TABLE OF CONTENTS:
1. Ing Benggansa Ning Poeta - Renato B. Alzadon
2. Kapampangan Dugong Aso - Tony Galang
3. Dayang Asu - Renato B. Alzadon
4. Dayang Kapampangan - Rafael Maniago
5. Sagakgak Ning Akdak - Tony M. Pena
6. Ing Sampaguita - Rafael Maniago
7. Pamakikalu - Renato B. Alzadon
8. Ing Rima Ra Ring "A", "I" at "U" - Ernie C. Turla
9. Sisilim - Renato B. Alzadon
10.Katawan - Monette Mallari
ING VENDETA NING POETA
Neng Renato B. Alzadon
Kaluguran kung Poeta , akuman, paniwalan mu
Enaku sana bisa pang mamikudtang pasibayu;
Dapot kening akakit kung kapagpabustan ning tau
King tungkul nang ingatan ne ing mulajan na ning Guinu;
Kening kalapastanganan king kapaligiran tamu---
King Indung Naturalesang palsintan mu---palsintan ku;
Telanan ke ining lira! O Poeta ning balen ku,
Talanan me sa ing keka, ban ing api maglipatu!
Palsintan teng madalise ing Indung Naturalesa
Pablasang yang babie tindag king diwa na ning Poeta;
Itang angin a saguiwang inawa ning Paralaya
Ing lagusgus da ding batis, ing banglu ra ding sampaga;
Ing tumaila ra ding ayup a maniale karing sanga
Ding tungatung da ding bunduk at mawalak a sabana;
Poeta, palsintan ta yan---at ya ngening sisiran da!
Dapat mung igale tala ding mamaping poesia.
Sasabian ding kayanakan, ena kanu usu ngeni
Ing pamigale poesia linuma ning Karaoki;
Inia naman ngeni oyan, ding bague kawili-wili
A palsintan ning Poeta matatda king yatung iti;
Nukarin la ding batisan a pagsarian tang parati
Nung nu tala panintunan detang Nimpang masasabi?
Bakit ding malino batis memala la at kinati---?
Kalupa na ning Poesiang sikwil da ding bayung suli.
Nukarin ya, O Poeta, ing malilung a kapuluan
Nung nu ding myaliwang ayup Paraiso deng pagkarinan?
kabang talu mamag-koplas king babo ra ding tanaman
Babagayan tang poesia ing malambis dang kundiman;
Ngeni, lon mu, kinutud do detang dutung king mulajan
Tinabi da la ding ayup a lesakan da tuknangan;
Ing gabun a melitungtung memanabtak king kapalian
At king katulid nang banua manyawad yang katalaruan.
Pagmasdan me, O Poeta, ing mawalak a marangle
Kanita, ustung papalut, magmalaguintu ya kule;
Inia ding kawatasan ta magyuyu lang magpatawe
Kambe ra ding maka-tawit a tinalague ning pale;
Dapot ngeni, ing palayan, mamayuspus king katamle
Liliwan na itang danum, kukusad pakakalale;
Makanano, itang sibul, kalalaman dinulung ne
Uling meko ing salilung ding dutung a mengamate.
Pagmasdan me, O Poeta, ing pipandiluan a ilug
King tela-bubug nang danum masaya tang mipaniabug;
Inia ding kawatasan ta tikmus la pangalindayug
Karing alun a makialung karing bulang lunto- lumbug;
Dapot ngeni ninung bisang magtampiso ken at talbug
King danum nang makilarung menuling na king kalabug;
Ding susu, bya, asan, paro, mimin lang mete at limbug
Mengamate la king lasun a sasarian dang tutugtug.
Pagmasdan me ,O Poeta, ing baryu tang Aranguren
Pagmaragul te kanita anting kapisi ning Eden;
Itang pasu ding kabayung pamasada da king balen
Maki agpang king sukad na ning poesia tang babaslen;
Ing makanian a musikang paninapan nang Bethooven
Inakmul ning alingongo ra ding babasuk a saken;
Ing asuk at alingongo nung era agyung salesen
Sakit katawan at isip ing ausan dang datang ken.
Nukarin ya, O Poeta, itang angin na ning napun,
Itang angin a saguiwa neng mamunag a mamambun?
Atme niaman sasangapan neng lalague tang maranun
Pigale-gale taya pa king pastulan lele Tabun;
Ngeni itang angin aita, sumawa tanang manintun
Ene subli pang magbalik ban kekatamu magdatun;
At pablasang linasun ne ning panyulung ning panaun
Inia balang sangap tamu, sasangapan tamu lasun.
Nukarin ya, O Poeta, ing makabigjaning jardin
Neng manintun katang diwa karin kata mag-imain?
Nung nukarin la ding Rosas a palsintan da ding batwin
Katulan nong pakialungan ning malimadmad a angin,
Nukarin la detang Rosal, ding Gumamela, ding Jasmin,
Ding bonggabilyang malare karing balag bitin-bitin?
Ing leguan mitambunan ya, basura ing atyu karin,
Guewa ra nia mung ugsianan karing marinat dang lampin.
Pagmasdan me, O Poeta , itang bunduk king malaut
Ken to inapsi ding amlat para karing bayung sibut;
Ken to tikmus ding Mamana, ding usa at babing dikut
Ding Sudya at Encantada at Diwatang libut-libut;
Detang dutung nang matatag digsa dala at pemutut
King ditak a patalusad titipa dong pasalikut;
Ing gagawan dang makanian nung e tuknang at maputut
Magpaldas ya ing balayan king trajediang makatakut.
E makalingad, Poeta, king yang Bunduk ya ing tabing
A pader nang peka-sagka ning danuman a matabsing;
Nung matibag ya ing bunduk malaso ya ing Pun Patling
Lumbug ya ing Syudad Tarlak at ding baryung makasiping;
At kanita ne maramdam ing gulilsak a tatabling
Ing Sambitan at ing siguk, tagulele at saingsing!
Ing makipasari kanian ing dapat dang e masanting
Ding taung butang pamisip a maki pusung matuling.
Inia mekeni , Poeta, ding dalit tang maki-bagsik
Ila namang ilague ta balang maramdam laguitik;
Ing Poeta tin yang bersung mataram at maki-lisik
Anting kildap neng kaleldo, mitataung manalamsik;
Karening Pusung Matuling matindi teng ipandikdik
Ing Vendeta ning Poetang inamun dang pemalantik;
Ngening ing kekatang lira yang papaten da salpitik
Para king Naturalesa, dapat katang magjimagsik!
KAPAMPANGAN DUGONG ASO
nang Tony Galang
Belita nang Roy Bautista, nga na keng beynti ya'ing Hulyo
Pyesta da ring Kapampangan king Patron na ning San Diego,
Nung malyari sana Tony, misadya kang poesya mu
Ing kitang ku, nanung tema? Ikang bala, nga na kako.
Basta nga na, ing balu ku - Pyesta da ring Kapampangan
Metung yang bali reunion, balang banwa pagmasusyan
Balang katlung Domingo na ning bulan a salukuyan
Ing masayang pamitipun kekami yang gagampanan.
Ing aisip kung ikwentu king istorya ning Pampanga
Kapampangan "Dugong Aso" yang masanting gawan tema
Kaniting pamag-research ku, bilang metung a poeta
Bayu yuku sa usgahan, makiramdam ko pa sana.
Keng kakung pamanyaliksik, adwa la reng akutnan ku,
Nung bakit ding Kapampangan inaus dong "dugong asu"
Ngeni kaku yang ihayag itang kaku ra kukwentu
At ya ing paksang pisabyan king masayang pyesta tamu.
Ing mumunang kesabi ku balita yang matenakan
Propesor ya karin U.P., at kaku kayang mengutang:
Nanung sangkan Dr. Flores, 'bat ikaming Kapampangan
'Naus dakeng Dugong Aso, king bandang katagalugan?
Aba, nga na ning propesor ketang salitang banayad
Keng masanting a kitang mu, oyni ing kakung pakibat:
Nga na, agpang kang Apu ku, Pampanga pampang yang dagat
Inya ding barku ring daywan muna lang karin sasadsad.
At king malagwa't salita detang daiwan a lalaki
Manikwa lang asawa ra karing nunu yung babai
Uli niti katatawlyan - ing linto king kekong lahi
Samut-samut, salat-salat ....Dugong Asu ing teguri.
King panakbang na ning aldo mibabayu ing panaun
Meragul yang kekong lipi....lahi yu biglang sinulung
Mimulat la reng memalen king makaba yung tradisyun
Makanyan lang Kapampangan king istorya na ning napun.
At dinatang ing panaun sinikat lang Kapampangan
Meyakit karin Menila manibat pa ketang "peace time"
Ing legwan ampong sintingan at manyaman a pamangan
Pati sikat diling sastri, Kapampangan lang "number one"
At e wari ketang Hunyo, Beauty Pageant California
King milyaring beauty contest sinambut ya ing Pampanga
Nanu pata sikat kayu angga keti America
Inggit la mu reng Tagalug uling sikat kong talaga.
Ibalaus ke ing kwentu kening kadwa kung pikutnan
Aliwa ne man ing kaku, nga na kakung Mr. Galang
"Dugong aso" tungkul ya'iti keng bage kabayanihan
Papuri ya, e patuya - ing tune nang kabaldugan
Dapot dinatang ing aldo menyora la reng tagalug
Kapampangan, dugong aso, a masakit keng balugbug
Keka ngeni magkwentu ku ban e ka sumukal a lub
Balikan ta ing simula masampat yung pamikuyug
King panaun ding Kastila karin kata magumpisa
Kanitang ing Pilipinas asakup ne ning Espanya
Ing amanung "dugong aso", metakmus itang amlat na
Tungkul keng pamisan-metung...meyakit king pamagobra
Ketang magumpisa na lang magpairal a gubyernu
Ing gubernador-heneral pepahayag yang abisu
Mabilug a Pilipinas pepabal da karing tau
King karing balang probinsya mika ating kapitolyu.
Ing tinanggap king abisu king Pampanga, ing kabesa
Kabud abasa ne'ing sulat agad na nang mengumbira
Detang anggang kayang sakup alang sweldu megobra la
At kalabas ning pabulan -- meyari ya'ing inobran da.
At king malagwa't salita, mepuri lang Kapampangan
Ayari re ing gatdula agyang pinaud ya't kwayan
E mu nanu ing tula na ning gubernador heneral
At inalimbawa nalang "Dugong Asong" memalayan.
Nga na, kakung aumasdan, karing tauwan king palasyu
Kabud kinaung ya'ing metung, pasikaung no ngang pi-u
Makanyan kong mibansagang Kapampangan "dugong aso"
A e dapat pikarine kareng sablang Pilipino!
DAYANG ASU
Neng: Renato B. Alzadon
Nung ngara ing kapampangan ausan deng dayang asu
kaung ya ampon manginis patye atin manabusu;
O bat ngening abusuan de ing palsintan nang amanu
Kabud ne mu e bubulad e lalaban agyang nanu.
Nung ngara ing kapampangan matapang yang anting tigri
Paglualu ne ing pulu na agyang nanu ing malyari.
Bat ngening ing amanu na yang lalto madadakati
E na palto ing tapang na at lugud nang alang anti.
Nung ngara ing kapampangan lumaban yang e gumulut
Ken man Leon man O tigre eya mo kanu tatakut;
Bat ngening ing amanu na akakit neng masasambut
Ene mangapampangan man king English ya sasalikut.
Aku pu karas keng daya, ali ku pu dayang asu
Atin kung dayang Kastila, Insik, ampon Ilukanu;
Dapot uling Kapampangan ya ing sisuan kung amanu
Kaungan kong alang tuknang ding lulub a manabusu.
Aku pu kapampangan ku, ing taguri ena bala
Maski na daya pang asu, dayang kambing, dayang pusa;
Ing pangakapampangan ku e king daya, ken yang gawa
Paglualu keng anggang binit kapampangan kung salita.
"DAYANG KAPAMPANGAN"
neng: Rafael Maniago
Malwat ku neng daramdaman dayang asung Kapampangan.
Eke masyadung sikasu, eke buring pakibalwan;
Mas buri ke pang abalu ing patutung Kapampangan,
Ing daya na ping mamagus, king uyat na ing tepangan.
Ing daya ning Kapampangan mayayakit king masala.
E paylupig e paysakup Karing Bansang manyalanta;
E ya kabud tataimik e ya kabud sasalita,
Nune papakit na'ing tapang, king dalan ya sasagupa.
Sasaganan no reng tangki, agya mang susyuk a balas!
King marangle ning labanan, at sasyo yang gugulisak!
Paglaban na'ing matulid na, emalyaring padamusak!
Buri na pang kasayan na ing daya nang misasalwak!
Dayang asu ing taguri agyang kaku e kailangan.
Ing kailangan ning pusu ku dayang tune Kapampangan;
Kapampangan king amanu, Kapampangan man king belwan,
Kapampangan ing lai ku, angga man king katatawlian!
SAGAKGAK NING AKDAK
Neng Tony Mercado Peña
malalam ya saksak ing bulus ning tandus
akdak ya king gulut taglus ya king dungus
kate ning wawa da pisuglung mung bagkus
king kuskus balungus e tana mibugkus!
amanung belugse king kekang kapatad
akdak ya king gulut mamatad yang pusad
atdu yang mapait e ne agyung yakmul
libung basung danum e makwa keng mulmul!
mwa mung selikut ot e mepa ikutkut
ban keta ing pulut e na mikalumut
mayumung pamyabe umpisa king yamut
e tane pakluran, ala nang magbugnut!
e taya aplusan ing balbas nang Judas
basbas lugud kaya meging balasubas
pekilibe pilak ing gewa nang ablas
sagakgak ning akdak sobra ya king kaplas!
tara nang mirungut king arap ning papag
pagdamutan tamu nanu man ing apag
ditak mu ing anda, maski alang banda
tiltilan ing lugud, ibye alang angga!
mekeni na abe, e naka maglumbe
ing buklud ning baklad pakyapusan tane
nung atin yang siwang keka tayang sulsyan
ban keta ding asan makatipun la ngan.
" ING SAMPAGUITA "
neng Rafael Maniago
Sampaga yang sidsad puti, bulaklak ning Sampaguita.
Pakiwari king dalagang Kapampangan ing legwa' na;
Busilak ya king aske na, manibat pa king buku ya,
Buri deng kukwintasan, detang maselang panlasa.
Ketang ardin lele bakud, sampyad-sampyara' ning angin,
Teterak yang Sampaguita, maka-ugne yang kekending;
Salingalngal na kanita ing banglu na misnang lambing,
Ninu mong e mabig-ani king samyu na at luningning.
Ating kung siping bale, ing dalaga ning baryu mi.
Sampaguita ing lagyu na at karin ya manatili;
Neng maranun sasaklu ya, ketang talaga parati,
Susuywan de ring bayntau, misasaglulu la reti.
Inyang misan linabas ya, kabang magdapug kung are,
Magdala yang kasaklulung makasinaklit a pale;
Itang bwak nang sidsad tuling, king pago na luge-luge,
Maging kwadru ning lupa na, misnang kaslag atmung
bage.
Buri ke mo sanang atwan, uling pesuglapa' naku,
Kambe mata nang mapundat, yaku namang mikakunu;
Oba't neng karap ke I Guitang, kukuyad ya ing dila ku,
Anya potang kagulut na, ing sisi ku emu nanu.
Migplaniu ku yakung dili, king tutuki nung malyari,
Nung ibie ne ning kundisyun, kailangan keng akasabi;
Kabud basta karap ku ne, atwan ku neng alan ali,
Sabyan kumo, "Komusta ka? Lalu kang melagu ngeni!"
Oyni makasadya naku ketang lele ning talaga,
Semasnan keng kakung kwelyu, saka ku menyanging bagya;
Balu ku ing penandit, neng sasaklu ya ing dalaga,
Mimorya ke'ing panatu ku, salitang pamuklat kea.
Anya inyang saganan ke, kabang palapit kung bina,
Bigla ku namung asabi, e komusta, "Mustasa ka?,
Lalu kang melaga ngeni!" Ngana kaku yang minatba,
"Kalupa ku waring gule" Ay dugo maybug kung matda.
Ing milyari kakung a'ini, alang ninung makibalu,
Mayna ku keng pamaglolo, makarine-rine rugu;
Bagkus potang yakung dili, kabyasnan kung mangamanu,
Anti ku mong poetista, king pikudta ampong bersu.
PAMAKIKALU
Neng Renato B. Alzadon
October 25, 2005
Nung keng pamaglarin bale, lalu't digsa ne ning bagyu
O adalanan ne kaya ning alisus a perwisyu;
Agyang era kata ausan saupan taya ing kabaryu
Ing mumunang tang kukutang : Abe, nanung asaup ku.
Makanian mu naman sana king mibagyuan tang amanu
Ngening panikuanan tayang italakad pasibayu;
Agyang era kata ausan ibie ta ing tungkul tamu
Makyabe tang makikalu karing makisugung tau.
Miyaliwa tamu beluan at instrumentung darala
Ating magaling keng yeru, ating magaling keng tabla;
Ating biasa keng sementu, ating biasa keng pintura
Ampon ating masibukan keng tubo at elektrika.
Antimuring king amanu, nung makisugu ta sana
Magdala tang kasangkapan a gamat tamung talaga;
Uling ing pamiyampangan potang mitipun-tipun na
Yang mang amanung mipase, talakad yang alang sala.
Ustung makisugu tamu atmu saya ing tambayan
Uling metung yamung planu ing kekatamung tutukian;
Ing peka-malating bague a kekatamung gagawan
Makatungkul ya king bale a kekatang lalarinan;
Makanian mu naman sana karing maldang kayaduangan
Balang tungkul a yampang da para king amanung sisuan;
Nung balang patak ning pawas alang masayang ditak man
Magbangun yang pasibayu ing amanung kapampangan.
At potang ayari tane ing bale linarin tamu
Atin tamung kaugalian antimong para kuswelu,
Ding lagyu ra ding sinaup misulat la king sementu
Ban keta abasa dala ding apu ding apu tamu;
Makanian mu naman sana king istoria ning bie tamu
Karing taung mekisugu atyu ya ing lagyu tamu,
Ban kanita asabi ra ding kaapu-apuan tamu
Sinaup tamung mitikdo king makaragsang amanu.
Itang pamikalukalu karas keng mayap a layun
Tatak ne ning kapampangan, panugali yang manayun;
Inya makalapit taman o menaliwa nang gabun
Eta ya dapat kalinguan ing ugali tamu napun;
Ngening ing amanu tamu yang digsa na ning panaun,
Makisugu tang misan pa, para king Indung magmalun,
Uling nung apusan tala ding pakatungangang mirun
Ing Amanung Kapampangan, kapilan man, e magbangun.
ING RIMA RA RENG "A", "I" At "U"
by Ernie C. Turla
Nga nang Mang Vedasto
Poetang laureado
Agyang byasa na ka
Mitalabu ka pa.
Masakit lang tugma
Letrang "u", "i" at "a"
Nung anyapin nga na
Paka-check tala sa.
Ing "gawa"
At "diwa",
"Akakwa",
"Masagwa",
"At adwa"
"Alimbawa"
Karima re ing ""mwa",
"Kwa",
"Lwa",
"Swa",
"Wawa",
"Babagwa",
"Taldawa",
At "aliwa".
Pero ing amanung "wa",
"Kaladwa",
"Banwa",
"Kawa",
"Manawa" (get contaminated with),
"Asawa",
"Inawa",
At "matwa",
Agyang ing tawli ra
Kapareu rala
E la miririma,
Nung damdaman yula.
Amanung "manaya"
Amanung "masaya"
E la miririma
Lawen yo man kaya.
Para keng mumuna
Deng kayang karima
"Pamilya"
"Poesya"
"Alkasya"
At "twalya";
"Koya"
"Pinya"
"Baya" (ember)
"Saya" (long skirt)
"Laya"
"Aya".
Deng namang keng kadwa
Tonu ra aliwa:
"Kupya",
"Daya",
"Taya", (bet, wager)
"Apalya",
"Bya",
At "tilapya".
Ing "kanta"'
At "tolda"
Deti mabsilbi la
Makanyan mu naman
At pakatandanan
Ding e ra kayarle
Keng tonu at aske:
Anti mo ing "pana"
"Talangka",
At "taba".
Ririma keng "ali"
Tandanan yo reni:
"Wali"
"Mipakayli",
"E bali",
"Malyari",
"Berdi",
"Sabi",
"Pipi"",
'Mataloti",
"Mewili",
"Lalaki",
"Babai",
"Palengki",
"Mangalugi",
"Bibi"
At "alwagi",
At deng "maka-tuki"
Lon yula king "iki":
"Malati",
"Maputi",
"Mapali",
"Kawali",
"Sawali",
"Mapakli"
"Susi"
"Kayli",
"Itali",
"Sali",
"Babi",
"Kamansi"
"Labi",
At "Itabi".
Ngeni ing "u" naman
A dapat tang sanayan
Samasan kong pitnan
Ba yong abalu ngan.
Karima ning "abu":
"Anta lu",
"Reng opu",
"Saku",
"Nanu",
"Tau", (person)
"Bau",
"Mau",
"Susu", (breast)
"Pabu",
"Buru",
"Pasku",
"Galgau",
"Mapinu",
"Amu",
"Bubu",
"Santu",
"Amanu",
"Nomiru",
Ilang "migugrupu",
Ilang myabe "kanu".
Dapot deni naman
Kawani ta no man:
"Mitabnu",
"Manabu",
"Matinu",
"Tabalu",
"Pau",
"Tau", (feast)
"Apu",
"Paku",
"Kuku",
"Tubu",
"Ilaku",
"Damuku",
"Susu", (snail)
"Tuku",
"Sugu",
"Duku",
"Laru",
"Sulu",
"Pasu",
"Lasu",
"Tangu",
"Tuldu",
"Turu",
"Tutu",
"Punsu",
At "pusu", (heart)
Rima-rima la "pu".
SISILIM
Neng: Renato B. Alzadon
Baltimore, Maryland 1978
O' bat atin pang sisilim...? Bat ing aldo lalbug ya pa...?
Bat ena mu pane abak
Ban ing aldo ene magpiak;
At ing sala alan'angga!
Lon me ing kalulung bie ku king kaugtuan kulimlim ya!
At detang yata nang pilak
Ning taguimpan kung busilak
Pakakalale dirimla.
Ing silim nung daratang man neng ati ku mangulila
Bakung atin pakisabian
Kabang kakung sasaluran
Ining lua nang pekadaya ning sugatan kung kaladua.
O' sisilim! O' sisilim! Nanu kata kabaldugan?
Metung kang paldas a belung
Pangambil kening lupa kung
Tebugan ning sadyang leguan!
Samantalang ketang napun maka-atna ya ing kanuan
Alang dine! Alang kanglap!
Agyang kenu maki-arap
Uling ganap ya king leguan, dangalan at kabanalan.
Ngening magdili-dili ku
O' Sisilim, takpan mu ku
Kulubutan meng lupa ku king tagle mung delumduman!
Uling nung magsalamin ku
Tatakut ku! Tatakut ku!
Pitatakutan keng akit ining lupa kung dungisan...!
KATAWAN
Nang Monette Mallari 8/18/05
Masanting Katawan, lelangan ning Ginu
Kalupa itsura, gawa mikumpletu
Pengisnawanan ne, para midinan bye
Mekatalakad ya, mekapaglakad ne
Katawan masanting, panigaralan ya
Mumuna tang lawen, ing peka buntuk na
Karin akit mune, mayamu nang lupa
Manakit king labwad, ing mapunge mata
Darandam balita mangatning balugbug
Ipan maglagutuk malutung balitug
Dila yang manyaman tatakman pamangan
Kanwan karin utak tamu makasimpan
Kile makagulis antimong ping arku
Malutung labi yang mumuma kanaku
Ing matilus arung sampaga 'babau
Buwak iyang babye santing ampong lagu
Panga yang mandala porma naning lupa
Balbas deng lalake tutubu king baba
Nung tipa tang bagya dasnan tamu batal
Susunud kanita, pago lang makapal
Pang Mr. Universe brasu misumangid
Bau kili-kili neng kayi manyagid
Lalam da reng takde manyingkil a siku
Palad ating gulis swerti akit tamu
Malantik taliri mabilis mag-obra
Kukung ating kutex malinis itsura
Adwang gamat pyabe, palapak masikan
Adwang gamat pyabe, mangadi tanangan
Ngeni munta tamu libutad katawan
Akit tamung agad salung karagulan
Makatayid karin susung mangalusug
Atyan a mabusi pamangan mebaldug
Sumangid ning salu gulut gagamusan
Manibat king tundun papuntang papalwan
Galudgud makaba miras ya king buldit
Pilatan ding ita, malagad akakit
Ing tau keng kayang alkus a daralan
Lakwas na king salu at king pi-i-imyan
Akit ta ing pami-aliwa da reti
"Nya ating babai at ating lalaki.
Magpabalag tamu dasnan tala reng puwad
Intud gagamitan mangadi sisiklod
Taliri at kuku, akit tala linis
Sakung a titikad, bubwat ne ing bitis
Butit atin seksi ampo nang masikan
Talampakan buwat mabilug katawan
Ing Ginung miglalang gewa kanam aldo
Migpaynawang agad kin |