LIBRARY OF KAPAMPANGAN POETRY - PAGE 35 - A Project of the Akademya ning Kapampangan International headed by Ernie C. Turla - Languages

Table of Contents:
1.Kapilan Tamu Migising? - Mar M. Franco
2.E Muku Gigisingan - Renato B. Alzadon
3.Bulkan Pinatubu (kasalesayan) - Mar M. Franco
4.Qng Malating Siwang - Pedro Rivera Alzadon
5.IMORTALIDAD - John S. Manalili
6.Bale Batu - Renato B. Alzadon
7.Ing Mananaman - EDR
8.Lugud Qng Culturang Capampangan - Edgardo Bonus Sale
9.Lugud King Kalinangan Kapampangan - Mar M. Franco
10.Nucarin Tamu Marap? - libutadcu

KAPILANG TAMU MIGISING?
by Mar M. Franco

O kakung kapatad, parang Kapampangan
Mabayat yang bina ining kekang kutang
Makananung sukdan o kaya tarukan
Ing pamagmasabal keng amanung siswan?

Para mo kanaku ing kapakibatan
Lubus yang mayakit keng kararaptanan
Ning balang pengari keti Kapampangan
Manibat king bale angga na king dalan

Nung balang pengari king pibalebale
Keng balang penandit ustung mipanapse
Ing amanung siswan iti gamitan de
Balugbug at asbuk ding anak misane

Kabud misane la king amanung siswan
Dalan da nang dagul pamangapampangan
Nukamin man miras yatung maleparan
Keragul amanu e ne makalingwan

Dapot keng pamalak e ya kabud sapat
Biasa lang manyabi deng balang penganak
Karetang eskwela ituru ya dapat
Ing kasalesayan king ban lang mimulat

Nung balang penganak karela mituru
Ing kasalesayan ding kekatang nunu
Alang pasubaling mamale king pusu
Kulturang pamana e re gawan biru

Dapot ing masakit mapait katutuan
Bina neng melakas amanung nasyunal
Pelalung masuluk ning labuad tang tibuan
Dakal nong tagalug keng pamitambayan

Susulung kabyasnan metung ya pang sangkan
Daragul lang syudad pati pangabyayan
Detang manintunan keti magsantungan
Dayang Kapampangan kanyan misamutan

King keyalan kalma da retang aliwa
Kulang la king belwan e la makasadya
King pamakipamuk king pamangabyayan
Lalu lang milugmuk simpang kakaluluan!

Balang adwampulu atlu la kareti
Kareng kapampangan deng meyalang swerti
Ing panakitan da e ya man sasapat
Anya daranup la marakal dang anak!

At ing makalunus karetang anak da
E la man magaral karetang eskwela
Mayayat dang takde mangalkal basura
O mamagpalimus kareng kabalen da

Kareng Kapampangan antini kabilyan
Karin mayayakit itang kekang kutang
Metung yang paralan ing kakung isipan
Saupan tala reti keng pamanintunan

Imbes na dinan lang dinerang a asan
Ibye ta karela gamit pamanasan
Ban keta mabyasa at manalakaran
King sariling bitis, sariling sikanan

At ustung mikabyus mipasno ing bie ra
Ding karelang anak lungub nong eskwela
At karin turu de ing amanung mana
Karin ne kumabie lugud king kultura

At iting paninap mikikapalyaryan
Nung balang memalen manyaman no batal
Nung ding balang anak lulub la’t magaral
Nung king pamanuru, amanu ta'ing miral!

KAPILAN TAMU MIGISING?
Neng: Mar M. Franco, a-21 ning Hunyu Banwang 2006

Pilan nang banwa ing panaun milabas
Nyang ding magmasakit tikdo la’t melikwas
Para mibangun ya tune magdalamat(1)
Ing amanung sisuan king pusu ra ding lat(2)

Uling makalunus la retang keraklan
Sisuan dang amanu dit mu man e pakang(3)
Pablasang melasun pusu’t panimanman
Keng nasyunalismung ngeni mipairal

O makalunus-lunus!... o Balen ming tibuan!
Diritak diritak... la reng Kapampangan
A lulugud lusuk king amanu mung mal
Uling kinaul de’ing salitang nasyunal!(4)

Salamat, salamat... atin pang mitagan
Karetang pamuntuk a maki masabal
Karin San Fernando syudad mung kapital
Suli yang Lazatin (5) mayap yang konseyal

At bilang konseyal nining syudad tamu
Migmunikala yang leyi king konseho
Ban pamanuru ring maestra’t maestru
Karelang gamitan beitan tang amanu

Malagwang salita megawa ya’ing batas
A dapat patupad kabilugan syudad
Malungkut balita kanaku miyatad
Mismung deng pengari e bisang patupad!

Gagawan dang sangkan para kareng anak
Magi lang alisto nukarin man miras
Miyaliwang lugal keti Pilipinas
Uling ing Tagalug balu re laganas

Ngeni ku atantu bakit mipakanyan
‘Nya mamamate ya ing amanung sisuan
Deng mumunang diling dapat parsalanan
Mismung deng pengari a alang masabal!

Kabalen kapilan mu kaya apansin?
Kapilan ka damdam kening panalangin
Lugud king amanu king pusu magmain
Kabalen kapilan... tamu ngan migising?
_________________________________________
(1) magdalamat - to stay on / to make it habitual as a e.g. makadalamat na keng katawan na ing kasipagan
(2) lat - everybody
(3) pakang - thirst for something (antimo keng inuman)
(4) salitang nasyunal - Pilipino/Tagalog was adopted and promoted as a unifying language for Filipinos
(5) Lazatin - refers to the first councilor of City of San Fernando, 2004-2007, a scion of wealthy and influential clan

E MU KU GIGISINGAN
Neng Renato B. Alzadon

Atmu no kasaya ding anak king Eskwela
magkanta lang kantang Kapampangan at teterak la.
E mu ku gigisingan...!
Ing malilyaring ini atmu na kaniaman a kaniaman
at ing pusu ku magkanta at teterak ya naman.

Babo na ning entablado ating mangatikding Poeta
a mamutung korona karing Mutya na ning piesta.
E mu ku gigisingan...!
Bisa ku pang damdam karing mangatimyas a bersada
ning amanung kapampangan a gagamitan da.

Ing mariposa na ning ari sinulapo ya
at oitang daladalipakpak king arap ning dalya.
E mu ku gigisingan...!
Atmu no kasanting mangapampangan ding kayanakan
a makatipun king pyalung a Bulaklakan.

Bisni ke ing telebisyun nandin bayu ku ume king kama
at kapampangan ya ing makapalage drama.
E mu ku gigisingan...!
E la sasawang manalbe ding kanakung mata
karening kapampangan a bayung sikat a artista.

Kabang magduyan ku lalam dutung kaibat meugtu
kapampangan la ding kantang dimdam ku king radyu.
E mu ku gigisingan...!
Pabustan mu kung matudtud maniaman, bungsu ku
kabang paninapan ke ing palsintan kung amanu.

Panalala Keng 15-Banwang Pamanakbung Ning
BULKAN PINATUBU
Neng: Mar M. Franco June 2006

E ku na alako kening kakung isip
E na makalingwan agyang nanung pilit
Bulan na ning Hunyo ning bie ming tahimik
Meliswas king takut king misan penandit

Mumunang pawaga ning kayaliswasan
Ding Amerikanung king Clark manuknangan
Myaliwa dang saken pinila king dalan
Papunta king Subic karin magsantungan

A-dies ya ing Hunyu karin la linikas
Lele Olongapu syudad na ning lambak
Pinila lang saken manibatan king Clark
At teluntunan de ing dalan ning “Death March”

Pilatan mung aldo kanita milyari
Pepakit yang kasbu ing Apu Malyari1
Itang binuga nang abung misnang pali
king banwa lininsad wangis yang “brocolli”

Ing mesabing abu meyakit metangal
Karin king Menila anti mong pepabal
Itang daratang pang tutuki nang palual
Bilang kayablasan keng alang masabal2

Pilatan mung aldo tutuking milyari
Anyang ibuga na ing abung mapali
Ing masalang abak migmistulang bengi
King mibugang abung babaung asupri

King keyalan kalma sukat miyagnanan
King mamyus a bagyu ing akbung ning bulkan
Ing mepalyari king makabang kabengyan
Misalbag ing abu malaut ing disnan

Kalabas ning aldong pisak king dalumdum
Memunag ing sala bistaman mamambun
Keraklan din taung ing takut e susun
Likwan dong bale rang keng abu metambun

King marayung lugal karin miglayunan
Nung nu e ne mabut ing abu ning bulkan
Dapot ding aliwang alang balung puntan
Tinggap dang pibata sablang kasakitan

Ing milalung danup kawa dang inuman
King mapilan aldo karelang delanan
At ala mang saup karela daratang
Uling alang patna ing abung mumuran

Mapilan mung aldo pesibalik nala
Detang pesilako king marayu minta
Deng karelang bale paglarinan da la
mesira king abung king bubungan digpa

E la pa meyari ketang pamaglarin
Dintang ing kauran ing bagyu at angin
Kanyan ume namang magus asmu sikan
Ing bubukal labuk karing kailugan

Ketang kabilis ning agus nang daratang
Asisira na ngan ing sablang dalanan
Pelalung deng tete konkretu’t matibe
Mengalasak la ngan mengagute-gute

Mengapatag la ngan detang pako ilug
Dayat kapatagan minagus ing labuk
Ding sese animal bitis da melapnus
Malabung tanaman melangi’t meduluk

Tutuking milyari makapangilabut
Ing atangalan da makalunus-lunus
kabilugan sakup balen ning Baculud
Mitambunan ya ngan king mapaling labuk

Patluran ku ne pa ining kakung kwentu
E ku na abata mangale ing lwa ku
Neng agaganaka ing meging apektu
King bie ring kabalen bibilang king libu

Bustan yung lipat ke ing tema ning kwentu
Nung nanung gewa ra ring kabalen tamu
Sumangid ning sakit ating positibu
Pamisaup-saup linto karing tau

At pagmaragul ku agyang kaninu man
Gintung kaugalyan da reng Kapampangan
Detang maki agyu memanyaup la ngan
Yatnang pasibayu balen Kapampangan

Maslag nang tanda ning metung Kapampangan
E agad susuku keng nanu mang laban
Nung buksingeru ya kalupa ne’y Pacman3
Ustung mituran ya karin ya tatapang

Masdan mu kabalen parang Kapampangan
Akakit mu ngen’ing kekang pipagalan
Kaybat labing–limang banwa ing miralan
Susulung ya’ing balen paraisong karinan!

1 - Apu Malyari as called by the Aetas (Baluga) is believed to be the god who hails from Mt. Pinatubo.

2 - It was rumored that the government has sanctioned an exploration along the foot of the volcano to tap its hot springs as possible source of energy or other economic purposes years prior to the eruption.

3 – nickname of the Filipino people’s boxing champion Manny Pacquiao.

QNG MALATING SIWANG
Neng Pedro Rivera Alzadon

Itang quecang jardin tutu yang masinup
pader ya ngan batu ing macapatulug
tutu yang matapang at masican a lub
ing ume mangangas lacbang bayang milub.

Ica ati ca qng libutad mung jardin
siluan naca nitang bulan a maningning,
balu mung ica mu itang atiu carin
uling alang milub qng bacud a pader.

Dapot e mu balung atin palang siwang
busbus yang malati a e ra atacpan;
acu ti cu carin cacung pagumasdan
ing pamagmain mu busal ding tanaman.

Cabang managtal cang myaliwang sampaga
qng cacung panaquit quipnuan cang ligaya,
balang atagtal mu pamanuman mo pa
saca mo bibili qng quecang plorera.

Dapot cayarap mu qng sampagang rosas
qng cacung panaquit ti ca migbanayad.
uli ning imbut mung ayagtal meng agad
pinilit meng guinong ing wanan mung gamat.

Dapot, capa. "Aray", ngamu mipa-asio
saca me linawe itang taliri mu,
qng cacung panaquit ing daya tutulu
mesucsuc ca pala qng pamanagtal mu.

Ing maputing rosas mengasna yang daya
aguiang mengasna ne tame pa penuma,
nung ding anggang angjel makanian la ngan sa
caring tanaman da alang mapinsala.

Ume na cang maco, dapot acu naman
pisiuc queng banayad metung a cundiman
qng cacung panaquit anti cang mipasdan
pamanintunan mu nung nu menibatan.

Bala-baliquid ca, lalon mucung pilit
nu ca man lumawe e mu cu rin aquit,
buri dacang puntan ecu midalaquit
pibata cu na mung qng siwang sisilip.

Inyang capupus na ning cacung cundiman
carin capa meco busal ding tanaman,
anggang e ca meco e kia naman licuan
ing pamanyilip cu qng malating siwang.

IMORTALIDAD

Nang John S. Manalili

Nanu ini, pali mu katawan?
Nung malabul king angin, milako a lisangan?
Liswas a penamdaman inyang kayanakan,
A buring ibalik anggiang masakit man?

Makasadya kung lugud
Makasadya ku namang luguran
King tune a lugud.

Papaburen ke ing sarili kung
Mabibie king paninap
Nung mumuritan da ku
Papaymurit na ku man.

E tinud ini
Agpang keng kapanwalan:
Ing taung atin na e ne aliwa pagdulapan.
Pero ustu ini
Agpang keng kakung kaburian:
Ing bage mawawala dapat yang panintunan.

Uling kabang lalakad ing panaun,
Kabang miraragdag ing idad,
Lalapit at lalapit ing aun,
Tutua kung bisang maging anak.

Inya pin paglolon ke
At buri keng asawanan
Ing imortalidad.

BALE BATU
Neng Renato B. Alzadon
Baltimore Md USA/2006

Misan, king baryu mi, mika-pamagbayu
mesanting ing bakud pati kampusantu,
at mika-koryenti king pun anggang sepu,
mepatag lang dalan a mika-aspaltu;
at kanyan no lunto ding peka-simbulu
ning kanawan ning bie..., dening Bale Batu.

Ing lalto, balamu nung batu ka bale
maki-tetagan na kabilian mu king bie,
at nung ing bale mu kwayan ya pa lande
maguing simbul ne mo ning bie mung mabule;
inya karing taung bisang makipante
itang bale batu maruruk deng pake.

Makanian ing sangkan 'nya ing mal kung ibpa
bale yapin batu ing kayang pigampa;
at king baneng kamtan maruruk nang paksa
itang kaparangan ginabak neng kusa
at king sipagan na gagawan neng adua
itang katawan nang king ketwan mimina..!

Mayap a balita...!Tinud ya ing atbu
at tinud ing pale kemada rang saku,
tinud ing kamuting lulual bultu-bultu
masanting panaman lalakad a presyu;
ikit keng mesaya lupa Y tatang ku
apagawa na ne ing bale nang batu.

Oita pin, dinatang la ding mangontrata
pimostra-mostra ra nung nanung gawan da;
angatan de kanu ing bale ming tabla
saka re bakuran batu ing lalam na;
ing lunto, ing bale, babo at lalam ya,
masanting ya kanu potang mayari ya.

Mebisa ya'y tatang king obra at bayad
at ding kagamitan seli na nong agad,
mapilan lang aldo ding meko miglakad
ing bale nang tatang siniro ne tingkad
mengari yang rosa a mibubukadkad
ing panaguimpan nang mamuk nang matupad.

Lalam da ding byabas mamagluklukan ya
inya ding lalabas magpusung la kaya;
ngara mong sasabi: metaba ya bulsa
metaba ya atyan, metaba ya lupa;
ining tatang naman ena pansin ita
timan-timan ya mu king kapusungan da.

Kayari ning bale, utus ning ugali
pemisik neng danum ning dinalo Pari,
mika pamagsaya, kaibat ning pangadi;
king tula nang tatang alang makasuri;
keyalimbawa na yang metung a ari
a mika-palasyo, a bayu pang yari.

At misan a bengi, balaku mo sana
pagpusungan naku ketang sinabi na,
aduan na kanakung nung kanung mate ya
ing sala king babo yang pagburulan na;
bilang peka galal ning panabilin na
ing birtud na ning bie kaku ne pamana.

At nganang tinuglung:" Anak, tandanan mu
ing misaplala ka king bie mu king yatu,
at king kapilan man eka makalulu
e ka manuknangan king malating kubu,
at ing kekang bale kaba na ning bie mu
bale yang mitumpak babo na ning batu."

E pala magpusung. King misan a abak
king pangalukluk na kabud nya mibagsak;
karin king Hospital ding doctor a tanak
e ra na abayu kalma nang mitatak,
mepupus ing bie na king tauli nang patak
ning lua nang parikil king irug nang anak.

At tiparan ke pin ing penabilin na
ing sala king babo yang piburulan na,
kabang maglame kung tanud ning bangke na
balamu ikit ke ing kayang kaladua,
ngana wari kaku: Anak ko, minuan ka,
salpantaya ka king sinabi ku keka.

Sinalpantaya ku. Menaglus king ubud
ning kanakung pusu ing banal nang lugud;
sinalpantaya kung landas yang makatud
ing kakung tuntunan....eya tete matbud;
kasalpantayanan yan at yamu kabud
ing munie upaya king pamanang birtud.

Iniang mibili ne ing mal a ibpa ku
king pagsantungan nang tuknangan a bayu;
ali kula likuan ding mag-obrang tau
anggang tauling saglit siping na ati ku;
dimdam kung minagus ing lua ding mata ku
inyang misara ne..., ing Bale Nang Batu...!

Ing Mananaman
ng EDR

Atin babaing mananaman
Keng jardin e na bandi
Katubu ra’t kabawi
Lumwal ya ing mikibandi
Pamututan nala.

Ining babaing mananaman
mibalik ya
digdagan na pa
Kinalat na ing bini
Ken jardin e na bandi.

Milabas mapilan
Mete ya ing babai
Mete ya ing mikibandi
Likwan dang jardin
Kitmu yang tanaman.

Lugud Qng Culturang Capampangan
Neng Edgardo Bonus Sale

Macananu tayang tarucan at sucdan
Lugud tamu qng Culturang Capampangan
Byasa tamung gawang poesia't cundiman?
Y ca ing peca macudta at matenacan
Queni pin awsan tamung Amanung Sisuan?

Ali a cung mequibat, queca yu ngan
Metung cu mung talapagobrang aldawan
Manitun capanintunan at pamangan
Ca reng ca cung pamilyang licwan
Quetang bale ming alang bungbungan

Uli ping paratang na ining cauran
Caya pin ala cung patugut cacayud
Ban ca cung pamilya e manga uranan
At atin a apag queng ca cung dulang
Maski nasi yamu at asin qng pinggan

E yu cu calupang matas pegaralan
Ing hay iscul e que ticman at delanan
Uli na ning queca ming cacaluluan
Iti e cu gagawan namu man sangcan
Lugud cu qng balen tang Capampangan

Ca buri cu pin sana mituru la ngan
Deng anac cung gagalucguc a atyan
Quening amanwan yung Amanung Sisuan
Ban 'tin lang panlaban quing Catagalugan
A bisang sumupil queng balen tang Tibuan

O neng sanu ing ustu at muna cung daptan
Ing byasa lang lugud Culturang Capampangan
De ning anac cung danupan alang canan
O ing sicapan pa ca cung capanintunan
Ba cung atin a yapag caras ning apunan?

Lugud King Kalinangan Kapampangan
by Mar M. Franco a-27 ning Hunyo 2006

O kakung kapatad, parang Kapampangan
Mabayat yang bina ining kekang kutang
Makananung sukdan o kaya tarukan
Ing pamagmasabal keng amanung siswan?

Para mo kanaku ing kapakibatan
Lubus yang mayakit keng kararaptanan
Ning balang pengari keti Kapampangan
Manibat king bale angga na king dalan

Nung balang pengari king pibalebale
Keng balang penandit ustung mipanapse
Ing amanung siswan iti gamitan de
Balugbug at asbuk ding anak misane

Kabud misane la king amanung siswan
Dalan da nang dagul pamangapampangan
Nukamin man miras yatung maleparan
Keragul amanu e ne makalingwan

Dapot keng pamalak e ya kabud sapat
Biasa lang manyabi deng balang penganak
Karetang eskwela ituru ya dapat
Ing kasalesayan king ban lang mimulat

Nung balang penganak karela mituru
Ing kasalesayan ding kekatang nunu
Alang pasubaling mamale king pusu
Kulturang pamana e re gawan biru

Dapot ing masakit mapait katutuan
Bina neng melakas amanung nasyunal
Pelalung masuluk ning labuad tang tibuan
Dakal nong tagalug keng pamitambayan

Susulung kabyasnan metung ya pang sangkan
Daragul lang syudad pati pangabyayan
Detang manintunan keti magsantungan
Dayang Kapampangan kanyan misamutan

King keyalan kalma da retang aliwa
Kulang la king belwan e la makasadya
King pamakipamuk king pamangabyayan
Lalu lang milugmuk simpang kakaluluan!

Balang adwampulu atlu la kareti
Kareng kapampangan deng meyalang swerti
Ing panakitan da e ya man sasapat
Anya daranup la marakal dang anak!

At ing makalunus karetang anak da
E la man magaral karetang eskwela
Mayayat dang takde mangalkal basura
O mamagpalimus kareng kabalen da

Kareng Kapampangan antini kabilyan
Karin mayayakit itang kekang kutang
Metung yang paralan ing kakung isipan
Saupan tala reti keng pamanintunan

Imbes na dinan lang dinerang a asan
Ibye ta karela gamit pamanasan
Ban keta mabyasa at manalakaran
King sariling bitis, sariling sikanan

At ustung mikabyus mipasno ing bie ra
Ding karelang anak lungub nong eskwela
At karin turu de ing amanung mana
Karin ne kumabie lugud king kultura

At iting paninap mikikapalyaryan
Nung balang memalen manyaman no batal
Nung ding balang anak lulub la’t magaral
Nung king pamanuru, amanu ta'ing miral!

NUCARIN TAMU MARAP?
nang libutadcu

mitalabu nacu naman canu,
ngana ning cacambal cu,
uling mamarala cu canu,
biru biru qng aliuang amanu.

mipalampas ya yata,
acalimbatawan de ring mata
ing iyacu enacu mamarala
birung macatula qng Akademya.

malagad mung tutu,
iyacu maqui ubilu bilu,
caniting isyung Capampangan,
ing cacung pilubluban quecayu yang cutnan.

macanian ya ing prinsipyu cu,
buri cupa ing gagawan cunamu,
kaysa qng puru salita mu,
alub cunamu carin atiyu cu.

nung nucarin cuman ngeni,
canacu nang babie,
masqui qng peca malating bague,
iyapse que ing canacung takde.

metung cupang tacde,
macuyad ya man caring lalawe,
lugud pusu que pang ibie,
caring calulung anak at inosente.

nung ing beluan da qng bie dimut mu,
pauli na ning alang TUTUNG SUSULU,
CARING MURA RANG DIWANG TUTU,
PANINAP AT PAGASA, CARELANG MAGUING SULU.

ditac nalamu ding managimpan,
paninap, pagasa, macacalinguan,
pamilya, iscuela, gobyerno, pisamban,
DETI ALA NO NGAN CABALDUGAN.

ing puna qng pisamban, goberno, pulitico,
ding atinan, masikanan, sipsip, asu-aso,
isanu ing lilingunan, nula lilimbato?
NANU, DIRINAN DONG PANSIN DING ANAK TAMO?

DING ANAK TAMUNG DARAGUL,
TUTUA NALA CABUD, GULUNG GULUNG,
PENGARI, ULYAN DA ING KULKUL,
MELACUAN A ANAK, ALANG MELACUAN UKUL.

ninu mo ta ngeni ing dapat ingatan,
ding anak a mamitbit labuad tamung licuan,
gubryernu, pulitika, pisamban, pansin carela langan,
PAKISABI KUNG MAYAP, ANAK LA RING ARAPAN.

"NGENI NA ING ORAS, BUCAS TAULI NA !!!"

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00185

Page Updated Wed Jun 28, 2006 4:25pm EDT