Table of Contents:
1. Sapning Menapa - Arnold Batul
2. Aniang Anak Ku Pang Limang Banua - Ronnie Juanta
3. Nanu Nang Oras - Ronnie Juanta
4. Nung E Ngeni, Kapilan? - Ronnie Juanta
5. Nukarin No Kaya? - Ronnie Juanta
6. Ala Ka Karin Kanita - Ronnie Juanta
7. Paturu Ku Sa Karela - Ronnie Juanta
8. Ding Talaturu - Biseru
9. Deng Basultu Nang Totoy Bato - Ronnie Juanta
10. Ing Sala - RBA
11. Simbang Bengi - Ronnie Juanta
12. O Tala Ning Balen - RBA
13. Talangka - Ronnie Juanta
14. Parul Kapampangan - Paing
15. Ing Parul a Pusu - RBA
Sapning Menapa
Neng: Arnold Batul
December 17, 2006
Sapning Kapampangan susuyung sukdulan
Ing keka pigkalam tutu yang kabyasnan.
Lugud yang timpukan diklut Na king kăban
At kekang inampang alang pikakunuan.
Dinalit dalise arap tau bebe
Ning pampang ibatan ing Sisuan a pagkabie
Ikua rang mipakde, dinuku’t merine
Indam dang salita karelang linele.
Malamyus amanu e ya king pang yatu
Menibabal salu karening maglualu
Saingsing ding atyan tutu lang danupan
Tinapeng pagkabie ding atyan pekabsyan.
Yng sulung paritan king gamat mung wanan
Minaslag yang sala king kapaligiran,
Ding matang memaglua pilisan mung tula
Delakit karela masanting balita.
Salamat king sabla O Kaka! O Kaka!
King dapat aliwa banal ya ing taya
Ikua mung menapa kekaming ulila
Bisa ku man lumua keng dalit mu’t tula .
Paingulut ka man sa ing lugud mung likwan
E mi akalinguan angga king kutkutan,
Lugud mung penaplus king pusung mamaus
Kibyusan meng lubus anti Ning Menatbus.
Aniang Anak ku pang Limang Banua
Neng: Ronnie Juanta
Aniang anak ku pang limang banua,
Ketang pelagwan dang balen Wawa
King aldo-aldo ala kung gewa
Nune ing mamyalung alang patna
Atin kung pasi, papadurut ke
Kening tali potang ablutan me
Sasandirit yang alang patugut
Angang tuknang ne king pamandurut
Burarul kung miyaliwa kule
Neng gatpanapun pasulagpo ke
Teterak ya king asul a banua
Kabang abitan ke ing tali na
Kening siping bale atin mula
Neng Sabado pipamyalungan ya
Aro-aro, piku at sakbatan
Paniatang ning bengi, salikutan
O karagul ning pami aliwa
Pyalung da ngeni ampo kanita
Pipindut keng butun gagawan da
Kilub ning kwartu, paka kulung la
Alang lulundag at pupulayi
Tambubung ampong lundagan babi
Deng pyalung ku mipalitan no ngan
Karening bayu dang panyaliwan
Eku balu nung mibalik la pa
Deng pyalung a delanan kanita
Ketang panaun anak kung paslit
Atin kalikutan at makulit
“Neng Abac”
Neng: Ronnie Juanta
Metung a galingaldo,
Mipalawe ku king aslagan
Daratang ne ing aldo
At ita mu ngan gigisingan
Deng ayup manyulagpo nala
Pati tulang at mariposa
Malwalas ng asul ning banua
Kening awang asilip muna
Ligwang tinikdo king pagkeran
At tinipa ku ketang eran
Malagwang linub kening banyu
Dilung itik, mitawli na ku!
Kapiblas ! papulaying linuwal
King kusina ban mag almusal
Bau ning melutung abakan
Kilbit ne, danupan kung atiyan
Pritung tuyu at single nasi
Mapaling kape’t sokolati
Burung ebun, suman bukagta
Bobotu at putu kutsinta
Ketang Balen kung penibatan
Abac makanyan meng umpisan
Migigising asna kanyaman
Kening labuad na ning Kapampangan
Nanu nang Oras?
Neng: Ronnie Juanta
Pangaslag ning aldo, tikdo king pagkeran
Pulayi king baniu, ketang pipandilwan
Nanu ng oras, ata mu ngan mangutang?
Kabang maniblas at manayus katawan
Mamaligwang mag almusal king kusina
Atin nang kape, ampong putu kutsinta
Epa man melaso kanakung pengan
Lual na bale para aldo umpisan
Papunta ketang kanto manabat kung jeep
Adiang sapak nala , kailangan sumabit
Makisiksikan karening estuyanti
At karelang maestro papunta keng klasi
Balang abak, Pane tana mamaligwa
Papunta escuela, papunta keng obra
Papunta palenke, paputan tidahan
Ban kaugtuan, malutu itang pamangan
Nanu nang oras, ngamu na naman kako
Oras nang muli uling mag alas sinko
Yari ne naman, ing aldo milabas ne
Metung a aldo king kekatamung biye
Bukas makanyan na naman,ulit-ulit
Ing balamu alang padukut sandirit
King aldo-aldo pamibiye-biye ku
Pane ku makitagalan kareng tau
Nanu nang oras kaniyan a mu na naman
Ing kekang pamangutang tuknang kapilan
Potang tinuknang ing oras ku keti yatu
Mirate king gabun at paynawa na ku
Nung E Ngeni? Kapilan?
Neng: Ronnie Juanta
Kalambat ku nang susuyu keka
Pepasyag na palsintan da ka
Manibatan aniang anak ka ta
Buri kung kayabe yapin ika
Emu misan kanakung sasabyan
Amanung king pusu manibatan
Kapilan mu kaya sabyan kaku
Na atin kung lugal king pusu mu
E na ku man sana mamaligwa
Ken pakibat manibatan keka
Pero dadalan ya ing panaun
Daratang ne kakung gatpanapun
Malunus ka kening manenaya
O karakal linabas nang banua
Angga man ngeni ena pa balu
Nung keya atin na kang pagsuyu
Mipakibatan ne sana rugu
Ing sinuyu banuang limang pulu
Nung balak me mang pakibatan
Ing kutang? nung E ngeni kapilan??
Nukarin no Kaya?
Neng: Ronnie Juanta
Misan a aldo, mig pasyal ku pangulu
Ban manaliwa, angin sisingapan ku
Keta Kabalenan, karin manuknangan
Meragul king poblacion ning balayan
Balang munta ku, asikan ng Apu ku
Manakit kung denas, pipit, bati batu
Ketang king sapa, atin mu naman sibad
Keta namang pampang, tikling lang sisikad
Keta babo banua, uwak at bulawe
Kening kul-kul sasalikut, dagis pale
Keng lele pilapil, kaibat na ning uran
Bulig, itu, miyaliwang singo asan
Neng ing pale makalbug ya pa ken danum
Deng tugak at susu karin la maratun
Lalu na neng panaun na ning kauran
Deng talanka king sapa, lilingkas no man
Ot kaya ngeni neng mumunta ku karin
Alang marangle, marinat ne ing angin
Ing dating palayan a pita-tamnan da
Konkreto ne, at meging subdivision ya
Detang ayup, tugak at asan marangle
Emu no akit, diyang nu ka pa milele
Detang dating atiyu, aniang anak ku pa.
Mengabating no ngan, nukarin no kaya?
Ala Ku Karin, Kanita.
Neng: Ronnie Juanta
Kagising nang abak, dinulung ya king marangle
Sasarulan ne ing gabun, pitamnan nang pale
Parumingu na neng pag obran, paka gambulan
Samasan ne, para ken paniyatang ning uran
King kapali paliyan aldo, biglang medalumdum
Kule ning banua, metuling balamu ing karbun
Ating akbung a malakas, matni pa king dul-dul
Misdan ya ing damulag, memulaying kukurul
Kayabe ing sarul, ing ortelano miragsa
Keta king burak, mikera ya at maka agpa
Detang keyang mata, mengabural la keng takut
Memulayi king kubu, at karin sinalikut
Nanu ya itang dimdam kung matning akbung nandin
Ing kutang na king sarili, kabang manalangin
Manyad kung tawad, kareng angang kasalanan ko
Diyos ko! Nung yapin na ini ing tawli kung aldo!
Ena pa man meyaring mengadi at mengurus
Atin ne naman didam a bu-byung at mamagus
Keng awang ning kubu ikit ne itang sapa
Mamagus, kule abung burak, mamasuk ya pa.
Keng ikit na king sapa, lalu yang mitakutan
Deng dating kakawe asan, mengamate la ngan
Ing berding, malwalas a marangle nandin pamu
Mitambunan maputi, maka pangukung abu
Siyete, Hunyo, mil nuebe siyentos nobenta’y uno
Memakbung iya ing bunduk, pelagwan Pinatubo
Abasa ku keng diyario, ining meging sakuna
King labuad Pampanga, ala ku karin kanita…
Paturu Ku sa Karela
Neng: Ronnie Juanta
Aniang malati ku pa, at eku pa magaral
Atin kung Darang Maestra tuturu ya king Sentral
Balang Sabadu, mamasyal ya king bale matua
Panenayan kung pane itang pamaniyatang na
Dening lapis at papel, na binye na kanaku
Binili keng la mesa , inabit ke ing banku
Selese ko deng cuadernu, ing libru binuklat
Makasadyang mabiyasang mamasa at sumulat
Letra ding alpabetu, miyaliwang numero
Pekilala nala at matiyagang tiru kaku
Adiang anak ku pa pin atlung banua kanita
A sulat ke ing lagyu ku, pauli ning turu na
Ngening meragul naku susulat ku pa mu rin
Uling Amanung Sisuan, sasagipan miya pin
Ing kebalwan pamanyulat tiru ng Dara ku
Iyang gagamitan, pamanapse kung amanu
Dakal ku buring gawan, para king Kapampagan
Mag poeta, pintor, gitaristang manigtigan
Poesia, dibuho’t musika, ban kong agawa
Dakal panaun, Ibye na sa ning Mayupaya,
Ngening makayabe ku kening Akademya
Akilala kula, deng batikan dibuhista
Y Rafael Maniago ampo itang Dan Pierda
Keng pamag dibuho, paturu ku sa karela..
Karening Koyang, Bapa, kanaku mamantabe
Eko sana sasawang, tuturu kening wale
Kening pamagsane miyaliwang kawatasan
Ban miyangat pasibayu, Amanung tang Sisuan
Ding Talaturu
Ning Biseru, December 20, 2006
Binang makalungkut-lungkut ing kanakung abalitan
Keng TV at kareng radyu at kareng peryodiko man
Kareng talaturu tamu ating mi-yayasuntuan
Keng pamagdisiplina ra king karelang tuturuanan
Keng mibabalitang ini dakal la ring kakung kutang
A lilibad kening isip nung nanu ing kasangkanan
Obat deting talaturu mibalita lang makanyan
Ing sagradu dang propesyun mesira at mimusingan
Kening makitid nang sipat ning kakung dimut a isip
Metung karing kasangkanan a kanakung asisilip
Nung bakit deng talaturu akwa dong apanasakit
Deng karelang disipulos magtamad la at makulit
Dapot iting kakulitan sapat ya pin kayang sangkan
Para deting disipulos mapalu la¢t miparusan?
Ing abagut kung pakibat kening kakung panimanman
Itang kwentu nang apu ku, itang matua nang kasebyan
Nung latiku ilele me¢t isalikut e gamitan
Keng pakamalan mung sapni a migkumit kasalanan
Nung ¡lang katapat parusa ing agawa nang kamalyan
Kabang daragul ya iti problema ne ning lipunan
Sumangid na naman niti, dening maestru¢t maestra
Dapat lang misip malale keng pamamye rang parusa
Itang tune katalaruan ya sana ing ipakit da
Ban karelang disipulos mamintu la at mabiasa
Kareng kekatang pengari, e ta sana kusintirul
Ing karampatang suporta ibye tamu at ipukul
Kareng kakadwang pengari karing anak ta gagambul
Ban dagul lang responsabli¢t tumua la ngang mayap-ukul
Deng Basultu ng Totoy Batu
Neng: Ronnie Juanta
Aniang minuna kong dimdam, keyang titigtigan
Metung kung estudyanti, atin gitarang indam
Keng matuang cassette tape, atin me-record ka piyestan
Y Totoy Bato, mamye tula kareng keraklan
Kantang makatula, ating kantang mika lisyun
Atin medyu salbayi, atin balamu pasyun
Pero nanu pa man ing tema deng kanta na
Ing kapiyestan deng balen apapasaya na la
Neng misan atin ya namang pakiyabe poesia
Diang kanu kang Balagtas, eya manandam rima
Mipakayli ku ketang poesiang boksingeru
Makapatungkul, ketang milyari Sapang Batu
Iyapse nang poesia, ketang parting biasa ya pin
Milyaliwang pikatulan, deng pisapin-sapin
Atin tungkul kang Apung Turyuk, ing lagyu na ita
Ing apu ng pesalwan aslam, miras Arabia
Deng basultong peg-aralan keng gitarang indam
Kakanta ko neng Sabadu, neng maki inuman
Asno king kasigla, makatulang daramdaman
Kambe ning serbesa, at manyaman a pulutan
Bayu mipasubu, maka inum alang oras
Buri kung abalu, nun ne keya mengaparas
Y Rodolfo Laxamana alias Totoy Bato
Akakanta no pa kaya, deng kayang basulto
Ing Sala
neng:rba
12/19/06
Dening tanaman ku apansinan ku la...
Ing sala ning aldo yang panalukyan da....!
At itang dalumdum yang gugulutan da
e're lalawan man itang anino ra...!
Abak pang maranun ta'no pakabatyo
ketang panyilang na aurorang sisiro,
king malating awang bisa langan tando
ban salubungan de ing sala ning aldo...!
Ing sinulud kening kakung kaisipan:
Ma'p la pa kanaku sese kung tanaman,
biasa lang gumulut king keralumduman.....
Ing sala ning banua, balu reng saganan....!
Samantalang akung taung palpitakid
king keralumduman ku bala-balikid,
anino yang paldas ing kaku tataid
inya king sigalut ku mangatalabid...!
Mal kung kayanakan, ilang apusan yu
ding kakung tanaman.... aliwa na aku,
yang panalukyan yu ing SULU ning yatu
pablasang king SALA.....karin ya ing Guinu...!
SIMBANG BENGI
Neng: Ronnie Juanta
Kalibutnan bengi, bigla da kung gigisingan
King marimlang tiyup ning angin, Disyembring amihan
Pemaligwan da kung piniblas ban kung mituki
King pisamban king plasa, tumagun Simbang Bengi
Kayabe ding Apu, Pengari, pisan, kapatad
King marimlang bengi, inumpisan ming miglakad
Diang mitutundu ku pa, pamiraplan da na ku
Pota eku miyambunan pamye da neng Pasku
Karas mi king pisamban, sisikan, dakal tau
Manalangin, mamasa keng grasia ning Guinu
Ing Pari, linwal ne at umpisan ne ing Misa
Pasalamat king Mayupaya, Pasku oyni na
Kayari ning Misa, siglulung linwal Pisamban
Ban makasali,miyaliwang tindang pamangan
Atin putu sulut, bibingka, putu panara
Kaibat, panulak, mapaling salabat kanita
Pangauli keng bale, king salas dineretsu
Pemusni deng kahon, na binye ra kanaku
Bayung imalan, pantalon, sapatos, piyalungan
Keng keraklan dang mibye. Eku no abilang man
Neng mong anak ka pa, kalupa ku mo kanita
Ing lawe mu keng pasku, asna panga aliwa
Lalawen mu wari, deng regalu’t aginaldu
Ngening matua naka, menga impis pitaka mu
Maralas mekalingwan, ing tune kabaldugan
Kening Santong Bingut, keyang aldo kebaitan
Bulag tamu kasi, lalawe mu king sarili
Anak na ning Dios, na mibait king aldo ayini.
Kapilan ta ne man dinan, kayang aginaldu?
Mig sakripisyung biye, ban akabus na ka tamu
Kang Hesus mengabus, kasalanan keni yatu
Papuri’t, Masayang Kebaitan pu keka Yu.
O' Tala Ning Belen
rba x'mas06
O' Tala Ning Belen, kabud tinando ka
labuad ning Bethlehem meguing mapalad ya.
Keya la tinipa ding Anghel ning Guinu
daralit Hosana king Anak Ning Tau.
Keya la migsarya mengidurup lamak
pantas a sinamba arap ning Dios -Anak.
King pisni ning libru nuan ya ing Bethlehem
a pagmaragul ning meto Jerusalem.
Uling king labuad ding lupig at maluka
karin ka tinando O' maslag a tala.
Nung pamayapan ning Banal a Amanu
mikaduanan ya sa ing minunang Pasku.
Tutuking sunlag ka O' Tala ning Belen
ya sang aslagan mu ing tibuan kung balen...!
*********************************
TALANGKA
Neng: Ronnie Juanta
Oyni ing kwento, king barrio Matalangka
Lalam ning palapat, king bebe ning sapa
Karin ya meragul, karin manuknangan
Y Tom Talangka, na mika kayabangan
Uling mong bayintau yang, asna dagul
Maski nanung balakid, eya kumurul
Makanyan paglalawe na king sarili
Ka barrio na, dadalan da niya keng ayli
Ing barrio da king lalam ning palapat
Mitmu yang lumut, at aliwang salabat
Panyatang ning kauran, karelang panayan
Kanita maglingkas, magdaus kapiyestan
Panayan ng aldo Tom, oyni nang dinatang
Piyestang lingkas Talangka, lele ning pampang
Selubungan da, miyaliwang bisita
Pati damuku’t ema, memanyatang la
Asna kasaya, karelang selebrasyun
Dakal gaindu,ing karela mangebun
Biglang mepatad, aldo ning pamag saya
Mirasan yang sakuna, barrio Talangka
Katatakutan da, balang maglingkas la
Yapin ing panyatang, darakap karela
Ala ya agawa, malating talangka
Potang mesaluk ne, keng buslu mikana
Aniang mimasmas ne, keng panga bigla na
Ayalak nang Tom, na paka kulung na la
Ay katalusad na, Balangang kulungan,
Pamanakas Y Tom, mimisip paralan
Mangaragul a sipit ginamit na la
King gulut ding kayabe na minukyat ya
Keng bukana, pikulungan dang balanga
A batsawan ne, maragul a kusina
Itulak yukung masikan ban kung luksu
Palwal keng balangang pikulungan tamu
Mantun kung bage, malyari yung ukyatan
Tumakas tamu ngan king kulungan a yan
Deng talangka keng lalam, e de panwalan
Pupusanan dang Tom keng keyang panyabyan
Mako kang dili mu, tsaka mu ke lakwan
Ngarang keya, aniang bigla deng abitan
Keng sikan ning abit, keng lalam ya miras
Y Tom a maragul katawan at malakas
Kiyak na at gulisak, mepatdang bigla
Minuran, maputing batu, king balanga
Masakit at maplas dimdam king katawan
Ing barrio Talangka, gugulisak la ngan
King kabukas ala nang makagalo man
Makarate, patung-patung mete no ngan
Nung pepaburyan de at meka luwal sana .
Menakit, ya sang lubid pitakasan da
Ngeni Y Tom at deng angang ka barrio na
Meging lang pamangan, keta king Pampanga.
"Parul Kapampangan"
neng Paing
Bandang Jeruzalem sinlag ya ing tala...
Tinulid yang mismu ketang kural tupa;
Ing Guinung Minyaklung karin mibayit ya,
Kambe nang San Jose at ing Birhen Maria...
Ing aslag ning batwin nung nu ya tutuldu...
Yang tukyan-tukyan da reting atlung Magu;
Binaslen dang bunduk, marimlang disyertu,
Alang pasimbalang puntan de ing Guinu...
Ing aslag ning tala king panaun ngeni...
Gewa rang kikislap dakal palamuti;
Miyaliwang kule, miyaliwa korti,
Parul Kapampangan bulalag ne keti...
Dakal nong maniglo, miyaliwang lugal..!
Pagsaryan da la ping king karelang aslag;
Kambe ring mosikos masayang papasyag,
Kebaytan ning Guinu king pusu masikap...
Anya nung akit me parul ketang awang...
Simbulu ning tala pamilyang aslagan;
Ketang kilub bale, anting lalabangan,
Ing diwa ning Pasku atyu kalibudtan.
Angga ngeni mu rin, balen ning Pampanga..
Higanti nong parul ding tutulid kaya,
Ing tala ning munag, mangislap masala..!
Ing Guinu tang Jesus king balen atyu Ya.
Ing Parul A Pusu
Neng: RBA X'mas05
Papasku nanaman......!
King tulid nang eran nitang bale gipu,
Ati ne na naman
Makasabit karin ing Parul a Pusu;
Kasuyung melakwan
Panyatang ning silim, sisindyan ne sulu
Tanda ning panayan
Na ing pamagbalik ning mutyang dinayu........
Sakasakali man,
Kabud ne mu datang ketang ena balu,
King balitang eran,
Ding banyagang bitis, ela mitalabu!
Papasku kanita,
King kapagnasan dang kumit bie manawa
Meko yang irug na
Tinggap ne ing obra king aliwang kuta;
Pamisulatan da
kabang bayu-bayu madalas, madiwa
O' kelambatan na
Ing datang ding sulat, malagad, bihira
Angga king alana.......
Bitasang alanang miras a balita,
Ene mekibat pa
karing kayang sulat ing dinayung mutya.
Papasku pa naman.....
Dinatang ing bagyu, kabud-abud na mu
Angin yang masikan
Ing mamius manugun ketang bale gipu;
Kalulung melakwan
Darala na mekad ning dusang milalu
Mibagyuan ya naman
Kabud nya mipase...masaspak ya salu.
Ala yang keliwan
king megising parul ing pirat nang pusu......
Ala yang keliwan
King mipdang inawa itang mipdang sulu.
Nung nukarin ya man
King disyertung labuad ing dinayung mutya
Agyang saglit muman
Ing likuan nang pugad aganaka ne sa;
O' nung sakali man
Ing sadyang tuknangan datang ya king diwa
Aisip na mu man
Panaun ding Parul...panaun ning saya;
O' tulid ning eran......
Ing Parul a Pusu eya pa mibaba
Yang palatandanan
King gisi nang pusu ning kaladuang mipda!
"Ing pangasakit ku e sapat a bague
ban ing amanu ku paimburisan ke,
nung mawala ya man ining bugtung kung bie
kapatak yang danum ing anting meyakse;
dapot ing amanu nung ya na ing mate
ing meto tapayan yang mimin miugse
at iting tapayan wari't mesintang ne
kapisik man danum ala na kang a'ike." Gallardo |