Contents:
1. Ing Legwan Ning Sinta - Renato B. Alzadon
2. Maman - Paing
3. King Mepakling Dangwe - Renato B. Alzadon
4. Menaliwang Kuta - Paing
5. Aliwang Marangle - Bonifacio S. Manacmul Jr.
6. Bulung - Tony Pena
7. Ding Politiku - Edgar Bonus Sale
8. Ding Politiku II - Paing
9. Ing Dalit Nang Juan dela Druz - Renato B. Alzadon
10 Paginakit Ning Kalulu - RBA
11 Salamat Kekong Byasa - Paing
12 Pamangan, Imalan, Tuknangan - Ronnie Juanta
13 Paynawa Ku Pa - Ronnie Juanta
14 Bayung Banwa - RBA
Ing Legwan Ning Sinta
Neng Renato B. Alzadon
Poeta Laureado
Dakal nong sinubuk---bulalag a kantor,
mangabinting watas, mangayap a pintor---
dapot , e're akwang ipalkas a balor
ing legwan ning sintang miyaliwa kolor.
Nung ding matenakan king pinsel at nota
bitin la telasan pangamat at mata,
ninu mo'ta akung malating poeta
mangangas migulis king legwan ning sinta....?
Inya..., ban e na ku makarine lunto
e'ke apusan man bosis Y Matt Monro
at e'ke damputan pluma nang Gallardo
o andaman kaya pinsel nang Maniago.
Ing legwan ning sinta, nung atin yang bikas,
nung atin yang anyu, nung atin yang timyas,
ala 'yu king nota, ala'yu king kanvas....
atyu king pamyutus ding pusung miyaptas....!
Atyu king dapat ding masipag a takde,
atyu king sampat ning amanung miyapse,
atyu ya king timan, king kaul, king lawe,
atyu king tambayan king pibale-bale...!
Lalkas ing legwan na ning sintang busilak
king pamisanmetung king yumu at salpak.....!
Malagung pamyutus...... potang mamulaklak,
sinag no ning sinta----uliran lang anak.
Nung buri yeng akit ing legwan ning sinta
Aloha, Oregon subukan yung munta;
pangaras yu karin ipangutang yu la
ding lagyung Angela at Ernesto Turla.
Tumagun ko kaya king Hotel Embassy
keng beinte sinku ya bulan ning Nobyembri
king apat apulu dang pamagmasusi
dening miyasawang Angela at Ernie.
Karin, subukan yung masusing pagmasdan
ing pamiyusig da at pamitambayan,
at ketang masampat dang pami-usigan
akit ye ing sinta king tune nang legwan.
Inya, marapat mung yabut ta karela
ing pamagmananu, lugud, at alala
king pamagmasusi king aldo kasal da...
ding mabye larawan ning legwan ning sinta....!
"MAMAN"
neng Paing
King gewa nang maman ning Apu kung Tisya,
Inyang malati ku ta babanten ke sa.
Tagan ketang asung ginamal kung kinwa,
Ba ku mong atakman nung nanu ya lasa
Mamaras-maras ya at mamali-mali;
King dila manyagid ning mamang pitili.
Bigla kung inapsa ing sapal at pali!
Ing samat at luyus, maskara at api.
Inakmul ku murin itang lagat sabo,
Ning tagan a maman king asbuk kung tako!
Inyang dumalan king gulunggulungan ko;
Dimdam ku na kabud buntuk ku malilyo!
Dinurut ku ikit at saka linutang,
Gagato ku wari king maman kung tikman.
Anya pala pamo, ena atuknangan,
Maman nang Apu pane nang gagawan!
King Mepakling Dangwe
Neng: Renato B. Alzadon
Poeta Laureado
Mengari kang dangwe ning dutung mung INDU
a pikli ning angin....dela king marayu,
ketang ka-ilangan nung nu ka menabu,
karin ka migyamut....karin ka tinubu.
Dakal ka pibata...! Dinaya ka sakung
bayu ka meragul a matibe dutung;
salamat king ambun ning banwang lililung,
king bayat ning dusa, ikwa mung mesaklung.
Ngening meragul ka yang bukud mung ngali
ing datang ne sana aldo pamanuli,
buri meng dulapan nung nu ya mibili
ing mewalang singsing ning guintung ugali.
Oh, dangwe mepakli, o'bat muli ka pa...?
King sanga mung likwan mekalingwan na ka....!
Nung atin mang sulul king likwan mung sanga
banyaga na kamung e ra kakilala.
Ding kaparang dangwe king napun kekuyug
mengpakli na lang king gabun mebaldug,
nung atin mapilan a tenge ning ilug
e na la mibalik....malambat nong limbug.
Ay! Tanggapan mu na O' mepakling dangwe
keni king desyerto....keni na ka mate...!
E mu no panayan ding sadyang kayabe
pabakalan deng lwa kaladwang maglakbe...!
O' kalulung dangwe, pulisan mung lwa mu
e mu ipabatas ing kalungkutan mu,
nung banyaga ka man.... dapot, ing pusu mu
ali ya dinayu king sangang likwan mu....!
MENALIWANG KUTA"
neng Paing
King aslag ning aldo biklat na ning sala,
Ing yatung malwalas milantad kang kusa;
Kinyak kang masikan bilus mu nang sabla!
Manang kasalanan melinis mistula.
Inyang takbang na ka muna mung asalat,
Kekang talampakan ing balen mung maslag;
Gabun mung amana a kekang kebaytan,
Matampa mung lugud anggang kamatayan...!
Kabud kabuklat ding labi antimurin,
Ing amanung siswan yang keka migpayring;
Dayang Kapampangan king pusu mirikil,
Nu ka man misadsad alang makasupil...!
Ba...! Kabang lalakad ing balang panaun,
Menaliwa sable ing anging manamun...!
Bulung da ring sanga dati manyalapung;
Mangabaldug na mu't mumuli king gabun.
Ikwa mung milisya, ikwa mung milintad...!
Menaliwang kuta ban keta misadsad;
Mekasilip ka mo'ng ma-aportyunidad,
Lugal da ring Puti a keka miyatad.
Ngening tikman mu na ing saya at luhu,
Ing matabang pusu tane magkuswelu;
Oneng e ya sapat kimtan mung pagsuyu,
Pagdulapan mia rin pibatan mung pulu!
Pero makanyan man agyang nu ka miras,
Gabun mung amana ala yang katumbas;
Matampa mung lugud makanyan ya katas,
Ing sinta king balen angga man king wakas!
ALIWANG MARANGLE
Neng: Bonifacio S. Manacmul Jr.
Matas itang dikut karin, keka pa mu ring biltangan.
Mapanas, masuksuk, mangirut king talampakan.
Mabuyun, maburak, dakal a ilug keka pang sisiran!
Miras ka mung panatag, mapait man pilit pibabatan!
Sukad mata malapit keng lawe lugal karin ika miras.
Pelakasan pa ing lub mu binulag na ning pangarap.
Pero ing katutuan milya-milya pa mu rin ing laut,
Dalan a baltangan o ba’t lalati ya pa yata kikiput?
Deng bitis mu king pagal miyagnan man e mitakbang,
Mitalusad ka’t mitalabu butit mu mengasyas la laman.
Dios ko bayu miras ing bengi aldo sana e kayalbugan.
Panalangin e mipamak king marok sana e pabustan!
Ing dela mung bakal kekang kipkap mebangnas, mesira,
Tinape mitatagan, mengulapu, mesyas lang anting buga.
Dagis mang pasinuldut bawan at takman tako da kinampa,
Pigpiyestan da reng lango ing mebuluk at simlam a kalpa!
Buwitre at leun a manambang kayat kayat la wawa,
Nandin pa manenaya nung misubsub ka’t misakinda!
Piratang mangulimbat bayung marangle tulisan sagana.
Daya’t laman gisanan da, sayran dang alang patumangga!
Magisan man itang lua mu alang damdam, alang malunus,
Ipakli mo man deng tud mu, siklaud ka’t mamalimus.
Gulisak ka man Abe ko alang saguip mate kang makalugmuk!
Nung isabak ing bie mu king bayung marangle kabudabud!
Sana rugu eka bisu bisu keka pamung pag-aralan,
Misip kang banayad, makatapulu bayu mu sa desisyunan!
Kesyasan ning buntuk e pairal, ita ing dapat mung bayuan!
Uling mayumu ing tagumpe nung kumpletu ka bakal!
Bulung
by Tony Pena
tinggal tunggal
telangan tengalan
alang kapatad-patad
aldo't benging mengalagas
malambat nang mitabugan ambun!
kaybat alang kapamun-pamun
tebiling banayad ing maskup
at maluwat nang kawat king
sangang keya masinup kinupkup
king napun nang meyampun!
miduyan-duyan yang
inatad labul ning angin
menibat ulap ba bo
angga lalam impun
mau king uma
e ya mipakaling gagagad
manenaya king mapaling
kaul ning gabung ibatan!
uling karin ya magpiyak
at magkerang tayimik
balabalan ne't dasayan
ing malwalas a kandungan
anggang manusbung pasibayu
ing menabung abung bulung!
DING POTIKU
neng Edgardo Bonus Sale
Eleksyun na naman....! Mengari lang kutu
makagatal buntuk dening politiku,
puru nang pangakung daramdaman ta mu,
o' ninung mipaku...? Ikatamu mismu.
Den naman botanti o'bat makanyan la
e're suryan mayap itang bobotu ra?
Kening edukasyun kasi, kinulang la,
myaliwang sitwasyon, e ra pin balu pa.
Kening kabilyan ming magobrang aldawan
ustung milalabas kening panakitan,
nung king pamilya mi atin manamdaman
keng lunto magastus ali na ke mangan.
Ninung dapat sisyan kening bye ming ini
ot e ke mibagwa king kakalulwan mi:
Ing dimut dang belwan ding kekeng pengari
o ding politikung ala naman silbi...?
Bisa kung mitigho...! Bisa kung mibagwa
kening kabilyan kung pane na king lugma;
dapot nanan kuman magmasipag mo sa
ing anggang kayud ku munta mu keng ala.
Nanu ing gawan ku? Nanu kay, nanu...?
Kening kasakitan, Dios ko, sawa na ku!!
Susumbong ko king Dios dening politiku
malunus la sana kekaming kalulu.
"Ding Politiku II"
neng Paing
Ating pulitikung tutu ampong ali,
Atin nang tutupad dakal la ring ali..!
Ati nang mangorap atin namang ali,
Atin tune mayap ating mu ring ali..!
Ding botanti naman ating malalagay,
Ating mu ring ali e makwa keng lagay;
Keng sakit na ning bie tanggap ya ring lagay.
Atin namang tapat bali wala'ing lagay.
Dakal nong kalulu a magkakasakit...!
Neng 'ting manamdaman dasan no ning sakit,
Ala mang panulu lalu lang pasakit;
Bie king aldo-aldo makanyan kasakit.
Ing dapat tang sisyan ika ampo yaku,
Ekata kikimut payasa ta kenu;
Tane katang lumwal karin magreklamu,
Munta Malakanyang angga king Kongresu.
Mipatunayan nang pilan nong milako..!
Presidenting peki, gulisak ding tau.
Angga king kelwatan atin mu ring tantu,
Tune manungkulan a ibotu tamu.
Eta ne bubugnus ing amanung lunus.
Ala ne king pusu da ring mamusabus..!
Ing kailangan ngeni kimut at balungus,
Pamisasanmetung ing gawan tang' lubus..!
Ing Dalit Nang Juan dela Cruz
Neng Renato B. Alzadon
Poeta Laureado
Dane ning aslagan...., gato-gato la ken
detang pupu-pulung kapisi ning EDEN
at inawus na ku ning Dakilang Amen
ba'ku lang likuman, ingatan, at banten
ing binye kung lingap e'ku pigmalumben
pablasang linto lang mayap ding memalen;
ing meguing galal ning e ya mipaburen
ing Pilipinas ku, malagu yang balen.
Ding daywan a lasip a mine dinalpak
king sagradung gabun mengipunlang sindak,
memanyulagpo la---mengari lang awak
a mengatakutan king taram ning tabak;
tune tengalan na ning yatung mawalak
ing tagle tepangan ding kanakung anak
e ra pikakunuan ....daya man misalwak,
talad la king digma king busal ning pisak.
Oyan ing kanita. Ding dayang malayo
misasausig la king guintung talindo,
mikalu-kalu la at mipapamatyo
king nanu man bague mipamwat lang pago,
karing balang bale ing lugud magbabo
inya kapayapan ya ing magparayo;
Ing takut king Guinu ya ing e mamako
king pilubluban da king lub ning aldo'ldo.
Kanitang minuna nung atin kapuryan
king labi ding malda atyu keng sipagan;
ding taung masipag ilang makasidwan
a makalukluk king banku ning dangalan;
king panugali na at kararaptanan
ning taung masipag ala kang liliwan
at ketang sipag nang papalto kabyayan
datang man ing bagyu e mako pamangan.
Mipaiglip ku mung dimut a saguli
ing alingatan ku bayung panugali;
ding mararamdam a pupurian ding labi
ding maki-upaya at makisalapi
inia naman oyan ding mag-ari-ari
king pamangurakut lalu lang misubi
at ding makalunus a mibaba uri
ding pakakalulung lalung meduahagui.
Nu'ku man malikid karing balang suluk
ila ding anak kung king dusa milugmuk
karing balang pusu nung atin mang tibuk
saldak lang inawa ning daing at siguk,
nung ngeni atin lang nasi ampon baguk
bukas era balu nung 'tin lang asanduk;
makanian ing bie rang mengari keng manuk
marakal a kalkal king metung a tuktuk.
Dala ning kalukan inia ding aliwa
maplas man keng lub da mamako lang kusa;
mamunta la rugu king aliwang kuta
at tatanggapan dang magpa-ipus no pa;
asawa at anak lakuan dong maki-lwa
ing e'ra pamikit aldo lang makaba
pibatan dang tikis ing dusa at lugma
ban king kasakitan mipasno lang bagya.
Kasumangid na ning panyulung ning yatu
at panyulung na ning kabyasnan ning tau;
lalu lang merakal ding pakakalulu
at lalung merakal ing krimen at gulu;
inya ding makatua ngarang mangamanu:
"iting kasakitan pepasari tamu.
miyungyung ta pusu king materialismu
at gilutan taya ing lupa ning Guinu."
"Meko kekatamu itang kagalangan
ketang mal nang lagyu at kayang kamalan;
Milako ta lugud kening kalikasan
pati na ding bunduk ala tang pitagan
inia naman ngeni king ditak a uran
titipa ing burak a manintun siran
pati na ding sadyang kaban ning pamangan
e ta mu sikasu...e ta mu lingunan."
Inya bayang miblas ing anyu ning balen
ibalik yeng lub yu king Dakilang Amen
ing pamikalugud ibalik ye't sesen
at pamisanmetung antimong memalen
ding mayayalipit ali yo paburen
at pakilabanan ing salut at krimen
ing kapaligiran ingatan ye't banten
at ding guintung aral balikan yong simen.
Nung ya nang mawala ing pamamerdugus
pamagsamantala at pamamusabus
mekad kanita ne mapatlud ing gapus
na ning kakaluluan at pamanagipus;
inya sa anak ko isubli yung lubus
maka-dyos a dapat at guintung pamyutus
akung kekong ibpang parating mamaus
ing pemansagan dang lagyung Juan dela Cruz.
Paginakit Ning Kalulu
rba-Baltimore Md USA
2006
Beluan...! Dinan yu kung beluan...! Bisa ku naman mabiasa
balang sumala panakit dening mapula kung mata...!
Baket....? Ikayu na wari a mibait maki pera
ing bukud maki-upayang lungub pasbul ning eskuela...?
O' makananu na ke man a anak na ning taldawa
mie na kami waring butang a mangulimlim pag-asa..?
Obra...! Dinan yu kung Obra..! Wa, bisa kung manintunan
ban keta dening ana' ku e 'na la sumalang mangan..!
Baket...? Ikayu na waring mangatas a pegaralan
ing bukud tatanggap bayad king bibu yung kapagalan...?
O' makananu na ke man a karamput mu kabiasnan
bitasang e na ke wari mag-obra at mibayaran...?
Doctor...! Dinan yu kung doctor..! Bisa ku naman paulu
ban ing katawan kung maina sikan ya pang pasibayu...!
Baket....? Ikayu na waring biasa at mabanding tau
ing bukud mangatuliran king panulu at serbisyu ....?
O' makananu na ke man mibait pakakalulu
mate na kami mu waring e makatakman panulu....?
Alak...! Dinan yu kung alak...! Ketang mabagsik....mapait
ban saglit kung akalinguan ing kaplas ning paginakit....!
Baket....? Ikayu na waring king kasaplalan mibait
ing bukud mipagkalaman king maligayang penandit...?
O' makananu na keman a king bie magkakasakit
e na ke wari maili man agyang dinam ya mung saglit...?
Aun...! Dinan yu kung aun...! Wa, dinan yu kung libingan
ban keta mipainawa ne ing malata kung katawan...!
Baket...? Ikayu na waring maki-gabun a beyaran
ing bukud maki lugalan king labuad ning kapainawan...?
O' makananu na ke man king siwal ming kapalaran
e na ke wari mipante angga na king kamatayan...?
Pamipanate...? Atin...! Atin...! Atin palang pamipante
ban keta alang makualta at kalululung matutunggue....?
Baket...? Ikayu na wari ding bukud mitagan mabie
ikami na mung kalulu ding sakit at mangamate ...?
O' ing aring kamatayan e ya mangabiran lawe.....
pante-pante, gabun tangan, at king gabun tangan ume...!
" Salamat Kekong Biasa "
neng Paing
Dakal a salamat kekong mangabiasa...
Mituringan pantas, miyaliwang linya;
Keng pin kabiasnan yu king kasaklo mata,
Pati e kekayu buri yu pang akwa..!
Butang kami rugu king panlalawa yu...
Alang pegaralan matas a koleyu;
Pero o't balu mi ing pamangawan yu,
Eke pu makapyak mata mi kulayu..!
Ikayung mituru kekami pa murin...
Mebyasa keng marap, tumutul, maglarin;
Keng pemaglasak yung kasiran mebinbin,
Sablang kasakitan kekami mibaling..!
Gawan yu nang gawan ing buri yung gawan...
Pamildis yo ring ley, ding batas patluran;
Paglisya, pamatdan, sulung gawan yu ngan,
Ba' kong manatili king kekong kabyasnan..!
Salamat kekayu keng kekayung gawa...
Lalu keng darakal ikong maki-gawa;
Lalu keng titibe ikeng mipamingwa,
Kekeng katuliran, ikami nang gawa..!
Nung ing belangkas yu patdan yu keng dakal...
Anti ke momg kuyug lalu keng darakal,
Nung e yu tuknagan kekong pamanyakmal,
Lalu ke pang dakal, salamat a dakal..!
Pamangan, Imalan, Tuknangan
Neng: Ronnie Juanta
Pangalto mu keti labuad, sumusu ka
King lubas a kabilyan, midin kang lampin
Keng panyatang mu, pengari mu metula
Masinup, tuknangan, mibait ka karin
Keng kekang paman dagul kailangan mangan
Keng pali at dimla, mika imalan ka
Neng bubulus ing uran, atin santungan
Pengari mu’t ika, king bale masaya
Marakal pamangan, nung atin okasyun
At keti mu rin, maka imalan bayu
Me isis, me linis, para selebrasyun
Ining kubu ku, diang kapurit ya rugu
Atin mu naman pamangan. Neng pa siyam da
Deng kekatang kayabeng, minaun na biye
Masanting imalan piblas da keng burul
Pabalik keya, biye tamu, iyang minye
Nung lawen mu la deng atlung bage ayni
Karin ya dudurut ing biye na ning tau
Pamangan. Imalan , tuknangan la deni
Dakal alang makanini, keti yatu
Dakal nong daranup, ala nong pamangan
Mangal-gal keng dimla, maduluk keng pali
Deni mong atinan, ilang manungkulan
Kambe ning upaya dang maka sarili
Nung ala keng asbuk, anti mong pamangan
Nung e me susulat, ala yang imalan
Nung alang balayan, ala yang tuknangan
Oyan ing malyare, balen Kapampangan
Kailangan nong gisingan, deng kayanakan
Buklat deng mata, ban kanita akit da
Nung nanu na, ing kekatamung gagawan
Ban eya mawala, kekatang salita
Potang datang na ing karelang panaun
Makapag maragul, karening keraklan
Amanung, ditak na miras king minaun
Atin yang, Pamangan, Imalan, Tuknangan
Paynawa Ku Pa [EkuAgawa]
Neng: Ronnie Juanta
Kaibat ning pamag obra, kayari ning aldo
Bisa kung magkera, ban kung mipasno
Makaba deng oras kabang manintunan ka
King makuyad oras, paynawa ku pa
Kaibat ning manyaman paugtuan, kinabsi ku
Keng miyaliwang asan a pengan ku
Kaibat na nita minum kang danum marimla
Ban malaso pengan, paynawa ku pa
Neng mamasa kung libro, manigaral lisyun
Uling malapit na, eksaminasyun
Dindam deng mata kung mapagal na at lulwa
Pinyak kong matalik, paynawa ku pa
Neng mag dibersiyon ku, kabang mag gitara
Deng taliri ku neng kayi maplas la
Tiknang ing pamanig-tig,lukluk ku king silya
Labulan ing gamat, paynawa ku pa
Kabang susulat ku, mamalangkas poesia
Lalu na ing buntuk, ala yang diwa
Pero ali ku tuknang, keng Guinu pasaupan
Ban ke pin apasyag, Amanung Sisuan
Bayung Banua
rba-2007
Yagkat keng magsaya ing kakung kaladua
bilang pasalubung keting Bayung Banua,
dapot, nanan ku man, bali-wala kaya
ing panyatang na ning aldo maligaya.
E bisang dumalo king plazang migayak
makilagum karing kakanta't teterak,
ban salubungan ya king matning gulisak
iting bayung banuang mamuk nang misapwak.
Uling king lawe na ing kapagmasusian
e ya pang-kaladua, ken ya mung katawan;
mabie yang sagisag na ning kamatayan....
Nung atin yang mula....atin yang angganan...!
Bayu ya mibait banuang dos mil syete
banuang dos mil seis dapat ya pang mate....!
kabud misapwak ya Enerong pangane
makaburul ne man ing matuang Disyembre...!
Yan palang kaladua ning metung a tau
e ne ligaya yang bague mibabayu;
uling inawa yang lebul na ning Guinu
'nia ala yang mula....'nia ala yang sepu....! |