 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY - PAGE 5 |
| ERNIE C. TURLA - curator |
| ||||||
PAGE 5 CONTENTS: 1. Pugue Para Queng Segunda Princesa by Delfin T. Quiboloy 2. Mate Ya Ing Tau by Monico Mercado 3. Aniang Lub Dacung Boxingero by Jose Gallardo 4. Ing Suerti by Ernie C. Turla 5. Ing Pila At Ing Anac by Ernie C. Turla 6. Ing Miwale by Angela Bonifacio-Turla 7. Ing Tanaman by Ernie C. Turla 8. Ing Sampaga by Ernie C. Turla 9. Ding Anam A Bulag A Tau SEXmoan by Ernie C. Turla 10. Pamamatawad by Ernie C. Turla 11. Deng Poeta by Ernie C. Turla 12. Magbisita Quetang Napun by Ernie C. Turla 13. Ing Mamalis by Ernie C. Turla 14. Tipunan Lang Sampaga Yu by Ernie C. Turla 15. Ing Angus Ning Gabun by Tony M. Pena 16. Subucan Pamu Bang Mabalu by Ernie C. Turla 17. Kasalanan by Aida Caranan PUGUE PARA QUENG SEGUNDA PRINCESA (by Delfin T. Quiboloy, 1971 poet laureate, Pampanga) Pagdala nacang regalu / ning malagung cacung musa Alang-alang queng leguan mung / catulad da ring sampaga Iting regalung bitbit na / macayuyut yang corona At miputung qng canuan mu / ban lalung palagu queca Ing migcalub queting galal / queca ya bisang malsinta Ing ibpa ring angang dioses / y Apollo ing yaus da Dapot bayu miputung ya / corona qng mal mung canuan Masa cung sambitlang ditac / qng bitbit a quecang leguan Canita reng ngang tinagun / samban daca't quilalanan Qng ica ing princesa na / ning baryu tang pacamalan Canita ing poeta mu / iganap na ing casuywan A sabic nang dela queca / bayu ya gumulut myuman Yang leguan mu maquibas ya / caring bucung mamucadcad A matulang magparayo / qng banglu ra balang abac Icang mayo ring poeta / cacanta rang paquitulad Quetang Helen na ning Troya / queng quinis ning quecang balat Ing suala mu mararamdam / caring dalit da at coplas Da ring ayup qng marangle / batu-batu ampong denas Ing timan a mamialungan / careng malare mung labi Ya ing sancap a patuyag / icang reina ring comangui Deng quile mung misnang lantic / catabas lang pinanari Lalu lang palagu queca / qng marangle neng mapali Ania ata ing lare ra / reting mengatba mung pisngi Miglulan la waring aldo / queng lutu rang ipasari Panualan mu icang reina / qng siduan ding balang pusu Ing carelang paintungulan / queca ra lubus pangacu Uling ica ing beit nang / pagmaragul a malagu Ning baryu tang uliran da / ring dalaga qng pangulu Ica itang babanten da / ding sampagang mangasamyu At daralit da ring ayup / ing hinhin mu ampong camu Rosa cang pangayamnan da / malagu pa qng asahar Masamyu ca at mabanglu / busilac a anting rosa Sariwa pa ing timan mu / uli na ning cayanacan At ing sabla mung pangimut / musica pa at cundiman Reina cang patulunan da / ring dioses na ning quetawan At santa cang libutad da / qng sacristan ning pisamban Queting leguan mung darala / ba cang lalung mitaluctuc Buri cu yuquiat da naca / qng bunduc na ning Olympus Quetang templu nang Apollo / ing dios ning yatung mabilug Ipuc daca queng lugal na / ning diosa nang pecasinup Ban ding sabla gumalang la / samba queca suguing Venus At icang papagarian cu / qng tronu nang mataluctuc Nung buri mung lalung tindag / ing iputung queng canuan mu Princesita, cuanan cula / ring astros na niting yatu Deng perlas ning calalaman / tipunan co arapan mu Ban magawa ya-ing coronang / malambat nang pengacu cu Ing taguimpan cung marurut / licuan daca reting tau Ica nasang tune diosa / at samban na niting yatu Oini ing capagnasan na / ning maluca mung poeta Uling queting quecang leguan / ya ing dapat mung amana Mena quene, o musa co / a tatalan qng corona Yampang taneng pacatiguit / queng canuan na ning princesa Yawad cung catahimican / caring lalbe at sasamba Ing patnube tang tigtigan / ya ing marcha Pilipina Music Metupad na o princesa / iting dacal ming casuywan Bisa na queng mamun pamu / queting maslag a piarapan Sacali nung cutnan dacami / reng taung quequeng delanan Igulisac mi at calat / ica-ing reina ning cabengian Uli na nian suguing mabie / yawad cu ing ticdo tangan Pasibayu saganan ya / qng matni tang palacpacan. (This eulogy was delivered by Atty. Ulysses Diwa (now an administrative nurse in a Colorado hospital) in the coronation event of the Masantolenos in San Francisco in 1989.) MATE YA ING TAU by Monico Mercado Ing bie na ning tau queti qng masala Qng laut ning malat mengari mung bula Queng sapuc ning alun agad nang matatda Ban qng panlalawe muli ya qng ala, Ania qng tau man nanu mang upaya Leguan o pibandian malicsing mawala... Mate ya ing tau alang capilisian Catigtig ning oras a e na panayan Leguan o upaya banding pecasimpan Capupus ning bie na malacuan la naman Ing quecang catasan capagpalaluan Lalam na ning aun tuquing mitambunan. Nanan mung catasan mate ya ing tau Nanan mung upaya, lacuan mia ing yatu At nung biasa ca man e pagmaragul mu Pablasang ing sabla pawang ating sepu E ca sa masangil quenu mang calulu Ganacan mu sanang mate ya ing tau. Ing lalung cababan yang quecang asalan Ugaling matampa yang sucat mung daptan Detang mebalatung e mo pipintasan At detang mebigu e mo sa palcaran Pibalacan mu sa ing quecang cabilian Gabun cang mistulang ibat qng cababan. Mamamamintas ca e ca naman ganap Nung canan ca sana culang ca pa sancap Taling-taling naca at magmatas-matas Bagcus qng cababan carin ca menibat Nung 'tin ca mang cualta o banding sisicap Balamu bunduc cang sari na qng catas? Ing sabla mapupus mate ya ing tau Iti dasnan ta ngan at mipapareu Ninu mang lelangan lacua' nia ing yatu Ban qng alicabuc muling pasibayu Canita mu aquit mababa cang tau Ing patag a gabun ya mu-ing caulian mu! Don Monico Mercado, the first assemblyman of Pampanga in the first Philippine assembly, at tegawan na queng cumpil Presidente Quezon, was a noted poet, writer, philanthropist and lawyer. He has a life-size monument at the town hall of Sexmoan, Pampanga. ANIANG LUB DACUNG BOXINGERO by Jose M. Gallardo, poet laureate 'Niang lub dacung boxingeru Dela racu Sapang Batu Ing canacung acalaban Pecapun de reng sanganu! Antemanung mipamustu Ot tinalan ne ping batu E pa man metigtig ing bell Binuga na no canacu! Dapot uling matinic cu Icua cong apangilagan Ania naman ing miliari Ing reperi yang mituran! (submitted by Frank Bonifacio Robles of Masantol, Pampanga) ING SUERTI by Ernie Turla Ing suerti o calma / quen yang queng milabas E ya daratang pa / o paintungul bucas Ing gulis ning palad / signus yang e tutu Ing suerti, suerti ya / calabas na pamu. Alang midestinu / e ta macatuntun Ita mu mung bala / queng quecatang acsyun Mirinan tang isip / darapat tang cusa Queng mayap at maroc / libri tamung gawa. Ing bie e sarsuelang / pirmadu cayarian A reng gagampana / balu ra'ing caulian Da reng balang metung / papil dang tatalnan E ta mu artistang / guewa ning miglalang. E ta mu manicang / pialungan ning Guinu E ta macadictang / tutuqui mamintu Itang gagawa ngan / queng mali at ustu 'Nia ating ligaya / at ating inpiernu! Uling nung tambing nang / miplanu ing sabla Miral magwagui ing / quewalan pagasa Pues nanu pa'ing daptan / nung macanian pala Megamit ya'ing tau / queng bie nang maluca! Nung completu ne ing / istoria ta queng bie Bayu pa mibait, / ala nang tagumpe Pati na rosario / ala na ngang cuenta Nung macanian pala / ot mangadi ta pa? Dapot uli na ning / guintung calayahan A pigcalub ning Dios / malugud, miglalang Samal tang paipagal / dacal ta tatanca At layun manintun / masampat a calma. Ania icang bala / cacung caluguran Gugulis me mismu'ing / quecang capalaran Ing suerti ala yu / queng quecang darasnan Nune bacas nia queng / gulut mung lebasnan (The author professes his belief in man's free-will and does not believe in pre-destination.) ING PILA AT ING ANAC by Ernie Turla Ating catigcal a pilang / diclut cu quetang serulan Peniacmal que at penamas / queng lambut nang titimplahan Cabang pamaslan que iti / tutuqui ya queng buri cu A moldi queng miamasamas / at apormang masqui nanu! Silmuc que quetang radilia / at milabas ing aldoldo 'Niang tutuqui queng daclutan / mipamulala cu , Dios co! Ot sinias yang anting batu / at e cu ne apasla man Ala na cung acarapat / menatili niang macanian! Atin cung metung a anac / peparagul at sinese Queng landas na ning tune bie / tintun que queng masalese E ya mipasunuran queng / unabis a camulangan A apupulut queng dalan / e que tatacut barugan. Binie cu ngan ing lugud cu / pecalingap que queng sabla Minoldi que at inusuc / queng angang mapuring gawa Lon ye ngening meragul neng / mesias anti itang pila Ing mayap nang panusancia / e cu na ayalilan pa! ING MIWALE by Angela Bonifacio Turla Ing taung miwale / keng sinta nang labwad Ayup ya mo waring / mewala keng pugad Mimisip at maglwa / keng lugal nang likwan Nung nu misapwak ing / kayang kaligayan. Migmula pa inyang / mako kung miglakbe Para makatuklas / kaunlaran keng bye Malukang pusu ku / payntunan nayng dati Mamita keng napun / anti yang kakagli. Nung anya pin ngeni / keng bili ku keti Gunam-gunaman kuyng / milabas kung swerti Ing miwawale keng / labwad na't panaun Dapat nyang maglimbang / para mipayndatun. (Note: This poem was written overnight as a homework assignment during the week-long workshop / seminar organized by Dr. Evangelina H. Lacson in Portland, Oregon (Nov. 21 - Nov. 28, 2000.) ING TANAMAN by Ernie C. Turla Queng pusu ning butul / a guewa cung bini, Ating matudtud a / tanamang malati. "Miguising na ca," nga / ning aldo neng abac, At ning macaprescung / uran a papatac. Cabud miguising ya / iquit na-ing masala At sinigpo yayti / queng tula na't saya. Ala na cung balung / poeciang masanting A mas queng tanaman / a sacdal queng lambing. Macatalanga ya / libutad ning ilang Yaduang nong gamat na / queng Guinung miglalang. ING SAMPAGA by Ernie C. Turla 'Tin cung atuclasan / metung yang sampaga Saguiwa-ing timan na / cayarle dalaga Qng uli ning timias / ning cayang ichura Inagtal que iti / at myuman queng dela. Singut-singutan cu / ing babie nang samyu At mipapaldan cu / caladua at pusu Tinungi queng quebit / queng canacung salu At mica-diwa cung / taimtim at tutu. Iniang matudtud cu / apaninap que mo Atyu cu queng hardin / at sulasulapo Iniang uman que'iti / meguing babai ya Mig-lalaqui ne mang / cacung mariposa. Linuat ing panaun / misan maglacad cu Tulid na ning mulang / minie "flora" cacu Queng lacbangan pasbul / lele ring tanaman Ating macalucluc / a mayumu timan. Sancan cung mengutang / queng direccion caya Agad-agad mu rin / que-iti aquilala Ngeni maluat na'ita / supling mi siam nala Utang ning lub cu queng / metung a sampaga. ING DAMULAG AT DING ANAM a BULAG (a tau Sexmoan) by Ernie Turla Ating anam a paintungul / mabiasang tau qng Sasmuan Sabic la queng pamagaral / bistat deti bulag la ngan Misan piyayagcatan deng / pagaralan ing damulag Banting upayang ing beluan / da lumapad at miragdag Sinaque lang banca reti / pepayatad la qng sacan Teiran nala't inantabe / nitang carelang tiburan Pemaltang no queng pilapil / ning marangle qng pangulu Dela nala queng damulag / a pagsarian dang abalu Ing mumuna catalan na / careng sagu nga nang agad "Anti ya mu palang lait / mu pin milalu ya lapad!" At ing cadua acapcap ne / itang iquing balag-balag Tambing nang guilisac "Lubid" / ya ing alcus ning damulag Ing catlu atalan no reng / malalam nang busbus arung "Anti ya mu palang lunga" / nga na, "e cu mabalatung" At ing capat sinitsit na / ing dalig yang calupa na Caibat nang misumpung niti / queng catalindiquingan na Pandac ya mu ing calima / gagapang nia queng tical na At 'niang ayamas ne susu / ngana "anti yang esponga!" Pulyu ya naman ing canam / at 'niang adacma ne butit "Anti ya mung asias ata / queng timpla cu at panaquit!" Cabud cauli ra reti / anting mica-educasyun Balang metung pipilit na / ing masias nang declarasyun Neng e re lubus atagquil / damulag dang pegaralan Tacba sira ing mali ra / alang tinud ni metung man! (based on The Elephant And The Six Blind Men of Indostan) PAMAMATAWAD by Ernie C. Turla Tiran nacu digsu nacu / mipasubsub queng samientu Inapis que ing tacde cu / at biglang micapali cu Dapot iniang tucnang yayti / agad menyawad dispensa Ot sinulapo ing saquit / gulping ala nang darecha. Ing saquit queng pilubluban / mas pa quesa queng catawan Uling iti reng pusu at / isip ilang manandaman 'Guiang matas ya lub yang tau / nung dicuan ne ning camuan na Ing patawad pihung bie na / ing pusu na lumambut ya. DENG POETA by Ernie Turla Ot mo reng poeta pacalalam do pa Deng gagamitan dang amanu't cataya E caraniwan ing queng carelang dila Iti nung ania pin ausan dong macudta! Ot mo ing sulat da sidsad casampaga Lacuas na nung digang bucud queng dalaga Neng magparayo ing masamyu rang diwa Iti nung ania pin ausan dong macudta Ot e na darechu'ing carelang salita Licu-licu pamu e mu agad acua Cailangan ya pamung pacabasa-basa Iti nung ania pin ausan dong macudta Ot mo macawili ing carelang rima Careng maquiramdam queng pusu musica Deng watas sanac do lingapngap deng malda Iti nung ania pin ausan dong macudta Obat pawa la ngan queng tinic di Soto Quiboloy, Ocampo, Yuzon at Gallardo -- Teluctuc de uri ing amanung sisuan Iti nung ania pin macudta rong ausan! MAGBISITA QUETANG NAPUN by Ernie Turla Macananu cung abalic / ing mayumung mengalabas Anti iniang anac catang / mamialungan lalam biabas Mialung picu o tagalan / alang capigaganacan Uling ing bie ta canita / bastat mialung mu at mangan Macananu cung abalic / itang guintung caorasan A iniang anac tamu pa / queng mula yu mamialungan Ustung cai reina ca mo / neng ing pialung Santa Cruzan At sanga lang gumamela / reng arcu ming bibitbitan Ustung cai aguiang bengi / neng masala ya ing bulan Lalual tamung para mialung / tambubung queng arap dalan E mu pansin camalayan / lalon cu ing quecang leguan Nung aniapin cacarug cu / salu cabang mamialungan Mengalumpis na cu lupa / meputi buac mebucut na Pero ica e ca tinua / ichura mu ya naman pa Ing leguan mu menatili / queng panaun e mewala Mula 'niang mig-graduate cata / at megaral ca Menila. Uling e na ca migbalic / ni migbisita mu man sa Manibat 'niang licuan mu cu / mewala na cang bitasa Queng pasamanu ning awang / tinulu ing canacung lua Cabud linual ing balita / mequiasawa na ca pala Ing daptan cu na siguru / ban mipasno-ing queng pusu cu Gunaman cung miamas-amas / ing canacung bie milabas Uling cabud abuclat cu / ing memoria queng garapun Bali anti na cu namang / magbisita quetang napun ING MAMALIS by Ernie Turla Ot ustung mamalis at macaducu ku Macalawe la ngan a mata reng tau E cu balung sabian 'cad pota siguru Micacadiwa lang manalbe canacu Ustung mangabalag ing bulung tanaman A papaid na ning angin a masican Agad cu na iti lingapan palisan "Sipag mo", nga ra reng lalaqui queng dalan Pagmulalan ku mu 'guiang macagulut cu Alben dacu murin queng pamamalis cu Pati reng "trycycle" apapatucnang cu Para manalbe mu queng pamamalis cu Macuyad cu palda uli ning lisangan At ala cung tacde ban lacuas miprescuan Malwalas ya batal maputi cung bata E na cu magbra man ban lubus mibasa Maquinis cu cutis balat cu maputi Saslag keng tangad ning aldo a mapali Mandilu cung pawas tutulu arap cu Mayap namu naman maympis ya'ing baru cu. Deng manaquit cacu queng cacung sipagan Sabi ra biasa cung magdalang imalan Lacuas na pa canu ustung mamalis cu Lupa cung artista anya lalon dacu. TIPUNAN LANG SAMPAGA YU by Ernie Turla Tipunan lang sampaga yu Cabang ating pang panaun Ing rosas a atyu ngeni Aquit me bucas magmalun Pasayangan yung lilipas Ing mayumung guintung oras Tandanan yu qng ing tau Tutua ya queng milalabas 'Nia tiwalag mu ing dine Magmahinhin nanu pata Anting biahi ing panaun Pota amis mu ing sabla Ing canung pecamasanting Queng bie yapin itang abac Mapali pa ing daya mu Ing damdam ning pusu sapac 'Nia diligan me ing rosas Ing sampaga ning quecang bie Ya ing sucad na ning saya At ing saya yang bie tune ING ANGUS NING GABUN (nang Tony Mercado Peña) Babie que queca mabie a catutuan Nung buri meng aquit pinanari ning bie Dumanas ca pa mung uran at carimlan Caibat canita sumlag yang macule Pinanari ning bie, masaplalang bale! Macanian mu naman bayu ca mebiasa Tinicdo't linacad matulid a tacbang gamit gamat-intud muna cang ginapang bagya-bagya't tungal ditac migpatalan mengasacab ca man e mu penamdaman! Atatandanan mu aniang mibait ca? Quiac na cang quiac lalual qng masala Matni mung pabalu e la migaganaca Ding camaganac macapaligid queca Macatiman la ngan gagagad la tula! Ing cabaligtaran yang tune malyari Queti babo yatu potang maco na ca Macatiman ca pang mamun caring sabla Ding camaganacan magpaligid queca Mangalbag la mata gagalgal la lua! Ing marimlang uran, macule pinanari Gapang na ning intud, matulid a lacad Quiac bayung bait, timan na ning mamun Catutuan lang mabie dapat mamucadcad Ban masaplala ing angus ning gabun! SUBUCAN PAMU BANG MABALU by Ernie C. Turla Ating migdeclarang imposibling gawan Oneng ating metung misna qng tetagan Meili ya at iti e na paniwalan Ban mabalu, nga na, dapat pang subucan Agad linundag ya licas ne'ing baru na Ban layun mibasa cabang magobra ya Bista ma't masaquit pigtiririn na pa Ot ayari nia rin mipamulala la Ating migsalita "Ninung macagawa Ala cu pang balung guinawa caniti." Oneng itang metung e ya maniwala Ban mabalu, nga na, dapat subucan pa Leco ne'ng cupia na miglislis yang tacde Diptan na'ing agyu na arap ding manalbe Macuyad salita icua neng ayari At deng sablang tau tingguen deng bayani Maralas queng tau agad susucu ya Neng cai e pa man iti megumpisa Tatacut nang daptan itang e na balu Iti e mabiasa simpli anga nia mu Alang imposibli picabaluan na'iti Deng memaninbentu at memagdiscubri E ro paniwalan dapot nang miliari Apalto ro mali ninung maili ngeni? (based on the poem, "It Couldn't Be Done" by Edgar Guest) KASALANAN by Aida Caranan Keng pamung balangkas ning kayang alino Keng timyas ning alkus nang makapasoso Yang kanung babai kabud at e pa man Miglubas, atin neng tambing kasalanan Lalu't-lalu na pa nung keng susulud na Deng kayang sisinup pinta-pinta la pa Santu nya'ing barakung mekatangal kaya A e pin matuksu ampong mikasala Kabud migkera ya kilub ning kulumbu Antemanu murin ing tukud nang Pedro Tikdo yang salubung milako animu At myuman maglasing, manyuca queng yumu Anyapin siguru macanyan sangkan na Nung bakit kang Adan mibye ya y Eba Keng pamisiping da e ra ayagwanta Ing aus ning laman ya ing kebaldug da. Anya ngarang agad sabi ring mangatwa Bunga nyang masusi ning kasalanan na Ning inda ing anak misapwac keng sala Tenam nya ning tata't gimbul nanu pa ta Bali ulmaan yang atyan ning babai At anting pila ing cupal ning lalaki King uli ning sinta ampong kasalanan Merakal lang tau keti king sikluban. To see the previous page, click: http://maxpages.com/poecia/poecia4 To see the next page, click: http://maxpages.com/poecia/poecia6 |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00131 |