LIBRARY OF KAPAMPANGAN POETRY, PAGE 27 - anthologized by Ernie C. Turla, curator - Languages

TABLE OF CONTENTS:
1. Ing Maestra - Juanita T. Manlutac
2. Kapasalamatan - Juanita T. Manlutac
3. Pamagbayu - Rafael D. Maniago
4. Ing Ayup a Perdiz - Renato B. Alzadon
5. King Ayup a Perdiz - Renato B. . Alzadon
6. Tagsibul 2006 - Renato B. Alzadon
7. Ing Dalit Na Ning Bie - Ernie C. Turla
8. Biru Mu - Renato B. Alzadon
9. Biru Mu Pu - Rafael D. Maniago
10.Nanu Ya Ing Tau? - Renato B. Alzadon
11.Ibatan Tamu - Aida Tanglao
12.Panintunan Daka - Renato B. Alzadon
13. Babo Ning Kalbaryu - Renato B. Alzadon
14. Ing Culul Ning Cualta - Edgardo Bonus Sale

ING MAESTRA
by Juanita T. Manlutac

Pagmasdan me lalabas ya
Masigla, pustura, maamu ya lupa
Mamitbit bag, libru at aliwang karga
Metung ya palang maestra

Limang aldo kilub ning paruminggu
Mame king eskuela, karing kuartu
Ban pabiasnan ding keyang disipulu
Sumulat lagyu at alpabetu

Pamamasa, pamanyulat ,pamangwenta
Musika, Geograpya at Siyensia
Banketa e dagul mangmang o tanga
Maging alistu at biasa king bie ra

King mipnung sipagan at kapibabatan
Pamanuru keyang depatan dikilan
E na pinsinan sariling bie't kabilyan
Meliguang tekasan ning kayanakan

Ing panaun linabas, maliguang linuksu
Sinulung, migtagumpe ring disipulu
Mabilis tinuki kambe ning progresu
Tune lang meging mangayap a tau

Doktor, narsis, dentista, abugadu
Ortelanu, sundalus at mangomersyu
Ding relioso, mangubyernu at empleyadu
Obra ning maestrang migsikap mituru

Ing maestra ya naman ing sadiang bili
E mikualta, sueldu e sapat, malati
Dapot matula ya king pusu na't sarili
Mekaserbisyu king balen at lai

Luid ka o malukang maestra
Ing premyu mu atyu babo banwa
Katungkulan mu agampanan mu na
Ngeni magretiru at paynawa na ka

KAPASALAMATAN
by Juanita T. Manlutac

Keka Kaluguran, Salamat

Kasaya ku naman king kekang simbitla
Ngening kaorasan lalapo ku tula
Kayaduanan ku e mikaduang salita
Kapasalamatan tanggapan mu na sa

Ing kalausan mu lub ali ku asali
King kinang, bayat at dakal a salapi
Ing Diyos ya nang balang mye kekang manyukli
Ing ablas ku na mu "salamat, pangadi"

Mi-ablasan sanang libu-libung ukdu
Ing depat mung mayap king para mung tau
Nanu man ing gewa mu nga na ning Guinu
Anti mu na namang depatan Kanaku

Lubus kung mipala 'tin kung alapitan
Anti mo ikang mal kung kakaluguran
E ka kaluguran, kapatad ka naman
Salamat king Diyos king Keyang lelangan.

"PAMAGBAYU"
neng RDM

Ing kailangan na ning Balen pamagbayu king ugali,
Pamagbayung patakaran, pamagbayung bayung lipi;
Manibatan king suluk na ning pusung manugapi.
Pamagbayung e kukupas anggang aun manatili.

Piblasan taya ing Balen king mipnung linis at kinang.
Sabitanan tayang gintu ing perlas na ning aslagan;
Agnan-agnan yang pagkanta king kekatang kametungan.
Miyabe-yabe tayang alsa karing king banwang ketasan.

Dakal na rin a milabas king tangke na ning panaun,
Kinusad ya king lalam da ring bansang mangulapul.
Dapot mibangun yang pilit laban king kildap at duldul!
At mengapinpin ing biga king gulut ning banwang asul.

Etane sana paburen mitakid at misubsub ya.
Karing gamat ding gahaman, king pansarili dang nasa;
Atyu ngeni kekatamu ing pamagmantining bina,
Ing pangakung pamagbayu, pamagbayung alang patna.

Ing Ayup a Perdiz
neng Renato B. Alzadon

Ing Ayup a Perdiz digpa ya king sanga
sanga yang malangi itang digpanan na;
inya malangi yang sanga ing pintan na
pablasang mipmu yang lungkut ing pusu na.

Ding kalupang ayup agyang e re kutnan
balu rang mabayat lungkut nang daralan;
ing sangang malangi yang palatandanan
ning dusang miglayun king kapanamdaman.

Nung kapilan naman maibug yang manangis
karin ya migkanta ing Ayup a Perdiz;
at ding mekaramdam king tarling na bosis
mipamulala la king masayang sunis.

Makananung e la mangapamulala
nandin malungkut yang mababalag a lua
ngeni magkanta yang masayang tumaila.....
linipat ya galang king sangang sagiwa?

Meki-aglo no man ayup nang kakalu
sangkan ning tula na king barang abalu;
ikit deng maratun ketang mangatuklu
king malanging sanga ning dutung king pulu.

At kanian de kutnan nung nanung sangkan na
ning masayang dalit king malanging sanga;
ing keyang pekibat, "magsaya ku", ngana
uling ing aldo ning tula daratang na."

" Malungkut ku ngeni, paldas yang pusu ku,
mipmu yang sambitan ining kaladua ku,
dapot bukas naman sunlag yang aldo ku
bayu yang pag-asa ing manaya kaku."

"Ngeni malungkut ku, danupan ing bili
inya daralit kung anting magmasusi;
agaganaka kung datang ing saguli
nung nu aku namang masaya at mabsi."

"Pagumasdan ye ing lakad ning panaun
kaibat ning Taglagas datang ing Tagsibul;
Inia detang bining metambun king aun
mibait lang lunto anting bayung sulul."

" Kaibat tang metudtud king benging matuling
king masayang abak karin ta migising;
nung atin man lulam a pindung a tabing
atyu ya ing aldo makaslag maningning."

Oyan ing sankan na, ing ayup a Perdiz
king kalungkutan na madiwa ya sunis;
uling manuala yang atin tulang labis
gulut ning saguling sambitan at aklis.

Inia nu man anti lungkut tang darala
e dapat mamale king pusu't kaladua;
ing balang pagsalbat 'tin yang tulang dala
uling balang sulip katapat na banua.

Nung e ta mu dulung king lalam ning yatu
e tamu miyukyat king Matas a Tronu;
Nung kapilan ta mu magbalik king abu
karin taya akit ing lupa ning Guinu.

King Ayup a Perdiz
Neng Renato B. Alzadon 1967

O' Ayup a Pediz malungkut ali ka
tarang magpatawe king tawit ning sanga,
kabang pagmasdan te ing berding alaya
ilague kune man ing musmus kung Lira
ban keta ing yatu kapnuan teng ligaya.

King guintung saguli malugud tang bandyan
sabla-sablang bague binang pangawilyan
kekata ing arte, samyu, at kundiman
pablasang ngamu pin ing akakit tang yan
bandi ning poeta king lira nang talan.

Bandyan ta ing leguan ding maldang bulaklak
pati tatakas dang banglu't salimuyak;
bandi te ing leguan nyang aldo masaspak
pati sasabug nang yatang kule pilak
king keyang panyilang king malagung abak.

Bandyan ta yang leguan na ning pinenari
a myaliwa kule, ing kabas na wari
yang diwang makudta king katas na uri
at uling leguan ya bandyan te saguli
king matang magmasid kabud nya mapawi.

Yang malino batis payapang mamagus
bandyan ta ing kayang makawiling ayus;
supling ne ning dagat a keya mamaus
inia masalusu ing keyang pagluslus
ban ing keyang indu kagum na neng lubus.

Bandyan ta ing leguan ning berding marangle
king makalantang nang maniampagang pale;
at ing tetagan ding bunduk a makule
lalam na na ning banuan tatanud lalawe
kekatang ampangan malambis a gale.

O Perdiz O' Perdiz pasalamatan ku
ini nang upayang binie mu kanaku
tiru mung bandyan ku ing leguan king yatu
ngening kaku nangan ing leguan at banglu
ngamu ibie ku ngan king mal tang amanu.

Tagsibul 2006
neng Renato B. Alzadon

Kaibat ning makabang panaun ning dimla,
salamat king banua,
oini, Tagsibul na...!
Ding dinayung ayup mamagbalik nala
daramdaman tana
mangising dang kanta-----
anting mamalita king bayung pag-asa...!

Dutung a mebingbing king magyelung lumbe
a miglupang bangke
king bigu rang aske,
ngeni akakit mung mabalik malale
king lubas dang tanke
ing saguiwang kule----
lalto la ding sulul tanda ning bayung bie...!

Malagung sampagang king aun mebingbing
king paldas nang tabing
ning kalmang matuling,
ngeni siniro lang mipalkasan ningning
king ipagmairing
dang leguan at santing-----
waga king ing yatu dapat neng migising.

Matudtud a batis migising nong lubus
ing masayang agus
yang lagalagusgus
at ding asan talu magpapatagusgus,
kanyan ta atalus
mituklip ne bagyus
ing alang patawak dimlang alang tarus.

Yana! Tikdo tana ibie ta ing tungkul
sumaup mangambul
bayang lungkas kulul
ing amanu tamung magmulang manyulul...!
kanyang banuang asul
maslag ne ing simbul
ning guintung pag-asa: Tagsibul...! Tagsibul...!

ING DALIT NA NING BIE
by Ernie C. Turla

E mu sasabian qng ing bie / paninap yang anting bula
At ing angang acaquit mu / quen mung isip magagawa
Lipo-lipo arapan mu / at layun cabud na matda
At magbalic pasibayu / queng alapap na ning ala

Ing bie, abe, palague cu,/ tutung sucat paniwalan
E la magcamali yampang / deng awang ning panimanman
At bistat man queng queluatan / dasnan ta ing camatayan
Ing cutcutan aliwa yang / quecatamung panaguimpan

Ing bie ra reng taung bantug / queng larangan ning linia ra
Caministilan tang tuquian / quilalanan ing yambag da
Mistula ing paintungulan / nung alang direccion ing bie
Atin tang sucat parasan / e ta cabud namu mate.

Catamaran, gamus-gamus / iti alang capupuntan
Dapat ating cang proyectung / macatanca para lacuan
Ban deng tauli nabangnan da / at tuquian da'ing quecang bacas
Mie la namang anti queca, / magprisiguing miamas-amas

Lito-lito gawing-gawing / anting lipactung queng dicut
Pihung alang mapirusta / careng pawa queng paticut
Dapot nung anti cang panas / magobrang alang patugut
Mipala ca queng quecang bie / ing dapat mu ating palut

Ania, ana, gamitan ta / ing oras queng ating cuenta
Ban e sayang milalabas / dapat tamung mahalaga
Ita sanang atin tamung / apirusta at pamana
Careng capara tang tau / potang caing ala ta na

(based on Henry Longfellow's poem, A Psalm of Life)

BIRU MU
Neng Renato B. Alzadon

Bibiruan daka mu. Buri dakang maili
agyang ing biru ku e makapakaili.
Ngaku mong mamiru: malagu kang dili
karing anggang dilag na ning yatung iti.

Nanu tang milyari...? Ketang eku balu
kaku ya kinablas ing bignus kung biru.
Anting malikmata, kabud-abud namu
malagu kang dili king mata ning pusu.

Inya makanian kung pisundu-sundu pa
ing pamamiru ku indat mikit kata.
Ngaku mong mamiru: uling malagu ka,
mebijag ku pusu, apalsintan daka.

Ing bignus kung biru, king alang kapyadyan
belikanan naku, aku ing mituran.
Uling king ubud na ning kapanamdaman
apalsintan dakang e makanian-kanian.

Indat biruan daka makibat kang biru
indat mamiru ka balamu mo tutu.
Ngamu pang sasabi: e na ka mamiru
atin nang aliwang kanaku tututu.

Mikatagun naman tin keka migsarya
daraun nang lugud tinggap mung mausta.
Guewa yu lang metung ding pusu yung adua
piaptasan yu la king metung a sumpa.

Balu ra ding malda, at balu mu naman
bibiruan daka mu king tagle mung leguan,
at bibiru ku mu nung asabi ku man
ing sintang tinubu king kapanamdaman.

At pablasa kaseng ing sabla biru mu
inya alang dapat lumulam a anyu.
Dapot, dening butil ning lua kung tutulu
Nan' ku mang balakan, e la mekibiru....!

"Biru Mu pu"
Neng Paing

Ating kung piglolon king sepu ning baryu,
A neng ka'rap ku ne tatatap ku salu;
Ala kung asabi nanu mang amanu
Misara ku asbuk lalon kunya rugu.

Misan dinalan ku king arap nang bale,
Mipasno kung lubus kabud asilip ke.
Makatando neman ketang awang pane
Babatyo ya naman kaku makalawe.

Makuswelu naku neng mikit ke mata,
Ing patingapun ku sulit neng manaya.
Angga na king bengi, anggang paninap pa
Karing ku bubulus pamandiga kaya.

Anti ku mong tarat keng pamagsalita,
King legwa' nang tagle ning irug kung sinta.
O ba't keng paninap magaling kung bina?
Dapot neng ka'rap ke pipi kung mistula!

Anya'ing a isip ku kunan ke king biru,
Ba ku nang abugnus ing maskup kung salu!
Kabud mikit kami nu ke man a-solu,
Pasyag kung pabiru ing lugud kung tutu.

Misan 'kayagnan keng lalakad king tabun,
Atdana' neng kanan, Tatang nang sasarul;
Kabud milapit ku bigla kung ayukul!
Inapis ke buldit, malambing a yaplus...

Sinyo yang masikan! Dimdam nang Tata na!
Pepiglo yang bigla king gewa ku kaya.
Oyta pu'yng milyare: palang king gamat na
Pepakasal nepu: Mamiru ku sana...

Nanu Ya Ing Tau
Neng Renato B. Alzadon

Nanu ya ing tau. Ing tau nanu ya?
Paki-intindyan ke king gagkas ding biasa.
Ngara ding pantas king pamanialpantaya
INAWA NE NING BIE lebul nang Jehova;
Agpang karing magkas king Pilosopiya
BAGUE yang MIMISIP--- LAMAN at DIWA ya;
Ding Darwinian naman matning sasabian da
Metung yang ANIMAL n'ya mapaniupil ya.

Ing kapaniupilan king kaparang Mortal
Yang palatandanan ning taung animal;
Ume yang maniupil ampon makipagkal
King baneng iwalak makitid nang lugal,
karing ayapsal na akit meng manapsal,
karing asakal na akit meng manyakal
Ban ding kayang supil tunggen deng makamal
Leon ya king gubat, guinu yang matangal.

Karing bilungan ning libru ning Istoria:
Mika Darius ya ing Matuang Babilonia,
Mika Alexander ya ing Macedonia,
Mika Julio Cesar king Paganong Roma,
Mika Napoleon Bonapart king Francia,
Mika Adolph Hitler ya ing Alemania.
Mika Genghis Khan ya Tsina at Mongolia
Mika Hannibal at mika-Atila pa

Agpang naman karing budning Pilosopo,
BAGUE yang MIMISIP matas ya talindo;
Pagnasan neng akit ing aslag ning aldo
Ban lakuan ne dulum ing Kweba nang Plato;
Inia makanian yang minisip matilo
Eya pepatugut king pamanimbento
King anggang paniulung a ngeni makalto
Ing PAMISIP naning tau yang pepalto.

Mika pamanyulung king parang ning syensya
Makapagmulala ne ing teknoloya;
Misusulapo ne ing tau king banua
Darasan na pati aliwang planeta;
Ing lijim ning dagat ene lijim kaya;
Ing bie na ning yatu atyu king gamat na.
Wari sa king libru na ning Pilosopya
Ikit ne ing sala, ala ne king Kweba.

Nga ra naman detang magkas king reliyon
Ing tau eya mu pamisip at aksyon;
Atin yang kaladuang makipag-komunyon
King Matas a IBPAng babie inspirasyon.
Inia kabang bie na ing mal nang debosyon
Ing tajiran no ding bayung jenerasyon;
Makalaman karing kayang meditasyon
Ing katuparan na ning Banal nang Misyon.

Ding linto uliran: Moses ding Hebreo
Ing bait Bethlehem, Jesus Nazareno;
San Pablo,San Pedro, Helen, Constantino
Ing Madre Teresa, at Papa Juan Pablo;
Propeta Muhamad ding Muslim o Moro
Siddarta Gautama ning turung Budismo;
King India, Mahatma; king dayang Malayo,
Doctor Jose Rizal at Ninoy Aquino.

Nung pitutuliran ing gagkas ding biasa
Lalto king ing tau atlu ya persona;
Ing kapaniupilan inia gagawan na
Personang animal yang magbabo kaya.
Inia e patugut pasulung keng syensya,
Personang mimisip ya ing paganan na.
Nung inya ing tau lusuk at sakdal ya,
Persona yang Angjel ing tataid kaya.

Aku man, nung misan, animal ku naman
Ding para kung lasip buri kong supilan;
Ibat king anak ku yang akaugalian
Maki-pagtorneo kareng pasiknangan;
Ing pamagsane ku e makanian-kanian
King bakung maniambut karas ning labanan
Ing pulung-arena buri keng sakupan
Maguing aring leon, kampyon dang tangalan.

At nung misan naman metung kung makudta
Sisibul king isip ing malagung diwa;
Tipunan ko detang mapinung salita
Saka ko ilala at piakma-akma;
Potang mayari ne ing kanakung guewa,
Poesia yang lunto yampang karing malda;
At ing poesiang yan yang magsilbiing tanda
King atin minisip king mayubung paksa.

At nung misan naman tapat keng susuyu
Dimut kung kaguiwan king banal nang lagyu
At panamdamn ning mabilug kung pusu
Malapit ku Kaya, anak nakung bungsu;
Nung paten daku man king krus da ipaku
Ali ku pa-alian nung nanu ing tutu:
Atin Dios! Atin Dios! Ing Dios yang mituru
Baku lang palsintan ding kalupang bigu.

Nung misan, king ubud ning kapanamdaman
Mipagkal-pagkal la ding atlung sikanan;
Ing personang lasip manintun yang laman;
Ing personang angjel babawal na neman;
Ing personang anghel buri na mayap ngan;
Ing personang lasip liliku yang dalan.
Ing personang isip ya ing manimbangan
Potang manatul ya, pikamuan da ne man.

Ing tau nanu ya? Ibat king anak ku
Paki-intidian ke king pisni ding libru;
Pikutang-kutang ku nung ninu ta aku,
Pati siping bale pagugumasdan ku.
Dapot angga ngening pilak na ing buak ku
Menatili ya ring metung a misteryu .
Bugtung ya mo waring luruk-lurukan ku.
Ing tau nanu ya? NANU ya ing Tau.

IBATAN TAMU
by Aida Tanglao

Ing tau, tau ya.
Dapot ngeni ikit dana
King Matsin menibat ya.
Oyta king Afrika
mawawalang suglung
Ethiopia meyakit ya.

Makanyan pala,
matuling, maputi,
dilo, kayumanggi
Indio, mayarlika
Pantepante la ngan
Palipi lang matsin.

Panintunan Daka
neng Renato B. Alzadon
April 2006

Ibat king mimulat ya ing kakung diwa
panintunan daka
king ban akit daka
ding adua kung matang magdulap king sala...!
Buri keng damdaman
agyang saglit muman
ing kabilugan na ning kekang siwala...!
Layun kong salangan
sugat mu king laman
karening gamat ku, bakung maniwala...!

King pamagdulap ku marayu ku disnan
menik ku king eran
ning siduan ning beluan
at mayap lang pantas ding kakung pengutnan.
Ing balu rang sabyan:
kasalpantayanan....!
Ere balung tuldu ing daklat kung tukyan
king bara kang ayan
layun pakisabiyan
ban nung ika pinYa, king barakang samban...!

Ah! Mapagal naku kening pamaglakbe...!
Panintunan daka...!
Dapot..nukarin ka...?
Ba't eraka akit agyang nuku ume...?
Ah? Makanian wari..?
Ken ku migkamali...!
Panintunan daka king labuad ding mete...!
King lugal ding banke
karin pala, eke
dapat panintunan ing metung a mabie...!

> Babo ning Kalbaryo
> Neng Renato B. Alzadon
>
> Linapat ke ing krus king kanakung pago
> at pekakaul ke
> tanda ning tinggap ke
> ing mitakdang tipan ning kalmang mapusyo...!
> Baluan kung tiwase
> king ing dalan ning bie
> mipnu yang sambitan, lua, at alingongo,
> dapot pisanan ke
> ban keta yukyat ke
> ing mabayat kung krus king kakung Kalbaryo...!
>
> Kabang guguyud ke ing krus kung mabayat,
> ding manalbe malda
> myaliwa no gawa,
> ati nang matula, atin nang magsalbat;
> atin nang mamuga
> atin nang maglura
> atin nang magsaya king tinggap kung batbat;
> atin nang makilua
> malulunus kaya
> karing akakit dang maraya kung sugat...!
>
> O' king beyatan na ning krus kung guguyud,
> e mekatapilan
> king mabatung dalan
> karin ku mibatbat, king gabud misubsub,
> dapot makanian man
> inatna keng kanuan
> pilit keng tetagan ing mimina kung lub
> bakeng akuang dasan
> ing tikda ning tipan
> agyang gapangan de ding malata kung tud...!
>
> At kabud disnan ke bunduk kung talindo
> ing krus kung pisanan
> king gabun ke tenam
> layun kung minukyat migbitin king babo,
> ken ke abatyawan
> itang kapatagan
> king kataluktukan ning kakung Kalbaryo,
> busilak nang leguan
> ning labuad kung tibuan,
> ing kakung balayan..., ing kakung Paraiso...!

ING CULUL NING CUALTA
Neng Edgardo Bonus Sale

Obat macanyan tamung Capampangan
E wari dapat mesasametung tangan
E pa man pegumpisan ing pamalimbagan
Ati nang lultu capagsamantalan

Dr. Lord dapat da cang pugayan
Queng dapat mung masanting a yan
Busten mo reng taung alang panamdam
Queng balen tamung Capampangan

Ing culul ning cualta ugse ta ngan
Ban misulung ing Amanung Sisuan
Deng cayancan ilang sicapan
Ituru ca re la ing Capampangan

E ta pay sira ca reng mapilan
Sundu taya ing megumpisan
Pamaglimbag poeciang Capampangan
Luid ya capilan man Amanung Sisuan

E cu purung Capampangan O' balen co
Dapot pagmasabal da ca aldoldo
Masqui ninu mang paquisabyan cu
Luid co ngan, Kapampangan cu.

****************************

For more Kapampangan poetry go to:
http://maxpages.com/poecia/poecia28
It was specially built to house the works of high school students.

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00270

Page Updated Thu May 4, 2006 8:47pm EDT