 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY - PAGE 55 |
 |
| ERNIE C. TURLA - curator |
| ||||||
Shanty Lala neng Renato B. Alzadon, poet laureate Baltimore Md. USA/07 Qng Pisamban San Esteban, Miercules bengi canita iniang minuna queng iquit ing simban cung Shanty Lala; macalucluc ya qng arap....maquicandun g yang guitara.... tambing dinalan qng lub cung ya ing Cantor na ning Misa; at quetang pamangadi cu qng Rosario ning Ligaya patawaran na cu ning Dios, ing lawe cu atiu queya, cabang macasiclaud cung pagumasdan ing leguan na anti cu mong manalangin arapan ning mabie Santa...! Meg-umpisa ne ing Misa---ing Misang e cu pansin man--- uling itang mabie Santa ya mung bucud cung pagmasdan; iniang iti magcanta ne mengilabut cu calamnan qng lambing ning siwala nang miglawiwi qng pisamban; lalon co ding taliri nang alang mintis mamialungan caring cuerdas nang tatabling ning guitara nang tatalnan; at cabang ning magcanta ya ding tau tajimic langan alus e no mangisnawa, qng ban lubus deng damdaman. Ing Misa yari ne ata...? Memaglaco no ding tau.... Sangcan-sangcan cung mangadi cabang ya mu ing lalon cu; quejun ne ing guitara na qng pangimut a mapinu at minarap ya qng altar, minie yang galang qng Guinu; at iniang maglacad ne yan acu naman ticdo na cu.... Misalubung lang mata mi.... tiniman ya....tiniman cu; dinwang ne ing queyang palad....inabut ne ning palad cu: "Renald Jhon Ray", ngacu queya, " Rose Ann Conner", ngana cacu. Telan que ing guitara na......acung memitbit caniti at miglacad queng papunta qng queyang saquen a Chevy; ca lub na ning guitara na migpasalamat ya iti at mequibasa ya cacu...atme cayagang casabi..... e melambat itang bulan menandauan ya quecami anting buri neng damdaman ing quecaming apisabi, yang quequeng apicasunduan , tutuquing Miercules bengi, miquit caming pasibayu, queni mu rin lugal aini. Caras ning Miercules bengi, calupa na ning minuna, miquit caming Rose Ann Conner, qng Pisamban, caibat Misa, pasibayu pigcusan queng binitbit ing guitara na at qng paradajan saquen sindu mi ing pamibasa, at ing pamibasang iti, yang cacu meguing gayuma ban queta e cu salanan neng Miercules ing sisimba, inia naman ing miliari manibatan na canita sisimba cu baqueng samban ing canacung mal a Santa. Qng quecaming pamibasa, ticda ning calma siguru, qng milapit cu lub queya at milapit ya lub cacu, miyawusan queng parati panga-oras nang maugtu a maralas caming lulual, nung e Biernis, neng Sabadu; at neng atin yang pupuntan a cantajan, abe nacu lalu caring catatagan pangcayanacan Cristianu, potang ibat neng migcanta at ducu ne caring tau mecamasican yang dili ing palacpac ding gamat cu. Yang mang rosas qng mulajan nung ganap ya pangasese mibucadcad ya ing bucung qng tangque na magpatawe; calupa na ning pamiutus a malambis at dalise ing bucu ning capalsintan mamucadcad yang tiwase; ing quequeng pamicalugud macanian yang mica asque panirug yang qng suyujan sinilad at micacule ulinita, pignasan cung caba na ning canacung bie qng santungan cu qng parang ya sang cacung acayabe. Ding malugud cung pengaring menaliwa nang carinan licuananan dacung bale at malualas a tamnanan; ing lulub dang maguing abli ding bunga ra ding tanaman sapat neng pangabiayayan mi, wari't micasupling que man ; inia ngacu mong mimisip, nung yang canacung acalman aguiang ali ne mag-obra antimong X-Ray Technician, O nanan ne pa ing Fallston Hospital nang piluluban nung ya namang maguing Reyna quening berding caparangan. Neng batiawan que qng balcun ing malualas a sabana yang catulan cung pagmasdan itang bunduc-bunducan na, qng cataba na ning gabun nung baquet calibudtan na carin ya ing Talimunduc a inaus ming Golgota; at uling masias ya gabun , batu ampon palanas ya inia nung atin tutubu, dicut gubat ing aus da, ing bugtung a matuang dutung a carin aguisnan cu na misan, qng sican ning baguiu, qng Golgota, miragsa ya. Ding sanga ning matuang dutung pemutut cu at selansan cabang itang miragsang pun carin ya rin macalangan; meguing panugali cunang neng masala ya ing bulan queni cu gagawang dapug babo batung mitatamban; cadalasan pin Y Rosa queni na cu pupuntalan at paramdam no canacu ding canta nang pagsanayan, ing paboritu nang canta....itang canta nang Patsy Cline Ya cabud ing cantang " Crazy" ....Mamulang ing Capalsintan. Ing sinta, tutu pin ata, qng iti, macamulang ya pablasang mamumulang cu qng pamalsinta cu queya, mamumulang cung magnasa caring nectar ding labi na mamumulang cung sasamba qng pambijirang leguan na at qng cacung pangamulang e cu na aganaca pa ing maquisanguni qng Dios, nung iti, Ya, caburian na, ngacu mo nung cacu ya rin ing buri cu sa ngeni na uling pitatacutan cung ding aliwa, acua re pa. Tatacut cung mawala ya qng bie cu ing cacung casi lalu't e na que sisismba caras ning Miercules bengi, lugal sanang qng pisamban ume yang magcanta iti ing pequiabayan nang grupu yang pupuntan nang parati, queni cu cacarug salu, magcang ining grupung ini yang ing lunto maguing subyang qng suyujan ming titindi ban ala nang sigalut pang sumiro qng bandang tauli aduan cung qng altar ning Dios mibuclud la ding pusu mi. Cabilugan ya ing bulan. Siluan ning sinag nang guintu ing pamagdapug ming Rosa qng Golgota na ning Pulu cabang teterac ing aping atmu pali qng calucu ing dimla na ning cabengian ala yang tugut maquialu; at cabang qng pun ning dutung carin ya macapatimpu siniclod cu arapan na cambe na ning panigapu inawad cung caba ning bie ya sang cacung acasuyu at inabut que ing singsing a mana qng cacung indu. E ya agad mipabulad. Inia naman maniabi ya ginulis la qng pusu cu ding amanung sinabi na: "Ing buri cung acapalad caba na ning bie cu", ngana, "ica, at ica mu Renald, at ala nang aliwa pa; dapot, ipanupaya mu, mamilatan ya quecata ing sicanan at upaya ning apalsintan cung canta at pablasang alipan cung talasamba ning musica macanian queng e atanggap ing simbul ning pamalsinta." "Queragul que ing musica, ibat qng pipunan cung pun musica ing pigcabie ra, at yang dela ra qng aun; inia, ala cung upaya ban salangsang cu qng amun na nining mapaling dayang qng uyat cu manaluntun; nung acu, e cu magcanta, ali cu rin mipaindatun angga mu qng magdusa cu qng palsimi at pagmalun; inia mu pintalan daca ban queca cu sana mamun uling tuqui cung maglayag caring miyaliwang gabun. " "Maco na cu", nganang Rosa, qng saquildap a saguli ing catataulian nang uma tetac ne qng cacung labi; bayu cu mecapaniabi ginulut neng memiragli casaque na qng cotsi na mabilis neng pepulayi; megapasandal na cu mu qng pun dutung a melangi nanan me ta yang tanaman a dinungdung at melawi; penandit pa, itang dimla ning cabengian, yang migwagui waga ning paintungulan cung undap-undap na mung api. Sinalicut ya ing bulan. Ing banuang migcule pisac sigatan neng alang lunus nitang quildap a menacdac; itang curug na ning duldul susunu ne qng sasagacgac ing calungcutan ning banuang maquilua nang patac-patac; ing quildap a atmu taram inamun queng gugulisac ban qng sugatan cung pusu queni ne pin man tumarac pati duldul inamun cung quening salu ne mibagsac ban ining lapac cung salu mamin nengan mangalapac. Ing quildap ampon ing duldul e ra cu pequiramdaman pati ila licuan dacu babo ning bunduc-bunducan, ala na cung cayantabe nung e ing patac ning uran a cayambula ning lua cung balamu uran na naman; at quetang penandit aita busal ning queralumduman pati na ing pamisip cu madalumdum na mu naman ya nang mamale qng lub cung maniaman de ding maniaman nung mawala ne ing bie cung ala na rin paintungulan. Ibat qng cacung Golgota tinipa cung alang inge mindilu cu at mibablas cabud miras cu qng bale; tinipa cung balus-balus qng cacung cotsi sinaque balac cung qng metung a "Bar" carin nacu taglus ume; ing atiu qng cacung isip ing manintun cung capate ban queta maus lang pulis qng ba'ra cung asalese at ing metung caring pulis ing baril na samsaman que ban queta barilan da cu, at macanian cung paimate. Qng bilis ning cacung saquen balamu susulapo cu e miglambat arap ning "Bar" perada que ing saquen cu, ustu cu pa mung miculdas iniang cacung acalaru macasara ne ing pasbul---- mamaglaco no ding tau; linub cu qng cacung saquen..... cabud na cu migmaneju... . nung nucarin cu misadsad bajala ne ing Dios cacu; mecad, Ya, caburian na pin, nung ba't qng e sasarian cu qng lugal cung quesanayan sinadsad cung pasibayu. Quetang paradajan saquen na ning Cantor na ning Misa ba't carin cu mipasadsad anting manintun cang Rosa...? Qng calalaman ning bengi a mecad mayayabac na baquit ing lupa ning bulan pasibayung migpalto ya...? At quetang matuang libingan ding migpainawang minuna nanung sangcan, ding bitis cu, o'bat carin da cu dela...? Ing canuan cung macaducu inia cabud yatna cu ya o'bat yang canacung iquit ing taung macasutana.. ..? "Renaldo", nganang menatu canacu ning Amung Rolly "mecapisabi queng Rosa, dinalan ya nandin queti, a bayu cacu memun ya abangguit na nung nu anti ing beyatan na ning dusa a licuan na queca niti; inia cabud aramdaman cung atin migparadang cotsi balu cu nang ica ita munta ca qng lugal aini; macanian cung memilaguang sinalubung queca queni ban canita saglit mu man acua racang acasabi". "Baluan mo", ngana ning Pari, bilang tau, itamu ngan miyaliwa tamu jilig miyaliwa ta caguiwan, atin taung ing widu na atiu queng pamananaman at atin mu naman taung maquiguiam queng pamanasan; inia, nung Y Rose Ann Conner ing tula na canta ne man pabustan mu ne canita, ali mu ne ambanganan; ipanalangin mu namu qng malagu ya parasan macanian ing tune lugud, e manayang cayablasan. "Anac co, aintindian cu nung nuya anti casaquit ing caplas ning sintang bigu a qng pusu mu manatsit; dapot e mu sa pabustan ing mie ca qng paguinaquit uling lalu yang titindi ing salpac na ampon pait; ing Dios e na ipaintulut ing mamusan cang macaiguit quetang aguiu mung adala....quetang aguiu mung abitbit; inia ban minawa ca lub a malumpawi ing saquit qng alang capicacunuan cacu mu ngan ipagsulit." "Bendisyunan mu cu, Padre, ngacung mengapasiclaud "Pablasang micasala cu qng isip cung e macatud; nandin pamu, qng lalam ning pamanialpantayang matbud buri cu sa ining bie cu mipase ne at macutud; cang Rosa, Padre, cang Rosa, caya cu ngan pepabucud ining alang cayarlayan at pamalsinta at lugud; dapot siquil ne ing nasang ya sang cacung acabuclud at qng dagat ning pagsalbat licuan nacung malulumud." Itang lumang cementerio, a besa ning dalo uran, arap na ning matuang Pari miliari yang cumpisalan; ing anggang balu cung sala caya sinabi cu nangan pati na ing pamagnasang miquit na queng camatayan; ing anggang atiu qng lub cu caibat nang pequiramdaman pigpayulan na cung mayap nung nanu ing cacung daptan; binie nang pecaparusa ing magdulap cung cabiasnan carin ne canu acaquit ing maslag cung paintungulan. Bayu cami micawani, binie que ing amanu cu qng lungub cu qng escuela, magaral cung pasibayu. " Ing buri cung pag-aralan", ngacung caya mengamanu itang cursung macasaup quening dusang cacamtan cu." "Nung macanian", nganing Pari, agpang mo qng delanan cu ing cabiasnan mung paintunan calupa ne ning canacu, ban cumit cang capayapan, ing bie na ning Cristong Guinu, yang dapat mung pagaralan qng lub na ning Seminariu." " Panupaya mu cu, Padre", ngacung migsalita caya aguiang nanu pa pung cursu e mu sa queng Theologuia yaring ing dapat ma-ulu ing mamulang cung malsinta queng linia ning Psychiatry ing marapat cung carera, "Nung macanian", nganing Amung, " yanang pilinan mu ita ligaya nang tangalan cung magsumicap cang mabiasa at qng quecang pamag-aral, ing Dios mantabe ya queca, minuan ca sa at mipalad, queti sulip anti banua." Calupa na ning pisabi, qng coleguio linub cu pin metanggap cu qng escuela na ning bantug a John Hopkins itang napun nacadua nang pamagdusang sapin-sapin pacacalale quinupas ....pacacalale mipinpin ; O' wa, atin pin saguling agaganaca que mu rin mupin, e anti ing sadyang qng isip que misisinsin, anti na ning ing cabiguan tinggap cu na at inamin ing canacung pamag-aral a pag-uculan cung pansin. Mag-apat nang banua ngeni iniang ing simban cung mutya sicwil ne ing panigapung acametung que sang calma mecad qng pamag-aral cu migculangan cung balita ing laguiu nang Rose Ann Conner e cu ne dimdam bitasa; pamisan misan queng radio macaramdam cung siwala balacu sana bosis ne, dapot, lagyu yang aliwa; nung misan, e cu abata, cabud cu nia aganaca..... itang mal cung Rose Ann Conner, mipacananu ne caya...? Dimdam co ding caclasi cu qng pacsang pisasabian da atin canung bayung batuin qng banua na ning musica, million la ding misasaling copia ra ding queyang placa casalucuyan yang atiu lilibut qng Australia; at misan, qng telebisyun ning Hospital, qng Cantina, ayalben mi ya palague ing sicat a amanuan da; ya pala Y Rose Ann Conner, binayu ne ing laguiu na, mibantug ya meto-yatu qng laguiu nang Shanty Lala. "Shanty Lala, Shanty Lala", ngacung bubulung dili cu cabang matula deng alben ing palague ding abe cu, "Matula cu, mipalad ca qng landas a apili mu at disnan me ing tungatung ning tagumpe aingan mu; dapot nung ing capalaran mapait ya bandang sepu at e na ca misulapo qng banua ning taguimpan mu, magbalic ca, Shanty Lala, carening tacde licuan mu angga ngeni, Shanty Lala, angga ngeni, mal ca cacu." At misan mibalic ya pin ing cacung simban a dilag qng ciudad na ning Baltimore nung nu tutu yang bulalag; abe dacu ding tinagun qng pialben a mitatag e mo a bilang ding taung babo dicut memaglatag; calabas ning benging ita sindu na ing pamaglayag dela na, dacal lang pusung talasamba nang abijag; at balang puntan nang lugal, anti yang Tala Ning Munag pupurian deng anting Diosa qng pedestal nang matindag. Yan mang Tala Na Ning Munag mawawala ing kislap na potang ing bayung panaun mibait ya qng alaya macanian ya ing miliari qng Venusa ning Musica anti ya mong talang maslag a quinuldas qng banua na; dacal la ding bayung batuin a sinlag a calili na angga qng bitasang e ne mababanguit ing laguiu na; ngacu mong migunam-gunam, nung sacaling mabie ya pa, nucarin ne caya ngeni, y Rosa o Shanty lala...? Pilan pang banuang milabas, qng Psychiatrical Journal ing casulatan cung guewa mipalimbag ya at milual; ing tema, ing relasyun ning macasugapang quemical qng saquit schizophreniang pamisip a mababangal; at iting pangalimbag na ning sulat cung pangdoctoral yang waga ning pamagyari cu qng mabang pamag-aral at ban macapagsane cu qng liniang psyhiatrical tinggap que ing residencia, New York, Lennox Hill Hospital. E cu balu ba't ing New York ya pamu ing apili cu ngening queni mu Baltimore macapagsane cung ustu; at qng dalan I-95, qng cacung pamagmaneju Y Rosa o Shanty Lala yang dinalan quening lub cu; Nucarin ne caya ngeni...? Atlu nang banua siguru iniang tauli queng damdaman pisasabian da ding tau; biglang sinulud qng isip a anti waring manucsu nanu ta ing cacung daptan nung miquit queng pasibayu...? Nung miquit queng pasibayu, siguru, e que alawe pota sabian ding mata cu ing e dapat masaglawe uling aguiang dacal la man ding banuang migpatawewe qng pusu cu at pamisip e ya lubusan miwale; ya ing sangcan angga ngeni ecu menaquit cayabe uling ing queya lugud cu macatanam ya pang tiune; at qng casulucsulucan ning canacung pamibule ya pa mu rin ing buri cung maguing capilas na ning bie. New York, Lennox Hill Hospital, itang Narsis cung pecaguia linibut na cu Hospital, caring miyaliwang sanga, at quetang Ward a masinup atin cung dimdam migcanta quetang canta nang Patsy Cline, "I'm Crazy for Crying", ngana ing cayantabe cung Narsis dela na cu arapan na protocol ya qng Hospital ing dapat queng miquilala: "Ms. Rose", ngana, " Y Dr. Ray ing lingap mu qng gamat na, Dr. Ray, ing pasyenti mu,, Rose Ann Conner----Shanty Lala". "Rosa". ngacu." comusta ca", dinwang que ing cacung gamat--- Y Rosa, aguiang ditac mu, e ginalo, e mequibat..! "Rosa, pag-amu-amu cu, bustan mu cung maguing dapat ban quening pangabilian mu apagsilbian dacang tapat". Dapot aguiang nang sabian cu bitasang e la mibuclat qng talic da pangasusi ding labi nang macacabat; canita cu abitasa nung nu ya anti cabayat itang piguyud-guyud nang macamulang a pagsalbat..! Cabud micawani cami, minta cu qng opisina at carin cu la binasa ding documento nang Rosa, ing camumulan nang Axis Paranoi Schizophrenia maquitambal pangaguna queng alac ampon queng droga; cadua , atin yang melacuan alang lagyung quepalsinta catlu, alang masasabing saquit na ning catawan na..... At detang queyang panulu miyaliwa nong lagiu ra alang daralan carayum. tabletas la at capsula. Istoria: Bait ya Ireland, iniang maglabi yang atlu tiqui no ding mi-inda na ning ibpang Americanu; migdatun la qng Baltimore... . iniang maglabi yang pitu mete la ding pengari na...acsidente queng autu.... meg-obra ya qng Hospital antimong X-Ray tecnicu ing jilig na queng musica.....mag- adua yang pulu't atlu iniang ume yang maglayag cambe na ning queyang grupu mibantug yang Shanty Lala queting mabilug a yatu. Iniang mag-atlu neng pulu....ing yatu quen neng gamat na canita ne penamdaman ing caplas ning bie ulila, at canian ne aganaca ing tune milsinta queya ing metung a alang laguiu a licuan na qng Golgota; ban mayampat ing palsimi peniubucan no ding droga angga qng mitas nang mitas ing doses a cailangan na, qng bengisan ning quemical melasun ing pamisip na angga qng misan a aldo mangalgal ya qng tacut na. Bayu ing pangasindac na mica-atin yang delusion qng ya, birjen yang milamnan---Imaculad a Concepcion.. . mitambalan ya pa iti qng queyang alusinasyon daratangan neng Satanas qng anyu ning Matuang Dragon, balang lunto ya'y Satanas metung ya mu aspirasyon ing paten ne ing anac nang maguing Ari da ding Nasyon, macanian yang mitambalan qng paranoiang emosyon tatacut ya cang Satanas at qng maroc nang ambisyon. Mag-atlu nang banua ngeni ibat qng pangasaquit na lual-lungub ya qng Hospital.... cumayap caibat saquit ya; macanano, calual na pin, aguiang sicnangan nang lub na maina yang alang ilaban qng sicanan na ning droga, lalu na, qng cabilian nang magdili-dili qng bie na licuan de ding queyang grupu iniang minunang saquit ya; darala ning cacaluluan ampon que-alan pag-asa e mu misan pignasan nang lasunan ing sarili na. Sera que ing queyang libru at sinicap queng ma-ayus caibat, qng lual ning Hospital mematyawan cung melaus; at quetang penandit aita penamdaman queng melugus ibat caring cacung mata ing mapaling luang minagus; pablasang ing cacung pusu mengatmu ya qng paglunus at ing caplas ning panamdam atmu taram ing gagalus uling qng bili nang Rosang qng aun magpatagusgus nanan me mo yang candilang undap-undap, matatampus. Pangabengi, qng pagqueran, biling-biling cung maliswas Y Rosa yang qng isip cu....e cu metudtud cabucas; panga-abac, quetang Ward na, quetataglus cung migtangas dapot Guardia la at Pulis ding disnan cung malingasngas; at agpang qng sasabian da, quetang e ra balung oras ampon quetang e ra balung paralan a mibalangcas, qng Ward a atmu casinup, babanten dang miamas-amas, ing pasyente Rose Ann Conner, cabud ne mu mecatacas. For the conclusion of this curiro (metrical romance), go to http://maxpages.com/poecia/poecia56 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00173 |