LIBRARY OF KAPAMPANGAN POETRY - PAGE 53 - Anthologized by Ernie C. Turla, president, Academia ning Amanung Sisuan, Int'l. - Languages

CONTENTS:
1. Ing Catatalacaran Cu - Renato B. Alzadon
2. Ing Bigbugan Ding Tulisan - Renato B. Alzadon
3. Bakanti - RDM
4. Deng Mag-Inglis - Paing
5. E Mucu Tatangisan - Renato B. Alzadon
6. O Indu Cung tibuan - Edgardo Bonus Sale
7. Tilapia - Renato B. Alzadon
8. Ing Amanung Sisuan - Renato B. Alzadon
9. Maquisugu Cu Mu - Elpidio Rivera
10.Anac Capampangan - Edgardo Bonus Sale

Ing Catatalacaran Cu

Ing catatalacaran cu atiu qng pangasagip na ning amanu tamu.
Macasadya cung maquiarap masqui na careng politicu, maestra,
media, pari o masqui caninu paman a sasacal qng batal ning
amanung sisuan. Inia, e mu na sana pagsintian nung lalto cung
mapanamdaman . Iti, darala na mecad ning capanualan cu, a atin
ya pang pag-asang masaguip ing amanu tamu capamilatan na ning
matatag a pamanalacaran a saguipan yang talaga qng macalunus
nang pangabilian. - by Renato B. Alzadon, Poet Laureate, 2006

Ing Bigbugan Ding Tulisan
Neng: Renato B. Alzadon
10/14/05

King dalan na ning Jerico, nganang Jesus, inyang misan
Atin pin metung a tau a sebat da ding Tulisan;
Kinua do ding kayang pera, linubas de at bigbugan
Kaibat likuan da nya kabud makalangan bebe dalan.

Itang minunang dinalan Talapanaral yang Judyu
Ing makalangan king dalan bitasang e ne sikasu;
At ing tinuking dinalan Judyu yang Talapanlualu
E ne mu naman pinsinan ining sugatan a tau.

At ing pangatlung dinalan, iti..., Samaritanu ya.......
Mababa ya uring tau king uli na ning daya na;
Tin yang dayang misamutan uling detang pipunan na
Karetang lajing e Judyo sinuyu lang mekyasawa.

Kabud ikit ne king dalan ining taung makalangan
lingunan ne, layun dela ketang metung a tuknangan;
Sabi na king Tala-ingat lingapan me ing taung yan
Nung atin pang lunto gastus, balikan ku, at bayaran.

Itang taung makalangan yang kabas na at kayarle
Ning Amanung Kapampangan bebe dalan makaungle;
Ding Suguing Talapanaral talaturu lang metunggue
E're man dugu sikasu ing amanung mamamate.

At ing katulad na naman ning Suguing Talapanlualu
Ila pin ding mangabiasa a metunggue tituladu;
Agya man akakit daneng lele dalan maghingalu
E're man dugu pinsinan ing sugatan dang amanu.

Kabas ning Samaritanu ding e lusuk Kapampangan
Ila ding magmalasakit kening amanung sugatan;
Ila ding misaup-saup king pagal at king gastusan
Ban ing melunung amanu maulu ya ampon sikan.

"Ume ka, pakiapusan me ing dapat a anti ita."
Nganang minutus ning Guinu ketang taung kasabi na;
Ing dapat Samaritanu sukat mu king apusan ya........
ING BIGBUGAN DING TULISAN, meko keni, saupan taya.

"BAKANTI"
RDM

Bakanti ya ing isp ku alang balung ipoesia,
eku balu ing gawan ku nung makananung magrima;
pero pilitan kung mapse pamagsane a pikudta.
Bahala na nung nanuman ing mayari a salita..!

Balamu mo neng ing banwa ala yang biga nanuman,
balamu mo neng ding batwin ala lang kasiping bulan;
makanyan mu naman kareng miyayaliwang tanaman
alang sampaga at bungang dakal a memayutputan. .!

Anti ku mong sapa mekad alang agus at maratun
ing danum kung maligamgam ni asan alang magdatun;
Anggang sampaga mung lili ala rugu agyang metung
manaya kung tiup ning angin ba ku mung galo at
malun..!

Bunduk kung malangi gabun alang mamagus a batis...
Anti ku mo ning disyertung alang ambun a mamapis,
alang uran a mandilu king katawan ku mandilig
pati kildap ampon duldul kening bili manayimik..!

Magbante ku balang oras king penandit a daralan,
manaya ku karing bersu a amanung Kapamgangan:
Ing kanakung pamanasa king kau ning pilubluban,
pilitan kung mamikudta ba ku sanang makayampang. .!

Ninanu mo e na bali ining kakung asusulat
bunga nia mu ning pamisip alang puntung asiwalat
alang aral a daralan alang belwan a kakalat
dapot ing amanung sisuan king pusu ku yang matapat..!

Ba lon mu na..? Bakit kaya..? Atin palang malilyari...
neng ing bie ku king amanu makasiping manatili.
Bustan ku nang makalingwan ing penandit makalili
salitang akagisingan e malyaring pisawili..!

"Ding Mag-Inglis"
neng Paing

King kanakung pamanyulat pilit lulub kening isip,
ing kalbilyan da ring dakal lalu karing magkasakit;
Mapipilitan yang mugne king salitang e na bayit,
ing salita king obra na... king sarili na ipilit..!

Kabilugan karing anak anting malating grupu.
Ding mamuntukan king bale at ila rin ding modelu;
Nung ing dapat da makatud o taliwas o korbadu
Katuliran karing anak mie papuri't magreklamu.. !

Nung mabisyu ya I Tatang at ing Ima ma-chismis ya,
Mipaburen la ring anak king usturyal disiplina;
Keraklan da ating lunto panugaling kalupa ra
O mekad atin mu naman magrebeldi o kokontra..!

Nung ing Tata magobra ya antimong pamangabiayan
At ing bos na Tagalog ya managalug nia mu naman
Kanita na'ing sakripisyu, salita nang Kapampangan
Mekad kauli na bale ing pamilya miyapektuan. .!

O nung naman itang Ima mipalpal ya mong megobra
Karing magsalitang English mapilit yang magsalita
King salitang Kapampangan tunggal ditak mawawala
Maging sangkan a mimiral ing abit ning ekonomia..!

Mipildis ya'ing Kapampangan king sakit ning bie ta
ngeni,
mebiktima ta king padwas a panapan dang parati;
Ing Tagalog o ing English magagamit nu man keti...
Ing kailangan Kapampangan. ..pamanyulat, pamanyabi..!

Nung kulang ya pegaralan king Enlgish e ya biasa
Katnamu misabit neman king danup a manenaya
Uling biasa yang Tagalog mekasaup king obra na
Migsakripisyu ne naman ing salitang amana na..!

Ing mutibu na ning balang Pilipinung bisang obra
Kailangan ne ing Tagalog ampong English a salita
Nung king rejion nang tuknangan alang obra e mipala
Ing Tagalog o ing English, mapilit yang magsalita..!

Magbalik yang pasibayu, ulit-ulit kung pasiwalat
Ing kabyayan yang sasabat pamanyabi, pamanyulat
Malalakwan ya ing bosis ning salitang a kamulat
King English ampong Tagalog mitatambunan ya sukat..!

Ken nang kekatang ugnayan e pasimbalang e lunto
Ing English mayayakit ya, ing Tagalog e masyado
Baka English namu naman ing salitang mangibabo
Yang parating misusulat gamitan ta king aldo-alado.. !

E ku kaya lunto manong o lumwal kung makarine..?
Pilan la mu ring susulat pane Kapampangan kete;
Manyad ku pung panupaya ing balu kung maging tete
Ugnayan yang Kapampangan e ya English lulto pane..!

E Mu Cu Tatangisan
Neng Renato B, Alzadon
Baltimore--- Marso 2007

Ing Reyna na ning Malasya, cabud migcamit yang laya
ya na man ing pepaculung caring sisuan a salita;
lalam ning capagnasan nang maguing metung namung dila
sinese ne ing Tagalog----papate no ding aliwa;
macanian ing casangcanan ning pangalalam mung calma
O' indu cung Capampangan a sisuan da ding macudta.

O' capait na, Indu co, ning miras mung capalaran
mijatulan cang magdusa quetang alang catalaruan;
macaba mu rin panaun ing ati ca qng suculan
angga qng ngeni miras ya ing aldo mung camatayan;
dening banyagang linusub qng sagradu mung balayan
ligaya ra ing aquit dang mate ca qng bibitayan.

Indu co, acaquit dacang macagapus aduang tacde
qng eran ning bibitayan ipapanic dang malale;
daramdamam cu ing aclis ding taung managulele
a guiguiaguis qng matulid ning mamuc mung pangabite;
ing cucutang da ding maldang macaluruc pamipante
o'bat caya cailangan pa ing mibitin ca at mate.

Daramdaman co, Indu cu, ding patatu ning Gobiernu
babasan de itang atul arapan ding maldang tau;
ngara qng ing casalanan a dapat icamate mu
ya itang ding Capampangan, icang sisuan dang amanu
ban ding bingut Capampangan ala nong Indung asusu
cailangan qng mawala ca queting babo na ning yatu.

Cucutang na ning Berdugo, nung atin man, nanu ya ta
ing tauli mung panabilin qng arapan da ding malda;
canita ca mematlawe at qng canuan mung macatna
dimdam mi, iqueng anac mu, ing matatag mung salita;
"anac co, ding quecong mata e yo pabustan micalua
ban e co labug panaquit qng cacung pangapiraya. "

Dimdam cung atmu calino ing quecang sinabi, Indu
e mu que buring cumiac man qng capalaran mung bigu;
nung macanian, na'ng gawan cu quening dusang milalalu
bayang mica capasnauan ing malalapac cung salu...?
lalu ngening acaquit cung ding Berdugong alang pusu
tatacpan do ding mata mu canyang matuling a panyu.

Dimdam que ing sinabi mu, ing lua ning dusa at saquit
carening quecang casalang , e mi ya dapat ipaquit;
dapot nanu ing gawan cu ngening canacung acaquit
lubid ne ning camatayan ing qng batal mu misaclit;
magtamimi na cu wari at panayan que ing saglit
a mibagsac cang gagalgal magjingalung mamalipit.
.

Dimdam que ing sinabi mu, e mu cami buring cumiac
ban queta e mi amiaman ing calma mung mipajamac;
ulinita, culio que ngan iqueng malugud mung anac
pamag-alsa.. .! pamag-alsa.. .! Yang matni ming igulisac;
Itabi la ding Berdugus qng tabulyo macasindac
at yang lubid qng batal mu pamatluran que queng tabac.

Ngening miras ing panaun a buri da nacang paten
ya na naman ing panaun dang mag-alsa ding memalen;
ding berdugos a manlupig mamin langan mitabi den
banang mica pamanggalang ing amanu na ning balen;
at canian da abitasang ing amanu dang papaten
capilan man, qng balyan na, e malyaring mipaburen.

Ing aclis ning pamag-alsa yang maramdam bengit' aldo
caring matua't cayanacan a e tucnang qng tabulyo;
pablasang ding quecang anac samsaman de at ipalto
ing singsing ning catuliran a maluat nang mepanaco;
canita O' indung sisuan milaya ca at mipasno
caibat ding dacal a banuang maniambitan ca at sasyo.

Inya, ya nang pangacu mi queca amanu ming sisuan
e no maglua ding mata mi qng miras mung capalaran;
quesa qng tangisan da ca qng maplas mung camatayan
gulisac queng alang gulat qng marangle ning labanan
ban abalu na ning yatu qng ngeni at capilan man
eya mate...! E ya mate...! Ing amanung Capampangan.

O' Indu cung Tibuan
neng Edgardo Bonus Sale

O'Indu cung Tibuan... E ra ca pabustan
Quening cabilyan mung mipmung casaquitan
Dacal lang memalen ala nang pacyalam
Pandacuracan de ing Amanung Sisuan

O' Indu cung Tibuan.. E ra ca quelingwan
Atyu cu mu quening catalingdiquingan
Icang manantabe... nanuman gagawan
Gaganacan mu cu... e mu cu lalacwan.

O' Indu cung Tibuan... Luluguran da ca
Pagmaragul da ca... ca reng caquilala
indat miungle ca... ititicdo da ca
Ing lugud cu queca, ala nang muna pa.

O' Indu cung Tibuan... pane babatyawan
Y ca ing acaquit dening panimanman
Queng aldo aldo cu... nanu man daraptan
Pagmasabal da ca... Angggang catatalwyan.

O Indu cung Tibuan... sale na ning leguan
Amanu mung Sisuan ca cung pagaralan
Sumulat cung prosa... ampon cawatasan
Y la ding ituru ca reng cayanacan.

Tilapia
Neng Renato B. Alzadon
Baltimore -2007

Quetang Paglautan ning Capas a pemalaguiuan dang Timbian
Y Minang ampon Y Pidung misisiping lang tucnangan;
Y Pidung baintau yang mag apat pang pulu't anam
At Y minang dalaga yang mag atlu pang pulu at syam.
pablasang ing tucnangan da atyu busal ning asican
inia ing pangabyayan da atiu queng pamananaman.

Ining Pidung, quening Minang, malsinta ya rugung lawe
cacabag ya ing salu na ustung acacasabi ne;
inya ing pamalsinta nang apulu nang banuang wewe
agya sanang pabulul mu e na man apasawawe
a memoria na no ata deng diga ring talagale
dapot e no asambitla quening cayang siping bale.

Ining Minang malambat neng bisang macapaquiasawa
dapot uling melapad ne ala nang maglolo queya,
macanano, queta caseng medyu pamilugan ya pa
alang queya macalele qng bigsican nang tatang na;
uling quening tauling byaje bisa ya pin saque sana
inia quening baintau e na balu ing gawan na.

Ining baintaung Pidung aguiang mag San Miguel yaman
talagang cacatug ya tud, e ya macapamanican;
ulinita, ining Minang ya nang mimisip paralan
ban micacatuparan ya ining sintang quetubasan,
at quetang kai-isip na cabud ne mu mipatiman
uling balu na ne ngeni nung nanung sucat nang daptan.

Panga-abac a maranun ati ne yan qng palengqui
at sinali yang tilapia a linulan na qng baldi
pangaras na qng carela agad na nong picsi deti
subali mu quetang metung a peca maragul dili;
iti, dinaing na neman, atme santing alcus iti
at bayang malare-lare pinolbuan ne pang asueti.

Qng tulid nang awang Pidung quen ya ginawang sablayan
at layun quen ne sinabit ing tilapia nang deingan,
inia naman ining Pidung indat tando ya qng awang
yana cabud acaquit na itang tilapia nang Minang
at quetang salingalngal na ning bau nang pangayamnan
migising ya lub Y Pidung, pignasan neng buring tacman.

Cabucasan , ining Pidung lepitan ne ing dalaga
a sangcan-sangcan mamalis lele na ning sablayan na;
"O' nanung buri mu, Pidung?" Ing malambis a quitang na,
Mipaducu ya Y Pidung uling mala-marine ya,
" Ining tilapia mu Minang lupang tutung maniaman ya
aguia sanang nu mu anti, buri queng atacman sana."

"Macanian mu pala, Pidung", ngana na man tinambayan
"quen Domingu maliari ne queni bale mu ne tacman,
balu mu na neng Domingu Y tatang cu ala ne man
aguiang ala yang pupusta e sasala queng sabungan."
"O' wa. Ngana naman Pidung, " siguradu dacang puntan
baluan cung ing tilapia mu maniaman de ding maniaman."

Linundag la ding saguli, miras ing aldo Domingu
macapiblas ya Y Pidung , macapomada yang Tansu;
capanic na cari Minang ya nang tambing nang abau
ing tilapiang sasalitsit qng cawali pipiritu;
penadit pa quetang dulang, macalucluc nong pareju
at ing tilapiang palapad maligaya deng pisulu.

Menos lang gamat qng tabu caibat dang meyaring mengan
ulina'ta ning cabsi ra e na la bisang ticdo man;
queta naman e ra balu ati ne Y Matuang Duman
magumpisa neng papanic caring balitang ning eran;
dapot mipatingangas ya qng dimdam nang sagicgican
sinigi ya quetang dingding qng banang paquiramdaman.

"Minang! Minang! Nganang Pidung, "niaman na ning tilapia mo
oyan ya ing e cu sawan aguiang yapag me aldo'ldo."
Pidong! Pidong! Culang pin yan , inta sang e cu migsabo
map na mu, ba'yang talusad, qng titilan me susoso ."
Ining matuang maquiramdam bitasang e bisang galo
ban damdaman na na nung nanung depat ding adua qng babo.

"Pidong! Pidong ! Nganang Minang, "nanu, e mo malinamnam
itang mismung atyu quetang libutad ning pibangalan?"
" Wa, Minang , caniaman na pen! Ay! calambut na pa naman
malinamnam yang mayumu, malat-alat, maslam-aslam. "
Ing maquiramdam a matua, magsalupsupan ne canyan
qng atin lang guewa deti cabang atiu qng sabungan..

"Pidung naman, ot balamu pecalpilasan me, ata
pitiltil-tiltil me pamu, at ali ca memilagua."
"inya mu meniltilan cu qng bayang mamasasa
at lalu yang lungcas lasa ing maniaman mung Tilapia."
Ining matuang maquiramdam canyan ne sulac a daya
at memirapal neng menic; ing pasbul biclat neng bigla.

"Aha...! Icayung adua quen e yu na cu paglingaran
mipaglimid cayu pala neng ati cu qng sabungan..!
Ica, Pidung, tin ca palang sisinup a camulangan
ya palang lilimiran mu ining tilapia nang Minang;
Ica, Minang, obat dugu mipacanian na ca, Inang
ining bague macarine, e mu na pequibalac man."

"Ining depatan yung licu, dapat mu qng itulid yu
qng malalaguang panaun cailangan ing casal cayu."
"Opu" ngana naman Pidung, " ala pung problema cacu
nung acu mu pu bisa cu, Y Minang pu ing cutnan yu."
"Aba! Bisa cu mu naman," nganang Minang mengamanu
basta cang Pidung mu sana ibie que pu ing tangu cu.

E na man binang melambat qunasal la dening adua
at quen taya pupututan ing istoriang mipacaba;
nung buri yeng maquibaluan lasa na nung nanu ya ta
ya nang cutnan yu Y Pidung qng tauli nang cabanata
angga na cu pamu queni ya nang balang mamalita
nung tutung maniaman ya pin itang mesabing Tilapia.

Ing Amanung Sisuan
Neng Renato B. Alzadon
Baltimore-2007

Ing amanung sisuan,
ya itang tumaila ning metung a indu
cabang pasusuan ne ing bungsu nang anac qng daya nang salu;
ing tumailang ita a minlungan qng lambis, lugud , ampon camu
yang antimong bining mipunla, meragul, qng saguiwang pusu;
nuan la ding penganac a midalitanan dilang catutubu
atin lang matibe sandigan qng bie ra, nu la man painturu.

Ing amanung sisuan,
ya itang aral na ning metung a ibpa
cabang tatalnan ne qng metung nang gamat ing lande paluca;
ing aral a ita, yang maguing tuntunan ning sapni nang mutya
bayang mipanginlag qng cabiguan ning bie, at maroc a gawa;
nuan la ding penganac a mituruanan qng sariling salita
ila ding migmana qng lijim ning beluan, aral a daquila.

Ing amanung sisuan,
ya itang dalung na ning malsintang tapat
cabang ing mutya na sangcan nang e pansin ing cayang pagtapat;
ing dalung a ita, dalung yang manayun pamilapat-lapat,
qng panga-apse na, mula anggang sepu, ganap ya at sapat;
Nuan ca cayanacan, atin cang amanung agamit magtapat
amanu yang sisuan a sacdal qng leguan , at sacdal qng sampat.

Ing amanung sisuan,
ya itang aru na ning casuyung irug
cabang ing sinta na, maquilua ya mata, aplit nang tatabug;
ing arung malambis, ya ing magpalino qng bague melabug
qng bayang masaguip ing pamipalsintang mamit-amit lumbug;
nuan ca Capampangan atin cang salitang maslag pa queng bubug
a quecang agamit antimong birtud na ning quecang panirug.

Ing amanung sisuan,
ya itang poesiang gayuma qng lambis
cabang gagale ne ning suguing macudtang pangawilian bosis;
ing poesiang ita, yang wagang patutu qng e ya maumis
ing sucad at rima, a pamanang adle na ning pamigulis;
nuan ca Capampangan, atin cang poesiang meapsi qng wangis
ning pulsu ning tau, a ustu qng sucad, at ustu qng sunis.

Ing amanung sisuan,
ya itang gulisac qng busal ning pisac
cabang ing labanan mapaling mamapi at casindac-sindac;
ing gulisac aita, masias yang terminung leucanan salpac
mipariquil ya mu caring manalipan a dayung manyindac;
nuan ca capampangan atin cang salitang mataram a acdac
a quecang agamit caring mapanyupil a magnasang dalpac.

Ing amanung sisuan,
ya itang sambitan ning managulele
cabang ketang aun ing matibe lubid yugus deng malale;
ing sambitan aita, lugud yang dala ning caladuang miwale
dane na pa carin nitang alan'anggan nung nu ya maglacbe;
nuan ca Capampangan atin cang amanu qng saglit ning lumbe
a quecang agamit ban ing quecang lugud miuman meng ayapse.

Ing amanung sisuan,
ya itang siwalang minunang dimdam na
nitang bayung bait, a alus e paman mibuclat a mata;
Ing amanuang sisuan ya ing capamunan ning ume magpiac na
cabang sisitsit na ing banal nang lugud caretang lacuan na;
nung pitutuliran, yang amanuang sisuan, ing cabaldugan na,
qng bie na ning tau, mula ya at sepu---alpa ya't omega.

Maquisugu Cu Mu
by Pidong Rivera

Maquisugu cu mu, qng sepu macatalan
Quening bale tamu mesabing aguman
Ibie cu quecayu, alang picacunuan
saup e macurilyu A NASI qng pinggan.

Metung cung maniaclu qng amanung sisuan
Datucanan cung buslu lalto yang carangan
Ing cacung cosuelu aquit co queraclan
Lugud qng amanu ya ing tune leguan.

Nucarin man miras, ning agus ugnayan
Lacuan tamung bacas qng aldo miaslagan
Oyan ing miye lunas, bie ning cabiasnan
Qng prosa at watas e ca macalinguan.
/EDR

Anac Capampangan
neng Edgardo Bonus Sale

Ibpa cu man, bait ya mang Capampapangan,
Indu cu man, bait ya mang Capampangan,
at Acu man, bait cu mang Capampangan,
acu caya, metung cung tune Capampangan?

Ngening nanan cu man pin paca surian
ala cu man aquit a pipagbatayan
uling e cu biasang sumulat Capampangan
E cu mu rin biasang mamasang Capampangan

Ing balu cu rugu balid a Capampangan
Uling macanyan pin usu queca ming cayanacan
Tagalug at Capampangan pisasamut mi ngan
Ban canita e cu malacwan ca reng pisasabyan

Catsurang pin acaquit at paquiramdaman
Ining a usu ming queraclan a cayanacan
Ninu ta ing dapat cung parsalanan
Deng matua cung e mengiturung Capampangan?

Agyang man queng quilub ning pipagaralan
E ra que buring magsalitang Capampangan
Magmultang cang pesus ustung atin mecaramdam
A magsalitang cang puru Capampangan.

Maua cung mabiasa queng salitang cacung sisuan
E pa naman tauli ining ca cung cabilyan
Turuanan yu cu pu y cayung macudta at matenacan
ban maguing tune cung Anac Capampangan!!!

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00121

Page Updated Tue Mar 20, 2007 6:10pm EST