LIBRARY OF KAPAMPANGAN POETRY - PAGE 37 - compiled by ERNIE C. TURLA, president, Akademya ning Kapampangan International - Languages

Table of Contents
1. Sabian Mu Na - Tec Sanchez-Tolosa
2. Pait At Yumu Ning Pamiyutus - Mar M. Franco
3. Anya Masaya Kata - John S. Manalili
4. Atsaka - Elpidio Rivera
5. Somewhere My Love - Renato B. Alzadon
6. Para Kang D. - John S. Manalili
7. Inyang Kayanakan - Mar M. Franco
8. Maligosu - Renato B. Alzadon
9. Deng O.F.W. - Edgardo Bonus Sale
10.Nanu Ing Katutwan? - Mar M. Franco
11.Ngening Meko Na Ka - Tony M. Pena
12.Kakaluguran - John S. Manalili
13.Neng Kawran - Mar M. Franco
14.Ing Arana Ning Poeta - Renato B. Alzadon

SABIAN MU NA
Tec Sanchez-Tolosa

Nanung buri nang sabian ning kekang kataimikan
Ing salu ku at balugbug makabante, makiramdam
Milabas dening aldo ala ka mang sasabyan
Ing pangimut, e ku balu, e ku makaying aintindian.

Nanu kaya ing tampu mu, maghinanakit ka kako?
Atin ku waring asabi, asugat ke’ing panamdam mo
Atin na ka man kayang panenayan na gawan ko
Sabian mu na, pakisuyu, ditak na mu kumiak na ku.

E mu sana pabustan na kumaba ining tampuhan
E na sana miraras keng malungkut a paintungulan
Misan ta nang mikawani, uling e ta pigtyagan
Na salesen itang bage kekata memilatan.

Lumapit ka kanaku, sinta kung pakamalan
Apisan me ing pisngi ku keng malambis mung talan
Lawen mu kung mayatna, mapundat, atna kalam
At sabian mung e magbayu ing lugud mu kapilanman.

PAIT AT YUMU NING PAMIYUTUS
Neng: Mar M. Franco
July 24, 2006

E mu na sana intindyan nung e ku man bulad-bulad
Nung nanu man ing kening lub biryanan kung e na pasyag
Nanu man ing pisabi ta pinili kung e bumulad
Ban itang kamarinayan e mikalat at misalbag

Pabustan me pa mu sanang dimla ining kakung salu
E mu pa mu panenayan itang lambis ku at suyu
Nung e ra ka man lalawen lilisyan ko reng mata mu
Uling pigaganakan kung milablab ku’t mikaluku

Panupaya mal kanaku nung ala kung inatbanan
O malino sang pakibat karing kaku mu kukutang
Ala ku naman panayan a dapat mu sanang daptan
Patawad nung maybug kang kyak neng e ra ka bubularan

E mu na sana ukulan nung atin kung paginakit
Nung atin ka mang asabi kening lub ku mekayatsit
Ing mitanam kung mua keka marayu keng kakung isip
King uli mu ing pusu ku mukmukdul ya keng penandit

Bistaman ing pamiyutus mabikwal ya at e patag
Ing dalan ning pamisuyu mangasaldak ya’t lulundag
Iti e ya maging sangkan para e te pin asadsad
Ing pitali tang palsintang makabukud at bulalag

Potang dimla ne ing salu ketang bage makakaplas
Bustan mung paramdam keka ikang bukud ku mung rosas
Paniwalan mung masolu ing lugud ku keka liyag
Kapilan man e magbayu kalupa ning aldo maslag

ANYA MASAYA KATA
Nang John S. Manalili

1. Pasalamat ku keng Dios
Mig-adwa ku lub paglolon daka.
Lawen mo reng puwad mu
At deng kekang butit
Asna no karagul.
Makasumami na kang lalon,
Umpak na ka pisngi.
Anggiang tumiman ka
Asna ka kalangi.
Makamurit ka dispusisyun,
Parati kang makasibangut.
Deng taliri mung dati balamu kandila
Balamu mepapa nala.
Balaku sa mapundat ka mata
Kulagat ka pala.
Deng labing mayumu, maslam la pala.
Ing malare mung pisngi
Makariri neng uman.
Ustung ala kang pustisu
Lupa ka palang aswang.
Matarling ing bosis mu,
Makalanging buntuk.
E mu na asalikut
peklatan ka pala.
Matuling ka gilagid,
Matuling ka kaladwa.

2. Balu ku mu namang
Pasalamat ka keng Dios
Migadwa ka isip
A sagutan muku.
Uling kalbu na ku ngeni
Ala nang ibuga
Magkasakit na kung imi.
E na makatikdo malwat,
Magkasakit mangisnawa
Keng kuku at usang.
Gagaralgal na ku bosis,
Ala ku pa king tonu.
Ustung mimilup kung sabo
Sabe-sabe keng kakung malan.
E na ku makalangut
Mengabungal naku ipan.
Balid na kung magsalita,
Gaguti at utal,
Mag-ulyan naku.
E ku na balu nung ninu aku
Neng misan.

3. Pero, piglolon daka
At segutan muku.
Bage kata pala
Anya masaya kata.

4. Daramdaman mo?

AT SAKA
by Elpidio Rivera

At saka ya linapit
kinaul matalik
At saka na sinitsit
Sara mo reng mata mu
tumaid ka kaku
Kasumangid ning katawan
A kinupas anting malan
Lalam na ning balat
kilub ning pusu
Tune lugud ya
ing akit ku.

At saka ya migkera
Miglako malan
Linawe neng maratna
Melanging katawan
Bistaman ing lupa
Butit, labi, mata
Asbuk ala nang ipan
King kayang panamnam
Ini ing taung buri nang tukian.
Ken kayang kamang-mangan
Melino ya kaisipan
Tune lagu atyu kilub
Gintu ya ken katutuan.

At saka mata mibuklat
At atin yang ikit
Mas medyu malalam
Mas manayun pa keng katawan
Na ena pa ikit kapilan man.
Nanu man bage mangupas
Tune lagu atyu kilub
Eme asukad.
King arap ning salamin
At saka ya tiniman
Lagu ning pusu, wa
dapat yang purian.

SOMEWHERE MY LOVE
Neng: Renato B. Alzadon

E ku balu nung nukarin, e ku balu nung kapilan
at nung makananung adle king lalam na ning likupan,
dapot ining poesia kung bignus king benging kaniglan
damdaman mu ne mu kabud, ketang e mu titinapan.

Mekad iti damdaman meng sisitsit ning mariposa
kabang tayu magpatawe king tangke ning mamung rosa;
mekad iti damdaman meng pasyuk ning angin alaya
kabang tane pakialung ing alun na ning aplaya

Mekad mipamulala ka king kalamnan ning gale ku
angga ngeni ikang laman ning diwa at ning pusu ku,
karing kakung kawatasan alang sawang sasabian ku
kapilan man bandi raka....kapilan man bandi mu ku.

Bandi mo ding kakung uma, at ding uma mu kaku la
kaku la ding kekang kaul at ding takde ku keka la,
ingatan kung mal a bandi ing misan mung pamalsinta
palsintan da ka pa mu rin....anti inyang anak kata.

At ing pamalsintang ita e kinupas....e melaun,
e mepawi, e mesintang king kekaba ning panaun,
angga ngening dirimla ne ing sinag ning gatpanapun
kaladua kung mangulilang king lingap mu magpa-ampun.

Nung matna ka king katasan at ding batwin akit mula
ikutang mu nung nanu ta ing pasabi ku karela;
at king sinag dang malamlam yang sabian dang alang sala
angga ngeni ikang laman ning diwa ku at alala.

Nung tingiran me mu sana ing tumaila na ning angin
damdaman me king sunis na ing keya ku panabilin
ulit-ulit sasabian kung anti waring panalangin
angga king tauling santungan, palsintan ku, ika mu rin.

Inya, sasamban kung Dyosa king altar ning taguimpan ku
oini ing kekang poesiang king kaniglan gagale ku
e ku balu nung kapilan, nukarin at makananu
Somewhere My Love, damdaman mung angga ngeni, mal ka kaku.

PARA KANG D.

Tec Sanchez-Tolosa
Kepampanganan neng John S. Manalili

Anggang e ka pasibayung datang,
Sumulat na kung sumulat poesia -

Balamu mo ing balang salita metung yang pamangumusta
Balang metung a letra, metung a timan.

Metung linya keng balang metung a uma
A mamagus keng tutuki,
Alang bulad a mamayun, alang patna,
Mangisnawa para mu mikabit tuldik.

Balang metung a talata metung yang kapitulu
Na ning agaganakang pamisabi
At makasalikut a lugar,
Ning alang patnang bulusuk ning kapanamdaman.
At taimik a pilatan.

Balang poesia, metung a testamentu
Kareng piangganan a likbangan a alang pamikakunu
At taling e mapatad anggiang kapilan.

Biyayan da ka kareng balang sasabyan
Isuku ke ing sarili kareng balang kasukdulan
Balang pamamupus,
Balang panaun.

Isulat ko reng poesia ku
Anggang e ka pasibayung datang.

INYANG KAYANAKAN
Mar M. Franco July 26, 2006

Neng babalikan ku kening panimanman
Itang masayang bie kakung aralanan
Ketang panaun ning kakung kayanakan
Mamyalung tambubung ampong salikutan
Potang panaun ning masala ya�ing bulan
At maglimid bunga karetang tanaman
Kaya-kayabe ko ring kakaluguran
Mibiebie kung alang kamalit-malitan

Gagawang bidoki king gabun a pila
Balas lang tiradol pandakap dumara
At karetang denas babo ring saresa
O karetang manuk a magdumalaga
A sese nang Apu lilibad king mula
Potang ating kaming daratang bisita
Uling bistung-bistu iti ing buri ra
Ing bubukal sabo king sale gisa ra

Magpastul damulag e ku akalingwan
Ibat galingaldo anggang kayabakan
Pablasang ya iting ustung kaorasan
Laput yamung laput ing kekeng kalakian
King marimlang dikut a mengayambunan
Kaybat nang kinabsi agad ku neng dilwan
King lele taguling saka ke uluran
Katawan nang presku milis keng sarulan

Neng kauran naman aldo pamanaswe
Magdatun na ke man libutad marangle
Kayabe magobra detang siping bale
Keng patitingapun king gabun dadangle
Pablasang usu pa itang kalu-kalu
Nanuman pagobran keta king pangulu
Keng balang penganak atin makatuldu
A dapat pagobran ketang kayang agyu

Ing masayang dili potang pamamupul
Potang itang pale mapalut mibuntun
Lilung na ning kubul karin ke mitipun
Keng bandang matas ning pagobran ming gabun
Ing gintung binutil kabud medara ya
Ibalusbus da ne ring kekaming matua
Takalan at datuk keng sakung abaka
At layun iyuli sake king gareta

Bayu ya mituklip itang pamamupul
Piyugalyan mi na ing mamagpag kubul
Ikeng makipupul mapag keng miryenda
Karetang kayabe a mekipagobra
Bilang pasalamat ketang masabal da
At king grasyang kalam ning matas a banwa
Makanyan dudurut ing bie ku kanita
Ketang kayanakan king balen Pampanga

MALIGOSU
Neng Renato B. Alzadon

Ining Maligosu, maniaman yang tutu,
nung ustu ya sangkap...nung ustu ya lutu;
yang maglutu sana talus ne at lisu
nung nu anti pait...ban e bisu-bisu.

Sadya na ing sangkap. Ban e ya magmintis
gisa ne keng bawang, sibuyas, kamatis
king tapi ning babing pemisikan patis...
kabulug ning bulung, takpan neng mabilis.

Yapag ne king dulang a ganap king pali
babasuk ya pa sang ibat king kawali,
nung mitambalan yang bayung single nasi
ding dungut king dulang muli langan mabsi.

Ining Maligosu, nung mapait yaman,
atyu keng maglutu....atyu keng mamangan...
makanian ya ing bie kalupang lelangan:
Nung misan, atyu ya king pait ing niaman...!

DENG O.F.W. (Overseas Filipino Worker)
neng Edgardo Bonus Sale

Bayung bayani ing / awus mu carela
Libu-libung milya / ing dayu ra queca
Manintun cabyayan / queraclan carela
Detang pamilya ra / lacwan dasan da la

Pibandyan da 'Pinas / pisasali ra ngan
Misasanla pati / quegana-gana ngan
Masqui "five-six" e la / micacunung mutang
Mipunta la sa quing / marayung pagobran

Deng OFW ilang / bie ning economya
Sasagip keng bansang / e lumbug qng mapa
Queng indultung dintang / a e ra man sala
Obat ngeni ilang / mipaimburisan pa?

Mapilan carela / ngarang mengamano
Masqui atin guera / e la curul maco
Uli ning masaquit / ing bie quecatamu
E baling arapan / nanuman peligru

Nucarin la miras / perang parala ra?
Banko Central ya ing / tatangap careta
Ya pin canu iti / itang cabalwan da
Sana tutu namu / at e quenung bulsa

Capilan la caya / micabus mibulus
Detang gamat tamung / pane macagapus
Dacal na lang tutu / detang makalunus
Quening bansa tamung / sicmal ding curacut

Pane rang sasabyan / atin pang pag-asa
Dapot mate tanang / mulagat a mata
Iti e ya datang / nung e ta magobra
Galo ta na cabang / atin pangisnawa!

Nanu Ya’ing Katutuan?
Neng: Mar M. Franco
July 28, 2006

Nanu ing katutuan?
Ing katutuan ya ing simbitlan king labi
Pengisnawan saldak ning salung mapali
Bunga ning sukal lub ning pusung mesawi

Nanu ing katutuan?
Ing katutuan ya ing kakung aralanan
Maki tula’t lungkut ampong kasakitan
Atin mu ring lugud ampon kapasnawan

Nanu ing katutuan?
Ing katutuan ya ing atin aldo saslag
Sumangid ning lulam o uran babalag
Kaibat na ning bengi pasala keng munag

Nanu ing katutuan?
Ing katutuan ya ing kinumit kung sala
Sasaryan o ali keng kakung kapara
Pigsisian ku’t ali ing Dios balu na’ita

Nanu ing katutuan?
Ing katutuan ya ing dakal bage-bage
Kekata daratang e ta male-male
Tanggapan ta’t ali keng kekatamung bie

Nanu ing katutuan?
Ing katutuan ya ing ‘tin e pamipante
‘tin pakakalulu at atin mabandi
‘tin ditak akumit ‘tin dakal adake

Nanu ing katutuan?
Ing katutuan ya ing dakal kule layi
atin kayumangi, matuling, maputi
at ing balang kule myaliwa lang sapni

Nanu ing katutuan?
Ing katutuan ya ing gigising kanaku
At babie sikanan kareng balang aldo
Yang pwersang tutulak ban tikdo ku’t kiso

Nanu ing katutuan?
Ing katutuan ya ing kanakung daraptan
Keng pamangabyayan keng aldo daralan
Ya ing pangimut ku a kekang umasdan

NGENING MEKO NA KA
(nang Tony Mercado Peña)

marimla ing sibul ning angin
manyaliksik, magsumiksik
angga karing sepu't yamut
ning kakung panalangin….

na sana e muku lalakwan
dapot bitis kung meniklaud
e parin migsilbing minagwanta
king kekang pamaglako.

ngening meko na ka
e daka tangisan
ining mitagan sikanan
karing takde kung manangle
panikwanan kung kumulkul
metung malwalas a kutkutan.

yang maging karinan
ning pamangalingwan
karin ko idatuk masuksuk
tambunan malalam gabun ...

ding langib ning napun
e na sinagiwang pasibayu
ding mélanging patak luwa
e milamnan timan kapilanman
ding mepiping siguk
nagtal ning pangulila.

ding apis linislis ning lablab
meging aplus ginalus ning dimla
ding bining amorseco
e na medilig ambun ulap
ding pira-pirasung paninap
e na mibayit kapilan pa man.

pekamalalam dili kung ikutkut
ya'ing mapait at mabye katutwan
lidlad ning sulat mung likwan
king babo kung ulunan
sinabi mung daretsanan
aliwa aku ing sinta mu
manibat pa king ibat.

KAKALUGURAN

Nang John S. Manalili

Paninintunan ku la pa mu rin
Deng kakalugurang migtangkang
Tumakas king kakalulwan,
O neng mengaragsa at meyangu bie
King mangarayung lugal.
Anggia mang tutu ping ding
Taung miragsa na ala nong balu,
Pakibalwan ku la pa; nukarin na la?
Malangi ku mata, dapot ing isip ku
Susukad ya, mangutang
Obat kailangan yang masukad ing tau
Nung daranup ya o ala yang tatanggapang katarungan?

Pekibalwan de ing batas ning kakalulwan,
Mekipagsapalaran, buri deng sambutan;
Keng aliwang labwad mengapalitan lang
Mamamagobra kareng gagawan dang tete at dalan,
O karing bayung bale da reng atinan.
Deng aliwa, barku la reng lilingunan,
Ating meki-ipus, ating mamisaling tula at saya.
Buri deng abutan itang gintung tronung mikidaya,
Dayang ibat kareng mapagal, sugatan
At makalubas dang katawan.

Kanita keti,
Ating tinanam pale at ginawang pamangan,
Ating menayi at aliwang pagobran,
Ba lang ating kanan,
Ating tinalan sundang at pluma,
Ating memanuru, at memamaglaram
Ba lang manakitan.
Ating minarap karing ukum,
Ating mengasukul
Ba lang miparusan.

Kayagnan na ning tyup ning angin a alang patugut sasaplit
Likwan de reng kakaluguran ing kayanakan,
At king alang patnang dimla, mengaragsa la,
E de man ikwang abalu ing batas ning kakalulwan.
Kaibat mekipagsapalaran, e de igyung simbutan.

Inya paninintunan ku la pa mu rin
Deng kakalugurang migtangkang
Tumakas king kakalulwan,
O neng mengaragsa at meyangu bie
King mangarayung lugal.
Uling e ku buring deng kanakung kakaluguran
Ibawal da la naman keng kutkutan.

Please register your mobile phone to activate this feature.

Register your phone to receive a text message when you receive Mail from particular senders.
Previous | Next | Back to Messages Call or Instant Message mar_m_franco
Delete Reply Forward Spam Move...

Printable View This message is flagged. [ Remove Flag - Mark as Unread ]
To: AkademyangKapampangan@yahoogroups.com
From: Send an Instant Message "Mar Franco" Add to Address BookAdd to Address Book Add Mobile Alert
Date: Mon, 31 Jul 2006 20:58:17 -0700 (PDT)
Subject: [AkademyangKapampangan] Neng Kauran / Poesya ning Biseru

Mang Ernie, Mang Rey, at kekongan pu kabalen:

Yampang ke pu kekayu ing poesya kung makaparikil keng panaun ning kauran. Mikadiwa ku pung sumulat pasibayu neng ayayalben ku keng telebisyon ing malilyari keng makapaligid ngening panaun ning kauran.

Salamat pu keng ibye yung panaun mamasa.

Ing Biseru

Neng Kauran
Mar M. Franco
Agosto 1, 2006

Neng bulan ning Junyo angga nang Agosto
Marakal ing lulbug dakal e makalto
Panaun ning uran daratang ing bagyo
Pane’ing alang obra’t mayna ing negosyo

Neng aldo kauran keni king Pampanga
Ing keganagana mitatas ulaga
Ing nanu mang bage mika importansya
Keng bayat na ning bie neng alang ganansya

Ing lalung masakit nung syam-syam ing uran
Ing albug miras na keng tukuran eran
At ding pako ilug mangabitas la ngan
Iti maging bulus maglapo lang plasdan

Kabud mebulus la ding asan king plasdan
Pihung pangalugi kareng memuhunan
Ban lang makabawi ketang pigastusan
Dakpan do’t ilaku ‘gyang malati la man

Pale antimurin masira’ing pupulan
Mipase king bagyu’ing gintung kabutilan
Ketang tinulage malagas, matangtang
Kalulung manasik mikutkut king utang

Makasagmit la man king butil mipase
E da apalangi ladlad man king dase
Nung langi man iti putim na ing kule
Meum itang abias manibat king pale

Deng makiyaldawan miritkan la naman
Agya sang abias mu ala lang itun man
Uling alang obra’t alang panakitan
Pibabatan da na’ing mangaplas la atyan

Dapot ing kauran e ya mu perwisyu
Atin tamu mu rin akuang benepisyu
Ing malanging gabun dating e sikasu
Makapatubu kang gule agyang nanu

At makanyan mu rin king malanging sukal
Pati lumang are ding manuk pengalkal
Karin la tutubu deng payung-payungan
Bunga ning kauran pagkabie pamangan

Deng mangatuang kwayan kanyan la manusbung
Pikwanan lang gule detang bayung labung
Malyaring igisa keng bawang at bagung
O lumpiang abe ning petubung balatung

Lawen tamu naman nung bakit matsura
Ing ablas ning uran karetang kapara
E kaya uli ning kararaptanan da?
Keng keyalan lingap keng naturalesa?

Obat mo ing bulus malilyari keti?
Tau’ing maki dapat ‘nya daratang iti
Dutung kareng bunduk digsa ro’t sikoti
Pemutut legari at piparti-parti

Dapot e ya karin ing bukud parsala
Ing balang memalen ‘tin ya naman sala
Kareng balang bale basurang yugse da
Keraklan na niti atyu king kalsada

Kadugpa ning uran magus ing basura
Karetang taguling iti ing magbara
Anya itang danum ala nang dalanan
Iti’ing maging albug malwalas aktangan

Deng dating malwalas sapa’t kailugan
Mengakitid na lang pilan kalundagan
Ala lang patugut lalapad ding plasdan
Anya itang agus ditak na dalanan

Nung syasatan tamu at pititimbangan
Neng mibubulusan tamu’t miyalbugan
Ala nang aliwang dapat parsalanan
Keyalan masabal at ing kaswapangan

Pablasang ing danum pekagalal ne yan
Ning naturalesang kekatang karinan
Nung luguran taya iti’t pakamalan
Pane pakinabang yablas ning kauran!

Ing Arana ning Poeta
Neng Renato B. Alzadon

Nung matudtud kaman, Batwin kung maningning
A ngeni migpampan king ulap a tabing;
King kablas ding kuerdas ning Lirang tatabling
Matudtud mung pusu, buri keng migising.

Sumiro ka sana king siwang ning ulap
Malukang Poeta atdanan meng sulyap;
Nung ipagkalam me ing dimut a kislap
Ligaya neng tune ning pusung maninap.

Utus ning ugaling akamulatan ta
Bayu king banua mu mipanik kung sinta;
King tulid mung awang midalit kung kanta
Antimong kaustan ning wagas kung pita.

Bilang pamamintu, ing kekang alipan
Oini ing dalit nang mengatmung taguimpan;
Ban ing keka lugud a pisimpam-simpan
Maramdam yang matni king meto-likupan.

Oyan balu nana ning kekatang balen
Ikang palsintan kung Tala na ning Belen;
Ika ing Anghel na ning kanakung Eden.
King altar ning pusu, sasamban kung Birhen.

Ngening balu nana ning benging tajimik
Ing dalise sintang king pusu midantik;
Maniad yang upaya ing kaladuang sabik
Ing lugud ku keka bustan mung mipanik.

Nanung ulaga na ning sintang melaun
Nung manabu ya mu king marimlang aun;
King kasibulan ning mayagang panaun.
Matampa ing manik arap mu idaun.

Kaministilan mung dalung yang mapilar
King Dyosa nang Venus ing sasambang Cesar.
O maslag kung Venus king siduan mung altar
Bustan mung mampang kung sampagang asahar.

Bustan mung mampang kung lugud ampon suyu
Antimong asahar, sampagang masamyu;
Idaun ku keka anggang kakung agyu
Akit daka sanang king tula magyuyu.

Nung pamayapan mung ding bitis-marangle
Mipanik lang sinta king kilub yung bale;
Ibie mu ing tanda kening talagale
Buklatan meng awang tando kang malale.

Dakal a salamat Batwin kung makislap
E mu la pigkait timan mu at sulyap;
Bisni me ing awang king siwang ning ulap
Layun pepakit mu itang lub mayap.

Salamat Batwin na ning matas kung banua
Dininan meng tula ing kakung kaladua;
Dimdam mu ing aklis king tabling ding nota
kening Harana na ning kekang Poeta.

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00238

Page Updated Fri Aug 4, 2006 6:33pm EDT