LIBRARY OF KAPAMPANGAN POETRY, PAGE 25 - compiled by Ernest C. Turla of Lubao, Pampanga - Languages

Table of Contents:
1. Karing Talaturu Ning Balen Ku - Renato B. Alzadon
2. Karing Barangay Kapitan Ning Balen Ku - Renato B. Alzadon
3. King Kagalang-galang a Pamuntuk Ning Republika - "
4. Karing Poeta Na Ning Amanung Kapampangan - Renato Alzadon
5. Karing Kayanakan at Pengaring Kapampangan - Mar M. Franco

KARING TALATURU NING BALEN KU
Neng Renato B. Alzadon

Talaturu ning balen ku: Muna, ing mayap a oras
tanggapan yung ibat kaku ing panalala kung wagas;
Aku 'y Renato Alzadon--- king Parnaso ra ding watas
mitagurian kung Poetang Kapampangan king milabas;
metung ku karing mapilan a tinikdo mekilamas
ban ing amanu tang sisuan e mipase at mayapas,
at iniang bayu ku mako king lipat dagat migtangas
ing amanung Kapampangan saguiwa yang mamutikas.

King bistaman miglayag kung mine king aliwang kuta
ing amanung Kapampangan e ya mebaklas king diwa;
uling agyang makabusal ku king banyagang salita
Kapampangan la pa murin ding sinulat kung pikudta;
uling nga ku mong mimisip, nung itulut nang Bathala,
magbalik ku king balen ku ketang banuang makatakda,
at detang kawatasan kung lipat ning dagat mi-akma
kauli ku king balen ku, isabug kong anting punla.

Bilang-bilangan ku la mo ding banua kung panenayan
a muli ku king balen kung laman ning kakung taguimpan;
uling yang panaguimpan kung akit ko ding kayanakan
matalustus lang maniabi king salitang aguisingan;
at king dit a pamanuru mabiasa lang mangundiman
makagawa lang poesia ampon kantang pangayamnan;
king makanian a pamalak akakit ke ing kanuanan
ning aldo nang mamutyawi ning amanung kapampangan.

Dapot...., mal kung Talaturu..., atin kaku mekasabi
balid no king kapampangan ding kayanakan ken ngeni,
balamu mo king lawe ra peka mababa yang dili
king uri ing Kapampangan karing bibigkas dang sabi;
Akung keni king marayu ing tatangis king palsimi
nung bakit mipakanian la pamisip ding bayung suli;
at lalu kung pagsalbatan ing balitang miras keni
yan kanu ing tuturu yu--- yan ing buri yung malyari.

Agpang king abalitan ku, itulid yu nung e tutu,
ing amanung Kapampangan papaten yeng e bibiru;
at ing lalu pang dewakan, nung sang akarapat yumu,
laputan ye king dila ra ding anak yung ituturu;.
ding disipulus yu kanu mipangapampangan lamu
miparusan lang magmulta nung e la man mangapalu;
maka-ustu naman kayang masita la at mapakdu
nung yapse ne ning labi da ing amanung katutubu.

Agpang king abalitan ku yang pagnasan yung mausta
alilan ye keng Tagalug, Kapampangan tang salita;
at sinalpantaya kayu king alapap na ning diwa
a mayap king bansa tamu maguing metung tana dila;
wa, sinalpataya kayu king pikatsang munikala
at eko sinalpantaya king depatan ning Dios Ibpa!
Ing Tore Ning Babilonia makanian keng paganaka
karing amanu king yatu ing Dios ya ing maki gawa.

Tau kayung memagaral, nia balu ye ing Historia
ding tau metung la sabi king panaun a minuna;
Ibat king banuang katasan ing Dios mismu tinipa ya
at lesakan ne ing syudad, ing Tore ning Babilonia;
uling yang amanung bugtung maguing uyat ne ning sala
inia ing Dios, myaliwa lang amanu ding lelangan na;
yan ya ing tandang patutu king ing Dios man salangsang ya
king balak yung metung ne mu ing amanu na ning bansa.

Agyang iniang manaral ya ing Guinu tang JesuCristo
eya metung mu salita agyang tanak yang Hebreo;
Anti murin panipa na nitang Espirito Santo
Karing Apostol binie na amanu lang sakdal lino;
Y Rizal man eya metung ing salita nang talindo
karing banyagang salita mibantug ya king talino;
Oren ding akayarap yo nung ipilit yeng magbabo
ing Tagalug a salita a ausan yung Pilipino.

Inia, mal kung Talaturu ning balen kung pakamalan
king ikutang ku kekayu sukat yu kung pakibatan!
King Tore ning Babilonia ninu ing linasak kanian.....?
Ing Talaturu ning Lugud balu ye nung ninu ya Yan.....?
Ing Lagyu na nitang Aping tinipa, balu yeng sabian.....?
Ninu ta itang bayaning berilan da Bagumbayan.....?
Balu yula palang igkas, Obat kekayung sasaryan
papaten yeng alang patna ing amanung kapampangan.....?

Anti ning asabi ku na, magbalik kung pasibayu
Talaturu ning balen ko, alang salang mikit tamu,
king kekatamung pamikit, ngeni pa, ipauna ku
ing bendeta na ning watas damdaman yeng ibat kaku;
karing kakung kawatasan ikong ausan kung berdugu
alang lunus makamate king sarili yung amanu,
maniawad kung katalaruan king ukuman na ning Guinu
baka yung mamakibatan king depat yung pamaglilu.

Karing Barangay Kapitan Ning Balen Ku
Neng: Renato B. Alzadon
Banuang 2006

Gagalangan kung Barangay Kapitan na ning balen ku
Muna pu ing kakung pugue mayap a oras kekayu;
Kaibat kung binie ing tungkul ngeni naman paintulut yu
king dinan kung kamasalan ing pamunta ku kekayu;
Inya keti ku magsakdal uling piugalian tamu
king nanu man pisasabian a magaganap king baryu
agyang malati yang bague o maragul yang asuntu
bayu ya miras king balen, dumpa ya karing gamat yu.

Inia..., karing kekong gamat makanian ya ngening dimpa
ing dalung nang manyad saup ning amanu tamung mana;
Mekad, e yu pu kabaluan, karing kekayung Eskuela
ing amanung Kapampangan papatluran de inawa;
uling dening Talaturung karing baryu yu sinalta
tuturu do ding anak yu king kultura dang darala;
Tagalog pu ampon English ing yusuk dang alang palta
at lalako re king dila ing pangakapampangan da.

Nung sakali ing turu da, Tagalog o English pa man,
E na bala....., e re mu sa babawal ing Kapampangan;
uling ing pamamawal da...iti, kalapastanganan
king ugaling katutubu ning baryu dang kebaitan.
Pablasang ing baryu yu pu atin yang akagisingan
a kulturang pepamana ding matua yung penibatan
kareti, kabilang de pu ing mal a amanung sisuan
a babawal ding tuturu karing kekong sasakupan.

Dening anak yung mag-aral, pangaras da king Eskuela
ali no pu Kapampangan, banyaga ing salita ra;
uling kabud Kapampangan ya ing linual king labi ra
nung ela man mangapaldu, siguradu magmulta la;
king makanian dang pa-iral ding Maestro at Maestra
ing amanu tamung sisuan papaten de pung talaga,
kesa pu king ituru de ining amanu tang mana
karing tuturu dang anak, oita pu....babawal de pa.

Kaluguran kung Kapitan, magsakdal ku pu kekayu
manyawad kung katalaruan lalam na ning hustisya yu;
aduan ku pung suryan yu la ding batas ning kekong baryu
ibat pa king kamumulan angga ngening panaun yu,
suryan yo sang myamas-amas ding kekayung dokumentu
nung atin pung makasulat a utus a tukyan tamu
a sasabing ibat ngeni ikayung anggang memaryu
bawal ya ing magsalita king kegisnan yung amanu.

Mekad pu, e ko manakit kautusan a makanian
uling manawang yang tutu--- salang ya king kaugalyan;
nanupata, ding memaryu atin lang tagle kalayan
ban igkas ne ning dila ra ing amanu rang palsintan;
dening anak king Eskuela...den, memaryu yu la naman
inia ila man atin lang katutubung katuliran
anting anak ning baryu yu e ro dapat pagbawalan
yapse re ing amanu ra king lugal dang pagkarinan.

Keng baryu pu, king balu ku, ikayu ding manibala
ikayu ding magpatupad karing utus a megawa;
nung atin man patuntunan a yapag dang munikala
bayu ya pu mipatupad, kekayu, sanguni de pa.
Kaluguran kung Kapitan, kitnan dakayu pu kaya
ban ibawal de king baryu ing sarili yung salita?
Nung ali pu, sasabian ku king ding talaturung mapia
dekurak deng alang lunus ing tatalnan yung upaya.

Kaluguran kung Kapitan, ing demokrasya balu ye
at karing sasakupan yu, alang salang patupad ye;
ing tau tin yang kalayan ban manawa neng ayapse
ing laman ning kayang diwa, panamdam, at pamibule;
at ken pung demokrasyang yan kabilang la o kayabe
dening anak a magaral a sakup ning kekong takde;
inia nung ing amanu dang katutubu babawal de,
dapat yulang ipaglualu, bilang Ibpang mamatnube.

Malyari pung ing sabian da ding matikding Talaturu
ing Eskuela karela ya at makasarili la pu;
atin lang peka-pamuntuk a karela mangituldu
nung nanung sukat dang daptan nung nanung dapat mituru;
uling atin lang panginuan at kaya la makaduku
inya ing kekong upaya gagawan deng anting biru;
uling nung ali makanian lon yu naman nung e tutu
lalabagan de ing batas ning kulturang katutubu.

Aku pu eku manuala king matulid a makanian
ing balu ku pu ikayu ing king baryu manungkulan;
inia dening Talaturu ning baryu yung sasakupan
ing tatalnan yung upaya e re dapat daralpakan;
nung nanu ya ing kulturang pa-iral yu king baryung yan
e la dapat kakalilwa maki-usig na la pin man;
uling nung ing kaburian da yang buri dang mipamintuan
ikayu na pu ing turu...ila nang maguing Kapitan.

Aku pu kening bili ku malati ku mung makudta
a ngeni pu magsalilung kanyang lalam yung upaya;
ipagamu-amu ku pu king kamalan yung maramla
dinan ye pung katalaruan ing papaten dang salita;
dening anak a mag-aral paniawad ku la pung laya
king e ro sa babawalan yapse ning karelang dila
ing amanung kapampangan a ibat pa king samula
pamana rang agisingan----ibat king Dios a Bathala.

King Kagalang-galang A Pamuntuk Ning Republika Ning Pilipinas
Poesia neng: Renato B. Alzadon
Banuang 2006/Baltimore, Maryland U.S.A.

Gagalangan kung Pamuntuk, Madam Gloria M. Arroyo
indu na ning Pilipinas a Perla na ning Malayo,
sana pu dasnan na kayu ning sulat kung makaberso
ligtas ko sana king tagku , at sigalut a mapusyo,
at layun paninasan kung magluid ko sana talindo
a ing mal tang Pilipinas minuan ya sa at minono,
ban king historia ning balen ing lagyu yu ing lunto
mininingning king dangalan, anti yang aslag ning aldo.

Sinulat ku pu kekayu king amanung kapampangan
pablasa kaseng balu kung kapampangan kayu naman;
uling kapampangan kayu malagwa yeng aintindian
ing kalamnan ning sulat ku agyang makarima ya man;
sangkan ning pamanyulat ku , buri dako sanang kutnan
at malati ya mung bague ing buri kung paki-baluan:
lub na ning dakal a banuang ati ko pu king tungkulan,
nanu na pung asuyu yu king amanu tamung sisuan?

E yu sana pagkasala nung akutang ku man ita
muna kapampangan kayu, anak na ko ning Pampanga;
kadua, itang kekong Ibpa, bukud king memuntukan ya
bulalag yang Kapampangan anting metung a Poeta;
detang kayang kawatasan balamu wari guintu la
pepakamalan mi la pu anting yas a majulaga;
antimong anak ning watas lubus kung sasalpantaya
pepamana ne kekayu ing lugud king amanu na.

Opu, sasalpantaya ku, linikas ne pu kekayu
ning Poeta Macapagal ing lugud na king amanu,
Opu, sasalpantaya kung ibat king malati kayu
ing mayumung Kapampangan yang sinimsim ding labi yu,
Opu, sasalpantaya kung agyang nu ko muntang yatu
ing amanung kapampangan mamale ya king pusu yu,
Opu, sasalpantaya kung matas man ing tungkulan yu
kapampangan ya pa mu rin ing tune yung pangatau.

Opu, ing dimdam yu kaku, puru kasalpantayanan
pablasang dimut ku balu karing tune kapalyaryan;
atiku pu king marayu lipat kadayat-malatan
ing balitang akakua ku epu sapat, nung atin man;
inia aku kening bili bina kung kasasabikan
ing balitang makatungkul king amanu tamung sisuan,
anti mong makibalita buri kusang pakibaluan
nanu na pung sinaup yu king amanung kapampangan?

Sasabian da ding aliwa king ing gubyernu yu kanu
mipnu yang kapamiraytnan, sapak ya keng eskandalu.
dapot ding aliwa ngara king mepili kayu kanu
metung karing matenakan king parang ning lideratu;
yan bague yan eku pansin, ali ku pu politiku
metung ku mung Kapampangan, pangkaraniwan a tau;
ing buri ku mung abalu at sana sabian yu kaku
nanu na pung sinaup yu king sisuan ta mung amanu?

Gagalangan kung Pamuntuk, ining musmus yung makudta
makiramdam yang matingid king ibigkas yung salita;
nung nanu man ing sabian yu kekayu ku maniwala
uling sasalpantaya kung kapampangan kong dakila;
Inia nanu Madam Gloria? Nanung kayapan mung guewa
para mo ing amanu mu minuan ya at misaplala?
Bilang supling kapampangan ngening ikong king upaya
ing amanung kapampangan, pigmalasakit ye kaya?

Oini pu ing kakung pluma makasadya neng sumulat
sabian ye pu, Madam Gloria, nanu pung kakung isulat?
manaya ku pung sabian yu nung nanung mayap yung depat
king kapampangan nang irug ning Ibpa yung talasulat;
Ban karing kawatasan ku matula kong isambulat
king labuad ning Kapampangan pati na king lipat dagat,
king metung kayung uliran a dapat dang purian ding lat
uling king amanung sisuan menatili kayung tapat.

Nanupata, Madam Gloria, kening Watas, mutus ko pu
ining pluma nang tatalnan makasadya neng isuyu;
maniabi kayu mu sana king alang pamikakunu
nanu na pung asuyu yu king amanung katutubu?
Angga ne mu keni Madam, at sana mablas kayu pu
king kanakung E-mail address, at dakal a salamat pu,
mamun naku pamu, Madam, ing kekayung talasuyu
Renato B. Alzadon ya ing kanakung pirmang lagyu.

Karing Poeta Na Ning Amanung Kapampangan
Neng: Renato B. Alzadon
Banuang 2006/Maryland

Makamal a Poeta na ning amanung Kapampangan,
muna pu ing kakung pugue, mayap a oras kekongan,
sinulat ku pu kekayu uling buri kong gisingan
ding lira yung mipanigla a melaun king simpanan;
layun kung managkat sanang diligan yang kawatasan
ing kekatamung amanung malambat nang mipabustan;
at karetang Laureado a kinalilwa nang dalan
buri ku mung paganaka king atin lang katungkulan.

Opu, agkatan dakayung kalbitan tala ding lira
ipakit tamu ing lugud king sarili tang kultura;
ban kanita ding dinatang a manapsal, abalu ra,
king ing amanu tang sisuan 'tin yang kawal a Poeta;
nung gulisak tang masikan kambe ning Tambor de Guerra
aisip da ding manlupig king lumaban tamu pala;
E ta nya kabud isuku ing amanu tang amana
king nanu pa mang salitang tuturu ding magbibiasa.

Opu, e ku na kailangan sabian at ipaganaka
ing Poetang Kapampangan tin yang tungkul a mamingua,
nung ding kautusan ning Dios masisintang lang mistula
nung ding kapara nang tau tutu nong mayalipusta
nung ing balayanan nang tibuan supilan de ding banyaga
nung ing naturalesang mal yang anting masasalawla
at lalu nang katungkulan ing lumaban alang kabla
potang ing mal nang amanu sisiran de ding manyira.

Inia, Poetang makamal, eyo malyaring ilele
ding Lira yung Kapampangan king ban e na ko migale;
uling antimong Poeta tungkul yu ing pamingua ye
ing amanung kekong sisuan a papaten dang malale;
Pablasang ing amanung yan nung paintulutan yeng mate
ing kekong pangapoeta dapat ye pung pikarine,
uling nanung ulaga ning Poeta kong metunggue
nung Poeta na kayu mu ning amanung meangu bie.

Opu, dapat yong ilague ding kekayung kawatasan
ela dapat manatiling makakabat king sinupan;
uling king panaun aini karin dala dapat basan
ding kabalen tamung mau king amanu tamung sisuan;
uling karing tauling aldo, sakali palimbag yo man
at saka yo pamisali bako mosang manakitan;
ala na pung sali karen mayala lang kabaldugan
ninu pang papamasan yu, nung ala nang Kapampangan.

At ikayu, Laureado, a kinawani nang landas
king kasalang a salita susuyu nang miyamas-amas;
lugal sana king ikayu ding matatag makilamas
ikayu pang migkalabyus, tinagilid, pigpaliwas
ing eku na mu pagsintian..., ing Guinung Talapagligtas
bayu ya mipaku king krus pigtaksilan ne pang Judas;
inya ing amanu tamu bayu ya lubus mayapas
ing mitatak king historya, pigtaksilan de ding watas.

Aku pu, e ku lilingad, maluka mu ining bili
ninu ta ing e maninap minawa at misalapi;
dapot nung ing amanu ku ya naman ing maduagui
e ke malyaring paglibe king kalaksing ding salapi;
ipanupaya yu namu, e ta parehu ugali
ali ke apagkanulu ing dila ning kakung dai;
E ku anti mo ikayu, king ditak a kalapanti
ing pangakapampangan yu pataksil yeng pamisali.

Magkanu ya ing pluma yung pisasali keng tindahan
nung pamisali ye mu rin, 'bat mo e ta mitawaran?
Magkanu ya ing dila yu ? Tutal pamisali ye yan
ibie ye ing halaga na, pota agyu keng bayaran;
Pablasang keng Telebisyon, Radio, ampon Pahayagan
ikayung makalto lagyu Poeta ning Kapampangan.
Inya nanu? Magkanu ya ing abli yung tatanggapan....
Atlung pulung pilak kaya, karing balang kataksilan?

Nung makanian, e ra nako akapamuatan pang pago
ban ing Indung Kapampangan pisaupan yang itikdo;
E na bala, dakal no man ding bayung usbung a lalto
at maki pusung mamingua kening amanung papiglo;
yaring itang king kasalang a amanu ko guguso
e na ko dapat mayaus Poeta o Laureado;
inya dapat tipa kayu king marangal a Parnaso
uling e la marapat ken ding pikailian a Payaso.

Yaring itang ding mangayap a Poeta migtaksil la
ikatamung makatagan misaup-saup ta sana;
ding kudyaping mengalawang, sana pu tigtigan yu la
saganan ta la pung lugud ding bayung lalto Poeta;
pablasang ding bayung sibul, e la anti ding minuna
makasadya lang mamingua king amanung palsintan da;
king pamisaup-saupan lubus kung sasalpantaya
kumaba ya pang bagya bie ing amanu tamung sinta.

Karing Kayanakan at Pengaring Kapampangan
Neng: Mar M. Franco, 1/30/2006

Ikayung anak a tune suling Kapampangan
Mikalmang menuknangan sumangid na ning pampang
Pauli ning e alirip a malino sangkan
Katutubung amanu e yu ne gagamitan

King kekayung kapagnasan magdulap kabiasnan
Siguradu yung pujunan king pamangabyayan
Panese pamilya at anak king paintungulan
Peingulutan ye pu ing balen tamung tibuan

Dapot nanung meging bunga ning kekong depatan
E yamu kabud gilutan ing labuad yung beitan
Nune pindapurak at layun ye pin kelingwan
Sisuan yung amanu manibat king kamusmusan

Oiti wari ing kablas ning ikua yung kabiasnan?
Ning asungkit yung batuin at pakpak king kanuan?
Ing dapat yung pagdunisia ing amanung sisuan?
Kaibat yung akamit ing kekayung peninasan?

Kekong kabalen kung metimawa’t mengabiasa
Nang ulaga ning kabiasnan nung mate’ing kultura?
Megari yang kasebian gule ning kulubasa
Linakad ya ing tangke melakwan ya ing bunga

Keko pung pengari ring anak a meging pantas
Nanu mo pu ing gewa yu kening meging kablas
Dapat pu sana pegising yu ing amanu ring watas
Dapot anti kayung balas king ilug meyagas

Ikayung mengunsilti keng mepalyaring iti
Sikwil ye’ing amanu managalug na ko ngeni
Karen mang apu yu neng pakisabian yo reti
Megari kong pusa kaung keta kaung keni

Dapot agyang makanyan ining mengapalyari
E tamu magpaina lub isalba tamu iti
‘Ting manimuna, Mang Renato, Paing at Ernie
Ing pagobran dakal, tara sopan ta la reti

Kaparang kapampangan e mu pagkatamaran
Ing singsing mung mewala keka yang lingapan
Saludsuran mu’ing masuluk o lipat dagat man
Undap-undap nang kandila kekang palablaban

Ganakan ye sana ing bayaning Jose Rizal
Likwan nang pawaga king alang pamagmasabal
King sariling amanu pengari’t kayanakan
Daig de pa keng buluk yang asan a mebunggan

For more Kapampangan poems, go to:
http://maxpages.com/poecia/poecia26

To go to the previous page, click:
http://maxpages.com/poecia/poecia24

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00336

Page Updated Mon Feb 6, 2006 2:17pm EST