LIBRARY OF KAPAMPANGAN POETRY, PAGE 22 - ERNIE C. TURLA, president, Akademyang Kapampangan International - Languages

TABLE OF CONTENTS:
1. Gisingan Mu Kung Abril - Renato B. Alzadon
2. Muli Ne Y Marcial - Rolando de Jesus
3. Mi Ultimo Adios Nang Rizal - Renato B. Alzadon
4. Ing Lamak Ning Watas - Renato B. Alzadon
5. Salamat Pu - Renato B. Alzadon
6. Tore Ning Baylonia - Renato B. Alzadon
7. Me Piden Verso - Renato B. Alzadon
8. Pasku Ning Maglakbe - Renato B. Alzadon
9. Capampangan Cu - Udis Manalansan Lord, Ph.D
10. Ing Lakad Keng Bie - Ernie C. Turla

GISINGAN MU KUNG ABRIL
Neng Renato B. Alzadon

Matudtud kung maniaman, Indu
king pali ning kekang salu.
Gisingan mu kung Abril!
Pasibayu kung tumubu
maniampaga kung "Daffodil".

Matudtud kung maniaman, Ibpa
king pugad a kekang dampa.
Gisingan mu kung Abril!
Akit mulang dalipakpak
dening kakung murang pakpak.

Matudtud kung maniaman, Guinu
king kalalaman ning yatu.
Gisingan mu kung Abril!
Magbangun ku king Bethlehem
king Bayu mung Jerusalem.

MULI NE Y MARCIAL
by Rolando de Jesus

Atlung banwa na pin, keng panga-opera
Pusung siguk-siguk, mesikan neng milduk
Barasus milamnan, mibawing katawan
Dinatang na'ing aldo, muli ne y Marcial

"E ka pa babalik, ikang subersibyo
Memakbung na naman, bomba ketang aldo.
Ciudad na ning Boston, asna king karayu
Agawa mu pa sundu'ng pamanggulu.

"Ing kadwa na nita, gubyernu minatba
Alang dokumentu, papeles nanu pa
Kabud ing karas mu, pabalik da na ka
Marakal lang tau, keng bie mu magsadya."

Kasakit na naman ning keyang kabilyan
Sarili nang tibuan, e naman aulian
Mabilug a yatu, iya pamu yata
Ideporta naka, sarili mung bansa

"Peratang yu kaku, alang kamalayan
Ing dala kung muli, malino konsensiya
Uling paniwala't tibe salpantaya
Ing katataulian, manyambut justicia."

Keng kasabikan, muling maligaga
Alang mekayawat, agad sinulat ka
Diktador ning balen, pabor e ka manyad
Pabalu mu kaya, muli na kang agad

"Isipan mu pamu, masolungmasolu
Ing marok a planu e mu na susundu
Kekang kaligtasan, e ku asiguru

Ing kekang panuli, ya ing kamate mu."
"Ala kang ganakan, alang katakutan
Manyaman saganan, datang kamatayan
Kauli ku ken, e mu pagdamutan

Desisyung ibulus o yakung patean."
"Keka yadwan ku, atlung pulung aldo
Legal dokumento, atin na siguru."
"Pusung mangalinyu, balen atiu na ku

Bulan ning Agosto, aldo beinte unu!"

MI ULTIMO ADIOS NANG RIZAL
Kepangpanganan neng: RBA

Mamun ku balen kung sinta, liyag ning aldo masaspak
Perla ning dagat aslagan, Eden ming mipda king pisak!
Malugud keng yampang keka ing bie kung lanta at muslak,
nung maningning ya man sana, sariwa, at mabulaklak
king kekang ikasaplala yampang kyaring pekalamak.

Ding aliwa, busal na ning malimpuyut a labanan
yampang de ing bie ra keka king alang kapikakunuan;
Nula mate ena bala, cipres, laurel, o lirio man
Lugal ding Martir o Parang, labanan o bibitayan
Alang ulaga karela , maus kasa indung tibuan.

mate ku ngening ing banua akakit keng mika- kule
Tanda na ning pangatuklip ning benging atmu katamle,
Yang saslag mung Aurora nung tula mung paguintuan me
ibubu mu ing daya ku ya ing gawan mung pangule
ban ing kislap nang kakablas sumilo king panlalawe.

yang panaguimpan ku bie ibat inyang kayintangan
at angga king dagul nakung miganap na king sikanan;
ing tangalan da ka sanang maguing iyas ning aslagan
ala kang lua, makatna ya ing alang dungis mung kanuan
alang dine, alang kanglap makidungut kenu paman.

kening bie ku ya ing bukud milalablab kung pigampa
Minuan ka, at yang gulisak ning kaladuang ume mapda!
Minuan ka1 O' kasampat na, tikdo ka akung miragsa
Ing bie ku, lalam mung banua, idaun keng mipnung tula
at king mistiku mung gabun matudtud ku kabang-kaba.

Nung king babo kung kutkutan misan a aldo akit me
ing sampagang inapsa ra ding dikut a mangulabe;
ilapit me king labi mu, ing kaladua ku uman me
lalam ning kakung kutkutan ing kanuan ku damdaman ne
Itang kekang pangisnawang atmu paling kaku mame.

Bustan mung yang mamung bulan pasinagan na kung kusa
Bustan mung yang aring aldo dumalo yang mamilagwa;
Bustan mung yang pane-pane angin kanaku manapa
at nung ating tuklung ayup king kurus kung pekatanda
bustan mung ing kapayapan matarling nang itumaila.

Bustan mung ing danum uran langi king pali ning aldo
kambe ning kakung sambitan mukiat kanyang banuang iro,
Bustan mong kiak ding kuyug ku king maranun kung panlako,
nung misan a gatpanapun atin mangadi, balen ko
ikaman, king kapainwan ku siping na ning Dios babo.

Ipangadi mula naman ding kalulung mengatampus
Ding tinangap king mabagsik a parusang alang tarus,
Ding pengaring minalduk king mapait dang luang mamagus
Ding ulila, ding mebalu, ding bijag a makalunus,
At layun ipangadi mung mitimawa kang tibubus.

Ing libingan nung ing bengi kulumbuan na neng matuling
nung atin mang mag-ayunu bukud namung ding milibing,
emu na sa gagambalan yang lijim dang makatabing,
at nung atin kang damdaman a litid a tataguinting
aku'yta, Balen, damdam ka, karing sunis kung tatabling.

potang ing kakung kutkutan kelinguan da ne ding tau
at ala nang pekatanda maguing kurus man o batu,
bustan mung ing talagambul isambulat ne king piku
Ining abu kung king ala makisaut pasibayu,
bustan mu sang isabug neng pulbus king balat ning yatu.

Nung makanian ena bala nung akalinguan mu ku man
likupan, dalan at banua kanaku larin baltangan;
kablas ku karing nota mu ban matni mu kung damdaman
banglu, sala, kule, kutug, kanta, o saingsing pa man
alang patna, pawaga king kakung sasalpantayanan.

Balen kung kaku mal dili, dusa na ning kakung dusa,
Palsintan kung Pilipinas mamun naku ngeni keka.
pengari ku at kekuyug keka lalakuan ku na la
king puntan ku alang ipus, berdugus, o manyupil pa,
ing salpantaya e mate , ing Guinung Dios mag-ari Ya.

mamun naku pengari ku, kapatad, at kayabyayan
at kesing-para kung anak king miwaglit kung santungan;
ibie yu ing pasalamat ing pagal ku miangganan,
mamun ku banyagang mutya, kasuyu at kaluguran
mamun ku maldang mal kaku, ing mate yang kapainawan.

ING LAMAK NING WATAS
Neng: RBA

Guinu, king aldo na ning kekang kebaitan
Nung arapat kusa, buri dakang puntan;
Bisa kung dumalo king kekang Sabsaban
King bara kang akit…, king bara kang samban;
Agyang dimut ya mu ing kakung kaguiwan
Buri keng idaun king kekang kamalan.

Nung metung ku sanang Anghel na ning banua
Tipa ku mu naman barakang pagkanta;
Oh’ wa, kasampat na ning dalit ligaya
Alelu, alelu, ale- aleluya....
Gloria in excelsis Deo, Gloria! Gloria!
Layun tipa-manik.... pupuri't sasamba.

Nung metung nakumang batwin a makislap
O talang maningning gulut na ning ulap;
Yang bigang matuling ena ku atakap
Pilit nang manatsit ning sinag kung sikap,
King kekang Bethlehem ing aslag laganap
Kabang dudurup ku kanyang mal mung arap.

Nung metung ku sanang pastul ning marangle
King kanta ding Anghel, migising..., mipakde;
Eku mikakakunung ume at lumele
King lilibangan da ding tupa kung sese;
Ketang mal a pungul babo na ning are
Ibie ku ing tungkul, purian at samban ke.

Nung metung ku sana karin taung sugui
Pantas king kabiasnan keting yatung iti;
Ume kung magtangas king aldo at bengi
Angga king akit ke ing Aring mesabi;
At nung akit ku ne, king kamala’ niti
Darala kung lamak, yampang kung masusi.

Mupin, O Guinu ku, ing keka sasamba
Lubas ya king ningning, king leguan at tula;
E batwin king babo…, e Anghel king banua
Eya taung sugui …, eya pastul tupa.
Malati reng dili ding angang Poeta
A talagambul na ning amanung mana.

Nanu tang yampang na ning maluka king bie
King aldo nang beitan ning Aring metunggue?
Ing malating dili karing talagale
King amanung sisuan biasa yang mibasle;
Inya O' Guinu ku keka yayampang ke
Ing lamak ning watas--- Pamasku yang gale.

Katulad ding Anghel ning banuang katasan
Malukang Poeta daralit ya naman,
Dalit yang mibubu king amanung sisuan
Dalit yang yapse ning dilang kapampangan,
Dalit ning ligaya...dalit ning kapurian
Aleluya, Guino......, king aldo mung beitan.

X’mas 05

SALAMAT PU
Neng Renato B. Alzadon
Thanksgiving 2005

Kekaming menuknangan na king Kweba ra ding Leproso
Emi ne ipangutang pa nung nanu ya ing Impyerno;
Nung ing Impyerno yang lugal da detang kaladuang sasyo
A magdusa aldo't bengi ketang kalma rang mapusio,
Makanian ke bie king kweba, ing pagsalbat e mamako
Agyang dimut mung penandit bitasang eke mipasno;
Uling agyang panaplak mu alang lunas a makalto
Ban mayampat ing kirut na ning laman ming malalaso

Mayap la pa ding mete na atin nalang kapainawan
kesa kekaming mabie pang marurunut a kalamnan;
Nung atin kemang inawa, diwa, at kapanamdaman
Mete na kaming mistula king mata na ning balayan ;
Ikami ding inugse rang mabie, keni king libingan,
Linubas da king upaya, pibandian, ampon dangalan;
Ikami ding inaus dang "Ding taung Makasalanan"
A misumpang pikamuan na nitang Guinu ming sasamban.

Numan anti king kabayat piguyud-guyud kung dusa
E kinulang pamanalig ing magsalbat kung kaladua;
Sasalpantaya ku mu rin king sasabian ding Propeta
King datang ya ing Manatbus king yatung palpikasala;
Inia kabud abalu ku king ing Maestro datang ya
Ban mamaltang ya pilatan ning Samaria't Galilea;
Aku at ding abe kung syam migtalukbung na keng lupa
King makapampan a lugal pasalikut keng menaya.

Enaman binang miglambat kekami yang abatyawan
kambe no ding alagad na, ing Maestrong panenayan;
At iniang magpaukiat ne king kekaming pagkabilian
Linundag ya ing pusu ku, ginulisak kung masikan:
"O Anak nang Aring David, ibie mung kapaglunusan
kekaming palpikasalang marurunut a katawan".
Melikid ya ing Maestro dimdam na itang sambitan
Biklat nala ding gamat na king bami ya ping lapitan.

At kabud milapit kami sinamba kami arap na
Maniawad kapatawaran king kekeng pamikasala;
"Ing kekayung kasalanan mipatawaran na", ngana,
"mekalag na keti sulip at mekalag na king banua".
Balamu panamdaman ku kaba ning magsalita ya
Ing anti ya mong isisan ing megipu kung kaladua;
Iniang lon mi ing sarili, keta muring oras aita
Melinis kami katawan, alang baltik, alang mansa.

King uli na niting mala, , tula mi miraralakdak
Emi balu ing gawan mi kikiak kaming sasagakgak;
Makananu naman mo ping eka sagakgak at kumiak
Kabud-abud nala limbug detang sugat ming nanaknak;
Inia king milalung tula ginulut keng terak-terak
At mitatagalan kepang anting mamialung a anak;
Metung yamu ing magbabo karing kekaming pamalak
Muli kaming mamalita karing kekeng kamag-anak.

At kabang maglakad kami biglang sinulud king diwa
Eke pepasalamat man ketang dinapat king mala;
Kabud aisip ku iti mibalik kung malalagwa
Binie ku ing pasalamat king Maestrong mayupaya .
"E wari apulu kayu? ", nganang kaku menusisa
"Obat ikamung mibalik ? Nukarin la ding aliwa?"
At ketang dimdam kung ita kanita ku abitasa
Ing Guinu man panayan nang pasalamatan yang kusa.

Ing Guinu man panayan nang karing tau damdaman ne
Ing ditak a "Salamat Pu" agyang malati yang bague;
Uling ita ya ing tandang kikilalanan yang tune
Ing dapat a kayapan lub a pigkalam na ning minie;
At ing ninu man melalang nung ganap ya pamibule
Ing pasalamat king Guinu karapat-dapat neng ibie;
Dapot ing tau pin naman anti mo ding kakung abe
ing katiting a salita, king Maestro, pigkait de.

At manibat na kanita tintu kuna kening lub ku
Ing pasalamat ku Kaya king anggang kalam na kaku,
At nung kapilan na ku man magpasalamat king Guinu
Karin ku lalung akakit ing lugud nang emu nanu;
At kabang panamdaman ku ining lugud nang masolu
Karin ku lalung kakamtan itang tulang sakdal yubu
Uling ngaku mong mimisip, metung kung hamak a tau---
Ninu akung liguran na...? Metung ku rugung Leprosu.

(Lukas 17:11-19)

Diwa:

Metung ku rugung Leprosung lininis na ning Mengabus
Lininis na ning daya nang pepatulari ning tandus;
O' kabang makayagpa yang makapaku babo ning krus
Inakdak de king gilid na ing pataram a matilus;
Itang majulagang dayang menalamsik at minagus
Yang menisis king kaladuang marinat at makalunus;
Inya karapat-dapat mung sabian ku king Guinung Jesus
Salamat pung alan'anggan king depat Yung pamanatbus.

TORI NING BABYLONIA
neng Renato B. Alzadon

Agpang king Banal a Libru, kanita kanung minuna
ding tau king meto-yetu metung ya ing salita ra;
ulina nyan ding dinatang a menibat Paralaya
a menalakad tuknangan king labuad na ning Shinara,
ala lang sumbagal ditman ban yapse ne ning dila ra
ing balak dang gawang syudad ibat sulip angga banua,
uling metung lamu sabi inia mikakametung la
at pigmulan deng telakad ing Tore ning Babylonia.

Ing Tore ning Babylonia yang peka-palatandanan
king kabiasnan na ning tau at king tagle nang sikanan;
yamo ing anting patutu king ing Dios ene kailangan
at agawa na ning tau nanu mang buri nang gawan;
yang antimong pekatandang era malyaring gulutan
ban ela mikalat-kalat keting yatung maleparan
at detang mengitalakad lagyu ra midukit no man
ban ila, aliwa ing Dios, ing lagyung mipaligayan.

E ata, ing meguing bunga na ning metung mung amanu
ya kabud ing kapalaluan king panamdam na ning tau;
inia kabud ikit ning Dios ing makanian a prinsipyu
sigka na ban ena milud dapat a e maka-ustu!
Dapot nanung gewa ning Dios? Agpang king Banal a Libru,
itang bugtung a salita ya ing sinintang na mismu;
pablasang ing salitang yan yang peka pun na at sepu
niting kapaglabanan da ding lelangan na king yatu.

Ing Tore ning kapalaluan inia mituknang ya iti
uling ding mangitalakad enala mika-intindi;
Ing Dios yang maki-kaburian king makanian a milyari
inia kine no king dila ding miyayaliwang sabi;
ban ing salita ning tau ya ing simbul nang matindi
king Dai nang pagmairing at dangal nang pakianti
inia nung pitutuliran ing amanung makawili
king Tore ning Babylonia yang simbul a menalili.

Karetang amanung detang binie ning Dios king ketawan
kabilang deng alang sala ing amanung Kapampangan
inia ing amanung iti ya ing simbul ning balayan
king dangalan na ning lahi ra ding Raha ampon Lakan
at kening amanung iti karin taya pakisabian
at pupurian aldo't bengi ing minie king amanung yan
inia detang makamate king amanung mipanuanan
kabang banua ya ing banua ela mag-luid kapilan man.

Nung ing metung a salita yang makakayap king bansa
at mag-tagalog ta namu, ala nang Kapampangan pa,
Ing Dios, king kayang kabiasnan, e nane sinintang sana
itang metung a amanung ding malda gagamitan da.
Oneng ali, deyu ne yan, karing dila ing kebit na
miyaliwa lang salita uling yan ing kaburian na;
inia kekong magsalitang "amanung metung" mayap ya
ganakan ye ing milyari king Tore ning Babylonia.

Me Piden Versos Nang Rizal
kepampangan neng RBA
December 2005

Apamitan yukung tigtigan keng lira
a mabang panaun pipi at balbal na;
ding luma nang litid eno babie nota
pati inspirasyon ning musa mipda na!
Nung pamilitan ke ding maguing ampang na
lubas la king diwa king leguan at ula;
nung tin man sagakgak pabalat lang bunga
pati na sambitan pikatsa lang dusa;
at ulina kase ning bie kung ulila
king tula o lungkut pata ku kaladua.

Kanitang minuna! Eku kalaraman!
Mupin, makaba nang aldo ing miralan,
taguring poeta ken da ku ausan
king pamakibasa't pamikaluguran.
Nung batyon ku ngeni, itang milabasan
bina nang maulap kening katandanan,
katulad na wari masayang kapiestan
nung nu ding sonatang malalam kalamnan
a peparamdam da detang manigtigan
ila nang mibukud king diwa melakuan.

Metung kung tanaman a bayu pang tubu
dane ning aslagan karin ku mebugtu,
karin nungnu ating amyam a masamyu
karin nungnu ing bie taguimpan yang mamu:
Era ka kalinguan O balen kung indu!
Karening dalit ku ilang mengituru
ding magkantang ayup king sanga magyuyu,
at itang lagusgus ning danum king pulu,
at ing byung ning dagat mame masalusu
king maliwalas nang aplayang katabnu.

Inyang mayintang pa ing kanakung diwa
tiniman ya kaku yang aldo masala
ing pali king salu mikal alang kabla
bulkan yang babasuk king aping mibugha,
Tinggap ku king lub ku ing maguing makudta
ban karing bersada kumit kung upaya
at itubud ke yang angin a saguiwa
king kabantugan mu, ban yang mamalita
karing balang suluk matning itumaila
ibat keti sulip anggang lipat biga.

Likuan ke ing kakung tibuan a balayan
lubas a miungle dutung king kakewan!
Ding mayubung kablas ding kakung kundiman
ila ding alina subli kapilan man.
King kapagnasan kung magbayu kabilian
miglakbe ku lipat kadayat-malatan
dapot ing bunga ning kamangmangan kung yan
kesa king kumit kung guintung kapalaran,
ing tinaid kaku king pampang kung disnan
paldas yang anino na ning kamatayan.

Detang matimyas kung panaguimpan king bie
talindo, pigagap, at sintang dalise
king balen kung maslag karin la migsale
lalam nang likupan niang banuang makule.
Pablasang ing kakung panamdam pata ne
eyu naku sana aduananan gale,
uling king busal ning desyertong matamle
karin la minagus dening pamibule,
inia ining diwa, metuyut king lumbe
kening kaladua kung king dusa mipase.

PASKU NING MAGLAKBE
Neng RBA

Nung nga ra ing Pasku, ala yang kalili
karing anggang aldo makawili-wili;
Ita...kareta mung maki pusung maili
siping ding kasuyu, pengari, at suli;
Dapot king maglakbe king Ilang melili
ing aldo ning Pasku...malungkut yang dili!

King pamagdulap nang beluan a maula
ning bigung maglakbe, mistulang ulila;
anti reng keririyan sadyang kakilala
uling era talus ing lungkut nang dala;
Inya ni metung man alang pepadala
agyang karaklut yang lugud at alala;

Ding daramdaman na a kantang kapaskuan
paganaka la mu king balen nang likuan!
Balen yang sale ning dusa't kakaluluan....
Balen yang megatmung sindak at kaguluan!
Inya ngening Pasku king Guinu na aduan
lingusan ne sana, ing balen nang tibuan.

Agaganaka no ding ulilang lubus
a king bebe dalan mamagpapalimus!
Deta sang mabanding mangasias a dungus
ing diwa ning Pasku king pusu de taglus;
ban detang kalulung king dusa migapus
atsanan do sanang kapatak a lunus.

Agaganaka no detang kulang kalma
king lub ning sukulan mekutud a laya.
Kabubuslan na ning bili rang malugma
manakit la sanang katiting a saya;
kabud nasa ating kuyug a manapa
king kabilianan dang antimung pinyumpa.

Agaganaka no detang makarate
king salun mipandig alang makabante;
King aldo ning Pasku atin sanang munie
panialing panulung apanyuglung dang bie;
Ing anghel na ning Dios sana pin datang ne
king bareng akamtan itang Paskung tune.

Agaganaka no ding anak maluka
ala lang pyalungan o piblasan kaya;
agya sang luma yang sewan dang munika
yabut de king anak king bane mang saya;
King aldo ning Pasku aganaka ro sa
ding pakakalulung simbul ning palyasa.

Dakal la pang pusung mibalut king lumbe
king aldo ning Pasku alang mamantabe;
dapot lipat dagat atin lang kayabe
karing balang saglit yang makayantabe
a anting anino kalukup dang kambe
diwa neng malugud ning bigung maglakbe.

CAPAMPANGAN CU
by Udis Sanchez Manalansan-Lord, Ph.D

Capampangan cu,
Doctora, soprano, black belt cu quing Tae Kwon Do
Ms. Asia International cu
Sinulat cung anam a libru
sumulat cu pang aduang pulu.

Ing timyas ning timan cu biniyag ne'yng yatu
Uling asna cu calagu.
Queng leon, queng tigre ecu tatacut
Uling Capampangan cu.
Tetagan, tenacan,
bandi co ngan yan uling Kapampangan cu.

Capampangan cu,
Caluguran que ing Pilipinas a labuad cu
Potang ayari co reng aduang pulung libru
talacad cong colegio
deng calulung cabalen cu.

Kapampangan cu, Doctora Lord
ing yaus da cacu
deng mabilug a yatu
dacal pusong biniyag ning timan.
malagu, matenacan, matatag, sopranung ,
capampangan cu.

ING LAKAD KENG BIE
by Ernie C. Turla

Keng lakad misakab
At mekatalakad
Mibubulang pane
Keng dalan na ning bie

Miragsa, misalsal
King buldit memusal
Alang nanu naman
Tinikdo yang myuman

Dapot nanding abak
Gulpi nyang misaldak
E ne mekatikdo
Tawli na nyang aldo

'Gyang nu ka kalakas
Datang murin bukas
Mina la reng intud
Tuknang na ka kabud

Alang makibalu
Nung nu anti dayu
Ing kekang apuntan
Keng mibye lakaran

'Nya kabang masikan
Kayapan tuntunan
Ban atin lang iglon
Deng kekang lalakwan

To go to the next page, click:
http://maxpages.com/poecia/poecia23

To go to the previous page, click:
http://maxpages.com/poecia/poecia21

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00355

Page Updated Fri Dec 30, 2005 9:46pm EST