Contents:
1. Keng Leon, Keng Tigre, E Ku Tatakut, Keka Pa? - Renato B. Alzadon
2. King Balen Kung Sinta - RBA
3. Kaybat Ning Pasku, Nanu? - RBA
4. Balang Banwa - Ronnie Juanta
5. King Aldo Ning Daun - Renato B. Alzadon
6. Piapunan - Tiakbong (Rolando de Jesus)
7. Nanang Luring - Biseru
8. Bayung Banua - Paing
9. Ing Pusu Ning Dusa - RBA
Keng Leon, keng Tigre, E ku Tatakut
Neng Renato B. Alzadon
Poeta Princepe/Poeta Laureado
Wa. Kapampangan ku ...! Bilang Kapampangan
atyu king daya ku ing manang tepangan;
e ku ipayntulut....angga king kutkutan
ing ating manumis king kakung palsintan....
Karas king matulid---e ku kayabangan---
Leon man O Tigre, e ko katakutan...!
King pisni ning libru, migulis, misulat
ing kakung tetagan anting pusung tapat;
king parang ning digma dulung ku nung sukat
ban pagmasakit ke layun a masampat,
mibansagan ku man king kanakung dapat
Keng Leon O Tigre e ku lunto gulat.
Aku'y Abad Santos...! Ing bilin nang Quezon
ali ke sinuku king gamat ding Hapon
mate na ku pamu king lagyu ning rason
bayu ku magtaksil king balen ku't nasyon;
uling Kapampangan ku king inspirasyon
ali ku tatakut keng Tigre O Leon...!
Karing Anak-Parang, aku Y Luis Taruc
a kapanalig ding king dusa milugmuk;
karas king matulid damdam kong lagutuk
talad ku nung sukat king pamakipantuk
keng Leon keng Tigre e ku duku buntuk
kambe ke ing MASA king pamakipamuk..
Nung ing katimawan ya nang madakurak
aku ya Y Ninoy....ing suli ning Tarlak;
e balang ing daya mamin mang misalwak
ing guintung kalayan akwa nang misapwak;
pusung Kapampangan ali re asindak.
ding Leon at Tigre a alang patawak.
King amanung siswan, Aku Y Gallardo
matapat maglualu king amanung sasyo,
angang kamatayan matni kung ikulyo
kalapastanganan king INDUng papiglo;
kambe ding kapatad matatag keng tikdo
arap da ding Leon at Tigreng mangantyo.
Kapampangan ku pin e ku ipayntulut
pangakapampangan kabud n'ya marunut;
inya O' palalung marawak a imbut
ikang dapat lisya munta king malaut;
keng Leon, keng Tigre nung e ku tatakut,
keka ku pa wari manglap makirungut...!
King Balen Kung Sinta
rba-Baltimore Md USA
Rizal Day 06
Balen kung sasamban
ing kekang sambitan....ing kekang pagsalbat
kakung daramdaman
bistaman ati'ku lipat dayat malat,
yang sinag ning bulan
king benging tahimik a matamle dangat
kaku na sasabian
ining kakaluluan a makadalamat;
Ing tyup ning amyanan
a babie kilabut king kanakung balat
sasabian na naman
ing kapanyupilan ding masias pangamat.
Alun king aplaya
ipamalita na ing maplas mung siguk
a pepesari ra
ding manungkulan mung mepiling pamuntuk;
king pangawili ra
king kislap ning pera linto lang dayukduk
ugaling mayaga
miyalilan ne king ugaling makasnuk;
king katakawan da
king upaya't kualta dening pakalukluk,
ika ing magdusa
o' balen kung sintang king dusa milugmuk...!
Ding Rizal linto la
agpang karing ayup a kaku sinumbung
ngara titulan da
ing marok a dapat....ing marok a layun
dapot, kalupa na
nitang berilan dang abak a maranun,
ding bayung patriota
lilibing da la mung e makakabaung;
tikdo laman ngara
ding apulung Rizal king aun magbangun
ing balen kung sinta
e ne milaya pa ketang pangakulung.
Balen kung palsintan
pakisabyan ku la ding mamung bulaklak
king bara'kang ayan
ban igkas da keka lugud kung busilak;
kasalpantayanan
mabie ya king pusu na ning kekang anak
aldo king silangan
isambulat na la ding yata nang pilak;
inya nung ngeni man
ikua mung mipandig king dulum ning pisak
e ka mangainipan,
king kekang alaya, maspak ya ing abak.
Ngening ka-panaunan
nung wari't batis man ing lua mung mamagus
a makiarlayan
karing mananabung bulung a melugus,
e mu sana painan
ing lub mu balen ku, akua mung mikabus....
keka yang tingiran
aklis ning kaladua king siwalang payus:
Balen kung palsintan
nung nukarin atin hamak busabus
e no sasalanan
tutubud ning Ibpa ding talapangabus.
Kaibat Ning Pasku, Nanu?
rba-12-30-06
Baltimore Md USA
Kaibat na ning Pasku, kalabas ning saya
ing tutuking tagku mengatmu yang dirya;
uling ika, tao, sakim kang upaya
ing atyu king lub mu pamanyalwak daya...!
Ing nuan a San Jose seke nong obehas
pungul at indu na layun lang tinakas
ban keta ing pungul, bie na e mautas
king kekang bengisan , taung mapagmatas...!
Ngening ala na yu ing talang maningning
ing meto balayan kule yang matuling,
kambe ning gulisak at matning saingsing
da ding indung kikiak a kematen supling...!
Ngening mepawi na malambing dang sunis
king katahimikan, Anghel Serapinis,
busal ning kabengian, nung atin mang aklis
maplas lang sambitan ding indung manangis...!
O' Tao...! O' Tao..! Nung kapilan pamu
kapurian king Guinu yang kekang pangaku,
baket kaya ngeni migkasias ka pusu
king ketasan mung lub , e ka bisang duku....!
Balu mung ing pungul a bait king Belen
ya ing pag-asa ning mabilug a balen;
O' Tao...! O' Tao.! Ing Dakilang Amen,
nung paintunan me man, king ba me mung paten....!
Balang Banua [ Para Keka]
Neng: Ronnie Juanta
E ku lubus a isip, nung makananung milyari
Ikatang adwa pala, ing miyabe bandang tawli
Ing kanakung edad, mas marakal, kesa king keka
E ya meging sagabal, king keka tang pamag sinta
Adiang mikandayu kata, aniang panaun ayta
Manintunan aliwang bansa, ika melakwan ka
Deng alang patnang sulat, at awus keng telepono
Anti ka mong makalapit, masasiping lele ko
King mapilan bulan ing aku keka makarayu
Bigla ku abalitan, atin aliwang susuyu
Keng karug kung atin, maka panako keng lugud mu
Diang ala keng oras, maligwang menga pauli ku
Disnan da ka keta kekayu, asna ka katula
King maligwang pamanuli, pauli na ning balita
Ot karapal mung daralusung pabalik? ngamu pa
Kunan da ka kaku, E ku paburen, nga ku keka
Malagwang salita, pemalaynan dakang marapal
Pengari mu at kanaku, pisabyan da ing kasal
Mag umpisa ya ing banua, ketang bulan marimla
Pipagpirman te king papel, ing pamikalugud ta
Ania naman ngeni, balang Pasku at Bayung Banua
Karin pag selebran, aldo ning pamisan metung ta
Kambe da dening meging bunga ning lugud keka
Lugud ning Dios, midinan ka ta, marakal pang banua
* Para kang Lani Malig Juanta*
Babye lakas kanaku, kening biye keti yatu…
King aldo Ning Daun
neng Renato B. Alzadon
Poeta Laureado
Mal kung Indu..., mal kung Ibpa...., misan pa, kalulungkut ku
king ali ku maka-uling dumalo king kutkutan yu;
inya, king Aldo Ning Daun, sakali man mo ala ku
e na buring sabyan nita king akalingwan da kayu;
uling nung nu ku man karin king maleparan a yatu
atyu ya king kakung dila ing pamana yu kanaku
ing dila kung kapampangan yang paganakang ikayu
ding sikdulan kung pengari, aku naman.....anak yu ku.
Ining amanung tiru yu ya kabud ing mengibusni
king awang na ning pamisip, panamdam at pamanyuri,
inya nung atin man lugud a king pusu ku mag-ari
uling ing tiru yu kaku salita re ding bayani;
ban nukarin mang marangle talakad kung e mangimi
uling atyu king dila ku ing amanu da ding budni;
eata, ing kekong tenam inyang anak kung malati
e ya tuknang manyampagang idalit ding kakung labi.
Nung king amanung tiru yu e ku lumingap a t gambul
penganak kung e yu sukat sinese at peparagul,
sayang ding gatas kung siswan inyang mayintang kung pungul
at ding pagal yu at puyat king kekong pamagparagul;
nung ngeni mong miwalak na ing diwa ku at pamyukul
tikusan keng pagtaksilan ing amanu yung kekaul,
nung agawa kung gumulut karing mayubu yung payul
ubingan kung kamamalung king buntuk dapat madamul.
Nung ding mata ku akwa rang masilo o kaya labug
king kislap da ding salaping mataginting king kalantug,
at layun keng ipaglibe ing amanu yung inirug
king salita ding banyaga at king sabi ding tagalug,
itang latikung kabayu o lande mamilug-milug
ya ing dapat, anggang binit king katawan ku ibarug
uling ing tiru yu kaku kinupas mu at melabug
at ketang e karampatan karin ku mu tinambulug.
Dapot nung e ku linisang king kaku biklat yung landas
at tinuntun kung masusi karing bakas da ding pantas
aduan ku ngeni kekayu king kanaku ye ibasbas
ing bendisyun ning pengari king suling e migpaliwas,
at king yatung maleparan nung nu kuman sana miras
ing kekong pamanantabe yang kanaku yu iparas
at sana idalangin yung kapilan man e kumupas
ing pamana yu kanaku....ing diwa ning pangawatas.
Ima...Tatang...ala ku man king kutkutan yung payapa
ining kaladwa kung watas ya ing kekayu manapa;
keni king marayung lugal arap ding aduang kandila
pangadi da kayu naman king malugud a Bathala;
at misan pa, damdam kayu.... mal kung Indu....mal kung Ibpa
ulitan keng pasibayu ing mataimtim kung sumpa
king kabang atyu ing bye ku yang matibe kung panata
paglualu keng anggang binit ing pamana yung salita.
Ing pamana yu kanaku, ya ing Tipan, ya ing tatak
na ning panga-pengari yu at ning kakung panga--anak,
king lagyu ning Tipan a yan, e ke ayamyam malagpak
ing amanung pamana yung lalasakan ding maglasak,
ding bitis ampon takde ku mamin no pang mangalapak
bayu ining amanu yu bustan keng masalampitak;
inya, pakabitasan yung tumutul ku at gulisak
angga king tawli nang kutug ning pangisnawa kung saldak.
Ing katatawlian a saldak nung sakali man datang ne
at salubungan yu na ku king karinan ding miglakbe
asabi kung ing amanung pekatuglung a matibe
e mepatad,...., e melubak..., e mesira pangasugue,
at kaustan napin nita nung pamitan yu kung gale
kapampangan la ding rimang idalit kung malumeme
pablasang kapampangan ku....at e' ku pikakarine
ing panga-kapampangan ku.....angga man king aliwang bie....!
from Rolly de Jesus
Prinsipe, Laureadung Poeta
Mengutang ya't migbuelta
Nukarin no reng kaatba?
Sasalikut, matudtud la?
Mamasa ku't makirandam
Makapinpin, manigaral
Agus ning kabiasnan
Bang kanita e sagabal
Salamat Koy, mebilang ku
'Tiu ku keka sasaludu
Kabatakan "dugong" asu
Anggaangga abe yu ku.
Ining makatuki atin yang ditak kainipan, sana pin agad yang mituru ing lenguaje keng balen tamu. Ing Tagalug metung yang salubsub a makatusuk. Makapatungkul ya kang Mamang Ernie at kekayu kabalen kung malugud keng amanu.
PIAPUNAN
neng Tiakbong 10/19/06
Patipating daranup
Patipating maina bagyus
Sinese no ming minaus
Butul Pampang mekasaup
Mesikan no reng bagyus
Sinarya ing pangabulus
Sinulagpo lampas biga
Misalbag na ing salita
E la ditak megumpisa
Sinulagpo minuna na
Mamapun nukarin la?
Lagas pakpak, matikal na!
Minuna nang sinulagpo
Anti lang bulalako
Nu la mapun, nu la dugpa?
Yampang sanga, masuksuk la!
Malugud ming talasese
Metung tanaman pakilawe
Dutung Pampang, 'yang matibe
Piapunan kekang sese!
Nanang Luring
Ning Biseru,
Oktubre 16, 2006
E maybug atanggap kening kakaung salu
Bie na nining Dara a biglang meangu
Itang mepalyari kabud-kabud namu
Agyang siping bale alang makibalu
Napun, nakadwa na bie mi misnang saya
Kekeng pamiyutus masampat pablasa
Dapot ing banwa ming masala’t masigla
Pedalumduman ning bagyung meminsala
Delubyung dinatang migit ya pa sikan
Keng bagyung “Milenyong” kapilan pa dintang
Uling migit pa king tanaman mibulang
Itang bie mewala’t kabud na mesintang
Neng bubulayan ku ing bie nang delanan
Ing kayang ganaka ampong kasipagan
Ing pamakikalu’t pamakitambayan
Nining Nanang Luring tutung pikabaluan
Anya naman kabud king baryu mebalu
Itang makagulat a bie nang meangu
Taung mekirame king mauli’t pangulu
Anting danum ilug agus masalusu
Bukud kung liliwan keng pamaglako na
Malambis nang suyu kekaming sapni na
Lalu na’ing bunsu ku ustung ya’ing memita
Nanu ya mang bage pilming ibye na ya
Galing nang maglutu nanu mang kapangan
Sadya nang yayapag neng pyesta’t kapaskuan
Mengalyu nang gamat, e kurul keng obran
Alang kwenta’ing puyat atin ya sang yampang
O Nanang kung Luring nung nukarin ka man
Dakal a salamat king kekang kasuyuan
Lugud panalala kekami peramdam
Iti manatili king pusu’t isipan
" BAYUNG BANUA "
neng Paing
Bayung banua ngeni kalipas ning napun...
Bayu ya ing aldo karing berding bulung;
Maslag yang masala pitda ne ing dulum,
Ing bayung pagasa ning bayung kasuglung..!
Ing bie ketang napun milabasang banua...
Umpisan ne ngeni bayung pamagobra;
Kalusan ing lagpus, panten yang sapak na,
Mibili king sapat nang pangayaregla..!
King dane ning kekatang ugnayan...
Ditak mang panaun e taya tiknangan;
Mipanatba tamu king amanung sisuan,
Didiligan taya itang Kapampangan..!
Atilung mamasa, oren ding susulat...
Ating magumasid, pilan a magmulat;
Talaturung biasa kekata kakalat,
Pamagmalasakit ing mayap dang dapat..!
King aske ning lugud a pisanmetungan...
A-mantini taya ing pamitambayan;
Karing balang metung meyakit ya naman,
King kekatang dane, mitnung kagalangan..!
Salamat king Guinu king panaun ngeni...
Bayung Banwang singkad babie ne parati;
Ing pamiyugnayan tamu manatili,
Ing amanung sisuan ene mitabili..!
Ing Pusu King Dusa
Neng E.C. Turla
Kepampanganan neng Renato B. Alzadon
Ing pusu ku--- migsalbat ya neng ikit keng mikulumbuan
king kapal ning kumpul ulap ing kinupas a katutuan
karin, keta king lalid na ning inawang alang anggan
kapantuk ke ing panaun ampon ing kayaktanganan.
Ding penandit a makule ila na mung mal kung iyas
a beit ning kakung napun ban mantabe alang wakas
ding panalala mung likuan king kaladuang maintun lunas
maguing panaru la sana king diwa ku't pusung paldas.
Kagum ning lua at sambitan, ing dusa magbabo kaku
nasa kung kumit sikanan king keka pamigunam ku
ban nung mampit sa king diwa ing yumu na ning timan mu
katmuan ne ning sintang maslag ing kalubkuban king bie ku.
Kanita ku no tipunan ding mengapisi nang dake
pisintak-sintak ning angin a amlat na ning kakung bie
a mispak at misambulat iniang gumulat kang kambe
ning pangakung e na muli a malino mung inapse.
Karing luntian kung paninap busal ding benging ulila
ati'ka ka king arapan ku api waring mibabaya
at king siklab kinislap la detang guintung milabas ta
ngening mibalik ka kaku king labuad ning malik-mata.
|