Table of Contents:
1. Poesia Para Qng Aldo Ring Indu - Mar M. Franco
2. Ing Indu - Renato B. Alzadon
3. Cang ysiaD, Ing Canacung Sinta - Mar M. Franco
4. C O K ORTOGRAPICA? - Libutadcu (helen dizon)
5. Panukala for Center for Kapampangan Studies - Libutadcu
6. Ninu Iyacu, Ninu Ica O Dios Co - Libutadcu
7. Hesus Ning Kakung Bie - Rick David
8. Nanu Ya Ing Poesia? - Rafael D. Maniago
9. Deng Lupa Ning Indu - Rolando de Jesus
10.Alun - Renato B. Alzadon
11.Sulu Ning Pusu - Elpidio Rivera
12.Kakang Barang - Tony M. Pena
POESIA PARA QNG ALDO RING INDU
Mar M. Franco, May 2006
Iting aldo quecatamung pagcelebran
Pariquil caring pengaring cababainan
Mausta’t masampat ta lang parangalan
Bie calam ning Igpa carela dinalan
Cacargan na ca pa quetang cayang atyan
Pibabata na na itang sablang tical
Panaregla na na sabla mung cailangan
Anting capiadyan na qng quecang panyatang
Cabud casapwak mu queti qng masala
Selubung na queca lugud ampong tula
Bistaman masaquit ing cayang delanan
Caring cayang tacde agad nang quinargan
Bingut nang mibait agad nang pesusuan
Panulu nang gatas caya na inampang
Qng nanu mang saquit maustang panlaban
Itang colostrum nang bucud nang sinimpan
Ing lusuc nang lugud yang queca peragul
Matulid a dalan queca na yayatul
Dapot nanung ablas ing caya peyacmul
Ditac mung e buri agad cang magmactul
Ngening meragul ca, y Indu metua ne
Ngening abut mu na itang sablang bague
Pati mataluktuk e abut ning lawe
Icua mu nang disnan qng quecang tagumpe
Nucarin ne y Indu obat quelingwan me?
Nucarin ing lugud queca na penese?
Nanung ayablas mu neng ngeni maina ne?
Nanung apupul na qng puhunan nang bie?
Anggang e pa tauli anac nang liguran
Indu mung malugud queca yang lingapan
Itang cayang lugud at queca pacamal
Queca yang ibalic at caya iyampang
Pacaisipan mu anac nang macamal
E me cacalingwan ing matuang casebian
Itang e maliquid qng cayang ibatan
E na acuang miras qng cayang puntalan
Ing Indu
neng: Renato B. Alzadon
Mothers Day 2006
Nanu ya ing indu...? Metung yang himala
a kena ning Guinu keti king masala;
ban karing dapat nang makapagmulala
akit taya gamat ing Dios a Bathala...!
Gamat lang malugud detang makakilik
king bungsung inirug matudtud tahimik.
Malamyus nang aplus at manene tapik,
ebanghelyo no ning banal a tangklik...!
Kagising ning bungsu, nanu tang gawan na...?
Ban ene damdaman gumaga mo sana,
ing sariling dayang ibat king salu na
ibie nang pamangan king bungsung anak na...!
Potang ing bungsu na ya ing manamdaman
akit me yang indu e miratun dit man.
Nung agawa nasa, ya nang misalunan
at ining bungsu na kumit yang sikanan...!
At potang lungub neng mag-aral ing bungsu
mantabe lang tapat ding gamat ning indu.
Pablasang imbut nang ing daya nang pusu,
king pamag-aral na, akua nang misundu.
Pibata na itang dusa ampon sakit
o aldukan kaya ing peka-mapait,
nung ing katumbalas ning pamagkasakit
akit ne ing bungsung king tula magkamit.
Nanu ing galal na ning keyang pagbitkil...?
Inirug nang bungsu yapang lunto sawil...!
Dapot, numan anti ing dapat nang ingsil,
ding gamat ning indu...., ali re asakwil...!
King akakit tang yan, nanu pang misteryu...?
Ding gamat ning Banua atyu la king yatu...!
Nung buri yong akit ding gamat ning Guinu,
lawan yu la gamat.... dening indu tamu...!
Cang ysiaD, Ing Canacung Sinta
Neng: Mar M. Franco, May 5, 2006
E cu pa quelingwan munang pamiquit ta
Carin UST Main Building cafeteria
Ing abe mu obra cacaluguran ta
Ya ing meging sangcan ning pamiquilala
“Oini y ysiaD” nga nang pequilala
Cacaluguran tang pareu mingatba
“Ya y Mar Franco” nga ning selisi na
“Cabalen ya naman bait qng Pampanga”
“Hello! Comusta ca?” nga cung megumpisa
“Mayap naman, Ica?” nga mu nang minatba
Sabe galamanu ding adwang gamat ta
Cabang acu naman e ca patdan mata
“Nanung cacuanan mu?” nga mu nang mengutang
“Inyero Civil mu”, nga cung tinambayan
“Yacu Accountancy“ nga mung migprisinta
“At working student quening cafeteria”
“Yacu man magobra” nga cung mequiquiapus
“Carin qng Public Works lele Intramuros”
Qng saquit na ning bie culang la panustus
Matuang ortelano malucang tibubus
Oras miquelangan ing pamicatagun
Malapit mirienda na ning gatpanapun
Qng malambing bosis agad na cang memun
Ban queta cuma cang nanu mang apainum
Cabang pagumasdan ing quecang panyatang
Aniang magdala cang sorbeting meriendan
E cu apansinan yaluc mung pamangan
Memalicmata cu quetang quecang leguan
Qng pangarine cu qng pamamansin mu
Guewa cu nang sangcan ing acu mabsi cu
Qng e mu mu balu maplas ne’ing atyan cu
Uling itang tutu e cu pa meugtu
“Agyang mabsi ca pa” nga mu nang mengulit
“Sige na canan mu yampang cung sorbetis”
Qng lagu mu timan icua cung mepilit
Cabang cacanan cu lihim cang gigigit
Cayari cung mengan quetang inapag mu
Dimdam cung cusuelu e mu anting nanu
Cabang liligpit mo cuchara at basu
Anti cung duduyan qng ulap que babo
Cabang lalacad cang macagulut meco
Apagumasdan que buldit mung mapuclo
A babagayan da puad mung misnang layo
Pati na butit mung puti macasilo
Cauli cu bale agad qng inaus
Cacaluguran ta qng ba queng abalus
Itang telepono na ning tucnangan mu
Ban queca asabi daralan qng lub cu
Cabud mequibat ca qng pamanaus cu
Melacas ya cabug curug ning pusu cu
Itang pamalsintang pinana canacu
Agad cung pigtapat at yang quebigla mu
Bigla cung mecacac qng quecang pequibat
Cabud sinabi mung manayang malambat
Quecang pamagaral muna pang ilabas
Bayu me pabalu lugud mung paquibat
“Aguiang pilan banua apanenaya cu”
Ngacung tinambayan quing quecang amanu
“Acu man arian pa ing pamagaral cu
Ban ating panese qng asawanan cu”
Qng sinabi mung yan ngamung mengamanu
“Ing pusu cu ngeni queca ya babie cu
Macapanaya ya qng pamagyari mu
E ca sa malsinta bucud pa canacu“
Meging ispirasyun ing pengacung sinta
E pansin milabas itang atlung banua
Meging Inyeru cu, ica CPA ca
Canian cu suguiran itang pisabi ta
Malambing ca timan anyang cutnan da ca
Pusu ta mitali qng pengacung sinta
Agad tanang pemun ing pamicasal ta
Quecatang pengari todu ing suporta
Mipapacaili cung apibulebule
Itang bie milabas quecatang piabe
Masayang tibubus, alang puwang lumbe
Pisulu ing lugud at bie matiwase
Pablasang pundasyun at pecatuntunan
Tune pamicalugud at catapatan
Apat lang lalaqui quecatang pipulan
Gracia ning Miglalang quecatang acamtan
C O K ORTOGRAPICA?
by libutadcu (helen dizon)
BALACU MO WARI,
QUENING PANAUN A ITI,
QNG IDAD TAMUNG INI,
BIASA TA NANG SUMURI, MANINTINDI.
QNG NANU MAN BALUKTUT, MAQUITID,
PISASABYAN MAYAN AT MASULIT,
LITERATURA, PULITICA, SIENSA, SAQUIT,
CARING TAUNG MAMAGLUID, MANGAGIPIT.
QUENING PISASABYAN AMANUNG SISUAN,
IYACU LILIBUTAD CU, QUECAYU NGAN,
ALA CUNG Y TULAC, ECU MANGABIRAN,
IPASUALA CUMU, ING CATULIRAN.
PUPUGAYAN DACO NGAN,
AKKAP, ALIBATA, DILA, K-LIST, BATIAUAN,
CACUNG PANIUALAN, QUECAYUNG PAKIRASAN,
CALARAMAN MAN O CATUTUAN.
NUNG CALARAMAN ITI,
E NA MAN MANATILI,
ING TUTU, LUNTO YA AT LUNTO,
NGENI, MACADUA, AT ALIUANG ALDO.
MEBIASA CU, CALUPA CULAMU,
QUECAYUNG ANAC A TUTURU,
QUECAYU, NGENI CUPA ABALU,
PIPUMPUNAN NING AMANU.
INING C O K ORTOGRAPICO,
‘DIACRITICAL MARKS’ NING AMANUNG SISUAN,
MANAQUIT CAYUNG PAMAGLOCO?
MANAQUIT CAYUNG CALARAMAN?
QNG AMANUNG SISUAN,
QUENING PISASABYAN,
BALAMU METUNG YANG LIGLIGAN,
CARING MENGABIASANG CAPAMPANGAN.
ISANUNG ING PILILIGLIGAN?
ING QUECAYUNG CABIASNAN?
O DING PERA YUNG DACAL?
O ING PUSISYUN YUNG SOSYAL, PULITICAL?
NANU ING MEGUING MASAMPAT A BASI-AN,
ING MESALICSIC (RESEARCH) A CASULATAN?
ING TAUNG MASYAS A CATULIRAN,
O ING MASYAS A CAPIT QNG MANUNGCULAN?
NUNG ALA MAN CARETI,
NANUNG SANGCAN ERA PAMIABEABE RETI?
DING SALICSIC (RESEARCH) A MENGASULAT?
NING BATIAUAN, ALIBATA, K-LIST, DILA, AKKAP?
ASAMBITLA CUNA QUECAYU,
ANGGANG SALICSIC (RESEARCHES) MASAMPAT LA CACU,
CARING MATUA, ANAC, AT QUECAYU,
GAMITAN TALA NGAN QNG BURI TAMU.
SABI DA CANU MAGCASAQUIT LA,
DING ANAC QNG ISCUELA,
QNG C ORTOGRAPICA,
TALACARAN CU NA MAYAN YA.
ICAMING MIBAYIT QNG C ORTOGRAPICA,
Y IMA CUNG MAYGIT DINALAN NA,
ANGGA MAN NGENI GAGAMITAN MIYA,
EMIYA MAN PEGARALAN QNG ISCUELA.
E CU AYABUT, MANGAPAMULALA,
QUENING QUECAYUNG PANUCALA,
AMANUNG MATUA, PAPATEN YE, Y QUE PA,
MABIE QUEPA, MABIE C ORTOGRAPICA,
E YU WARI ATATANDANAN, PANAUN A ITA?
NUNG MACANANU TAMUNG MEGUMPISA,
MANIBAT UAM BI, ANGGANG MAG GRADUADO TANA?
PURUS INGLIS ING TIRU DA RING MAESTRA?
NANU NGENI ING PAGCASAQUITAN,
DING MAESTRA, AT DING CAYANACAN?
NUNG QUECAYUNG PACAISIPAN,
PALAC LANG MABILIS QNG CABIASNAN.
BAQUIT MO PICACAWANI LA,
SALIKSIC NING BATIAUAN, ALIBATA,
K-LIST, AKKAP, AT DILA, DING ALIUA PA,
CARING SALUCUYAN LIBRUNG LITERATURA?
DETING MIYAYALIUANG APTAS,
METUNG MU ING CARELANG IYAGCAS,
E YA MASAULAULA, E NE MADACURAC!!!!!
MANATILI YANG MABIE AMANUNG GINGCAS!!!!!.
C O K ORTOGRAPICA, DIACRITICAL A MARCA,
MATUANG TRADISYUN MISULAT LA O ALI LA,
ULIT ULIT A PANAUN MIPASA PASA LA,
CARING KAAPU APUAN NING PAMPANGA.
DAPAT LANG MIYABE AT MISULAT,
CARING ANGGANG LIBRUNG MISUSULAT,
CARING ANGGANG ISCUELA, MABABA AT MATAS,
MABALU CARING SABLANG ANAC!!!!!!
CABALEN, MAGLUID YA MAN ING K ORTOGRAPICA,
NUNG MAGAMIT LA DING DIACRITICAL A MARCA,
MAS MALAGO YA PANGAYALIWA’T PANGILALA,
AMANUNG TAMUNG SISUAN, ELIGANTI YAPA.
PAQUISABING MAYAP,
NINUMAN AT NUCARIN COMA IBAT,
BISTA’T E RA COMAN ACAYARAP,
PANIUALAN MI MAYAP AT MASAMPAT.
BURI MI PASANANG ADUAN,
QUECAYUNG CABALEN PARANGALAN,
E SANA RUGU MAGUING SANGCAN,
TAUNG ATIN PAINTUNGULAN, E DAPAT PUTUTAN.
NANUNG CABALDUGAN NING ANGGANG PAGNASAN,
NUNG ITAMU TAMUNG TAUNG CAPAMPANGAN,
E MISASANMETUNG, MIPAMATE PAINTUNGULAN,
SAMANTALANG METUNG MU ING PAQUIRASAN.
BALUCU MO WARI, AINTINDIAN TANA ING BILI,
NING BANSANG PILIPINAS, PURUS GULU ING MAPIPILI,
TUTUNG TUTU, PANE ADUA ING MIPAPARTI,
TUTUNG TUTU METUNG MU NAMAN ING PAQUE.
QUETASAN AT MUA, MASAQUIT WARING ITABILI?
ING DAPAT MANATILI LUGUD TAU AT QNG SARILI,
CATULIRAN MU CAYA, TITIMBANGAN PANE,
CARIN TAMU QNG LIBUTAD MANANTABE?
PANUKALA KING CENTER FOR KAPAMPANGAN STUDIES
by libutadcu
KING LAGYU MU MESIMPATYA NA KU,
EKE PAMAN IKIT, ATIN NA KUNG BALU,
ANGYANG ALA KUPANG ABASA MASKI NANU,
MALAPAD AT MALALAM, PAKIRASAN MU BALEN KU.
KING SIMPLI KUNG PAMANISIP,
KING LAGYU MU MAKADUKIT,
BAByE KU SANG MANYALIKSIK,
KARING LULUGUD A MATIGIK.
ING PAKIRASAN MU, BALEN KU,
MAGLUID KA EMU KING AMANU,
EKUNUMYA, SOSYAL, BIE SPIRITU,
LALUNA KING EDUKASYUN DING TAU.
KENG MENGALABAS A PANAUN,
BALEN, AKAKIT MU, EMU MIPAINTAGUN,
INISIP MU, MASANTING YA PUSISYUN,
KING MAPA, PABOR YA KARING MAGDIGATUN.
TAU ILOCOS, PANGASINAN, TARLAC,
BAGUIO, BATAAN, OLONGAPO, DACAL LANG LINIPAT,
CAVITE, MENILA, BULACAN, BATANGAS,
KING PAMPANGA IKIT DA GINTO AT PILAK.
MAKAPALIBUTAD YA ING PAMPANGA,
NUNG KING KATULIRAN, ING KATUTUAN NA,
TAUNG KAPAMPANGAN MESILO AT MEBULAG YA,
ENALA IKIT DING GINTO’T PILAK KING BALEN NA.
DACAL A MESIRA, DACAL A MEUALA,
DING MAKATUA, DING KAYANAKAN LALUNA,
KELINGUAN DA ING MINUNA, ERE BALU ING AMANU RA,
SELAULA DE ING AMANU, MEGING ‘PAMPALOG’ (PAMPANGO/TAGALOG) YA.
NGENING SALUCUYAN, METE TAMUNG MABIE,
MANIGAPU TAMU, KABUD TAMU MAKALELE,
ING PANIGAPU TAMU, PURUS MUNG PATE,
MITAGAN AT TALAKAD YA, ‘MATERIALES FUERTE’
DACAL TAMU APTAS, METUNG LAMU IYAGKAS,
ING MAKATULA, PURU LANGAN MANGATAS,
KABIASNAN, PULITIKA, O PERA ING ARMAS,
KING DEBATE, MEKALINGUAN LA DING GINTO’T PILAK.
DING GINTO AT PILAK, IYAPIN ING KABILUGAN
NING BALEN PAMPANGA, KEKATAMUNG IBATAN,
EWARI ING LALABAN, MANATILI YANG PABYAYAN,
EMU ING PAMIBIEBIE, LALUNA ING AMANUNG SISUAN?
KABANG PIPAPATEN TAYA ING AMANUNG SISUAN,
KING PUSISYUN PULITIKA, PERA AT KABIYASNAN,
DING DAYU MIGTAMASA, ERA PETUGUTAN SISIMUTAN,
GINTO AT PILAK, AT SAKA RA KATAMU KAYLIAN.
‘CENTER OF KAPAMPANGAN STUDIES’,
PAGMARAGUL DAKA AT PAGMALASAKIT,
PARA KARING ANAK A MANYALIKSIK,
KING KATUTUAN MU, A MAYAYAKIT.
CKS, LAGYU MU, IKA ING MANANTABE,
TUPARAN MU ING PAKE MUNG TUNE,
MAMILATAN KA KING MINUNANG BIE,
ISUNDU MU ANGGA ATING MANALILI.
ULING SENTRO KANG PAMAGARAL NGAMU KABUD,
DING MANYALIKSIK KEKA RA NGAN IBALDUG,
OBRA MU, Y AREGLA IMPORMASYUN MIBUBULUG,
ALA KANG TUTULAK, E MANGABIRAN PABURITUNG MANUK.
BALANG METUNG ATIN YANG KAPAMAUAN (?) (CREATIVITY),
KING MESIYASAT, MESALIKSIK A KASULATAN,
DING MANYALIKSIK MIYAYABE LANG PARANGALAN,
PUSISYUNG KING SENTRU NING PAMAGARAL.
ING SENTRU EYA MAKAPAGDILIDILI,
ALA YANG KABALDUGAN NUNG ALALU RETI,
DING MENYASAT, MENYALIKSIK KING MINUNANG BIE,
DING MAGARAL, KARING MIKABALU LA MAGDEPENDE.
ASAMBITLA KUNA KEKAYU,
ITI IYAPIN ING SANGKAN, LIBUTAD KU,
ING EYU AKAKIT, AKAKIT KU,
MIGISING KA, KABALEN KO !!!!
NINU IYACU, NINU ICA O DIOS CO?? - libutadcu
CANG TATA CU, CANG IMA CU,
QUING TALATURU, CARING CACLASI CU,
CARING MAMUNTUCAN NING BALEN CU,
CARING PARI O MINISTRU.
CARING MANGABIASANG TAU,
CARING MANGALALAM A LIBRU,
METUNG MU ING SASABIAN DA CACU,
“ING DIOS ATYU CANACU.”
NGA NANG IMA CU,
LELANGAN MUCUNG CALUPA MU,
E CA TAU, METUNG CANG SPIRITU,
MAYAN CANG LUNGUB CANACU.
KAPAMILATAN NING SPIRITU SANTU,
ING CALADUA CU MICATAUAN TAU,
BANUA’T LABUAD, MABILUG A YATU,
PAMAGLALANG, PAMIPALTUTU.
CABABO NING PAQUIBAT,
CALALAM NING UYAT,
CAYAN NING CABALDUGAN,
CALALAM NANG PANISIPAN.
NGA CUNG MIGUNAMGUNAM,
MURA CUNG CAISIPAN,
CARING LALAM DING TANAMAN,
METUNG METUNG PAGUMASDAN.
ATIN ALDUC ING DIMDAM CU,
CAYAN NANG CAYAN NING SARILI CO,
MENGAPAMULALA CU,
ABA! OBA’T ATYU CU BABO!
AYUP CUNG SULASULAPO,
MARIPOSANG CUNG CULE DILO,
ASAN CUNG CAUECAUE, GATOGATO,
BERDI CUNG DICUT, BIGANG ASUL BABO YATO.
PASPAS PASPAS CUNG ALUN DAGAT,
BIYUNG CUNG HANGIN CARING PALAPAT,
CACANTA CUNG AYUP PANGA ABAC,
URAN CUNG MASICAN, PAPATAK.
MILINGA’T CU PINAPINANDIT,
E NA CU BISANG MAGBALIC,
QNG CATAUAN CUNG MANAIMIC,
MITACUTAN BINA AT MINISIP.
NANU ITI O DIOS CO? !!
METUNG CUNG TAU O SPIRITU?
NUNG LELANGAN MUCUNG CALUPA MU?
IYACU ICA, ICA IYACO?
NANU MAN ING MILYARI,
ISINUP CU QNG SARILI,
ISIP CU ING IMPORTANTI,
METUNG CU CARING MASUERTI.
BALU CU NA NGENI’T CAPILANMAN,
TUTU MAN, O GUNAM GUNAM,
DIOS CO QNG QUECANG KAPAMILATAN,
SPIRITU SANTU IPALTUTU NA NGAN.
NUNG CACU PANG PANYABYAN,
ALIUANG E MACAPANIUALANG DELANAN,
ALA CUNG AMANUNG IYAMPANG,
ING CATIMBANG ALA MUNAMAN.
ING LAGUIO NING DIOS EYA ASUGLUNGAN,
NUNG SUGLUNGAN YA, CUMITID YA CAYARIAN,
ALA YANG PENIBATAN, ALA YANG CAPUPUSAN,
ING MAYAN, AMANUNG DIOS, QNG DIUA (CONSCIOUSNESS) CU MIPALTUTU NGAN.
NGA CU UARI CANITA, CABABO MO,
PAQUI INTINDIAN, CALALAM MO,
ATYU CA QNG LUAL, ATYU CA QUILUB CO,
BALU CUNA NUNG NUCARIN CA, DIOS CO!!!!
from Rick David:
Aslag na ning abac
Bulus na na ning uran
Tsup na ning gatpanapun
Aslag na ning Bulan
Batis a malino
Dagat kule asul
Siwala ning kaluguran
Tumayla ning Indu
Pag asa ning ulila
Takde ning kalulu
Sulu ning tatakut
Kapaldanan ning masakit
ibat king kantang "hesus ng aking buhay",
the best of himig heswita album
NANU YA ING POESIA?
neng Paing
Nanu ya ing poesia?
Bunga niang paninap ning taung makudta;
Angin yang marimla,
King mula ning Edeng dakal a sampaga...
Malino yang bula,
A gagato-gato king pampang ning sapa.
Maputi yang biga,
King banwang matilo a manatad sala!
Karing Kapampangan...
Karing mamoesia bina yang malalam;
Talaga ya wari,
Ing sibul na niti alang kapupusan.
Sukad yang makaba,
Manibat king isa anggang katatawlian.
Mayumu yang dila,
Pagtumayla raka king kekang pagkeran.
Nanung ulaga na?
Nung ing Kapampangan ena no babatyon...
Deti nang poesia,
A babie ligaya king pusung magmalun;
Karing manamdaman,
Panaplak yang sakit at bie yang panyuglung.
Ing amanung siswan,
Yan ing Kapampangan king kabang panaun.
DENG LUPA NING INDU
Neng Tiakbong 05/09/06
Ing Indung melalang marakal ya lupa
Daig ya'ng diyamante, nung pakintaban pa
Matibe yang asias, maralas banting ya
Tune ka pin Indu, sulu ning pamilya.
Ing metung a Indu, keng kapigaganakan
Mikuldas ne'ing pusad, anak ibat atiyan
Panamdam ning anak, panamdam na na naman
Ala yang kapante keng kayang kabiasnan.
Keng gabun mamiyalung, atandanan mu pa?
Masukal, marikut...marakal katapa
E me man diyan pansin, piyalung maligaga
Kulait namg Ima, "Pota matapa ka!"
Kabang lilinis at titingkap bale
Keka makatonu, maski asna kainge
Sigpo at pulai, luwa na mengale
E ka pa man kiniyak, atiu ne keng lele.
Bitis a mebitak, malaguang binidbid
Saka ne'ya peglabul, saka ne'ya inapis
E ne man doktor, lalung e ya narsis
Milako la sakit, sugat mu keng bitis.
E mayampat lagnat, anting magdeliryu
Deng gamat nang tikal a keka manimu
Sagad nang katawan, manyaman a tundu
Pali ning salu na yang ke'yang penulu.
Maragul lang bakas, Indu reng likuan mu
Gimpanan mu keti, ika'ng mekaagyu
Ninu reng makiapus, ninu reng mangatmu?
Alang aliwa sa, kalupa nung INDU!.
ALUN
Neng Renato B. Alzadon
Ketang balkonahe ning hotel, Virginia,
kanakung pigmasdan
ing datang ning alun
a mumuma ketang balas ning aplaya.
Balamu deng anak, mitatagalan la
ban agad deng dasnan
ing indung magmalun
a bina nang sabik karetang anak na.
Ken ke aganaka ing balen kung sinta,
Perla ning Aslagan,
makabang panaun
a makawale ku king sepupunan na.
King udyuk na mekad ning pamangulila,
milayi la naman
mangalating alun
a misasaglulung dinugang king lupa.
Ing alun e pala king pampang mamangga
tauli nang sadsaran
yang salung mamalun
ning bigung maglakbe mau king balyan na.
Sulu Ning Pusu
(by Elpidio Rivera)
Neng aganaka raka
Mibalik ing milabas
Ding amanung kinupas
Mitakpan la king balas
Mibalik la balamu
Bisitang e kimbira.
Maspak ya man ing banua
Ing dagat mamala ya
Kaisipan mabura
Sulu ning kakung pusu
Aslag ya anting aldo
Ken lugud e mamako.
Nung kekatang milabas
Mako ya't tumakas
Pati kanta matanggal
Nung ena ku man manakit
Sulu ning kakung pusu
Aslag ya anting aldo
Ken lugud emamako.
Nung sakali ing dalan
Lumbug ya ken kakewan
Pati masalang bulan
Salikut ya't maglaram
Sulu ning kakung pusu
Aslag ya anting aldo
Ken lugud emamako.
Ala kung apangaku
Aldo't bengi pangadi ku
Ing Sulu ning lub at bie
Sopan na kata lagi
Kekatang pamaglakbe
Aslag ya anting aldo
Ken lugud e mamako.
KAKANG BARANG
(Tony Mercado Peña)
orening anak bayung suli
king kamulatan dang mewili
maluwat nakang mitabili
bugtung biye mu ping melili
karing karinan ding mesawi.
alus biye mung kabilugan
mepupus ya king kaylugan
bagse at bangka mung santungan
alang patad natad daungan
kaluguran meto balayan.
pemagse mo’t linipat ilug
matwa’t bingut lubus ing kaybug
at ding pipi’t maklak balugbug
aldo’t bengi maski makalbug
alang aramdam pagal-karug.
memutatan kalyu mung palad
ligat kutis palid mung bilad
bitis burakan mung mibabad
ala rugung kabuladbulad
tinggap ing kalmang makasadsad.
karing libu-libung natad mu
lipat ilug mung pasaheru
akalingwan emu pin agyu
detang mintang pisamban rugu
miglinis kaladwa at pusu.
makintab malan sedang piblas
malare kutis alang pekas
bitis at palad alang kaplas
danup ning atyan e maliswas
uli mu midinan lang basbas.
dapot ika milub kang misan
king malapit-marayung p'samban
inyang yatad ka king kutkutan
kilub ning marimlang karinan
midaun matbud mung katawan.
o Kakang Barang a bangkera
bye delanan atin kapara
memusan krus anggang Golgota
linigtas lumud sasyo k'ladwa
atbang ilug karin ing timawa.
king milabas mung makuyad bye
ditak ing nawad dakal ing binye
paynawang mapagal mung napun
kumbabang lub dala anggang aun
ketang mababang tambun gabun.
nukarin man kabilyan ngeni
tayimtim ing kakung pangadi
king kandungan ning Igpa mayli
marayu karing budhing gaguti.
|