anac
Icang babie sala careng cacung abac
Malambing tumaila neng ume matulsac

Napun, napun pamu matibe’ing tipanan
Sicsian na ning banua, tala at ning bulan
Nanu ing miliari bigla nang miglulam?
Mapaling caleldo minulus minuran

Ing duldul ing quildap pilit cung erapan
Ing mebigung sinta cacu sang icutang
Ninu mo quecata ing maqui camalian
Ing mequibat cacu lagusgus ning uran

Tipanan
neng RBA

Ining benging ini... caring anggang bengi
macayaliwa ya, masampat yang dili,
uling calupa ning quecatang pisabi
datang ca canacu ngening benging ini.

Babo ning lamesa maca-apag na ngan
itang cunwari mo myaliwang pamangan,
ding cristal a copa tana la milamnan
at caring labi ta manayang simsiman.

Itang balamu mo ding aduang candila
mitatau na lang malamlam dang sala,
at ining panamdam tana maligaga
alub cu na mu mo qng datang na ca sa.

Balamu dimdam que musicang malambis
sonata caretang mipalsintang labis,
panenayan da no ding quecatang bitis
manucluanan caring macayamang sunis.

Metigtig ne itang oras a mitacda
e ca rin dinatang qng canacung diwa
micacarugan cu at migaganaca
o'bat ala ca pa, ninanu ca caya?

Biclat que ing awang baracang tandauan
dapot memiragling sera que mu naman
pablasang ing anggui atmu na casican
manuldul, mangildap, masican ing uran.

Nung e ca miratang yan aintidian cu
bubulus ing uran, masican ing baguiu
o ninu naman mong matapang a tau
lumusub busal ning mamuangit a yatu...?

Inia, yarin itang masican ing uran
ya nang aisip cung e mu cu datangan;
dapot cajilig cu qng cacung pagqueran
canita que iquit ing quecang larawan.

Quen cu apialas, macanian ya pala
ing pamitipanan ding aduang caladua
aguiang babaguiu man datang at datang ca
qng cabubuslan na ning cacung alala.

E Man Dapat Muran
Neng ArtDax

Ba't caya ing bengi tayu milulaman... ?
Bunduc man at patag talu miulapan
Ba't sinalicut la ding batwin at bulan...?
Ing balu cu sana, e man dapat muran.

Binitbit me itang payung mung malutu
macacapoti cang mamun nang dumayu
E ca pa mamaco ngacung menigapu
bustan mung ing lulam lumabas ne pamu.

Aguiang datang man sa angin a masican
mibaube la man qng gabun ding kwayan,
matajimic ya ing quecatang cabengian
nanu man ing inge, e ta damdaman man.

Yana, aplusan me ing salu cung gaglas
Limusan mu cu sa agyang dit' mung oras
Queni cang siping cu dasnan na ning bucas
Munie capaldanan quening sintang wagas.

Baluan cu irug cu e marapat queca
Ing bie alang cule at alang musica
inia sa't mequeni dalitanan daca
yanang idalit cu ing palsintan daca...!

Ing cacung asabi e man sucat sabian
uling talus muna ing capanamdaman,
calupa ning tacda na ning capalaran
ati ca siping cu, e man dapat muran.

Ing Sicanan Ning Tatang
Ning Biseru, Father’s day 2007

Ing sican ning Tatang e ya mayayaquit
Qng asque mabagsic o dagul na bosis
Nune qng lugud nang culang man qng lambis
Caretang anac nang tune pagmasaquit

Ing sican ning Tatang e ya asusucdan
Careng atipun nang cualta’t cayamanan
Nune quetang cayang sese catuliran
At qng pamipalcas tune catalaruan

Ing sican ning Tatang e ya atatantu
Qng capal na salu o casias camau
Nune qng dagul na at lualas na pusu
Caring mangailangan quetang cayang suyu

Ing sican ning Tatang e ya mipapalcas
Qng ticas talacad o masanting piblas
Nune qng pamilyang quibsian na qng lingap
At qng panalala’t lugud alang cupas

Lalangan Te Ing Milabas
Neng Renato B. Alzadon

Bina mung pagmumulalan nung ba't ding guintung alala
e mo alulan mo sana
quetang metung a garapa
ban canita capilan man e ra acuang dumayu pa,
uling ngamu, para queca,
ing milabas masampat ya,
calupa ra ding melacuan a bacas ta qng aplaya....!

Ya ring masampat la queca ding saguling cule rosas
ngamu, malacuan a bacas
ning pamipalsintang wagas
a pagnasan mung balicdan caring aldo na ning bucas......
Mequeni Lirio ning Watas
queni qng salu cung gaglas
at quening saguling ini, lalangan te ing milabas....!

Mequeni na sumilad ca bulaclac cung macaticum
at saluran mu ing ambun
ning maligaya tang napun
at guisanan cung ilicas qng bilungan na ning album,
ban ding alalang malicum
masampat la at manayun
lalangan te ngening ngeni ing milabas tang panaun....!

Sacaling ing aldo bucas e na na acuang datang pa
e na pa bala quecata
ing milabas quecata ya
a maingat mililicas qng simpanan ning alala,
ba n qng yubu milusuc ya
cumaul ca cacung sinta
capnuan te ing quecang album
qng sampat ning milabas ta....!

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00105

Page Updated Sat Jun 23, 2007 1:45pm EDT