Home
language
 poecia2
poecia3
poecia4
poecia6
poecia7
poecia8
poecia9
poecia10
poecia11
poecia12
poecia13
poecia14
poecia15
poecia16
poecia17
poecia18
poecia19
poecia20
poecia21
poecia22
poecia23
poecia24
poecia25
poecia26
poecia27
poecia28
poecia29
poecia30
poecia31
poecia32
poecia33
poecia34
poecia35
poecia36
poecia37
poecia38
poecia39
poecia40
poecia41
poecia42
poecia43
poecia44
poecia5
poecia45
poecia46
poecia47
poecia48
poecia49
poecia50
poecia51
poecia52
poecia53
poecia54
poecia55
poecia56
poecia57
poecia58
poecia59
poecia60
poecia61
poecia62
poecia63
poecia64
poecia65
poecia66
poecia67
poecia68
poecia69
poecia70
poecia71
poecia72
poecia73
poecia74
poecia75
|
| LIBRARY OF KAPAMPANGAN POETRY, page 23 |
 |
| Ernie C. Turla, curator |
This webpage contains Kapampangan Tankas, Haikus and Other Styles, including Poeciang
Pang-anak (poems for children). The authors are Tony M. Pena, Aida D. Tanglao, Renato
B. Alzadon, Ernie C. Turla, Arnold Batul & Udis Lord. (Kaybat ning Uran / Panaun /
Tibubus Dila / Dayang Mapayapa, Miyaliwang Pansin / Oras Alas Seis / Lapis Bayung
Tilus, Deng Atlung Kumpana, Nanan Me Yang Rosas, Pasalamat, Bayung Banua / Deng Atlung
Kumpana, Ing Bilang Da Reng Bulan, etc.)
E KAYU TUTUKNANG
Neng: Renato B. Alzadon
1/14/2006
O' pipit, O' pipit
eka tutuknang mag twit-twit
sundu me ing kekang dalit.
O'Kulayo, O' kulayo
eka tutuknang mag-woo-woo
sundu me ing kekang berso.
O' maya, O' maya
eka tutuknang magkanta
sundu me ing kekang rima.
O' kuliglig, O kuliglig
eka tutuknang kikilig
sundu me ing kekang tigtig.
O' kwayan, O, kwayan
eka tutuknang magduyan
sundu me ing gale mung yan.
O' batis, O' batis
eka tutuknang lawiswis
sundu me ing kekang sunis.
Ah! kabud tinuknang kayu
lumbug ya ing amanu yu
ene lunto pasibayu!
***************************
kaybat ning uran
pinanaring kikindat
asilip naku ...
bibilad ke'ing ulunan
besa ning lwa nabengi
labing malutu
dampul na malalaglag
e na kalupa
tawling bulung king sanga
e pa bisang mabalag
Tony M. Peña
PANAUN
mapayapa ing ambun.
manahimik ing alun.
ah? kamatayan!
ing lua pepalangian na
pati timan pitda na.
Aslag-aldo mapali
danum-uran melangi
king keyang pali
megisan ngan mepawi
lwa na ning pusung sawi
- Renato B. Alzadon
TIBUBUS DILA
tibubus dila
misimpan karing pusu
ding maluka
lulut king pangalukup
migdalang yumu't leguan
Aida D. Tanglao
ING SINTA
Ing sinta....
Ambun yang manyampukake
Keng sampagang masesese
Keng lambis na't uma ning bwang
Mika-bungang atmu nyaman.
Ernie C. Turla
MIYALIWANG PANSIN
Aili na matni tabling
bingut a bayung gising
ailing ginising
king tudtud nang mahimbing
ning pusu kung mebingbing.
Lablab-aping kandila
King mata makalula
kabud nya mipda
kabud na mu mewala
ing inamdam kung tula...
Ing mataram a kildap
sigatan ne ing ulap
mipatakan ku
king luang daya ning laram
manyugat a pataram....
Kindat-kindat a batwin
king babo bitin-bitin
mamiru ya pin
lugud kung makabitin
irug ku ena pansin.
Alisus yang dinatang
karing bale minyintang
eya tinuknang
ikua na rin melipang
ning diwa kung mayintang.
King talagang malino
ating linto anino
pilmuran ke...
atyu kaku ing kaplas
ning palmurang kinablas.
Ing ambun a marimla
king bulung gumamela
yang penimu ku
grasya nang ibat banua
sasalpantayang kaladua.
Linto anino
king danum a malino
pilkaran ke...
atyu kaku ing kaplas
ning palkarang kinablas
Renato B. Alzadon
ORAS ALAS SEIS
Oras alas seis -
Mispak ya ing munag
At ing saya sinlag
Mibait ya'ing abak
Aldo yang penganak
Oras alas seis -
Mebaldug ing dulum
Ing pepatingapun
Matda anting bula
Muli ta king isa
Oras alas seis -
Paklang yang penandit
Keng mata manakit
'Ting lalto, 'ting lalbug
Migising, matudtud
Oras alas seis -
Kumpana, kebaitan
Tigtig, kamatayan
Ganing-aldo - silim:
Sukad ne ning bie pin
- Ernie C. Turla
LAPIS BAYUNG TILUS
Lapis bayung tilus
Panyagka keng lubus
Keng karalumduman
Kening pigapusan
Gugulis neyng sisuan
Amanu kung tikdan
Tibuan kapampangan
Kablas pilubluban
Lapis ding magiting
Matni ing saingsing
Albugan aslagan
Kapampangan la ngan
Linto ne ing singsing
Lapis yayng mengising
Paritan ne sala
Enaku ulila
- Arnold D. Batul
Gulut ning biga
Tala yang mipnu’ng sala
Pakatalanga
Anak lang mipnung tula
Aginaldu ning Pasku
Tanaman Narra
Babie tula’t ligaya
Istung oras na
Kaugtuan magpaynawa
Karing bulung salilung
Balacat la pin
Deng ikit ta’ nandin
Penapyas dala
Uling nong pinderang da
Tilapiang paugtuan ta!
Arnold Batul
Dayang Mapayapa
Tinularing daya
Bie metung makudta
Binie na ing sabla
Ban ta’ng mipayapa
Nuan ya karing sabla
Keng matang mipala
Butil ning metung lua
Anak ya’yng misalba
Amanung salita
Kablas sepung dila
Kapampangan bina
Daya keyang teya
Mengulabe kaku
Anti mu rin keka
Pitularyan daya
Dikdik ne’yng salita
Arnold D. Batul
ORAS
Oras ning almusal--
kape at pandesal
mangan tanang dapal
lage tang mamalbal
ing obra marakal.
Oras ning paugtuan--
saglit ta pang mangan
ban mika sikanan
uling ing linangan
dapat ta yang tamnan.
Oras na ban mapun--
ing pale metipun
medara ing buntun
ngeni ta mitipun
atin tanang itun.
Oras pamaniglip--
ing pagal mituklip
ing sakit melilip
yan pamipatilip
King bie keti sulip.
- Renato B. Alzadon
DENG ATLUNG KUMPANA
Atlu lang kumpana:
'Ting masigla swala
At ating papa-lwa.
Keng taung maglakbe
Ilang muhun ning bie.
Prumerung kumpana
Tigtig na masaya.
Ing bingut kikyak ya,
Masala ikit na,
Kinatmu ing grasya!
Iti dinagul ya
At layun milsinta.
Tinigtig yang myuman,
Kasal king pisamban,
Mesaya no naman.
Plegaria ya tigtig
Makapangaligkig,
Tangis ning kumpana
Paldas a balita
Inawa mewala.
- Ernie C. Turla
ATLUNG TANKA
manyaman dili
oras ning pamaglakbe
potang sisilim
malino meng asisinag
nukarin ka menibat
ngening kapaskwan
kurap-kurap paritan
kilub ning parul
puput-matda keng dimla
keng ali mu panyatang
‘ning bayungbanwa
nung ala kapa murin
lakwan ke’ing parul.
king kasumangid dalan
e muku panintunan
Tony Mercado Peña
Patac ning daya cu
tintang ginamit cu
sinulat cong librung
mibie tete queca
bang atacasan muy'ng
malucang bili mu.
Udis Lord
Ing aldo e bisang lumabas
nung ene atiupan ing bulac a ulap
Pasilipan ney'ng timan ning canacung Inang
tinaid canacu. - Udis Lord
madalumdum na
menabu ne ing aldo
mapun na bale
nukarin ka ima ku
pali mu't kaul bye mu
saya ning pasku
misanmetung king dayu
kudtang mepupul
king dimla penulas da
yelu pekapalyan na
aida tanglao
More Haikus:
matang makapyak
kidlat ning ganingaldo-
biklat ning silo
kaybat ning kidlat
katlung pulung bilangan-
duldul yang maklak
ring dapu ilug
maratun lang manaya
e titimanan
lamak a lugud
ngening Pasku king Indu-
perlas lang haiku
lugud e sama
pamanulu e sakit
bye ning beluan
Aida D. Tanglao, Disyembri, 2005
Nanan Me Yang Rosas
Poesiang pang-anak neng RBA
Nanan me yang Rosas nung ala yang suksuk
kabud naka magtal, eka rin masuksuk.
Nanan meng puntukan ing kekang salikap
nung ala yang laman, eka mekakalap.
Nanan meng puntalan yang mabungang dutung
nung eme ukyatan, ken kang masalilung.
Anak, ukyatan me ing kekang paninap
managtal kang bunga, katmuan meng salikap.
Nung atin mang dusa anti lang pagsubuk,
Nanan me yang Rosas nung ala yang suksuk.
Pasalamat, Bayung Banua
Salamat queng Guinu
Queng bie queting yatu
Nung e mu pin Kaya
E ta linto sana
Anting pamanablas
Queng lugud nang pantas
Ing magpacacayap
Queng sabi at dapat
Ngening Bayung Banua
Itamung mangatua
Neng disnan ta pa'iti
Masuerti tang dili
E anting mangaya
Queti qng masala
E bala nang tau
Tutua at masuelu.
- Ernie C. Turla
ING BILANG DA RENG BULAN
by E. C. Turla
Deng aldo ring balang bulan
Titlu lang pulu keng bilang:
Abril, Hunyo at Septyembri
Anti murin ing Nobyembri.
Titlung pulu't metung no man
Detang anggang makatagan,
Subali mu keng Pebreru
A kulang keng panakit ku.
Tidwa yang pulu't walu 'iti
Anya pugit ya ping dili
Balang kapat namang banwa,
Daragdag kang metung kaya.
based on the poem:
Thirty days have September,
April, June and November.
All the rest have thirty-one
Excepting February alone
Which has but twenty-eight in fine
Till leap year when it has twenty-nine.
Keng panga-memorya na ning poemang ayni,
agad milang atandanan kabilangan a aldo reng balang
bulan.
The End
To go to the next page, click:
http://maxpages.com/poecia/poecia24
To go back to the previous page, click:
http://maxpages.com/poecia/poecia22
|
|