Contents:
1. Ing Manuk Kung Dumalaga..Menisi Ne - Bonifacio S. Manacmul Jr.
2. Nung Payntunan Muku - Renato B. Alzadon
3. Sampagang Rosa - RBA
4. Mana Lisa - Renato B. Alzadon
5. Sana Naman - RDM
6. Pangadi Nang San Francisco de Asisi - RBA
7. Mipatudtud Ya - Renato B. Alzadon
8. Mona Lisa - RDM
9. Nanu Tang Balu Ku? - Renato B. Alzadon
10 Bisyu Nang Ingkung - Bonifacio S. Manacmul Jr.
11 Ing Siwala - RBA
ING MANUK KUNG DUMALAGA..MENISI NE
Neng: Bonifacio S. Manacmul Jr.
Malambat kung manenaya queng sese kung dumalaga.
Datang ing aldo oini sana mangebun ya.
Akakit kung matikas a tatyo liligid-ligid na la.
Ninu kaya karela ing munang manikwa kaya?
Dinatang ing aldo a kanakung panenayan.
Dumalaga ku talatalanga queng pugad a susulapawan.
Pilan mung Domingo ita mangebun ya.
Aro ing kaynip ku..queng tula..mipasno na!
Silip-silipan que siwang da reng lande kuwayan.
Anti ku mong tiktik aku itang manandawan.
Singkitan kung mata alang kurap queng paglalawe.
Gayndu kung makalukub pugad lalam bale!
Aldo-aldo bibilangan..queng isip taruk-tarukan.
Kapilan la kaya miyapsa dening ebun a amanuan?
Nung mipaltutu..mabuguk sana emu naman.
Ing sasagi queng isip ku..sabik ing mitatagan!
Salamat dinatang na ing penandit a turing.
Kaaldawan da reng ebun queng pugad a makabitin.
Dimdam ku ing mumunang siyap da ebun ngeni sisi na la.
Wari ku kikingking la pa queng pangarimla da!
Pakpak dang mabasa..gayndu ing migpala.
Bibiye pali queng pangalukup, lugud at pamagtiyaga.
Nanu ing panamdam ku nung quecong akukutang?
Aro katula ku..quing ikit ku, pusu ku mipaldan!
Nung Paintunan Mu Ku
neng Renato B. Alzadon
Poeta Princepe/laureado
E mu ku paintunan king kakung milabas
ala kang atagpwan a likwan kung bakas
uling ding alun a king pampang memaspas
gisan dong pelisan bakas ku king balas.
E mu ku paintunan king aldo daratang
ali mu ku akit king bigang lulutang,
uling itang a angin king keyang panyatang
tenge ne ing bukas ning bie kung mayintang.
E mu ku paintunan king kekang paninap
ali mu ku akit babo ning alapap,
uling nung atin mang mitagan kung kislap
malwat nong mitakpan king kumpul ning ulap.
E mu ku paintunan nung nuku matambun
ali mu ku akit king lalam ning gabun
uling ing akit mu king kanakung aun
bungu yang tanda na ning mipdang panaun.
Buri mu kung aket...? Irug ko, mekeni
kumaul ka kaku, ati ku mu keni.
Daramdaman mu ko...? Tutu pin aku'y ni
ati ku siping mu....., ati ku king NGENI.
Sampagang Rosa
Neng RBA
Migising ne naman
matudtud nang leon ning kanakung pusu.....!
Mipakde ne naman
king karatunan na king kweba nang salu...!
Ing kayang sambitan
kakablas king dalig, at makipatlalu
king atmu kasikan
a kurug ning duldul king busal ning pulu...!
Bala'ku mo sana
ing sintang matudtud e'mu ne gisingan
ban makalingwan na
ing sugat at kaplas king kapanamdaman....!
O' Sampagang Rosa,
bakit angga ngeni king kakung taguimpan
paganaka mo pa
ding tulang dapat sa pisulu tang kimtan....!
Mona Lisa
Neng Renato B.Alzadon
Poeta Princepe-Laureado
Mona Lisa, kalagu mo...! Agyang nanan dakang lawan
ya ing akakit ku keka ing malagung kapampangan....!
Kalago ra ding mata mo....! Ninu'tang kekang lalawan....?
Kayumu ra ding timan mo....! Ninung kekang titimanan...?
Atin..? Ing kekang Banyaga...! Inya pala ding mata mu
kaya la makapasuglap---- e la makalawe kaku.
pati timan mu kaya la---ala nang mitagan kaku
nune ing kaplas nang likwan ning sikwil mung panigapu....!
Migpatitig kung musika e'ra ka ikit tinerak
migpusung kung karagulan bukud mung e sinagakgak
migale kung kalungkutan sarili mu nang e kiniak
migkanta kung usung kanta e'ka mu man memalakpak...!
Agyang nanu ing gawan kung lingap, lugud ampon suyu
ing pansin mu atyu ya rin king banyaga mung kasuyu;
e me buring damdaman man ing matibe kung pangaku
a angga king kamatayan bandi me ing kakung pusu....?
Ding mata mu, tutu waring kaya nongan makalingus
at e ka mibalikid man king palad kung managipus....?
E mu ne wari lawan man ing anyu nang makalunus
ning melupig king labanan a sugatan mung sundalus....?
Ding labi mu, tutu waring ding timan da kaya no ngan
at ala nang mitagan pa king makudtang kapampangan....?
Ya na waring mikadiwa king sinag ning kekang legwan
at lubus neng mapda sunis ing lira kung kalawangan....?
Manyabi ka Mona Liza, nukarin ku migkamali...?
Nanung agawa kung lisya ban magbayu ka ugali...?
King wagas kung lugud keka, bakit makanyan ka sukli
sikwil mu ku at piglibe king banyagang e 'mu dayi....?
Sabyan mu, nanung guewa kung salang keka, Mona Lisa
ban keta pikamwan mu kung e na buring akakit pa...?
Nanu 'ta ing asabi kung mekapanyugat mo sana
ban lumawut ka lub kakung e mu na pakisabyan pa....?
Manyabi ka Mona Lisa, sabyan mu ngeni, sabyan mu....?
Nanung kakung pamagkulang.....? Nanu, Mona Lisa, nanu...?
Ba't e mu ku pakibatan...? Ba't e mu sabyan kanaku
king arapan, king tapatan, o'bat pasakitan mu ku....?
Ah...! E' ka makapanyabe....? Wa pin, e'ra ka pilitan
Balu kung keng kabilyan mu e'mu ku apakibatan....!
Makasabit ka pala ken....! Metung ka palang larawan....!
Alang pusu....! Alang isip....! At alang kapanamdaman....!
"SANA NAMAN"
Neng RDM
Sana naman... miyabie na ing malwat da nang adwan...
Ding ortelanu king Bansa, panaun dang panenayan,
Tune Reporma king Gabun patune ning katimawan.
E wari ing demokrasya makatulid kaninu man?
Sana naman... misapat na ing ustung pamag-sweldu...
Karing tapat a magobra king pamilyang manigapu,
Ba' ra ne mang aragisut ing bie ra king aldo-aldo.
Simpling asan ampong nasi yan ing karelang sasyo!
Sana naman... magbaba na ing panyalwan king
palengki...
Ing presyu ning gasolina at ampo ning pamasayi;
Alaga da ring panulu matas karing mangalati.
Kalulu no ring kalulu ketang makuyad dang sati!
Sana naman...midinan lang ustisya ring mangawala,
Mangamate, mangatortyur, mangasukul nang mistula;
Miyayaliwang opisyu, magabyayan lang payapa,
Mekad tututul da reti ing matulid king upaya!
Sana naman... mika bale la pamilyang manuknangan,
Karing ugsyanang basura, tudturan da at pamangan;
Makitagalan king bie ra, makikisaglulu la ngan,
Ban milabas patingapun ing pamilyang kaluguran.
Sana naman... Ing amanung siswan a amana tamu;
Mikalat ya karing malda king iskwela ban mituru,
Sumlag karing balang suluk ing dalumdum a mituldu,
Tumula ya'ing balen tamu ing nasa na e mabigu!
Pangadi Nang San Francisco De Assisi
Kepampanganan neng RBA
Guinu, paintulut mu sana
Maguing kasangkapan naku ning lusuk mung kapayapan,
Ing kamua nung nukarin ya,
Pabustan mung isalbag ke ing bini ning kapalsintan;
Karing magdusang kaladua,
Pabustan mung idaun ke ing kekang kapatawaran
Karing e sasalpantaya,
Pabustan mu kung patutu king bara' kang paniwalan.
Guinu, paintulut mu sana
Maguing kasangkapan naku ning lusuk mung kapayapan,
Ing dusa nung nukarin ya,
Pabustan mung iladlad ke ing malagung kapanayan;
Ing dulum nung nukarin ya,
Pabustan mung salangian ke ing sulu na ning katutuan;
Ing lungkut nung nukarin ya,
Pabustan mung miyampang kung tibubus a kaligayan.
O ‘ Maestro kung sasamban,
Paintulut mung kabang bie ku, eku panintunan sana
King akung mipamatulan,
Nune akung mamatula, king tulang menibat keka;
E king bara kung intindian,
Aku sanang manatindi nung nanu ing kabilian da,
E king bara kung luguran,
nune ibat king pusu ku, aku sang lugud karela.
Uling nung pitutuliran
Atyu ya king pamagkalub, ing pamananggap king grasya;
King pamamatawad naman,
Atyu ing kapatawaran king depatan tamung sala;
Ining bie tamung ingatan,
Magbalik ya kekatamu nung kapilan mewala ya,
Pablasang king Kamatayan
Karin ya ing panga bait ketang bie king alan’angga.
Mipatudtud Ya
Neng Renato B. Alzadon
Princepe-Laureado
2006
Nandin, ing likupan, mamu yang payapa----
tahimik ing alun, maputi ing biga----
Ala tamung karug...., ala tamung lugma
uling abe taya king kekatang bangka.
Bah...! Mipatudtud ya....! Makananu kanyan...?
Dili-dili tamu busal ning danuman...!
Ah...! Lalaganap na ing keralumduman
magkule yang paldas ing meto sikluban...!
Mangiildap...! Ing Kildap magbala-balate
antimong barug ning latikung maglate...!
Manuldul..! Ing duldul manintun kapate
mamulang ne waring bisang makamate...!
Mamangin...! Ing angin...! Sisyuk...! Mamyus...! Bibyung...!
maki abe daing ing keyang sabewung...!
Mamalun...! Mamalun...! King mwa na ning alun,
ing malating banka ing keyang penugun...!
Ing banwa, kinyak ya, ing lwa na tinulu...!
Uran...! Uran..! Uran, king banka menabu...!
Malagwa...! Ing banka ban e ya kumatmu,
Maglimas...! Maglimas...! Limasan yang tabu...!
Ing angin..., ing angin.., sisikan...! Sisikan...!
Mamwangit ing alun....! Tutugtug ing uran...!
Nung e tuknang ini, mangamate tangan...!
Ing Guinung matudtud dapat neng gisingan...!
Guino...! Guino...! Guino...! Migising ka, Guinu...!
Nung e ka migising mangamate tamu...!
Aba...! Migising Ya...! King dit' nang amanu,
biglang memayapa....! Tinuknang ing bagyu...!
At linawe naku....ali ke alawe,
dinuku na ku mu king milalung dine,
at kaibat dimdam keng minyabing manene:
"kasalpantayanan, nuya karin, abe?"
Digdug keng salu ku...! Digdug kuneng digdug...!
Matbud ku...! Matbud ku...! Tau ku ping matbud...!
Ba't e ku aisip...., ing Guinung Malugud....,
nung mityab yang banka...., kayabe keng lumbug...!
"MONA LISA"
neng RDM
Mona Lisa..! Ing lagu mu, bukud mung keka mirikil,
Melalang kang anting diosa magtapiso karing batis.
Dalaga kang Kapampangan nung kaku ka pakiwangis;
Ing timan mung alang kabas keting yatu 'lang kaparis!
Yaku ing migliluk keka, menulma at migpinta,
Bilus ku ngan ining bie ku pati pusu't pangisnawa;
Balang ditak a penandit, panaun kung pibabata.
Ala ing ninu mang mandi king pibutnulan tang sinta!
Gisanan do man tipunan detang nota ketang pianu,
Kwerdas da man ding gitara kalingking nong' misnang
samyu;
Ding poetang Kapampangan king arap mu manigapu,
Yaku mu rin king timan mu ing paglibe ali mu ku!
Mona Lisa...Mona Lisa...Pilan banwa tang piyabe?
Agyang benging kapitangan ing lona mung peka dase;
E ku bitasang linaut karing kekang panlalawe,
MIyuman mu rin e kinupas ing timan mu kaku 'yapse.
Ninu man ing tumanud keka at mampang lang sintang
wagas,
Sabyan da nang ibuklat de ing salu king kekang arap;
Wa! Ing pusu rang daraya, manyambitan, manyad lingap,
Dapot ing panimanman mu king mata ku alang kurap!
Ing labi mung makatiman e mibuklat kapilan man,
Manaitli ya mu kaku king ligayang piyabayan;
Ing pisumpanan tang adwa, kanita pa't kapilan man,
Bukud mung yaku at ika king matibe kapalsintan!
Nung datang man ing panaun, nung ing sala
mitambunan...
Nung ing pali ning alimum at ning dimla miyatbanan,
At mibaligtad ya 'ing yatu melangi ngan ing dayatan;
Ipaubaya ku keka ing pasya kung katimawan!
Bukud ku mung panabilin O Mona Lisa ning bie ku,
Nung busnian me itang labi poetang keka sumuyu,
Ding matikding Kapampangan ibaling me kekang pusu.
Uling keng leon o tigri, ala lang kurul o sumuku!
Nanu tang balu ku....?
Neng Renato B. Alzadon
1985
Ortelanu ku mu....., ining ka-ukulan
anga ya mu rugu keng pamananaman;
pangaras keng salun ning kapanamdaman
misteryu ya kaku....e ke atarulan;
inya ing kekatang pamisangan -dalan
agyang mapait ya, tingap keng maniaman.
Ing panugali mu, karing mapanatu
ya ing salang malpa at salang magadtu
masaya kata pa.... pena-penandit mu
kabud naka mu mwa---manyugat kang pusu;
potang apansing mung melungkut ku anyu
saka ka lalapit, maglambing, manaru.
E mekatapilan kusa kang linawut
ban mangulila kung magdase king lungkut;
balamu ligaya ning pusu mung maymut
ing tangalan mu kung king dusa misawut;
at nung anti ku momg batung e mekimut
tutu mung e buri.... lalu kang magbugnut.
Nung misan, anti kang king obra misagad
atna ka katamle maglupa kang sayad,
nung nuka linukluk e naka talakad
nung nuka tinuknang e na ka maglakad;
nung magsalita ka dimut at banayad
paralan mu namu ketang e bubulad.
E ku aintindyan, at na ka katamle
at pagmalunan mu yang malating bague;
balamu ing dusa na ning meto-orbe
babo ning pago mu karin migbalate;
kabud naka kikiak ing lua mu mangale
nung na'ng kikiakan mu, alang maki- male.
At nung misan naman aliwa ka porma
balamu supil me ing yatu at banwa;
ikang biasang dili king kekayung obra
inya king yutus mu buri mu tupad la
at nung e'la tupad..., ing mwa mu karela
kaku mibubuntun..... aku ing magdusa.
E' ku aintindyan. Akung pikamwan mu
uling tula kuna nung ninu'ta aku;
ika ing buri mu maguing mabandi ku
biasa, mayupaya, at bantug king yatu
nung agawa mu sa alilan meng bayu
ing kabilugan ning kakung pangatau.
Nanu mang gawan mu, tangis, aru, at mwa
ing panugali ku e ya manaliwa;
peki-anti mu ku king batung estatwa
buri meng samasan....ali mu agawa;
king pamaglarin mu ikua mung sinawa
inya aisip mung lumawe aliwa.
Detangan naka ning ma'p a kapalran
menakit kang bayung buri mung larinan,
O kaligaya mo.....makalunus neman
dalanan na rugu ing kakung delanan;
uling ing tutu na, nung pitutuliran
ika ing estatwa a dapat samasnan.
Ortelanu kumu. Ing anak- taldawa
pangaras keng salun nanu tang balu na;
atin mekasabing detang anti keka
dapat lang pa-ulu ban mikalunas la;
Ikang makibalu....ken kang medicina
aku, nang male ku keng Mania-Depresa....!
BISYU NANG INGKUNG
Neng: Bonifacio S. Manacmul Jr.
Dakal nang aldo’t uran ing milabas agaganaka ku pa..
Payak a bisyu nang Ingkung kanitang iya mabie ya pa.
Maranun ya pa kareng denas maglibut ne ketang mula..
Impun luyus makabebe dane bakud papandawan alang sala.!
Ninu mu pin ing e mawili, dilo’t malagintung balat da deti?
Managkatan kayang kule kareng bulung nang pepe-pepe.
Memaltang dalakit..pusan ne ing bulu a gewa nang sungkit.
Penandit mu ing milabas bungang luyus oreni pibitbit-bitbit!
Deng bungang luyus a sinungkit na linatag no ketang dulang..
Karin simen na la.. mapilan kareng mepili balatan na la’t talipan.
Aku naman itang makabante atin ku mu rin kasing panenayan..
Ing ubud na ning luyus a parti ku, buri-buri kung gigigutan!
Sagiwa’t berdeng bulung samat..liglugan agad-agad..
Pikaso kaso.. pitampi-tampiso kareng kayang adwang gamat.
Saka patiktikan malinis a seda kuskusan neng banayad..
Maligwa’t marapal linatnat ya balat..kumintab bulung samat!
Kiskasan neng api tela-pusung bulung samat..
Kemiku yang masasabi..ekspertu yamu ring alagad..
Siguradu ing galo na..dalubasa ya iti e magpanggap..
I Ingkung a maluat migsane..parati keng panaun a malambat!
Dildakan ne ketang asung..sangkap nang pitipun-tipun.
Ing peka ispesyal tauling timplang ngeni megkule gabun..
Pitili-tili kareng kayang palad produktung mekalap..
Kinisan neng pangatngat ing maskada, ‘champion’ kanu itang tatak!
Mesaya..meluwalas ya lupa! ing bie na mekuntentu..
Kanyaman pin kanu malino king balugbug a dimdam ku!
Binulung ya ing matua king kastila pasitsit anang tono!
“Muy delicioso..que sabroso!” magmama ya I Ingkung ku!
Ing Siwala
(Ning Kukulait King Ilang)
neng rba
Ketang pampang na ning ilug manaral at maminyag ya
ing taung e karaniwan a manulang amanuan da;
dapot inyang kutnan da ne nung ninu tang talaga ya
ngana king ing kukulait king ilang yang siwala na
at ngana king atin datang a miguit e palak kaya
nung wari sasadya ne mu ing dalan king panyatang na
at king kamalan ning datang e man sukat para kaya
ing kalagan no ding sintas da ding sapin ding bitis na.
At ngana pa ning Maminyag: " Ing datang a amanuan ku
Ya kabud ing makalako king kasalanan ning yatu,
nung king danum na ning ilug aku bininyag da kayu
Ya binyagan na nako man ketang Santo Espiritu;
inya bilang pamagsadya aduan kung sumisi kayu
ban e kayu magimg sukal a masilab maguing abu
at pablasang malulut ne ing panaun na ning tau
inya ing baug a dutung makutud yang siguradu."
At dakal lang meniwala karing amanu nang ginkas
anting metung a Propetang tiburan ning banuang matas,
king masid da ding menasa menibat ya king milabas
ya ing Propeta Elijang mamuklat king bayung landas;
dapot king pamanaral na yang malino nang pabatas
atin datang, at ing datang Ya pin ing Talapagligtas
pagnasan nang ding daramdam lubusan dang atalastas
king ing Pangakung Maniaklung datang Ya nanu man oras...!
King arapan da ding malda, milyari misan a aldo
ing panenayan dang datang ikit deng king pampang linto,
"Oini", ngana ning Maminyag, "oini na ing amanuan ko
Ya ing Kordero na ning Dios a king sala makalako."
Dinulung la king danuman, king awad ning Nazareno
bininyag ne ning Maminyag ing teguryan nang Kordero
at king akakit ding malda tinipa yang ibat babo
king anyu ning Patipati itang Espiritu Santo.
Kaibat ning tagku king ilug, e na binang miglambat pa
ing Maminyag sinukul de ding salang king panaral na,
kabang atyu king sukulan ya ing pakibalitan na
ing dapat nang pagmulalan ning Korderong amanuan na:
"ding bulag talu manakit ding pipi magsalita la
makalakad la ding lumpu pati mete bibyayan na."
King sulit nang aramdaman lubus yang sinalpantaya
ala nang aliwang datang a Kordero, Ya pin na Ya.
Kanyan ne lalung manaral ing Maminyag, king sukulan
ala yang tuknang mamaus pamanising kasalanan,
linto pin king yang siwala ning kukulait masikan
a manintun karing tupang melili king ka-ilangan;
dapot ding misukul kaya e ra buring daramdaman
itang bague panyabian na 'nya lalu deng pikasnukan
inya baneng manahimik king ukyan da, inyang misan,
itang buntuik nang mekutud yang inapag da king pinggan.
King mepalyaring iti ing balayan migsalbat ya
pablasang kapanwalan dang ing Maminyag Propeta ya,
at kabang pagmalunan de ding maldang malugud kaya
ing maplas nang kamatayan yang memale king pusu ra,
kanyan ne anting mipinpin ing pabatas na karela
king ing pangakung Maniaklung dinatang ne, Ya pin na Ya,
ding menasang mekaramdam king Minyabi menwala la
ing e'ra mu peniwalan itang mismung AMANUAN NA.
Inya ngana ning misulat, kamumulan ing AMANU
at king ulina ing sabla linto ngan at meguing atyu,
at iting Amanung Banal mikatawan ya pang tau
at layun yang meki-saut, meki-ugne, mekisulu
dapot agyang dinatang neng mekisalamuha mismu
makanyan man ali ne pa kilalanan man ning yatu,
numan anti ing guewa nang mangaragul a milagru
pete re pang makapaku at pilkaran e mu nanu.
Diwa:
(King maustang pamanyuri, ing kapaskuan makanyan ya
menibat ya king Pangakung Talapanatbus king sala
bayu ya datang ing aldo pamanyatang, mumuna ya
itang Talapamalita king aldo ning panyatang na,
malyaring maslag yang talang tando king awang ning banua
O atlu lang Aring Magong mangutang king beitan na,
O metung kayang Maminyag a sasabing |