 |
 |
 |
 |
 |
 |
 |
 |
 |
 |
 |
|
language
poecia2poecia3poecia4poecia6poecia7poecia8poecia9poecia10poecia11poecia12poecia13poecia14poecia15poecia16poecia17poecia18poecia19poecia20poecia21poecia22poecia23poecia24poecia25poecia26poecia27poecia28poecia29poecia30poecia31poecia32poecia33poecia34poecia35poecia36poecia37poecia38poecia39poecia40poecia41poecia42poecia43poecia44poecia5poecia45poecia46poecia47poecia48poecia49poecia50poecia51poecia52poecia53poecia54poecia55poecia56poecia57poecia58poecia59poecia60poecia61poecia62poecia63poecia64poecia65poecia66poecia67poecia68poecia69poecia70poecia71poecia72poecia73poecia74poecia75|
|
| LIBRARY OF KAPAMPANGAN POETRY PAGE 30 |
 |
| compiled by ERNIE C. TURLA, president, Akademya ning Kapampangan International |
| ||||||
| Contents: 1.Atin Ka Ping Singsing - Renato B. Alzadon 2.Ing Kabaldugan Ning Sinta - Renato B. Alzadon 3.Ing Vendeta Na Ning Poeta - Renato B. Alzadon 4.Nung Mipatudtud Ku - Renato B. Alzadon 5.Ing Cacaluluan - Edgardo B. Sale 6.Atin Yang Lua Ing Punlas Ning Rosa - Renato B. Alzadon 7.Limpungat - Tony M. Pena 8.Poesia, Nanan me...? - Renato B. Alzadon ATIN KA PIN SINGSING Neng : Renato B. Alzadon Atin ka pin singsing metung yang timpukan a kekang amana king indung ibatan. Nanu tang guewa mu.....? E me sinulud man, nune sininup me king metung a kaban....! King pisinupan mu, emu inakala king datang ing aldo kabud nia mawala...! Ikang makibalu a nung nume kena inia tiwala kang kanyan alang kuma. Dakal la ding banuang mepunti king tanke king pamaki-pamuk king batalya ning bie. at king keralan ding kimtan mung tagumpe--- ing singsing mung mana, akalinguan mu ne..! At misan a aldo, king biru ning tagku, ika ing mibili king lugal ning Indu, imbut mung malakuan king irug mung bungsu ing pekatanda ning lugud mung milalu. Ken me aganaka ing singsing mung mana ban kening bungsu mu pasulud me sana, anting peka-simbul ketang degulan na ning keya lakuan mung lugud a pamana. Kanian ne manatsit ining makalungkut a kapanamdaman king isip mangutkut. Kekang abitasa ing depat mung maimut--- lugud ne ning indu ing kekang selikut. King mipnung ligalig kanian me dulapan ing singsing mung mana king indung ibatan; inyang ibuklat me sinupan nang kaban, mewala ya palang emu kamalayan...! Ngeni ka magsalbat king milalung dusa mikukurus gamat babo ning lamesa. Ing anggang pangaku agyang yapse mu na ing mewalang singsing ene magbalik pa. Ah! King milyaring yan ken mu atalinting ing kabaldugan na selikut mung ningning. Nanu ya man bague, kalupa ning singsing, nung eya misulud, kabud n'ya mabating. ING KABALDUGAN NING SINTA neng Renato B. Alzadon Earth Day 2006 I. Era ka babawal, Bungsu, nung bisa kang makyasawa uling ngamu palsintan me ing kekang maguing esposa. Dapot, bilang pengari mu, bayu musa gawan ita, buri ku king abalu me ing sintang yan, nung nanu ya. Uling ing Dios man bayu ne binie kang Adan ing Eva, kang Adan, tiru ne pamu ing kabaldugan ning sinta. Bayu ne tirung malsinta king kauri na't kapara, tiru ne pamung malsinta karing bague lelangan na. Tiru ne pang palsintan no ding mangalagung tanaman ban atalus nang ing sinta yang kakambal na ing leguan. Ing sinta king bayang lunto kawiliwiling tangalan kailangan king magambul ya, masese at midiligan Itang lingap a dalise mika atin kayablasan karing lunto miyaliwang bulaklak na ning mulahan. Inya naman nung ing sinta king lingap e magkulangan atmu lagu ing pamiutus king kilub na ning tuknangan. Tiru nepang palsintan no ding ayup a susulapo ban dugpa lang alang kanglap babo na ning kayang pago. Alang maliap a e tunud king kayapan a makalto ban lubus makisausig king maningning a talindo. Uling ing sinta e maimut, malaya lang magparayo king ketasan na ning banua ampon bunduk a matilo, dapot ing bini ning sinta king pusu ra ene mako inia ding ayup muli la bayu ya lumbug ing aldo. Tiru nepang palsintan no detang kawan king marangle antimurin detang asan king danuman kawe-kawe. Makanian mu rin ding ilug uling keni la mabibie ding asan ampon ding kawan king danum nang madalise. At ing madalise danum ya ing larawan nang tune ning sintang e mikamansa king dapat a makarine. Inya ing dalise sinta, nung ing malsinta balu ne, ene pabustan mimansan itang malinis nang dase. Tiru nepang palsintan no detang majulagan batu uling ilang mabie simbul king pibandian na ning tau. Balu ning Dios ing kalukan ya ing mitsa na ning gulu a sisira king pamiutus a panilan king kayumu. Inya ban e mikalamat ing pamisuyung mayubu ding anak nang mipalsinta eno buring makalulu; inia ing tau dapat neng pakaingatan masolu ing pibandian a menibat karing palad na ning guinu. Makanian ya ing larawan na ning tune sinta, Bungsu: Eya manibat king isip...eya manibat king pusu. Ing sinta atyu keng dapat....dapat yang papalto lagu inia pati pusung maliap maguing matunud at mamu. Ing sinta ala yang mansa....at maslag yang batung guintu pablasang ibat ya king Dios, at mismung Dios yang mituru. Pagaralan daka dapat.....at kaniang dapat mung liku agyang nanan kung balakan, ing sinta, eme pa balu...! II. Misan pin autus dakang ikutkut mo king taldawa ding manuk a mengamate king salut a meminsala. Kesa king ikutkut mula inugse mu la king sapa layun pepanyud king agus na ning danum a payapa. Balu mung ken la miminum ding sese tamung aliwa ampon ken tala darakpan ding susu, paro, ampon bia. O'bat kabud abangguit ku ing depat mung makalisya ika pang makiupayang migmatas a lub at mimua. Ing guewa mu miglayas ka, bandang Norte ka mipadpad layun kang mekipag-obra nung nukarin ka sinadsad; karetang anak nang Kain karela ka mekitulad pemandagsa yo ding dutung at menalakd kong syudad; timbunan yula ding batis at pinatag yu ing labuad at mangatas lang gusali detang kekayung telakad. Iting kalapastanganan at dapat a makalinsad yang kikiakan da ding ayup a pemanyira yu pugad...! kaibat, bunduk ka minukyat, abe raka ning manakut karing kinutud yung dutung a titipang pasalikut. Ban king dalan alang sabat pepauna yong inabut ding papagsak karing pulis at politikung kurakut. King kekayung pamanggasak bitasang ala kong tugut kabang atin makatikdo dutung a eyu aputut. King depatan yung makanian, aku ya ing mangilabut....! Ena sana maliliyari ing sakunang makatakut. Kaibat mu king kabundukan king dagatan ka migbanda mekyabe karing manasan a manatsang dinamita. E yu pibali ditak man itang pangapinsala na ning pibandian ning danuman a kekatang peka-mina; inyang marakap na kayu aisip mu ku kanita uling kailangan muku mung mamayad king kekang multa. Ing e ku mu aintindian nung nukarin la mipunta ding perang penakitan mu ibat inyang miglayas ka. Ngeni naman minuli ka, nanu ta ing kasilbian mu? E mo man adinan dikut king kuadra dening kabayu. Dapat sa lingunan mula at lingapan mong masolu uling ika ing maralas a sasake magkuswelu. Nung apapulayan mula ibat king pun anggang sepu balamu susulapo kang kukurug ing delanan mu. Neng lon ko ding kakung sese maibug tumulu ing lua ku potang akit ku ing laman a mengalbag king barug mu. E ku balung sabian Bungsu nung kaninu ka migmana; ing prinsipyu ming Inang mu ena kalupa ning keka. E mu palsintan ing leguan ning berding naturalesa; e ka malugud animal a kalupang mangisnawa; e mu balung pajulagan ing pipawasan mung pera; e ka biasang pasalamat king grasyang babie ning banua; e me pa balu Bungsu ku ing kabaldugan ning sinta, saka ngeni mo sabian mung bisa nakang makiasawa? Nung abubud mo ding ayup at ela magliap dumayu, nung apalto mo bulaklak ding rosas ning kekang indu, nung apapamungan mula ding mangga ning kekang Apu, nung asese mong kabayu king almasa ampon dilu, kanita maniwala ku king balu mu ne pin tutu ing kabaldugan ning sinta a keka ku ituturu. At nung yana ing akit ku ing dapat a mangalagu, aku na mismung sumabing makiasawa naka, Bungsu...! ING VENDETA NA NING POETA neng Renato B. Alzadon Kaluguran kung Poeta , akuman, paniwalan mu Enaku sana bisa pang mamikudtang pasibayu; Dapot kening akakit kung kapagpabustan ning tau King tungkul nang ingatan ne ing mulajan na ning Guinu; Kening kalapastanganan king kapaligiran tamu--- King Indung Naturalesang palsintan mu---palsintan ku; Telanan ke ining lira! O Poeta ning balen ku, Talanan me sa ing keka, ban ing api maglipatu! Palsintan teng madalise ing Indung Naturalesa Pablasang yang babie tindag king diwa na ning Poeta; Itang angin a saguiwang inawa ning Paralaya Ing lagusgus da ding batis, ing banglu ra ding sampaga; Ing tumaila ra ding ayup a maniale karing sanga Ding tungatung da ding bunduk at mawalak a sabana; Poeta, palsintan ta yan---at ya ngening sisiran da! Dapat mung igale tala ding mamaping poesia. Sasabian ding kayanakan, ena kanu usu ngeni Ing pamigale poesia linuma ning Karaoki; Inia naman ngeni oyan, ding bague kawili-wili A palsintan ning Poeta matatda king yatung iti; Nukarin la ding batisan a pagsarian tang parati Nung nu tala panintunan detang Nimpang masasabi? Bakit ding malino batis memala la at kinati---? Kalupa na ning Poesiang sikwil da ding bayung suli. Nukarin ya, O Poeta, ing malilung a kapuluan Nung nu ding myaliwang ayup Paraiso deng pagkarinan? kabang talu mamag-koplas king babo ra ding tanaman Babagayan tang poesia ing malambis dang kundiman; Ngeni, lon mu, kinutud do detang dutung king mulajan Tinabi da la ding ayup a lesakan da tuknangan; Ing gabun a melitungtung memanabtak king kapalian At king katulid nang banua manyawad yang katalaruan. Pagmasdan me, O Poeta, ing mawalak a marangle Kanita, ustung papalut, magmalaguintu ya kule; Inia ding kawatasan ta magyuyu lang magpatawe Kambe ra ding makabitin a tinalague ning pale; Dapot ngeni, ing palayan, mamayuspus king katamle Liliwan na itang danum, kukusad pakakalale; Makanano, itang sibul, kalalaman dinulung ne Uling meko ing salilung ding dutung a mengamate. Pagmasdan me, O Poeta, ing pipandiluan a ilug King tela-bubug nang danum masaya tang mipaniabug; Inia ding kawatasan ta tikmus la pangalindayug Karing alun a makialung karing bulang lunto- lumbug; Dapot ngeni ninung bisang magtampiso ken at talbug King danum nang makilarung menuling na king kalabug; Ding susu, bya, asan, paro, mimin lang mete at limbug Mengamate la king lasun a sasarian dang tutugtug. Pagmasdan me ,O Poeta, ing baryu tang Aranguren Pagmaragul te kanita anting kapisi ning Eden; Itang pasu ding kabayung pamasada da king balen Maki agpang king sukad na ning poesia tang babaslen; Ing makanian a musikang paninapan nang Bethooven Inakmul ning alingongo ra ding babasuk a saken; Ing asuk at alingongo nung era agyung salesen Sakit katawan at isip ing ausan dang datang ken. Nukarin ya, O Poeta, itang angin na ning napun, Itang angin a saguiwa neng mamunag a mamambun? Atme niaman sasangapan neng lalague tang maranun Pigale-gale taya pa king pastulan lele Tabun; Ngeni itang angin aita, sumawa tanang manintun Ene subli pang magbalik ban kekatamu magdatun; At pablasang linasun ne ning panyulung ning panaun Inia balang sangap tamu, sasangapan tamu lasun. Nukarin ya, O Poeta, ing makabigjaning jardin Neng manintun katang diwa karin kata mag-imain? Nung nukarin la ding Rosas a palsintan da ding batwin Katulan nong pakialungan ning malimadmad a angin, Nukarin la detang Rosal, ding Gumamela, ding Jasmin, Ding bonggabilyang malare karing balag bitin-bitin? Ing leguan mitambunan ya, basura ing atyu karin, Guewa ra nia mung ugsianan karing marinat dang lampin. Pagmasdan me, O Poeta , itang bunduk king malaut Ken to inapsi ding amlat para karing bayung sibut; Ken to tikmus ding Mamana, ding usa at babing dikut Ding Sudya at Encantada at Diwatang libut-libut; Detang dutung nang matatag digsa dala at pemutut King ditak a patalusad titipa dong pasalikut; Ing gagawan dang makanian nung e tuknang at maputut Magpaldas ya ing balayan king trajediang makatakut. E makalingad, Poeta, king yang Bunduk ya ing tabing A pader nang peka-sagka ning danuman a matabsing; Nung matibag ya ing bunduk malaso ya ing Pun Patling Lumbug ya ing Syudad Tarlak at ding baryung makasiping; At kanita ne maramdam ing gulilsak a tatabling Ing Sambitan at ing siguk, tagulele at saingsing! Ing makipasari kanian ing dapat dang e masanting Ding taung butang pamisip a maki pusung matuling. Inia mekeni , Poeta, ding dalit tang maki-bagsik Ila namang ilague ta balang maramdam laguitik; Ing Poeta tin yang bersung mataram at maki-lisik Anting kildap neng kaleldo, mitataung manalamsik; Karening Pusung Matuling matindi teng ipandikdik Ing Vendeta ning Poetang inamun dang pemalantik; Ngening ing kekatang lira yang papaten da salpitik Para king Naturalesa, dapat katang magjimagsik! NUNG MIPATUDTUD KU Neng Renato B. Alzadon Nung mipatudtud ku, eme kakalinguan ing bilin ku, Bungsu; ding kawatasan ku, king kalaganapan, ibugnus mong paslu; ing peka bayi mu ya ing kababan lub, genaka, at kamu; tanam mu keng lub mu, king eku ligaya ing pamagpalalu; ing pekabagting mu ya ing tetagan na ning kakung pangaku ing anggang agyu ku idaun kung tapat king ausan kung "Indu". Dening kawatasan a kekang ibugnus magdala lang tula inia ing mituran panamdaman ne ing lugud kung dakila; ing kakung layunan ing agyagan kula ban maki-ambula king kapanamdaman a pakaban ya bie ing manang salita; inia ninu ya man ing mituran pusu, mipakde yang kusa layun neng talanan ing lira ning watas at mampang yang diwa. Kabang ing diwa ku e pa mipatudtud, ekya rin tuknangan ing pamangalbit ku king litid ning lirang pagas na kundiman; Waman, matundu ku dalit ku pa mu rin king kayaktangan anting harana ku karing makudta na ning amanung sisuan; nung tahimik naku at ing siwala ku ene maramdam man, pakabitasan mu, mipatudtud naku..., king kakung burulan...! ING CACALULUAN neng Edgardo Bonus Sale E cu na ayabut isipan man Ining tema ning Cacaluluan Maybug maspac ing cabuntucan Reng pacacalulu, ilang sopan Capilan pa mu atin cung inalben Quening telebisyun ABS-CBN Documentaryung peliculang balen Diquil ca reng calulung memalen Nung ninu pa reng ditac a cacanan Ilang dacal a anac, atyan danupan Gobyernu, politicu gising co ngan E na co payracap magmamatudturan Arapan yu problemang balen cabilugan E co pate pate e co dapat paylacwan Bilisan yu ing saup ca reng queraclan Ban dumitac ing crimen at casalbayan Yacu ibat cu quing cacaluluan Dapot iti e ya meging sangcan Ban minawa bagya ing cabilyan Pigpursigyan ca cung pegaralan Salamat O'Ginung mapamacalulu Ugsyanan mong bindisyun ditac rugu Sopan mo sana re ning pacacalulu Iti ing panalangin queca O'Ginu Miyaliwang organisayung Capampangan Queti quing balen America manucnangan Misaup saup tamung sumaup ngan Ca reng daranup memalen Capampangan Malagwa lang turu e daranup atyan Lalu na ca reng dacal a cayanacan Ituru lang sumulat, mamasa't ninu man Quening salita tamung Amanung Sisuan. ATIN YANG LUA ING PUNLAS NING ROSA Neng Renato B. Alzadon, 2006 Baltimore, Maryland, U.S.A Nandin, king kanakung pamaglinis bale apansin kung dakal la ding bague-bague e ku na kailangan. Nung nuku la kine manyayang lang lugal. Dapat nong miyugse...! Alimbawa namu ding atyu king kahun a makasalansan a malating buntun. Ing bague atyu ken kupas na at laun king kekaba na ning miglakbe panaun. Itang makalaman iniang syasatan ku, lumang kagamitan ampon lumang libru. Nanan ko pa reni...? Eno maka-usu. E ku no kailangan. Atin namang bayu...! Inia, makanian kung migmulang menakut ban yugse ko reti king lugal king laut. Ding bague pisawan karin do kukutkut ban king lalam gabun mamin lang marunut...! Ining tauling kahun, kabud tinimtim ke dimdam keng mabayat karing kakung takde. Pablasang balu ku king keni ke kine ing malating libru ning kakung talambie. Iniang ibuklat ke ing malating libru mabie lapa detang letrang sinulat ku, nung nula milimbag king mabie amanu ding matning gulisak kilub ning salu ku...! Karin, a nung nu ku pigisan siwalat itang pamalsintang banal, wagas, tapat. Ing era asabi ding labing mikabat, king malating libru karin ku simbulat...! King kabubusalan nitang librung ita karin ke sininup ing punlas ning rosa. King mingatbang bulung limbag la ding letra pauli na ning lua ra ding kekang mata. Rosa...! Rosa...! Rosa...! Ati ne na naman king diwa, ing aldo na ning kapamunan. Nung nu itang lua mu...., pinulis kung miuman king punlas ning rosang binie mung bakalan. Ing maputing punlas , nung e man saguiwa, ya, at yapa mu rin, eya menaliwa; ngening lalawan keng maratnang maratna akakit ke itang lupa mung maki-lua..! Ing malating libru piragli keng tiklip ban keta ing napun kambe neng mituklip, magkang mangaplas ya king kakung pamisip ing gising paninap a e na melilip...! Nanu tang gawan ku...? Yugse ku ne kaya ing punlas ning rosang king lua mu mengasna...? Kagum na ning libru nung nula mitala ding pepabakal mung pamigaganaka...? Nung ayugse ko ding lumang kasangkapan at aliwang bague e ku na kailangan, dapat mung ing punlas at librung simpanan--- luma na la mu rin---yugse nala naman...! Dapot...ken mang palang pamaglinis bale, ampon pamaglinis diwa't pamibule, Kakung abitasang atin palang bague mitanam king pusung..... e ku na ayugse....! LIMPUNGAT by Tony Mercado Pena kapitna ning bengi mitalindiking ku king kakung pagkeran! bigla meng asudsud makaba kung tudtud kinalbit pasitsit pepakit meng pilit mapaling inuyat mapulut a bagkat kilub tukil bulu ibat king pangulu! e binang malambat malugud meng biklat king mapinung salat mayubung nang uyat mayumung inuyat masyas yang makunyat! bigla kung milingat king kakung limpungat kaya naman pala matas neng masala aslag na ning aldo king bubungan babo! antimong mekandut detang babing dikut king mula king gulut susyuk 'lang patugut! ing kekang inuyat linamnam ya nyaman migising ku puyat metung mu ing ngalngal tukil nang kaluban dati neng mebangal! Tony Mercado Pena Poesia, Nanan me...? Neng Renato B. Alzadon Poesia, nanan me...? King labuad ning inge, masdan mo ding taung misalasalibe. Eno mipaglawe king bilis dang mame king paki-aryan dang matimbang a bague--- ala lang panaun ban makiramdam pa king pagale-gale...! Poesia, na'n me yan...? Ngening kapanaunan "text" ing makausu, "cell phone" ing kailangan. Karas keng sulatan, mipag-E-mail naman. Ing sabla balamu makisaglulu ngan--- inya king poesia, a parima-rima, ninung bisa kanyan...? Dapot..., kapamu na. Wapin. Wapin pala...! Kasumangid na ning panyulung ding bansa atin pang magdusa kikiak lang kaladua sikwil ning lipunan king kakaluluan da--- maplas dang saingsing ninung mangidalit nung alang poesia...? King balen ta mismu laganap ing gulu mipapatayan la ding kapatad tamu. Ing pamanabusu tinuki king usu at mitabili la ding aral ning Guinu--- nung alang poesia ninung mamikudtang yan e maka ustu. Ing sumpa ning lugud sinulad n'yang matbud a king dit a bague agad mapapatlud. Inya kabud-abud namu mapupupud ing pami-usig ding sadyang mikalugud--- nung alang poesia nukarin misulat king yan e makatud...! Inya sa, mekeni O' Makudtang Sugui mamikudta katang poesiang matindi. Ding guintung lawiwi ilang panawili ding ulilang pusung tinkus ning palsimi--- Uling ing poesia, tutu yang kailangan king balen ta ngeni...! |
 Sign Guestbook |
 View Guestbook |
 ernieturla@yahoo.com |
|
. |
| Visitors: 00174 |