LIBRARY OF KAPAMPANGAN POETRY, page 34 - This is a project of the Akademya ning Kapampangan International under Ernie C. Turla - Languages

1.Makasukad a Poesia - Renato B. Alzadon
2.Dinam - Renato B. Alzadon
3.Ing Tauling Tipanan - Renato B. Alzadon
4.Ing Lugud Qng Amanung Sisuan - EBS
5.Anino Ning Napun - Renato B. Alzadon
6.Maki-dimla ya pa ing Bulan Ning Junyu - Renato B. Alzadon
7.Atyu Queca - EBS
8.Deng Anak Nang Tatang - Mar M. Franco
9.Kalinguan Da Na Ka - Tony Mercado Pena
10.Dapat Dasnan - John Manalili
11.Lingkas No Reng Poeta - Paeng
12.Mayumung Lasun - Renato B. Alzadon
13.Para Kang Islo - Renato B. Alzadon

MAKASUKAD A POESIA
Neng Renato B. Alzadon

Bisa kang mabiasang sumulat poesia?
Nung yan ing sarya mu, kanaku damdam ka:
tuklu ka keng sukad: mag-anam-anam ka
la- la- la- la- la- la, La- la- la - la- la- la.

Misane ya murin ing kekang balugbug
la-la-la-la-la-la, pug-pug-pug-pug-pug-pug
lala--lala--lala--, katug--katug--katug
Lalala--lalala, kalugkug---kalugkug.

Nung bisa na ka man saben me keng pakpak
pa-pa.pa-pa-pa-pa-, pak-pak-pak-pak-pak-pak,
papa--papa--papa-- , pakpak--pakpak--pakpak
papapa--papapa---, palakpak---palakpak.

Nung pamayapan mu gumamit kang paswit
pi-pi-pi-pi-pi-pi, wit-wit-wit-wit-wit-wit,
pipi-pipi-pipi, pipit--pipit--pipit
pipipi--pipipi---, palipit---palipit.

Malyari mya naman gamitan katus
ka-ka-ka-ka-ka-ka--, tus-tus-tus-tus-tus-tus,
papa--papa-papa- , patus-patus-patus
papapa--papapa---, patustus---patustus.

Malyari m'ya naman gamitanan piling
du-du-du-du-du-du---, ling-ling-ling-ling-ling-ling
mumu--mumu--mumu---,tingting--tingting--tingting
dududu---linglingling---, mumumu--- tingtingting.

Malyari m'ya naman gamitanan pitik
pit-pit-pit-pit-pit-pit---, tik-tik-tik-tik-tik-tik
terak-terak-terak- itik-itik-itik
iterak me kaka terak itik-itk

Malyari m'ya naman gamitanan ayli
ha-ha-ha-ha-ha-ha---hi-hi-hi-hi-hi-hi,
mimingat kang bagya pota deng masisti
pamalagwan dakang mesira kukoti.

DINAM
Neng Renato B. Alzadon
1988/Kingsville,md/usa

Misan, pintalan ke ining kakilala
king baku lang kunan ding plakang dinam na;
ot e na no sibli...? Siguru, bala na
eku no kailangan...inya, kaya na la.

Kabud abalu na ing kanakung pake
kinua no ding plaka, matula nong binie;
mako na ku sana---ing abe na bale
atin yang bisita---pepakilala ne.

Mipagbansag kami. Abalu ke lagyu
at ing sangkan na ning keti pamandayu;
kabud ne mu meko irug nang kasuyu
king malating bague e pamikasundu.

Ikit ku ing lungkut karing keyang mata
antimong mesambut king tauli nang pusta;
bayang makabawi at mika-pag-asa
ing malam kung pusu, peparam ke keya.

Manibat kanita pilimbang-limbang ke
angga king magbalik ing diwa na king bie,
at king timalad ku king keyang pamakde
ing dinayung irug akalinguan na ne.

Nung maligaya ya maligaya na ku
uling atyu keya dinam nang pusu ku;
bilang katumbalas ning pamiparam ku
dininan neng kule ing dinam kung yatu.

At milabas la ding dakal a saguli
irug nang miglayag ali ne minuli
inya ing pusu ku panatag ne bili
maguing bandi na ne....., e na ne isubli.

Kabubuslan na ning dinam a mulahan
ya ing kakung kakung Eva, akung keyang Adan;
king alpombrang dikut a kekeng desayan
pepatudtud na ku king keyang kandungan.

At menagimpan ku. Mekabulad namu
akalingatan ku nung nanu ing tutu;
bala ku sa akung mengiparam pusu
aku pala itang menandam kasuyu.

Nung kapilan naman hibang kung sasamba
anting kambubuyug king mal nang sampaga,
kanita na sabian king miyangganan na
ing mitakdang sukad ning dinam a sinta.

Bakit mipakanyan...? Ing dinam kung dilag
kabud-abud ne mu manyawad patawad;
ngana minuli ne kasuyung miglayag
'nya ya man muli ne king karelang pugad.

O' ing anyu ning bie makanyan ya pala
nanu ya mang dinam dapat isubli ya
makanyan ya naman ing dinam a sinta
susubli yang anti yang dinam a plaka.

King aral kung kimtan matibe kung tintu
ena ku manandam at mamaram pusu,
uling atin ya ring kaplas a kayalu
itang pamisubli king sintang dinam mu.

ING TAULING TIPANAN
Neng Renato B. Alzadon
2006

Lalon mu ku.... lalon daka. At king pamilawayan ta
mangutang la ding mata mu nung kalupa ning kanita,
Ali na na, ngara naman mekibat ding kakung mata
mika atin pamag-bayu king dane ning pamalsinta.

Dinuku ka...dinuku ku. At Ikit kong memyalungan
karing sagiwa mung labi ding manamuyut a timan;
at king lipang kung pamisip anting mebatulalangan
eku balung ding labi ku manamuyut la mu naman.

Sinimsim ka....sinimsim ku, kaibat...king talapagslbi
binye me ing kekang sinyal, manyad ka pang aduang boti;
agyang dakal la ding taung mikaili at misasabi
balamu mo ing kabengian kekata yang adua iti...!

Inapsal mo ding palad ku...inapsal ko ding palad mu
at pilatan ding palad ta ating aping mitatau;
balu ku king ing pali na manyagid king kaladua mu
uling anti yang tatamban mabilug kung pangatau.

Medalumdum...! Meramdam ya itang musikang managyag
ban king mamu nang lindayug sake kata at maglayag;
kagum niti, mibait la detang sulung mapda-sunlag
pawagang ing tulang dinam balatkayu ya aninag...!

Tinikdo ka...tinikdo ku, at king lambing ning sonata
ding bitis mu...ding bitis ku, menuklwanan la king nota;
ing salu mu...ing salu ku...kaba ning milalapat la
ing pusu mu...ing pusu ku... anting misisitsitan la.

Ing pangisnawa mung sabik dimdam ke kening lupa ku
kabang anti mung babandian ing samyung manibat kaku;
at balang singap naku man maguguna ku animu
king kananggang makalasing a ibat king katawan mu.

At kinaul ka kanaku...! Matalik... atmu katalik..!
Dimdam ku ing kulait na nitang katawan mung sabik;
Penamdaman kung balamu mapapatlud kung pamitik
a king sikan mung manigut malale laga-lagitik ...!.

At dimdam ku lang ginulis king batal ku anggang pisni
ding labi mung mibabaya a manene pangadampi
anti mu lang panintunan ban dunutan mo king api
ning pamagnasang masinsin dening migkalyap kung labi...!

Atin kang sinitsit kaku, atme gayut, atme lambing
at dimdam keng kasing katni ning gulisak a matarling
dapot itang daralung mung makabighaning saingsing
ali ke apanusigan....pekibatan ke king piling.

Mepupus ne ing musika. Linakad ka...tinuki ku
limnan me ing kekang basu, kaibat, limnan me ing kaku;
tinas talang pipungkulan, ngaku keka..., ngamu kaku:
para king tauling tipanan....mamun naka...mamun naku...!

Kaibat..., marapal kang meko...! E ka makapaniwala
king mipda ne king salu ku ing lablab ning pamagnasa;
kanita, king panirug mu, magpalimus kung mistula
o'bat ngening babie mu ngan, aku naman ing e bisa...?

Mebisa kung mikit kata, ban keting tauling tipanan
atalus mung ena naku alipan ning kekang legwan,
pablasang dening anak ku at kapilas kung katawan
e ko malyaring paglibe.... king gayut ning kasalanan.

Ing Lugud Qng Amanung Sisuan
neng EBS

Obat macanyan tamu ngan Capampangan
Ala tang masabal qng Amanung Sisuan
E ta paisaul ca reng Catagalugan
Ing salita ra yang ing dapat supilan

Migising tamu ngan quening catutuan
Ticdo at lundag ta ngan agnan agnan
Ing amanu tamu e ye rugu lalacwan
Maski nu ca rin ta mangaparas man

Y cayung memalen ning Capampangan
Queni yu na ing dapat pagumpisan
Pamanuru yu qng Amanung Sisuan
Ca reng queraclan a cayanacan

Cabuclat qng masala ning metung bingut
Pakisabyan meng aldodo lang patugut
Quening amanu tamung maybug mikutkut
Byayan ye ngan ban e tamu maglungcut

Ngeni na, e queng macadua o macatlu
Masqui pa ca cung poesiang cacatelu
Sigi pin ngana ning Isan cung Renatu
Sumulat cang poesia, prosa sundu mu

Ban mayakit ing masabal at lugud mu
Quening Amanung Sisuan tangalan tamu
E cu Capampangan dinalan porsyentu
Dapot ing lugud e mu susucdan cacu

ANINO NING NAPUN
Neng Renato B. Alzadon
2006/Junyo

Arap ning salamin, kabang aguran ke
ing malabung kung buak king ipan ning sukle,
metung yang anino ing kaku linele
at karing pago ku malugud minakbe.

"Anak" ngana kaku, "datang ya ing aldo
lugud kang mataktak, masagid, masaklo,
at ing luguran mu kabud ne mu lunto
arap ning salamin..., ing kekang anino...!

Ding amanung detang kanaku na likuan
ning ibpang mine nang aliwang karinan,
ila ding amanung ali ku kelinguan
minangga na ngening ibpa na ku naman.

At misan a aldo apagumasdan ke
arap ning salamin ing kakung pangane,
ing malabung nang buak agud-aguran ne
at pialkus-alkus king ipan ning sukle.

Linapit ku kaya at minakbe kusa
anti ing guewa na ning kanakung ibpa;
kabud ikit ko ding anino ming adua
anti kung milingat king metung a mala.

Itang anino na ning kayanakan ku
ya ngeni ing anyung atyu king anak ku,
at itang anyu na ning mal a ibpa ku
kalupa ke ngeni....., atyu ya kanaku...!

Kanian ke atalus ing kabaldugan na
nitang sinabi na kanaku kanita.
Ngana wari kaku: "Ala nang migit pa
king lugud ning ibpa king mal a anak na."

At kening anak ku..., kaibug kung sambitlan
ing kaluguran keng alang kayarlayan;
dapot ing dila ku nan' ke man pilitan
itang lugud ayta, e ne balung sabian.

Inya ngaku namu: "Anak, tandanan mu
datang ing panaun lugud kang masolu.
At ing luguran mung miguit pa king bie mu...,
arap ning salamin....ya ing anino mu...!"

Maki-dimla ya pa ing Bulan Ning Junyu
Neng Renato B. Alzadon
2006

Keni king Baltimore, kabud sinampa ya
ing Bulan ning Junyu, migbayu ing klema,
pati na ding bengi malisangan na la
balamu mo wari tutung kaleldo na.

Ing pali nang yatad ning Bulan Ning Junyu
managlus king diwa ding ka-pilipinu,
ban pagmasususian de king mata ning yatu
ing metunggue "Aldo ning Kalayan" kanu.

Nanu tang kalayan...? Ngakung manusisa.
Kasangkapan ya yan king balang magsaya...!
Ing tutu, aldo yang mengatmung palyasa
king kapampangan kung mekutud a laya...!

Kabang magbiba lang "Nuan ka Pilipinas"
kambe ning musikang king Plaza kakablas,
ing mal kung amanung king aun kukuldas
maka-kabaung yang belabalan paldas...!

E ata ing Aldo ning malayang balen
yang kayaldawan ning Mebating a Eden,
uling ing amanung kusa rang papaten
ume neng milibing king pangapaburen..!

Inya, sumangid na niting pamagsaya
ating gugulisak a payo siwala
"Kalayan..! Kalayan..!" nganang alang patna
"kalayan king kakung sisuan a salita...!"

Kabang 'tin amanung mapapatlud a bie
darala na nitang alang pamipante,
yang kalayan a yan, pagmasusian da ne
e ya mu rin magluid, pablasang e tune.

Yang tune kalayan e ya masung bakal
a gagamitan dang keng batu pamalbal;
E ya tune laya iting mipa-iral:
Biayan me ing metung....paten mo ding dakal...!

Inia ing Aldo na ning Kalayan tamu
e ya pa kaleldo king panimalad ku;
kabang manangis ya ing mal kung amanu
MAKI DIMLA YA PA ING BULAN NING JUNYU...!

At'yu Queca
Nang Edgardo Bonus Sale

At'yu queca, ing magpasyag catimawan
At'yu queca, ing daya mung Capampangan
At'yu queca, ing caladuang Capampangan
At'yu queca, paten me Amanung Siswan

Nanu ing gawan mu keng que cang cabyasnan
Bakit sasalicut mu ca reng queraclan
Palto mu ing panga Capampangan
E marapat ducu maski caninu man

At'yu queng gamat mu, at'yu queng palad mu
Ing sulu ning pusu at pamicatau
Sumulung ca, sulapo ca y ca mismu
Pabusten meng lagablab ing paritan mu

At'yu queca ing sablang capaquibatan
Nanu man pangarap buri mung parasan
At'yu queca ing susi ning caganapan
Ba cang tacman agyang dimut a canawan

Migsalbag ing grasya cabuclat ning sala
Binye na ngan ning Ginu tang maganaca
Calulu ca, macualta ca y cang bala
Sumalud queng grasya, 'bat qng Maupaya

At'yu queca nung bisa cang paytalwi pa
At'yu queca nung mag pate pate ca pa
At'yu queca nung bisa cang mani muna
At'yu queca nung bisa ca pin mibagwa

Deng Gamat Nang Tatang
Neng: Mar M. Franco, Fathers' Day 2006

Deng gamat nang Tatang manibat samula
Mebye ya ing bini keng atyan ning Inda
Mamantabe nala keng tenam nang punla
Manusig keng kagli midaysut ya mu sa

Deng gamat nang Tatang ilang peparagul
Kareng kayang supling keng yatu sinibul
Mengalyu nang palad keng obra e kurul
Ban atin ayampang kareng kayang sulul

Deng gamat nang Tatang panyu lang malambut
Karetang anak nang tatangis sisiguk
Dapot anti la mong bakal a mamaltuk
Karetang anak nang darapat baluktut

Detang kayang adwang mangasias a takde
Matigit dang kaul magsilbi lang sale
Magaspang nang palad ilang mamatnube
Ban tuntun matulid king dalan na ning bye

Y Tatang bistaman e ya bulad bulad
At ing kayang lugud e mu atimalad
Neng mangamanu yang sakdal kabanayad
King pusu ding anak kukutkut tatalab

Ing lugud ning Tatang e na pin papakit
King mapaling uma at kaul mahigpit
Mangamal regalu o bage panusig
Nune keng kabyasnan a dapat akumit

Ing Tatang babye ne itang kayang oras
Keng pamanuru nang belwan e kukupas
King laban na ning bye nukarin man miras
Anting kapiyadyan king aldo ning bukas

Y Tatang yang kabud minunang mituru
Mabyasang mibata, mabyasang manlualu
Manikwang kompyansa, magpalkas keng tutu
At matulang tupad nanu man pengaku

Ngening meragul ku at bulebulayan
Ing bye king gamat na ketang milabasan
Nung nanu ku ngeni iti kablas na ngan
Akumit kung belwan menibat kang Tatang!

KALINGWAN DA NAKA
by Tony Mercado Pena

napun …
lume kang nagud lawe
umpisa king sepu ning bitis
angga king sepu ning buwak
makakalale, alang kangye
maski ining duldul ning salu
ing saldak na malumene!

sinitsit yang migpumilit
pepasapupu ing lisangan
ning makabang gatpanapun
sinalilung king kandungan
ning manaplus mung timan!

e binang miglambat
bayu ya melabal ing silim
uyung nang Kupidu
inaptas no't sinintas
ding mikalugud tang pusu!

ngeni …
kasaguli, bilis kislap-kurap
mababating ka king kakung arapan
mamapun ne ing napun
matudtud ne ing bengi
malalagas no talulut
ding sampagang kampuput
mapapayus no paswit
ding denas king jardin
malalam na kati ing danum
misasalbag ing dulum!

bukas …
tagusgus ing masikan a uran
magsadya kung salubungan
ing mamalimpuyung agus
kanita wasan malinis ing bakas
ning kekang merimlang kaul
ding galus ning kekang aplus!

kaybat …
sabe kung magpatiyanud
kusang malugud malumud
muli karin king dayat-malat
king malwalas nang sapupunan
yang matayimik kung santungan!

DAPAT DASNAN
by John Manalili

Magdulap.
Mangapkap.
Kala-kalale takbang
Balamu metung kung taung melili
keng metung a lugal.
.

Magmasid.
Mamamakyapus.
Taka-takiki.
Inyang mapilan mung penandit,
ing karug ku salu mewala
kaybud ikit ko ring aliwang maglakbe.
.

At e mu naman melwat,
abitasa ku a e ku pala melili
nune menakit kung dakal a kayabe
papunta ketang dapat puntalan.
Lilino.
Lalapit
Ing dapat dasnan.

"Lingkas No Ring Poeta"
neng Paing

Dinatang na ing panaun miras na ing kayaktangan.
Mamag-lwal no ring poeta king lungga rang kabilyanan;
Mag-lwid ya ing Balen tamu, iting balen tamung tibwan!
Uling e malyaring lumbug ing amanung Kapampangan!

Wa man ating man manyubsub o pipilitan deng palbug.
Ing amanung Kapampangan Abe oren ding tibubus;
Oren na reng kekang kawal ding tanud king balang suluk,
Magbante lang miyamas-amas, mag-pader lang paka-tanud!

Deng poesya nang RBA, I Mar,Tony at Ed Sale.
Pader no ning Kapampangan ngening malino patune;
Mekad maka-isip nala deng ngang bisang makamate,
King amanung Kapampangan kapilan man e malyari!

I Mang Ernie yang kukumpas anti tamu mong orkestra.
King lindayug ning musika maka-akma balang nota;
Nung ating mang tatapiluk pipildis ya king teklada,
Itang kalbit nang malambing maki-sunis ka talaga.

O reta pang lalung dakal a bibitbit king amanu.
Ing pwersa na ning sikanan makakalat no king yatu;
Ing amanung Kapampangan king pami-yatbanan tamu,
Manamuyut karing lalung bisang mabyasa pang tau!

Ing masalang mayayakit karing kekatamung palad.
Makasalale ya'ing lugud kekatamu yang isadsad;
Ing kebaytan a salita ing amanung Kapampangan,
Manatili king kaladwa at king pusu kapilan man!

Mayumung Lasun
neng: Renato B. Alzadon
Banuang 1977, Kingsville

Katiwala ku mo king palsintan mu ku
at aku mung diling mal dili king bie mu;
eku inakalang at nung mirayu ku
king kekang kandungan, O' mutyang mal kaku
pyalungan mya pala ing sintang likuan ku.

Pepabukud ku mo ining kapalsintan
keka inirug kung mipnung katapatan;
pusu ku't kaladua, dangal at sikanan
alang pamikunut keka inampang ngan
liguran kang migit king indung ibatan.

E ku inisip king gawan mung mistula
ing lugud ku kekang wagas at dakila;
maili ka sinta ku...sagakgak king tula
kabang ining pusung seria mung piraya
mimalan yang paldas king bigu nang kalma.

Bustan mung kaku lang ingatan at bandian
guintu nang alala ning bie tang miralan;
ilang peka-kurus a palatandanan
king libingan naning kanakung taguimpan
at delumduman ning kakung paintungulan.

O' nung sakali man kelinguan mu na ku
babo nang kandungan ning sinta mung bayu,
dapot aku naman, ipanupaya mu
e na ka miwaglit king katandanan ku
kabang atin banua...kabang atin yatu.

Kabang atin bigang lulutang king banua
kabang atin ayup a biasang magkanta
kabang atin banglung babie ring sampaga
kabang atin aldo saslag king alaya
e ra ka kalinguan at ing milabas ta.

E ku na kalinguan ing tula ta napun
dala kung manabu king marimlang aun;
ing yumu ning sinta misan a panaun
kamandag king pusung tingkus ning pagmalun
lasun yang mayumu....mayumu yang lasun...!

Kang Islo
neng RBA
2006

Kabud abalu mung maguing tatang naka
mipda na ka kabud karing kakung mata.
Mine ku kekayu---ipangutang daka,
alang maki-balu a nung nuka minta;
agpang kang ima mu, ing kapanwalan da
abe raka Dau, ketang tuknangan ta.

Ena ka mibalik. Mag-adua nang bulan
a ing tuknangan ta e mibabayaran.
Palakuan da naku, ala kung puntalan
karin pa Bisaya ing kakung ibatan...
Magumpisa nakung daragul a atyan
Eku rugu balu ing kanakung daptan.

Mayap namu rugu atin mekasabi
a mangailangan la kanung "patipati";
Ing obra: Terak kang maki abe arti
king arkiladung 'Club" da ding "U.S Navy";
darala na nitang bie kung mamulubi
tinggap keng masaya ining obrang ini.

King obra kung ini, ken ke akilala
ing Amerikanu, Kenneth ing lagyu na;
atme kaganaka, atme pa kabasa
agyang balid ya man mangapampngan ya;
at king pepakit nang lugud at alalala
balamu anghel yang nibu na ning banua.

Malungkut ya itang istorya na king bie
itang kabislak nang pusu, mewala ne
melakuan bingut yang 'lang indung manese
paki-ilu ne mu karing siping bale,
inya makanyan nang apibulebule
kaibat ning mapilan pang banua, muli ne.

Uli pin e pane ing datang ning obra
inya maralas kung kapapaltan pera;
uling mitawli ing pamamayad upa
pepalakuan daku ketang tuknangan ta;
itang makibandi king milalung mua na
pepaugse nakung antimong basura.

Kabang maglakad kung makaduku kanuan
eku rugu balu ing kakung puntalan
mekabulad namu tin kung apungkulan
metung a lalaking maglakad mu naman
ya pala Y Kenneth, map a kapalaran
ing anghel ning banua ati ne na naman.

At selita ku pin ing milyari kaya
ing kapaglunusan kanaku binie na
tiki naku rugu keta king karela
layun inalukan dirinan nang obra
libre ku tuknangan makisueldu kupa
sesen kya sa kanu bingut pang anak na.

King bili kung ita nanu tang gawan ku
nung e tanggapan ku ing aluk na kaku;
manibat kanita binie kung suyu ku
king pibale-bale ning Amerikanu
at kening ikit nang lingap kung masolu
ing kakung panginuan aluguran naku.

At misan a aldo kaku pigtapat na
ing lugud na kaku tapat king pusu na
king ulina niti kaku inawad na
maguing kabangal ne ning kakung inawa
eku mekatanggui lalu't malapit na
aldo nang panuli bansang Amerika.

Tinuki ku kaya. King Bayung Paraiso
ikit ke nung nanu ing bie makanono;
ing pamangabyayan alus lapo-lapo
ala kang liliwan king lub ning aldo'ldo,
dapot sumgangid ning ligayang masaklo
e ra ka lubusan akalinguan, Islo.

Ngeni pin kaibat na ning dakal a banua
datang ke ning kakung anak a dalaga
king sadyang Clark Air Base subukan ming munta
bakung abalikdan ing bie ku kanita
nanutang gawan mu, nung king lugal aita,
king e ta sasaryan makapikit kata...?

Anti kung akakit, lundag yang pusu mu
kabud ikit me ing dalagang abe ku;
kanyan mo bilangan karing taliri mu
ding banuang milabas inyang milamnan ku;
mekad ken mong lubmu pikutang-kutang mu
nung ing dalagang yan yapin ing anak mu.

O'Islo. O'Islo, ing abe kung dilag
balu ne'y tatang na, tau yang matatag,
e ya anti kekang dwag da ding anggang dwag
memulaying anting kapun a damulag...!
Islo, ing anak mu..... e ke pepalaglag.....
pagkalungkutan ku....kusa nang mebalag...!

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00180

Page Updated Fri Jun 16, 2006 12:34am EDT