 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY - PAGE 57 |
 |
| ERNIE C. TURLA - curator |
| ||||||
| Contents: 1. Patawaran Mula - Helen Lagman-Dizon 2. Ing Lupa Nang Kristo - Tony M. Pena 3. Pun A Matua - Jason Laxamana 4. Aliguat Ning Laman - RBA 5. Puni - Rafael D. Maniago 6. Mal A Aldo - Edgardo B. Sale 7. Ganacan Mu Cu - Tiakbong 8. INRI - Louie Escoto 9. Pamagsadia - Renato B. Alzadon IBPA PATAWARAN MULA by Helen Lagman Dizon IBPA PATAWARAN MULA DING DACAL NANG MULALA QNG MALAMBAT AT MAKABA LIMBUN NING MAROC A PULITICA MACASUTANA AT MACACURBATA POPULAR QNG MEDIA, MACUALTA, MAMYE PERA DING ANGGANG MAGBOTU KARELA LABAC YAMURIN ING SALANGYAN DA. NGACU WARI: NANU MO ING PENIBAYU NGENI CARING DACAL A CACAMPANYA AT BOTANTI CACUNG PAQUIUARI: IYANAMAN ING ISIP AT BUDNI NUAN YA CAYA ING TATANGGAP, NUAN YA CAYA ING BABIE? NUCARIN TANA CAYA, CARING PAQUIRASAN NING INDUNG KAPAMPANGAN, QUECATANGAN IBATAN? IYAN MUNG CAYANG AMANUNG SISUAN ETAYA BALUNG ISINUP AT PACAMALAN? NUNE PEPABUREN TAYANG MESALAULA SELAULA DING ANAC, AUSAN TANG "PAGASA" DING ESCUELANG ISIP TAMU MACASAPLALA DING MAMUNTUCAN, PENGARI, MAESTRA, ILAPA ING MENYIRA. NGENI QUECANG SINAMBITLA BALAC DA PALANG MAQUIAMBULA, OBAT NGENI LA PA MU SASAPA? CALUPA DING MADLA, MACASUTANA BIASA LANAMAN SUMAWA SUSUGAL LA NAMAN DEN, SASAGUPA, AT ATIN LANG IBUGA. "SAPINGILAN MONG WANAN A PISNGI, AIBIE RE ING BANDANG CAYLI" ABE CO, ITI ING MARAGUL NANG LABAN NING PARI DACAL ING ETAMU BALU, QUILUB NING SEMINARYU "IQUIT DE ING SARILI" NUNG WARI QNG MAGCADETI, EXPERTO LA KANITI. PILAN LAMO WARI DING MAQUIBALU QNG SARILI? NUNG BALU TANE ITI OBAT PROBLEMA TAMU ING MALILYARI? ETA SANA PAIMBURISAN AT USGAAN ING ETA MUMAN IQUIT BIE NANG DELANAN NING CALUPA TAMUNG MELALANG ULING IYA ITAMU, ITAMU ING TAUNG IYAN. ING LUPA NANG KRISTO (Neng Tony Mercado Peña) aligaga yang matudtud malalam ing meto libutan, alang mekarandam. mibayit ya king mababang sabsaban kayantabe ring tupat't bakang pastulan. meragul yang miglakad makatapak karing dalan makiput matipak. ring pile apalakad nala ring bulag apanakit nala ring pipi apagsalitan nala ring maklak aparandam nala! sinlag yang tala katmu king sala! ding poderoso ilang mengasilo ilang mengabulag king linto a maslag. migit ing tinggap kaplas sapinit ning dila ning tao kesa king kablas hagupit ning latigo king katawan butul-balat abang guyud-guyud paukyat ing Krus mitmung bayat pupusanan nang misanan ning Menatbus ing kasalanan king meto kalalangan! king matas a banwa mukyat ya i Kristo lukluk dane wanan ning Ibpa! keti king sulip malakwan ya i Alisto kulkul na pulseras at ginto! PUN A MATUA neng Jason Paul Laxamana Lalakad ku kng lugal a alang tau At ikit ing pun a e ku balu lagyu Mangatagtag la rugu ring kayang bulung Kng bakubaku ampon malanging gabun Ding ayup babo lalabul lang lauiui Kng tula, ring sampaga, e la paitauli Lupisak, tugak, masayang mipaglandi Itang pun mu rugu ing malungkut dili E gagamit siuala, anti na kung ausan Nitang mangatagtag bulung a tanaman Balang bulung a mayayagtal, lalauan Aganaka bigla ring bageng kelinguan Balang bulung malaguang miras kng gabun Ali malyaring kng babo mu magdatun Makananu ya man kasikan ing buyun Mekapampang, lalati na ya mung alun Daralumdum, mangaring talang ing aldo Yari na ing obra, benging makapasno Dapot kng balang kayarian, tutung lunto Ing bayung umpisa; miyadya ka, aro... Binang malungkut man ing pangapupus biye Kagulan man ing babiye ning pangamate Dapat kang mayap, manalakad kang bale Atin ding tuknang keta kekang kamate Aliguat Ning Laman Neng Renato B. Alzadon Marso-2007 Cayanacan na ning bengi---mapali cu panamdaman--- ing lisangan manaliguat qng mabilug cung calamnan, qng pali na ning aliguat mibangun cu qng pagqueran at qng balcun ning Palacio tinaglus cung menandauan; adungdungan que ing sibul a megawang pipandiluan nung nu ing cristal nang danum paquislapan ne ning bulan, anti ya waring managcat ban tipa cu qng mulajan at layun cung magtampiso qng danum nang pangayamnan. Cabang lalon que ing sibul, oita, cabud-abud namu inapsa re ding sampaga ing babaing atmu lagu, penandit pa, quetang sibul dili-dili nang mandilu e na balung pagmasdan cu ing pangayamnan nang anyu; ing maimpis nang imalan inyang mebasa nang tutu iquit cu ing upaya na ning mapanamun nang salu at itang upayang ita yang buri cung apasucu qng pali ning pamagnasang mitau qng cacung pusu. Oita, yang dili qng sibul, nung misan pin, sumaca ya at lucluc ya caring batung menibat qng Babilonia; nung misan, lumacad neman, lapitan no ding sampaga at saca no uman-uman detang maputing catleya; nanan que man pagumasdan ing mabilug a anyu na peca-malagu yang dili qng Israel at qng Juda, aguiang ding anac nang Saulo a balita qng leguan da e la tuclung calingquingan quening mandilu qng mula. Udiuc na ning pamagnasang qng pusu cu misisinsin pepa-aus que qng Tanud itang mandilu qng ardin, at iniang cayarap cu ne iting maslag pa qng batuin at lalon cu ing leguan nang pangaririan da deng jasmin, ing camalan cu't caniuan silapo na ngan ning angin sablang bague queting yatu antimo waring milinlin; ing pamilugan nang bicas ya nang bucud cung a pansin at ing mig-ari qng lub cu, pagbandi que, ngeni mu rin. Queta pin cabengian aita, qng mabilug cung calamnan migbabo yang menagumpe ing aliguat na ning laman; calupa na nitang danum ning sibul nang pipandiluan, Y Batsheba, ya ing sibul a penaplac cung lisangan; ing samyu na ning Catleyang matula nang uman-uman ya ing samyung asangap cu qng mabilug nang catawan, at detang mapinung marmol a nung nuya migluclucan, inaplus cung capinuan da caring puad nang pamilugan. Oyan ya ing cacung lijim, ing lijim cung pecalijim at ala cung pisabianan quening ljim cung malijim, dapot qng misan a aldo pequisabian nacung lijim at ngana qng milamanan ya, darala neng macalijim; balu cu qng mabalu ya ing queyang pilijim-lijim e ne malyaring isinup ban cabang-caba ilijim inya qng ban mitacpan ya ing depatan cung palijim ing marapat a paralan belangcas queng macalijim. Pepa-aus que Y Urias, Y Joab pepaulian ne sangcan cung maquibalita qng labanan qng marangle; dapot quetang e na malit ing macalijim cung paque ing yang gawan cung pangambil qng macalijim a bague; caibat que pin acasabi inutus queng muli bale ban queta ing asawa nang Y Batsheba, lapitan ne, qng macanian a paralan nung ing atian na dagul ne Y Batsheba asabi na qng Y Urias inulian ne. Dapot, cabucasan nita, yang canacung abalitan qng Y Urias e minuli qng sarili nang tucnangan; e na atanggap qng lub na ing magjilig qng pagqueran cabang ding casing-cawal na atilu qng caparangan; uliniti, inagcat queng maquisulu qng apunan layun pepainum queng alac ban micapali ya laman, iniang lupa neng magilas canita que pepaulian ban queta pin Y Batsheba, puntalan ne, at lapitan. Ali, e minuli bale, talagang laus qng lub na ing cayang pamaquirame caring abe na qng guera, inia ginawa cung sulat cang Joab a jeneral na at Y Urias ya ing mismu ing tiburan cung magdala, e na balung ing calamnan ning sulat a darala na ing maplas nang camatayan qng labanan na ning Rabba, ipabili que y Urias qng arapan ning batalya at caibat paingulutan de ban qng laban miragsa ya. Milabas ing pilan aldo ing tubud na ning Jeneral dinatang ya arapan cu at migsulit manga-utal sinabi na qng mapilan caring matapat cung cawal miragsa la qng lele na ning cuta ra ding capagcal; cabud abalu cu iti, ing cacung daya mibucal at ing mua cu abatas na ning tubud a menigalgal, inia ban minawa cu lub sinabi nang memirapal qng Y Urias cabilang ya caretang cawal a mibual. Menagis ya Y Bathsheba qng cabislac nang mipase iniang yuli deng iburul itang sugatan nang bangque, acu ati cu siping nang manaru qng queang lumbe e na balung acu mismu ing cang Urias pepapate, pepaquit cu caring tau ing tapat cung mequirame layun cung minie capurian qng tepangan na ning mete; calabas ning pamagmalun, y Bathsheba, inuli que ban qng caba ning panaun asawa queng matutunggue. Ngening ala ne Y Urias mandilu cu qng ligaya ati ne qng candungan cu ing marilag nang Catleya, at caring panimanman cu lalung lingcas ing leguan na pamilugan ya papaluan uli na ning darala na, at ing darala nang iti uling balu cung cacu ya bina cung casasabican ing aldo ning paniatang na; potang lunto ne qng yatu princepe queng paquilala magpiesta yang caragulan ing Israel at ing Juda. Misan pa, qng balconaje, magmain cung timan-timan ing nectar ning tagumpe cu mayumu queng sisimsiman, pablasang ing cacung lijim e ne lunto capilan man cambe neng metambun Urias qng malalam nang cutcutan; cabang lalon que ing sibul qng busal da ding tanaman lepitan na cu ning tanud, binie na ing cagalangan; sinabi nang atin dalo, buri na cung paquiquitan metung ya caring Propeta, at ing cayang laguiu Nathan. Qng pamirungut ming Nathan, iti, ya ing pigsulit na: "queta pung metung a lugal, atin aduang tau", ngana, "ing metung calulu ya pu, ing metung atme cacualta, ing macualta pu at mu ne caracal a sese tupa; dapot ing taung calulu metung ya mu ing tupa na caluguran ne pu iti ,mamangan ya qng palad na; at misan pu ing mabandi mica atin yang bisita inia mitubud yang ipus ban misadyang pamangan da." "Aguiang dacal lang tupa nang malagu at bayung tubu ala yang buring miyapag caring bisita nang dayu, qng balang micapamangan--quetang quesiasan nang pusu-- ing tupa na ning calulu yang quinua nang pepalutu." "Ninu ya ta ing taung yan?" Ngacung guincas micacasbu "kamatayan ya ing dapat qng depat nang macalicu; mamayad yang alang sala qng macatapat a ucdu!" "Mal cung Ari", nganang Nathan. " ing taung yan, icayu pu!" "Ing Dios, binie na quecayu upaya ampon pibandian, dinan na cayu pa ning Dios nung quecayu culang pa yan, qng queraclan ding babay qng sarili yung tucnangan ba't ing asawa nang Urias ya pang quecong pag-imbutan; at ila ding ginamit yu ding pataram ding calaban inacdac yu la cang Urias bayang mate qng labanan; ing catulid a parusa qng depatan yung macanian agpang mo qng quecang atul, ing marapat, camatayan." "Macanian man, ing Guinung Dios, pabustan na cayu pang mie, ing anac yu cang Bathsheba, potang datang ne, yang mate; ing pataram e ne lacuan ing quecong pibale-bale layun dagul ing sigalut a gumapang mangulabe; ing depatan yu cang Urias, ing asawa na, quinua ye, daptan na naman quecayu ning mismung siping yung bale depatan yung macalijim, ya daptan nang macalague, ing mabilug a balayan, ausan ne pang manalbe." Cabud cagulut nang Nathan, canita cu mengilabut mengablad ing cacung laman qng dine cu ampon tacut; uling cacung apialas, qng Dios, e macasalicut ing depatan cung palijim lalam aun macacutcut; at quetang penadit aita penamdaman cung mengutcut qng mabilug cung calamnan ing caplas ampon ing quirut angga qng mipasiclod cung menangis alang patugut sisising alang patanat qng depat cung pasalicut. "Dios co, ngacung miniambitan, " malunus co pu canacu tau cung palpicasala ibat qng mipangagli cu, bucud mumu, ica , Dios co, icang picasalanan cu inia queca cu dudurup at maniawad pacalululu bustan me sanang luminis dungisan a caladua cu ing metung a bayung pusu ya sang ibie mu canacu, Pagamuamu cu, Dios co, e me sa lalaco cacu pabustan meng manatili , ing Banal a Espiritu." "Dios co, baluan cung nung waman mi-ampang cung ain queca e mabawas ining salang depat cu qng quecang mata; at aguiang nanu man ain ing qng altar mu isampa maliari mung a isacwil a payalan mung ulaga dapot ing e mu agawang apisawili mu sana ya ing tantung pamanisi ning metung a micasala inia ulit-ulit Dios co, pagparalampu cu queca ibie mung pamamatawad ......patawaran mu cu sana." Aral: Caluguran cung babasa qng "Aliguat na ning laman" ing quecatamung istoria, quen taya pu pupututan, ing aral nang babie niti nung buri ye pung isimpan ya itang acaquit ning Dios yang dapat a macapampan; inia, nanu ya man sana ing babalacan tang daptan ganacan tang atin matang e tamu apaglijiman calupa nang Aring David, aguiang pecalijim ne man, ali ne alijim qng Dios ing depat nang casalanan. "PUNI" neng Paing Kasanting ning poesia mo paganaka keng milabas, Itang puni keng baryu ta, babie saya atmung timyas; Kadalagnan at baintau neng bengi akit mong lumwal Mipamutikas lang aske, ibat miyaliwang lugal... Kabang gagale lang pasyun ketang bosis dang matarling..! Ketang kilub ning bisitas detang mitutukan karin; Abala lang magserbisyu ding dalagang misnang injin, Ding galyetas, pitabasan, paniltilan da king ice cream... Ikami naman kanita kunan mi ne i kalakyan, Saklit mi ne itang paud ketang tundun at king batal; Igutan ne ing gareta mitmu kaming pakasandal Munta na ke karing baryung magselebra king aldong mal... Kabang dalan king kalampag ning garetang alang muelye, Bugbug na ing katawan mi kalibe ning kekeng ayli; King tula na ning kabengian aslag ning bulan kekami Parati yang paganaka ning maleldo at ning puni. Metung pang kasasaya na itang bie kung milabasan, Abala kung migugulis neng ing puni yang daratang; Ipinta ku kareng altar itang lasa nang delanan Ning Guinu tang Jesukristo yang lalon dang tatalangan.. . Mipalad kung makadake king sakripisyu nang Kristo, Ing maglame kung gagawa ketang arap na ning patyo; Kabud kayari da reti panyabit dong pakatikdo Karing miyayaliwang altar kareng siping-siping baryo... Ing delanan kung kasanayan maragul yang mekasaup, Karanasan ku neng puni pamagpinta kung masinup; Pamanyulat anti mu rin anti ngening midadaup Ing Puni neng Maleldo bie nang Kristo a malugud... Mal A Aldo Qng Baryu Neng Edgardo Bonus Sale Aro canyaman oyan na paratang na ing Mal A Aldo Alub cu nang misara ing clasi bulan ning Marso Ban na cu pin muli qng baryu nang Indu co At ca rin cu pupusan ing pamagbacasyun co. Aquit cu no naman canyan deng mangalagung babai Queta qng baryung pipunpunan ning pamilya mi Lalsut la rugu ustunng atin ocasyun calupa niti Tucnang cu qng bale matua quilub ning atlung bengi. Umpisang mierculis santu 'gang biernis santu Ing Puni qng malating baryu Santo Rosario Pau. Muna at caduang aldo gastus ning libutad at sepu Catlung aldo ca ren yang aduang macualtang bapa cu. Pablasang ala pang curyenti qng baryu canita. Deni pin aduang bapa cu ila na ding manibala Qng generator at sulu ning bisitas, babie sala Careng mamasang pasyun a bisang maqui pamasa. Qng arap ning bisitas ca rin mo aquit at damdaman Dening aduang bapa cung alang patugut maqui arbulan Atlung benging wewe anggga na qng mapupus ing cabenyan Ca reng memalen ning baryung, y la ring tatangalan Potang lungub no reng mipisan pisan qng bisitas Maca lawe langan deng mag serbisyung mi amas amas Misisitsitan la't mibubulungan deng mangalagung damas Alub da na mung cumabsi cami ngan a alang cabas. Cabang mamangan bala mu anti queng ari't prinsipe Pagsilbian da queng mayap, ma ustu at masese Deng memuntucan qng Puni e la bisang mipacarine Ca reng aduang bapa ming dacal a ambag at binie. Macanyan cung atatandanan ing Mal a Aldo qng baryu Cayabe cula deng pisan qng Menila at qng Olongapu Asmu que casaya canitang mabie ya pa ing Ingkung cu Alus manganingaldo cami queng cuentuhan magcusuelu. GANACAN MU CU Neng Tiakbong Marso 2007 Sagad queng pagal migquera queng lande Miyayo ing tundu...isip. . patda't sinde Beluctut catawan....ulas belabalan Mipasno cung bagya, ing dimla mipampan Belag ing catawan....dinuyan ning tundu Sepupu ning ulap...disnan cu marayu Bigla cung milingat...agad memalicuas Baleng pitudturan digpanan ning quildap! Mumugun nang dingding babasuc bubungan Deng catubale cu, ustu ra mung milual Minayun masican!!..Quisug ne at silsal Pibandian a bale, pundasyun meyabual! Anyang menjimik, alicabuc dinatila Bubungan at dingding quing gabun minuma Detang casangcapan, pibandian aliwa Mistulang basura..ala nong ulaga Queng pangagulmuc cu at pangabigla Papelas, letratu, 'la nang aganaca Busal ning basura, munang acalcal cu Imaje nang Cristo, quetang crucifijo! Mitangal canacu, payac Mung Ichura Ing crucifijong ini, bage pin basura Dios, Guino co, paniualan da na Ka Queng bayung altar carin que dambana Patawad,salamat, paninap ya pala Daratang na mo ing Semana Santa Lasa Yu Guino, Via Dolorosa Peuaga Mu cacu, Ica paganaca. "MAL A ALDO" neng Paeng " Ibpa patawaran mu la era balu in gewa ra..!" Makanyan yang tiktak lugud...oyta karing amanu na... Ing anak ning Dios kaku, itamu ngan ampo keka, Panyad na ka ta pang tawad keng gewa tang sala Kaya..! Nunu ing kasalanan ku..? E ku anting mangalingwan. .. Nanu ing pamagkulang ku..? Saliri kung gunam-gunam; Ala kung balung agawang marok at kapangangasan, Keng belwan ku tapat na ku king amanung Kapampangan. .! "Akalingwan mu na wari," inyang misan nganang Kristo, "Minta ka king Shoe-Mart abe, ding pekibat mung amano..." "Magandang hapon po naman, maganda rin ang tinda n'yo." King mekad e mu male... "Belasbas me ing gulut ko..!" "Layun me pang pikpuk masu, ing gamat kung daraya na, King indu mung Kapampangan iniang kanitang menatba ka... Karing padala mung sulat ketang kekang kapalsinta, Ing pawaga mung lugud pawang English ing laman da,,! Ala Na kang tuknang panyad kapatawaran pa mu rin, Neng miras ka king obra mu yang Tagalog ampong English, Gagamitan mung salita mekad e mu apapansin... Atyu na ka man Pampanga o ing sangkan usu karin..! Sasaganan taya ngeni Mal a Aldo itamu ngan... Sisisian ku nang mataktak ing gewa kung kasalanan; Ding kesalubung kung tau king Pampanga manuknangan Aliwa ing amanu ku karing kakung asaganan..! Pangaku ku karing kakung akayugne at susulat... Karing Ka-Kapampangan ku Kapampangan ing pagmulat; Kapampangan a madikdik ing kailangan a misulat Karing taung Kapampangan agyang nu ku man sa miras..! Nung buri meng pagtumayla ing Kristo tamung Ari... Gawa katang poesia o sumulat 'tang parati; King amanung Kapamgangan, ing salita tang' ibili, Ding mamasa at manatba kanita no mipatuki..! Ngana pu salangi tana king Puni na ning ugnayan... Mamasa ta nang pasyun ketang lasa Nang delanan; King bunduk na ning Golgota ning amanu tamung sisuan, Sumulat ta nang sumulat king amanung Kapampangan. .! RDM I N R I by Louie Escoto Babo ning tungatung ning matas a bunduk atin maka paku maka duku buntuc dara ya kanuan a betibat suksuk at ing kayang salu inatsit yang tandus Tutulu ya lua king maragul nang sindak at ing anak ning Dios mepilit yang kiniak kung ing sumbat mu pin tutu yang mabayat bakal ya mang salu misan ya magabak Ding liban ding paku maplas at pipitik sasaguid king butul ing lasun at sakit king panga agpa na lalasang tajimik oyan na ing waga ning sindak a mabagsik Arapan ning birhen kakung panigapu lugar na ning bungsu aku nang mag paku libe ning mate ne king isip at pusu ing metung a Evang e biasang mangaku. Pamagsadya Neng Renato B. Alzadon Marso 2007-Baltimore Qng mialiwang bague, tutung cailangan ya qng bie na ning tau, iting pamagsadya; inia, O' capatad, canacu damdam ca ing capupuntan mu pagsadian me sana. Bayu sa miras ya pamananam pale ing quecang asican a isadya mu ne, nung macasadya ya masipag lang maswe dening maquisugu, qng quecang marangle. Bayu ya mibait bungsu mung panayan mangisadya na cang lampin at imalan; nung maliari mu rin pati na ing duyan nung nu me iyuyu pungul mung irugan. At nung mag-aral ca, pacasamasan mu yan pamagsadya ya para qng bucas mu, nung e mu pagsadyan ing paintungulan mu bandang tauli, ica, ing lunto calulu. Magsane ca pamu, bayu mangangas ca marap qng labanan quilub na ning rueda; uling nung marap cang alang pamagsadya pialungan na ca mu ning quecang cabangga. Bayu me sa gawan ining quecang cubu isadya mu na pa ing anggang gamit mu, nung macasadya na ing cailanganan mu ali ya mitangtang ing tatalacad mu. Bayu ca maglutu qng quecang cusina gamit mung paniangcap isadya mu na pa; nung macasadya ngan e ca ma-antala lunto yang maniaman calutu mung guewa. Qng mamagsadya mu, e mu cacalinguan ing bie queti sulip atin yang angganan inia marapat mung pagsadyan mia naman aldo yung pamiquit ning Dios mung sasamban. Now, go to: http://maxpages.com/poecia/poecia58 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00177 |