Table of Contents:
1. Tinulu Cu Lua - Udis Manalansan Lord
2. Palsintang Alang Angga - Udis M. Lord
3. Capampangan, E Mu Cu Quiquiacan - Udis M. Lord
4. Nung Lacuan Mucu - Udis M. Lord
5. Uling Ala Na Ca - Udis M. Lord
6. Nucarin Ne Ing Barkada? - Rheybert M. Montoya
7. Oba't Kaya? - Udis M. Lord
8. Queng Anac Cung Americana - Udis M. Lord
9. Mana Cang Apu Cu - Udis M. Lord
10. Pengacu Mu Cacu - Udis M. Lord
11. Alipinan Mucu - Udis M. Lord
12. Pamagcunuari - Udis M. Lord
13. Qng Bie cu - Udis M. Lord
14. Diamanting Palsintan - Udis M. Lord
15. Bantiti - RBA
16. Dayang Asu - Udis M. Lord
17. Ing Panagkat - Rheybert M. Montoya
18. You don't Know Me - Renato B. Alzadon
19. Ding Tugak - RBA
20. Pipit - RBA
21. Ing Ayup -contributed by Dr. Joyce
TINULU CU LUA
(C) Dr. Udis Sanchez Manalansan-Lord
Memulut cung pale, mapaling marangle
Danupan cu dungus asna cu carinat.
Matuling, mayayat catsura cu cano
Uling calulu cu pemusitan dacu.
Tinulu cu lua pero selicut cu
Sinumpa'y pusu ing micwalta cu.
Caluguran matua licuan co ngan dugu
America minta tagumpe penintun.
Aldo't bengi mengadi, megobra, megaral, memasa
Meguing Doctora cu, melagu misapla.
Itang luang tinulu quetang anac cu pa
Iyang inspiraciun cu n'ya ngeni misapla.
Palsintang Alang Angga
(C) Dr. Udis Sanchez Manalansan-Lord
www.drudislord.com
9/8/06
Balu cu ing Guinu pepapuntan nacu,
quening yatu bang palsintan daca.
Masqui na ing bulan matda ing sala na,
masqui anggang batuin magdalumduman la
palsinta cu queca, mal co, alang angga.
Ala cung isipan nung ali mu ica,
ampo itang sumpa mu lalam da reng mangga.
Ing masalang bulan, kikindat a batuin memamagselos la.
Yumung pangacu mu, a peniwalan cu,
sinicap quing caban, melaslas pusu cu.
Masqui migtacsil ca, eca acalinguan.
ecu mipatudtud, ecu macapangan.
Uli ning calicsing acalinguan mucu,
ampo itang sumpang sinitsit labi mu
Minagus ing lua cu iniang iquit daca,
cabang panuman me ing bayu mung sinta.
Ibinie me caya singsing binie cacu,
dirinan meng rosas, ampong susumpa ca.
Binie mu ngan caya ing lugud mu cacu.
Caulan mu cu! Gagapang cu! Irog malunus ca!
Palsinta cu queca susucdul quing banua!
Masqui na pa ngening balu cu tacsil ca.
Pait, laram ning sumpang lugud mu canacu.
Lawen, macanganga'ng, darayang, melaslas pusu cu
Mal co!, Nung eca mibalic, nung emu cu uman,
ala neng alaga ing mamamateng sulu ning bie cu.
Palsinta cu queca, mal pa queng daya cu.
O irug co, lawen muy'ng papatac a lua cu
a balamu uran, malacas a bagyu!
a e bisang tucnang, masqui nang gawan cu.
Masqui na manuldul, masqui na maquildap,
Masqui na salicut matuling a banua.
Ining balang pintig pusung biniag mu
Ausan parati palsintan'g lagiu mu.
At nung eca mibalic quening candungan cu.
aduan cu quing Dios a cuanan na nacu
Sulapo cu quetang banuang pibatan cu
carin cu tangisan ing pamagtraidul mu.
Ing pecatauli mu rugung aduan cu,
A isipan mu cu neng aquit mey'ng selosang bulan.
Ampo neng damdaman duldul ampong uran
paramdam, papaquit lumbe ning tangis cu.
Capampangan E mu Cu Quiquiacan
(C) Dr. Udis Sanchez Manalansan-Lord
9/7/06
Capampangan, e mu cu quiquiacan,
ing catutuan masqui licuan daca,
pusu cu't caladua bandi mu
anggang matda na ing malumbeng inawa.
Nung saca-sacali quelinguan mu nacu,
acu ing anac mung minta America.
Quetang ati cu quen
butiti, matuling, busabus aus da canacu.
Licuan cong menangis d'Inang ampo'y Tatang,
acu ing bunsung pecacaluguran.
Ngeni rugu meangu no bie,
eco pa man iquit carelang cutcutan.
Ngeni ing anggang maragul a yatu,
Dininan deng dangal malucang lagiu cu.
Doctora, "Beauty Queen" pinutung da cacu
Quing saup ning Guinu
meragul suerti cu.
Pero macanian man lungcut ning bie cu,
Anggang e que duyanan malagung candungan mu.
Nung sacasacali mawala ing bie cu,
Capampangan dapat pacatandanan mu,
ing eraca man licuan masqui marayu cu.
Nung Lacuan Mu Cu
(C) Dr. Udis Sanchez Manalansan-Lord
Nung lacuan mucu,
anti moy'ng buri mu,
mawalang alaga, ining bie cu.
Deng ayup a pipit, eno magcanta,
Deng sampaguita,eno mamulaclac.
Mate cung ditac ditac!!!!!
Pero nung manatili ca,
quening siping cu,
magkanta la ngan, masayang pipit.
mamulaclac la ngan, deng sampaguita.
Masqui itang bulan,
ampo itang aldo,
parehung sunlag, queng catula da.
Masqui itang angin ampo itang batis
sagacgac la ngan ampong magcanta.
Deng maputing Angel,
aranaan dacu, ipagkanta ra,
ining ligaya cu.
Dinan dacung pakpak,
bang sulapo cu
a cayabe ra, quing matas a banua.
Pero nung maco ca,
emucu babalicdan,
bang emu aquit
lua cung tutulu.
Dios co, mabungsul cu
Eco acarga,
ing bayat na ning pamaglaco mu.
Nung lacuan mu cu, nung lacuan mu cu.
Eca mamaco!!!!!
Uling Ala Na ca
(C) Dr. Udis Sanchez Manalansan-Lord
www.drudislord.com
Nucarin la minta
deng balu cung canta?
Acalinguan co ngan,
uling ala naca.
At mewalang tonu
ing pamibiebie cu.
Ing cataimican
ecu apibata,
antimong atdung
alduc alducan cu.
Itang pinan ari
mewala ya cule.
ampo itang bulan
bigla yang mebangal.
Ing mabilug a yatu
bigla yang merimla
maniulud quing butul
gagalgal cu panga.
mebalbal ya'yng biyulin cu,
enacu magcanta.
migculung na cu mu
dalumdun ning cuartu.
Ninung lugud cacu,
ngening ala naca?
Ninung caulan cu,
libutad ning bengi,
neng ining pusu cu,
maintun yang cabangal?
Macananu cung mie
ngening ala naca,
cabang icang dili
ing apalsintan cu.
Ob'at mewala ca
nang casalanan cu?
Sinta nanu pa man
patawaran mu cu.
Nucarin ya minta
tula ning pusu cu?
oba't melumut ya
ing malutong rosas?
Lon me melangi ya,
anti moy'ng pusu cu
a e bisang mintig
uling ala naca.
Nukarin Ne Ing Barkada
neng: Rheybert M. Montoya
Kanyaman ganakan panaun milabas
Masayang pinandit king diwa kakablas
Kekatang piyabe king lalam ning biyabas
Lele ng lambale nang indung matimyas.
Agyang manutang mu, atin mu sang alak
Ban atin tang pisulu, king aldo masampat
Bengi ning Sabadu tumoma tang ditak
Ban king kabukasan king misa ta gayak.
Pare idurut me, basu maglumut ne
Nandin pamu wari, pisasamsaman ye
Obat ngening tawli, marok nako lawe
Kening pakapitsil, ampon king tatage.
Pilan nang pinandit aldo nayng bilangan
Mabawas tang metung a kakaluguran
Kumpare tang Raymond munta Afghanistan
Kambe ning peligru niting sapalaran.
Ing metung mu naman kekatang kayabe
Manakgat naman king Porac mamalae
Ban dakita't iuli, sinta ng babae
Bilang asawa na, king bie kayantabe.
Tunggal ditak mababawas ing barkada
Pauli ning sangkan a e ayagwanta
Metung na kareti ing pamakiayasawa
Ampong obligasyun king kekatang pamilya
Makipustahan kung ena na kawangis
Ding adwa o atlu nung eno katangis
King lungkut at saya ning balang pinandit
Alak akmulan ya king batal gugulis.
Deni ding realidad ning bie keti yatu
Alang manatili nune mu'yng pamagbayu
Ali anggang-angga agawa ning tau
Antimong panatilyan, ing gawang bayntau.
Makalumbe mu ping pigunam-gunaman
Na etana abalik ing napun mitanam
Bagkus ing malayari tanamung gampanan
Ing pakadiligan, yamut pamikaluguran..
Oba't Kaya?
(C) Dr. Udis Sanchez Manalansan-Lord
www.drudislord.com
Oba't kaya miquit cata pa?
Oba't kaya pilsintan daca?
Oba't panintunan cu pa'yng lugud mu?
Samantalang tacsil ca!
Oba't apibata mucu
cabang ing anggang mal cacu
binie cu queca?
Oba't piglaraman mu cu
bakit, bakit, bie co?
Ngeni neng damdaman quey'ng canta ta,
sugat ning puso buclat na.
masqui nucarin cu pa munta
tuquian tuquian nacu.
Deng galapac da reng mamialung a anac
deng banglu da reng bulaclac
ing lambing ning alon ning aplaya
ing uma da reng aliwa.
ila ngan, ila ngan ede apabiayan
ing bangkeng puso cu
quelinguan tumula.
Oba't panintuan cu pay'g lugud mu,
samantalang caracal da reng tune malsinta cacu?
oba't e biasang mamintu ining pusung binandi mu
quing utus na ning buntuc cu
a calinguan da naca, tacsil ca canacu.
bengi't aldo panalanging cu quing Guinu
subli na sana ing sinta mu cacu.
baquit, baquit ala ca pa?
macananu caluat? macananu caluat?
ing dadaing a pusu cu mangiac ya queca?
oba't caya miquit ca ta pa?
oba't caya pilsintan daca?
oba't caya migtacsil ca,
queng puso cung sawi?
Queng Anac Cung Americana
(C) Dr. Udis Sanchez Manalansan-Lord
Nung sabian da queca
eca magtagumpe,
tacpan mong balugbug
eca maquiramdam.
Pacatandanan mu
indu mung ibatan
mibait maluca
ngeni doctora ya.
Paquit mu carela
tatag mu't tenacan
Mericana ca man
dayang capampangan.
N'ya nung sabian da queca
eca magtugumpe
tacpan mong balugbug
ampong galapac ca.
Mana Cang Apu Cu
(C) Dr. Udis Sanchez Manalansan-Lord
www.drudislord.com
Maburac, baluctut, macaba ya cucu,
ubingan yang lasun a calacalicut,
uling e megaral, malucang indu cu
Quimcam ing mana na
gabun nang Apu co.
Mequipus ya'y "nang cu
ampong capatad cu,
canita apagaral
dacu queng colegio.
at lugud na ning Dios
meguing doctora cu.
Timan timan ya pa
arap ning publico,
era baluy'ng ganid
matalas ya cucu.
Ngeni dimanda que
bang acutut cula,
maburac, baluctut,
macaba, marinat a cucu.
Lima na queng banua
ini queng husgado,
metua no't saquitin
dening capatad cu.
At detang aliwa
meangu no rugu bie
era dugu ticman
mana cang Apu cu.
maburac, baluctut,
marinat ya cucu
itang cayang iqui
paspas paspas ya pa.
Datang ing panaun
a pututan co ngan
baluctut mung cucu
pati pay'ng iqui mu.
Pengacu Mu Cacu
(C) Dr. Udis Sanchez Manalansan-Lord
Pengacu mu cacu
acu muy'ng lugud mu
ibinie que queca
anac a pusu cu.
Pero penyacmal me
ampong teguracan
licuan meng daraya
at managulele
Ngeni balu cu na
anya guewa mu ita,
atin cang bayung mal
a capalsinta mu
liniyag me cabang
mangacu ca cacu.
Dapot macanyan man
susumpa cu queca
enacu malsinta
nung ali ya ica.
Bulag ya'yng pusu cu
e biasang mamili
queng tune manirug
a tapat canacu.
Pero macanyan man panenayan daca,
masqui na pusu cu managulele ya,
Manenayang tapat masqui nanu caluat
Lugud cu queca irug, matatag masampat.
Uling tatandanan pengacu mu cacu
Quing cabang mabie ca,
acuy'ng luguran mu.
Nucarin, nucarin minta'y pengacu mu?
Quelinguang malicsi
sinira ney'ng bie cu.
Napun iquit daca cacaul mey'ng sinta
linawe ca caili bamu mu cung e aquit,
Pero apansin mong malutu cung mata
a quiquiac nang quiquiac mamaus la queca.
Pengacu mu cacu
acu muy'ng lugud mu,
masqui malaram ca
panenayan daca.
Alipinan Mu Cu
(C) Dr. Udis Sanchez Manalansan-Lord
Pacalacasan que ining cacung radio,
bang eque damdaman manangis a pusu.
Yumu ning labi mu tiruanan dacu
paalipin que queca malungcut a bie cu.
oba't namu sinta bigla cang mewala?
emucu man pebaluan a lacuan mu nacu.
Detang pangacu mu
punyal pacatarak,
darayang puso co,
papatak! papatak! papatak!
Nanung alaga ra atlu cung diploma?
nanung alaga ra dening corona cu?
nanung alaga ra librung penyulat cu?
nung emucu caulan, tuparan pangacu?
Dening television, radio ampong diario,
pacapila la ngan manayang interview,
canita acana masayang timan cu,
queng carelang t.V., radio. ampong diariu.
Dapot pamaglaco ra malacas ing uran,
a casinlacas na ning lua cung tutulu.
Ining ulunan mong mebasa que lua cu
Iya mung miki balu
queng calungcutan cu.
Nung ing bayu mung sinta
pagtacsilan naca,
antimo itang guewa mu canacu.
Agcasan mia mu ing canacung lagiu,
agad mulayi cu quetang candungan mu.
Masqui na balu cu ing uma mu lasun,
ipiac cong mata cu, masayang inuman.
Pecalacasan que ining cacung radio
pero kinanta re ing quecatang "theme song."
Maybug cung maloca, ticpan cong balugbug
Eraca atacasan, alipinan mu cu.
Pamagcunwari Mu
(C) Dr. Udis Sanchez Manalansan-Lord
Mabilug ya'yng bulan
quetang 'numa mucu.
Migselus a batuin,
memanialicut la.
Ngeni dalumdum ning bengi
lacad lacad cu.
magdili dili cu mu pero magcunwari,
a cayabe raca at panuman mucu.
sera cong mata cu,.
dimdam quey'ng bosis mu,
at quinaul daca.
Pero ing pusu cu e biasang maglaram.
Balung nay'ng uma mu,
balung nay'ng caul mu,
pamagkunwari mu.
Ngening oras a iti
bang magdili dili cu,
uman me'yng labi na
ning bayung sinta mu.
Binie mu ngan caya
ing anggang lugud mu,
a emu aibie canacu.
E cacu! E cacu!
Masqui ala nacu
ing yatu masaya ya.
Mawala nacu bie,
ecu man atacman
ing tune lugud mu
uling cunwari mu,
ing uma mu cacu.
masqui ala nacu,
maligaya ca murin.
uling casiping ing
sintang lalambingan.
Peru acu rugu
dili diling quiquiac.
itang uma mu cacu,
itang caul mu cacu,
pamagcunwari mu.
Quing Bie Cu
(C) Dr. Udis Sanchez Manalansan-Lord
Quing bie cu,
dacal cu pangutang a alang macabaquibat:
Ot ing pusung tapat e macapanintun
tune capalsintan?
Ot anggang caracal da reng
maburi canacu magdili dili cu?
Ot balang manyuyu canacu manaquit cung ipintas?
Ot deng manyuyu canacu masyadu lang anac?
Ot cabang abugadu ca masanting,
macualta, masuyo eraca apalsintan?
Ot imbes na magpolbu cu
ampong magpacalagu
maswelu cung mamasa, susulat a libru?
Ot deng anggang maquibalu cacu
bala da perfectu ing bie cu?
Ot ing palsintan cung Thor
Adonis, matenacan, masuyu, malambing,
mayaman, tapat, masanting,
binie nang ngan cacu ing aggang buri cu.
Ot ing palsintan cung Thor,
gewa, gewa quiamu.
Quing bie cu, dacal cu pangutang
a alang macapaquibat?
Ing bie cu masqui macanian man
maligaya cu.
Diamanting Palsintan
(C) Dr. Udis Sanchez Manalansan-Lord
Puro, malinis, maquintab,
diamante ya'yng lugod cu queca,
Parating mamagus, anti ya mong batis,
mapali ya aslag anti ya mong aldo.
Ing diamanti cong liim,
kislap kislap ya pa,
pisikap sikap, que queng caban
ning piikan cong puso.
Iquit da cang misan
pero balu cu na,
ica ing buri cung acayabe sinta.
Linub cu quetang cuartung madalumdum,
a mascup caretang libu-libung tau,
masqui na mainge, masqui na mascup pa,
Manintung pusu cu queng suluc iquit ca.
Adonis cung panagimpan,
minugse cang lawe quetang banda cu,
Maligayang pusu, linundag lundag ya,
Emu cu man iquit,
matuling, mayayat
ampong calulu co.
Dapot iquit dacang maquipapamiru,
mecapaligiran dalagang mangalagu,
Paca "high hill" la pa,
At pacalipistic,
Pawas cu papatac, macabalut burac,
at detang bitis cu
ala la mang suecus.
Diamanting palsintan peninapan daca,
bengi't aldo masqui cu nucarin.
Ecu ne abata ining cacung liim
anya inaus que lagiu mung palsintan.
Emu cu pinsinan
emu cu man balu.
Uling ing lagiu cu
quebaluan calulu.
Maracal nang banua itang mengalabas,
Ing aldo sinlag ya, ampong limbug,
Neng cai matas ya, neng cai lalam ya
ing bie ning tau eme asiguro.
Ngening doctora cu minta Amerika,
Misan minuli cu quetang bansa tamu.
Taung memaligid
quintab ning "Jaguar" cu,
tuquian tuquian muya,
pangutang lagiu cu.
Eraca linawe
bilangan dolar cu,
Mata mu mesilag,
diamanting sulud cu.
puro ya, malinis, maquintab,
seli ning dolar cu.
Bantiti
Unknown
Memunga ya ing daladan
a tinubu lele dalan
ing kabalyerong dinalan
peninasan neng agtalan
Sungkitan ne ene abut
basibasan, e ya tumud
inyang ume neng gumulut
kabud-abud nya mebaldug.
Katuglung Ning bantiti
RBA
Atin dalagang makanyan
a kalupa ning dalandan
subukan mung mamanikan
alus e naka pansin man.
E me asungkit keng suyu
abaldug keng paralampu,
potang mamun kang dumayu
kabud-abud nya tatangu.
Dayang Asu
(C) Dr. Udis Sanchez Manalansan-Lord
Sige ausan mu cung dayang asu,
matapang, matapat, matenacan ampong masipag cu.
Masqui na nanu ing cacu aus mu,
Ipagmaragul cu'y daya cung asu!!!!!
Ing purong, maputing, mabanglung sampaguita,
ausan me mang baguc e ya man mamuluc,
Ing catutuan uling mabanglu ya,
Masqui nang aus mu, e maco'y yumu
ampo ing banglu na.
Ania masqui ausan mu cung dayang asu,
Ing catutuan, iyan ipagmaragul cu,
Palague cu detang cacung nunu,
inaus dong dayang asu,
uling queng tepangan, catapatan,
catenacan, casipagan, cabangluan
alang carela maniambut.
Anya, sige, ausan mucung dayang asu,
tigtig yang cumpana, GULISAC QUENG yatu
a yacu ipagmaragul cu
ING DAYA CUNG ASU
Ing Panagkat
neng: rheybert m. montoya
Mangangas ka abe eka mikakunu
Buklat me ing isip yatiat mo ring bagyus
Ing kekang kabiasnan king luid tang amanu
Nung eme gamitan mangalawang yamu.
Iapse mo ring berso ume ka king awus
Sumyo ka king ilang anggat eka payus
Buryan ding watas mu king salu la tandus
Ban ding makaramdam matagkil lang lubus.
O dalitan me ing kaladua kung mau
Sambitlanan mu kung mayumung amanu
Pagdulapan tune sumangid ning yatu
Ing batingo-ngo mu himno ya king pusu.
Ika wari ing anghel king banwa mitubud
Kambe ning harpa mu tumayla kang lugud
Diyan mong kapaldanan tigang kung balugbug
Pantun meng kanawan diwa kung milugmuk.
You Don't Know Me
Neng Renato B. Alzadon/2006
Poeta Princepe/Poeta Laureado
"Hello", ngaku keka, "Hello", ngamu naman
kabang abutan me ing gamat kung wanan.
Migpakilala ku....At kaibat..., ika man
migpakilala kang maki-abe timan.
King kapanwalan mu, ibat na kanita,
e na ku banyaga karing kekang mata,
itang balamu mo..... , king pamibasa ta,
king talagang tutung mikilala kata!
Ay, Ali...! Ing tutu, balu mu ku lagyu.....
Subali kanita, e mu na ku balu.
Ah? Balu mu waring mabilug meng anyu
ing makadambana king kilub kung salu...?
Ali. E mu balung ikang makalaman
king pamibule ku at kapanamdaman...!
Nung makagising ku..... ika ing isipan,
nung mipatudtud ku..... ikang paninapan.
Kalulungkut ku mu, a nung baket kaya
king arte ning sinta e ku mipagpala;
ing sintang mikabat a magdulap laya
e ne man apasyag ning umid kung dila.
Sayang da, wa, sayang da ding guintung saglit....!
Aklis ning kaladwa.... ba't e ku pigsulit...?
Magkang itang sintang e ku man abanggit
katugma ning sintang e mu man asambit...!.
"Goodbye" ngamu kakung mekidaup palad
"Goodbye" ngaku na mung minyabing banayad;
kaibat ginulut ka, abe meng miglakad
itang apili mung kasuyung mapalad.
At king panlako mu yang kambe mung dela
pamikaluguran a binang maula;
nung mampit ku man sa king kekang alala
metung ku mu karing kekang kakilala.
Metung ku mu karing sadya mung kaklasi
at kakaluguran---- makanyan ku kasi,
dapot..., e mu balu king angga man ngeni....
I still love you so....; still... You don't know me...!
Pamasan Pang-anak
Neng RBA
Ding Tugak
Patak...! Patak...! Patak...!
Ing uran papatak...! papatak...!
Mipatakan lang uran ding tugak.
Kokak..! Kokak..! Kokak...!
Magkanta la ding tugak.
Magkanta la ding Manugak.
Tugak.! Tugak...! Tugak...!
Magkanta la ding anak;
mangan lang Batute Tugak...!
Pipit
Neng RBA
Twit...! Twit...! Twit...!
Magkanta ya ing pipit.
Magkanta yang twit, twit, twit.
E na malit...! E na malit...!
Anak yang keya lalapit.
Anak yang magdalang sulpit.
Palapit neng palapit...!
Lisya na ka sana, pipit;
sulpitan naka king buldit.
ING AYUP
contributed by
Dr. Joyce
Sangkan cung mag papaynawa
Quetang lalam na ning saresa
Nung atin ayup a dugpa,
Barilan que quing pistola
E me sana babarilan
Ing ayup cung pacamalan
Obat mo, e ke barilan
Manyira yang bungang tanaman.
|