LIBRARY OF KAPAMPANGAN POETRY, page 29 - compiled by ERNIE C. TURLA, president, Akademya ning Kapampangan International - Languages

Table of Contents:

1. Ing Matali' Kung Kakaluguran - Renato B. Alzadon
2. Quecang Mapamusca - Mar Franco
3. Manggang Dinamulag - Mar Franco
4. Pamanalik Kuldun - RBA
5. Masakit A Biru - Juanita Manlutac
6. Atin Mung Memiru - Renato B. Alzadon
7. Bulan Ning Yatu - Aida D. Tanglao
8. Nanung Peninap Mu? - Renato B. Alzadon
9. Nanu Ing Cualta - EBS (Ed Sale)

Ing Matalik Kung Kakaluguran
neng: Renato B. Alzadon

Ibat inyang anak kami MIKALUGURAN keng Rosa
kekyalung ke king mulahan, keklasi ke king eskuela.
neng atin keya mamuska, akung TALAPAMINGUA NA,
neng atin kaku mamintas, e na buri, mimumua ya;
NENG ATIN YANG PANAMDAMAN MAKABANTE KU SIPING NA
at neng akung manamdaman, emu nanu ing lingap na;
angga king dagul na kami, baintau na't dalaga
e mebawas katuldik man ing sampat mi pamibasa.

Kanaku e no linihim detang keya mamanikan
kabilang de Y Deserto, ing meyaus ANAK-DALAN;
neng kukutang na kanaku nung atin kung dadalawan
ala kung asabing lagyu, uling tutung ala naman;
pagnasan na mo ning lub kung kalabas na ning kauran
at mitas ya ing sueldu ku king kakung kapanintunan,
aduan ku king ing sampat ning kekeng pamikaluguran
gawan mi nang mipalsinta, at king altar misumpanan.

Milabas ya ing kauran at miragdagan ku sueldu,
panaun na bakung sabian ing laman na ning pusu ku;
kabang makalukluk kami ketang MATUANG MABIE BATU
karing lalam dang salilung ding SARESA AT KAIMITU,
Biklat ke ing lub ku keya....biklat ne ing lub na kaku;
malino ming abitasang mipalsinta keng masolu...!
Mikaul kaming matalik...itang lua na...itang lua ku,
miyambulang sinagese king lupa na...king lupa ku.

Pangadominggu na nita, ding mingatba ming pengari,
karin, ketang BALE MATUA, meyaus at minta kami.
Ing bukud kung aintindyan karing dakal dang sinabi
king emi sa babalayun nanu man ing isipan mi;
at nung sakali man kanu atin kaming pamisabi
ing kalinguan mi na pamu, emi dapat ilud iti;
at ngara pa balang tuknang a labit ding mapagsisti
tuknangan mi o pututan ing pamikit ming parati.

Ing karelang pamanutul dininan dang kasangkanan
inanak nakung tatang na...mikapatad ke nung suryan;
at ing pamikamag-anak agyang kaseng marayu man
karela masigi yapa, ngara metung kami laman;
inia wari't pagnasan ming mika-atin keng ugnayan
lalabag kami king batas na ning kasalpantayanan;
at nung mika-anak kami, ila kanung miparusan
ban magdusa at mamayad king kekaming kasalanan...!

Pangalunis, Lunis Santo, kanita ne megumpisa
ing kanakung pamamusan king krus kung alang Golgota;
at na kabayat kanaku ing ali ke mikit Rosa
pablasang ding pengari ku't pengari na, babawal da...!
Dapot kabud abalu kung Y Rosa makabilang ya
karing migpiknik king ilug....uling Sabado de Gloria,
agyang eku kumbiradu memimirapal kung minta
ikit ke'y Rosa king pampang atmu lungkut ing aske na...!

ING BANUA ATME KALULAM, mumuran na king Pangulu
at ing agus na ning danum na ning ilug mesalusu;
Y Rosa atyu king pampang, oita, makatikdo yamu,
kabang aplit lang sasaka detang nandin pa mandilu;
mekabulad, kayagnan na ning DULDUL A MIKAKASBU
linundag ya, inakmul ne ning alun a milululu...!
Eku inisip ing bie ku, king alang pamikakunu
linundag ku king danuman, at king AGUS MEKIBUNU...!

King kalalaman ning ilug panintunan ke Y Rosa,
sikad keni, kapkap karin, kapkap karin, sikad keta;
at misan a magpalto ku ban saglit sang mangisnawa,
Y Rosa atyu king pampang miligtas at mesagip na;
Y Deserto yang sinagip....kauli na king karela
tinubud no ding pengari ban keta mamalayi la;
tinggap do ding memalayi, keta mu rin benging ita
mitakda yang alang subyang ing aldo na ning kasal da.

King aldo nang pangakasal tinagun kung meging saksi
king aldo nang kamatayan ning tula kung mengalasi;
iniang sindyan dong kandila, balamu dimdam ku wari
king ing kanakung kaladua MADUDULUK YA KING API.
kabang pi-arasan na la ning mangikasal a pari
anti re mong gigilingan ing pusu kung mangapisi.
Kapupus na ning kasalan gematan ku la kunwari
at layun kung meninasang ing tula ra yang mag-ari

Ing rosas ning kaladua ku kababa na kapalaran....
Y Deserto, e melambat, sinubli yang anak-dalan...!
At neng muli yang malasing ketang galut dang tuknangan
ing PEMINGUA kung bulaklak maralas neng panumbukan...!
At pablasang katuglung ne ning kakung kapanamdaman
indat panasakitan ne, manasakit ku mu naman...!
Dapot ngara ding matua ku, eku dapat pansinan yan
KING BIE RA DING MIYASAWA, E LA DAPAT PAKIALAMAN...1

Ulining kaplas ning lub ku linuslus ku king Menila,
karin naku menintunan at karin na migdatila;
kalabas ning pilan banua kanita ku aganaka
ing muli ku king balen ku ban saglit mo sang manapa.
Iniang akit ke Y Rosa...., mengilabut kung mebigla...!
Menakmul la ding pisni na...! Butul-- balat yang maputla...!
At detang adua nang anak kabud la makatulala,
payat la ampon marungis, mipaburen lang mistula.

Oita pin, abalitan ku karetang magkaraYkrus
Y Deserto ken yang droga ampon bisyu makalingus,
lual lungub ya keng sukulan, balita atyu Ilokus
tin yang tikian a babaying kalupa nang alang tarus;
inia naman ding likuan na ilang linto makalunus,
maglabada ya Y Rosa, keni't keta magpaipus;
nung misan darala napin nitang bie rang managipus
tutuki no ding anak na....tutulid yang magpalimus...!

Kening austan kung ini anti ku mong miduldulan
pintalan ko ding matua ku, ilang kakung parsalanan,
"Oyan", ngaku, "king ulina ning mali yung kayatulan
ing liguran kung matalik dinalan yang kasakitan...!
Sinabi yung ding anak na ning kekeng pami-ugnayan
magdusa la at mamayad king depat ming kasalanan,
lon yo ding anak nang Rosa, ba't magdusa lang makanian....?
Magdusa la king ulina ning salang emi depatan...!"

"Inia king milyaring ini yanang matibe kung sumpa
king babalakan ning lub ku alang kaku makasagka;
karing panig nang Deserto mimua nala ding bisang mua,
karing kamag-anak tamo manatsa no ding manatsa,
at kekayu pengari ko, bisa kayo, eko bisa
kunan keng maguing asawa ing asawa ning aliwa...!
Nung iti kasalanan man...ah! Mikasala na ku pa
dapot ya at ding anak na ituki ku la Menila...!

"Uling king penandit aini ing bie na ning kanakung bie
atin yang kapanamdaman a malyari nang kamate;
idala ke karing doctor, bayang sikan, paulu ke
at misan pa king siping na akung maglame magbante;
ipakit kung pasibayu lingap kung alang kapante
ban managlus king pusu na ing sintang e biasang mate;
nung ek'ya sagip kanita, dapot ngeni, sagipan ke,
eke pabustan malumud at tangalan maging bangke...!"

At Y Rosa pintalan ke, king aluk ku mebisa ya
at binalut napin ulas itang ditak nang adala;
panga-abak a maranun ati na kami king plasa
tunggalan kaming tataid karetang aduang anak na;
sinake kami king saken, king Menila kami minta
at ketang kakung tuknangan karin kula tiglus dela;
at kang Rosa sinabi ku: "Ing anggang kanaku keka,
uling aku bandi mu ku keti sulip, angga banua."

Pepaulu ke Y Rosa, mesikan yang pasibayu,
ding anak na mibawi lang mikadiwa at animu;
at misan abasa ku pin, atyu king pambansang draryu
meyari ya Y Deserto king pamanlub da king Bangku;
inia agyang pabiru mu ing katutuan asabi ku
itang antimo kanita miglayunan kening lub ku,
"kalabas na ning kauran, kabud miragdag ku sueldu
piaptasan tong pusu ta ketang altar na ning Guinu."

Atlung banua ing milabas, oita, Maleldo na naman,
apigampa ming dumalo king baryu ming penibatan;
ikit da ding pengari mi king tune ku lang liguran
ding anak kung eku anak, ding daya kung eku laman;
at sumangid napa niti pasibayu deng tengalan
itang sinubling leguan na ning rosas kung pakamalan;
at kanian da abitasa king ing sinta paten meman
ating aldo subli yang mie, magbangun ya king kutkutan...!

(Ing poesia simboliku ya. Kasumangid na ning istoria atin yang aliwang mensahi.
Ding megamit a simbolu kabilang de ing lagyung Rosa. Ing Rosa king poesia e ya
tau nune larawan ne ning kultura.
Ding aliwang simbulu ilapin ding bale matua, mabie batu, kaimitu at saresa, agus
ning danum, duldul, anak-dalan, at malulam a banua. RBA )

Quecang Mapamusca
Neng: Mar M. Franco, April 18, 2006

Pasibayu cung sinulat qng amanung macarima
Quinaduan que ing poesiang sinulat cu nang minuna
Canita ban cung apasiag ing canacu babalisa
Caring temang mababasa qng quecatang Academia

Bina cung malulumbe careng canacung ababasa
Caring amanung marauac manibat caring aliwa
Mapilan caring kayabe ugali rang mapamusca
Amanu rang iyayapse maging lasun qng babasa

Cacaluguran a miembro ning quecatang Academia
E tamu sa cacalingwan ing casebian da ring matua
Amanung mangasakit a yagkas mu qng capara
Magi lang antimong sucsuc a titibu king pusu ra

Bayu me sa ibalaus ing bage quecang titema
Layun meng pacaisipan nung queca re ibalandra
Nung e la manasakit manamdaman qng datang na
Ring quecang balugbug sigi na pin manapse ca

Dapot nung alang masampat manibat qng quecang asbuc
Mayap pang isara me at paburen me ping makulub
Ban canita retang singo makinabang lang tibubus
Caring quecang amanung sasalingalngal qng cabuluc

Caministilan mung sabyan cu capatad a mapamusca
Ing dadaptan mung macanyan isusuca ra ring malda
Ing pamanisip matsura laban caring quecang capwa
Ala cang apupul masampat nung e purus palmura

Nung ala cang ayambag qng nanu mang itatangca
Masanting ing maquiramdam at manajimic na mung kusa
E mo sana pamalagyuan nung nanu nanu deng mikalda
Uling ila quiquiso la menibat mu qng munikala

Ining tatangca tamung libru proyectu yang pisanmetung
Miyayaliwang talasulat ding obra ra pisampulung
Paquibat ya qng munikala ning quecatang pekaigpa
Qng parasan nang milimbag ing sinulat ding macudta

Manggang Dinamulag
Neng: Mar M. Franco, April 18, 2006

Anac cu pa mung malati buri cu nong sisisigan
Manggang dinamulag neng malatapung la qng quetuan
Lalu na nung ing tiltilan guisang baguc a alamang
Neng aisip cu iti mangayat cu wawa’t mangaslam

Neng panaun ning bacasyun at alang lub qng escuela
Maratun na cu quetang pun a maragul quetang mula
A nung nucarin ya macasabit itang duyan a linala
Qng siniklat a balat na nitang yantuk a marimla

Carin agyang patingapun e cu manamdaman cainip
Abe co reng cacuyug majilig mu naman manisig
Careng manggang mangalare malasinigwelas lasa
Agyang ala pang tiltilan magisan la qng nyaman da

Potang malulut neman sa yang dinamulag a mangga
Panyabyan yang calaraman ing lasa na ning bunga na
Anyapin mabilug a yatu mequilala yang alang kabas
Qng cadalise na yumu nyang dinamulag a prutas

Ing penibatan nang tanaman nitang bungang manyaman
E ya naman atawaran qng babie nang paquinabang
Caretang manamdaman lisangan neng capalipalian
Detang malabung nang bulung marimla lang salilungan

Angga man ngening metua nacu balicbalican que pa
Ing manggang dinamulag quetang libutad mulang matua
Tanaman yang sacsi nung macananu racung pinande
Ring malugud cung pengari qng lusuc nang dalan ning bie

Matuang tanaman maticdi quetang queang telacaran
Saguisag ne ning tetagan qng dalan ning catuliran
Alang mang bagyu at ayun qng impun na mecayabual
Pablasa ping menuyat ya qng gabun na ning cababan

Pamanalik Kuldun
Neng RBA

Magmalagintu na ing kadua tang bili
palakayang silbag a disnan ning pali;
kanyan no man datang ibat king Mauli
salut a maniale king tangke mepakli.

Ding ibat Los Banyos, tubud ning Kabyasnan
nga ra king ding salut dapat lang gisanan
magdala lang lasun king ba rong lasunan
binawal tala mu, ban e ro taginan...!

Mipamulala la! Nga ta mung sinabi
E kayu makyalam problema mi ini;
agyang pilan salut a anti kanini
agyu ming labanan...! E ke mamulubi...!

Ngara dening biasang dinatang king baryu
manalik tang kuldun dumanup ta kanu;
deni kanung salut, dagis a perwisyu,
ing agyu rang siran, e mu mamagkanu.

Dening mangabiasa kanian no magmintis
e ra kata balu galing at kilatis;
subali king dakal ta abias at mais
nananu nalamu dening pindang dagis...!

(Metung pu karing paralan a gagamitan ku king pamanyulat poesia, ya itang atin
lang dake ding talabasa ban munie kamasalan nung nanung milyari. Antimo pu king
poesiang ini, eku naman sinabing pengan mila ding daguis, agyang balamu wari
makanian na. Ing talabasa yanang balang sumuri nung ding dinatang a manyira
king pamangan ila ding mepangan. RBA)

Masakit A Biru
by Juanita Manlutac

Y Fredung palikeru, bohemyung masiadu
Basta makabaru 'la yang e apatangu
Lugud at panamdam gewa nang anting biru
Pangaku e tututu dakal luang tinulu

Misan a kayabakan ketang istambayan
Ating babaing dayuan a kaya mengutang
Nukarin ya, ngana, ing bale nang Mang Teban
Atyu karin, tiru na, king sepu ning dalan

Kabang pasalamat ya matna neng pegmasdan
Lupang kapilas bulan at seksing katawan
At niyang lumakad ne payarap aslagan
Pakimbe-kimbe ya pa ing kayang balakang

Bigla niyang metandus ing pusu nang maliap
King leguan ning dalagang nandin akayarap
Mipaku ya isip metulala yang ganap
Busina ring saken ginising king maninap

Kilub ning paruminggu laman yang isipan
Ing kayang larawan a pilit pagdulapan
Binalak neng sirawan aldo kabukasan
Ing dalagang palsintan king kayang tuknangan

Mibablas yang todo ing matikding bohemyu
Miras masalusu, magalang pepaindispu
Iniang buklatanan de dibsu nia linuksu
Ing pagdugalan na lalaki yang malagu

Masakit a biru ing kaya miliari
Ing mebaldug at milsinta king binabai
Lubus yang marine maski king sarili
Ablas nang Kupidu king dapat a salbahi

Atin Mung Memiru
Neng Renato B. Alzadon

Na'ng sabi mu, Pare...? Ikit dakung kikiak...?
Melasing ku kanu, ngarang sasagakgak...?
Ikang saksi, Pare, nung atin man alak
migsaya kata mu....minum katang ditak.

Lukluk na ka, Pare. Yana, minum kata
king bateng asundu ing pamagsaya ta;
magsaya kata pin uling masaya ya
ing pakibiruan kung mekitutuanan na.

Balakusa, Pare, makibiru yamu
ketang sinabi nang atin nang tututu;
ing pakibiruan ku, ketang eku balu
makisaltutu ya...., e pala bibiru....!

Lon mu naman, Pare, nung memiru ku man
darala na, Pare, ning piugalyan yan;
keni kekatamu, talagang makanian---
usu kekatamu ing mibibiruanan.

N'ya deng mapamiru gawa lang istoria
balang mamakaili karing kabiru da;
at ing pikatulan a pamalita ra
ing lua rang tinulu ding kanakung mata.

At king istoria da yabe de pa kanyan
ing menamdaman kung e makanyankanyan;
palto rang balamu aku ing mituran
ketang palantik na ning pamibiruanan.

Ikang saksi, Pare. Lon me ing lupa ku.
Lon mu nung atin luang belag ding mata ku;
nung 'tin mang menalas dala na siguru
ning asuk a ibat king sigarilyu mu.

Lalaki ku, Pare. Ali ku palua-lua;
emu ku apakiak king ditak a bina.
Nung aku ing kumiak yang malino waga
king pigpaldasan ku ing bigu kung kalma...!

Nung ngarang sasabi king kiniak kung tutu
a antimo waring mebitawak pusu----
nung ngara ikit da ing lua kung tinulu,
ing pigmulan na n'yan.....ATIN MUNG MEMIRU....!

Bulan ning Yatu
Neng Aida D. Tangalo
22 ning Abril, 2006

Gewa reng bulan ning yatu ing Abril
Bankanita kanu mirinan yang pansin
Kabilyan na ning Tibuan tang Gabun.
Pun tanaman oyan parakalan
Dayat malat, ilug karelang lilinisan
Asuk king alapap pangilagan dakal.

Sagipan ya pin ing Yatung
Ditak ditak a melalang
King Dios tamung sasamban.
Pauli ning eganaganang lelangan
Ating gamit ating sangkan
Pati yamuk, bulati ampon leypan.

Ing tau a pekamatas uring lelangan
Ya ing gagawa, ya ing makinabang
King pamikatawan na, ini masanting ngan.
Dapot sana ing diwa kaladua na
E la akalimbatawan
Bankanita pipagalan e mayala timbang.

Ing katimawan ning dila
Pamanapse ring anak karing salita
Bina na lang mangatuldu, pamagluban.
Diritak, masasabat karelang kalayan
Pasulung patubu mibalayun
King sarili rang kaburyan a paralan.

Kalupa ring ilug, ding sapa
Ing utak atin yang sariling pakana
E sukat misasalabatan kayang daralanan.
Inglis, Kastila, dakal pang alwa
Ya ngan abalu na
E ya sa didiktan Kebayit nang Salita!

Nanung Peninap Mu?
Neng Renato B. Alzadon

Oras ning almusal. Kabang bibili ne
babo ning lamesa ning abe ku bale
itang singkapan nang babasuk pang kape,
inatsanan na kung mapanyuring lawe.

"Nabengi", gingkas nang makilauk-timan,
"Ali raka sana buri man gisingan;
dapot, mumungul kang anting manyambitan.
O' nanu ta waring kekang paninapan?"

Eku mipabulad. O' nanung sabian ku:
Ing kakung peninap..? O ing peninap ku...?
Bigsu ku asabing ing kakung animu
migmain yang saglit king aliwang yatu.

Kinet kong labi ku. Pota ikutang na:
Ninu tang abe mu ketang yatung ita...?
Anti kung akakit lumulam ya lupa
nung mangguit kung lagyung aliwa ing keya...!

" Atin kang ausan", nganang mengisundu,
"kabang mumungul kang anting makibunu,
nan' ku man tingiran eke ata balu
nung ninu man itang ausan mung lagyu."

"Masdan me yang asuk", ngakung migsalita
king bakeng ipanyud ing datang ning paksa,
"yan ya pin ing paling king tasa mikana....
nung dimla ing kape, ing asuk mawala."

" Kabud mipakde ku, ing king pamibule
sinulapo anti yang asuk ning kape.
Inia ing nabenging peninap kung bague,
emu ne kukutang....., akalinguan ku ne...!

NANU ING CUALTA?
neng EBS

Nanu ing cualta? Simbulu ne ning dacal pera at
sicanan?
Nanu ing cualta? Ya pin ing aldodo mung gagastusan?
Nanu ing cualta? Ya pin tatangalan da reng queraclan?
Nanu ing cualta? Ya pin ing dala mu queng cutcutan?

Ing cualta nanu ya? Ya pin ing sweldu patingapun
pipagalan?
Ing cualta nanu ya? Ya pin ing pamayad mu ca reng pica
utangan?
Ing cualta nanu ya? Ya pin ing cailangan mu ban atin
cang canan?
Ing cualta nanu ya? Ya pin ing amut canu ning
casalbayan at corocan?

Ing bie ning tau metung yamu cabud queti yatu
E me a sali, e me a maquipanayus maski magcanu
Cabang mabie gawang cayapan maski ditac mu rugu
Potang meta na ca, ding cualta lacwan mu la mu.

Nanu wari ing peca maulaga queng bie tamu?
Dacal ca pera, dacal ca cualta calupa mu?
O' atin cang a sopan ca reng calupang tau?
Iti ing cutang ca reng queraclan queca yu?

For the next page, go to:
http://maxpages.com/poecia/poecia30

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00186

Page Updated Thu May 4, 2006 5:56pm EDT