LIBRARY OF KAPAMPANGAN POETRY - compiled by ERNIE C. TURLA, president, Akademya ning Kapampangan, International - Languages

This page features poems which are all written by
Renato B. Alzadon.

TABLE OF CONTENTS:
1. Talaturung Kapampangan
2. Ing Arana Ning Poeta
3. Ding Bayaning Alipan
4. Ing Kanakung Batwin
5. Ing Musa Ning Tagimpan
6. Nanu Ya Ing Sinta?
7. Sumpa Ning Poeta
8. Kirirrring!
9. Ing Parul A Pusu

TALATURUNG KAPAMPANGAN
Neng Renato B. Alzadon

Kapampangan! Kapampangan! Masuerti ka! Masuerti Ka!
Uling agyang makanian mu atin kapang Ernie Turla;
Ya at ding kayang kayabe bibu ne ing Akademya
Ban ding anggang kapampangan makapangapampangan la.

Ing gagawang diksunaryu dapat yang e gawang biru
Dakal ka benging lamayan dakal ka pawas tumulu;
Makanian man Y Kang Ernie pigkasakitan neng bibu
Ban detang e kapampangan mabiasa la at mituru.

Sinulat yang poesia, basultu, kanta, pulosa
A saka no titipunan ding akupkup nang poesia
At saka ya babie turu banda keni, banda keta
Ban keta ing kapampangan a salita masaguip ya.

Dapot makalunuslunus ing malugud king amanu
kening kayang pamanuru, alang lalto intresadu;
Ene man makapamilit pota sabian da ding tau
Nung inya mu kakanian ya magtinda yang diksyunaryu.

Agyang matimbang ya turu lalto la mung alang kwenta
karening linub mag-inglis, paratut a magbibiasa;
Kesa king makiramdam la king tuturu na ning matua
Ilang bural bural salung dididtsung magbida-bida.

Oita rugo ing gewa na ning marangal a maestru
King pangamoderator na tajimik yang migretiru;
Makanano akakit na king mapilan lamung tau
Ding lalto atin masabal king paglualu nang amanu.

Kalupa kung kapampangan e ta mu dapat pabustan
King ining pipagalan na ma ala mung kabaldugan
Uling aku, kabang bie ku, ing lawe ku king taung yan
Metung ya karing bayani ning amanu tamung sisuan.

ING ARANA NING POETA
Neng Renato B. Alzadon

Nung matudtud kaman, Batwin kung maningning
A ngeni migpampan king ulap a tabing;
King kablas ding kuerdas ning Lirang tatabling
Matudtud mung pusu, buri keng migising.

Sumiro ka sana king siwang ning ulap
Malukang Poeta atdanan meng sulyap;
Nung ipagkalam me ing dimut a kislap
Ligaya neng tune ning pusung maninap.

Utus ning ugaling akamulatan ta
Bayu king banua mu mipanik kung sinta;
King tulid mung awang midalit kung kanta
Antimong kaustan ning wagas kung pita.

Bilang pamamintu, ing kekang alipan
Oini ing dalit nang mengatmung taguimpan;
Ban ing keka lugud a pisimpam-simpan
Maramdam yang matni king meto-likupan.

Oyan balu nana ning kekatang balen
Ikang palsintan kung Tala na ning Belen;
Ika ing Anghel na ning kanakung Eden.
King altar ning pusu, sasamban kung Birhen.

Ngening balu nana ning benging tajimik
Ing dalise sintang king pusu midantik;
Maniad yang upaya ing kaladuang sabik
Ing lugud ku keka bustan mung mipanik.

Nanung ulaga na ning sintang melaun
Nung manabu ya mu king marimlang aun;
King kasibulan ning mayagang panaun.
Matampa ing manik arap mu idaun.

Kaministilan mung dalung yang mapilar
King Dyosa nang Venus ing sasambang Cesar.
O maslag kung Venus king siduan mung altar
Bustan mung mampang kung sampagang asahar.

Bustan mung mampang kung lugud ampon suyu
Antimong asahar, sampagang masamyu;
Idaun ku keka anggang kakung agyu
Akit daka sanang king tula magyuyu.

Nung pamayapan mung ding bitis-marangle
Mipanik lang sinta king kilub yung bale;
Ibie mu ing tanda kening talagale
Buklatan meng awang tando kang malale.

Dakal a salamat Batwin kung makislap
E mu la pigkait timan mu at sulyap;
Bisni me ing awang king siwang ning ulap
Layun pepakit mu itang lub a mayap.

Salamat Batwin na ning matas kung banua
Dininan meng tula ing kakung kaladua;
Dimdam mu ing aklis king tabling ding nota
kening Harana na ning kekang Poeta.

DING BAYUNG ALIPAN
Neng:Renato B. Alzadon

Minum tana naman! Mekeni kuyug ku
Lukluk ko king bangku ning Tindajan Baryu;
Pepabuklat nakung "Maputing Kastilyu"
Ipadurut tane ing sikdan basu;
Balang maspak diwa dening Laureadu
Pakalabkaban ke ing pantuk- amanu;
Agkatan da kayu--- king bie tang kalulu,
Parsalanan tala ding pengari tamu!

Ding pengari tamu, lon yula panyaptan
Ining pamanganak era tutuknangan!
Anak nalang anak! Inya pin makanian
Ing bukas ding anak ere gaganakan!
Balu yu nung nanung karelang isipan...?
Pepa-utang lang bie---dapat lang bayaran!
Inia anti la mong memugnus patubuan
Menganak la---balang atin sisingilan!

Nung wari keng sisi---bayu ta miyapsa
Itang pamamayad yang malino paksa!
Inia eta ta paman mika-balbas baba
Makitanam tana O mamagut punla!
Nukarin la detang patinga dang kinua---?
Bakit kening dulang alang nasing malpa---?
Eta no paintunan mimin nong mitaya
King Jueting, king Sabung, King kwaho, at Sakla!

Tiru daka tamung lague king marangle
Balang paragulan ding kekatang sese;
King sakyud ning lait miyuli tang kumpe
Sese tang biseru ban pakanan ta ne;
Potang dagul ne yan at pisali dane,
Ing abli dapat lang munta king menese---
Uli ping mamayad tamung utang, abe
Kunan da ing abli--- ala tamung dake!

Masdan yu, kalupang anak-talagambul
Oyan ing marangle nung nuta meragul;
Agyang mumuran man, mangildap, manuldul
Aplit tang mamaswe o kaya sasarul;
Potang miras na ing aldo pamamupul,
Nanu tang galal ning pagal tang milangkul---?
Uling mamayad tang utang a maragul
Ala tamung dake king kekatang pupul!

Subukan muna mung lumual mamasada
Trycycle man O Jeep. O kaya kalesa;
Kabud kauli mu daptan mung mumuna
Ding penakitan mo ipalad mu nala;
Ding mal tang pengari dapat naman sana
Ibie do ding dake anting para-gana;
Pablasang utang pin ing sisingilan da
Ding penakitan mu muli ngan karela.

Nanutang milyari karing kuyug tamu
A meki-pagobra king aliwang yatu?
O' bat kauli ra keni kekatamu
Mibalik la naman kening bie kalulu?
E wari pane lang magpadalang sueldu?
Dapat mung atin lang atipun king Bangku!
Eta no pangutang----karing matua tamu
Bayad lang utang den---beit daka tamu.

Oini ing masakit ding anggang masakit
Ing bague makanian eta mu abangguit;
Balu kung kanining kanakung piglabit
Nung abalu ra yan mangaplas ku buldit!
Subali keng barug biasa lang manyukit
King depat dang mayap pelalung kapurit;
Pangalutkutan da at piatsit-atsit
Ban king utang tang lub eta mu mipikit.

Uling maka-lisang ing karelang gawa
Pamayapan tanang magtamad tana pa!
O ninu naman mo ing ali sumawa
Obra nakang obra---eka minanawa!
Nanung kabaldugan ning mipawas daya
Nung ala kang layang mukiat at mipala!
Nung e miyalilan ugaling sapala
King saug ning dusa ken tana myambula.

Ban king kakaluluan eta magbaluktut
Yang pamag-pautang sukat neng maputut;
At alilan tayang lugud a e maimut
E manayang ablas ing mayap a imbut;
At potang ing lugud yana ing magyamut
Ing pamanalipan kanian ne mabagut;
Iting kaugalian nung ene sisibut
Ing dugang ning dusa tuknang yang dudurut.

Nung pilan lang bingut ding agyu tang sesen
Ilang dapat lunto king kekatang Belen;
Paragulan tala, ingatan, at banten
Ban keta lunto lang mayap a memalen;
Ing paintungulan da sukat tayang baslen
Nanu mang malyari eta la paburen;
Datang ing panaun ding anak tamung den
Ila ding pag-asa ning kekatang balen.

O' dale kakuyug, bisa nakung mamun
Angga keng tutuking pamitipun-tipun;
Ing lalakuan ku mung anting peka-liksyun
Dinan lang kalayan bayung henerasyun;
Nung deni dagul lang mitmung inspirasyun;
Akua nang magwagui ning mayap a layun;
At kanian ya pamu mituklip---milulun
Ing galut nang dase ning dusa't pagmalun.

ING KANAKUNG BATWIN
Neng: Renato B. Alzadon

Dinalit kung kanta king kayaktanganan
Dimdam ne ning Batwin kung panaguimpanan;
Migpatagusgus ya king keyang tatalnan---
Sinulad a sutlang pipaglambitinan.

Kabang magbaba ya eku bisang kurap
Eku patdan mata gugulis nang kislap
Pigaganakan kung, kalupa ning undap,
Kabud ne mu mapda, king misan a kisap!

Kabang titipa yang atmu kasalusu
Magbabo ing tula king ubud ning pusu;
Lidlad kong palad ku layun menigapu
Manyawad upayang akung makasapu.

Dapot, kalmang siwal, karin ya memaltuk
Ketang tungatung na ning matas a bunduk;
Kambe ning lipatung mamaping lulutuk
Ya ing lulun-lulun a maputlang-asuk!

Uyab na ning sintang king pusu misinsin
Minta ku king bunduk ban ukyatan ke pin;
Bakeng pagdulapan nung nuya man karin
King matas a bunduk ing tinipang batwin.

Kanian ku no yatyat ding kanakung gamat
At pigmulan ku ne itang pamanukyat;
Ing kakung katawan kinatmu yang sugat
Dapot sindu ku rin ing pamangalawat!

E mekatipilan bigsu ku menabu
Pablasang nung misan ing dulum milalu;
Itang Indung Bulan a kaku susulu
Agagawa napang kanaku magtampu.

Aldo malabab ne dane ning Alaya
Tungatung ning bunduk iniang dasnan ku ya;
Agad penintun ke a nung nukarin ya
Ing maslag nang batwin ning kakung ligaya.

Ketang kalibudtan ning alkus pabilug---
Tela-batyang kulkul O malating saug;
Ketang lugal aita karin ya mebaldug
Ing paninapan kung batwin ning panirug.

King malating saug tambing keng tiglusan
Ing menabung batwin ning banuang katasan;
Karing aduang palad malale sepupwan
Layun maratna keng pekalawan-lawan.

Oini ing Batwin kong sakdal king luningning
A mekipatlalu king leguan at santing;
Ngening atagpwan ke ni ala yang ningming
Karing kakung palad--- abu yang matuling!

Oita ing batwin ning taguimpan ku't tula
King tyup na ning angin linimpad, mewala
Makanian ya pala ing ningning at sala
Matuling yang abung muli mu king ala!

KING MUSA NING TAGIMPAN KU
Neng Renato B. Alzadon

Kaministilan kang ayan, O Musa ning taguimpan ku
Kaministilan kung sabian ika pin ing palsintan ku;
Nung ika ing kakung sinta, ninu naman palsintan mu?
Nung ing pusu ku kekaya, kenu neman ing pusu mu ?

Nung emu man mosa tula sintang daraun ku keka
Nung sikwil mu mang mistula poesia kung yampang keka;
Palsintan da ka pa mu rin, ing lugud ku alang angga
Palsintan ku ika mu rin keti sulip angga banua.

Karing kakung poesia ,ikang kakung ampanganan
Karing daralit kung kanta, ikang kakung parikilan;
Balang jardin kung sambitlan, ikang Rosa king mulajan
Balang banua kung bangguitan, ikang batwin king katasan.

Pagumasdan me yang aldo neng saslag ya king alaya
Pagumasdan me yang dagat neng uman ne ing aplaya;
Malabab a sinag aldo ing kanakung pamalsinta
Malalam a dayatmalat ing kanakung lugud keka.

E me asagka yang batis king pamunta na king ilug
E me abawal yang ilug king dagat bisa yang talbug;
E me asagka ing aklis kening salu kung kakarug
E me abawal ing kutug kening pusung mapanirug.

Kening bie ku ikang Alpa, mula ka king pamigunam
kening bie ku Omega ka , sepu ning bie mipagkalam.
Nung mate ku atyu keka, ikang diwa ku't panamdam
Nung mie ku uli mu sinta, ikang bie ning bie kung dinam.

(Ing poesya asonansya yang malikmatang kawatasan)
Copyrighted 05

(2005-Poesia Rima-Perpecta)

NANU YA ING SINTA
Renato B. Alzadon

Nanu ya ing sinta ? Utus ne ning Guinu,
Utus yang misulat king pusu ning tau;
Utus yang misulat, ubud ning pusu ku
Ban palsintan daka, kaba na ning bie ku.

Nung e ra ka sinta, akung miparusan
Nung isakwil daka, kanakung pagdusan
Nung isakwil daka, mausta kung salang
King kaustusan na ning kaku miglalang.

Nung salangsangan ku ing kautusan na
Nung e ku mamintu king sintang utus na;
Nung eku mamintu ing tula mapda ya
Magpaldas ing bie kung lubas king ligaya.

Nung atin kung tula, ikang kaku minie
Ikang ing ligaya a kaku na binie;
Ikang kasuglung na ning kaladuang mabie
Kabislak ning pusung kasuglung na ning bie.

Nanutang sibul ning mayubung pamyutus?
Nanutang batis na ning sintang matutus?
Ya ing pamanupad king banal a utus.
Pablasang Sinta ya ing mismung minutus

Salamat kapilas ning kakung kaladua
Salamat karening makule tang banua;
Yang pamanang usuk karening supling ta
Dapat yang tuparan---UTUS YA ING SINTA!

(September, 29, 2005/ Happy Anniversary, Honey)

SUMPA NING POETA
Neng Renato B. Alzadon

Ing Poeta Pakdu makukulami ne
Ining susulat na, ene asalese;
Dakal no ding benging dili nang maglame
Dapot ing diwa na e bisang mantabe!

Bayang datang diwa, Ing Poeta Pakdu
Ya ing aisip na ing munta king pulu,
King Pulung-kulayu nasa neng ibubu
Ing pang-laureadung "Poesiang Guintu".

Oita pin, kabuklat ning mayap a abak
Memun ne Y Pakdu king mutyang kabislak
Penapik no pago ding lima nang anak
Kaibat, tintunan ne gasgas a e gasak.

King kayang panlako bukud darala na
Mapilan a papil at ing paniulat na;
Inyang dasnan na ne ing pulung sarya na
Aldo kukuldas ne ketang tungatung na.

Lalam nang lilung ning lubas king bungang Dwat
Karin ya linukluk ining talasulat;
Kanian ne ilague ing kayang paniulat
Ing Obra-Maestra bananeng isulat.

Sumulat ne sana ,dapot minambangan
Ing danup at kau ning kayang katawan;
Bisa ya mang minum ala yang inuman
Bisa yang sumubu ala yang pamangan.

King ulining puyat, pagal, danup, kau
Bigla yang melata kabud nia malilyu;
Kalulung Poeta mipda ya animu!!!
Oita! Yang dili nang alang male tau!!!

King panga-ungle na king tigang a sulip
Pantas yang tinikdo ing kayang pamisip;
King siwang ning tabing karin ne asilip
Ing atmu katimbang a pamipatilip!

King malating siwang ikit ne ing Matua
Painuman deng daya panyuglung king bie na;
Ketang peka-altar lalapit do kaya
Ding anak ding Watas a susugatan da.

Mipatingangas yang mengablad, mesindak!
Ila ding ikit na detang kayang anak
Magsakripisyu la--- daya da papatak
King panat nang labi ning Matuang makapiak!

At kayagnan na ning aklis da at daing
Ding anak-poetang king danup gigiling!
Linub ya Y Pakdu king siwang ning tabing
At selubungan deng maplas tampaling.

Iniang lawan no ding menampaling kaya
Ila ding atinan, pamuntuk, at biasa ;
"Buri kulang akit ding anak ku", ngana
Segakgakan de mung anting mamulang na.

Pituya-tuya de at pitulak-tulak
Kambe ning sunu ra at matning sagakgak
"Oyan ing Poeta", ngara pang maglibak,
"King kai-isip na, mesira ya utak".

"King pangamulang nang susulat poesia
Ilang magkasakit ding kayang pamilya;
Kukunan no daya ding mismung anak na
King baneng dinan bie ing amanung mana".

"Bat e mipakanian? Lon ye pamanyaptan
Kesa king sarul ya susulat ne naman;
Inia ding anak na linto lang danupan
Dungis-dungisan lang mete paintungulan".

Ding amanung deta ilang mekapakde
King bigung Poetang king gabun mirate;
ken na apialas ing mapusio nang bie
Magdilidili ya king benging malumbe.

Mistula ya waring mamulang nang tutu
Alang kasausig king dulum ning pulu;
Ding kawatasan nang king kaniglan bibu
Ala lang ulaga, sisibi da la mu!

King katajimikan na ning benging ita
Meramdam ya itang Sumpa Ning Poeta
"Nung Payaso ku mu king balen kung sinta
Bitasang enaku sumulat poesia".

"Karing pamilya ku ibie ku ing tungkul
Ilang maguing paksa ning kakung pamyukul
Yang gawan kung papil ing gabun a ulyul
Yang gawan kung pluma ing sudsud ning sarul!"

Inyang pauli ne, 'guiang malaut ya pa
Abatyawan na ne ning kayang asawa
Agad selubung ne kinaul ya kaya
At layun neng kitang itang susulat na.

"Ayari me", ngana, "ing kekang susulat?"
"Oh, wa, ayari ke", ngana ning pakibat;
Saka ne inabut ing papil a pirat
Nung nu ne binalut ing pakling panyulat!

KIRIRRRING----
Neng Renato B. Alzadon

Kiririring!!! Hello...! Nino...? Rey Alzadon...? Aku pin ya.
Ninu ini? Ha! ha! ha! ha! Rosa Mia! Ika pala!
Ali raka abosesan---balaku aliwa ika---
Nuko! Dakal nala mu rin ding banuang e mikit kata!

Kelinguan dana ka ngamo, ay! kapamiru mu naman
Agyang nanu pang malyari ali raka akalinguan;
Ing mumunang sinta kanu agyang tumua kang menuban
Ya ing emu aiwaglit king diwa't kapanamdaman.

Komusta ing bie ku, ngamo? Lugud na ning Apung Guinu
Medyu masalese naman--- ena masyadung kalulu;
Mekapag-aral kung bagya at mitas kung bagya sueldu---
Neng makasobra kung ditak, padala ku kekatamu.

O' Ika komusta naka,ampon komusta ya naman
Itang pepakilala mu ken king New York, iniang misan...?
Nano.....??? Diborsyada naka? Rosa Mia, bakit naman?
Balaku sang atagpuan me ing kekang penaguimpanan.

Aha. Aha. Ustu ka pin. Makanian pin. Wa. Ustu ka.
Tutu yan. Kalokuan na ne, pepatangis na ka pala;
Sayang na pin ne, wa, sayang ! Dapat sana pin ikata
Ing miaptasan a pusu, O' kaligaya ta sana.

Emu na ku man asisian uling ibat pa king ibat
Balu mu namang king ika ing apalsintan kung tapat;
Dapot ing kapalaran ta talagang e milalapat
Uling aliwa pin aku ing taguimpan mung katapat.

Buri mu king mikit kata? O' wa, kapilan? Nukarin?
Bina kung kasasabikan ing makapikit kata pin.
Nano...? keng Sabado, ngamo, alas sinku. Chinese Cuisine!
King Baltimore Inner Harbor...? Restaurant na ning Ongpin...?

Kapamu na. Emo kaya masanting nung keni bale...?
Bamu no man akilala dening kakung katubale!!!
Kuma kang papil at lapis, ing lugal ku isulat me.
Eka mikakunung maus ---ing numeru ku balu me.

Wha! wha! wha! wha! Pasensya ka. Ining bungsu, gagaga ya!
Akung maningat kanini, Y ima na mamimipi ya!
Ala keng kasaup keni. Inia ing pamagpamilia
Babalikatan mi rugu--- ikeng aduang miyasawa!

Oreni pin ding bunga na ning pamiusigan ming Jen
Adua na la dening linto mangalikut ming sisesen-----
Hello.....! Hello.....! Beep..! Beep...! Beep! Beep! Hello...! Hello...! Ati ka ken...?
(If you want to make a phone call, please hang-up and dial again).

ING PARUL A PUSU
Neng: Renato B. Alzadon

Papasku nanaman......!
King tulid nang eran nitang bale gipu,
Ati ne na naman
Makasabit karin ing Parul a Pusu;
Kasuyung melakwan
Panyatang ning silim, sisindyan ne sulu
Tanda ning panayan
Na ing pamagbalik ning mutyang dinayu...
Sasakali man,
Kabud ne mu datang ketang ena balu,
King balitang eran,
Ding banyagang bitis, ela mitalabu!

Papasku kanita,
King kapagnasan dang kumit bie manawa
Meko yang irug na
Tinggap ne ing obra king aliwang kuta;
Pamisulatan da
kabang bayu-bayu madalas, madiwa
O' kelambatan na
Ing datang ding sulat, malagad, bihira
Angga king alana.......
Bitasang alanang miras a balita,
Ene mekibat pa
karing kayang sulat ing dinayung mutya.

Papasku pa naman.....
Dinatang ing bagyu, kabud-abud na mu
Angin yang masikan
Ing mamius manugun ketang bale gipu;
Kalulung melakwan
Darala na mekad ning dusang milalu
Mibagyuan ya naman
Kabud nya mipase...masaspak ya salu.
Ala yang keliwan
king megising parul ing pirat nang pusu......
Ala yang keliwan
King mipdang inawa itang mipdang sulu.

Nung nukarin ya man
King disyertung asul ing dinayung mutya
Agyang saglit muman
Ing likuan nang pugad aganaka ne sa;
O' nung sakali man
Ing sadyang tuknangan datang ya king diwa
Aisip na mu man
Panaun ding Parul...panaun ning saya;
O' tulid ning eran......
Ing Parul a Pusu eya pa mibaba
Yang palatandanan
King pirat nang pusu ning kaladuang mipda!

To go to the next page: http://maxpages.com/poecia/poecia21
To go to the previous page: http://maxpages.com/poecia/poecia19

Sign Guestbook

View Guestbook

The Classic Kapampangan Dictionary can now be odered online

for $21.95 per copy plus postage and handling

Help promote the Kapampangan language

ernieturla@yahoo.com

Visitors: 00323

Page Updated Sun Dec 25, 2005 10:46pm EST