LIBRARY OF KAPAMPANGAN POETRY, page 33 - compiled by ERNIE C. TURLA, president, Akademya ning Kapampangan International - Languages

Table of contents:

1.Ing Mariposa - Renato B. Alzadon
2.Pakibat ning Reyna - Mar M. Franco
3.Mariposa ning Ari - Renato B. Alzadon
4.Ing Manyaklu - Ernie C. Turla
5.Ing Makisugu - Mar M. Franco
6.Ortelano, Mekakeni - Renato B. Alzadon
7.No Other Love - Renato B. Alzadon
8.Sumpang E Metupad - Mar M. Franco
9.Salamat Qng Pamicaluguran - EBS
10.Ing apu Kung Bingut - J. Manlutac
11.Pamagbalik - Renato B. Alzadon

ING MARIPOSA
neng: Renato B, Alzadon
September 11, 2005

Ing Mariposa ning Ari linwal ya king kulungan na
at linub ya king pasbul na ning ardin da ding sampaga;
mine yang dinalipakpak king arapan na ning Dalya
layun nang binie king dilag ing mayagang panalala.

Bayu ya lubusan dimpa king sampagang pangayamnan
Kitnan ne ning Mariposa nung biasa yang kapampangan;
dapot ngana ning sampaga dagul ne katagalugan
inia balid neng dila na king salitang agisingan..

Malungkut yang ginuyapgap ing Mariposa ning Ari
dapot king likuan nang ardin migbalik yang memiragli
Pablasang atuglapan ne ing sampaga na ning lahi,
ing malagung Sampaguitang king leguan makabighani.

Kitnan ne ing Sampaguita nanung balu nang amanu
Ing pekibat ning sampaga Tagalug at Ilukanu;
Ngana pa, "ing Kapampangan agyang sakdal ya kayumu
Dapot pepabustan de pung mete detang nunu tamu."

Ing Mariposa ning Ari a tatablan na ning lungkut
maibug neng lumual king pasbul ban munta ya king malaut
makanyan man pibata nang king ardin miglibut-libut
angga king akayarap ne ing marilag a Kampuput.

Lepitan ne ing sampaga at kitnan neng kipnuan lambis
nung king sabing Kapampangan makapanampang yang sunis;
Ing Kampuput pekibat na;" ken pung Tagalug at Inglis,
emu sana Kapampangan, makatuklu ku keng gulis."

Ing Mariposa ning Ari migbalik ya king kulungan
At migsulit ya king Ari at Hukum a gagalangan;
At ngana karing pekapun: " ibie yu ing kayatulan
dapat mung ituknang tane ing pyalung a Bulaklakan.."

Ing Pekibat na ning Hukum: "matampa at sukat ita
nung king sabing kapampangan ala nang bisang dalit pa;
dapot bayu ta manuklip bilang tauling pamamita
adwananan tayang gale ing ari tamung poeta."

Nganang miniabi ning Ari, "kaligayan ku pung tune,
king pyalung a Bulaklakan yampang ke ing tauling gale;
dapot bayu ku pu tupad, ing Reyna pu yang manunggue
mangadi tang kapaynawan ning amanung meangu bie!"

PAKIBAT NING REYNA
Neng: Mar M. Franco, 18 May 2006

Nganing Reynang tinambayan “bayu tamu pu mangadi
yaduan kung kekong panayan tiburan kung patipati
inutus kung magumasid panaligan kung parati
nung atin bayung balita miyaliwang kontinenti.”

Anya kabud dinatang ya patipating tiburan na
agad ya ping memalita king pakamalan nang Reyna
“pakamalan mulingid ka” magalang nang inumpisa
“ing amanu e pu mete’t e kaylangan magmalun ka”

"Kareng lugal kung pintalan, pilit de pung gagamitan
ding sundalus yung marangal paglualu deng misnang tapang
bistaman detang aliwa gilutan re at kelingwan
ding matapat yung sundalus e re kabud peimburisan

kalibudtan ding amanung makamate king sikanan
keng malati rang kagiwan karela yang pagpursigyan
nanu man ing linto sagwil e kinurul e sinuku
ban kanita ing amanu e ya tuknang mukdul pusu

nung bakit e metampus bye ing amanung pacamalan
uli ra ring miyaliwang susulat dang kawatasan
tinipun da’t pisapunggul anting metung kapagnasan
king miyaliwang bulung ning Akademyang Kapampangan

deng atagmwan kung sundalus myaliwa ing ibatan da
‘tin nang ibat Kabisayan, America at Canada
nung makananu lang mikit e ta sukat pagmulalan
uli ning karelang lugud king amanung agisingan"

nung makanyan nganing Reyna "e ta dapat malulumbe
kaluguran tang amanu kapilan man e ya mate
anggang atin tang sundalus, ing suyu da e paglibe
ing pusu ra milalablab king pamalsintang dalise

anya ngeni pulisan te itang lwa tamung mangale
kekata yang mulingiran ing Ari keng kayang gale
ing kaya ku sana yaduan ban milud ing bulaklakan
pasibayu neng palwalan Mariposang pakamalan"

MARIPOSA NING ARI
Neng Renato B. Alzadon

Tiburan neng pasibayu ning Ari ing Mariposa
ban puntan nong pakisabian ding sampaga king hardin na,
uling buri nang atalus nung nanung meguing sankan na
ning maplas nang kamatayan ning amanu nang amana.

Makaba-kaba la mu rin ding penandit a miralan
bayu ya mekapagbalik ing Mariposang tiburan,
kabud miras ya arap na ning Ari nang gagalangan
dinurup yang minie pugue king upaya na't kamalan.

O' Aring kagalang-galang", nganang minyabing banayad,
"tulutan ye pung magsulit ing tiburan yung alagad
ban atalus yung mausta nung ba't king tibuan yung labuad
ing sarili yung salita ya pang milalaman palad."

O' dale, ngana ning Ari, ipagsulit mu nung nanu
ing sangkan ning kamatayan ning kegisnan kung amanu."
Pekibat ning Mariposa: "agpang karing akutnan ku
ing amanu yang kabas na ning ardin king bakuran yu.

"Ding akutnan kung sampaga ngara pung kaku minyabi
mipaburen ya ing hardin ning kapampangan yung sabi
pablasang ding hardinerong dapat lumingap kaniti
e ra binie ing tungkul dang matapat a pamagsilbi."

'Alimbawa, inyang misan'," sabi na pu ning Kampuput"
' 'tin Hardinerung dinatang a karing sukal miglaput,
kalabas ning pilan oras kabud ne mu sinalikut
limang bulan ing milabas bayu miya pu apalsut'.

'Opu', "nganang Sampaguita", ' 'tin dinatang inyang misan
mindilig ya sinaguli kaibat saka nake likuan,
at inia pung magbalik ya ban mandilig ne na naman
ing panaun a milabas atin pung anam a bulan.

'Opu', "ngana nitang Dalya" 'makanyan ke pangasese
e mi balu nung kapilan ke miyugsyanan pagkabie;
nyang datang la detang durun a manyira't makamate
e mi balu nung nukarin ya ing kekeng Talabante.'

'Sabyan mu king Mal a Ari' "ngara ding Sampaga kaku"
'mapupuput ke inawa king sukal at alibubu,
ing hardin a mipaburen, kalupa na ning amanu
malaso yang alang sala nung ala yang Hardineru.

"Oyan pu, O' mal kung Ari ing sasabyan ding sampaga
ikayu nang balang matul nung tutu ing sasabyan da,
mamun naku pung magbalik ketang guintu kung awula
nung atin ku pang asuyu, mutus kayu pung, misan pa.

ING MANYAKLU
by Ernie C. Turla

Ating metung a manyaklu keng gripu na ning kabyasnan
Anggang binit yang bobomba para agad neng akatmwan
Lulanan nang makasalud keng danum na ning amanu
Oneng palang ing lata na tutulu ya, makananu?

Kapilan ya sapak iti nung ing busbus na maragul
Agyang bomba ne ping bomba keng obra na alang kurul
Kabang milalamnan yayti mangayugse mu ing dakal
Dapot e na pasayangnan ing pawas na ampong pagal

Iti mengari mu pu keng gagawan da reng makudta
A susulat alang patna ban magwagi ya'ing salita
Ban ataluktuk de'ing sulu ning amanu tamung sisuan
At atin lang ipamana kareng supling dang lalakwan

Dapot kareting poesya nanu rugung malilyari?
Ken lang suluk misusulmuk, makasira keng lub iti
Ot e ro mo ipaturu deti kareng estudyanti
Bangkanita naman lunto king atin lang silbi reti?

Samantala ing salita pupundat neng maybug matda
King uli ning keng iskwela e re pagamit bitasa
Deng mang anak at pengari yugse ra nya naman ata
Keng karelang bale mismu gagawan deng bali wala

Anya dapat lingapan ya, larinan ya iting busbus
Bangkanita e tatakas ing danum a mibubulus
Kabud iti atakpan ya masagip ing pipagalan
Ing kabyasnan a mesaklu maging tuba keng kanyaman

ING MAKISUGU
Neng: Mar M. Franco, 19 May 2006

Sagiwa pa kening isip ing panaun ning milabas
Kanitang ing ulaga na ning pamagpatulung pawas
Kareng taung makisugu timan yamu itang kablas
Detang taung pekisugwan panalala e kukupas

At nung pamaglipat naman kubu libutad marangle
Detang anggang sipingsiping siguradu la ngang lage
Agyang e mu la abiswan mamwat king malating bale
Kusa lang sumaup musan sikanan da isuyu de

Ngeni tutung makalumbe iting dapat mewala na
Nanu man yatang pagobran ubligadung mamayad ka
Ditak mung saup aduan mu agad dang kukwentan kwalta
Ala nang bitasang libri kalukalu leko ra na

E kalupa nyang minuna keng marangle akit mu la
Neng panaun ning bibili ortelano pisugwan da
Ing pamanyarul damulag pamanaswe keng libluban
At pamamagut sinabud anggang mayari ing tabnan

Nung ken namang pamanyaup kareng dalan manakit ka
Anak at matuang lilipat atin mantabe karela
Nung magkasakit lang mitbit ketang mabayat dang karga
Atin karela sumaup angga na king sakenan da

Ngeni mengawala na ngan ala na kang atingiran
Tibubus nang mekalingwan itang gintung kaugalyan
Kayagnan neng mitawewe mebating king pilubluban
Ing milalablab a lugud king amanung Kapampangan!

Meging maragul yang sangkan kakalulwan king balayan
Pangamate ning amanu keng dila ring Kapampangan
Mismung kareng bayung sibul keng balang pibalebale
Dening karelang pengari ing amanu pagkaymut de

Map namu atin mitagan king amanu magmasabal
Bistaman makatuknang la keng makalaut a lugal
Atin misugung magdapug atin misugung sasaklu
E la patugut kikiso ban magluid ya ing amanu

Aku bilang makisugu pamaglingap king salita
Atin kung buring pabalu parang Kapampangan daya
Keni abe tuki naka ing pagobran marakal pa
King nanu man akagiwan tula ku ing sumaup ka!

ORTELANO, MEKAKENI...!
Neng Renato B. Alzadon

Ortelano, mekakeni, king silangan, batyawan me
ing pagmulan ning kabyayan, ing malapad a marangle;
at king tagle dang sikanan ding mayupaya mung takde
buri ku sa ilinlin mu ing dikut nang mangulabe;
at ketang kabubuslan na, ing sibul na, gisingan me
ban keta ing keyang danum magus yang pakakalale.

Potang mamasa-masa ne ing gabun ketang sibul na,
e ka sana pate-pate, ing sipag mu palto mu na;
ing sudsud ning kekang sarul bustan mung pamaligtad na
itang gabun a melayo a king lingun manenaya,
at nung sasarul ka mu rin ing lub mu ibugnus mu na
e itang sarul kang ditak, kaibat, dakal ing paynawa.

Yang byasa keng pamanyarul abistu meng agad-agad
king takbang nang makarima, makasunis, makasukad;
itang eya mamirapal dapot ene man banayad
atyu ya king kasantingan itang kayang pamanlakad,
inya agyang malambatan ing sarulan e sasayad
uling balu nang timtiman nung nukarin ya misadsad.

Yan namang e byasang sarul, kimut na pabisu-bisu
anti yang makitagalan, ala nemang kasaglulu;
inia potang makatangtang ing sarulan, kabud nemu
sunga-sunga king kapagal, bisang magpainawa pamu;
makanano malata ne karing pawas nang tinulu
uling ing pamanyarul na, masagwang pasakdu-sakdu.

Yang gabun balu na naman nung ustu ya panga-obra
kaibat na ning pamanyarul atme kamu yang lupa na,
akit mu itang sepuling pante-pante, pila-pila...
nanan me ta yang poesiang atmu santing pangalala,
yan mang gabun nung ustu ya pangagalo, magana ya
at yang bining mipunla ken dagul at mataba bunga.

Kaibat na ning pamanyarul, ita, e na buring sabian
ing muli ka king kubu mu ban matudtud kang maniaman;
yang biasa keng pamanasik ene lakwan ing asikan
at manintun ya pang bague a sukat na sanang daptan;
nung atin man tagubana panikuanan nong atakpan
ban ing danum naning sibul e miyugse, matipun ngan.

Potang mitakap ing silim, at ing gabun paynawa ne
ikaman paynawa na ka at muli king kekang bale;
dapot kabuklat ning abak, gayak ka, at agad lague
ban keta ikang mangising king matudtud a marangle,
ing sepuling makababad kaba ning palambutan me
mamalimping ka't magdaras, karin pilapil manyable.

Oyan, Budning Ortelano, nung masipag ka, keka ya
ing malwalas a asikan ning tagumpe at ligaya;
dapot nung angga kamu keng sarul ditak at paynawa
ena ka pa mu dudulung, king aliwa na ka munta;
ngeni nung king pamanasik makisipagan kang dala
oini ing kanakung gabon, mekakeni, sarul na ka!

No Other Love
Neng: Renato B. Alzadon
11/18/05

Ala nang aliwang sinta king pusu ku nune ika
Alang ligaya king bie ku nung king siping ku ala ka;
Bulan kung manamdam sala, keka, aldo ning alaya
Gabun kung manamdam ambun, keka, banua ning ligaya.

Ding timan ku nula ibat? Ibat la king kekang timan
Ing sikan ku nu ta ibat? Ibat king kekang sikanan;
King ulina ning timan mu, migkamit kung kaligayan
King ulining sikanan mu, ing mabayat meging mayan.

Keka ibat ining tulang miglayunan king pusu ku
Inya pamatulan daka king tulang binie mu kaku;
Keka menibat ing pali ning lugud a mitatau
Inya ing lugud ku keka malabab king pangatau

Ing banua, inia banua ya kaku, uling ikang batwin
Ing hardin, inia hardin ya kaku, rosa ka king hardin;
Ing banua, ali ke buri, nung era ka abe karin
Ing hardin, ali ke buri, nung dili kung mag-imain.

Eke buri ing Paraiso, nanan keta, nung ala ka
Buri kune ing Kalbaryo, siping ku ati ka sana;
Eke buri ing palasyo, nung ing kalibe na, ika
Buri kune ining dampa, keni ikang kakung Reyna.

Nung ati ka king siping ku sablang bague atyu na ngan
Nung ikang ala king bie ku lungkut ku emu asukdan
Nung Eva ka king siping ku king bie ala nang kailangan
Nung ikang ala king bie ku, pekamalungkut kung Adan.

Inya ing bie ku durugang kayabe rakang gagalo
Nung ati ku kalalaman ika itang magpatilo;
Inya ing bie ku durugang kayabe rakang titikdo
Nung ati ku king dalumdum ikang sinag na ning aldo.

Nung batis ku king tula mu , sibul da ka king ligaya
kekaya ing taguimpan ku, ing taguimpan mu kaku ya;
Nung keka babie kung diwa, kaku babie kang pag-asa
Keka ya ing kakung lugma, bandi ku ing kekang dusa.

Alanang aliwang sintang miguit king yumu at sampat
King pamyutus a mayubu, pamiyaduangan a tapat;
Alanang aliwang sintang lusuk at karapatdapat
king pamyusig a pisulu, king diwa ampon king dapat.

SUMPANG E METUPAD
(Pakibat keng "No Other Love" nang Poeta RBA)
Neng: Mar M. Franco, 25 May 2006

Kayumu napin ning sintang impang mu kaku kanita
Ngamu nung ala king siping ala ing kekang ligaya
Ngamu akung aldo saslag ketang bye mung alang sala
Ngamu aku itang ambun keng gabun mu pasaguiwa

Itang sablang mangayumu kanaku mu ngan pepasyag
Kanita ing kakung pusu layun meng akua’t abihag
Itang sablang mangalagu kanaku mu kinumpara
Kanita ing kakung pusu malaus neng muli keka

Karing yumu ring pangaku ikwa kung mebunglu salu
Karing yampang mung sampaga lubus mu nakung asilu
Karing lamyus ding amanu ikua mu kung apatangu
E ke amulingiran man paganaka na ning indu

Ngeni nanu ing milyari karetang kekang pengaku?
Kaibat ning mapilan bulan ning kekatang pamisulu
Sasalikut mung ugali tunggal ditak papalto mu
Ing matuling nang alino ning tune mung pangatau!

Ala nakang pakundangan keng kakung kapanamdaman
Ditak mung pamagkamali agad mu kung pansakitan
Megari mo ketang misan nasing tinun kung apunan
uling e mamusal-musal tumbuk kaku mu petakman

Pota sanang sumpung neman alimpuyut na ning laman
Kanita ka mo maglambis agyang benging kapitangan
Balamu turing mu kaku metung ku mung kasangkapan
A malyari mung gamitan nanu mang oras imbutan

Nanu tang pengakung sinta nukarin ya ing ligaya?
Ing binie mung galal kaku ala yang kapante dusa!
Kapilan ku mitimawa keng bye mikutkut king lugma?
Siguru king kamatayan mayari na'ing sabla-sabla!

SALAMAT QNG PAMICALUGURAN
neng EBS

Atatandanan cu pa, primerung miquit tamu
Banwang 1993 nung e cu magcamaling tantu
Cayabe que ing asawa cu at metung pang tau
Ya pin y Leticia Mendoza, a caclasi tamu

Mitmu qng saya at cusuelu ing pimirungut rungut
Cuentu queni, daldal keta a la tamung patugut
Memigsu tana quelingwan pin pati ing apunan
Caya mabilis at malagwang inapag ing pamangan

Caybat ning apunan at meyaring migmayumu
Sindu tana nanam ing queca tamung cuentu
Alang patna reng cutang a paquibatan cu
Pati na ing oras acalimbatawan tamu

Canini pin megumpisa pamicaluguran ta
Iti pacamalan cu masqui nu ca rin cata
Bista man malaut ca, mapicandayu ta na
Ing queraclan tang "memories" melacwan pa

Y ca Reynaldo Maniago, caluguran co
At y Donna maganacang cayaduangan mo
Angad queca yu, masayang pamagretiro
Qng balen San Fernando a tucnangan yo.

Dacal salamat quing pamicaluguran ta
Capilan man at qng a lang angga angga
Miqui abe lungcut at saya pamicawani ta
Ini e ya sangcan para calingwan daca

Ing Apu Kung Bingut
JManlutac

Aliwa 'yang pekamasanting a ikit yu
Karing sablang bingut king syudad o baryu
Aliwa 'ya naman ing gagawan modelu
Subali 'yang pekamanayun para kaku

Ing katawan nang e mataba, katamtaman
Maliksi king kimut keng tablang kukusaran
Masaya at magana king pamamangan
Kaya siguru e ne man misasalunan

Ding mata nang paneng maili at asmu kabye
Arku ra ring kileng ginulis makabage
Labing makatiman, pisnging malutu kule
Lupa nang maamu, mala-pusu ya korte

Ala yang gagawan kilub ning patingapun
Nune mamangan, matudtud at mamiyalung
Kukusad, gagapang, mamalebe keng dutung
Pagal ning magbante, sasyo yang bubulung

Ining bingut a apu makapagal ya man
Potang maglambis ne asne king kanyaman
E me paglibe king nanu mang pibandian
Tutu yang maulaga ing tubu king puhunan

Sobra ya kalabit ala keng aintindian
Kakatmuan neng tula ing bale kabilugan
Kiyak at kulisak, sagakgak damdaman
Uma at kaul na maglako kapagalan

Katukup ning silim datangan ne ning tundu
Maligwang mipatudtud king pago nang impu
Angel dela Guardia na magbante magsolu
Masigla yang migising king aldo a bayu

Pamagbalik
Neng: Renato B. Alzadon

Ugtung aldo tapat---tajimik king baryu
Ala kang damdaman inge agyang nanu;
Atilu ngan ata king bale deng tau,
Kilung do ngan ata king bale deng asu!

King katajimikan kabud na memaltuk
Tikian ning lagapak at matning lagutuk!
Mikit ing akbungan! Balas la ding sisyuk---!
Pakasakab tamung makasubsub buntuk.

Eta mu bubulad. Eta mu sasabi,
Agyang balu tana nung nanung milyari.
Makasane tana king anti kanini:
Milaban no naman ding Hukbu at PC.

Penapenandit mu ing tangking kukurug
Ya ing lito-lito king gabun durugdug;
Kabang lilibut yang mamamalipugpug
Anti lang bebewan ding salu tang kakdug.

Biglang menahimik. Tinuknang ing akbung.
Dinayu ne itang tangking daragundung;
Kanian ya maramdam ing matning galeung!!!
Ketang bale galut, manangis ya’y Bilyung.

Meki-iglo tamung alang pamikunut.
Kaibat ning akbungan, ala tanang takut.
Ing tengalan tamu makapangilabut---!!!
Mebaril ya rugu atyan ing mabuktut.

Libu syam a ralan pitung pulu’t lima
Iniang mapalyari ing trajedyang ita.
Kaibat nang milibing ning kayang asawa.
Y Bilyung, king baryu ene linto lupa.

Ngara ding aliwa minta ya king Cebu,
Ding aliwa naman, king Palawan kanu.
Menga-alilan no dening gugubyernu
Bitasang aliya siniput king baryu.

Kaibat ning panaun ning pamanahimik
Mibalik no naman ding tropang mabagsik;
Itang kaselanan kabud na migbalik;
King pamagbalik na, mataram ya pitik.

Banda king Pangulu atmu na kagulu
Dakal no na naman pamaten dang tau.
Lalto makalunus itang Ortelanu
E ta makatanam pale ampon atbu.

E ta pa mibawi king pamagkasakit
Magbalik na naman ing pamamalipit.
Ala tang keliwan karing makasipit
Pilatan ding aduang batung mipamitpit.

Ngara ding makatua---detang mekatanda
Ketang panaun na ning salwakan daya:
"O'bat kaya rugo e tana sinawa
King pane patayan at pamanganyaya."

"Oyan, ing patayan mengari yang bagyu
Papunta ya keni king kekatang baryu;
Magdatun no naman king bale deng tau,
Magkulung no naman king bale deng asu."

At misan a aldo kabud na memaltuk!
Milaban no naman ding PC at ding Huk;
Ba'tang mipanginlag king balas a sisyuk
Pakasakab tamung pakasubsub buntuk.

Ati ne na naman ing Tangking kakarag
Anti yang manintun bale pamaliswag;
Anggang e dinayu ali ya mepagpag
Ing sindak king lub da ding salung kakabag!
Penapenadit mu ala nang akbungan
Ala tamung takut linague king dalan;
Buri tang abalu nung ninu la’t pilan
Ding miragsang mete king pamibarilan.

Karetang miragsa keni king padulung,
Kabud tana atin akilalang metung;
Inia pala keni marakal ing akbung
Tidtaran deng balas Y KUMANDER BILYUNG---!!!

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00274

Page Updated Thu Jun 8, 2006 7:08pm EDT