 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY - PAGE 54 |
 |
| Anthologized by Ernie C. Turla, president, Academia ning Amanung Sisuan, Int'l. |
| ||||||
| Table of Contents: 1. Ing Indu - Renato B. Alzadon 2. Kapasalamatan - RDM 3. Poetang Kapampangan - Renato B. Alzadon 4. Amanung Sisuan - Paing 5. Pamanyulat - Paing 6. Macananu Dacang Caluguran? - Art Tolentino 7. Macananu Dacang Caluguran? - Willie Dizon 8. Indung Balayan - RDM 9. Ing Bigbugan Ding Tulisan - Orlando D. Maniago 10.Ing Dusa Na Ning Kalulu - Orlando D. Maniago 11.Macananu Daca Caluguran - Art Tolentino Ing Indu neng: Renato B. Alzadon Mothers Day Nanu ya ing indu...? Metung yang himala a kena ning Guinu keti king masala; ban karing dapat nang makapagmulala akit taya gamat ing Dios a Bathala...! Gamat lang malugud detang makakilik king bungsung inirug matudtud tahimik. Malamyus nang aplus at manene tapik, ebanghelyo no ning banal a tangklik...! Kagising ning bungsu, nanu tang gawan na ban ene damdaman gumaga mo sana...? Ing daya na ning bie ibat king salu na ibie nang pamangan king bungsung anak na...! Potang ing bungsu na ya ing manamdaman akit me yang indu e miratun dit' man. Nung agawa nasa, ya nang misalunan at ining bungsu na yang kumit sikanan...! At potang lungub neng mag-aral ing bungsu mantabe lang tapat ding gamat ning indu, pablasang imbut nang ing daya nang pusu, king pamag-aral na, akua nang misundu. Pibata na itang dusa ampon sakit o aldukan kaya ing peka-mapait, nung ing katumbalas ning pamagkasakit akit ne ing bungsung king tula magkamit. Nanu tang galal na ning keyang pagbitkil... ? Inirug nang bungsu nung lunto yang sawil...! Nu man anti itang degulan ning ingsil, ding gamat ning indu...., ali ne asakwil...! King akakit tang yan, nanu pang misteryu...? Ding gamat ning Banua atyu la king yatu...! Nung buri yong akit ding gamat ning Guinu, lon yo ding gamat da dening indu tamu...! "KAPASALAMATAN" RDM Dakal a salamat keka, budning Renato Alzadon... Ing pekapun ding poeta king balu ku ikang lalon; Tatalangan da ring dakal, poetista't polasador, Talasulat Kapampangan king marangle ding orador..! Oyan balen mayayakit mipagladlad tang baraha... Ing panyambut kang Kang Rene agyang nanu pa sang tema; Pamanyulat kawatasan at pamigale poesia, Ing pusu mu bakal ya man, lumambut yang anting sutla..! Ninu yakung karamput mu ing belwan kung pamanyulat.. . Labung ku mung bayung alput at mabulu ku pa balat; Milele ku king paludpud ding buku nang misnang kasias, Mipasandal kung midikit karing kwayang pamanlangkas. O salamat kekayu ngan, ing pangasalangat ku keti... Kekayu ku mabibiasa misasane manatili; Ing belwan ku miraragdag sadyang asmu mu kalati, Ba ngeni darakal na ta, pamagsane kung prusigi..! Balang linyang milaladlad mesiwalat king ugnayan... Mikakaragdag nong bina pamagaral karing anak; King miyayaliwang porma pamanyugid a mataktak Ating oras a mituldu ing kundisyun yang mitatak..! Potang datang ing panaun magamit nong pagaralan... Deng ngan asususlat tamu makasaup dong gamitan; Kanita da no sanakan kulitan do at pilinan, King mapinung pamamasa, pamanyulat' salitanan..! Ing miyabie puge kaku, puge ya ngan kekatamu... Alang tumwas king tambayuk, dadalan tang kasaklulu; Kakayan yang bibitbitan, uli e ya solu-solu, Uling ing "Amanung Sisuan" itamungan ing mibubu..! T'anu mong talanga tamu, karin palang babo banwa... Ating dapat tune puryan king ating tang agagawa. Durungdungan nakatamu, ban mitulid e milisia, Ing kabud paintingulan na, ning liguran tang salita..! Poetang Capampangan Marso 21, 2007 Baltimore Md USA Ing Poeta, subali qng masanting yang mangirima at biasa yang mamigale caring cayang poesia, atin pang aliwang bague ban queta maquilala ya iti, atiu qng ugali ampon cararaptanan na. Munang dili, ing Poeta atin yang lugud qng Guinu at cabaluan nang ing Guinu ya ing minie qng amanu; at balu nang tungculan nang caring amanung mapinu purian ne at paligayan ing Guinu ning banua't yatu. Cadua, ing budning Poeta palsintan neng amanu na ing amanung cayang sisuan qng malugud a indu na; inya sa't ing amanung yan sesen ne qng panalala e ne tulutan malanat qng palsimi at qng dusa. Catlu, uling ing Poeta atin yang pusung bayani palsintan ne ing balyan na at sepupunan nang laji; inya nung atin man sanang daratang a manduajagui talacad ya ing Poeta at sagumun e mangimi. Capat, ing tune Poeta palsintan neng madalise yang berding naturalesang diwa ra ding cayang gale; inya caring poesia na alang salang damdaman me ing pamagmalasaquit na qng leguan ning meto orbe. Calima, ing tune watas malugud yang capara na malugud ya qng pengari, asawa ampon anac na, atin yang cababan a lub, malambis yang maquibasa nung inia pitutulan de ding cuyug na't caquilala. Deting bague mesaglawe lubus ta lang atangalan cang Rafael D. Maniago ning amanu tamung sisuan; inia naman marapat mung purian ta ya at pugayan iting mayap a poeta ning amanung capampangan. Ing mayap nang panugali at lugud na qng amanu ya ing tularan da sana ding ca-capampangan tamu. at idalangin ta sana qng arapan na ning Guinu qng cumaba ya sana bie queting babo na ning yatu. (Pirma) Renato B. Alzadon Poeta Princepe/Poeta Laureado from Paing: Maestru Mang Ernie, Dakal a salamat king mesabing galal, E tamu tatakut king tigring matapang,,! Nanung ikatakut ika, atamu ngan, Ding makipaglaban king amanung sisuan..! Nung yaku mung dili, nanung agawa ku,,. King taram na ipan ning tigring milalu, Pamanyalambo nang e man mikakunu Karetang iskwela, maglub kareng kwartu. Ya pin ing pagsadyan tamung e patugut, Susulat mensaying amanung masinup... Poesia o prosa, nanu mang akupkup King pamakipagkal king tigring manlipul..! Oren ding bunga na ning amanung sisuan... Maglual nong poeta king lukib ning belwan; Amanung matimyas bayung mararamdam Dobli la pataram pagsadiang labanan..! E ta patugutang armas tang tatayis, King balang penandit ing oras lalapit At king katatawlian ing bagsik at lupit, Ning kekatang ablas, matras yang mulandit..! Paing "Amanung Sisuan" neng Paing Nanu man ing bante ring matang matalas..! Pilit yang magalsa ing kakung panyulat: Kailangan keng tayis ngeni ampo bukas, Yang kakung panyagka at kakung kalasag..! Ninu pang mamingwa ning manalungenge. .. Ing amanung sisuan tane milelele: Aliwang salita yaneng managumpe, Dakal king pamilya, kilub at lual bale..! Sumulat kung pane, pane kung sumulat..! Keni ke abugnus ing kakung panyulat... Alang masasayang tinta yang pipiglas, King balang penandit, king nanu mang oras..! Nanu man ing bili, king lungkut o saya, O king likuban ning dalumdum o sala: King bakanting oras o kipmuang abala, Ing kakung salita yang kakung pauna..! Maski yakung dili, yaku nang mitagan, Ing maka-intindi king sariling nabang: Ing diwang bubukal, mipasno yang lumwal, Bayang magtampiso king landas ding watas..! Tali yu ku gamat, tanikalang bakal..! Misara ku asbuk at mata mitakap, Dapot ing diwa kung pilit manigalgal Pipiglas yang sasyo king maslag a bukas..! Alang makasagka king tune kalayan..! Antimo ning ayup marangle king parang, ning agus ning danum malinong batisan, Salpuk na ning alun kadaya't malatan..! Ing amanung sisuan ya ing magpatune, King pamiyugnayang melalang a bage, Ing Dios a mengabus kekata sasabe King paintungulan t'ang maslag a tagumpe..! "PAMANYULAT" neng Paing Misundu ne naman ining pangisnawa.. . Ing amanung sisuan, yang bie ku't inawa; Iting pamanyulat, suglugan yang diwa, Karing mikanlaut, lambis yang panata...! Neng abasa ku la, ring sulat yu kaku... Ligayang tamasan, tulang emu nanu; Pamagdili-dili, atyu ko siping ku, Pilatan mang dagat, maging kagpa nia mu..! Alang sinka biasa, alang paligsahan.. . Karing susulat t'ang pamiu-ugnayan; Pamanese lugud king amanung sisuan, Ampo kakatamung tune Kapampangan. .! Nanu ya mang porma, king rima o ali... Nanu mang misulat a pekamalati; O pekamakaba, makuyad a sati, Eya matitimbang king bayat na niti..! Nung misulat ya man, king pusung o biru... O siryosung bage, maglambis e tutu; Agyang bunga nia mu, nitang peninap yu, Sulat yang mamatad kening kabilyan ku..! Keni king banda mi, ala keng abasa... Nanu mang babasan, sisuan a salita; Anya neng atdanan yu kung pakawasa, Masampat yung sulat, mipasno kung masa..! Deng asusulat ku at asusulat yu, Yang dalanan tamu, tete yang painturu; King kinabukasan karing anak tamu, Atin lang abasa king bukas mituldu..! Dakal a salamat karing ebangheliu.. . Karing manga-banal midinan regalu; Nung ela misulat ding aral nang Kristu, Eke akilala yang Dios sasamban ku..! RDM Two translations of Elizabeth Barrett Browning's "How Do I Love Thee" into Capampangan: Macananu Dacang Caluguran? by Art Tolentino Macapacananu daca caluguran cuentan cung tungaltunggalan Caluguran daca qng lapad, catas at lalam A ayabut na ning caladua neng mawawala cu animu Neng balamu mapupupus ing bie cu Caluguran dacang pinapinandit capatas detang bibie inawa canacu, aldo at cabengyan Caluguran dacang ganap calupa da reng bayani a paglaban ing katimawan Caluguran dacang cadalise a alang pagpuring panayan Caluguran dacang capante ning cacung pemibatang milabas lumbe at musmus cung capaniwalan Caluguran dacang lugud a balamu mewala Careng canacung meliling santu---Caluguran daca Qng balang inawa, saya, lumbe ning bie cu—at nung ing Dios pabustan Mas luguran daca caibat camatayan Macananu Dacang Caluguran by Willie Dizon: O baquit caluguran daca?, bague bague tunggen cu queca. Caluguran dacang ating calidad mataluctuc ampo pang malalam Caladua cu iyang mabut nung canacung animu ala na Angga quing tauling pangisnaua grasia macaantabe ya. Caluguran dacang macapante queng malamlam a aldo, lugud cabuclat ning masala angga na queng dalundum ning cabengian ing candila andap andap. Calugurang dacang madalise queng papuri menibatan at mibalangcas. Lugud cu quecang tutung macaulu queng lungcut at lumbeng menga palabaslabas, ampo yng casalpantayanan anyang caynacan. Caluguran dacang caluguran calupa na ning lugud cu queng meliling santung sasalpantayanan ....ating tetagan lugud cu anggang angga. Queng tula ampo pang lua ning bie cu quing Dios atin capaintulutang luguran daca angga na quing caibat cung mepatad pangisnaua. "Indung Balayan" neng RDM Ing Indung Balayan a indu tamu ngan. Ning balang mibayit niting kapuluan; Miyaliwang isla, watak-watak ta man, lajing Pilipino a pepamansagan. ..! Panaun na naman itang anak-anak, deni sang pangane a dapat miyaslat king ustung tungkulan a karapat-dapat, Ing pake king Indung Balayan matupad...! Karing balang balen ninumang mituktuk, sana ing gampan da alang mitalisud; Pansariling nasa nung iti yang milud, magdusa ne naman ing indung malugud..! Karing karanasan a kekatang ikit, balu ta'no nangan ding makamatulid; Ding tutung susuyu at ating balikid king Indung Balayan a mapagumasid. ..! Ita' ing magdusa karing makalisya, kekatang binitbit at likluk tang kusa; Detang pangaku rang tane babandila, botu ta karela mamunga sang sala...! Bakit angga ngeni ing tangis ning balen..? Ing luang sasagese king pisni nang aren, O ba't ding anak nang mengangapaburen. .? Manaliwang bansa karelang babaslen...! Ninuman ing indu buri nong tipunan, ding sisi nang anak buri nong lukuban; Dapot king subung ning sakit nang kabilyan, e'no man ayawat ba'no sang lingapan...! Atyu kekatamu pagasa ning balen. E ta ya payasa nung ninuman sa den; Ipakuldas ta'la deng likluk tang aren Detang e tutupad, e tala paburen...! Ing Indung Balayan matula ya aske nung ding anak na sa, metung la mu pake; Ludud king balayan king nanumang dane king pusu't kaladwa angga man king mate...! Kapurian qng " Ing Bigbugan Ding Tulisan" Neng: Orlando D. Maniago Kabud iti abasa que " Ing Bigbugan Ding Tulisan" Mibuclat ya ing diwa ku qng amanung Capampangan Manamun ya wari sana, `bat etamu pibulayan Dirimla ya'ng katutubu, amanung akagisingan. Ing poetang Laureado, Renato B. Alzadonian Biasa yang gawang poesya `bat etamu pakyapusan Makanyan kung mekabule kanakung isip-isipan Ba't e kumo maka-ambag king malati kung kagiwan. Pero ing tune nang lagyu Renato B. Alzadon ya. Guewa k'ya mung Alzadonian bayang mirima'ng poesya Inya potang abasa ne iting comentu ku kaya "Aba!" ngana "ninu kaya iting meliling poeta?" Aliku pa atatanggap poeta ku king larangan Uling eku pa sibukan linaban karing Krisotan Ni metung pang korona ala ku pang karanasan Pero siguru pulosa malyari da kung subukan. Makanyan kung pengangasan agyang pilan yang parapu Kalipunang Capampangan bisa ku sa'ng maging m'yembru. Uling asnong pangasanting ding watas a abasa ku Poesya lang Capampangan kayabe re pay'ng wali ku. Atin pang taktak ku tula metung karetang poesya Guewa n'ya namang Alzandon "Tilapya" ing titulu na Binasa ke pang masikan karing kanakung pamilya Sinagakgak la pung meyli sabi ra pin "poeta ya". Angga n'ya mu keni Abe ing ayambag kung kagiwan Nung apanupaya yu ipalub ye qng Aguman. Guewa ku ngan ing agyu ku pupuri king Capampangan, Gulisak ta meto yatu "Luid ya ing Amanung Sisuan." Ing Dusa Na Ning Kalulu Neng: Orlando D. Maniago August 2004 Ati' nang mapilan aldo ibat inyang memanuran Limbug mabilug a Guagua king dalan anggang awakan Malingongo la reng tau tatalasan da ing uran Panintunan de rugu itang karelang kabyayan. Makalunus pagdusan na ing bili na ning kalulu Neng datang ing kalamidad mumunang yang apektadu Ustung lumbug no reng dalan ene balu nu ya lingo Ing kabyaya' nang "tricycle" mete n'ya naman negosyu. Agyang detang mamasada ustung lumbug no reng dalan Bangka na la mung de-motor deng karelang payandaran. Deta rugung mangapilit para palto lang kabyayayan Agyang tutulak lang balsa mamasada la mu naman. Ing masakit king kalulu potang muli neng tuknangan Magdala yang pamalengki ala ne mang pipaglutuan Limbug ya ing kayang bale ala ya rugung tudturan Mangyak la ring kayang anak manyawad la ngang pamangan. Nanu ka pusung pengari king makanyan a kabilian Mangapase no king danup ding anak mung kaluguran Ginulisak ya ing tata " Diyos ko eku aintindiyan `Bat magdusa ya'ing kalulu ala ne mang kasalanan?" (Ans Ezekiel 9:11) HOW TO I LOVE THEE? ArtDax Translation Macananu Daca Caluguran by Art Tolentino Macananu daca caluguran? Buri cung bilangan Caluguran daca qng lapad, catas at lalam A ayabut nang capasnawan ning caladua cu Neng balamu mapupupus ing bie cu Caluguran dacang penapinandit capatas detang Bague magsuglung qng inawa, aldo at cabengyan Caluguran dacang ganap calupa da reng bayaning paglaban ing catimawan Caluguran dacang cadalise a alang pagpuring panayan Caluguran dacang capante ning cacung penamdaman milabas lumbe at musmus cung capaniwalan Caluguran dacang cayambe pamagnasang e malasantu Caluguran daca qng balang pangisnawa, saya, lumbe ning bie cu at nung ing Dios Kayang panusigan Luguran dacang mas maigit caibat camatayan Oini pu ing poesia queng Ingles: How do I love thee? Let me count the ways..." by Elizabeth Barrett Browning (1806-1861) How do I love thee? Let me count the ways. I love thee to the depth and breadth and height My soul can reach, when feeling out of sight For the ends of Being and ideal Grace. I love thee to the level of everyday's Most quiet need, by sun and candle-light. I love thee freely, as men strive for Right; I love thee purely, as they turn from Praise. I love thee with a passion put to use In my old griefs, and with my childhood's faith. I love thee with a love I seemed to lose With my lost saints, --- I love thee with the breath, Smiles, tears, of all my life! --- and, if God choose, I shall but love thee better after death. For more Kapampangan poetry, go to: http://maxpages.com/poecia/poecia55 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00100 |