LIBRARY OF KAPAMPANGAN POETRY, page 24 - curator: Ernie C. Turla, pres., Akademya ning Kapampangan, Int'l. - Languages

TABLE OF CONTENTS:
1. Bustan Mung Dalit Ku - Renato B. Alzadon
2. Nanung Sabian Ku Karela - Renato B. Alzadon
3. Deng Bungang Kaymitu - Gus Balatbat
4. Tuki Ka Kaku, Pampanga - Willie B. Baloloy
5. Maligua Ka, Inda - Willie B. Baloloy
6. Ing Mamulang - Willie B. Baloloy
7. Y Juana Kung Sinta - Willie B. Baloloy
8. Y Juan A Lasenggu - Willie B. Baloloy
9. Sukat Mu King Abalu Mu - Renato B. Alzadon
10. Kapampangan Balang Bansa - Rafael D. Maniago
11. Palsintan Daka Rin - Renato B. Alzadon
12. E Raka Kalinguan - Renato B. Alzadon
13. Y Ed Bonus Sale - Renato B. Alzadon
14. Ing Poeta Palma Garon - Renato B. Alzadon
15. Ing Tukador - Tony M. Pena

BUSTAN MUNG DALIT KU
neng Renato B. Alzadon

Bustan mung dalit ku reyna ding sampaga
sampagang masamyu king ardin ning sinta,
sintang mamutyawing kabas ning alaya
alayang masaspak magdalang ligaya.

Bustan mung dalit ku king dalit ning watas
watas a malsinta king leguan mu't timyas
timyas a managyag king bareng ibigkas
ibigkas ding labi pamalsintang wagas.

Bustan mung dalit ku antimong makudta
makudtang malsintang wagas at dakila
dakilang panirug yampang kipnuan tula
tula ku ing mate nung era ka mutya.

Bustan mung dalit kung metung a kundiman
kundiman ning sinta mutyang parikilan
parikil ku keka ining kapalsintan
kapalsintan keka alang kamatayan.

Bustan mung dalit ku dalitanan daka
dalitanan daka king dalit ning sinta
king dalit ning sinta pagtumaila daka
pagtumaila ra ka O' maslag kung Dyosa!.

NANUNG SABIAN KU KARELA?
Neng RBA

Ketang Bale- Matua.
Ing Ingkung mag-istoria ya king anak na.
Keta kanung kapanaunan na
kayabe de di Hilario, Mercado, at aliwa pa
at pepalabung de ing amanung mana
karing kawatasan a sinulat da.

Ketang Bale-Kubu king lawta
Ing Tatang naman yang mag-istoria.
Keta kanung panaun na
kayabe de di Yuson, Reyes, Yumul, at aliwa pa
at pepalabung de ing amanung sinta
karing mangalambing a kawatasan da.

Ketang Restaurante Panera
Ing Apu naman ing mag-istoria.
Ketang kapanaunan na
Kayabe re di Maniago, Pena, at Turla
ban saguipan de ing amanung mana
karing kawatasan a gagawan da..

Ing apu king tud linawe ne Y Tatang na
O' yaku nanu neman ing dake ku, ngana.
Ninu pang akayabe kung poeta
nung ala nang kapampangan pa?
At nung miras ing panaun aku naman mag-istoria
nanung sabian ku karela?

DENG BUNGANG KAYMITU
by Gus Balatbat

Mayumung kaymitung inampang na kaya
Neng maka-wili la agad nong tinimpla
Lambut da keng lulut, mengayat ya wawa
At agad ya namang mika-gyam at diwa

Kabang kikinisan nala't kikisaban
Ing yumu ra lasa tikman nang manyaman
Kuswelu ning minye makanyan mu naman
Keng kukwa at mamye pareu panandam

Masyas ya ing papil a gagampanan na
Matikdi ya kasi bilang anting bida
Babo entebladu agad yang sinampa
At begut ne'ing kayang makabang espada

Layun neng tinasak iti keng alpombra
Linsut yang malalam makutkut keng tabla
Begut ne at kaybat siksak na ne naman
Anting pamagpractis keng kayang kaluban

Dakal ing pawas nang minagus keng sigla
Neng keng kayang practis alang patna-patna
Dapot ing pagal na memungang manyaman
Ngeni atin ne ping yuyuyu keng duyan

Deng kaymitu pala apansin yo laman?
Talusad da butol, ila ring tatanam!
At metung pa pala ing agta ra naman
Balamu yang gatas keng boting ukukan

TUKI KA KAKU PAMPANGA
by RBA

Tuki ka kaku Pampanga
King balen da ring kakung matua
Ban mung akit ing kayapan ibye keka.

King Bakulud munta ka ta
King Kasaysayan iti mabsi ya
Manibat kang Crissot ibpa ding poeta.

King Betis dala da ka
King dutung, ribultu mu idukit neng tata
Magumpisa bitis angga lupa.

King bale nang Apung Ellong manapa ka ta
Ing poetang ibpa ning Guagua
Ka rin masyal king plaza na.

At king Sasmuan tuknang ka ta
At takman ing yumu ning pakabug na
Kasing yumu ne ning lugud ku keka.

Mekeni, tuki ka kaku Pampanga,
Balen kung tune sagana
King kayapan, lugud at sabla-sabla.

MALIGWA KA, INDA!
Willie Bernardo Baloloy

Maligwa ka, inda, maligwa ka!
King awang munta't dumungo ka
Uling y tata ku paparatang ya.

Maligwa ka't lawen me ing kakung matua
Bitbit ing gamit na
Menibat pa king disyertu ning Arabia.

King lalam tipa ka
At salusunan me ing pamagdatang na
Pilmi yang matula potang akit na ka.

Dapot ninu itang dalaga
A kayabe ning kakung tata
At ding gamat da mitatalnanan la pa?

Aroy! sinimangut ka lupa
King katutwan a mibungad keka
King lual y tata ku makilandi ya.

Dapot nanu ing daptan mu, inda
Kareng adwang palamara?
Mataram mung tabak sagana karela.

ING MAMULANG
by Willie B. Baloloy

Misan dinayu ku keti Guagua
Lugar a malwat kunang kilala
Ing balen a mayap at sagana.

Kakung pikutnan metung a matua
Nung marapat kung magtinda keya
Linawe na ku bitis at lupa.

“Nanung titinda mu?” anang tata.
“Librung mayap,” pakibat ku kaya.
Galapak ya’t magkas yang salita:

“Nanung kayapan ning kekang dala?
Librung dela keti alang bisa;
Metung man tau alang mamasa!”

“Ing pong kayapan, aku kang tata,
mayayakit ya king keyang dila,
at king bawat amanung agkas na.”

“Mali ka, ito! Ana ning matua,
Reng mayap magkamal la king sabla;
Uling ila ing bosis ning madla.”

“Mayap masasabi, aku kaya,
nung ing banua keka mamayun ya;
at ing yatu keka matula ya.”

“Maski nukarin lugar, agkas na,
Pibandian ing primerung lalon da;
Guinu ya ing magkamal king pera.”

“Ali keti Guagua, aku kaya,
Na ing salita’t ali ing pera,
Ing susi ning kayapan karela.

At kalupa ning libru kung dala
Ing kayapan ala king mala’ na
Nune king bawat letra’t salita.”

“Aku tinua na ku keti Guagua;
Ni metung a mayap king salita
Ala kung balu,” sabya’ nang tata.

“Nung pantunan yu la, aku kaya,
Lango la mu kareng sablang mata:
Reting mamulang – lagyung bansag da.”

“Ninu ba ika?” kutang ning matua.
“Metung kareng lango a lalwen da:
Ing mamulang!” siwalat ku kaya.

Y JUANA KUNG SINTA
Willie B. Baloloy

King malating sitio ning Guagua
Nung nukarin ding tau malugud la
At ing salita da mayumu ya.

Ka rin ating metung a dalaga
Ing keyang lagyu mabanglu ya
Kaparis ning rosas at sampaguita.

Juana, neng ausan de reng matua na
Lagyung ibat pa kang apu na,
Lagyung mabuktut king lugud at saya.

Ding lalaki king lugar da
Ampo na ding balu ning Santa Ursula
Susuyu’t mamye papuri kaya.

Pati na ring bayung tau ning Candaba
Ampo ring king Magalang at Santa Ana
Mamye dalo kaya.

Tune deng dadayuan ing dalagang sinta
At maski ding baluga titipa
King bunduk a pibatan da.

Dapot maski ninu man munta
Metung ya ing agkas na karela:
“Ing lugud ku king poeta yang sinta!”

Metung-metung mumuli la
Sisibi’t matamle king pamaglako da
Ding pitung-pulung susuyu kaya.

Datang ya ing poetang sinta
Ding mapilan karela dasa’ na
Kang Juana akit deng mamye sampaga.

Tune yang mipala iting poeta
Lugud nang Juana keyang ikwa
Ing poetang ayta aku pala.

Y JUAN A LASENGGU
by Willie B. Baloloy

Y Juan a lasenggu keti Guagua
Alang aldo na eya minum sirbesa
King kasa man king karela.

At maski nukarin lugar atyu ya
Y Juan a lasenggu keti Guagua
Basta atin boting sirbesa.

Masalusu yang munta
Betis ya o Bakulud man ‘ta
Agyang eno kakilala makiinuman ya.

Metung bengi keting kasa
Mipatudtud ya king kalasinga’ na
Y Juan a lasenggu keti Guagua,

Makasubsub king lamesa
Iting tumador ning Guagua
Lingo at alang male king malilyari kaya.

Ating lalaking mamwat kaya
King metung a palasyu iti dela
Y Juan a lasenggu keti Guagua.

At pangayabak iti migising ya
Y Juan a lasenggu keti Guagua
Mipabalikwas king akit na.

King pagkeran a malambut makakera ya
Binungad king siping na
Malagung sirbienti, apulu la.

“Nukarin ku?” kutang na karela
King kekayung mansyun!” pakibat da
Kang Juan a lasenggu keti Guagua.

“E wari aku y Juan a lasenggu keti Guagua?
At y Senor Juan Sirbesa,
Aku pamu rin ita?

At ing pibandian ku, mansyun, ali ya!
Nune metung a kubu siping ning sapa!”
Siwalat na karela.

“Y Don Juan de Gracia, ikayu ita,
Magkamal king mabilug a Guagua!”
Agkas da reng sirbienti kaya.

Bigla yang maili king dindam na
Iting lasenggu keti Guagua,
Isipa’ na, naya aliwa pin iya.

“Dale, dinan yu kung sirbesa!” utus na
Kareting malagung dalaga
At sirbesa kaya dela da.

Ating maladiosang linapit kaya,
Siniping at migkandung kaya,
Minuma at minum king alak na.

“Ninu ika?” kutang na king siniping kaya.
“Ing kekang sinta, ing kekang esposa!”
Pakibat ning kaka.

“Esposa? Dale, kaku sumiping ka!
Uling malwat kung megnasa keka!”
Siwalat ning lasenggu kaya.

“Sinta ko! Ing bengi makaba ya
At ing bage a buri makapanenaya!”
Pakibat ning esposa.

“Ing mawa kung akmulan mipasno ya
King katawan mu at alak mung dala!”
Ngana ning lasenggu kaya.

“Sinta, tutu pin ita, anang kaka,
Dapot paburen mung mie kung tula keka
Kareng bage masaya!”

“Paburen mung mibungad keka
Reting mangayap a pigagap Santa Rita
At iting dramang daptan da!

Ing palabas ayalben mung daptan da
Magumpisa king Minalin angga Guagua
Bantug ya!” anang kaka.

“Esposa ko! Kaku sumiping ka!
Minum at alben ta
Iting dramang daptan da!” anang Juan a Sirbesa.

“Reng mangayap paluban la
At iting drama pagumpisan da na!”
Gulisak ning lasenggu keti Guagua.

“Mekeni na kayu, utus ning kaka,
At ing drama umpisan na
Masiri neng malbe ing kakung sinta!”

Reting mayap mamintu lang maligwa
King amanu ning kaka
Esposa niting tumador keti Guagua.

Tunggal-tunggal reng mayap lual la:
Lalaki, babai, anak at matua
At iting drama umpisan da.

Y Juan a lasenggu keti Guagua,
kasiping ning keyang esposa,
Matulang malbe king dramang dapat da.

Ing dramang albe’ na
King bayung panahun tugma ya
Makapatungkul king bayung salita king Pampanga.

Itang aldo’t kabengian ayta
Megsaya kayabe ing keyang esposa
Y Senor Sirbesa ning Guagua.

Pangayabak, ding madla maliswas la
Lalben de ing lasenggu keti Guagua
Kareng kua makilandi ya.

Migising ya’ t akit na la
Reting madlang makalawe kaya
At pati na reng apulu nang esposa.

Lukluk ya’t marap kareng kua king siping na
Ampo king inda rang manulu wawa
Kaya makalawe ya.

Makalale yang tikdo y Senor Sirbesa
Dapot ing inda lumapit ya
Sagpanga’ ne ing bandi na.

Gulisak yang malakas y Senor Sirbesa
At masalusung mamulandit ya
Tatalnan ing bandi na.

Sagakgak lang maili dening madla
King merapat king Lasenggu ning Guagua
A mipalako king dine na.

“Obat ikwa nang memulang ning lokong ayta?
Pati reting kua petasa’ na,”
Nganang tata kareng madla.

Milabas ing metung dekada
Mikapalabas keti Guagua
Metung a saineti tungkul king sirbesa.

At ing lasenggu niting Guagua:
Y Senor Juan a Sirbesa
Megin kumidya ing bie na keti Pampanga.

Abanggit ku pin ketang aldo king ing asonansya-lirika metung ya karing akagisingan ku nang adle ning kawatasan kapampangan. Siguru pu 1960, inyang gagamitan de ding matenakan. Antimong Sable-bakud a makudta meki-kiapus ku naman. Emu pu ing pekiapusan ke ing asonansyang pangkilual penyubukan ke pa ing asonansyang pang-kilub. Oini pu ing alimbawa na ning asonansyang pang-kilub. - RBA

SUKAT MU KING ABALU MU
Neng Renato B. Alzadon

Sukat mu king abalu mu
abalu mung mala ka kaku
mal ka kaku kabang bie ku
kabang yatu ya ing yatu

Ing keka ku kapalsintan
kapalsintan yang marangal
marangal, lusuk, at sakdal
sakdal ya king katapatan

Makasadya kung magdusa
magdusa ulimu sinta
sinta ko, kamtan m'ya sana
kamtan m'ya sana ing gloria

Mamun ku keka irug ku
irug ko dumayu na ku
dumayu na ku siping mu
siping mu sinta neng bayu

Oini naman ing kabangal na:

Sukat Mu King Abalu Mu
Neng Renato B. Alzadon

ikang kakung pagdiwatan
ngeni ay king kapilan man
ing keka ku kapalsintan
e manakit kamatayan.

kapalsintan kung e sakim
madalise, mataimtim
keka, bukud keng parikil
Devota na ning pagbitkil.

nung king tula ka magkamit
aldukan kung libung pait
maligaya ra kang akit
pibatan ku ing masakit.

mako naku ban maglakbe
mapda na king panlalawe
king kanakung pangawale
ligaya ka sana king bie.

Makanian ne man pung lunto potang miyabe la:

Sukat Mu King Abalu Mu
Neng: Renato B. Alzadon

Sukat mu king abalu mu ikang kakung pagdiwatan
abalu mung mal ka kaku ngeni at king kapilan man
mal ka kaku kabang bie ku, ing keka ku kapalsintan
kabang yatu ya ing yatu e manakit kamatayan.

Ing keka ku kapalsinatn kapalsintan yang e sakim
kapalsintan yang marangal,madalise, mataimtim;
marangal, lusuk, at sakdal keka bukud keng parikil,
sakdal ya king katapatan Devota na ning pagbitkil.

Maksadya kung magdusa nung king tula ka magkamit
magdusa uli mu sinta aldukan ku ing mapait
sinta ko, kamtan mya sana, maligaya ra kang akit
kamtan mya sana ing gloria pibatan ku ing masakit.

Mamun ku keka irug ku mako naku ban maglakbe
irug ko dumayu naku mapda karing panlalawe
dumayu na ku siping mu, king kanakung pangawale
siping mu sinta neng bayu ligaya ka sana king bie.

*************************************

Talabaldugan

Devota--diwata; dyosa; mutya; musa

Ing asonansyang pangkilub agyang masanting ya pung damdaman keng gale, eya lubas keng kapintasan. Muna masakit ya pung isulat, kadua masakit yang dinan wakas.

KAPAMPANGAN BALANG BANSA
by Rafael Maniago

O Kapampangan ning lugud ding anak mung menyalapung,
Menyalapung balang Bansa, bansang eman
tuglung-tuglung;
Tuglung-tuglung lang mitaid, pauli namu ning lugud,
Lugud king kekang amanu, Kapampangang e matudtud!

Migising la at mipakde karing kareglang pagkeran,
Pagkeran da ketang kama, napun lande yamung kwayan,
Kwayan karing balang baryu, yang alus magamitan,
Magamitan dapot ngeni, pasulung ka Kapampangan!

Dakal na la ring mekalbit, ding supling mu balang
bansa,
Bansa lang mikakanlaut, milapitan pusu't diwa;
Diwa karing Kapampangan, miyugnayan, metimawa,
Metimawa lang susulat, mamoyesya, mamikudta!

Pakibatan, milibayan, milapatan, mipamasa,
Mipamasa tang mensai, pamagsane tang salita,
Salita tamu at siswan, king bie tamu mandatila,
Mandatila king katawan, manatili kabang-kaba!

PALSINTAN DAKA RIN....!
Neng Renato B. Alzadon

Nung waman ding kekang uma ali la maguing bandi ku
Nung waman ding balang pintig ning pusu mu ena kaku,
dapot, palsintan daka rin....!
Nung apikamuan mu ku man kening sintang sakdal yubu,
aku eraka pikamuan----palsintan ku pati mua mu.

Nung emu man mo sa tula ing lugud kung babie keka,
Nung pisawili mu ku man kabangal na ning kaladua,
dapot palsintan daka rin....!
Nung sikwil mu kung lubusan kasuglung na ning inawa,
Aku era ka isakwil---bandi mu ku---bandi ra ka.

Nung yanang kekang ligaya ing mawala kung lubusan
Nung maniaman nang akit mung dulung naku king kutkutan,
dapot palsintan daka rin....!
Nung inugse me ing lugud a keka ku pepamisan
Eke inugse ing keka---dala ke king alan'anggan.

E RA KA KALINGUAN
neng Renato B. Alzadon

Dakal lamang bulung king tanke malagas,
Dakal lamang banuang datang at lumabas,
E ra ka kalinguan!
Pablasang king diwa eku no abaklas
ding ala-ala na ning bie tang milabas.

Nung malakue man sa dagat kung lipatan,
Nung marayu man sa lugal kung pintalan,
E ra ka kalinguan!
Pablasang ing sumpang seria mung tikusan
dela neng miglakbe ning pusung sugatan.

Nung tulandung kuman king marimlang aun,
Nung matambun ku man king lalam ning gabun,
E ra ka kalinguan!
Pablasang ing kakung kaladuang magbangun
palsintan naka rin kaba ning panaun.

Nung painturu ku man king kayarian banua,
nung akua keng dasan ing matas a Gloria,
E ra ka kalinguan!
Pablasng ing kakung malsintang kaladua
ketang aliwang bie dasan meng manaya.

ED BONUS SALE
neng: Renato B. Alzadon

King pamisalbag mu king amanung sisuan
babie ku ing pugue ampon kagalangan;
uling ing kapatak a gawang makanian
pamitipun-tipun katmuan ne'yng tapayan.

Nuya ta mibubu ing Bantayang matas
nune king malating binutil a balas;
inia ing katiting a ambag keng aptas
babie yang sikanan king parasang wagas.

Mekad ding aliwa ngara pang sasabi
malati yang bague ing megawang ini.
Dapot nuya lunto matas a higanti
nung e king malati a anti kaniti?

Nung balang kayanib na ning akademya
guniat lang makanian king akaguiwan da;
yang malating bague potang matipun na
magus ing pagkabie king amanung mana.

Inia kapatad kung mabinting Ed Sale
sasaluduan daka king mayap mung adle,
at karing bilungan ding kanakung gale
ing mal a lagyu mu maslag ya't makule..

KING POETA PALMA GARON
Neng Renato B. Alzadon
June 22,1977/Maryland U.S.A.

Kaluguran kung Poeta, tanggapan mu ining pugue
Kambe ning pasalamat ku kening pepabal mung gale;
Ing sulat mung makarima, kabang iti babasan ke
Anti ku waring duduyan kanyang alun makasake;
Inia bilang katumbalas ning kekang ligayang binie
Telanan ke ining pluma, ing kagiwan, damutan me.

Pangangasan ku lang simen ding amanung anting perlas
At kening papil a sutla panikuanan kong ilikas;
Ban ilang munie patutu king ditak man e mebawas
Pakamal king kapampangan, ing amanu ding Mardikas;
Kalupa na ning guewa mu, aku man ketang milabas
Binie ku ing kasuyuan ku ban ing leguan na yang lungkas.

Poeta, e ko kalinguan detang mipagpalang aldo
Gagale kung poesia king babo na ning parnaso;
At e malyaring miwaglit ing maningning a talindo
Ing akit keng magmairing king banua na magparayo;
Inya ngening malaut kung ena ku damdaman kulio
Ing diwa ning pangawatas yang mumuli at dadalo.

Poeta, linub king pusu ining kaku mu sasabian
Aku man mangulila ku king labuad tang kebaitan;
Tutu pin, atmu kasakit ing kaplas tang pibabatan
Ing kaplas ning makarayu king balen tang penibatan;
Akuman, antimo ika, bina kung kasasabikan
Tuklu lang gabun komanggui ding kanakung talampakan.

kaibug keng akit ing aldo king baryu ku neng saslag ya
At didiluan ne king yatang kule guintu ing alaya;
Ing ambun a anting bubug king dikut paka-korona
O' kaburi kung damputan at yang panimu kung lupa;
At kaburi kong damdaman ding mamag-koplas a maya
Pagpatawe yuyuyuyu karing tawit da ding sanga.

O' kaibug kung maki-ayo king linangan a marangle
At magtampiso king burak kambe ding tatanam pale;
O' kaniaman nang batyawan nitang napun a makule
Nung atin kusang upaya, ngeni mu rin balikan ke;
Nung nu siping ning dalagang king tamnanan akalele
Daralit ku king kundiman ing sintang malamarine.

Poeta, dimdam ke keka ing aklis ning mangulila
Mau karing kaluguran, kapatad, at kakilala;
Aku man, paniniglon ko ding masayang aldo deta
Makatipun keng daralit basultu ampon pulosa;
At neng maslag ya ing bulan taginting ya ing gitara
King malagu na ning baryu tutulid keng magharana.

Dapot ngening makalaut tamu king tibuan tang gabun
E ta sukat manatiling makabalikid king napun;
Dapat mu king marap tamu king ngeni makapanaun
Nung nu makabusal tamu king malimpuyut a amun;
Talad tamung alang gulat kaniting pamikatagun
Ban keta itabi taya ing palsimi at pagmalun.

Poeta, yang dalangin ku king Dios na ning Banua't Labuad
King pampang tang pakirasan akua tangan sang misadsad;
Ala sana metung muman kekatang mikakapatad
Ing manabu king saug na ning kapalaran a linsad;
Ban kanita tauling aldo mikit tamu at mipalad
Misulusulu king dulang ning tulang alang katulad.

*******************************************

Ing kawatasan misulat ya bilang pakibat king makarima nang sulat ning Poeta Palma Garon ning Mexico, Pampanga.

ING TUKADOR
(neng Tony Mercado Peña)

ala ka mang mabye kangye
tayimik kabilyan mung bye
metung kang testigung mabye
kening malilyari king bye
kilub kebaytan kung bale!

ala kang rekla-reklamu
ibat anyang malati ku
kilub sala king arap mu
aske't lupang libu-libu
migpasanting, migpalagu!

ala kang kapagal-pagal
aldo't benging mangarakal
mulagat kang e menikal
kipkup malugud ing sukal
lub kung kasing bayat bakal!

ala kang kabulad-bulad
king arap mu mibuladlad
kakung amor secong bilad
misapwak ampong mipadpad
melangi k'ning sawing palad!

balang aldo nung sakali
king arapan mu malili
ing sinamwak memulkari
king sintang melamat puri
sige salbagan meng asugi!

takap-silim dakang lakwan
napun ku kekang simpanan
king magsalamin k'kung adwan
alamat nakung ingatan
dakal salamat kekongan!

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00380

Page Updated Wed May 3, 2006 3:48pm EDT