Table of Contents:
1. ING PUSU KING DUSA - Renato B. Alzadon
2. AMUN KENG METUNG A MAGBIASA-BIASA - RBA
3. " BAYUNG BANUA " - Paing
4. "E KU BALU" - Kua
5. CYCLAMEN - Renato B. Alzadon
6. ING ASO O ING UBINGAN - RBA
7. MALSINTA PA KEKA, RITA KO - Tiakbong
8. ING CAYADUANGAN CUNG GAMAT - Edgardo B. Sale
9. LUGUD KUA - Kua
10.ING ABE CU - Renato B. Alzadon
11.KALUGURAN DAKA - Paing
12.CANG YSIAD - Bisero
ING PUSU KING DUSA
Neng E.C. Turla
Kepampanganan neng
Renato B. Alzadon
Ing pusu ku--- migsalbat ya neng ikit keng mikulumbuan
king kapal ning kumpul ulap ing kinupas a katutuan
karin, keta king lalid na ning inawang alang anggan
kapantuk ke ing panaun ampon ing kayaktanganan.
Ding penandit a makule ila na mung mal kung iyas
a beit ning kakung napun ban mantabe alang wakas
ding panalala mung likuan king kaladuang maintun lunas
maguing panaru la sana king diwa ku't pusung paldas.
Kagum ning lua at sambitan, ing dusa magbabo kaku
nasa kung kumit sikanan king keka pamigunam ku
ban nung mampit sa king diwa ing yumu na ning timan mu
katmuan ne ning sintang maslag ing kalubkuban king bie ku.
Kanita ku no tipunan ding mengapisi nang dake
pisintak-sintak ning angin a amlat na ning kakung bie
a mispak at misambulat iniang gumulat kang kambe
ning pangakung e na muli a malino mung inapse.
Karing luntian kung paninap busal ding benging ulila
ati'ka ka king arapan ku api waring mibabaya
at king siklab kinislap la detang guintung milabas ta
ngening mibalik ka kaku king labuad ning malik-mata.
AMUN KENG METUNG A MAGBIASA-BIASA
neng RBA
Binasa kong ustu, Abe, ding piskil mung kapampangan
agya man kapampangan la, atmo kasakit intindyan;
e ku lubus awawaga nung nanung kekang sasabian
ampon nung ninu kekami ing tau mung sasabianan
ing metung mu a balamu akakua ku nung ya pin yan
ing balamu dinatang ka ban magdalang kapintasan;
ing akakit mung baluktut buri mu mosang tuliran
kapamilatan ning kekang pamamintas a paralan.
Ing balu ku sana Abe, e king ituturu daka,
king dutung a e mu tenam e ka sa managtal bunga;
king hardin ning maki hardin e na kamu lulub sana
at kabud -abud na ka mu managtal karing sampaga;
dening bayung talasulat, paganaka ku mu keka
king ali mo penintun den ban pasulatan mo sana;
uling e mo puhunan den , o pipagalan mo sana
e mu no sa pakialaman ban e la milako gana.
Aku abe ing sasabing sulung pin sumulat kayu
saka ta na la samasan nung atin e maka-ustu;
uling king bili na ngeni ning kekatamung amanu
kailangan tamung sumulat king sukub ning agyu tamu;
deta sang biasang sumulat karing amanung mapinu
ipalkas da ing agyu ra sumulat lang asintadu;
dapot ding kua ampon bingut at dakal pang bayu-bayu
king sukub na ning agyu ra pabustan mong mangamanu.
Ngeni nung king amanu ra anti kang mangaplas dungus
ot e mu ipalto abe, ing gelingan mung TIBUBUS,
sumulat kang poesiang makasukad at ma-ayus
ban nung tutung magaling ka, keka na kami makyapus;
dapot nung e mu apalto ing magaling ka ping lubus
ipakisabi ku abe eka sana dalus-dalus;
uling wari't isundu mu king ali ka pagpangalus
pakatandanan mu abe, king isukad daka patus.
" BAYUNG BANUA "
neng Paing
Bayung banua ngeni kalipas ning napun...
Bayu ya ing aldo karing berding bulung;
Maslag yang masala pitda ne ing dulum,
Ing bayung pagasa ning bayung kasuglung..!
Ing bie ketang napun milabasang banua...
Umpisan ne ngeni bayung pamagobra;
Kalusan ing lagpus, panten yang sapak na,
Mibili king sapat nang pangayaregla..!
King dane ning kekatang ugnayan...
Ditak mang panaun e taya tiknangan;
Mipanatba tamu king amanung sisuan,
Didiligan taya itang Kapampangan..!
Atilung mamasa, oren ding susulat...
Ating magumasid, pilan a magmulat;
Talaturung biasa kekata kakalat,
Pamagmalasakit ing mayap dang dapat..!
King aske ning lugud a pisanmetungan...
A-mantini taya ing pamitambayan;
Karing balang metung meyakit ya naman,
King kekatang dane, mitnung kagalangan..!
Salamat king Guinu king panaun ngeni...
Bayung Banwang singkad babie ne parati;
Ing pamiyugnayan tamu manatili,
Ing amanung sisuan ene mitabili..!
"E Ku Balu"
Ne ning: Kua
Minuna da kang ikit, king eskwela.
Pitu kang banwa, aku, anam ku pa.
Mikaklasi kata, mumunang gradu.
King kwartu, makalukluk ka siping ku.
Aniang balikid ku, papunta keka.
Karin ko ikit, malagu mung mata.
Mipa lawe ka kanaku't tiniman.
Milibe lagyu, migalamanwan.
Makatukanang ka pala, lipat tete
Ketang mala Kastilang lumang bale
Sese na ka pala nitang apu mu,
Penabilin ding pengaring marayu.
Mumuna pang aldo, keka me akit
King pamag aral, metung kang matinik
Keng pama masa maki ligligan ka
Pati na matematika at siyensia.
Pauli na ning gelingan mu at legwan
King pusu ku migising ing panandam
E ku atarukan, e ku ayintindyan,
E ku balu nukarin ing kabilyan.
Aldo-aldo Lunis anga nang Biernis
Pamag lub eskwela, ala kung mintis
Asne kasaya ing kanakung yatu
Potang abe dakang makiyalung kaku
Keng kelambatan tanang mikilala
Manibat pa aniang pitu kang banua
Pilit kung selikut panandam ku keka
E ku apasyag, e ku asambitla
Neng atin panaun, ika tang dili
Sabyan kusa, panandam ning sarili
Alang lakas lub, dungo kung masyadu
Mapu puput keng sakit ing pusu ku
Anam a banua milabas kekata
King elementarya meyari tana
Mag aral ku keni, ika Menila
Malapit na ing pami kawani ta
Tawli tang aldo keta king eskwela
Kukunan tala kekatang diploma
Karin tawling ikit deng kekang mata
Minunang diling aburyan ku keka
Potang kakung agaganaka rugu
O tat meging kung matuang bayung tau
Ot e ku kasi kanita linadlad
Marine ku kasi, e ku bubulad
Ngeni isipan ku, nung nanu kaya?
Ing milyari nung kakung sinambitla.
Metula ku kaya, o mispak pusu.
Pakibat , e ku balu, e ku balu.
Cyclamen
Neng Renato B. Alzadon
Baltimore, Md, USA-2007
Cyclamen.... ! Cyclamen...! Apagmasdan daca
uliran cang mutya ding maldang sampaga
mapagcumbaba ca at cayaga-yaga
e ca maningayang manintun julaga
bistaman ing leguan mipagkalub queca...!
Ibat qng bucu cang malale mamangat
lalon me ing tangque nung nuca menibat;
at qng pandalo na ning aldo sisicat
babie mu ing queya galang a masampat
capuri-puri ca qng mayap mung dapat....!
Potang ding pisngi mu sumilad nong miuman
at magparayo na ing tagle mung leguan,
ya at ya pa mu rin ing quecang aingan
ing macapagbalic qng tangque mung licuan
ban caring punlas mu malugud meng caulan...!
Panyatang ning aldo a acaul mune
ing queca misapwac a indu mung tune,
carin me panayan ing aldo ning lumbe
nung nu matanggal ya ing punlas mung tacde
qng pangacaul na qng indu mung tangque....!
Cabang lalon daca malagung Cyclamen
agaganaca que ing licuan cung Eden;
itulut na nasa ning Dakilang Amen,
dasnan na cu nitang aldo pagmalumben,
a maca-caul cu qng tibuan cung balen....!
Ing Aso O Ing Ubingan
neng RBA
Nung ing Guinu dinan na queng peca-Eden ming mulajan
ning canacung maguing Eva ban carin que manucnangan,
caring sabla-sablang mabie a qng mula maglayunan
ipaquisabi cu kayang e ne iabe ing ubingan,
uling yang ubingan case, mesubuc ne qng miralan
makisalapang ya dila a bubugjang calaraman;
inya ding catubale na e la mica caratunan
magcang pota matuctuc la qng dila nang camandagan.
Nung ing Guinu icutang na nung ninu ta ing buri cu
a mabie milapit mosa kekami ning cayabe cu,
ing ipaquibat cu cayang maquilauc panigapu
calibe na ning ubingan ya sang ibie na ing asu,
uling ing asu tapat yang sumuyu qng cayang guinu
yang magbante qng mulajan qng ban alang manabusu
at nung sacaling atin man mapangangas a mangulu
ing asu yang maquiarap, at paimate yang maglualu.
Inya, anting kapampangan, ding asu nung nucarin la
carin ya ing cacung bale, carin ya ing cacung mula,
at carin cu mananaman caring dutung a mamunga
pablasang ala cung kanglap a ing manyira datang ya;
uling nung ining ubingan nasa nang lumapit sana
ali nana ibalayun uling pigaganacan na
a qng tepangan ding asung alang tacut marap caya,
at yana cabud maliari, dunutan de ing buntuc na.
MALSINTA PA KEKA RITA KO
Neng Tiakbong 02/08/07
O irug, e mu dimdam kaku poetang pamangamanu
Tala, bulan, bulalako bula la at paninap mu
Kamasalan, tune lungud, deng penapan, ilang balu
Inampang ku keng arap mu, sarili at kaladua ku.
Keka bandi, sinta ku mu, kalam kaku ibat Guinu
Ngening aldo ra reng pusu iyapse ku misnang yumu
Ing lugud mu at ing kaku, sana panwalan mu
Ing lugud mu...ing lugud mu tiru na ku.
Ing nasa ku kakung sinta kareng malda ku na sabian
Nung nanu ya saring lugud kekang pusu menibatan
Pabustan mu sinta...de ta namung mangalalam
Balugbug mu sitsit namu, makalingapngap at manyaman.
Misan aldo keng pagal at tikal mung katawan
Pegpurupasan ku'ng megili isigang mu sa'ng ulam
Peragli mung nilup...mengaligkig sabe'ng timan
Manyaman? Kalua ko, Dios ko asnang kaslam!
Kaluguran at bisitang mekatakman kekang lutu
Agad da na kang purian, magkarinderia kata kanu
Lalu na neng makagulut pataban me'ng kakung pusu
Pagmaragul, tiru ra ka, tagatakman ku, 'ya ing tutu
Reng aliwang memaglakbe, keng karelang pamagobra
Atin lang lalakwan balang bansang pintalan da
Maglibutad ing lugud mu, paganaka ning tiwala
Lugud a e medungisan, tiwala e mesalaula
Ing bie tang delanan, miyagape, mipupusan
Ing bukas nung kayabe ka, atin sagut kareng kutang
Nung sakali yaku nang dili mangulabe kening dalan
Mangapkap anting bulag, e na ku bisa mang takbang
Metung yamu kabud yadwan sasamban tang Mayupaya
Yagnan na kata san kaulan panaun datang painawa na
Alimbawang minuna ku , pakpakirandaman mu sa
Ganakan mu kakung sinta, liguran da ka angga king alang angga.
Qng Cayaduangan Cung Gamat
neng Edgardo Bonus Sale
Sagiwa pa qng pamisip ing minunang pamiquit ta
Piesta qng baryung dang beitan dening parejung Indu
ta
E da ca man pig-uculan dacal a pansin canita
Uling aliwa ya ica ing qng cacung malic-mata.
Ing canacung panintunan dalaga yang maca bayu
ita sanang ing piblas na maca tugma ya queng usu.
agyang nanan cung isipan qng piblas mung e modernu
e cu balu a nung baquet queca cu mequipagcuentu.
Cambe ra ding pinisan cu atmu saya ing cuentujan
uli caseng malagad lang miquit-iquit neng piestajan;
at quetang penandit aita bistaman e ta sasarian
mipanatsa ca tang sulyap, tajimic milalawayan.
Milaco ne queng isip cu ing pamiquit ta canita
sindu cu ing pamanintun qng mutya ning malic-mata
dapot nu cu man manintun ing paninap cung diwata
e que iquit qng queraclan da ding pepaquilala da
At misan a cayaldauan inaus na cung Indu cu
at quitang na nung ninu tang dalagang daralawan cu
layun cacu na sinabi qng pansinan que sa canu
ing anac ning cumari na a balu na pangatau.
Anti cung mica-animu qng sinabi na ning matua
macanian dacang paintunan nung nucarin ca mag-obra
aus queni, aus carin, cutang queni cutang queta
at ali cu pepatugut minangga qng miquit cata.
Inyang makapiquit tana balisa cang acaquit cu
anti cang migaganaca qng asabi ra ding tau
uling ing quecang isipan kalupa ning isipan cu
ing pamicamag-anac ta cang indu cu at indu mu.
Iti, e sapat a sangcan ban e cu sumuyu queca
inia queca sinuyu cu maiguit mu rin pepabanua
atmu na la pangasaya ding penandit ta canita
angga qng binie me cacu ing peka mayumu mung ua
Mupin, atin cang siglawe a patagal a amanu
ing capaliqueruan sana ilaco cuna queng lub cu
at mengapamulala cu quetang amanung tiglung mu
qng sasabian mu mu ita uling caluguran mu cu.
Oyan ngeni, lawan mu na, ining pamipalsintan ta
macaba nia rin lecaran, maigit aduang pulung banua
macanian man itang sampat ning pamyutus atyu ya pa
uling ing pamisuyuanan ya ing magbabo quecata.
Salamat carening aduang anac a binie ning Guinu
aguinaldu no quecata, babai la pang pareju;
qng bistaman babai la matula na cu't cuntentu
agyang inyang ala lu pa lalaqui sa ing buri cu.
Nanu pa caya ing bucas a capanayan ta qng bie
ngening a dalanan ta na ing capagsubucan qng bie
dapot e ta aisip man ing cumawang qng pamiabe
ulining pamicalugud a mayubu at dalise.
Yca ing cayaduangan cung gamat qng capilan pa man
angga man qng dasnan na ne ning bie cu ing
catataulyan
ining pamisametung ta qng caladua at qng laman
e ne malyaring mabaclas angga na qng camatayan.
"Lugud Kua" (Puppy Love)
Ning: Kua
Kasayang aldo ita, anyang ikit da ka.
Mumuna da kang asilon, deng kakung mata
Ka piyestan kanita, metung aldo ning Mayu
Meki pangan kayu, king bale nang dara ku
Kinarug salu, kabang pakilala na ka
Ni ning pisan kung kanaku, mas maka matwa
Gamat mangarimla kakabug ku pa salu,
Kabang maka timan kang, maki galamanu
Ngeni ku pa dimdam, makanyan pala
Anti ku mong ayup, susulapo king banwa
Lalu na niyang, tiniman ka't , linawe mu ku
Keng dine ku keka, mipa duku ku rugu
Ume na ka keni pisan, nganang atsi ko
Abayan me saugli, ban atin yang ka kwento
Linapit ku kekayu, ditak ku mitakid
Dening bisita, mebigla lang melikid
Kabang mipag kwentu ka ta, karin abalu
Y koyang ku pala, metung meng talasuyu
Mangutang ka kanaku, nanu ya panugali
Nanu ing kasaman na't , nanu ing buri
Anti ku mong mengaklak kening sinabi mu
Keng pusu mu maka lugal ne ing koya ku
Oyta pala, nung bakit matimyas ka timan
Tungkul kang koya, aku palang pipa ngutnan
Kaibat kung a kwentu panugali nang koya
Memaligwa kung memun, at likwan da na ka
Tinipa ku bale, ketang gulut ku bignus
Ing kamwa ku't kiyak, king sarili ku melunus
Itang aldo a ita, balang aganaka ku
Aniang rapidu yang kinabug ining pusu
E pala tutu ing panandam ku kanita
Lugud niya ning kua, uling kelagwan ku keka
Potang babanten kula, deng kanakung paunakan
Atlung lalaking, asna kasakit pastulan
Bunga ning pami asawa yu ning koya ko
Ing dati kung liguran, meging ke pung bayo
Qng Abe Cu
Neng Renato B. Alzadon
O' calagu naning yato...! Qng jielu, balamu wari
ing meto caliwalasan mipinturan yang maputi;
iting mapayapang leguan, lacuas yang lingcas a uri
inyang qng pago ning bunduc paitas ne ing Bolang Api;
at itang pamijambula na ning dimla at ning pali,
lalam ning gabun a laio ating miguising a bini---
calupa ne ning mipacde matudtud cung pusung sawi
qng pali ning panirug mu a e biasang malumpawi.
O' calagu na ning banua...! Qng piblas nang bayung culul
ing kule na ning catasan meguing mapinung yang asul;
ing king napun linaganap a lulam a casapungul
pitabi-tabi ning amyam a pane-pane babagul;
ing dimla na ning Taglagas a maniaguid anggang butul
ala neng paglugalan pa king pali ning quecang caul
at nung atin ya man bacas ing pamalsintang medampul
larawan na nalang cupas ning panaun a milangcul.
O' calagu na ning batis...! Calino na ning danum na
a mamagus pane-pane anting kutug ning inawa;
king me-aligogo danum nung masdan mo ding lupa ta
mijalu lang maguing metung at yang aquit mu, ikata;
at panga-uli ta bale, ing qng danum anino ta
ya na cabud ing aquit mu qng lupa ra ding anac ta
pablasang macanian ya pin ing larawan naning sinta
ding meguing metung mu pusu, panamdam, ampon caladua.
O' calagu na ning Eden...! Ing dimla, mimin ngan meco
ing banua ala neng dampul, at ing batis atme lino;
ing jielu babo cung salu meguisan na ngan melaso
pablasang ing quecang lugud casing pali ne ning aldo;
salamat queca, irug cu, qng pacamal mung masaclo
ing bini ning capalsintan mibait ya at siniro;
at ngeni cu peniwalan casumangid ning Calvario
atiu carin manenaya ing maningning a Paraiso....!
> "Kaluguran Daka"
> neng Paing
>
> Kaluguran daka king balang penandit...
> Manibat pa inyang misan kata mikit;
> Tintu ku king lub ku king pusu midukit,
> Ing pibutnulan tang lugud a masagid..!
>
> Ing pali ning lugud a kekatang timban,,,
> A yang manantabe ligayang mitanam;
> Dakal a bulaklak at memayutputan,
> Ding bungang malare a sidsad king niaman..!
>
> King aldo ning pusu Febrero katorsi...
> E ku na kalingwan kekatang pisabi;
> A ibie me kaku ing mamu mung pisni,
> Ing mitagkil neman ing mau kung labi..!
>
> Ing piyatbanan tang sumpang alang kupas...
> King arap ning altar saksi la ring damas;
> Saksi ring pengari, bisitang magilas,
> Mesaya lang dakal kasal tang matimyas..!
>
> Dakal tang delanan dakal a pagsubuk...
> Ing amun na ning bie lungkut e manyambut;
> Nanu mang kasakit dalang salimuyut,
> Alang pasimbalang magbabo ing lugud..!
>
> Ing pamiyabe ta king saya at dusa...
> Parating tang ilud king pamisabi ta;
> Itang kaburyan mu at pikaburyan ta,
> Uling yang buri mu yang kaku at keka..!
>
> Alang kapupusan pali ning labi ku...
> Neng datang ne iting bulan ning Febreru;
> Makanyang mu naman, sasabyan mu kaku,
> Ing mamu mung pisni panenayan naku..!
Cang YsiaD
Neng: Ing Biseru, Valentine�s Day 2007
Ngening capagmasusia' na ning cayaldon da ring pusu
Pabustan mung ulitan cu sintang queca cu pengacu
Ica mung bucud babaing sininup cu quening salu
Ibat quing miabe cata liguran cu ica namu
Misan canacu mu quitang nu angga ing lugud queca
At ing canacung pequibat "anggang atin cung inawa"
Pablasang paniwalan cung pigcalub naca ning Banua
Manibat pa camumulan mitangaran cata mata
Capilan man e cu sawan pasibayung sabian queca
Aguiang dening balugbug cu e no damdam caring nota
Aguiang deng aduang mata cu mula no�t e manaquit na
Itang palsintang simbit cu, atiu ya pa anting sadia
Aguiang ining cacung diwa e ne macabubung rima
Aguiang dening labi�t dila eno macasambit letra
Anggang ining pusu cu e tucnang mucdul at momba
Ica mu ing palsintan cu angga quing tauling inawa
Sana salpantayanan mu ing simbitla cung amanu
Ica mu cabud bandi cu, ining sinta cu bucud mu
Ania ing cacung pagnasan anggang atin cung sicanan
Queca cu ngan iparamdam ing yumu ning capalsintan.
|