LIBRARY OF KAPAMPANGAN POETRY, Page 3 - compiled by Ernie C. Turla, curator - Languages

Table of Contents:
Ninu Ing Migtaksil? - Renato B. Alzadon
Pangadi King Aldo Beitan - Renato B. Alzadon
Lugud Ding Ibpa at Indu Ku - Rolando de Jesus
Pugue Kang Rolando de Jesus - Renato B. Alzadon
Amor Seco - Tony M. Pena
Salamat Keka, Irug Ko! - Renato B. Alzadon

NINU ING MIGTAKSIL?
Neng Renato B. Alzadon

Ing amanung kapampangan, nung metung ya sanang bansa
Mamit-amit neng mikuldas ing maningning nang bandera;
Uling insamang linusub kabud iti migwagui ya
Yang mumuna nang ibaba ing bandera ning simbut na;
Inya sa't ing kapampangan nung mesambut neng talaga
Ing bandera ning sinambut ya naman ing iladlad na.

Mupin, insanung bandera ing panalili dang ike...?
Ngening atlu la ding Osong agnan-agnan sinalake...!
King buntuk na, ing Tagalug alang tuknang pangetan ne
King bitis na, Ilukanu lang ngangatngat alang inge;
Keta namang bandang atyan English ya ing makasake
Ing amanung panginisan makanian yang mamamate.

Map namu pin keng makaba rang panaun ding Kastila
Me-ingat yang myamasamas keng gubyernu ing Salita
E re binang papayakmul ing lengguahi rang daralan
Nune ila pang megaral at mebyasang Kapampangan
Nung anyapin ing Salita e ya mitda at mewala
Ing Espanyang sinalake, e ne kininis bitasa -ET

Ngara detang mausisa: Bakit kaya mipakanian?
E wari mangatapang la dening lahing kapampangan?
Balakusang king uyat da mamagus, manaluntunan
Ing daya ra ding bayani..., dayang sugui..., dayang Lakan?
Bat inyang ing amanu ra lisuban deng sisintangan
Nukarin la ding sundalus, O'bat ela mekilaban...?

Linaban la ding sundalus! O' wa, linaban lang tutu
Ing historia patutuan na, linaban lang e bibiru;
Tinikdo ya Y Gallardo, Y Ocampo, at ding sugu
Tinalad la king labanan binie ra ing sablang kagyu;
Angga king tauli nang patak ning paniulat dang megipu
Ding sundalus ning amanu bitasang ela sinuku.

Nung makanian a ding watas tinalad lang mekibangga
Bat ing amanu rang sisuan mapapatad ya inawa?
Makanano, ding memalen na ning Tarlac at Pampanga
Ila ding mismung kinawang at pepaingulut karela;
Inya balang metung karen marapat mu ing kutnan la
Ika...,ika Kapampangan, ing pusu mu nukarin ya?

Nukarin ya ing pusu mu? Bakit alika melunus
King sarili mung salitang akakit mung managipus?
Nukarin ya ing pusu mu? Bakit sikwil meng tibubus
Ing kultura ning balen mung king kau na mamayuspus?
Nukarin ya ing pusu mu? Bakit tikusan mong lubus
Ding kawal na ning amanung akakit mung mangatampus?

Inya, oyan! Lon me, Oyan! king kapalaran nang ingsil
Ning amanu ning balen mung king kutkutan makagitil...!
Ika..., ika..., Kapampangan ing king tungkul e dinikil
Ika mismung migpabusta....ika mismung linto sawil;
Karing kawal ning amanu, ika, ika ing misakwil....
Ika..., Ika Kapampangan..., ikang minunang migtaksil!

Ika..., ing anting patutut matulang mekilaguyo
karing dayuan a dios-diosan simban mung anting idolo.
Ika..,ika ing mewili king gayut dang makailo
Meguing supaping mekiapus king pangimut da at galo;
Ika.., ikang migpiak mata karing sundalus mung sasyo
King marangle ning labanan maniambitan at papiglo.

Nung ninu napin mang lasip king amanu mu lalapak
Yanapin mang pupurian mung sasalabungan palakpak;
Nung ninu napin mang salut king salita mu maglasak
Yanapin mang kakaulan mu at palsintan mung mataktak;
Dapot karing poeta mung mekipaglaban king pisak
Bitasang emu sikasu ing tangis da a gulisak.

Nung ating bansang matatag keting yatung maleparan
Ila ding ating sundalus a tatalad king labanan;
Yang bansang alang masabal karing kawal ning balayan
E malyaring managumpe..., e mitikdo kapilan man;
Makanian ya ing amanu, e managumpe at minuan
Nung ding sundalus nang watas mipabustan lang makanian.

Inia oyan Kapampangan, oyan ing maplas nang kalma
Ning amanu ning balen mung maghingalu nang mistula;
Nung karing kekang sundalus eka mosa migpabaya
Malaut yang mipakanian ing sarili mung salita;
Ah! Emu ne kikiakan pa, sayang na mu ing kekang lua....
Ing historia ya ing matul.....ika, ikang migpabusta!

PANGADI KING ALDO BEITAN
Neng Renato B. Alzadon
November 11, 2005

Aduan ku Guinu ku, dinan meng sikanan
Ining malata kung matbud a katawan;
Pablasang tutu pung ditak--- nung atin man---
Ing aisuyu ku king amanung sisuan;
Nung maguing dapat pu buri kung dagdagan
Suyu ku king kakung Indung Kapampangan.

Balu yu naman pu tau kung kalulu
Mabibie king pawas ibat king kanuan ku;
Nung eku pu lungub king pipag-obran ku
Dumanup la dening anak a binie mu;
Inia makanian keng ena asikasu
Ing Kapamapangan kung mal diling amanu.

Darala na Guinu ning bie kung maluka
Menigaral ku pung aliwang salita;
Menagalug ku pu, ingles, at kastila
Pablasang king obra kailangan lang bina;
Inia makanian yang misane ing dila
King pamanggamit king salitang banyaga.

Dakal la ding banuang mepunti king tangke
Bayu ku misingap king kalukan ning bie;
Kanuan kung dinuku inyang miyatna ne
Ing mal kung amanu pagdulapan ku ne;
King kakung tengalan ing lua ku mengale
Ing kapampangan ku, malapit nyang mate.

Agaganaka ke ing mal a Indu ku
Mewala ing bie na siping na ala ku;
Inia keni mu man Indu kung amanu
Mawala ing bie na siping na ati ku;
Bayu ya mipampan king mata ning yatu
Apagsilbian kesang anti kang Ima ku.

Kasakit na pala ning kawalan Ima
Buri me mang suyuan ala kang agawa;
Makanian ya naman ing amanung mipda
E mune asuyuan nung tane mewala;
Inia itulut mu malam a Bathala
Kabang mabie ya pa apagsilbian ke sa.

At potang mete ne Indung kapampangan
Ali ke pa murin malyaring kalinguan;
Uling Y Ima ku agyang mete ya man
Mabie ya pa mu rin kening katandanan;
Yang pagmalumben kung angga king kutkutan
Ing kakulangan ning karela kasuyuan.

Inya O Guinu aduan ku pu keka
Dagdagan mo sana baltangan kung banua;
Nung eke asuyuan indu kung mete na
Asuyuan ke ining indu kung mabie pa;
At potang ing tungkul agampanan ku na
Matula neng muli ing kakung kaladua.

At karing dalit kung kapampangan, Guinu
Miparangalan ya ing mal a lagyu mu;
At abalu na ning mabilug a yatu
Ing kapaglunusan a binie mu kaku;
A apagsilbian ke ing Indung amanu
Antimo ing Indung mewala king bie ku.

LUGUD NING IBPA AT INDU KU
Nang Tiakbong 11-15-05

Lugud d'eng pengari, alang akalibe
Pujunan da ika, migtinda la anti
Ala nong ayabli, mie la pang sukli
Lugud a tune alang akapante

Ima mung kakagli, kanita'ng umpisa
Atyat mung masakit, malako inawa
Tata mu alang pagal, mainitunan ya
Kanan dang isubu, 'subu re pa rugu keka

Matimid, malasa ing uma da keka
Ika pa'ng mayumung anak, dusingan a lupa
Angga king metua ka at mikapamilya
Lalung miglapu pa ing lugud da

Ikamong penganak, malunmalun ka pa
Pusu mung mematu, palambutan mu ya
Bie marayu, maski marangya, era buri ita
Gawan mu sa, tiru da, idaun ing karela

Panenayan da keka, kabang atin inawa
Ipakit mu penganak, malugud ka
Uman, matalik kaulan, saka mu sabian
"Pengari ko, lugud yu manyaman!"

PUGUE KANG ROLANDO DE JESUS
Neng Renato B, Alzadon
November 15, 2005

Tutung pambihira karing watas ngeni
Ing bisang susulat kening paksang ini;
Pablasang ing paksang lugud king pengari
Karing matua tamu, maselan yang dili;
Inia makanian kung pupugue, pupuri
King tetagan na lub, ning Poeta Rolly.

Ing kawatasan na nung sampulungan ke
Atmu ne katimbang ing diwa nang babie;
Karing matua tamu sukat tamung ibie
Ing katumbalas na ning lugud dang binie;
Pepaganaka na inukuk dang lumbe
Dagul ta mu sanang maligaya king bie.

King bistaman ela manenayang sukli
King binie rang lugud ...mika atin abli;
Dapot yang penganak a biasang sumuri
Ene kailangan pang sabianan matindi;
Ya na ing magkusang tupad king ugali---
Ablasan nong lugud pengaring miniwi.

Nanu tang miguit pang matimbang a bague
A kayablasan ning lugud dang dalise?
Kesa king masabal at lugud a tune
King pepamana rang mahulaga king bie;
Nung singsing ya sana, asikan, O bale
Itang anggang lingap matampa yang ibie.

Karing pamana ra matimbang yang dili
Ing amanung sisuan....ing sisuan a sabi;
Pablasang ulina ning amanung iti
Akasabi tala ding mal tang pengari;
At karing labi da dimdam ta kareti
Ing lugud a sakdal a alang kayanti.

Inia marapat mung luguran yang tune
Ing pamana ra ding pikautangan bie;
Wari't luguran ya pamana rang binie
Ing lugud kakablas karing taung minie;
Sabing kapampangan...nung pepamana re
Sukat yang palsintan.... king sintang dalise.

Inia sa't kabalen, kening diwang ini
ibie ta ing pugue king Poeta Rolly;
Ing diwang yan sana ya ing manatili
karing balang kanuan da ding taung sugui;
Ban ing kapampangan minuan ya't mapuri
antimong pamana ding mal tang pengari.

AMOR SECO
(Neng Tony Mercado Peña)

king dalanpasigan keni ku magmalun
king babo pilapil na likwan mu napun
pamagmuni keka yatad da ring alun
saka sake agus king danum a susun.

ing agus king ilug mamandal na ngeni
magbatyo kung sinag kapitangan bengi
manaya't maninap bigla kang salangi
sipingnan pagkeran kakung dase bungi.

maski pa kalaldo lwa ku mayuyuyut
papatak king basu na kinatmung lumut
inuman ku kaybat mapayit a pulut
akmulan ing lumbe kaku makabalut.

kapatak mang uran ala nang mamanggi
sana pin madilig sinta tang lalangi
dilang alinlangan pipi no ring labi
bisa kung sulapo pakpak ku mepakli.

mebalbal ku lugud sugat melalam ya
inyang abalu ku `ting linukub keka
dapot e pamurin mipasno ing dimla
king pemalabal nang dimut a kalinga.

bukas makadwana langi ne ing sugat
bakas ya mung langib gulis yang kapirat
mako no ring lango mayangu no dapat
mako naka naman sinta kung masampat.

atin pang mitagan kening amor seco
dening butil bini king salu misapla
potang mabaldug na ing ambun king babo
tinipun kung butil kaku lang ipunla.

ining dilig ambun a manibat babo
basbas sagradu ya king sintang meyango
e basibas ablas manibat king tao
yang makasagiwa kening amor seco.

mekeni na sinta lugud ta ikabyus
salubungnan mune ing salu kung mam'yus
e mune pagkaymut mayumu mung aplus
agnan katang siklod arap altar ning D'yos!

SALAMAT KEKA, IRUG KO!
Neng Renato B. Alzadon
Thanksgiving 2005

Kaninu ku pasalamat ngening aldo mipagpala?
Muna king Dios kadua keka O batis ning kakung tula.
Salamat king malam a Dios king lugud mung meguing kalma
ning pusu kung makapandig king delumduman ning lugma.

Nung balikan ku king diwa itang napun a miralan
mipmu yang pamangulila king balen kung pakamalan;
at paniatang na ning Aldo na ning Kapasalamatan
panamdaman keng babayat ing kurus ning kalungkutan.

Pablasa kaseng ing Aldo na ning Pamipasalamat
ya ing anting pekasusi ban magmula neng mibuklat
ing aldo na ning ligayang karing pusu daralamat
ing Aldo na ning Kapaskuan a pamasusian da ding lat.

Dapot king pusung ulila king balen na at pengari
alang kasuyung manaru king palsiming alan'anti;
anggang ali ye mapupus ing bulan na ning Disyembri
ing Pasyun ning kalungkutan atin yang luang e kakati.

O' wa! Balu ke ing Pasku nung nu ya anti kalungkut
king kaladuang mangulila king balyan na makalaut;
balang bagul na ning amyam manialisik at mangutkut
ing diwa nang pagmalumben ning banyagang makisaut.

Salamat, salamat irug king lingap mu at alala
dininan meng kapasnawan ing kaladua kung ulila;
Ing Pasyun ning kalungkutan a kurus kung pibabata
dininan meng kapupusan king taluktuk ning Golgota.

Salamat keka irug ku biklat me kaku ing Eden
Segipan me ining pusung ulila king kayang balen;
Inya ngeni datang ya man ali kune pagmalumben
Ing aldo nang kebayitan nitang Pungul na ning Belen.

Salamat keka irug ku at kabaluan mung mausta
ing king tibuan a balayan, ing pakamal nung nanu ta;
makanian man king siping mu makaslag yang anting yata
ing taguimpan kung kanuanan ning kakung likuan a kuta.

Ibie mung kapanupayan e sapat ing kakung dalit
ban igulis ku hulaga ing kayapan mung papakit;
inya naman makanian kung sasabian piulit-ulit
salamat, salamat keka king banal mung malasakit.

Pasalamat ku king Ibpa king ati ka king siping ku
a miyatdanan yang kule, ing sadyang paldas kung Pasku;
at meaplak ing kau na ning pusu king balen tamu
salamat O' bandi kung mal, inia mabie ku, uli mu.

To go to the next page, click:
http://maxpages.com/poecia/poecia4

To go to the previous page, click:
http://maxpages.com/poecia/poecia2

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00470

Page Updated Thu May 10, 2007 5:37pm EDT