Kapampangan Poetry For School Children
Table of Contents:
1. O' Matas A Banua - Renato B. Alzadon
2. Pasalamat, Bayung Banua - Ernie C. Turla
3. Mamilang Tamu - Renato B. Alzadon
4. Aduang Gamat - Renato B. Alzadon
5. Mamilang Tamu - Renato B. Alzadon
6. Mamilang Tamu - Renato B. Alzadon
7. O Asu Kung Puti - Rnato B. Alzadon
8. Nasi Ya Mu - Rolando de Jesus
9. Dulung Ku Kanini - Ernie C. Turla
O' MATAS A BANUA
by Renato B. Alzadon
O' Matas a Banua paintungulan daka
puntan kong pasyalan ding kekang planeta.
Puntalan ke ing Mars, Mercuryo, at Venus
taglus ku Jupiter, Saturn, at Uranus.
Saka ku paindalan Neptuno at pluto
bayu ku magbalik king planetang yato.
Manaya kang bagya kabud meragul ku
Astronaut kung mukiat kanyang ketasan mu.
PASALAMAT, BAYUNG BANUA
by Ernie C. Turla
Salamat queng Guinu
Queng bie queting yatu
Nung e mu pin Kaya
E ta linto sana
Anting pamanablas
Queng lugud nang pantas
Ing magpacacayap
Queng sabi at dapat
Ing sang tuturu ra
Reng quecatang mestra
Pagsicapan ta sa
Queng bie cabang-caba
Ngening Bayung Banua
Neng e ta pa matua
Pasalamat ta ngan
Dacal ta pa dasnan
ADWANG GAMAT
Neng RBA
Aduang gamat, wanan ampon kaili
balang metung atin limang taliri.
Balang gamat atin siku
at balang taliri atin kuku.
Itas tala, eko maili
lunto la ring kilikili.
Pakpak tala, isa ,adua, atlu, apat
Malinis la ding adua kung gamat.
MAMILANG TAMU
Neng RBA
Metung, adua--
Aduang pusa.
Atlu, apat--
apat a damulag.
Lima, anam--
anam a tandang.
Pitu, walu--
Walung kabayu.
Syam, apulu--
apulung pugu.
**************
MAMILANG TAMU
neng RBA
Isa, adua, atlu--
Dalaga at baintau.
Apat, lima, anam--
Mipaglolo no man.
Pitu, walu, siyam--
Miyasawa no kanian.
Karas ning apulu--
Maki-anak no pu.
O, ASU KUNG PUTI
Neng RBA
O' asu kung puti
galo-galo iki,
kanaku ka tuki.
Lon to ding mangapit
king pale magligpit
a aplit sasagmit.
Karing pikapitan
karin to abuangan
detang Pugung-Dalan.
Potang mayabuang la,
ing metung karela
ya ing tagalan ta.
Ing keyang agpanan
agad teng durutan
bayang alang lualan.
King durut pa-igu
malyu ya ing pugu
kabud nya magdukmu.
Beluan mung isikap:
Alang pugung malyap
karing bisang dakap.
NASI YAMU
Nang Tiakbong
(Roando de Jesus)
Nanga ning maestra
Potang kaugtuan
Dala yung bakal
Kanan agnanagnan
Ing aldo ngeni
Tutung maulaga
Ngeni ke ituru
Tune makisulu
Nasing marimla
Napun pa mitun
Bidburan mung asin
Mebalut keng bulung
Makanyan kapayak
Magaral a anak
Kalulu king baryu
Lakaran marayu
Pansit gisadu
Pindang, ebun buru
Puestu king palengki
Karin ngan mesali
Pakisulu ke
Atin makisulu?
Kabud nasi yamu
Mipakaili la mu
Indung menabilin
E marine, o maimut
Pakisulu me pin
Kanakung binalut
Ninu ing migsalbat
Kaninu la gamat
Yapin..nasi kabud
Binalut yang lugud.
DULUNG KU KANINI
by Ernie C. Turla
Dulung ku kanini
Keta king palengki.
Sali kung sibuyas
Kamatis at kamyas.
Nung ala, sampaluk
Babi ampong baguk.
Maglutu kung sigang
Ulam a manyaman!
To go to the next page, click:
http://maxpages.com/poecia/poecia22
To go to the previous page, click:
http://maxpages.com/poecia/poecia20
|