LIBRARY OF KAPAMPANGAN POETRY - PAGE 40 - Ernesto C. Turla, pres. Akademya ning Kapampangan Int'l., curator - Languages

Table of Contents:

1. Nu Ya Minta Ing Kaleldo? - Renato B. Alzadon
2. Nung Mete No Ding Poeta - Renato B. Alzadon
3. Kapampangan Italacad Daca - Udis Manalansan-Lord
4. Pamanamun - Renato B. Alzadon
5. My Endless Love - Renato B. Alzadon
6. Lumang Guitara - Renato B. Alzadon
7. Bacal a Pusu Cu - Udis Manalansan-Lord
8. Jeannette - RBA
9. Neng Mumuran - Rheybert M. Montoya
11. Only You - RBA
12. Only You - RDM
13. October 23, 1988 - Rheybert Miranda Montoya
14. I Can't Stop Loving You - Renato B. Alzadon
15. Miryenda - Ronnie Juanta

Nu Ya Minta Ing Kaleldo
Neng Renato B. Alzadon
Poeta Princepe/Poeta Laureado

Nandin, atyu ya pa keni....Ay! Ot e ke balung meko...!
Sinakildap mu alayu. ..! Nu ya minta ing kaleldo...?

Balamu kapilan pamu...., ing lugud nang alan-anti
yang balas kung pagdasayan king Beach na ning Ocean City...!

Balamu kapilan pamu..., ing legwan nang paniniglon
ya ing Falls na ning Multnomah king Estado ning Oregon.

Balamu mo napun pamu...., ing pali nang makilugud
pepatulu nang pawas ku king Parke na ning Dollywood.

Napun pamu kailyan na ku, uling abe kong mandilu
ding anak a mangalikut ketang gripung pepatulu.

Nandin pamu..., nandin pamu...., lalon na kung mananaman
karing m'yaliwang sampaga ketang bebe na ning dalan...!

Dapot ngeni, nuya karin....? Ot kabud ne mu milabas...!
Sinaguli mu mipda yang selisyan na ning Taglagas...!

Ing kaleldo..., ing kaleldo...., nanu ta ing keyang likwan...?
Ha..! Metung ne namang gulis kening lilino kung kanwan...!

Nung Mete No Ding Poeta
Neng Renato B. Alzadon
Poeta Princepe/Poeta Laureado

Menakit na kayung banuang alang batwin...alang tala...
at king benging kapitangan alang bulan a masala....?
Makanyan ya ing larawan ning amanung mesalanta
nung king banua nang katasan mipda no ngan ding makudta....!
(Ing banua ning kapampangan madalumdum yang mistula
nung mete no ding poeta a dapat manambag sala.)

Kapilan na ko menakit a malwalas a marangle
alang kamuting gagapang alang manyampagang pale...?
makanyan ya ing larawan na ning amanung matamle
nung ala nang tutubu pang tanaman a babie kule.
(Ing amanung kapampangan makanyan ya pangarate
nung ding Poeta nang pantas mimin no ngan mengamate.)

Menakit na kayung hardin a gigisingan ning abak
dapot ala yang akit mang tanaman a mamulaklak...?
Makanyan ya ing larawan ning amanung medakurak
alang legwan...! Alang banglu...! Alang tulang misasapwak...!
(Ing hardin ning kapampangan makanyan yang melamistak
nung mete no ding poetang dapat munye salimuyak)

Menakit na kong pisamban a lupang matibe dalig
dapot ala yang kampanang neng orasyon matitigtig...?
Makanyan ya ing larawan ning amanung makapandig
king salun na ning pagsalbat a nung nung ya makasandig...!
(Ing parnasong kapampangan makanyan yang mararaig
nung mete no ding poetang karing lira dapat tigtig.)

Menakit na kayung ilug a maratun... e gagalo
alang asan a lulundag, kakawe, o magpagato...?
Makanyan ya ing larawan ning amanung manimusyo
alang diwa...1 Alang sunis...! Alang gale magparayo...!
(king amanung kapampangan, ing agus na milalako
nung mete no ding poetang dapat masipag gagalo.)

Sibukan yu nang dinalo king marangle na ning guera
alang akbung...! Alang tambul...! Alang kulyo at palkara...!
Makanyan ya ing larawan ning amanung sinuku ra
ing bukud nang makatikdo ya ing maputing bandera.!
(Kapampangan...! Kapampangan...! Mekeni, manangis kata.
Panangisan to ding mete....NUNG METE NO DING POETA...!)

Kapampangan Italacad Daca

© Dr. Udis Sanchez Manalansan-Lord

Api lang mapali, maluto, mamaltuk, mamacbung!
Neng daramdaman cung Indung kapampangan mamamate ya.
Saupan queng italacad, maniulat cung poecia,
Masqui ecu biasa, masqui ecu biasa.

Agiyang libu libung anios ing pamanucnang cu quing America,
Kapampangan ya’y ng diamanting queng pusu cu makapinta,
Megaral cung Spaniola, Aleman ampong Francia,
English ing lenguaing tuturu cu America,
Pero, Kapampangan ya’y letratung queng pusu cu macaquintal.

Macananu queng calinguan ing salita deng Nunu cu?
Bandera yang italacad masqui mal pa’yng ibayad cu.
Masqui ing lagiu cu mibalut libu libu mang diploma,
Queng lupa’t, salita’t, kule’t, tacbang, talagang Kapampangan cu!

Arap da reng ninu mang Ari, Reina’t Princesa,
Queng arap da talacad cu,
Paquilalang Kapampangan cu.
Quen mang “first class” a restaurant masqui nucarin pa queng yatu,
Magsalita cung Kapampangan nung ‘ting macaintindi cacu.

Ali, eya mate ing Kapampangan a Indu cu,
Uling acung anac na, quing pusu cu titigtig ya.
Kapampangang salita cu,
E calinguan capilan man!

Api! Mapali! Malutu! Mamaltuc! Mamacbung!
Ing balang Kapampangang sasabian cu.
Gulisak! Gulisak! Gulisak!
Ecu quiac! Lumaban cu!
Italacad que’yng bandera
Ning Kapampangan a Indu cu!

9/30/06

Pamanamun
Neng Renato B. Alzadon
Poeta Princepe/Poeta Laureado

Ing poesiang binsagan kung "Nung mete no ding poeta"
tune ke pung iparikil karing watas ning AGTAKA,
uling lalto king balamu ing AGTAKA mabye ya pa
at ing pamuntuk na niti pengari neng Rosie Calma;
nung makanyan, atin lagyung king aguman pakalista
a makudtang talagambul na ning amanu tang sinta,
nung mabye la, nula karin, obat metung man karela
alang meliling dinalo king forum ning Akademya...?

Ing balu ku karing watas kabud dinamdam lang berso
tuknang la king gagawan da, at dapal lang maki-iglo;
mengalto no ding biseru king Akademyang Parnaso
karing watas ning AGTAKA agyang metung alang linto;
inya ausan ke pansin ing Poeta del Rosario
antimurin ing ari da, ing Poeta Ved Ocampo:
Sakali matwa na ko pu at e yu na agyung tikdo
o'bat e ko mangitubud karing kekong laureado...?

Ban keta alang sumabing manyabi kung talimhaga
pakalina-linawan ke ining kanakung salita:
karing watas ning AGTAKA managkat kung pantuk-diwa
o manamun kung Crisotan agyang nanu ya man paksa,
inya nung ing AGTAKA yu tutung e ya pa miragsa
mangitubud kong poeta...patikdon yeng malalagwa
uling nung alang makibat ya ing tune mabitasa
ing AGTAKA miragsa ne....NUNG METE NO DING MAKUDTA...!

MY ENDLESS LOVE
Neng Renato B. Alzadon
Poeta Princepe/Poeta Laureado

Nung saka-sakali akung mate muna
ing kapatak mung lua kanaku sapat na,
at nung ika naman, tali ning inawa,
pagpaldasan naka ning kakung kaladwa.

E sapat kagiwan ing dila kung watas
ban ilarawan ku ugali mung pantas
pablasang king bie ku, lubus kung abatas
anghel kang nibu na ning upayang matas.

Ikang minie lunas king pusung sugatan
ban akalinguan ku ing kaplas nang kimtan,
nung lon ku man ngeni ing bie kung gilutan
e na ku manglap pa king keyang limputan.

King landas ning bie ku matindag kang sulu
tune kang timbulan kening pamikalu
king uli mu, yan mang matarik a pulu
au-ukyatan keng alang karug salu.

Bukud ayampang kung anting katumbalas
ning katapatan mung kaku pepamalas
ing dalise lugud ning pusung kapilas
a iguit ulaga king guintu at perlas.

Keka ya irug ku ing matibe lugud
a king kapilan man e malyaring tumbud
pablasang lugud yang metakmus king ubud
ning kakung kaladwa a keka lulugud.

Inya nung sakali muna kung maglakbe
ing pamandayu ku e mu kalulumbe
uling ume ku man king aliwang orbe
ing kekang alala yang kaku mantabe.

Ketang mulahan na ning bie alan'anga
panenayan dakang sumiro sampaga
angga king pangakung Eden na ning banwa
palsintan na ka rin ning kakung kaladwa.

Inya, kapilas kung matibe sandigan
ing sumpa kung lugud keka yang aligan:
My love, My Endless Love, ika ing irugan
anga man king sepu na ning alan'anggan.

LUMANG GUITARA
neng Renato B. Alzadon
Poeta Princepe/Poeta Laureado

King kupas nang dingding nitang Bale Matwa,
a nung nu ke likwan, apulu nang banwa,
ing Guitarang Luma, makasabit ya pa,
panenayan na kung talnan keng misan pa
king bakeng tigtigan.... anti ing kanita
kabang kakanta ko ding apulung kanta.

Kunan kesang talnan...., n'ya mu e ku guewa
pota atin sugat a biglang sagiwa,
uling ding apulung dalit a megawa
ela kabud singo ning lipang a diwa
nune bibu nala ning kalmang saliwa....
apulu nong patak ning tinulu kung lwa.

Ing mumunang patak....ya kabud ing butil
ning kalmang pirait ning sumpang dusupil,
Inirug kung mutya tikusan neng sikwil
ing sumpa nang lugud a kaku parikil;
maibug kung mamulang king dusang dirildil
o'bat agawa nang kanaku migtaksil... !

Ing kadua...ing katlu...ing kapat a patak
ila ding taguimpan a mengalamistak,
kalima.... at kanam.... mamyus lang lagapak
king kapanamdaman ning salung masaspak
kapitu...kawalu. ..matni lang gulisak
ning kaisipan kung maibug nang malasak!.

Kasyam...at kapulu...malaing nong aklis
ning kaladwang sasyo dili nang gigyagis,
at itang sambitan , gulisak, at tangis
minutus king diwa king balang igulis
ding apulung kantang misulat king wangis
ding apulung pantyun king paldas dang ugis

Ing meguing libingan ding lwa kung milukut
ila ding apulung kantang mangalungkut
gulut da ding nota karin ko selikut
ding kapanamdaman a kakung binekut
paninasan ku mong eno makalutkut
nung nula misimpan.... nung nu la mikutkut.

Ban keta ala nang mangangas pang talan
king lumang guitarang ngeni tatangalan.. ..
king baneng mituklip pinduan ing miralan
kambe ding apulung kantang makalulan;
ban ala neng latak itang kataksilan.. ....
ing Guitarang ini....dapat neng balbalan.... !

King bayang mamin ngan maspak at malamug
kening lande tabla ...keni ke ibarug...!,
at ding mitalandang kapising misabug
ilang tipunan kung pamatawung dapug
mekad kayagnan nong maduluk at lumbug
detang alala na ning sawing panirug.

Ay! Ali, ali ya dapat mangalasi
ing lumang guitarang bukud meguing saksi,
uling king panaun ding banuang meyapsi
pepakayapan de ing salung mepisi.....
keni naman pusu, ding apulung gisi,
king apulung banua ikua rang mesulsi.

Misan pa, ume kung maglakbe marayu....
king Lumang Guitara makidwang kung suyu.
Ding apulung kantang guewa ming pikalu.....
king keyang pamingat karin ko paki'lu;
uling ing tutu na...., yamung makibalu
king apulung patak ning lua kung tinulu...!

BACAL A PUSU CU
(C) Dr. Udis Sanchez Manalansan-Lord

Pusu cu bacal ya
e biasang malsinta
nia ecu masaculat peociang 'ti queca.

libu libong milyun librung babasan cu
mamasa susulat yamuy'ng gagawan cu
Uling acaquit que colegiong palsintan
ipatalacad que quening pepawasan
bang dinan masanting a quinabucasan
calulung capatad a canacung licuan.

Metung, adua, walo dinalan a libru
Nung oitay'ng cailangan ilang isulat cu
queng balang pagina a cacung gugulis
Daya ning pusu cu tintang gamitan cu.

Aro rugo pala masqui macanian man,
Bacal mang pusu cu
Malsinta ya naman.

JEANNETTE
neng: RBA
2006

King karurukan ning kakung malik-mata
pamanintunan ke amanwan dang sinta.
Ban sang saglit mu man mabawas ing dimla
a makakulaput king bie kung ulila,
at uling ing sinta e ke balu lupa
atyu ne arap ku......panintunan ke pa...!

Kasi, ing atyu king kakung panimanman
ya ing kapalsintang e ku pa ikit man,
mikalugud ke king pamisulatanan
tikda mi ing aldo ning pamitipanan;
a aku muli ku king balen kung tibwan
king ba ke pin mikit ning maki larawan.

Kabang sasadya ku ing dalan kung muli
Mutyang Kakilala, abe keng manyali;
karing panyaliwan byasa yang mamili
nung akung dili ku dakal ing magmali;
darala ning keyang malagung ugali
atmu no kasaya ding balang saguli.

Atme ka-alala....atme kaganaka
pusu na, mitmu yang pamigaganaka,
king pakiwari ku alang pangakabla
tula nang akit nang magkamit kung tula
dapot ing pusu ku bulag yang mistula
makapyak ya karing lingap nang dakila.

Angga king datang na ing mitakdang aldo
at yatad na na ku king kakung panlako,
kabang ining diwa sabik yang tatando
king manayang Eden ning kakung talindo,
ati ne king kakung takde ing Paraiso...
panintunan ke pa....mamun ku pang mako...!

Inyang miras na ku king balen kung tibwan
ken ke aganaka ing dalagang likwan,
paninintunan ku ing tagle nang legwan
at ing alala na kakung lewan-lewan
agad kung sinulat ban keya ku adwan
padala ne kaku metung nang larawan.

Kabang isipan ku ing pakikitan ke
king mitakdang lugal ing kanakung pake;
ing kapanamdaman anting mepirake
bakung pibulayan nung nu ku ta payke
uling akakit ke king aliwang dake
ing anyu ning sinta....king tune nang aske.

Ing sinta atin yang inawa at anyu
mabye yang antimong sampagang masamyu;
inya king pamisip yang mamalimbuyu
ing panalala ning likwan kung marayu,
nung ing sintang mabye keng yang pamisuyu
e ku ne paintunan.....balu ku ne lagyu.

Palako na ku mu inyang dinatang ya
makuyad a sulat a menibat keya;
karing kamag-anak ke pepakilala
itang amanwan kung Mutyang Kakilala
ngaku muli naku pota mainip naya
king pamagbalik ku likwan kung manaya.

At seganan na ing kakung pamagbalik
king mipmung alalang kaul a matalik,
at karing pisni na karin ke linalik
ing umang menibat king pusu kung sabik;
uling talus ku na...subuk ne lagitik
itang pamisuyung e na lubak tigik.

"O' nanu, ikit me?" Ing agad kitang na.
" E ke pekikitan", pekibat ku keya
Kasi, aisip kung aliwa pala ya
ing panaguimpan kung tula at ligaya
atyu paka keti kaku ya manaya....
ya ing pepadala ketang larawan na.

At mipatiman ya---mayumu lang timan--
ding ngeni ikit ding kakung panimanman,
pablasang ing sintang metudtud maniaman
migising ne ngeni king kapanamdaman
ban manibat ngeni at king kapilan man
nung nu ya man karin----karin ku mu naman.

Dakal no ding banwang kinusad malale
atyu king siping ku....yang maka-alale,
at e ya kinupas kayapan nang tagle
pati karing adwang supling ming kesale...
katapatdapat mung ampangan keng gale
ing malagu pusung......kayabe ku bale...!

NENG MUMURAN
by: Rheybert M. Montoya

Anti daku mong duduyan istung kakung daramdaman
Ing patak na ning uran king kalawangnan a bubungan
Kayabe na ning sigla detang tugak atsu laysan
Nanan me mo ing pinikpik, eku migising masilab man.

Tsup ning angin karing awang manyaliksik karing takde
Sasagitsit lalam bale king pilatan da ring lande
Asmu kanyaman mamalulktut, king paka umang a dase
Kambe mapali mung inawa, at ning lugud mung dalise.

Agyang nanu mung ulam ing iapag ketang dulang
Misip kang peka payak, nanyaman ya neng mumuran
Lalu na nung itang asan makisabo kang ilupan
Mipawas kang butig-butig, enaka bisa mang tuknang.

Inaptas talbus kamuti agyang ibabo me mu king nasi
Burung asan king garapun igisa me king kawali
Malulut biyabas a menabu ketang baguk me itiltil
Ternuan meng derang tuyu, malpang tinun ing kaparis.

Deni ring bage pagnasan neng marayu ka king tibuan
Makipagobra, maki-abe king libutad ning aslagan
Aldo--bulan-- a mabagal, imbut maybug panabitan
Ban ting upayang makabalik king mal balen a ibatan.

Tumangis kapa banua, bulus mabinit ing kekang lua
Karing duldul ampong kildap, iapse mu ing kekang mua
Diligan meng alang patna karing marayuput mung biga
Ding manablang a asikan at ing marurunut kung diwa.

ONLY YOU
neng RBA

Only you, ika mu, ala nang aliwa
Musang babye kule king kupas kung diwa;
ding apulung patak king bye kung malugma
pepalangi no ning malambis mung uma.

Only you, O' My love, you are my destiny
Alpa ka't Omega kening bye kung ini;
munag kang mitabi king kakung palsimi
dulum kang kalukup king dimla ning bengi.

Only you, O' my love, ing babye sikanan
king bakung guyapgap king kayaktanganan
ing malyap nang bagyus ning pamanaguimpan
matunud yang ayup king kekang kasaupan.

Only you, O' My love, ing matibe gabe
king ban e ku mityab kening pamaglakbe,
mamyus man ing alun ning dusa at lumbe
agyu kung baltangan ngening ikang kambe.

Only you, O' My love Mutya ning Parnaso
mamu nang bulaklak ning kakungParaiso
Venusa kang maslag king kakung Olimpo
angin ding bagyus ku bakung misulapo.

O' my Love, O' My love, mabye ku ulimu
king pusung sugatan lunas kang balsamu;
ing tronu mung maslag king pusu atiyu
Reyna kang kaku mal...., my one and only you.

"Only You"
neng RDM

Ika mu at ala nang aliwa,
Ing babie kule kening kakung diwa.
King patak ning uran ning malamlam a lua,
Katumbas ne murin ning kakung ligaya.

Ika mu, ika mu, kakung kaluguran,
Amanung salita ikeng Kapampangan.
Munag kang masala neng abak ning amyam,
Dimla na ning bengi king kakung panamdam.

Ika mu, o sinta, sinta kung balayan,
King kakung guyapgap ning kayaktanganan.
Malapad nang bagyus ning pamanagimpan,
Bisa yang ping sigpo king pangayalipan.

Ika mu, balen ku kening kakung takde,
Ing iguyud daka king makabang lakbe.
Sigpo na ning alun ning dusa at lumbe,
Agyu kung talasan ngening ikang kambe.

Ika mu. wa ika, bansa kung liguran,
Ding bayani tamung dase't pikusayan.
Ing dayang malutu a keka pepabal.
Era ka paburen angga king kutkutan.

Ika mu, balen kung banten kang timawa,
E mi patdan mata ding keka magnasa.
Deting manungkulan a keka payasa,
Pansariling imbut karela mawala!

OCTOBER 23, 1988
neng: Rheybert Miranda Montoya

Masikan ing uran inyang yatad daka
Bainti tres ning kapulung bulan na ning banua
Mamagus king pisngi ing malat kung lua
Lua na ning lumbe o indu kung mutya.

Mikyabe ing panaun king ke alang tula
Na ning ka orasan a migkaymut saya
Menuldul, binagyu, migpaldas ya ing banua
Pati ring angeles tinangis, migdusa.

Busal na ning lungkut kinalbit ing tula
Mesaya ya ing pusu tiniman kung bagya
Ikit ko ding tau mekapal lang bigla
Eda pigagap man malan dang mabasa.

Bagyung Unsang ita eku akalingwan
Buburak, makalbug ing kekang kutkutan
Dapot e metinag ing kapibabatan
Ding mekipatnugut tiktak king karakal.

Sidsad daka indu anggang katataulian
Ding taung tigkil mu king kekang kanuanan
Binye da ing pugue, keka da pigkalam
Anggat mabibie la edaka kalingwan.

Balu ku king pusu da luid ka o ima
Eya meging sangkan ing angin at dimla
Menibabo ing kapasalamatan keka
King sablang kayapan pepakit mu karela.

Patune ngan iti nung makananu kang mikiabe
Karing kakaluguran ampong siping bale
Iniang kapanaunan enaka pa kinwa bie
Ning Mayupaya, nuan ka! king keyang lawe.

I Can't Stop Loving You
Neng Renato B. Alzadon
Poeta Princepe/Poeta Laureado

Ngening ala na ka kening kandungan ku
at makahilig na king bayung irug mu,
buri dakang mapda king katandanan ku
king banang miwaglit ing dusang likuan mu;
dapot nanan ku man e bisang magbayu
ing lugud ku keka........I can't stop loving you...!

King kaisipan ku, bat e ko abaklas
detang maligayang aldo tang milabas;
kalupa ning alun king pampang kakablas
makanyan ing sintang kening salu gaglas
inya makanyan kung aminan a gagkas
I can't stop loving you..... angga man king wakas.

Nung ngara ing sugat ning pusung magmalun
apakayap ne nyang amyam ning panaun,
tinyup na la detang libung gatpanapun
e pa mikalunas ing maplas tang napun;
mekad...., mangga na king bangke kung matambun
I can't stop loving you..... king lalam ning gabun.

Yaring king pamisip e na ka mabura
at kening pusu ku e na miwaglit pa,
kupas mung larawan kaku neng idala
at ikanta ko pin ding kekatang kanta
mekeni na pin man......tutal, makanyan na....
I can/t stop loving you....angga man king angga....!

Mekeni...! mekeni...! Mekeni kanaku
e na ka darayu.....magbalik ka kaku...!
King kabilugan ning kakung pangatau
ing lablab ning sinta bustan mung mitau
uling balu ku na....alang pamagbayu
anggang kamatayan....I can't stop loving you.

MIRYENDA
Neng: Ronnie Juanta

Quetang kanto, lele escuela.
Atin metung a carinderia.
Aldo-aldo neng gatpanapun
Karin kami ngan mag miryenda

Miyaliwa ining tinda ra
Puto sulot, puto panara,
Cuchinta, sinantan , sampelot,
Tid-tad at arroz caldong lelot.

Deng suman banos, suman bulagta
Tibok-tibok, mapaling bibingka.
Pansit palabok, pansit guisado
Istu na yan abe, mabsi naco

Ay talagang manyaman
Miryendang Capangpangan
Tik-tak ya linamnam
Eka sumawang tatakman

Pritong okwi at pepalto,
Halo-halo at boboto.
Kalame nasi, kalame ubi,
Lutong Instik bochi-bochi

Dapat paynawa nacu man
Queng canacung pamamangan
Pota datang na ing bengi
Enacu pu mag hapunan man

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00822

Page Updated Thu Oct 12, 2006 12:45pm EDT