 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY - PAGE 56 |
 |
| ERNIE C. TURLA - curator |
| ||||||
| continuation of Shanty Lala: by RENATO B. ALZADON, poet laureate Cabud abalu cu iti, ala cung oras seyangan acu mismu ing migcusang masipit queng panintunan, mengaparas cu qng Brooklin angga qng sepung Manhattan nanan me ta yang manintun carayum queng pipalutan; dapot iniang mabengi na....itang lupa na ning bulan paganaca ne ing napun...., Miercules bengi pa naman..... linual cu qng I-95 .... susulapo cu qng dalan..... atlu mung oras disnan que ing Pisamban San Esteban. Perada que Y Matador qng arap na ning Cumbentu pintan que Y Padre Rolly a sadyang taga-payul cu; caibat cung binie ing tungcul selita cu ing pacsa cu panintunan que Y Rosa.....miwaglit yang pasibayu; " Capamu", ngana ning Pari, *nandin, bayu cu maugtu, atin cung iquit maglacad quen qng Lumang Cementeriu, capamacde ne pin Rosa, malamang, ya pin siguru. Nung ya pin ya, baquit caya, e man mequiquit canacu?" Binie cu ing pasalamat, caibat, minuli cu bale tinaglus cu quetang balcun at tajimic mibubule, mecabulad, e cu seria, yang ayatdanan cung lawe ing mibansagan Golgota qng libutad ning marangle qng quecaba ning panaun.....quen, maluat cung e linele ban e cu nia aganaca ing liguran cung miwale, uling cabud megaral cu qng catiwala licuan que ing pamanibalang lubus quening sibul ning pagcabie. Bigla cung quinarug salu....! Tinipa cung malalagua inuquiatan queng misan pa, Tela-bunduc cung piniumpa, mecad buri que mung aquit itang dutung a miragsa uling ya ing pecasimbul na ning sintang alang calma, dapot quetang babo batung pipagdapugan cung cusa carin....carin que atagpuan ing panintunan cung mutya...! agad-agad queng lepitan....canita cu abitasa..... . ing Rosa ning caladua cu, Dios co, bangque yang maputla...! Quetang penandit a ita, bisa cung palto milagru a lub cu na mung Y Rosa mie ya sanang pasibayu; dirinan queng pagisnawang ibat qng pangisnawa cu gigisingan queng pusu na qng bayang mica-animu; aguiang nanan cung gamitan beluan a tiru da cacu ing mumuna cung pasyente bitasang ala neng pulsu; macanian cung apialas aguiang nanu pang gawan cu Y Rosa, meco ne naman, at misan pa, licuan na cu. "O' macamulang a sinta", ngacung matning ginulisac "baquit guewa meng pialungan ing capalaran cung muslac, inucuc cung sabo pait at agtang pecamasalpac qng pamisanga ming dalan ning pilsintan cung busilac, balacusa sumangid na ning calungcutan at sindac atin tulang manenaya a minlungan qng sagacgac; O'bat ngening atagpuan que ing mal cung diling bulaclac metanggal ya qng tangque na, ala neng bie, aguiang ditac...!" Caibat ning cacung sambitan, ila ding apansinan cu detang boting alang laman ding miyaliwang panulu; deti, ilang ginamit na anting pecainstrumentu ban dinan nang cayangganan ing queyang bie queting yatu; at quetang sinag ning bulan at Flashlight a darala cu apansinan que ing sobre a macapatan qng batu, at pablasang ining sulat macalagyu ya canacu bisni que bacung abalu ing sasabian na nung nanu. "Caluguran cung Renald Jhon, mamun cu quecang misan pa maglacbe cu qng marayu, lipat da ding biga banua, mecad, cabang babasan me ing sulat cung licuan queca marayu ne apuntalan ing lilipo cung caladua; dapot...buri cung malacuan ing pasalamat cu queca qng pepaquit mu canacung taimtim a pamalsinta; oita mupin, calupa na ning abasa cu queng Biblia dinatang ca quening bie cu.....ali ra ca aquilala." "Dinatang cang anting tubud a bildug ning Banuang Matas ban catmuan me ing pusu cu qng sintang alang catumbas; dapot, nanung inablas cu qng pamalsinta mung wagas...? Piglibe ra ca qng canta, at qng taguinting ding cuerdas, iniang paquisabian mu cu carin cu lubus abatas ing pacamal mu canacu, catuldic man, e mebawas, e mu balung ing pusu cu pusu ne ning talipandas atiu qng pangatau cu ing pangatau nang Judas." Nung atatandanan me pa itang canta nang Patsy Cline ing canta, yang amanuan cung mamulang cung apalsintan, nung pepaiguit que ing canta, queca, e mu panamdaman pablasang apalsintan queng miguit qng Dios cung sasamban; ding quetang minunang aldo magcanta cu qng pisamban ing canta, aliwa ing Dios, ing tune cung parangalan, inia, aliwa mu ica, ing canancung pigtacsilan pati ing Dios na ning banua pigtacsilan que mu naman." "Ngeni cu pa apialas, ing Dios, samban yang mumuna at Ya, cambe yang parati, aguiang nu ca pa man munta, nung ing Dios ali me abe, aguiang managumpe ca pa, ding bunga ning tagumpe mu, mapait mong apilasa. Renald, ngeni cu sisisian ing cacung pamicasala idalangin mu cu qng Dios, patawaran na cu sana, at patawad ca mu naman qng pamagculang cu queca.... Mamun cu queca, irug cu, dacal a salamat. Rosa". Mengilabut cu calamnan.... .uling cacung acalaru qng acu man, calupa na, pigtacsilan que ing Guinu, deta nang Miercules benging cunwari mo sisimba cu Y Rosa, aliwa ing Dios, ing sasamban ning pusu cu at quetang pangabijag ning mabilug cung pangatau cang Rosa que tegulaling ing cabilugan a bie cu, yang pepaiguit cu Y Rosa qng sabla queti qng yatu pablasang apalsintan queng miguit pa qng cacung Guinu. "Dios co, patawaran mu cu, apalsintan que Y Rosa patawaran me mu naman apalsintan ne ing canta, dapot Ica....Dios co,,., Dios co... e ca sasawang malsinta queca ming mangatbud pusung anac ning pamicasala; Dios co, patawad ca Dios co, alang-alang qng daya na ning anac mung dinaun mu qng babo na ning Golgota; ing depat cung casalanan ali ne miulitan pa ibat ngeni, ing cacung bie, tatagulaling que queca." "Sasalpantaya cu, Dios co, ing lugud mu alan'anti e me maliaring isacwil ing caladua cung sisisi, macanian cu pung lalapit a taimtim maquisabi idayu ye qng pusu cu ing dinat a macariri, cambe ning bayu cung pusu tulutan yu cung magsilbi ban qng dapat cung casuyuan ing laguiu yu yang mapuri, at tatantu cung matibe, Ibpa co, manibat ngeni ica ing Dios cung sasamban at palsintan a Ibpa mi." Linawe queng mitmung lugud ing lupa ning cacung mutya at anti mong capamunan tetac que ing tauling uma, "Acu man, mamun cu queca", ngacung mainang migsalita, "mamun cu qng milabas ta at qng paintungul tang mipda; ing istoria na ning bie mu maguing aral yang daquila at cacu yang isambulat queting babo ning masala ya sanang lungub qng pusu ning ninu mang macabasa ing Dios, samban yang mumuna....e Ya dapat maguing cadua." Oyan ing canacung Rosa, pilsintan queng calupa yu ing quecayung Shanty Lala, a simban yung calupa cu nung buri yeng adalawan, San Esteban munta cayu macalibing ya libis na nitang Lumang Cementeriu; ing aquit yung pecatanda, metung yang lapidang batu a nung nula macasulat detang licuan nang amanu: "Agyang managumpe capa, nung e me abe ing Guinu, mapait mong apilasa ding bunga ning tagumpe mu." For the next page, go to: http://maxpages.com/poecia/poecia57 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00126 |