Contents:
1. DIAS POR PAN - RBA
2. Tauling Pamikit - RBA
3. Mala - RBA
4. Beha - RBA
5. " ING SULAT " - Paing
6. ING CALULUNG BOTANTI - Edgardo Bonus Sale
7. Capatad Dave at Ronnie - EBS
8. Dave - RDM
9. Para Queca Ima Co - Tet Bondoc( Christy Layug)
10.“Malansang Gurami” - Kua
11.ING PUSUNG SAWI - Paing
12.Ing Pusung Mesawi - Bicero
13.Bayung Banua [Nanu Kaya?] - Ronnie Juanta
DIAS POR PAN
by RBA
Kaluguran kung Mang Paeng, kelinguan mu ata, koya
king amanung kapampangan, Laureado kang Poeta,
sakali akalinguan mu, paganaka ku mu keka
karing anggang kapampangan keti sulip, uliran ka;
ngaku wari, anting watas a makiputung korona
ika ing piyalimbawan a dapat pakyapusan da;
inya nung king kapampangan a palipit, nanayun ka
balamu ata sukat mung iting bague pisabian ta.
Aku, e'ku na pagsintian nung karen sang bayu-bayu
a manigaral susulat nung atin mang sintunadu,
agyang misan e mu dimdam king karela memintas ku,
saka ta na la samasan yang maralas sasabian ku;
dapot nung ing anti kekang batikan at asintadu
yang manimunang tatanggap king salitang dispinadu
agyang nanan kung balakan balamu ata e ustu
pigaganakan kung pota pakiapusan do ding tau.
Inya ngeni pa Kang Paeng magsalita nakung tapat
king binie mung alimbawa tutul ku at sasalungat;
aku, e ku makanayun king ing amanung masampat
mipabustan nya mu kabud mangatalamsikan dinat;
inya naman angang binit guguso ku at guguniat
ban ing amanu tang sisuan ya ing lunto at miyangat;
inya nung yang matenakan e ya makatuntun dapat
mimua nala ding bisang mua, manyabi kung alang gulat.
Kaibat kung keka apasyag ing kanakung katuliran
e na sana pagkasala ning kamalan mu't kaniwan;
iti, pamipatibe mu king kekatamung parasan
a yang dapat suyuan tamu ing amanu tamung sisuan;
inya bayang lungkas lagu ing amanung pakamalan
king sukub ning agyu tamu maniabi tang kapampangan;
biru ya man o e biru e ya dapat gagamitan
ing amanung atmu dinat a ausan mung "DIAS POR PAN".
Tauling Pamikit
r-balto.md.USA
1-9-07
Mitalanan katang gamat, makalukluk.....alang himik
kabang dening kaladua ta maligaga la at sabik,
pablasang dakal lang banuang mepakling lagalagitik
bayu kata mikit, Rosa..... king tauli kung pamagbalik,
at kabang tatalnan mu kung atmu pali...atmu talik
ing pali ning kekang lugud king pusu ku manialiksik....!.
Ah...! Milawayan ta na mu...kalupa na ning kanita
ing lihim na ning pusu mu papasyag ding kekang mata;
antimurin, ding mata ku.....anti inyang anak kata,
papasyag dang ulit-ulit ing keka ku pamalsinta;
dapot ala yang amanu itang pamalsintang ita
pablasang ibat king ibat makabawal ya kekata....!
Mengisnawa kang malalalam....kaibat....ikit dakang migpiak
at dimdam ke ing lagusgus ning pangisnawa mung saldak,
ing inawa mung melugus bunduk ya waring melagpak
nung nu higanti lang batu ding meluslus lalagapak
at king babo ning salu ku inyang bigla lang misaldak
balamu ing yatu kaku milugmuk ne at melasak....!
Ah...! piputan ku ing daing, ing sambitan, at ing aklis
bistaman ing kaladua ku king kaplas ya magigitis;
mekabulad, king pisni ku kabud nala memalisbis
ding binutil a kakung luang atmu kapaling ginulis,
ing balang butil tagle ne ing lihim ding anggang batis
nung bakit king panipa ra daramdaman kong tatangis...!
Ding palad mung makatalan mabilis lang migkalabyus
at pinulis mu king panyu ing kanakung luang mamagus;
at kanita ke pinimpin ing kaniwan a mumutus
telanan ke ing palad mu at inuma keng melaus
itang samyu mung sampaga king lub kung salu tinaglus
uling ika, ikang Rosa, ning ayup mung pakli bagyus....!
Tinikdo ku....tinikdo ka....malale katang linapit
king maratun nang pagkeran ning matudtud makapikit;
at ketang penandit aita, mekad, e' mu na akumpit
migsukub ka king salu ku at menangis sakdal pait
pabulung mung kitang kaku : "Bakit kaya, bakit...? Bakit...?
makaburul ne ing sinta, bayu na ikuang mibait....?"
"Bala ku sana ing sinta", ngamung malale misundu,
"yang kabas na yang bulaklak a sisiro atmu lagu,
bakit inyang titiman neng mibubukadkad a buku
penako ne ning alisus a dinatang masalusu;
alang bitasang melakuan kening sugatan kung pusu
nune ing kaplas at kirut na ning kekang pamandayu."
Kabang pakiramdaman ke ing siwala mung mebalbal
ing pusu ku anti ya mong gagalusan da keng punyal;
uling ding balang amanung karing labi mu mebungkal
anti lang punlas sampagang mananabung tunggal-tungal
buri ku man sang saluran ing panamdam mung metanggal
dapot lubas lang amanu dening labi kung gagalgal.
Itang lua mu...itang lua ku...miyambulang sinagese
anting ilug a mitagpu a misanmetung king lumbe;
mekad, detang mekatangal king makalunus tang aske
abatas da ing beyatan ning pamangulila king bie;
agyang mikakunu la man linapit lang malumeme
ban igkas deng mipnung lugud tapat dang pamakirame.
Mupin, dening mayap a lub, dit'man e'ra aintindian
ing lihim a kasing lalam na ning dagat king aslagan,
ing kikiakan ning pusu ku aliwa ing kapainawan
o ing pamaglakbe kaya king dane ning alan'anggan;
nune itang pamalsintang makapiak na king burulan
dapot e ya biasang mate..... sikwil ne ning kamatayan.
Ngamu kaku, muli naka, kabang ing lua mu tutulu
at aku naman mamulis ketang matuling kung panyu;
At ikit dakang ginulut, mekad, parehu tang balu
yanang tauli tang pamikit keting yatung mapamiru;
uling mapilan mung aldo pasibayu kung painturu
karin king lipat ning dagat ketang marayung marayu.
Dakal nang banuang milabas, nung misan, atin penandit
a magbangun la king diwa detang napun tang miwaglit,
ing bukud na mung panaru king kaladuang menasakit
bayu mawala ing bie ku ikua ta rin mekapikit,
pibandian lang ingatan ku ding maulang guintung saglit
a mipagkalam kekata, itang....TAULI TANG PAMIKIT...!
Mala
r-balto md -USA
01-10-07
King pamigunam ku manintun kung sala
bakung mi-aslagan a pamaniwala,
uling king panyulung---- ding matang melula
makasilad la man, makidwang lang mala...!
E sapat ing mala ning aldo masaspak
king milaladlad nang yatang kule pilak;
e sapat ing mala ding mamung bulaklak
at dalit ding ayup a lipa-lipakpak.
E sapat a mala ing tibe ding bunduk
o' ding bulkan kayang tahimik babasuk,
E sapat a mala yang angin a sisyuk
o' yang alun kayang king pampang sasaltuk.
E sapat a mala ing benging kaniglan
a tatanuran na ning Sultanang Bulan,
e sapat a mala ing meto likupan
santungan ding astros ning kalaganapan.
Ing buri kung mala a pakit ning Guinu
maka-agpang ya sa king sariling bie ku;
ita sang metung yang mistulang milagru
a paniniglawan king mata ning tau.
Malyaring kanita ngakung migugunam
milusuk ing kakung kasalpantayanan
pablasang ing mala e manyabing laram
lalu na't ibat ya king Makapalyarian...!
King pamigunam kung manaya king mala
ining kaladua ku dimdam ne siwala;
Ngana wari kaku: "Taung mipagpala
nanu tang milagrung keka munye tula?"
"E mu wari balung ing panintunan mu
a malang patibe king kapanwalan mu,
mala lang milyari kanyang bie mu mismu
uling mismung ika ing kakung milagru....!"
Ken ko apialas ding bague megawa
kening kanakung bie, makapagmulala;
e'ku la pinsinan--- guewa kong mistula....
e'ku balung deti, ilang Keyang mala...!
Beha
r-balto md USA
01-09- 07
King misan a aldo, king pamanlakad ku
king dalan lele ning tindahan king kantu
kaku lang apansin babo ning sementu
miyaliwa klasing behang sigarilyu.
Karen na mung beha mayakit, masuri
king atin mababa at matas a uri
keyalimbawa ra ding taung sisindi
atin nang kalulu, atin masalapi.
Ing metung kareti, maki-asuk ya pa
makaba ya abung katuglung ning beha,
mekad ing sinindi milako ya gana
pinitik na ne mung e'na pitda baya.
Sindu ku ing lakad kabang isipan ke
ining sigarilyung babasuk miyugse,
nung nanu ya kaya ing aral nang babie
babo ning ketawan king panakbang ning bie.
Kakung apigunam king ing bie ning tau
mengari yang api na ning sigarilyu
ding balang saglit nang mabie mitatau
mapupupud nemang mumuli king abu..
At potang ing api ning bie mapda na ya
asuk yang sulapo ing tauling inawa
insa man katawan a ala nang baya
kalupa na ne mu ning abu at beha.
Inya o kapatad a matas a siduan
e mu pagmaragul pibandian mu't beluan,
datang ing panaun king lele ning dalan
beha kang miyugse e'ra pulutan man..
Inya kabang atin ka pang tagle baya
dapat na kang mayap....ganakan mu sana
ing tauli mung asuk a kekang kaladua
marap yang ma-ukum king matas a banua.
Alang kabaldugan nung nanung tatak mu
agyang kamelyu ka o kaya kabayu
bukud mahulaga mayap a depat mu
inyang alika pa behang sigarlyu.
" ING SULAT "
neng Paing
Ing sulat... menibatan ya king isip at panamdam,
Ginulis de ring taliri at king tinta ya ginusal;
Taimik yang magsalita king balugbug e maramdam,
Dapot kaksing ing siwala ing kablas king pilubluban..!
Karing namang talabasa a mamagus anting batis...
Pitange-tange ning agus king kalamnan mitatayid;
Kabang apipilasa ne ing yumu na ring misunis,
Paburen yang mamukadkad anting rosas ketang ardin..!
King sulat.. agigising na itang napung milabasan...
Makapanatad yang timan lalu keng kasalukuyan;
Maka-agnan ya keng biga makalipat yang dagatan,
Karing adwang mikalugud atigik neng pibutnulan..!
Apapagana na naman itang lungkut a dinalo...
A mapilit kakalingwan ketang salu yang magbabo;
Nung mi-ugse king kealan karing sulat naman lulto,
Sasariwang pasibayu ketang ardin king parnaso..!
Ating sulat a magbakas king katandanan at isip...
Makakintal at mamale king panamdam manyaliksik;
Dapot atin naman mekad king saguli mung penandit,
Mawawala, mabubura, ketang sapo-sapo angin..!
KIng mabilis nang panyatang o mabagal ya mang mako...
Ing kalamna' na ning sulat anti ya mu mong babatyo;
Keng pamagdili-dili mung king kaynipan a miyayo,
Atin na kang a-karame king kuswelu magtampiso..!
ING CALULUNG BOTANTI
neng: Edgardo Bonus Sale
Agpang caring amanu ning tatagal a politicu.
E canu maca diquil queng cualta ing politicu queca
tamu
Nune atyu canu queng pamagserbisyu
qng balen at qng caparang tau..
Casanting na pin ning queyang simbitlan a amanu.
Maca nanu ne cayang daptan? Yan, ing kutang ku.
Careng apulung pangacung simbitlan na.
Pilan no man caya ing agyu nang tuparan careta?
Papalapit na ing pamagcampanya ra.
Bandang bulan ning Eneru pagumpisan da na
nucarin do cuanan deng cualtang gamitan queng
campanya?
Milyun milyun pesus canu ing gagastusan da.
Bayu que ibaldug ing botu cu.
Paca suryan que ing pangatau ning cacung bobotu.
E cu balabalaus queng desisyun cu.
itang talagang dapat yang pilinan cu
Pota a cu mu rin ing sumisi king guewa ku
caybat cung migbotu qng presintu.
Metung yang carapatan pangmacatau ing pamagbotu.
E que dapat pakitawaran o pisasali ing botu cu.
Bista man masaquit ing cabyayan cu
Ing consensya ya ing paquiramdaman cu.
Labanan cu, e cu paisaul qng tucsu.
Tucyan que ing papasyag na ning pusu cu.
Atin pa mu rin mapilan a mayap a taung politicu.
Atin mu naman e tututung cacandidatu.
Pilinan cong miyamas amas deng sucat bobotu.
Ban cung milisya nanu man datang a indultu.
Yang gamitan ku ing consensya cu
bacung mipanginlag qng peligru.
Ca reng naman manyabut a poticu.
E yu cu sana cacalingwan ca reng pangacu yu.
Metung cu mung taung pacacalulu
sopan yu cung mibagwa queng pamangabyayan ku.
Ba' na cu man maging "productive" tau
antimong memalen ning Indung Tibuan tamu.
Ing catatalwyan, O Mayupaya ming Guinu.
Dinan yo pung sala^ de ning mata cu.
Ba cung aquit ngan ing catutuan qng paligid cu
at macapagdesisyun cu quetang macaustu.
Iti ing panalangin queca O' Guinu cu
bayu cu muntang magbotu qng presintu.
EBS
Capatad Dave at Ronnie,
Malambat cu ne pin babalacan
Ing que ca tamung pami ugnayan
Taneng "busy ta mu milabas a bulan
O sige tatag ta ne canyan ing AGUMAN
Queng pamagbalic na bat Pilipinas
Ning mang Pidung Rivera a maticas
Ca rin tane pin umpisan at balangcas
Iting pamitambayam miyamas amas.
Queng bulan ning Pebreru pamalac cu
Metung a aldo ning ugtung Sabadu
Ca rin qng San Diego miqui cubu
Bandi neng Pidung caluguran tamu
E que calingwan dalan ing Karaoke
Magcanta tamu at gumale nang gumale
Ban ing bosis misane neng misane
Ing Capampangan 'tin yang belwan tagle
EBS.
"Dave"
rdm
D...ave deng poesia mu malaman la pitik..
Anti la mong panas maparas la kinis;
Nung wari keng lara, lara lang inanis
Angga na king gulut maplas ka pa buldit..!
A..be isundu mu kekang kawatasan,
Pamitula-tula, ating kararasan;
Magsane tamu mu, king amanung sisuan,
Pakalako kaynip anting manandawan..!
V...ery good yaku pin, keng kekang umpisa...
Mekabuu na kang mapilang poesia;
O yaku pin ngeni anti mong paynawa,
King uli yu abe tuluy ang ligaya..!
E..ta tutuknangan susulat poesia...
Maski pa nanu mung linub a ideya,
Maski e poesia, prosa o pulosa,
Malyari mu naman, Kapamgangan sana..!
Para Queca Ima Co
Tet Bondoc( Christy Layug)
Napun sinali Kung tinape, Minuli na, atin cheese wheez kayabe
Eku balu kung bakit Quing mata nang ima cu
Alang sukat a lugud , king ayli na.makagulis
Oyni ikami buri Kung ipabalu, Balen Capampangan
King kilub ning adwang pulu't anam a banwa bilang tau
Anak, kapatad at kaluguran,
Oyni ing istorya ning bie mi,saksi ke ing banwa
Ing pengaring lalaki,belikan ing keyanakan at anang meg amano:
"inyang acung manigaral lisyun makasake babo ning damulag
Nung dadalumdum n tumulid lalam poste manintun aslag ning sala"
Ing padre de pamilya dati yapung megsundalu,meg-AME ,
Bandang tauli pilan yang pulung banwa megtyaga Arabia.
King sumagid d reng panahun ala ya tata mi
Ing Ima ku malugud kambe iyang menantabe.
Tinikdo bilang adwang pengari,
Ima co keca saludo kami.
Ima co, pilan ng banwa milabas iya pa rin
Alang aliwa, kambe lugud, manyampukaking pamaintindi,
Alang pipilinan oras para kamustan naka,
Kawlan naka agyang mabangnas ya, ing uma na agyang mipapawas ya.
Sumangid ning kasakitan, kapibabatan….
Atin tula kilub pusu ming limang mikakaputul,
Uling ima cu iyang dapat pasalamatan.
Uling ima cu meging dahilan,
Uling ima cu meyari kami ngan pamagaral
Dacal a dapat pang sabyan, pero nung ima ing pisabyan
Ala ng dacal pang pagbiruan,
Ing baleng atin imang malugud , alang kupas, alang bahid takut
Mesabing maswerte ya at pagpalaan ya.
Oyni para keca Ima co, ala ng dapat bang intindyan
Uling kapag achu naka, kapigagacan ala na.
“Malansang Gurami”
Ning: Kua
Anyang marayung milabas, misan a aldo
A isip kung lumual, ban makasaling auto
Telakyad ke ing pisan, ban asaupan na ku
Pauli na ning English ku, E ya pa pulidu
Pintalan mi iya, ing pipag tindan dang saken
Deng bayung modelu, kasanting dang lalawen
Panintunan ke, ing saken king paninap ku
Itang maporma’t mabilis, pang bayung tau
Kabalikid ku keng wanan, oyta! ikit ke
Malambat ku nang pag nasan, modelung kotse
Keng malwalas a loting, kakung dudurutan
Taga pag tinda ra, maili na keng lepitan
Mi alung karug at saya, ing mibalut kaku
King mapilan penandit, mika kotsi na ku
Gelamanwan na ku nining taga pag tinda
At masayang tiki king keyang opisina
Karin apansin ku, balamu kabalen ke
Ka apelidu de, ding tau Makabebe
Palipit kung English, e ku ne papansinan
Uling salita ku, pirmi neng ayintidian
Kabang dening papelis, keyang sasamasan
Kitang ku nung mika daya yang Kapampangan
Uwa. Ngana keng pamag English nang mekibat
Karin ku meragul, bayu keti linipat
Bah! Ayintiniyan me pa pala nung makanyan
Siguru? Ing kekatamung Amanung sisuan
I’m sorry, what is that? I did not quite understand
Been here for so long, I have forgotten how it sound
“Taung ini, malambat ne siguru keni
Akalingwan nane, ing Amanung sarili
:Pilan na kang banua keti, kutang ku keya
Keng English pekibat na, mag adua nang banua
Ditak ku mibaligtad, king kakung luklukan
King pekibat ning tau, king kakung arapan
Mako ta na keni. Nga ku keng pisan ko
King aliwang lugal, ta na manintun auto
Keng kamwa ku, pota abalugbug ke pa yan!
Kabalen ya pa mo, makarine mang sabyan
Basibas me at itoto keya ing apan
Ketang asbuk, ing asan, karin me darakpan
Kayang pamag lingad, katutubung salita
Mengari ya mong guraming asna kalansa
Makanyan ing sabi na ning tau Kalamba
Kareng e lulugud king karelang salita
Poesia ning Kua[011207]
" ING PUSUNG SAWI "
neng Paing
Ing pusu ku magmalun ya inyang likwan mu ku bandi...
Ketang makapal a ambun at malabug... yakung dili;
Aggang punta ya kalaut, pangisnawang alang anti,
Ing panaun memilatan kening bie kung me-unsyami..!
Neng agaganaka daka yang masampat kung pibandian...
Itang ketang milabasan, angga na king katatawlian;
Ding likwang mung panalala king kaladwang manyambitan,
Kapasnawan king isip ku kening pusu kung mebangal..!
Mikuluban ku king lungkut kening lua ku ampong
tangis...
Ing meging sikanan ku mu, neng atyu kening isip;
Paburen kung mangibabo kening diwa ing timan mu;
Mitmung tula keting bie ku ining pusung manigapu..!
Pasibayu tunggal-tunggal ku lang pulutan karin...
Itang melasak kung bie a pitange-tange ning angin;
Anting misalbag a akbung, kaku mu kung pe'inggulutan,
Ketang sitsit mung masikan... a e mu naku balikan..!
Keng balang paninap ku, neng marimlang benging
pisak...
Atyu ka king kandungan ku, ikang aping milalablab;
Kakablas ing aslag kaku ketang gintung milabasan,
Pasibayu ra kang abe kening bie ku... ing katutuan..!
Ing Pusung Mesawi
Kapampangan translation ning Biseru from the
original English version of the poem “A Heart In Despair”
by Mang Ernie C. Turla
Ining pusu …mengaplas ya anyang ume mu kung lakwan
Tikpan ning makapal nang ambun ning kinupas a katutuan
Karin king marayung sepu ning alang angga’t kapupusan
Ing panaun at pamikandayu yang kanaku memyalungan
Ing mangasayang penandit a kanakung pekamalan
Menibat ketang milabas mitanam king pilubluban
Ding ala-ala mung likwan kening kaladwang manalumduman
Sana ing kanakung isip ayaru ne ing pusung sugatan
Ining kalungkutan kimbalan ning milalung lua’t kasakitan
Pilitan kung kumang lakas kabang babalik ka king panimanman
Kapamilatan ding masuyung panalala karing mayumu mung timan
Magbalik kang pasibayu kening bie kung kitmuan lugud at kaligayan
At kanita ko pa pamulutan ding mengasalbag a pirasu
Nitang bye kung menagipung tiki nang silapo ning bagyu
Kaybat nang melasak keng akbung ning pamaglako mu
Kambe ning sumpa mung e na ka magbalik kapilan man kanaku
Dapot karing paninap ku balang benging malungkut at marimla
Pilit kang babalik keng yatung madalumdum anting aping babye sala
Keng aslag nang paganaka keng gintung penandit a milabasan
Karin magbalik ka king siping ku king labuad ning e katutuan
Bayung Banua [Nanu Kaya?]
Neng: Ronnie Juanta
Menaliwa ne naman ing banua
Oyni na naman, at mag umpisa
Ngening banuang ayni nanu kaya?
Mag bayu, makananung agawa
Mag balik lub ku, king Mayupaya
Manyad tawad, keng mali kung gewa
Banuang ayni, at tutuki sana
Keng turu na, enaku milisya
Mag bayu kung lub at panugali
Samasan la, deng pamag kamali
Pagmasusiyan, ngening banuang ayti
Mag matibe, at ena mapakli
Magsikap ku king, pamag-obra ku
Maging masipag, ban kung masensu
Ibiye ing kailangan, pamilya ku
At kareng angang, mamasa ka ku
Dinan dakal oras ing pamilya
Diang manga tambunan ku king obra
Kalupa na ning kanakung Igpa
Kanitang mangalati kami pa
Pamanyulat ku. dinan panaun,
At ing diwa ku, esa mumugun
Maki yabe ku, karening lilimun
Keng Amanung, pilit dang babangun
Midinan lakas, midinan diwa
Makasulat poesia at prosa
Amanu ku, italakad ke pa
Bayu mikera, bayu ku matda…
|