Table of Contents:
1. Tagimpan King Bayung Banwa 2007 - Biseru
2. Ing Lasa Ning Kayanakan - Arnold Batul
3. Isanu Ing Kapampangan? - Paing
4. Pakibat..."Ing lasa ning Kayanakan" - Paing
5. Pangadi Ning Pengari - Monette Mallari
6. ING TARAT QUING PORTLAND - Rudy Espino del Rosario
7. Ing Bombilya - rba
8. " SULUNG PARITAN " - Paing
9. Ketang Tangke - Arnold D. Batul
10."Palakpakan Karing Mika-galal" - RDM
11.Special Poem: Ing Capayà - Segundo S. Romero
12.Lambis Kang Mang Paing - rba
13."Itas Tala reng Basu" - Paing
********************************************************
Tagimpan King Bayung Banwa 2007
Ning Biseru, January 4, 2007
Pabustan mung pasyag keka o kanakung pakamalan
Ing masampat kung tagimpan kening banwang salukuyan
Ing mumunang pagnasan kung keka sana atangalan
Ing aslag na ning ligayang magdatila kapilanman
Kakadwa kapasnawan at karatunan panimanman
Balang maranun saslag ya ing aldo neng kayabakan
Kakatlu keng tagimpan ku ing kekang pamanagumpe
Keng nanu mang gagawan mu balang oras ning kekang bie
Deta sanang pamilya mu pane lang makayagape
Ding kekang kakaluguran keka la sana mantabe
At ing lugud a dalise king salu mu makasale
E mu sana ipagkaymut at e sana mamamate
Mikalaman ka sang lakas a kailangan mu keng bukas
Pane mu sang gaganakan ing mangalagung milabas
Uling deti ilang susi keng yumu ning pasalamat
Kareng kalam a tinggap mu ibat ketang banwang matas
Tuntun ka sa keng malinis at e masuksuk a gasgas
Keng dalan ning katuliran karin ka sa tuki bakas
Ban ing balang paninap mu akwa mu la nu man katas
At matula mong pupulan ding bunga ning kekang pawas
Ing Lasa Ning Kayanakan
Neng : Arnold Batul
Meko ku at memagasa alang genakan bitasa
Uling ala nang mawala kening bie kung salimpusa
Kabuklat na ning masala almusal man tuyu ala
Ing pamagaral pa kaya! Bie kung darasnan, salanta!
Gagaladgaran ke’yng dalan magdarame agyang kauran
Mamusan nang kasakitan ding matua ku pepapusan
Angga kya mu keng awakan basurajan pangalkalan
Plastik o boteng kalapan pyesta nung atin pamangan.
Ding matuang mikikabilyan manintunan pangabyayan
E de pigloluan kekaming kinabukasan a dasnan
Nune saga-sagakgak king alak miglasun king pamibalak
Nung ali sa pwersa kami ngan tutulak king bie misalmak
Ing atyan kung mangayatyit keng dagul ku pang bulilit
Manulid mamangan pansit miyugsyanan gyang kapurit
Oyan ing bie mengasipit e bibiru ing papakit
Laganas ing bie mekibit manangis palapalipit.
Malikid naka man wanan deng akit mung kayanakan
Mangasanting la piblasan asul at maputing ‘malan
Gayak king pipagaralan kabyasnan ing payntungulan
Mumuran la reng pyalungan paka kajun bulan-bulan
Dirirya kung tutu misan at kakung pane kukutang
O’t ing bie mi mitmung kulang ala yang ke libang-libang
E ku sukat apanimbang obat ing bie ku matabang
Ing isip ku mamumulang susulapo doplang-doplang
Migising ku king pagkeran kuku-kuku king kerimlan
Samwentung kakung sepinan kajun lamung pengalapan
At ya na naman umpisan anti’yng napun a danupan
Galagalukguk a atyan galadgad maintun pamangan
Akit ku no naman dening anak a pikakatulan
Kabang saken dang panayan celfon no man ding tatalnan
Kililing pipagparilyan atmo tula king libangan
Makawili lang matyagan danup ku akakalinguan.
Dakal a banwang milabas anti lang bulung melagas
Makanian ya pa rin talas ing bie kung e na lumwalas
Nung nu na ku mengaparas ban bie kung lubas makwerdas
E patugut magpapawas manintun pa mu rin lunas.
Pepaindalan ku misan ketang dalan at siyasatan
Nung nu la ding kayanakan kanita kakung panginuan
Ikua kung mengapayasdan king kakung apagumasdan
Ding kakung pikakatulan gusut-gusut no imalan.
Makaumpuk lele dalan anti’yng saken a kesiran
Kabukasan paintungulan keng napun dang kayanakan
Limbug alang keukulan kening dalan dane kayli’t wanan
Kalibutnan, basung alak dudurut piliwas-liwasan.
Sasyong pusung mengatandus kablas ding balang balungus
Alang patnang dadagusgus ing lua king gabun tataglus
Ing bie napun a pagkabyus anting ayup leko bagyus
Ninu pa kayang manatbus kening bie a makalunus?
Balikdan mu ku O tanak keti yatu a misapwak
Metung ku mu rugung anak manayang lugud busilak
Ban ing bie ming mipnung salpak e ke mu makatungakngak
I keng Anak ngeni lubas at bukas I keng manulak.
Pusung Babatak a Kapampangan,
Arnold
" ISANU ING TUNE KAPAMPANGAN ? "
Ing tau nukarin yaman menibatan o maratun...
Neng kayi ing salita na, lenggwaing e makatuntun;
Ni ere man aintindian agyang karin ya mandatun,
Kailangan yang magsalita nung bisa yang makiayun.
Amanung disan na pilita' nang makiagum..!
E mu man apagmaragul nung e ka biasang Kapampangan...
Agyang deng pipumpunan mu, tune lang Kapampamgan;
Mibayit langan Pampanga salita ra Kapampangan,
Dapot eka mangamanu king masusing Kapampangan.
Buri mupa'ing managalug piglibe me'ing Kapampamgan..!
Buri ke pa'ing makipamalen, nukarin yaman menibat,
Agyang pang ding pengari na mibayit aliwang lugal.
Pinilit dang magsalita, mebyasa lang Kapampangan,
Liguran de at diligan, sinese'ing amanung siswan,
Deng taung anti kareti, karela pin ing kapuryan..!
Makananu ne man kaya ing anak a managalug?
Pengari nang Kapampangan, pakisabyan deng Tagalug.
Tubu langan king Pampanga pero taliwas ing usuk,
Ere tirung Kapampangan piglibe re king Tagalug,
Inyang miras ya Menila lalu ne ping Menagalug!
Makalunus no ring taung piglibe re'ing amanu ra,
Mibayit l'at meragul keang Rihyun a disan da,
Kasi naman ing Tagalug yang popular at daka' la
Yang sasabyan dang pilit, Pilipinas ing bansa ra.
Muna ya pa ing Rihyun mu, bayu karing aliwa pa..!
I Ima ku ampo'y Tatang, I Apu ku, ninunu ku,
Bayit langan king Pampanga ing salita dang amanu,
Kapampangan kilub bale, Kapampangan king luwal mismu,
Kapampangan kepa murin, ding anak ku at apu ku.
Nukarin ke man sa miras, Kapampangan anggang sepu..!
Poecia neng,
Paing
Pakibat...
"Ing lasa ning Kayanakan"
Neng: Paing
E ku mamako pagasa...king nanu mang kasakitan.
Ketang mangalati tamu, delanan tang' kakaluluan...
Angga ngeni atiyu pa, alang pamagbayu di't man,
Lalu yatang pasakit pa, nanu kaya'ing meging
sangkan..?
Alayu karing pengari, nung disan ta' man iti...
Lalung ali kekatamu, balu taya ing sarili;
Magmasipag tanang tiktak, anggang binit magprisigi,
Nung nukarin ta minono, manintunan alang anti..!
Mapilan la ring mikabyus, ayup a tinubu bagyus..
Deta mong mekapagaral, miligtas lang mebusabus;
Ikwa rang mitigko palwal king bansa tang makalunus,
At mibagwa la kabyayan...ding melakuan ning'
manatbus..?
Agpang king sitwasyun ngeni mababasa kareng diaryu...
Mayayakit kareng TV, ing sistema e pareu;
Ing korapsyon kayli't wanan, lual at kilub ning
Gubiernu,
Migugulisakan na la, ding mibotu king Kongresu..!
Ding manatbus mayayakit... karing me-aping memalen...
Detang limang Kongresista, lalawen dong pakabanten;
Uling ila ring mabitbit, karing problema ning balen,
Lejitimung kayaduanan, yang karelang pakipanten..!
Anya magpanatag na ka king isip mung
doplang-doplang...
Den ngang sektor ning sosyudad, atin no ngan
kametungan;
Mabilug no at matatag king miyaliwang kimutan,
Kasakitan ding kalulu, karin la manalumpakan..!
Pangadi Ning Pengari
Nang Monette Mallari 1/4/07
Anak lang mayap pin mangalati Ginu
Kabiasnan’t pasensiya dinan muku
Maligwa atukyan ing bantug bakas mu
Namu mang daratang isadia mula pu
Ginuko, anak lamu pung mangalati
Dinan mukung oras makyalung kunwari
Pamamasang libru, o makipagkwentu
O kumunan la ban akit lugud mu
Metung mung penandit e paburen maski
Isipan ku atin pang mas-importanti
Drama king iskwela, resaytal’t pakibat
O tahimik lakad, mitalnanan gamat
Saguli panahon anak agad dagul
Miwale at eku ‘balikan milabas
Dinan santing panalala, alang sisi
Saupan muku maging mayap a pengari
Nung kailangan mu kung magdisiplina
Paburen mung gawan mipmung lugud’t saya
Paburen muku sang matatag pero patas
Paburen mag-isplika atsana maralas
Daragul miwale deng anak mi Ginu
Abang ‘tin akarapat gawan ing agyu ku
Angga painawa ning bie ku Ginu
Paburen peka kaluguran da aku.
ING TARAT QUING PORTLAND
nang Rudy Espino del Rosario
Misan a caleldo,quening bauiu ming carinan,
linual cung pacacalale para magbatiauan,
Quetang mula cung malati a cacung timnanan
Gule ampong langguc, sampaga at mialiua pang tanaman.
Madatun ing tiup ning angin,mabanglu la reng sampaga;
berdi la reng tulud,ding bunga macule at macayama la.
Quing cacung pilubluban,matula cu't masaya,
uli ning caladua cu pasalamat ya quing Miglalang quing
upayang binie na.
Dapuat,anti mo quing Eden,busilak a jardin,
mica abluc ampong gusut,micasucal a macamusing.
Meracal la ding lasip,macamate at mabangis
mica atin mu namang,para careng aliua, ing dapat da
e masanting.
Biglang metabac ing cataimican,cararagli mitda ya.
Pauli na nitang aus,gulisak a matinis at macabuysit pa.
Tinalanga cu babo patuntun quing biga, ing laue cu digpa ya
quetang metung a sanga,ing Tarat (Scrub Jay)macalucluc, macatiman at
batiu-batiu ya pa.
Banda naman quetang lalam,malapit caretang uacat,catulid na,
itang metung a "Dagis Tanaman" o Dagis-dagisan (Squirrel) alang
patna,maningcap ya.
Alang patad a cuculcul;babauan at ambucan na,pisinupan quetang
pamangan,
Para queng tutuki,queyang pamilia,ibie na.
Timbunan ne ning Dagis ing culcul,saca ne tepican,quetang ugali
da queyang tindanan.
Meniguru ya at linaue, banda caili at banda uanan at pasibayung
sinulung menintun pang aliuang pagcabiayan,
E na balu quing gulut na,ating Hudas a magmanman.
Sinulagpo yang pababa itang Tarat a tampalasan,macangisngis lawe-lawe
pacibaluan na nung ating daratang.
Cilculan ne at cilcal itang bini(walnut)a macasiduan,quetang gabun
a pisinupan,
sidya na ning Dagis para queng tutuking danup at kauran.
Dinamput ne quing tuctuc na at dela neng maigpit.
Kinulcul yang aliua quetang lugar alang manaquit.'
Bildug neng pasibayu at timbacan neng papilit,
at alang capasimbalangan ginulisak paquit-quit,quetang tonong
macabuysit.
Mebalag cu labi at mipacama-cama,migmistulan cung mulala
at alang agaua.
Quing pusu cu linapo ing lunus ampong mua
pauli da retang malating lelangan,memie lang masampat a
alimbaua.
Tictac cu quing lub, at sinabing tinantu,ing ali mag-usga
quing miliari, quing carapan cu meging tutu.
Pati careng tau e ya aliua at marayu,
cayabe tamung mabibie quening babo yatu,pare- pareu tamu mu.
E na cu pebusten ning Anghel cung malugud,caring bagyus na sicloluan
na cu at bicud.
Dinayu na cu quetang e ustu at baluctut
Teiran na cu at pepaquit, ing tune lugud, pamanupaya,tula at alang
lungcut.
Daratang na naman ing caleldo,caibat ning yelo at kauran.
Deng Tarat,mibalic la, quing mialiuang labuad la menibatan.
Pacicuanan cu at pacaisipan, detang parate macananu lang gagauan,
para ing pamamalcara ning Tarat mayari na at mitucnang.
Nung gaua na cu man, cacung sinabi,
mecad meracap cu at masucul....
Paintungulan cu masira alang anti,
Metung pa canita,magmultang maragul at e da cu siguradong patugutnan
alingasngasan deng Audubon at Humane Society.
Ing Bombilya
rba-balto-md-07
King pangapaslag da ding sulung bombilya
ketang kolesiyum nung nu kami minta,
ing benging madulum balamu aldo ya
inya ding mamyalung, ayalbayan mi la.
Kabud kauli mi agad kong sinindyan
ding sulung bombilya ning kakung tuknangan
at itang dalumdum a kekaming disnan
tinabi ning sala a makapalyaryan.
Ing metung kareti inyang sindyan ku ya
e'ya minye sala, mepundi ne pala
yang bombilyang pundi agyang nanan me pa
e mu ne apaslag, ala neng ulaga.
Ken ke apialas itang kabaldugan
ning bombilyang maslag a simbul ning beluan,
yang kabyasnan pala dapat yang gamitan
at e ya sisinup king keralumduman.
Karing kapampangan dakal la ding biasa
a mipagkalaman beluan a maula,
maguing king marangle ning literatura
atin makasulat prosa at poesia.
Atin biasang dalit kantang kapampangan
o manaral kayang guintung kabanalan,
o munye pamalak para king balayan
at ikasulung na ning amanung sisuan.
Taung atin beluan e sukat karela
sasalikut da mu beluan a tagle ra
pablasang ing beluan grasya ne ning banua
ban keta sunlag yang antimong bombilya.
Inya, kapatad ku king dayang komanggui
e'ka ta magkaimut king amanu't lahi,
ing tagle tang sala, nung yan e sisindi
keyalimbawa ta BOMBILYANG MEPUNDI....!
" SULUNG PARITAN "
neng Paing
Ketang lande kwayan, babo ning lamesa...
Paritan yang sulu lele ning banggera;
Pangaras ning abak itang keang punta,
Matuling ne asuk makuyad ne mitsa..!
Ding kilu ning bale kubu ming tuknangan...
Menuling la naman king asuk nang likwan;
Ding aging babagwa a pakasabit ngan,
Abuin no kule uli ning paritan..!
Dapot king sala na malamlam nang aslag...
Milabas ke dugu pilang banwang singkad;
Ya meging gabe ku kakung pamagaral,
Neng benging taimik ning sulung paritan..!
Ing amanung sisuan a kekatang mana...
Yang salang manatad king balen tang sinta;
Anti yang paritan palablaban taya,
Alang makapatda ene dalumdum pa..!
Anya ding manakap buri deng tukupan...
Atyu tamu keti magbante, manarang;
Miyaliwang porma tane kakambilan,
Karing gamat tamu , pusu at panamdam..!
Luid ya'ing Kapampangan..! Itamung pasala...
Itang manyalangi neng maybug yang matda;
Karing nasa tamung mantinian ya sala,
E taya lalakwan sesen tayang kusa..!
RDM
Ketang Tangke
Neng: Arnold D. Batul
Ketang tangke ning kwayan
Limbug yay’ng baluktut a yaslag ning kamamaranunan
Linto yay’ng kaliskis ning pikikilabutan
At miumpukan king suluk kinaingking alang simbitlan
Biglang dinatang ing angin a mamalisus
Alang kuskus balungus tinikdo ya’y Pegasus
Ginuyapgap at pigpag ding malapad nang bagyus
Minatyat, sinikad, gabun mengakayus
Misalbag asupring alang kalamnan
Mengintal, mibakasan metu Kapampangan.
"Palakpakan Karing Mika-galal"
neng RDM
Akalimbatawan ke uling megobra ku...
Ing metung a-aldo king ugnayan tamu;
Iniang basan ku la atlung pulut pitu,
Eko ngan ayatba panupaya yu pu..!
Deng midinan galal palakpakan tala...
Uling mika-dake na la king istorya;
Keng balen tang tibwan nung nu manenaya,
Ing gagawan tamung lugud para kea..!
Kasampat nang lalon neng ing Kapampangan...
Yang salita tamung pane pisasabyan;
Poesia o prosa, kwentung maki-aral,
Lalu nung ing tema king amanung sisuan..!
Masanting ya datang iting bayung banua...
Dakal lang mekalbit, sinulat, menatba;
Ing balen tang tibuan, makayatna lupa,
King panlalawe nang makatiman ya pa..!
Karing migselebra king aldo rang beitan...
Ipa-abut tamu king Dios a Miglalang;
Ing dakal pa sanang banua rang daratang,
Sikanan at saya karelang tamasan..!
Salamat kapatad king balang penandit...
Ing midinang pansin malagintung saglit;
Misasane ta pa anting pamagsulit;
King pamangamanu, balang masasambit..!
A Special Poem:
Ing Capayà
Nang Segundo S. Romero (1913-1996)
Tanam cang capayà, dacál ya casilbián,
Malaguáng tumubù, mayán yang itanám,
Cabang malatî ya dinan meng barandál
Aguiáng tulus la mu sangcán mong bacuran.
Tanam cang capayà, pamilì mong lugál,
King datunan danúm alî ca tatanám,
Matbúd la king basâ yamút da king lalam,
Gabún a bujangin yang tutúng catulan.
Cabang daragúl la dinan mong patabâ,
Sumantíng la bulás at sacá mabunâ,
Nung mamulaclác la pagumasdán mo sâ
Sampagang Babai, pandác lang matabâ.
Nung Lalaki noman payát lang malatî,
Macabà la tangké, agád mong apilì,
Sampagang bibitin antimóng tinungì
Malagad la simpé, parungdúng king bilì.
Capayang Lalaki, emu la sisirán,
Tenam mung Babai sangcáp da la namán,
Ding Calimbubuyog detang manipsipan,
"Pollen" ding Lalaki, Babai do dalán.
Ing Capayà casé ing cayapan na pa,
Gamitin panalpà saguiwà nang bunga,
Dacál makiburî king lutong "tinola,"
Malyaring atsara o caya panara.
Ing Carne ning Manók at sacá Capayà
'Lutò rang tinola makí bulúng larà,
Sancapán dang laya, sanglé-sanglé ra pa
Cabang guiguiza ra king ditac a tabâ.
Atin pang maniaman king alpang Capayà
Bulúng Camalungué dinan me king murà,
Casantingán lambút, e mu pacalagà
Caniaman ing sabó cabang mapalì pa.
Nung malulót no man, gawan pagmayumu,
Idungót king mesa caríng visita mu,
Dampút ya in bisà potang bayu ticdó,
Burî reng talagá Capayang mayumu.
Capayang malulót masantíng yang yampáng
Nung atín cang dalo visitang dinatáng,
'Lacó mu la butol caybát mong binangal
Yapág mo maayos king metung a pinggán.
Capayang malulót sangcapán meng gatas
Sacá me timplaján azucal a ditac,
Maniaman almusál, canán mu neng abac
Yulam king pan de sal sustanciang banayad
E la warì dacál ding taung maburî
Bunga ning Capayà maragúl, malatî,
Baket ding tátanám bijirà la warì,
Macuenta lang pagál e ra pin ugalì.
Ing balu cung sabián nung atín Capayà,
Tenam mung mápilán at mabunga la sâ,
Caríng caquilala nung atíng manapà,
Aquit dong mabunga dili rang maririâ.
Managtál cang bunga, sacá mu la dinan,
Alî ca dumine, agad da lang cuanán,
Pasalamat la pin king quecang inampang,
Itá mong tula ra panulu mung pagál.
Ing casantingán na pa tenam mung Capayà,
Nung cailangan mu agád cang manicuâ,
Bungang manibaláng, manaya cang baguiâ,
Pota mong lulot la, ica nang sumawà.
Ding bungang Capayà agawâ mong "pera,"
Yulì mo king Balén sacá mo itindá,
Agád lang misalî aguiáng mag-jeep ca pa,
Saguiwà, malulót, mísalíng talagà.
© 1984-2006 Heirs of Segundo S. Romero.
All rights reserved
Lambis Kang Mang Paing
neng rba
O'koya kung Paing, patawad ibie mu,
akung migkamali, aliwa ikayu,
kekata nang adua e sa paniabyan yu
miglambing ya keka, ining kapatad mu.
Neng waring pikpuk me yang sipit ning ema
tambing mu neng buring kanan ing laman na;
aku nung inya mu pikpuk ke ban keta
akit ku nung nanung atyu king kilub na.
At ngeni ku ikit ampon atangalan
nung nanung laman na pusu mung uliran;
e ka man mamablas mapalantik ka man
padalan mu na mu keng kapagkumbaban.
Ngening atangal ke ing laman mung pusu
ing lawe ku keka milusuk pang lalu;
at manibat ngeni yang kakung pangaku
e ra na ka dinan masakit a biru.
Mamiru ku Koyang king kakung asabi---
mikapatad kata nanu man malyari;
paralan mu nya sa keng pa-aili-aili
miglambis ya keka, malugud mung wali.
"Itas Tala reng Basu"
neng Paing
Kabang aldukan ke ining alak kening basu...
Gugulis ya kening batal anting aping kakaluku;
Nung nanu ing pali nang mikakalabkab kening salu,
Katumbas ne ning lugud ku king amanu at kekayu..!
Ing lugud ketang kasebian mibalangkas a kataya...
E mu man kailangan sabyan pamanyawad panupaya;
Uling bayu ya mebanggit pamatawad atyu na ya,
Kabanalan ing magbabo kababan yang manenaya..!
Keng kekatang pamisugu king amanung kekatang mal...
Miyayaliwa nong sanga ing paksa tang pisasabyan;
Nganang miras king malwalas o makiput a salapang,
Paud ya mang mibaluktut mitulid ya king angganan..!
Ing amanu a kekatang paglualu, sasagipan..
Ding armas tang tatalanan misusumangid la taram;
Nung atin mang mangaturan o maski mangatampiusan,
Dadala na ning bigsikan ning kekatang kasanayan..!
King tetagan ampong tapang keng leon man o king
tigri...
Pikabalwang Kapampangan e kukurul kekeng lai;
Lalu na sa ing amanu a sisuan ta't meduagi,
Mibangun yang matenakan king taluktuk manatili..!
Anya king balang penandit a mesaglawe king mata...
A dinalan king pamisip misamut na king kaladwa;
Ding misulat a amanu gintu lang me-presrerba,
King katandanan tamung makakintal king istorya..!
RDM
|