LIBRARY OF KAPAMPANGAN POETRY , Page4 - compiled by Ernie C. Turla, curator - Languages

CONTENTS:

1. Bayung Pinduan - Renato B. Alzadon
2. Ing Asu at Ing Ubingan - Renato B. Alzadon
3. Atsing Aida - Renato B. Alzadon
4. Ing Bigbugan Ding Tulisan - Renato B. Alzadon
5. Kulumparit - Renato B. Alzadon
6. Mimosa Pudica - Tony M. Pena
7. Ing Maputing Liryo - Renato B. Alzadon
8. Duldul at Paligi - Rolando de Jesus
9. Ing Duat - Rafael Maniago
10.Saresa - Renato B. Alzadon
11.Ing Alamat Ning Motorsiklu - Ernie C. Turla
12.Alegorya Ning Motorsiklu - Renato B. Alzadon
13.Ing Apalya - Rafael Maniago

BAYUNG PINDUAN
Neng Renato B. Alzadon
10/16/05

Kalupa kung kapampangan ken king bebe na ning ilug
Kening Akademya tamu, subukan yu pung tambulug;
Uli pung nung damdaman yu ing sasabian ding tagalug
Dugong Aso! Dugong Aso! Magpanting ko pu balugbug.

Ing lalto pu king bala mu---nung tutu ing sasabian da---
Mekikampi la king dayuan ding nunu yu king minuna;
Balamu mekikampi la ketang dayuan a Espanya
At mekikampi la naman king dayuan a Amerika.

Ita pu ketang minuna-----ing dapat arapan tamu
Aliwa ing Lumang Pinduan, nune ing Pinduan a Bayu.
Uling ngening salukuyan 'tin linub king kekatamu
Dayuan nemang makamate king sisuan tamung amanu.

E makalingad kekayu, ing Tagalug a salita
Linub ya king kekatamu, ya ing dayuan a manyira;
Ing amanung kapampangan makanian yang mapupuksa
Nung etaya pu paglualu, lumbug ya pung anting bula.

Pabustan yu ne man waring lumbug ing amanu tamu
at kumampi ko king dayuan, Tagalug a Bayung Guinu?
Nung makanian ko pu daptan, salang ko karing maglualu---
Ing lunto pu king talagang tune kayung dayang asu.!!!

Oini pu ing Bayung Pinduan. O' kasampat napin sana
Nung ing isulat tamu ken: Ing Dayuan Tinabi Taya!
Alang lunto dayang asu king bilungan ning istorya---
Luid ya ing amanu tamu---at luid ya ing Akademya!

ING ASU AT ING UBINGAN
neng Renato B. Alzadon

Aldo kung beitan kanita, anak ku pamung malati
Atin yang binie Y Tatang, makasaku neng inuli,
Inyang busni ke ing saku kwa yang atmu na kaputi
King uli na ning kule na inya inaus keng "PUTI".

At kabang daragul naku Y Puti man daragul ya
Yang parati kung kayabe neng maglakad ku king mula
Tuki-tuki ya kanaku neng maniradol kung mangga
Ampon neng pasulapo kung burarul karin king lawta.

Misan, ugtung aldo tapat, memaltang ke king asikan
Tinuntun ke king pilapil a ausan dang " Pilatan"
Karin na kami inabat nitang taksil a ubingan
Makatas ya ing buntuk na anting manamun labanan.

Mipaurung ku king takut! Kinaung ya ing asu ku!
Ining taksil a ubingan Obat lalapitan naku;
Kanian na ne man lundagan nining matapat kung asu
king babo na ning pilapil milaban lang emu nanu.

Dapot sawing kapalaran! King sagildap a pangimut
Ding pangil na ning ubingan ilang kang Puti kinutkut;
Sinaingsing ya ing asu dinurut yang sasayikut
King kamandag ning ubingan mete yang makabaluktut.

Kiniakan ke ing asu ku a pete na ning ubingan
A kaibat nang mekamate mine ya king kasukalan;
Kitkut ke ing kakung asu ketang gulut ming mulajan
Kabang bie ku ing depat na ali ku na akalinguan.

At inyang meragul nakung gagale nang poesia
King Radio ning DZAB kapampangan a Programa;
Ing pangakapampangan ku tindag na at makilala
Lalu na kilala da kung anting metung a Poeta.

Dening taung mapanuksu kanian dana ku man tuksuan
king taguring dayang asu makanian dakung ausan;
Balu kung ining taguri e masanting daramdaman
Dapot sindu ku pa murin ing gagale kawatasan.

Uling ing taguring ita yang paganaka kanaku
King binie nang katapatan nitang kakung mete asu;
Kaku, ing kabaldugan na katapatan yang masolu
Itang king kaluguran mu O' paimate kang maglualu.

karing kakung kaluguran mesubuk ku pamakyabe
Nung aku mu tajimik ku eku taung palpipate;
Dapot nung ing kakuyug ku akakit kung abusuan de
Sulak ya ing dayang asu akit dakung makipate.

Inya ngening akakit kung ining mal tamung amanu
Ya ing buri dang tuktukan ubingan a manabusu;
Eya patugut kakaung ing meyaus dayang asu
Ila ding daramdaman yung poesia at basultu.

Balu kung ing panyulung na ning amanung kapampangan
Ing dalan na e malinis, pilapil yang ma-ubingan.
Ding ubingan manaya la king oras a karampatan
Salabat la ban manyira, manuktuk la nung kailangan.

Sakali datang ing aldo king ubingan matuktuk ku
king kamandag malasun ya ing lagyu ku't pangatau;
E bala nung mipampan ku karing mata ra ding tau
Dapot mate kung maglualu king liguran kung amanu.

ATSING AIDA
Neng Renato B. Alzadon

Kapampangan! Kapampangan! Lumawe ka banda keta
Lon me yang Mapyang Babaing alang patugut magobra.
Luid ya ing amanung sisuan, king ulining sipagan na,
Mikaka-atin neng laman ing kekatang Wikepedia.

Pagmasdan ye, e patugut, pane nong pangalutkutan
Ding katumbalas ning English king amanung kapampangan;
E patugut! E patugut! King daraptan nang makanian
Bayani neng makalihim ning amanung kapampangan.

Sinulat yang poesia Pintasan de? Ena bala!
Dapot eya pepatugut, sindu na ing pamanggawa.
Inya naman ngeni, oyan, kalimpi re ding makudta
Ding Tonka na ampon Haiku makalimbag lang e matda!

Metung pa, paninasan na ing makapilual yang libru
Ding kanta nang peka-iyas ning palsintan tang amanu;
E binang pagmumulalan kening sipagan ning tau
Nung mangipastil ya namang Komedya ampon Kuriru.

Nung misan, deng guintu pusung mayap a kararaptanan
Ila napin mang keng suluk, makalele, makapampan;
Ing kasuyuan a yampang da ena balu ning balayan
Inya ilang e magkamit king matampa rang dangalan.

Nung akung atin upaya, sabitanan keng Medalya,
Ining agyu kung isuyu pamanyulat mung poesia;
Inya nung ding poesia ku sakali ingatan yula
Pakaingat-ingatan ye ing poesiang Atsing Aida.

(Malugud yang miyampang ing poesiang ini kang Aida Aguas)

ING BIGBUGAN DING TULISAN
Neng: Renato B. Alzadon
10/14/05

King dalan na ning Jerico, nganang Jesus, inyang misan
Atin pin metung a tau a sebat da ding Tulisan;
Kinua do ding kayang pera, linubas de at bigbugan
Kaibat likuan da nya kabud makalangan bebe dalan.

Itang minunang dinalan Talapanaral yang Judyu
Ing makalangan king dalan bitasang ene sikasu;
At ing tinuking dinalan Judyu yang Talapanlualu
Ene mu naman pinsinan ining sugatan a tau.

At ing pangatlung dinalan, iti...Samaritanu ya.......
Mababa ya uring tau king uli na ning daya na;
Tin yang dayang misamutan uling detang pipunan na
Karetang lajing e Judyo sinuyu lang mekiasawa.

Kabud ikit ne king dalan ining taung makalangan
lingunan ne, layun dela ketang metung a tuknangan;
Sabi na king Tala-ingat ingatan me ing taung yan
Nung atin pang lunto gastus, balikan ku, at bayaran.

Itang taung makalangan yang kabas na at kayarle
Ning Amanung Kapampangan bebe dalan makaungle;
Ding Suguing Talapanaral kapampangan lang metunggue
Ere man dugu sikasu ing amanung mamamate.

At ing katulad na naman ning Suguing Talapanlualu
Ila pin ding mayakayan, ding pantas a tituladu;
Agya man akakit daneng lele dalan maghingalu
Ere man dugu pinsinan ing sugatan dang amanu.

Kabas ning Samaritanu ding e lusuk Kapampangan
Ila ding magmalasakit kening amanung sugatan;
Ila ding misaup-saup king pagal at king gastusan
Ban ing melunung amanu maulu ya ampon sikan.

Ume ka, pakiapusan me ing dapat a anti ita
Nganang minutus ning Guinu ketang taung kasabi na;
Ing dapat Samaritanu sukat mu king apusan ya........
ING BIGBUGAN DING TULISAN, meko keni, saupan taya.

KULUMPARIT
(Dikut a Malamarine)
Neng: Renato B. Alzadon
October 16,2005

Ibat king anak ku, kakilala kune
Dikut-Kulumparit o Malamarine;
Pikakasaman yang dikut king marangle
Uling masuksuk ka kabud dilpakan me.

Inya makanian deng pamaligtad yamut
Ampon sisilaban kaibat ning papalut;
Talagang imbut da ding tau king Laut
Ing patdan de lahi ing Marok a Dikut.

Inyang dagul nakung munta Amerika
Ing Marok a Dikut ikit keng misan pa;
Dapot ene dikut.....! Ing lawe da kaya
Metung a tanaman.... malagung Sampaga!

Karin ya king siduan king Marmol nang Pasu
Ninu man manakit pupurian de lagu;
Pemalayawan deng "Malambut a Pusu"
Kasi, tagkilan me, magtikum yang duku.

Ining Kulumparit o Malamarine
Tin yang Guintung Aral king kekatamung bie;
Ining kasaman dang sukal a metunggue
Sampaga ya palang maulagang bague.

Eme pakalati yang taung kalulu
Agyang Kulumparit ya mu king lawe mu;
Pota nung akua yung mikit pasibayu
Sampaga ya pala......Marangal yang tau!

MIMOSA PUDICA
(Neng Tony Mercado Peña)

mimosa pa kaya ing palagyu keka
nung piblasan dakang suksuk ala nala
nung mawala nala mataram mung suksuk
sutlang alpombra kang keka ku manyuluk

pamisalubung da ring kekatang mata
aku ing merine e mu ayalata
aku ing merine bigsu ku melaso
malambut mung lawe tinaglus yang sasyo

metagkil kang ditak obat sinaguli
dinuku kang agad selikut me'ing ayli
tunggen daka lagyu anting lakambini
ugaling mahinhin katutubung lipi

bakung e mansakit king suksuk manyungkit
manyapin makapal talnan dakang pilit
sanung makarine sabyan mu kanaku
memaltuk mung suksuk o banglung mebunglu?

mimosa, e ka mu basta singo dikut
na maski nukarin tutubung malikut
libutad ning kekang pusad a makiput
metung yang sampaga karin ya susulput

e ka malamarine keka manwala ku
nune akakit kung mabaya ka yatu
ngeni tanam daka king metung a pasu
sesen dakang lugud bukal-ibat pusu!

ING MAPUTING LIRYO
Neng: Renato B. Alzadon
10/20/05

Lalam nang likupan ning Bale-Salamin
Karin ya ing metung a Modernung Jardin
Timpladu ya pali, danum, gabun, angin
Pili lang tanaman detang atyu karin.

Ing bining menibat pamu king marayu
King Modernung Jardin, karin ya tinubu;
Inyang dagul ne yan at maspak ne buku
Liryu yang Maputing sakdal king kalagu.

Mikatagun naman 'tin kapagmasusian
Ing Maputing Liryo mayagtal ya kanian;
Uling king leguan na ya ing karampatan
Maguing palamuting mikana king siduan.

O' karing gamat ning mayap a Florista
Linto yang balamu sikat a artista;
Nung 'tin yamang abe ketang pomang ita
Kontra-bida la mu at dakal a extra.

Ing kapagmasusian mengari yang sine
King Maputing Liryo dakal lang menalbe;
Ninuman manakit king leguan nang tagle
Pupuryan deng anting Reyna na ning Arte.

Dapot kalabas na ning kapagmasusian
Ding taung menalbe mako nala naman.
Mapilan mung galo gamat ning orasan
Ing Maputing Liryo ala ne king siduan.

Insamang Sampagang meyagtal king tangke,
Agyang sablang lingap gisanan mung ibie,
Diligan me man king lua mung sasagese,
Malanat ya mu rin, mistula yang banke.

Ngening ala nayu king lugal nang siduan
Ing Maputing Liryo nuta ya dulapan?
Oitang makatambun ketang basurahan
Inugse ra nyamung kalupa ning basan.

Aral:

O' Maputing Liryo , emu pakakatas
Malagu ka ngeni, nanu kata bukas?
Potang king ketasan tagusgus kang kuldas
Ing manaya keka..., Kutkutan yang Paldas!!!

DULDUL AT PALIGI
(Nang Tiakbong 10/20/05)

Danum a malino, uran ibat babo
Metung yang makabie, dimla makapasno
Makangangang gabun, mengabtak keng langi
Manenaya kaya, danum a tulandi.

Bayu ya man datang, uran a makabie
Bigang mangaputi, tuling la pa kule
Duldul a kakablas, anting mangulait
Ik'ong talatanam, e ko sa magpait.

Makanyan mu naman keti Akademya
Duldul king aslagan, y Renato ita
Banda king albugan, Paeng Maniago ya
Duldul lang mamaksing, yagkatan ra kata

Oyan na ing anggi at lintik lintik na
Mabalisa tamu, kuanan ta ne'ng pala
Gawa ta'ng paligi, manibat king bana
Makatas a gabun, mirakayan mu sa

Eko mamirapal.....abe ko, saguli
E wari atin nang malualas paligi?
Ninu'ng simbitla mu, y Ernesto Turla?
E lalung makayan, nung atba atbanan la?

Sakildap, saguli...dakal nang malyari
Beba'ng sarili, gewa nang paligi
Gabun a meyangyang, kayang pasayangan
Datang ing panaun, makinabang ta ngan.

"ING DUAT"
neng Rafael Maniago

Tinanam kung duat, king gulut kung bale,
Saka ke bekuran, a nung nu ke kine;
Kagising kung abak, silip-silipan ke,
Tunggal ditak nemang, lulto keang tangke.

Milabas ing aldo, dumingu at bulan,
Ding tangke melabung, ding sanga salapang;
Durukwan kiang lalon, panaun miralan,
Tatalangan ku ne, ing duat kung tanaman.

Inyang memunga ne berdi lang malati,
Kabang lululut la uling la mo anti;
Nung lawan mong bunga, matuling yang pisngi;
Mikakunu memang uman a parati.

Dapot king tuling na, ing bunga ning duat ku
Lasa na manyaman, mayumung-mayumu;
Tatalangan de ngan ding kakaluguran ku;
Bisa langang takman, bisang makisulu.

Neng misan ing kule, balang panlalawe,
Eme gad abalu, anggang eka ume;
King kakilub-kiluban, libutad na aske,
Pusu yang lulugud, ing tibuk na ning bie.

SARESA
Neng: Renato B. Alzadon
10/21/05

Dakal nong tikman kung maniaman a bunga
Karing tanaman na ning kekaming mula;
Ing pekamaniaman king kakung panlasa
Yapin ing malulut a bungang Saresa.

Sakdal ya kayumu! Sakdal ya kasampat
Dalaga ya waring irugan mung tapat;
King bameng akamtan ing tangu nang ingat
King keang kamalan mangangas yang mukiat.

Nung bisa kang mupul king mayumung bunga
King pamanukyat mu maingat ka sana;
Nung bugasuk ka mu kapaklian kang sanga
Uling yang Saresa matbud yang talaga.

Karetang mumukiat a pabisu-bisu
Dakal nong melagpak king gabun menabu;
Uling yang Saresa eme apatangu
King kabugasukan at pamagpalalu.

Yang kabugasukan at gawang sapala
E mamungang mayap keti king masala;
Ugaling sapulyut at pabigla-bigla
Ing kararasan na mapait yang kalma.

Karetang makatua kanaku yang dimdam
Diparan yang payul king diwa mitanam;
Yang kanung bugasuk a kasuklam-suklam
Potang masuksuk ya at mu na kalalam.

O' ining Saresa king pakiwari ku
Tin yang babie aral kareng baintau;
Nung bisa kang magtal keng bungang mayumu
E ka magbugasuk king pamanukyat mu.

ING ALAMAT NING MOTORSIKLU
by Ernie C. Turla

Ating byasang talasulat / deng "journalists" a awsan da
Oneng pikakasaman la / careng taung lilimbag da
Anti murin ating taung / misabak keng politiku
Nung nukarin e mamako / ing api na ning piligru.

Ngeni, deti payapa la / king ligaya babo banwa
Kambe ra ring kalupa rang / sasaup sa keng balen da
Pepatudtud da no karin / ba nala mung mipaynawa
Neng pisyag da keng tapang da / ing katutwan a balu ra

Obat kaya peparimla / rala sakung dugu reti
Dakal la pa sa serbisyung / abye nung atyu la ngeni
Pero neng mirate nala / hustisya na ing adwan da
Ken mu mang bage anti 'ita / mekad makuswelu nala.

Nung balik ta ing panaun / at tukyan ta ing oras da
Lalakad lang alang pyadyan / kaybat na ning aldo obra
Motorsiklu keng gulut da / e ra pansin lalabas ya
At ing tawli ra nang dimdam / ing memaksing keng buntuk da.

epilogue:

'Nya nung atin kayung balung / babayaran a atrasu
Keng gewa yung e ra buri / maski na pa matulid yu
Kabud dimdam ye kalugkug / keng gulut yu'ing motorsiklu
Balikdan yong makasake / e ko papayagrabyadu

Alegorya Ning Motorsiklu
Neng Renato B. Alzadon

Ing Motorsiklu, king bayang mipulaying masalese
Ding pyesa na kailangan lang masanting a pami-ugne;
Ing Spark-plug dapat sana ing api na pane-pane
Ita sanang e magpalya ban ing makina e mate.

Kailangan ing peka-clutch na mag-obra ya sanang ustu
Uling nung yan ing magpalya kasipitan ta mung kambyu;
Pakasiguruan ta sana king masikan ta mu prenu
Nung eta mu biasang tuknang misapung tang siguradu.

Pelalung malating bague pati ing angin keng goma
Pati na rayus keng gulung kailangan mag-obra sana;
Uling nung kulang ya angin at alang bisang mamomba
Ing kekatang Motorsiklu angga mu king masira ya.

Ing mesabing Motorsiklo ala ya waring keliwan
Kening Akademya tamu king amanung Kapampangan;
Bayang mulaying ma-ayus papunta king pakirasan
Dapat sana balang pyesa ustu la pamitambayan.

Deta pung biasang sumulat dapat sana sumulat la
At detang biasang sumuri dapat surian dala sana;
Deta naman atin E-mail dapat ipadala ra la
Karing parang Kapampangan ban keta abasa dala.

Ding Maestro at Maestra ela sa na mikakunu
Ing amanung Kapampangan pag-imbutan deng ituru;
At detang biasang magkanta iti karapatdapat mu
King ila ding mangikanta karing rimang mangalagu.

Deng atyu keng Politika karapat-dapat king deti
Ing Amanung Kapampangan ilaban de keng dibati;
Deta namang atin pera sumaup la nung malyari
Ban keta ing gasolina king tanki eya kakati.

Pangaras keng pamanimbang ampon keng pamagmanehu
Ing talan keng manibela dapat metung yamung tau;
Balu na nung nuta ibat balu ne ing puntan tamu
At balu neng papulayan ing kekatang Motorsiklu.

Potang ding balang pyesa ning Motorsiklu mag-obra la
Balang metung balu na nung nanu ta ing tungkulan na;
Lunto yang atmu kasanting kalugkug ing Akademya
At ala kang daramdaman backfire keni backfire keta.

Oyan ya ing alegorya, balang metung kekatamu
Atin tangan katungkulan king kekatang Motorsiklu;
Nung magampan ya ing tungkul at alang pyesang palyadu
Magluid ya ing Akademya at ing kekatang amanu.

MOTORSIKLO
neng Rafael Maniago

Kailangan kung makisake king mesabing Motorsiklo,
At nung ali malakwan ku king bilis ning keang sakdu;
Lalu ngening papali ya ing makina na at laru,
Ding kasangkapa' nang tagle, tane layun yang sisigpo!

Ing matikdi tang maestru manibela yang tatalan,
Ing poeta Mang Renato, king prenu at kambyu naman;
I Tony ampong Tiakbong, ila namang maging dugang,
Mekad yaku ing tambutsu angga ketang kabulditan.

Ding Spark-plug ampo retang miyayaliwa pang pyesa
Kabuuang Motorsiklo , lapitpit ing pulayan na;
Deta waring aggang miembo anti mo ning Akademya,
King pamitatambayan, kumulyo ta king ligaya!

Ninu mo reng sasalabat, nung bisa lang maparalis
Sagkan deng kekatang saken, king bulusuk tamu' t bilis;
Mangapakli la ngan butul, saka la mangalapiris!
Mamanatras la mu rin den, tunggal-tunggal lang taimik.

Ing puntu ning kakung tema, ding amanung mesaglawe,
Akademyang Kapampangan, Motorsiklung keang aske;
Inistart ne pung Mang Ernie, anti ku mung maki-sake,
Nung bisa kong mangkas ta ngan, tara na pu at maglakbe.

" ING APALYA "
neng Rafael Maniago

Kabang aslaga' ne ning aldo neng abak,
Tenam kung Apalya gagapang neng singkad;
Tataluntuna' nong kwayan kung siniklat,
Panantabe kea, king kayang panukyat.

King gulut ming bale gewa ke pang balag,
Ba neng kulaputan, saka babalibad;
Ding sanga na't tulud kukulate langan,
Tiban kong pemuknul ketang dangwa kwayan.

Nung ala yang balag, gule kung Apalya,
Angga niang kukusad king gabun maratna;
Malwat yang mitigko, bayu ya miyatna,
Nung alang gagabe lumabung kaya?

Kawangis niya naman ning Amanung Siswan,
Ing gule Apalya. Itamu ing balag;
Mamunga yang agad saka ya gumayak
King keketang talan, lalu't e mabalag.

Pakasesen taya Apalyang tanaman,
Saup-saup tamu ban mamayutputan;
'Ta neng pamamupul, itang makinabang,
Ampo ring lai tang anak Kapampangan.

For the next page, click:
http://maxpages.com/poecia/poecia5

For the previous page, click:
http://maxpages.com/poecia/poecia3

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00472

Page Updated Thu May 10, 2007 5:40pm EDT